𑁯. 𑀉𑀧𑀸𑀳𑀦𑀯𑀕𑁆𑀕𑁄

𑁨𑁩𑁧. 𑀉𑀧𑀸𑀳𑀦𑀚𑀸𑀢𑀓𑀁 (𑁨-𑁯-𑁧)

𑁧𑁬𑁧. 𑀬𑀣𑀸𑀧𑀺 𑀓𑀻𑀢𑀸 𑀧𑀼𑀭𑀺𑀲𑀲𑁆𑀲𑀼𑀧𑀸𑀳𑀦𑀸, 𑀲𑀼𑀔𑀲𑁆𑀲 𑀅𑀢𑁆𑀣𑀸𑀬 𑀤𑀼𑀔𑀁 𑀉𑀤𑀩𑁆𑀩𑀳𑁂;

𑀖𑀫𑁆𑀫𑀸𑀪𑀺𑀢𑀢𑁆𑀢𑀸 𑀣𑀮𑀲𑀸 𑀧𑀧𑀻𑀴𑀺𑀢𑀸, 𑀢𑀲𑁆𑀲𑁂𑀯 𑀧𑀸𑀤𑁂 𑀧𑀼𑀭𑀺𑀲𑀲𑁆𑀲 𑀔𑀸𑀤𑀭𑁂.

𑁧𑁬𑁨. 𑀏𑀯𑀫𑁂𑀯 𑀬𑁄 𑀤𑀼𑀓𑁆𑀓𑀼𑀮𑀻𑀦𑁄 𑀅𑀦𑀭𑀺𑀬𑁄, 𑀢𑀫𑁆𑀫𑀸𑀓 [𑀢𑀫𑁆𑀳𑀸𑀓 (𑀲𑀻.), 𑀢𑀼𑀫𑁆𑀳𑀸𑀓 (𑀲𑁆𑀬𑀸. 𑀧𑀻.)] 𑀯𑀺𑀚𑁆𑀚𑀜𑁆𑀘 𑀲𑀼𑀢𑀜𑁆𑀘 𑀆𑀤𑀺𑀬;

𑀢𑀫𑁂𑀯 𑀲𑁄 𑀢𑀢𑁆𑀣 𑀲𑀼𑀢𑁂𑀦 𑀔𑀸𑀤𑀢𑀺, 𑀅𑀦𑀭𑀺𑀬𑁄 𑀯𑀼𑀘𑁆𑀘𑀢𑀺 𑀤𑀼𑀧𑀸𑀳𑀦𑀽𑀧𑀫𑁄𑀢𑀺 [𑀧𑀸𑀦𑀤𑀽𑀧𑀫𑁄𑀢𑀺 (𑀲𑀻. 𑀧𑀻.)].

𑀉𑀧𑀸𑀳𑀦𑀚𑀸𑀢𑀓𑀁 𑀧𑀞𑀫𑀁.

𑁨𑁩𑁨. 𑀯𑀻𑀡𑀸𑀕𑀼𑀡𑀚𑀸𑀢𑀓𑀁 (𑁨-𑁯-𑁨)

𑁧𑁬𑁩. 𑀏𑀓𑀘𑀺𑀦𑁆𑀢𑀺𑀢𑁄 𑀬𑀫𑀢𑁆𑀣𑁄, 𑀩𑀸𑀮𑁄 𑀅𑀧𑀭𑀺𑀡𑀸𑀬𑀓𑁄;

𑀦 𑀳𑀺 𑀔𑀼𑀚𑁆𑀚𑁂𑀦 𑀯𑀸𑀫𑁂𑀦, 𑀪𑁄𑀢𑀺 𑀲𑀗𑁆𑀕𑀦𑁆𑀢𑀼𑀫𑀭𑀳𑀲𑀺.

𑁧𑁬𑁪. 𑀧𑀼𑀭𑀺𑀲𑀽𑀲𑀪𑀁 𑀫𑀜𑁆𑀜𑀫𑀸𑀦𑀸, 𑀅𑀳𑀁 𑀔𑀼𑀚𑁆𑀚𑀫𑀓𑀸𑀫𑀬𑀺𑀁;

𑀲𑁄𑀬𑀁 𑀲𑀁𑀓𑀼𑀝𑀺𑀢𑁄 𑀲𑁂𑀢𑀺, 𑀙𑀺𑀦𑁆𑀦𑀢𑀦𑁆𑀢𑀺 𑀬𑀣𑀸 𑀯𑀺𑀡𑀸𑀢𑀺 [𑀣𑀼𑀡𑀸𑀢𑀺 (𑀲𑀻.)].

𑀯𑀻𑀡𑀸𑀕𑀼𑀡𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁨𑁩𑁩. 𑀯𑀺𑀓𑀡𑁆𑀡𑀚𑀸𑀢𑀓𑀁 (𑁨-𑁯-𑁩)

𑁧𑁬𑁫. 𑀓𑀸𑀫𑀁 𑀬𑀳𑀺𑀁 𑀇𑀘𑁆𑀙𑀲𑀺 𑀢𑁂𑀦 𑀕𑀘𑁆𑀙, 𑀯𑀺𑀤𑁆𑀥𑁄𑀲𑀺 𑀫𑀫𑁆𑀫𑀫𑁆𑀳𑀺 [𑀫𑀫𑀲𑁆𑀫𑀺 (𑀓.)] 𑀯𑀺𑀓𑀡𑁆𑀡𑀓𑁂𑀦;

𑀳𑀢𑁄𑀲𑀺 𑀪𑀢𑁆𑀢𑁂𑀦 𑀲𑀼𑀯𑀸𑀤𑀺𑀢𑁂𑀦 [𑀲𑀯𑀸𑀤𑀺𑀢𑁂𑀦 (𑀲𑀻. 𑀲𑁆𑀬𑀸. 𑀧𑀻.)], 𑀮𑁄𑀮𑁄 𑀘 𑀫𑀘𑁆𑀙𑁂 𑀅𑀦𑀼𑀩𑀦𑁆𑀥𑀫𑀸𑀦𑁄.

𑁧𑁬𑁬. 𑀏𑀯𑀫𑁆𑀧𑀺 𑀮𑁄𑀓𑀸𑀫𑀺𑀲𑀁 𑀑𑀧𑀢𑀦𑁆𑀢𑁄, 𑀯𑀺𑀳𑀜𑁆𑀜𑀢𑀻 𑀘𑀺𑀢𑁆𑀢𑀯𑀲𑀸𑀦𑀼𑀯𑀢𑁆𑀢𑀻;

𑀲𑁄 𑀳𑀜𑁆𑀜𑀢𑀺 𑀜𑀸𑀢𑀺𑀲𑀔𑀸𑀦 𑀫𑀚𑁆𑀛𑁂, 𑀫𑀘𑁆𑀙𑀸𑀦𑀼𑀕𑁄 𑀲𑁄𑀭𑀺𑀯 𑀲𑀼𑀁𑀲𑀼𑀫𑀸𑀭𑁄𑀢𑀺 [𑀲𑀼𑀲𑀼𑀫𑀸𑀭𑁄 (𑀓.)].

𑀯𑀺𑀓𑀡𑁆𑀡𑀚𑀸𑀢𑀓𑀁 𑀢𑀢𑀺𑀬𑀁.

𑁨𑁩𑁪. 𑀅𑀲𑀺𑀢𑀸𑀪𑀽𑀚𑀸𑀢𑀓𑀁 (𑁨-𑁯-𑁪)

𑁧𑁬𑁭. 𑀢𑁆𑀯𑀫𑁂𑀯 𑀤𑀸𑀦𑀺𑀫𑀓𑀭 [𑀫𑀓𑀭𑀺 (𑀲𑁆𑀬𑀸.), 𑀫𑀓𑀭𑀸 (𑀓. 𑀲𑀻.)], 𑀬𑀁 𑀓𑀸𑀫𑁄 𑀩𑁆𑀬𑀕𑀫𑀸 𑀢𑀬𑀺;

𑀲𑁄𑀬𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑁄, 𑀔𑀭𑀙𑀺𑀦𑁆𑀦𑀁𑀯 𑀭𑁂𑀦𑀼𑀓𑀁 [𑀭𑁂𑀭𑀼𑀓𑀁 (𑀲𑀻. 𑀧𑀻.)].

𑁧𑁬𑁮. 𑀅𑀢𑁆𑀭𑀺𑀘𑁆𑀙𑀁 [𑀅𑀢𑁆𑀭𑀺𑀘𑁆𑀙𑀸 (𑀲𑀻. 𑀲𑁆𑀬𑀸. 𑀧𑀻.)] 𑀅𑀢𑀺𑀮𑁄𑀪𑁂𑀦, 𑀅𑀢𑀺𑀮𑁄𑀪𑀫𑀤𑁂𑀦 𑀘;

𑀏𑀯𑀁 𑀳𑀸𑀬𑀢𑀺 𑀅𑀢𑁆𑀣𑀫𑁆𑀳𑀸, 𑀅𑀳𑀁𑀯 𑀅𑀲𑀺𑀢𑀸𑀪𑀼𑀬𑀸𑀢𑀺.

𑀅𑀲𑀺𑀢𑀸𑀪𑀽𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁨𑁩𑁫. 𑀯𑀘𑁆𑀙𑀦𑀔𑀚𑀸𑀢𑀓𑀁 (𑁨-𑁯-𑁫)

𑁧𑁬𑁯. 𑀲𑀼𑀔𑀸 𑀖𑀭𑀸 𑀯𑀘𑁆𑀙𑀦𑀔, 𑀲𑀳𑀺𑀭𑀜𑁆𑀜𑀸 𑀲𑀪𑁄𑀚𑀦𑀸;

𑀬𑀢𑁆𑀣 𑀪𑀼𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀘, 𑀲𑀬𑁂𑀬𑁆𑀬𑀸𑀣 𑀅𑀦𑀼𑀲𑁆𑀲𑀼𑀓𑁄.

𑁧𑁭𑁦. 𑀖𑀭𑀸 𑀦𑀸𑀦𑀻𑀳𑀫𑀸𑀦𑀲𑁆𑀲, 𑀖𑀭𑀸 𑀦𑀸𑀪𑀡𑀢𑁄 𑀫𑀼𑀲𑀸;

𑀖𑀭𑀸 𑀦𑀸𑀤𑀺𑀦𑁆𑀦𑀤𑀡𑁆𑀟𑀲𑁆𑀲, 𑀧𑀭𑁂𑀲𑀁 𑀅𑀦𑀺𑀓𑀼𑀩𑁆𑀩𑀢𑁄 [𑀅𑀦𑀺𑀓𑁆𑀭𑀼𑀩𑁆𑀩𑀢𑁄 (𑀓.)];

𑀏𑀯𑀁 𑀙𑀺𑀤𑁆𑀤𑀁 𑀤𑀼𑀭𑀪𑀺𑀲𑀫𑁆𑀪𑀯𑀁 [𑀤𑀼𑀭𑀪𑀺𑀪𑀯𑀁 (𑀲𑀻. 𑀧𑀻.)], 𑀓𑁄 𑀖𑀭𑀁 𑀧𑀝𑀺𑀧𑀚𑁆𑀚𑀢𑀻𑀢𑀺.

𑀯𑀘𑁆𑀙𑀦𑀔𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁨𑁩𑁬. 𑀩𑀓𑀚𑀸𑀢𑀓𑀁 (𑁨-𑁯-𑁬)

𑁧𑁭𑁧. 𑀪𑀤𑁆𑀤𑀓𑁄 𑀯𑀢𑀬𑀁 𑀧𑀓𑁆𑀔𑀻, 𑀤𑀺𑀚𑁄 𑀓𑀼𑀫𑀼𑀤𑀲𑀦𑁆𑀦𑀺𑀪𑁄;

𑀯𑀽𑀧𑀲𑀦𑁆𑀢𑁂𑀳𑀺 𑀧𑀓𑁆𑀔𑁂𑀳𑀺, 𑀫𑀦𑁆𑀤𑀫𑀦𑁆𑀤𑁄𑀯 𑀛𑀸𑀬𑀢𑀺.

𑁧𑁭𑁨. 𑀦𑀸𑀲𑁆𑀲 𑀲𑀻𑀮𑀁 𑀯𑀺𑀚𑀸𑀦𑀸𑀣, 𑀅𑀦𑀜𑁆𑀜𑀸𑀬 𑀧𑀲𑀁𑀲𑀣;

𑀅𑀫𑁆𑀳𑁂 𑀤𑀺𑀚𑁄 𑀦 𑀧𑀸𑀮𑁂𑀢𑀺, 𑀢𑁂𑀦 𑀧𑀓𑁆𑀔𑀻 𑀦 𑀨𑀦𑁆𑀤𑀢𑀻𑀢𑀺.

𑀩𑀓𑀚𑀸𑀢𑀓𑀁 𑀙𑀝𑁆𑀞𑀁.

𑁨𑁩𑁭. 𑀲𑀸𑀓𑁂𑀢𑀚𑀸𑀢𑀓𑀁 (𑁨-𑁯-𑁭)

𑁧𑁭𑁩. 𑀓𑁄 𑀦𑀼 𑀔𑁄 𑀪𑀕𑀯𑀸 𑀳𑁂𑀢𑀼, 𑀏𑀓𑀘𑁆𑀘𑁂 𑀇𑀥 𑀧𑀼𑀕𑁆𑀕𑀮𑁂;

𑀅𑀢𑀻𑀯 𑀳𑀤𑀬𑀁 𑀦𑀺𑀩𑁆𑀩𑀸𑀢𑀺, 𑀘𑀺𑀢𑁆𑀢𑀜𑁆𑀘𑀸𑀧𑀺 𑀧𑀲𑀻𑀤𑀢𑀺.

𑁧𑁭𑁪. 𑀧𑀼𑀩𑁆𑀩𑁂𑀯 𑀲𑀦𑁆𑀦𑀺𑀯𑀸𑀲𑁂𑀦, 𑀧𑀘𑁆𑀘𑀼𑀧𑁆𑀧𑀦𑁆𑀦𑀳𑀺𑀢𑁂𑀦 𑀯𑀸;

𑀏𑀯𑀁 𑀢𑀁 𑀚𑀸𑀬𑀢𑁂 𑀧𑁂𑀫𑀁, 𑀉𑀧𑁆𑀧𑀮𑀁𑀯 𑀬𑀣𑁄𑀤𑀓𑁂𑀢𑀺.

𑀲𑀸𑀓𑁂𑀢𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁨𑁩𑁮. 𑀏𑀓𑀧𑀤𑀚𑀸𑀢𑀓𑀁 (𑁨-𑁯-𑁮)

𑁧𑁭𑁫. 𑀇𑀗𑁆𑀖 𑀏𑀓𑀧𑀤𑀁 𑀢𑀸𑀢, 𑀅𑀦𑁂𑀓𑀢𑁆𑀣𑀧𑀤𑀲𑁆𑀲𑀺𑀢𑀁 [𑀧𑀤𑀦𑀺𑀲𑁆𑀲𑀺𑀢𑀁 (𑀲𑀻. 𑀧𑀻.)];

𑀓𑀺𑀜𑁆𑀘𑀺 𑀲𑀗𑁆𑀕𑀸𑀳𑀺𑀓𑀁 𑀩𑁆𑀭𑀽𑀲𑀺, 𑀬𑁂𑀦𑀢𑁆𑀣𑁂 𑀲𑀸𑀥𑀬𑁂𑀫𑀲𑁂.

𑁧𑁭𑁬. 𑀤𑀓𑁆𑀔𑁂𑀬𑁆𑀬𑁂𑀓𑀧𑀤𑀁 𑀢𑀸𑀢, 𑀅𑀦𑁂𑀓𑀢𑁆𑀣𑀧𑀤𑀲𑁆𑀲𑀺𑀢𑀁;

𑀢𑀜𑁆𑀘 𑀲𑀻𑀮𑁂𑀦 𑀲𑀜𑁆𑀜𑀼𑀢𑁆𑀢𑀁, 𑀔𑀦𑁆𑀢𑀺𑀬𑀸 𑀉𑀧𑀧𑀸𑀤𑀺𑀢𑀁;

𑀅𑀮𑀁 𑀫𑀺𑀢𑁆𑀢𑁂 𑀲𑀼𑀔𑀸𑀧𑁂𑀢𑀼𑀁, 𑀅𑀫𑀺𑀢𑁆𑀢𑀸𑀦𑀁 𑀤𑀼𑀔𑀸𑀬 𑀘𑀸𑀢𑀺.

𑀏𑀓𑀧𑀤𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁨𑁩𑁯. 𑀳𑀭𑀺𑀢𑀫𑀡𑁆𑀟𑀽𑀓𑀚𑀸𑀢𑀓𑀁 (𑁨-𑁯-𑁯)

𑁧𑁭𑁭. 𑀆𑀲𑀻𑀯𑀺𑀲𑀫𑁆𑀧𑀺 𑀫𑀁 [𑀆𑀲𑀻𑀯𑀺𑀲𑀁 𑀫𑀫𑀁 (𑀲𑀻. 𑀧𑀻.)] 𑀲𑀦𑁆𑀢𑀁, 𑀧𑀯𑀺𑀝𑁆𑀞𑀁 𑀓𑀼𑀫𑀺𑀦𑀸𑀫𑀼𑀔𑀁;

𑀭𑀼𑀘𑁆𑀘𑀢𑁂 𑀳𑀭𑀺𑀢𑀸𑀫𑀸𑀢𑀸, 𑀬𑀁 𑀫𑀁 𑀔𑀸𑀤𑀦𑁆𑀢𑀺 𑀫𑀘𑁆𑀙𑀓𑀸.

𑁧𑁭𑁮. 𑀯𑀺𑀮𑀼𑀫𑁆𑀧𑀢𑁂𑀯 𑀧𑀼𑀭𑀺𑀲𑁄, 𑀬𑀸𑀯𑀲𑁆𑀲 𑀉𑀧𑀓𑀧𑁆𑀧𑀢𑀺;

𑀬𑀤𑀸 𑀘𑀜𑁆𑀜𑁂 𑀯𑀺𑀮𑀼𑀫𑁆𑀧𑀦𑁆𑀢𑀺, 𑀲𑁄 𑀯𑀺𑀮𑀼𑀢𑁆𑀢𑁄 𑀯𑀺𑀮𑀼𑀫𑁆𑀧𑀢𑀻𑀢𑀺 [𑀯𑀺𑀮𑀼𑀧𑁆𑀧𑀢𑀻𑀢𑀺 (?)].

𑀳𑀭𑀺𑀢𑀫𑀡𑁆𑀟𑀽𑀓𑀚𑀸𑀢𑀓𑀁 𑀦𑀯𑀫𑀁.

𑁨𑁪𑁦. 𑀫𑀳𑀸𑀧𑀺𑀗𑁆𑀕𑀮𑀚𑀸𑀢𑀓𑀁 (𑁨-𑁯-𑁧𑁦)

𑁧𑁭𑁯. 𑀲𑀩𑁆𑀩𑁄 𑀚𑀦𑁄 𑀳𑀺𑀁𑀲𑀺𑀢𑁄 𑀧𑀺𑀗𑁆𑀕𑀮𑁂𑀦, 𑀢𑀲𑁆𑀫𑀺𑀁 𑀫𑀢𑁂 𑀧𑀘𑁆𑀘𑀬𑀸 [𑀧𑀘𑁆𑀘𑀬𑀁 (𑀲𑀻. 𑀲𑁆𑀬𑀸. 𑀧𑀻.)] 𑀯𑁂𑀤𑀬𑀦𑁆𑀢𑀺;

𑀧𑀺𑀬𑁄 𑀦𑀼 𑀢𑁂 𑀆𑀲𑀺 𑀅𑀓𑀡𑁆𑀳𑀦𑁂𑀢𑁆𑀢𑁄, 𑀓𑀲𑁆𑀫𑀸 𑀦𑀼 𑀢𑁆𑀯𑀁 𑀭𑁄𑀤𑀲𑀺 𑀤𑁆𑀯𑀸𑀭𑀧𑀸𑀮.

𑁧𑁮𑁦. 𑀦 𑀫𑁂 𑀧𑀺𑀬𑁄 𑀆𑀲𑀺 𑀅𑀓𑀡𑁆𑀳𑀦𑁂𑀢𑁆𑀢𑁄, 𑀪𑀸𑀬𑀸𑀫𑀺 𑀧𑀘𑁆𑀘𑀸𑀕𑀫𑀦𑀸𑀬 𑀢𑀲𑁆𑀲;

𑀇𑀢𑁄 𑀕𑀢𑁄 𑀳𑀺𑀁𑀲𑁂𑀬𑁆𑀬 𑀫𑀘𑁆𑀘𑀼𑀭𑀸𑀚𑀁, 𑀲𑁄 𑀳𑀺𑀁𑀲𑀺𑀢𑁄 𑀆𑀦𑁂𑀬𑁆𑀬 𑀧𑀼𑀦 𑀇𑀥.

𑁧𑁮𑁧. 𑀤𑀟𑁆𑀠𑁄 𑀯𑀸𑀳𑀲𑀳𑀲𑁆𑀲𑁂𑀳𑀺, 𑀲𑀺𑀢𑁆𑀢𑁄 𑀖𑀝𑀲𑀢𑁂𑀳𑀺 𑀲𑁄;

𑀧𑀭𑀺𑀓𑁆𑀔𑀢𑀸 𑀘 𑀲𑀸 𑀪𑀽𑀫𑀺, 𑀫𑀸 𑀪𑀸𑀬𑀺 𑀦𑀸𑀕𑀫𑀺𑀲𑁆𑀲𑀢𑀻𑀢𑀺.

𑀫𑀳𑀸𑀧𑀺𑀗𑁆𑀕𑀮𑀚𑀸𑀢𑀓𑀁 𑀤𑀲𑀫𑀁.

𑀉𑀧𑀸𑀳𑀦𑀯𑀕𑁆𑀕𑁄 𑀦𑀯𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀯𑀭𑀼𑀧𑀸𑀳𑀦 𑀔𑀼𑀚𑁆𑀚 𑀯𑀺𑀓𑀡𑁆𑀡𑀓𑀓𑁄, 𑀅𑀲𑀺𑀢𑀸𑀪𑀼𑀬 𑀧𑀜𑁆𑀘𑀫𑀯𑀘𑁆𑀙𑀦𑀔𑁄;

𑀤𑀺𑀚 𑀧𑁂𑀫𑀯𑀭𑀼𑀢𑁆𑀢𑀫𑀏𑀓𑀧𑀤𑀁, 𑀓𑀼𑀫𑀺𑀦𑀸𑀫𑀼𑀔 𑀧𑀺𑀗𑁆𑀕𑀮𑀓𑁂𑀦 𑀤𑀲𑀸𑀢𑀺.