𑁫𑁪𑁦. 𑀲𑀼𑀯𑀡𑁆𑀡𑀲𑀸𑀫𑀚𑀸𑀢𑀓𑀁 (𑁩)

𑁨𑁯𑁬. ‘‘𑀓𑁄 𑀦𑀼 𑀫𑀁 𑀉𑀲𑀼𑀦𑀸 𑀯𑀺𑀚𑁆𑀛𑀺, 𑀧𑀫𑀢𑁆𑀢𑀁 𑀉𑀤𑀳𑀸𑀭𑀓𑀁 [𑀳𑀸𑀭𑀺𑀓𑀁 (𑀲𑁆𑀬𑀸.), 𑀳𑀸𑀭𑀺𑀬𑀁 (𑀓.)];

𑀔𑀢𑁆𑀢𑀺𑀬𑁄 𑀩𑁆𑀭𑀸𑀳𑁆𑀫𑀡𑁄 𑀯𑁂𑀲𑁆𑀲𑁄, 𑀓𑁄 𑀫𑀁 𑀯𑀺𑀤𑁆𑀥𑀸 𑀦𑀺𑀮𑀻𑀬𑀲𑀺.

𑁨𑁯𑁭. ‘‘𑀦 𑀫𑁂 𑀫𑀁𑀲𑀸𑀦𑀺 𑀔𑀚𑁆𑀚𑀸𑀦𑀺, 𑀘𑀫𑁆𑀫𑁂𑀦𑀢𑁆𑀣𑁄 𑀦 𑀯𑀺𑀚𑁆𑀚𑀢𑀺;

𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀯𑀺𑀤𑁆𑀥𑁂𑀬𑁆𑀬𑀁 𑀫𑀁 𑀅𑀫𑀜𑁆𑀜𑀣.

𑁨𑁯𑁮. ‘‘𑀓𑁄 𑀯𑀸 𑀢𑁆𑀯𑀁 𑀓𑀲𑁆𑀲 𑀯𑀸 𑀧𑀼𑀢𑁆𑀢𑁄, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬𑀁;

𑀧𑀼𑀝𑁆𑀞𑁄 𑀫𑁂 𑀲𑀫𑁆𑀫 𑀅𑀓𑁆𑀔𑀸𑀳𑀺, 𑀓𑀺𑀁 𑀫𑀁 𑀯𑀺𑀤𑁆𑀥𑀸 𑀦𑀺𑀮𑀻𑀬𑀲𑀺’’.

𑁨𑁯𑁯. ‘‘𑀭𑀸𑀚𑀸𑀳𑀫𑀲𑁆𑀫𑀺 𑀓𑀸𑀲𑀻𑀦𑀁, 𑀧𑀻𑀴𑀺𑀬𑀓𑁆𑀔𑁄𑀢𑀺 𑀫𑀁 𑀯𑀺𑀤𑀽;

𑀮𑁄𑀪𑀸 𑀭𑀝𑁆𑀞𑀁 𑀧𑀳𑀺𑀢𑁆𑀯𑀸𑀦, 𑀫𑀺𑀕𑀫𑁂𑀲𑀁 𑀘𑀭𑀸𑀫𑀳𑀁.

𑁩𑁦𑁦. ‘‘𑀇𑀲𑁆𑀲𑀢𑁆𑀣𑁂 𑀘𑀲𑁆𑀫𑀺 𑀓𑀼𑀲𑀮𑁄, 𑀤𑀴𑁆𑀳𑀥𑀫𑁆𑀫𑁄𑀢𑀺 𑀯𑀺𑀲𑁆𑀲𑀼𑀢𑁄;

𑀦𑀸𑀕𑁄𑀧𑀺 𑀫𑁂 𑀦 𑀫𑀼𑀘𑁆𑀘𑁂𑀬𑁆𑀬, 𑀆𑀕𑀢𑁄 𑀉𑀲𑀼𑀧𑀸𑀢𑀦𑀁.

𑁩𑁦𑁧. ‘‘𑀓𑁄 𑀯𑀸 𑀢𑁆𑀯𑀁 𑀓𑀲𑁆𑀲 𑀯𑀸 𑀧𑀼𑀢𑁆𑀢𑁄 [𑀢𑁆𑀯𑀁 𑀘 𑀓𑀲𑁆𑀲 𑀯𑀸 𑀧𑀼𑀢𑁆𑀢𑁄𑀲𑀺 (𑀲𑀻. 𑀧𑀻.)], 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬𑀁;

𑀧𑀺𑀢𑀼𑀦𑁄 𑀅𑀢𑁆𑀢𑀦𑁄 𑀘𑀸𑀧𑀺, 𑀦𑀸𑀫𑀕𑁄𑀢𑁆𑀢𑀁 𑀧𑀯𑁂𑀤𑀬’’.

𑁩𑁦𑁨. ‘‘𑀦𑁂𑀲𑀸𑀤𑀧𑀼𑀢𑁆𑀢𑁄 𑀪𑀤𑁆𑀤𑀦𑁆𑀢𑁂, 𑀲𑀸𑀫𑁄 𑀇𑀢𑀺 𑀫𑀁 𑀜𑀸𑀢𑀬𑁄;

𑀆𑀫𑀦𑁆𑀢𑀬𑀺𑀁𑀲𑀼 𑀚𑀻𑀯𑀦𑁆𑀢𑀁, 𑀲𑁆𑀯𑀚𑁆𑀚𑁂𑀯𑀸𑀳𑀁 𑀕𑀢𑁄 [𑀲𑁆𑀯𑀸𑀚𑁆𑀚𑁂𑀯𑀗𑁆𑀕𑀢𑁄 (𑀲𑁆𑀬𑀸.), 𑀲𑁆𑀯𑀚𑁆𑀚𑁂𑀯𑀗𑁆𑀕𑀢𑁂 (𑀓.)] 𑀲𑀬𑁂.

𑁩𑁦𑁩. ‘‘𑀯𑀺𑀤𑁆𑀥𑁄𑀲𑁆𑀫𑀺 𑀧𑀼𑀣𑀼𑀲𑀮𑁆𑀮𑁂𑀦, 𑀲𑀯𑀺𑀲𑁂𑀦 𑀬𑀣𑀸 𑀫𑀺𑀕𑁄;

𑀲𑀓𑀫𑁆𑀳𑀺 𑀮𑁄𑀳𑀺𑀢𑁂 𑀭𑀸𑀚, 𑀧𑀲𑁆𑀲 𑀲𑁂𑀫𑀺 𑀧𑀭𑀺𑀧𑁆𑀮𑀼𑀢𑁄.

𑁩𑁦𑁪. ‘‘𑀧𑀝𑀺𑀯𑀸𑀫𑀕𑀢𑀁 [𑀧𑀝𑀺𑀥𑀫𑁆𑀫 𑀕𑀢𑀁 (𑀲𑀻. 𑀧𑀻.)] 𑀲𑀮𑁆𑀮𑀁, 𑀧𑀲𑁆𑀲 𑀥𑀺𑀫𑁆𑀳𑀸𑀫𑀺 [𑀯𑀺𑀳𑀸𑀫𑁆𑀳𑀺 (𑀲𑀻. 𑀧𑀻.)] 𑀮𑁄𑀳𑀺𑀢𑀁;

𑀆𑀢𑀼𑀭𑁄 𑀢𑁆𑀬𑀸𑀦𑀼𑀧𑀼𑀘𑁆𑀙𑀸𑀫𑀺, 𑀓𑀺𑀁 𑀫𑀁 𑀯𑀺𑀤𑁆𑀥𑀸 𑀦𑀺𑀮𑀻𑀬𑀲𑀺.

𑁩𑁦𑁫. ‘‘𑀅𑀚𑀺𑀦𑀫𑁆𑀳𑀺 𑀳𑀜𑁆𑀜𑀢𑁂 𑀤𑀻𑀧𑀺, 𑀦𑀸𑀕𑁄 𑀤𑀦𑁆𑀢𑁂𑀳𑀺 𑀳𑀜𑁆𑀜𑀢𑁂;

𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀯𑀺𑀤𑁆𑀥𑁂𑀬𑁆𑀬𑀁 𑀫𑀁 𑀅𑀫𑀜𑁆𑀜𑀣’’.

𑁩𑁦𑁬. ‘‘𑀫𑀺𑀕𑁄 𑀉𑀧𑀝𑁆𑀞𑀺𑀢𑁄 𑀆𑀲𑀺, 𑀆𑀕𑀢𑁄 𑀉𑀲𑀼𑀧𑀸𑀢𑀦𑀁;

𑀢𑀁 𑀤𑀺𑀲𑁆𑀯𑀸 𑀉𑀩𑁆𑀩𑀺𑀚𑀻 𑀲𑀸𑀫, 𑀢𑁂𑀦 𑀓𑁄𑀥𑁄 𑀫𑀫𑀸𑀯𑀺𑀲𑀺’’.

𑁩𑁦𑁭. ‘‘𑀬𑀢𑁄 𑀲𑀭𑀸𑀫𑀺 𑀅𑀢𑁆𑀢𑀸𑀦𑀁, 𑀬𑀢𑁄 𑀧𑀢𑁆𑀢𑁄𑀲𑁆𑀫𑀺 𑀯𑀺𑀜𑁆𑀜𑀼𑀢𑀁;

𑀦 𑀫𑀁 𑀫𑀺𑀕𑀸 𑀉𑀢𑁆𑀢𑀲𑀦𑁆𑀢𑀺, 𑀅𑀭𑀜𑁆𑀜𑁂 𑀲𑀸𑀧𑀤𑀸𑀦𑀺𑀧𑀺.

𑁩𑁦𑁮. ‘‘𑀬𑀢𑁄 𑀦𑀺𑀥𑀺𑀁 𑀧𑀭𑀺𑀳𑀭𑀺𑀁, 𑀬𑀢𑁄 𑀧𑀢𑁆𑀢𑁄𑀲𑁆𑀫𑀺 𑀬𑁄𑀩𑁆𑀩𑀦𑀁;

𑀦 𑀫𑀁 𑀫𑀺𑀕𑀸 𑀉𑀢𑁆𑀢𑀲𑀦𑁆𑀢𑀺, 𑀅𑀭𑀜𑁆𑀜𑁂 𑀲𑀸𑀧𑀤𑀸𑀦𑀺𑀧𑀺.

𑁩𑁦𑁯. ‘‘𑀪𑀻𑀭𑀽 𑀓𑀺𑀫𑁆𑀧𑀼𑀭𑀺𑀲𑀸 𑀭𑀸𑀚, 𑀧𑀩𑁆𑀩𑀢𑁂 𑀕𑀦𑁆𑀥𑀫𑀸𑀤𑀦𑁂;

𑀲𑀫𑁆𑀫𑁄𑀤𑀫𑀸𑀦𑀸 𑀕𑀘𑁆𑀙𑀸𑀫, 𑀧𑀩𑁆𑀩𑀢𑀸𑀦𑀺 𑀯𑀦𑀸𑀦𑀺 𑀘.

𑁩𑁧𑁦. (‘‘𑀦 𑀫𑀁 𑀫𑀺𑀕𑀸 𑀉𑀢𑁆𑀢𑀲𑀦𑁆𑀢𑀺, 𑀅𑀭𑀜𑁆𑀜𑁂 𑀲𑀸𑀧𑀤𑀸𑀦𑀺𑀧𑀺;) [( ) 𑀦𑀢𑁆𑀣𑀺 𑀲𑀻. 𑀲𑁆𑀬𑀸. 𑀧𑀻. 𑀧𑁄𑀢𑁆𑀣𑀓𑁂𑀲𑀼]

𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀉𑀢𑁆𑀭𑀸𑀲𑀦𑁆𑀢𑀺 𑀫𑀺𑀕𑀸 𑀫𑀫𑀁’’ [𑀉𑀢𑁆𑀭𑀸𑀲𑁂 𑀲𑁄 𑀫𑀺𑀕𑁄 𑀫𑀫𑀁 (𑀲𑀻. 𑀧𑀻.)].

𑁩𑁧𑁧. ‘‘𑀦 𑀢𑀁 𑀢𑀲 [𑀦 𑀢𑀤𑁆𑀤𑀲𑀸 (𑀲𑀻. 𑀧𑀻.)] 𑀫𑀺𑀕𑁄 𑀲𑀸𑀫, 𑀓𑀺𑀁 𑀢𑀸𑀳𑀁 𑀅𑀮𑀺𑀓𑀁 𑀪𑀡𑁂;

𑀓𑁄𑀥𑀮𑁄𑀪𑀸𑀪𑀺𑀪𑀽𑀢𑀸𑀳𑀁, 𑀉𑀲𑀼𑀁 𑀢𑁂 𑀢𑀁 𑀅𑀯𑀲𑁆𑀲𑀚𑀺𑀁 [𑀅𑀯𑀺𑀲𑁆𑀲𑀚𑀺𑀁 (𑀲𑁆𑀬𑀸.)].

𑁩𑁧𑁨. ‘‘𑀓𑀼𑀢𑁄 𑀦𑀼 𑀲𑀸𑀫 𑀆𑀕𑀫𑁆𑀫, 𑀓𑀲𑁆𑀲 𑀯𑀸 𑀧𑀳𑀺𑀢𑁄 𑀢𑀼𑀯𑀁;

𑀉𑀤𑀳𑀸𑀭𑁄 𑀦𑀤𑀺𑀁 𑀕𑀘𑁆𑀙, 𑀆𑀕𑀢𑁄 𑀫𑀺𑀕𑀲𑀫𑁆𑀫𑀢𑀁’’.

𑁩𑁧𑁩. ‘‘𑀅𑀦𑁆𑀥𑀸 𑀫𑀸𑀢𑀸𑀧𑀺𑀢𑀸 𑀫𑀬𑁆𑀳𑀁, 𑀢𑁂 𑀪𑀭𑀸𑀫𑀺 𑀩𑁆𑀭𑀳𑀸𑀯𑀦𑁂;

𑀢𑁂𑀲𑀸𑀳𑀁 𑀉𑀤𑀓𑀸𑀳𑀸𑀭𑁄, 𑀆𑀕𑀢𑁄 𑀫𑀺𑀕𑀲𑀫𑁆𑀫𑀢𑀁.

𑁩𑁧𑁪. ‘‘𑀅𑀢𑁆𑀣𑀺 𑀦𑁂𑀲𑀁 𑀉𑀲𑀸𑀫𑀢𑁆𑀢𑀁, 𑀅𑀣 𑀲𑀸𑀳𑀲𑁆𑀲 𑀚𑀻𑀯𑀺𑀢𑀁;

𑀉𑀤𑀓𑀲𑁆𑀲 𑀅𑀮𑀸𑀪𑁂𑀦, 𑀫𑀜𑁆𑀜𑁂 𑀅𑀦𑁆𑀥𑀸 𑀫𑀭𑀺𑀲𑁆𑀲𑀭𑁂.

𑁩𑁧𑁫. ‘‘𑀦 𑀫𑁂 𑀇𑀤𑀁 𑀢𑀣𑀸 𑀤𑀼𑀓𑁆𑀔𑀁, 𑀮𑀩𑁆𑀪𑀸 𑀳𑀺 𑀧𑀼𑀫𑀼𑀦𑀸 𑀇𑀤𑀁;

𑀬𑀜𑁆𑀘 𑀅𑀫𑁆𑀫𑀁 𑀦 𑀧𑀲𑁆𑀲𑀸𑀫𑀺, 𑀢𑀁 𑀫𑁂 𑀤𑀼𑀓𑁆𑀔𑀢𑀭𑀁 𑀇𑀢𑁄.

𑁩𑁧𑁬. ‘‘𑀦 𑀫𑁂 𑀇𑀤𑀁 𑀢𑀣𑀸 𑀤𑀼𑀓𑁆𑀔𑀁, 𑀮𑀩𑁆𑀪𑀸 𑀳𑀺 𑀧𑀼𑀫𑀼𑀦𑀸 𑀇𑀤𑀁;

𑀬𑀜𑁆𑀘 𑀢𑀸𑀢𑀁 𑀦 𑀧𑀲𑁆𑀲𑀸𑀫𑀺, 𑀢𑀁 𑀫𑁂 𑀤𑀼𑀓𑁆𑀔𑀢𑀭𑀁 𑀇𑀢𑁄.

𑁩𑁧𑁭. ‘‘𑀲𑀸 𑀦𑀽𑀦 𑀓𑀧𑀡𑀸 𑀅𑀫𑁆𑀫𑀸, 𑀘𑀺𑀭𑀭𑀢𑁆𑀢𑀸𑀬 𑀭𑀼𑀘𑁆𑀙𑀢𑀺 [𑀭𑀼𑀘𑁆𑀘𑀢𑀺 (𑀓.)];

𑀅𑀟𑁆𑀠𑀭𑀢𑁆𑀢𑁂𑀯 𑀭𑀢𑁆𑀢𑁂 𑀯𑀸, 𑀦𑀤𑀻𑀯 𑀅𑀯𑀲𑀼𑀘𑁆𑀙𑀢𑀺 [𑀅𑀯𑀲𑀼𑀲𑁆𑀲𑀢𑀺 (𑀲𑁆𑀬𑀸.)].

𑁩𑁧𑁮. ‘‘𑀲𑁄 𑀦𑀽𑀦 𑀓𑀧𑀡𑁄 𑀢𑀸𑀢𑁄, 𑀘𑀺𑀭𑀭𑀢𑁆𑀢𑀸𑀬 𑀭𑀼𑀘𑁆𑀙𑀢𑀺 [𑀭𑀼𑀘𑁆𑀘𑀢𑀺 (𑀓.)];

𑀅𑀟𑁆𑀠𑀭𑀢𑁆𑀢𑁂𑀯 𑀭𑀢𑁆𑀢𑁂 𑀯𑀸, 𑀦𑀤𑀻𑀯 𑀅𑀯𑀲𑀼𑀘𑁆𑀙𑀢𑀺 [𑀅𑀯𑀲𑀼𑀲𑁆𑀲𑀢𑀺 (𑀲𑁆𑀬𑀸.)].

𑁩𑁧𑁯. ‘‘𑀉𑀝𑁆𑀞𑀸𑀦𑀧𑀸𑀤𑀘𑀭𑀺𑀬𑀸𑀬 [𑀧𑀸𑀭𑀺𑀘𑀭𑀺𑀬𑀸𑀬 (𑀲𑀻. 𑀧𑀻.)], 𑀧𑀸𑀤𑀲𑀫𑁆𑀩𑀸𑀳𑀦𑀲𑁆𑀲 𑀘;

𑀲𑀸𑀫 𑀢𑀸𑀢 𑀯𑀺𑀮𑀧𑀦𑁆𑀢𑀸, 𑀳𑀺𑀡𑁆𑀟𑀺𑀲𑁆𑀲𑀦𑁆𑀢𑀺 𑀩𑁆𑀭𑀳𑀸𑀯𑀦𑁂.

𑁩𑁨𑁦. ‘‘𑀇𑀤𑀫𑁆𑀧𑀺 𑀤𑀼𑀢𑀺𑀬𑀁 𑀲𑀮𑁆𑀮𑀁, 𑀓𑀫𑁆𑀧𑁂𑀢𑀺 𑀳𑀤𑀬𑀁 𑀫𑀫𑀁;

𑀬𑀜𑁆𑀘 𑀅𑀦𑁆𑀥𑁂 𑀦 𑀧𑀲𑁆𑀲𑀸𑀫𑀺, 𑀫𑀜𑁆𑀜𑁂 𑀳𑀺𑀲𑁆𑀲𑀸𑀫𑀺 [𑀬𑀜𑁆𑀘 𑀳𑁂𑀲𑁆𑀲𑀸𑀫𑀺 (𑀲𑀻. 𑀧𑀻.), 𑀢𑀁 𑀫𑁂𑀁 𑀳𑀺𑀲𑁆𑀲𑀸𑀫𑀺 (𑀓.)] 𑀚𑀻𑀯𑀺𑀢𑀁’’.

𑁩𑁨𑁧. ‘‘𑀫𑀸 𑀩𑀸𑀴𑁆𑀳𑀁 𑀧𑀭𑀺𑀤𑁂𑀯𑁂𑀲𑀺, 𑀲𑀸𑀫 𑀓𑀮𑁆𑀬𑀸𑀡𑀤𑀲𑁆𑀲𑀦;

𑀅𑀳𑀁 𑀓𑀫𑁆𑀫𑀓𑀭𑁄 𑀳𑀼𑀢𑁆𑀯𑀸, 𑀪𑀭𑀺𑀲𑁆𑀲𑀁 𑀢𑁂 𑀩𑁆𑀭𑀳𑀸𑀯𑀦𑁂.

𑁩𑁨𑁨. ‘‘𑀇𑀲𑁆𑀲𑀢𑁆𑀣𑁂 𑀘𑀲𑁆𑀫𑀺 𑀓𑀼𑀲𑀮𑁄, 𑀤𑀴𑁆𑀳𑀥𑀫𑁆𑀫𑁄𑀢𑀺 𑀯𑀺𑀲𑁆𑀲𑀼𑀢𑁄;

𑀅𑀳𑀁 𑀓𑀫𑁆𑀫𑀓𑀭𑁄 𑀳𑀼𑀢𑁆𑀯𑀸, 𑀪𑀭𑀺𑀲𑁆𑀲𑀁 𑀢𑁂 𑀩𑁆𑀭𑀳𑀸𑀯𑀦𑁂.

𑁩𑁨𑁩. ‘‘𑀫𑀺𑀕𑀸𑀦𑀁 [𑀫𑀕𑀸𑀦𑀁 (𑀓.)] 𑀯𑀺𑀖𑀸𑀲𑀫𑀦𑁆𑀯𑁂𑀲𑀁, 𑀯𑀦𑀫𑀽𑀮𑀨𑀮𑀸𑀦𑀺 𑀘;

𑀅𑀳𑀁 𑀓𑀫𑁆𑀫𑀓𑀭𑁄 𑀳𑀼𑀢𑁆𑀯𑀸, 𑀪𑀭𑀺𑀲𑁆𑀲𑀁 𑀢𑁂 𑀩𑁆𑀭𑀳𑀸𑀯𑀦𑁂.

𑁩𑁨𑁪. ‘‘𑀓𑀢𑀫𑀁 𑀢𑀁 𑀯𑀦𑀁 𑀲𑀸𑀫, 𑀬𑀢𑁆𑀣 𑀫𑀸𑀢𑀸𑀧𑀺𑀢𑀸 𑀢𑀯;

𑀅𑀳𑀁 𑀢𑁂 𑀢𑀣𑀸 𑀪𑀭𑀺𑀲𑁆𑀲𑀁, 𑀬𑀣𑀸 𑀢𑁂 𑀅𑀪𑀭𑀻 𑀢𑀼𑀯𑀁’’.

𑁩𑁨𑁫. ‘‘𑀅𑀬𑀁 𑀏𑀓𑀧𑀤𑀻 𑀭𑀸𑀚, 𑀬𑁄𑀬𑀁 𑀉𑀲𑁆𑀲𑀻𑀲𑀓𑁂 𑀫𑀫;

𑀇𑀢𑁄 𑀕𑀦𑁆𑀢𑁆𑀯𑀸 𑀅𑀟𑁆𑀠𑀓𑁄𑀲𑀁, 𑀢𑀢𑁆𑀣 𑀦𑁂𑀲𑀁 𑀅𑀕𑀸𑀭𑀓𑀁;

𑀬𑀢𑁆𑀣 𑀫𑀸𑀢𑀸𑀧𑀺𑀢𑀸 𑀫𑀬𑁆𑀳𑀁, 𑀢𑁂 𑀪𑀭𑀲𑁆𑀲𑀼 𑀇𑀢𑁄 𑀕𑀢𑁄.

𑁩𑁨𑁬. ‘‘𑀦𑀫𑁄 𑀢𑁂 𑀓𑀸𑀲𑀺𑀭𑀸𑀚𑀢𑁆𑀣𑀼, 𑀦𑀫𑁄 𑀢𑁂 𑀓𑀸𑀲𑀺𑀯𑀟𑁆𑀠𑀦;

𑀅𑀦𑁆𑀥𑀸 𑀫𑀸𑀢𑀸𑀧𑀺𑀢𑀸 𑀫𑀬𑁆𑀳𑀁, 𑀢𑁂 𑀪𑀭𑀲𑁆𑀲𑀼 𑀩𑁆𑀭𑀳𑀸𑀯𑀦𑁂.

𑁩𑁨𑁭. ‘‘𑀅𑀜𑁆𑀚𑀮𑀺𑀁 𑀢𑁂 𑀧𑀕𑁆𑀕𑀡𑁆𑀳𑀸𑀫𑀺, 𑀓𑀸𑀲𑀺𑀭𑀸𑀚 𑀦𑀫𑀢𑁆𑀣𑀼 𑀢𑁂;

𑀫𑀸𑀢𑀭𑀁 𑀧𑀺𑀢𑀭𑀁 𑀫𑀬𑁆𑀳𑀁, 𑀯𑀼𑀢𑁆𑀢𑁄 𑀯𑀚𑁆𑀚𑀸𑀲𑀺 𑀯𑀦𑁆𑀤𑀦𑀁’’.

𑁩𑁨𑁮. ‘‘𑀇𑀤𑀁 𑀯𑀢𑁆𑀯𑀸𑀦 𑀲𑁄 𑀲𑀸𑀫𑁄, 𑀬𑀼𑀯𑀸 𑀓𑀮𑁆𑀬𑀸𑀡𑀤𑀲𑁆𑀲𑀦𑁄;

𑀫𑀼𑀘𑁆𑀙𑀺𑀢𑁄 𑀯𑀺𑀲𑀯𑁂𑀕𑁂𑀦, 𑀯𑀺𑀲𑀜𑁆𑀜𑀻 𑀲𑀫𑀧𑀚𑁆𑀚𑀣.

𑁩𑁨𑁯. ‘‘𑀲 𑀭𑀸𑀚𑀸 𑀧𑀭𑀺𑀤𑁂𑀯𑁂𑀲𑀺, 𑀩𑀳𑀼𑀁 𑀓𑀸𑀭𑀼𑀜𑁆𑀜𑀲𑀜𑁆𑀳𑀺𑀢𑀁;

𑀅𑀚𑀭𑀸𑀫𑀭𑁄𑀳𑀁 𑀆𑀲𑀺𑀁, 𑀅𑀚𑁆𑀚𑁂𑀢𑀁 𑀜𑀸𑀫𑀺 [𑀅𑀚𑁆𑀚𑀳𑀜𑁆𑀜𑀸𑀫𑀺 (𑀓.)] 𑀦𑁄 𑀧𑀼𑀭𑁂;

𑀲𑀸𑀫𑀁 𑀓𑀸𑀮𑀗𑁆𑀓𑀢𑀁 𑀤𑀺𑀲𑁆𑀯𑀸, 𑀦𑀢𑁆𑀣𑀺 𑀫𑀘𑁆𑀘𑀼𑀲𑁆𑀲 𑀦𑀸𑀕𑀫𑁄.

𑁩𑁩𑁦. ‘‘𑀬𑀲𑁆𑀲𑀼 𑀫𑀁 𑀧𑀝𑀺𑀫𑀦𑁆𑀢𑁂𑀢𑀺, 𑀲𑀯𑀺𑀲𑁂𑀦 𑀲𑀫𑀧𑁆𑀧𑀺𑀢𑁄;

𑀲𑁆𑀯𑀚𑁆𑀚𑁂𑀯𑀁 𑀕𑀢𑁂 𑀓𑀸𑀮𑁂, 𑀦 𑀓𑀺𑀜𑁆𑀘𑀺 𑀫𑀪𑀺𑀪𑀸𑀲𑀢𑀺.

𑁩𑁩𑁧. ‘‘𑀦𑀺𑀭𑀬𑀁 𑀦𑀽𑀦 𑀕𑀘𑁆𑀙𑀸𑀫𑀺, 𑀏𑀢𑁆𑀣 𑀫𑁂 𑀦𑀢𑁆𑀣𑀺 𑀲𑀁𑀲𑀬𑁄;

𑀢𑀤𑀸 𑀳𑀺 𑀧𑀓𑀢𑀁 𑀧𑀸𑀧𑀁, 𑀘𑀺𑀭𑀭𑀢𑁆𑀢𑀸𑀬 𑀓𑀺𑀩𑁆𑀩𑀺𑀲𑀁.

𑁩𑁩𑁨. ‘‘𑀪𑀯𑀦𑁆𑀢𑀺 𑀢𑀲𑁆𑀲 𑀯𑀢𑁆𑀢𑀸𑀭𑁄, 𑀕𑀸𑀫𑁂 𑀓𑀺𑀩𑁆𑀩𑀺𑀲𑀓𑀸𑀭𑀓𑁄;

𑀅𑀭𑀜𑁆𑀜𑁂 𑀦𑀺𑀫𑁆𑀫𑀦𑀼𑀲𑁆𑀲𑀫𑁆𑀳𑀺, 𑀓𑁄 𑀫𑀁 𑀯𑀢𑁆𑀢𑀼𑀫𑀭𑀳𑀢𑀺.

𑁩𑁩𑁩. ‘‘𑀲𑀸𑀭𑀬𑀦𑁆𑀢𑀺 𑀳𑀺 𑀓𑀫𑁆𑀫𑀸𑀦𑀺, 𑀕𑀸𑀫𑁂 𑀲𑀁𑀕𑀘𑁆𑀙 𑀫𑀸𑀡𑀯𑀸;

𑀅𑀭𑀜𑁆𑀜𑁂 𑀦𑀺𑀫𑁆𑀫𑀦𑀼𑀲𑁆𑀲𑀫𑁆𑀳𑀺, 𑀓𑁄 𑀦𑀼 𑀫𑀁 𑀲𑀸𑀭𑀬𑀺𑀲𑁆𑀲𑀢𑀺’’.

𑁩𑁩𑁪. ‘‘𑀲𑀸 𑀤𑁂𑀯𑀢𑀸 𑀅𑀦𑁆𑀢𑀭𑀳𑀺𑀢𑀸, 𑀧𑀩𑁆𑀩𑀢𑁂 𑀕𑀦𑁆𑀥𑀫𑀸𑀤𑀦𑁂;

𑀭𑀜𑁆𑀜𑁄𑀯 𑀅𑀦𑀼𑀓𑀫𑁆𑀧𑀸𑀬, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁩𑁩𑁫. ‘‘𑀆𑀕𑀼𑀁 𑀓𑀺𑀭 𑀫𑀳𑀸𑀭𑀸𑀚, 𑀅𑀓𑀭𑀺 [𑀅𑀓𑀭𑀸 (𑀲𑀻.)] 𑀓𑀫𑁆𑀫 𑀤𑀼𑀓𑁆𑀓𑀝𑀁;

𑀅𑀤𑀽𑀲𑀓𑀸 𑀧𑀺𑀢𑀸𑀧𑀼𑀢𑁆𑀢𑀸, 𑀢𑀬𑁄 𑀏𑀓𑀽𑀲𑀼𑀦𑀸 𑀳𑀢𑀸.

𑁩𑁩𑁬. ‘‘𑀏𑀳𑀺 𑀢𑀁 𑀅𑀦𑀼𑀲𑀺𑀓𑁆𑀔𑀸𑀫𑀺, 𑀬𑀣𑀸 𑀢𑁂 𑀲𑀼𑀕𑀢𑀻 𑀲𑀺𑀬𑀸;

𑀥𑀫𑁆𑀫𑁂𑀦𑀦𑁆𑀥𑁂 𑀯𑀦𑁂 𑀧𑁄𑀲, 𑀫𑀜𑁆𑀜𑁂𑀳𑀁 𑀲𑀼𑀕𑀢𑀻 𑀢𑀬𑀸.

𑁩𑁩𑁭. ‘‘𑀲 𑀭𑀸𑀚𑀸 𑀧𑀭𑀺𑀤𑁂𑀯𑀺𑀢𑁆𑀯𑀸, 𑀩𑀳𑀼𑀁 𑀓𑀸𑀭𑀼𑀜𑁆𑀜𑀲𑀜𑁆𑀳𑀺𑀢𑀁;

𑀉𑀤𑀓𑀓𑀼𑀫𑁆𑀪𑀫𑀸𑀤𑀸𑀬, 𑀧𑀓𑁆𑀓𑀸𑀫𑀺 𑀤𑀓𑁆𑀔𑀺𑀡𑀸𑀫𑀼𑀔𑁄.

𑁩𑁩𑁮. ‘‘𑀓𑀲𑁆𑀲 𑀦𑀼 𑀏𑀲𑁄 𑀧𑀤𑀲𑀤𑁆𑀤𑁄, 𑀫𑀦𑀼𑀲𑁆𑀲𑀲𑁆𑀲𑁂𑀯 𑀆𑀕𑀢𑁄;

𑀦𑁂𑀲𑁄 𑀲𑀸𑀫𑀲𑁆𑀲 𑀦𑀺𑀕𑁆𑀖𑁄𑀲𑁄, 𑀓𑁄 𑀦𑀼 𑀢𑁆𑀯𑀫𑀲𑀺 𑀫𑀸𑀭𑀺𑀲.

𑁩𑁩𑁯. ‘‘𑀲𑀦𑁆𑀢𑀜𑁆𑀳𑀺 𑀲𑀸𑀫𑁄 𑀯𑀚𑀢𑀺, 𑀲𑀦𑁆𑀢𑀁 𑀧𑀸𑀤𑀸𑀦𑀺 𑀦𑁂𑀬𑀢𑀺 [𑀉𑀢𑁆𑀢𑀳𑀺 (𑀲𑀻.)];

𑀦𑁂𑀲𑁄 𑀲𑀸𑀫𑀲𑁆𑀲 𑀦𑀺𑀕𑁆𑀖𑁄𑀲𑁄, 𑀓𑁄 𑀦𑀼 𑀢𑁆𑀯𑀫𑀲𑀺 𑀫𑀸𑀭𑀺𑀲’’.

𑁩𑁪𑁦. ‘‘𑀭𑀸𑀚𑀸𑀳𑀫𑀲𑁆𑀫𑀺 𑀓𑀸𑀲𑀻𑀦𑀁, 𑀧𑀻𑀴𑀺𑀬𑀓𑁆𑀔𑁄𑀢𑀺 𑀫𑀁 𑀯𑀺𑀤𑀽;

𑀮𑁄𑀪𑀸 𑀭𑀝𑁆𑀞𑀁 𑀧𑀳𑀺𑀢𑁆𑀯𑀸𑀦, 𑀫𑀺𑀕𑀫𑁂𑀲𑀁 𑀘𑀭𑀸𑀫𑀳𑀁.

𑁩𑁪𑁧. ‘‘𑀇𑀲𑁆𑀲𑀢𑁆𑀣𑁂 𑀘𑀲𑁆𑀫𑀺 𑀓𑀼𑀲𑀮𑁄, 𑀤𑀴𑁆𑀳𑀥𑀫𑁆𑀫𑁄𑀢𑀺 𑀯𑀺𑀲𑁆𑀲𑀼𑀢𑁄;

𑀦𑀸𑀕𑁄𑀧𑀺 𑀫𑁂 𑀦 𑀫𑀼𑀘𑁆𑀘𑁂𑀬𑁆𑀬, 𑀆𑀕𑀢𑁄 𑀉𑀲𑀼𑀧𑀸𑀢𑀦𑀁’’.

𑁩𑁪𑁨. ‘‘𑀲𑁆𑀯𑀸𑀕𑀢𑀁 𑀢𑁂 𑀫𑀳𑀸𑀭𑀸𑀚, 𑀅𑀣𑁄 𑀢𑁂 𑀅𑀤𑀼𑀭𑀸𑀕𑀢𑀁;

𑀇𑀲𑁆𑀲𑀭𑁄𑀲𑀺 𑀅𑀦𑀼𑀧𑁆𑀧𑀢𑁆𑀢𑁄, 𑀬𑀁 𑀇𑀥𑀢𑁆𑀣𑀺 𑀧𑀯𑁂𑀤𑀬.

𑁩𑁪𑁩. ‘‘𑀢𑀺𑀦𑁆𑀤𑀼𑀓𑀸𑀦𑀺 𑀧𑀺𑀬𑀸𑀮𑀸𑀦𑀺, 𑀫𑀥𑀼𑀓𑁂 𑀓𑀸𑀲𑀼𑀫𑀸𑀭𑀺𑀬𑁄;

𑀨𑀮𑀸𑀦𑀺 𑀔𑀼𑀤𑁆𑀤𑀓𑀧𑁆𑀧𑀸𑀦𑀺, 𑀪𑀼𑀜𑁆𑀚 𑀭𑀸𑀚 𑀯𑀭𑀁 𑀯𑀭𑀁.

𑁩𑁪𑁪. ‘‘𑀇𑀤𑀫𑁆𑀧𑀺 𑀧𑀸𑀦𑀻𑀬𑀁 𑀲𑀻𑀢𑀁, 𑀆𑀪𑀢𑀁 𑀕𑀺𑀭𑀺𑀕𑀩𑁆𑀪𑀭𑀸;

𑀢𑀢𑁄 𑀧𑀺𑀯 𑀫𑀳𑀸𑀭𑀸𑀚, 𑀲𑀘𑁂 𑀢𑁆𑀯𑀁 𑀅𑀪𑀺𑀓𑀗𑁆𑀔𑀲𑀺’’.

𑁩𑁪𑁫. ‘‘𑀦𑀸𑀮𑀁 𑀅𑀦𑁆𑀥𑀸 𑀯𑀦𑁂 𑀤𑀝𑁆𑀞𑀼𑀁, 𑀓𑁄 𑀦𑀼 𑀯𑁄 𑀨𑀮𑀫𑀸𑀳𑀭𑀺;

𑀅𑀦𑀦𑁆𑀥𑀲𑁆𑀲𑁂𑀯𑀬𑀁 𑀲𑀫𑁆𑀫𑀸, 𑀦𑀺𑀯𑀸𑀧𑁄 𑀫𑀬𑁆𑀳 𑀔𑀸𑀬𑀢𑀺’’.

𑁩𑁪𑁬. ‘‘𑀤𑀳𑀭𑁄 𑀬𑀼𑀯𑀸 𑀦𑀸𑀢𑀺𑀩𑁆𑀭𑀳𑀸, 𑀲𑀸𑀫𑁄 𑀓𑀮𑁆𑀬𑀸𑀡𑀤𑀲𑁆𑀲𑀦𑁄;

𑀤𑀻𑀖𑀲𑁆𑀲 𑀓𑁂𑀲𑀸 𑀅𑀲𑀺𑀢𑀸, 𑀅𑀣𑁄 𑀲𑀽𑀦𑀕𑁆𑀕 [𑀲𑁄𑀦𑀕𑁆𑀕 (𑀓.)] 𑀯𑁂𑀮𑁆𑀮𑀺𑀢𑀸.

𑁩𑁪𑁭. ‘‘𑀲𑁄 𑀳𑀯𑁂 𑀨𑀮𑀫𑀸𑀳𑀭𑀺𑀢𑁆𑀯𑀸, 𑀇𑀢𑁄 𑀆𑀤𑀸𑀬 [𑀆𑀤𑀸 (𑀲𑀻. 𑀧𑀻.)] 𑀓𑀫𑀡𑁆𑀟𑀮𑀼𑀁;

𑀦𑀤𑀺𑀁 𑀕𑀢𑁄 𑀉𑀤𑀳𑀸𑀭𑁄, 𑀫𑀜𑁆𑀜𑁂 𑀦 𑀤𑀽𑀭𑀫𑀸𑀕𑀢𑁄’’.

𑁩𑁪𑁮. ‘‘𑀅𑀳𑀁 𑀢𑀁 𑀅𑀯𑀥𑀺𑀁 𑀲𑀸𑀫𑀁, 𑀬𑁄 𑀢𑀼𑀬𑁆𑀳𑀁 𑀧𑀭𑀺𑀘𑀸𑀭𑀓𑁄;

𑀬𑀁 𑀓𑀼𑀫𑀸𑀭𑀁 𑀧𑀯𑁂𑀤𑁂𑀣, 𑀲𑀸𑀫𑀁 𑀓𑀮𑁆𑀬𑀸𑀡𑀤𑀲𑁆𑀲𑀦𑀁.

𑁩𑁪𑁯. ‘‘𑀤𑀻𑀖𑀲𑁆𑀲 𑀓𑁂𑀲𑀸 𑀅𑀲𑀺𑀢𑀸, 𑀅𑀣𑁄 𑀲𑀽𑀦𑀕𑁆𑀕𑀯𑁂𑀮𑁆𑀮𑀺𑀢𑀸;

𑀢𑁂𑀲𑀼 𑀮𑁄𑀳𑀺𑀢𑀮𑀺𑀢𑁆𑀢𑁂𑀲𑀼, 𑀲𑁂𑀢𑀺 𑀲𑀸𑀫𑁄 𑀫𑀬𑀸 𑀳𑀢𑁄’’.

𑁩𑁫𑁦. ‘‘𑀓𑁂𑀦 𑀤𑀼𑀓𑀽𑀮𑀫𑀦𑁆𑀢𑁂𑀲𑀺, 𑀳𑀢𑁄 𑀲𑀸𑀫𑁄𑀢𑀺 𑀯𑀸𑀤𑀺𑀦𑀸;

𑀳𑀢𑁄 𑀲𑀸𑀫𑁄𑀢𑀺 𑀲𑀼𑀢𑁆𑀯𑀸𑀦, 𑀳𑀤𑀬𑀁 𑀫𑁂 𑀧𑀯𑁂𑀥𑀢𑀺.

𑁩𑁫𑁧. ‘‘𑀅𑀲𑁆𑀲𑀢𑁆𑀣𑀲𑁆𑀲𑁂𑀯 𑀢𑀭𑀼𑀡𑀁, 𑀧𑀯𑀸𑀴𑀁 𑀫𑀸𑀮𑀼𑀢𑁂𑀭𑀺𑀢𑀁;

𑀳𑀢𑁄 𑀲𑀸𑀫𑁄𑀢𑀺 𑀲𑀼𑀢𑁆𑀯𑀸𑀦, 𑀳𑀤𑀬𑀁 𑀫𑁂 𑀧𑀯𑁂𑀥𑀢𑀺’’.

𑁩𑁫𑁨. ‘‘𑀧𑀸𑀭𑀺𑀓𑁂 𑀓𑀸𑀲𑀺𑀭𑀸𑀚𑀸𑀬𑀁, 𑀲𑁄 𑀲𑀸𑀫𑀁 𑀫𑀺𑀕𑀲𑀫𑁆𑀫𑀢𑁂;

𑀓𑁄𑀥𑀲𑀸 𑀉𑀲𑀼𑀦𑀸 𑀯𑀺𑀚𑁆𑀛𑀺, 𑀢𑀲𑁆𑀲 𑀫𑀸 𑀧𑀸𑀧𑀫𑀺𑀘𑁆𑀙𑀺𑀫𑁆𑀳𑀸’’.

𑁩𑁫𑁩. ‘‘𑀓𑀺𑀘𑁆𑀙𑀸 𑀮𑀤𑁆𑀥𑁄 𑀧𑀺𑀬𑁄 𑀧𑀼𑀢𑁆𑀢𑁄, 𑀬𑁄 𑀅𑀦𑁆𑀥𑁂 𑀅𑀪𑀭𑀻 𑀯𑀦𑁂;

𑀢𑀁 𑀏𑀓𑀧𑀼𑀢𑁆𑀢𑀁 𑀖𑀸𑀢𑀺𑀫𑁆𑀳𑀺, 𑀓𑀣𑀁 𑀘𑀺𑀢𑁆𑀢𑀁 𑀦 𑀓𑁄𑀧𑀬𑁂’’.

𑁩𑁫𑁪. ‘‘𑀓𑀺𑀘𑁆𑀙𑀸 𑀮𑀤𑁆𑀥𑁄 𑀧𑀺𑀬𑁄 𑀧𑀼𑀢𑁆𑀢𑁄, 𑀬𑁄 𑀅𑀦𑁆𑀥𑁂 𑀅𑀪𑀭𑀻 𑀯𑀦𑁂;

𑀢𑀁 𑀏𑀓𑀧𑀼𑀢𑁆𑀢𑀁 𑀖𑀸𑀢𑀺𑀫𑁆𑀳𑀺, 𑀅𑀓𑁆𑀓𑁄𑀥𑀁 𑀆𑀳𑀼 𑀧𑀡𑁆𑀟𑀺𑀢𑀸’’.

𑁩𑁫𑁫. ‘‘𑀫𑀸 𑀩𑀸𑀴𑁆𑀳𑀁 𑀧𑀭𑀺𑀤𑁂𑀯𑁂𑀣, 𑀳𑀢𑁄 𑀲𑀸𑀫𑁄𑀢𑀺 𑀯𑀸𑀤𑀺𑀦𑀸;

𑀅𑀳𑀁 𑀓𑀫𑁆𑀫𑀓𑀭𑁄 𑀳𑀼𑀢𑁆𑀯𑀸, 𑀪𑀭𑀺𑀲𑁆𑀲𑀸𑀫𑀺 𑀩𑁆𑀭𑀳𑀸𑀯𑀦𑁂.

𑁩𑁫𑁬. ‘‘𑀇𑀲𑁆𑀲𑀢𑁆𑀣𑁂 𑀘𑀲𑁆𑀫𑀺 𑀓𑀼𑀲𑀮𑁄, 𑀤𑀴𑁆𑀳𑀥𑀫𑁆𑀫𑁄𑀢𑀺 𑀯𑀺𑀲𑁆𑀲𑀼𑀢𑁄;

𑀅𑀳𑀁 𑀓𑀫𑁆𑀫𑀓𑀭𑁄 𑀳𑀼𑀢𑁆𑀯𑀸, 𑀪𑀭𑀺𑀲𑁆𑀲𑀸𑀫𑀺 𑀩𑁆𑀭𑀳𑀸𑀯𑀦𑁂.

𑁩𑁫𑁭. ‘‘𑀫𑀺𑀕𑀸𑀦𑀁 𑀯𑀺𑀖𑀸𑀲𑀫𑀦𑁆𑀯𑁂𑀲𑀁, 𑀯𑀦𑀫𑀽𑀮𑀨𑀮𑀸𑀦𑀺 𑀘;

𑀅𑀳𑀁 𑀓𑀫𑁆𑀫𑀓𑀭𑁄 𑀳𑀼𑀢𑁆𑀯𑀸, 𑀪𑀭𑀺𑀲𑁆𑀲𑀸𑀫𑀺 𑀩𑁆𑀭𑀳𑀸𑀯𑀦𑁂’’.

𑁩𑁫𑁮. ‘‘𑀦𑁂𑀲 𑀥𑀫𑁆𑀫𑁄 𑀫𑀳𑀸𑀭𑀸𑀚, 𑀦𑁂𑀢𑀁 𑀅𑀫𑁆𑀳𑁂𑀲𑀼 𑀓𑀧𑁆𑀧𑀢𑀺;

𑀭𑀸𑀚𑀸 𑀢𑁆𑀯𑀫𑀲𑀺 𑀅𑀫𑁆𑀳𑀸𑀓𑀁, 𑀧𑀸𑀤𑁂 𑀯𑀦𑁆𑀤𑀸𑀫 𑀢𑁂 𑀫𑀬𑀁’’.

𑁩𑁫𑁯. ‘‘𑀥𑀫𑁆𑀫𑀁 𑀦𑁂𑀲𑀸𑀤 𑀪𑀡𑀣, 𑀓𑀢𑀸 𑀅𑀧𑀘𑀺𑀢𑀻 𑀢𑀬𑀸;

𑀧𑀺𑀢𑀸 𑀢𑁆𑀯𑀫𑀲𑀺 [𑀢𑁆𑀯𑀫𑀳𑀺 (?)] 𑀅𑀫𑁆𑀳𑀸𑀓𑀁, 𑀫𑀸𑀢𑀸 𑀢𑁆𑀯𑀫𑀲𑀺 𑀧𑀸𑀭𑀺𑀓𑁂’’.

𑁩𑁬𑁦. ‘‘𑀦𑀫𑁄 𑀢𑁂 𑀓𑀸𑀲𑀺𑀭𑀸𑀚𑀢𑁆𑀣𑀼, 𑀦𑀫𑁄 𑀢𑁂 𑀓𑀸𑀲𑀺𑀯𑀟𑁆𑀠𑀦;

𑀅𑀜𑁆𑀚𑀮𑀺𑀁 𑀢𑁂 𑀧𑀕𑁆𑀕𑀡𑁆𑀳𑀸𑀫, 𑀬𑀸𑀯 𑀲𑀸𑀫𑀸𑀦𑀼𑀧𑀸𑀧𑀬.

𑁩𑁬𑁧. ‘‘𑀢𑀲𑁆𑀲 𑀧𑀸𑀤𑁂 𑀲𑀫𑀚𑁆𑀚𑀦𑁆𑀢𑀸 [𑀧𑀯𑀝𑁆𑀝𑀦𑁆𑀢𑀸 (𑀧𑀻.)], 𑀫𑀼𑀔𑀜𑁆𑀘 𑀪𑀼𑀚𑀤𑀲𑁆𑀲𑀦𑀁;

𑀲𑀁𑀲𑀼𑀫𑁆𑀪𑀫𑀸𑀦𑀸 𑀅𑀢𑁆𑀢𑀸𑀦𑀁, 𑀓𑀸𑀮𑀫𑀸𑀕𑀫𑀬𑀸𑀫𑀲𑁂’’.

𑁩𑁬𑁨. ‘‘𑀩𑁆𑀭𑀳𑀸 𑀯𑀸𑀴𑀫𑀺𑀕𑀸𑀓𑀺𑀡𑁆𑀡𑀁, 𑀆𑀓𑀸𑀲𑀦𑁆𑀢𑀁𑀯 𑀤𑀺𑀲𑁆𑀲𑀢𑀺;

𑀬𑀢𑁆𑀣 𑀲𑀸𑀫𑁄 𑀳𑀢𑁄 𑀲𑁂𑀢𑀺, 𑀘𑀦𑁆𑀤𑁄𑀯 𑀧𑀢𑀺𑀢𑁄 𑀙𑀫𑀸.

𑁩𑁬𑁩. ‘‘𑀩𑁆𑀭𑀳𑀸 𑀯𑀸𑀴𑀫𑀺𑀕𑀸𑀓𑀺𑀡𑁆𑀡𑀁, 𑀆𑀓𑀸𑀲𑀦𑁆𑀢𑀁𑀯 𑀤𑀺𑀲𑁆𑀲𑀢𑀺;

𑀬𑀢𑁆𑀣 𑀲𑀸𑀫𑁄 𑀳𑀢𑁄 𑀲𑁂𑀢𑀺, 𑀲𑀽𑀭𑀺𑀬𑁄𑀯 𑀧𑀢𑀺𑀢𑁄 𑀙𑀫𑀸.

𑁩𑁬𑁪. ‘‘𑀩𑁆𑀭𑀳𑀸 𑀯𑀸𑀴𑀫𑀺𑀕𑀸𑀓𑀺𑀡𑁆𑀡𑀁, 𑀆𑀓𑀸𑀲𑀦𑁆𑀢𑀁𑀯 𑀤𑀺𑀲𑁆𑀲𑀢𑀺;

𑀬𑀢𑁆𑀣 𑀲𑀸𑀫𑁄 𑀳𑀢𑁄 𑀲𑁂𑀢𑀺, 𑀧𑀁𑀲𑀼𑀦𑀸 𑀧𑀢𑀺𑀓𑀼𑀦𑁆𑀢𑀺𑀢𑁄 [𑀓𑀼𑀡𑁆𑀞𑀺𑀢𑁄 (𑀲𑀻. 𑀲𑁆𑀬𑀸. 𑀧𑀻.) 𑀏𑀯𑀫𑀼𑀧𑀭𑀺𑀧𑀺].

𑁩𑁬𑁫. ‘‘𑀩𑁆𑀭𑀳𑀸 𑀯𑀸𑀴𑀫𑀺𑀕𑀸𑀓𑀺𑀡𑁆𑀡𑀁, 𑀆𑀓𑀸𑀲𑀦𑁆𑀢𑀁𑀯 𑀤𑀺𑀲𑁆𑀲𑀢𑀺;

𑀬𑀢𑁆𑀣 𑀲𑀸𑀫𑁄 𑀳𑀢𑁄 𑀲𑁂𑀢𑀺, 𑀇𑀥𑁂𑀯 𑀯𑀲𑀣𑀲𑁆𑀲𑀫𑁂’’.

𑁩𑁬𑁬. ‘‘𑀬𑀤𑀺 𑀢𑀢𑁆𑀣 𑀲𑀳𑀲𑁆𑀲𑀸𑀦𑀺, 𑀲𑀢𑀸𑀦𑀺 𑀦𑀺𑀬𑀼𑀢𑀸𑀦𑀺 [𑀦𑀳𑀼𑀢𑀸𑀦𑀺 (𑀲𑀻. 𑀲𑁆𑀬𑀸. 𑀧𑀻.)] 𑀘;

𑀦𑁂𑀯𑀫𑁆𑀳𑀸𑀓𑀁 𑀪𑀬𑀁 𑀓𑁄𑀘𑀺, 𑀯𑀦𑁂 𑀯𑀸𑀴𑁂𑀲𑀼 𑀯𑀺𑀚𑁆𑀚𑀢𑀺’’.

𑁩𑁬𑁭. ‘‘𑀢𑀢𑁄 𑀅𑀦𑁆𑀥𑀸𑀦𑀫𑀸𑀤𑀸𑀬, 𑀓𑀸𑀲𑀺𑀭𑀸𑀚𑀸 𑀩𑁆𑀭𑀳𑀸𑀯𑀦𑁂;

𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀧𑀓𑁆𑀓𑀸𑀫𑀺, 𑀬𑀢𑁆𑀣 𑀲𑀸𑀫𑁄 𑀳𑀢𑁄 𑀅𑀳𑀼.

𑁩𑁬𑁮. ‘‘𑀤𑀺𑀲𑁆𑀯𑀸𑀦 𑀧𑀢𑀺𑀢𑀁 𑀲𑀸𑀫𑀁, 𑀧𑀼𑀢𑁆𑀢𑀓𑀁 𑀧𑀁𑀲𑀼𑀓𑀼𑀦𑁆𑀣𑀺𑀢𑀁;

𑀅𑀧𑀯𑀺𑀤𑁆𑀥𑀁 𑀩𑁆𑀭𑀳𑀸𑀭𑀜𑁆𑀜𑁂, 𑀘𑀦𑁆𑀤𑀁𑀯 𑀧𑀢𑀺𑀢𑀁 𑀙𑀫𑀸.

𑁩𑁬𑁯. ‘‘𑀤𑀺𑀲𑁆𑀯𑀸𑀦 𑀧𑀢𑀺𑀢𑀁 𑀲𑀸𑀫𑀁, 𑀧𑀼𑀢𑁆𑀢𑀓𑀁 𑀧𑀁𑀲𑀼𑀓𑀼𑀦𑁆𑀣𑀺𑀢𑀁;