𑁨. 𑀤𑀼𑀓𑀦𑀺𑀧𑀸𑀢𑁄

𑁧. 𑀤𑀴𑁆𑀳𑀯𑀕𑁆𑀕𑁄

𑁧𑁫𑁧. 𑀭𑀸𑀚𑁄𑀯𑀸𑀤𑀚𑀸𑀢𑀓𑀁 (𑁨-𑁧-𑁧)

𑁧. 𑀤𑀴𑁆𑀳𑀁 𑀤𑀴𑁆𑀳𑀲𑁆𑀲 𑀔𑀺𑀧𑀢𑀺, 𑀩𑀮𑁆𑀮𑀺𑀓𑁄 [𑀫𑀮𑁆𑀮𑀺𑀓𑁄 (𑀲𑀻. 𑀧𑀻.)] 𑀫𑀼𑀤𑀼𑀦𑀸 𑀫𑀼𑀤𑀼𑀁;

𑀲𑀸𑀥𑀼𑀫𑁆𑀧𑀺 𑀲𑀸𑀥𑀼𑀦𑀸 𑀚𑁂𑀢𑀺, 𑀅𑀲𑀸𑀥𑀼𑀫𑁆𑀧𑀺 𑀅𑀲𑀸𑀥𑀼𑀦𑀸;

𑀏𑀢𑀸𑀤𑀺𑀲𑁄 𑀅𑀬𑀁 𑀭𑀸𑀚𑀸, 𑀫𑀕𑁆𑀕𑀸 𑀉𑀬𑁆𑀬𑀸𑀳𑀺 𑀲𑀸𑀭𑀣𑀺.

𑁨. 𑀅𑀓𑁆𑀓𑁄𑀥𑁂𑀦 𑀚𑀺𑀦𑁂 𑀓𑁄𑀥𑀁, 𑀅𑀲𑀸𑀥𑀼𑀁 𑀲𑀸𑀥𑀼𑀦𑀸 𑀚𑀺𑀦𑁂;

𑀚𑀺𑀦𑁂 𑀓𑀤𑀭𑀺𑀬𑀁 𑀤𑀸𑀦𑁂𑀦, 𑀲𑀘𑁆𑀘𑁂𑀦𑀸𑀮𑀺𑀓𑀯𑀸𑀤𑀺𑀦𑀁;

𑀏𑀢𑀸𑀤𑀺𑀲𑁄 𑀅𑀬𑀁 𑀭𑀸𑀚𑀸, 𑀫𑀕𑁆𑀕𑀸 𑀉𑀬𑁆𑀬𑀸𑀳𑀺 𑀲𑀸𑀭𑀣𑀻𑀢𑀺.

𑀭𑀸𑀚𑁄𑀯𑀸𑀤𑀚𑀸𑀢𑀓𑀁 𑀧𑀞𑀫𑀁.

𑁧𑁫𑁨. 𑀅𑀲𑀫𑁂𑀓𑁆𑀔𑀺𑀢𑀓𑀫𑁆𑀫𑀦𑁆𑀢𑀁, 𑀢𑀼𑀭𑀺𑀢𑀸𑀪𑀺𑀦𑀺𑀧𑀸𑀢𑀺𑀦𑀁.

𑀲𑀸𑀦𑀺 𑀓𑀫𑁆𑀫𑀸𑀦𑀺 𑀢𑀧𑁆𑀧𑁂𑀦𑁆𑀢𑀺, 𑀉𑀡𑁆𑀳𑀁𑀯𑀚𑁆𑀛𑁄𑀳𑀺𑀢𑀁 𑀫𑀼𑀔𑁂.

𑁪. 𑀲𑀻𑀳𑁄 𑀘 𑀲𑀻𑀳𑀦𑀸𑀤𑁂𑀦, 𑀤𑀤𑁆𑀤𑀭𑀁 𑀅𑀪𑀺𑀦𑀸𑀤𑀬𑀺;

𑀲𑀼𑀢𑁆𑀯𑀸 𑀲𑀻𑀳𑀲𑁆𑀲 𑀦𑀺𑀕𑁆𑀖𑁄𑀲𑀁, 𑀲𑀺𑀗𑁆𑀕𑀸𑀮𑁄 [𑀲𑀺𑀕𑀸𑀮𑁄 (𑀲𑀻. 𑀲𑁆𑀬𑀸. 𑀧𑀻.)] 𑀤𑀤𑁆𑀤𑀭𑁂 𑀯𑀲𑀁;

𑀪𑀻𑀢𑁄 𑀲𑀦𑁆𑀢𑀸𑀲𑀫𑀸𑀧𑀸𑀤𑀺, 𑀳𑀤𑀬𑀜𑁆𑀘𑀲𑁆𑀲 𑀅𑀧𑁆𑀨𑀮𑀻𑀢𑀺.

𑀲𑀺𑀗𑁆𑀕𑀸𑀮𑀚𑀸𑀢𑀓𑀁 [𑀲𑀺𑀕𑀸𑀮𑀚𑀸𑀢𑀓𑀁 (𑀲𑀻. 𑀲𑁆𑀬𑀸. 𑀧𑀻.)] 𑀤𑀼𑀢𑀺𑀬𑀁.

𑁧𑁫𑁩. 𑀲𑀽𑀓𑀭𑀚𑀸𑀢𑀓𑀁 (𑁨-𑁧-𑁩)

𑁫. 𑀘𑀢𑀼𑀧𑁆𑀧𑀤𑁄 𑀅𑀳𑀁 𑀲𑀫𑁆𑀫, 𑀢𑁆𑀯𑀫𑁆𑀧𑀺 𑀲𑀫𑁆𑀫 𑀘𑀢𑀼𑀧𑁆𑀧𑀤𑁄;

𑀏𑀳𑀺 𑀲𑀫𑁆𑀫 [𑀲𑀻𑀳 (𑀲𑀻. 𑀧𑀻.)] 𑀦𑀺𑀯𑀢𑁆𑀢𑀲𑁆𑀲𑀼, 𑀓𑀺𑀁 𑀦𑀼 𑀪𑀻𑀢𑁄 𑀧𑀮𑀸𑀬𑀲𑀺.

𑁬. 𑀅𑀲𑀼𑀘𑀺 𑀧𑀽𑀢𑀺𑀮𑁄𑀫𑁄𑀲𑀺, 𑀤𑀼𑀕𑁆𑀕𑀦𑁆𑀥𑁄 𑀯𑀸𑀲𑀺 𑀲𑀽𑀓𑀭;

𑀲𑀘𑁂 𑀬𑀼𑀚𑁆𑀛𑀺𑀢𑀼𑀓𑀸𑀫𑁄𑀲𑀺, 𑀚𑀬𑀁 𑀲𑀫𑁆𑀫 𑀤𑀤𑀸𑀫𑀺 𑀢𑁂𑀢𑀺.

𑀲𑀽𑀓𑀭𑀚𑀸𑀢𑀓𑀁 𑀢𑀢𑀺𑀬𑀁.

𑁧𑁫𑁪. 𑀉𑀭𑀕𑀚𑀸𑀢𑀓 (𑁨-𑁧-𑁪)

𑁭. 𑀇𑀥𑀽𑀭𑀕𑀸𑀦𑀁 𑀧𑀯𑀭𑁄 𑀧𑀯𑀺𑀝𑁆𑀞𑁄, 𑀲𑁂𑀮𑀲𑁆𑀲 𑀯𑀡𑁆𑀡𑁂𑀦 𑀧𑀫𑁄𑀓𑁆𑀔𑀫𑀺𑀘𑁆𑀙𑀁;

𑀩𑁆𑀭𑀳𑁆𑀫𑀜𑁆𑀘 𑀯𑀡𑁆𑀡𑀁 [𑀯𑀓𑁆𑀓𑀁 (𑀓.)] 𑀅𑀧𑀘𑀸𑀬𑀫𑀸𑀦𑁄, 𑀩𑀼𑀪𑀼𑀓𑁆𑀔𑀺𑀢𑁄 𑀦𑁄 𑀯𑀺𑀢𑀭𑀸𑀫𑀺 [𑀯𑀺𑀲𑀳𑀸𑀫𑀺 (𑀓. 𑀲𑀺. 𑀲𑁆𑀬𑀸. 𑀧𑀻.)] 𑀪𑁄𑀢𑁆𑀢𑀼𑀁.

𑁮. 𑀲𑁄 𑀩𑁆𑀭𑀳𑁆𑀫𑀕𑀼𑀢𑁆𑀢𑁄 𑀘𑀺𑀭𑀫𑁂𑀯 𑀚𑀻𑀯, 𑀤𑀺𑀩𑁆𑀬𑀸 𑀘 𑀢𑁂 𑀧𑀸𑀢𑀼𑀪𑀯𑀦𑁆𑀢𑀼 𑀪𑀓𑁆𑀔𑀸;

𑀬𑁄 𑀩𑁆𑀭𑀳𑁆𑀫𑀯𑀡𑁆𑀡𑀁 𑀅𑀧𑀘𑀸𑀬𑀫𑀸𑀦𑁄, 𑀩𑀼𑀪𑀼𑀓𑁆𑀔𑀺𑀢𑁄 𑀦𑁄 𑀯𑀺𑀢𑀭𑀸𑀲𑀺 [𑀲𑀩𑁆𑀩𑀢𑁆𑀣𑀧𑀺 𑀲𑀫𑀸𑀦𑀁] 𑀪𑁄𑀢𑁆𑀢𑀼𑀦𑁆𑀢𑀺.

𑀉𑀭𑀕𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁧𑁫𑁫. 𑀪𑀕𑁆𑀕𑀚𑀸𑀢𑀓𑀁 (𑁨-𑁧-𑁫)

𑁯. 𑀚𑀻𑀯 𑀯𑀲𑁆𑀲𑀲𑀢𑀁 𑀪𑀕𑁆𑀕 [𑀕𑀕𑁆𑀕 (𑀲𑀻. 𑀧𑀻.)], 𑀅𑀧𑀭𑀸𑀦𑀺 𑀘 𑀯𑀻𑀲𑀢𑀺𑀁 [𑀯𑀻𑀲𑀢𑀺 (𑀲𑁆𑀬𑀸. 𑀓.)];

𑀫𑀸 𑀫𑀁 𑀧𑀺𑀲𑀸𑀘𑀸 𑀔𑀸𑀤𑀦𑁆𑀢𑀼, 𑀚𑀻𑀯 𑀢𑁆𑀯𑀁 𑀲𑀭𑀤𑁄 𑀲𑀢𑀁.

𑁧𑁦. 𑀢𑁆𑀯𑀫𑁆𑀧𑀺 𑀯𑀲𑁆𑀲𑀲𑀢𑀁 𑀚𑀻𑀯, 𑀅𑀧𑀭𑀸𑀦𑀺 𑀘 𑀯𑀻𑀲𑀢𑀺𑀁;

𑀯𑀺𑀲𑀁 𑀧𑀺𑀲𑀸𑀘𑀸 𑀔𑀸𑀤𑀦𑁆𑀢𑀼, 𑀚𑀻𑀯 𑀢𑁆𑀯𑀁 𑀲𑀭𑀤𑁄 𑀲𑀢𑀦𑁆𑀢𑀺.

𑀪𑀕𑁆𑀕𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁧𑁫𑁬. 𑀅𑀮𑀻𑀦𑀘𑀺𑀢𑁆𑀢𑀚𑀸𑀢𑀓𑀁 (𑁨-𑁧-𑁬)

𑁧𑁧. 𑀅𑀮𑀻𑀦𑀘𑀺𑀢𑁆𑀢𑀁 𑀦𑀺𑀲𑁆𑀲𑀸𑀬, 𑀧𑀳𑀝𑁆𑀞𑀸 𑀫𑀳𑀢𑀻 𑀘𑀫𑀽;

𑀓𑁄𑀲𑀮𑀁 𑀲𑁂𑀦𑀸𑀲𑀦𑁆𑀢𑀼𑀝𑁆𑀞𑀁, 𑀚𑀻𑀯𑀕𑁆𑀕𑀸𑀳𑀁 𑀅𑀕𑀸𑀳𑀬𑀺.

𑁧𑁨. 𑀏𑀯𑀁 𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄, 𑀪𑀺𑀓𑁆𑀔𑀼 𑀆𑀭𑀤𑁆𑀥𑀯𑀻𑀭𑀺𑀬𑁄;

𑀪𑀸𑀯𑀬𑀁 𑀓𑀼𑀲𑀮𑀁 𑀥𑀫𑁆𑀫𑀁, 𑀬𑁄𑀕𑀓𑁆𑀔𑁂𑀫𑀲𑁆𑀲 𑀧𑀢𑁆𑀢𑀺𑀬𑀸;

𑀧𑀸𑀧𑀼𑀡𑁂 𑀅𑀦𑀼𑀧𑀼𑀩𑁆𑀩𑁂𑀦, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬𑀦𑁆𑀢𑀺.

𑀅𑀮𑀻𑀦𑀘𑀺𑀢𑁆𑀢𑀚𑀸𑀢𑀓𑀁 𑀙𑀝𑁆𑀞𑀁.

𑁧𑁫𑁭. 𑀕𑀼𑀡𑀚𑀸𑀢𑀓𑀁 (𑁨-𑁧-𑁭)

𑁧𑁩. 𑀬𑁂𑀦 𑀓𑀸𑀫𑀁 𑀧𑀡𑀸𑀫𑁂𑀢𑀺, 𑀥𑀫𑁆𑀫𑁄 𑀩𑀮𑀯𑀢𑀁 𑀫𑀺𑀕𑀻;

𑀉𑀦𑁆𑀦𑀤𑀦𑁆𑀢𑀻 𑀯𑀺𑀚𑀸𑀦𑀸𑀳𑀺, 𑀚𑀸𑀢𑀁 𑀲𑀭𑀡𑀢𑁄 𑀪𑀬𑀁.

𑁧𑁪. 𑀅𑀧𑀺 𑀘𑁂𑀧𑀺 𑀤𑀼𑀩𑁆𑀩𑀮𑁄 𑀫𑀺𑀢𑁆𑀢𑁄, 𑀫𑀺𑀢𑁆𑀢𑀥𑀫𑁆𑀫𑁂𑀲𑀼 𑀢𑀺𑀝𑁆𑀞𑀢𑀺;

𑀲𑁄 𑀜𑀸𑀢𑀓𑁄 𑀘 𑀩𑀦𑁆𑀥𑀼 𑀘, 𑀲𑁄 𑀫𑀺𑀢𑁆𑀢𑁄 𑀲𑁄 𑀘 𑀫𑁂 𑀲𑀔𑀸;

𑀤𑀸𑀞𑀺𑀦𑀺 𑀫𑀸𑀢𑀺𑀫𑀜𑁆𑀜𑀺𑀢𑁆𑀣𑁄 [𑀫𑀜𑁆𑀜𑀺𑀯𑁄 (𑀲𑁆𑀬𑀸.), 𑀫𑀜𑁆𑀜𑀯𑁆𑀳𑁄 (𑀓.)], 𑀲𑀺𑀗𑁆𑀕𑀸𑀮𑁄 𑀫𑀫 𑀧𑀸𑀡𑀤𑁄𑀢𑀺.

𑀕𑀼𑀡𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁧𑁫𑁮. 𑀲𑀼𑀳𑀦𑀼𑀚𑀸𑀢𑀓𑀁 (𑁨-𑁧-𑁮)

𑁧𑁫. 𑀦𑀬𑀺𑀤𑀁 𑀯𑀺𑀲𑀫𑀲𑀻𑀮𑁂𑀦, 𑀲𑁄𑀡𑁂𑀦 𑀲𑀼𑀳𑀦𑀽 𑀲𑀳;

𑀲𑀼𑀳𑀦𑀽𑀧𑀺 𑀢𑀸𑀤𑀺𑀲𑁄𑀬𑁂𑀯, 𑀬𑁄 𑀲𑁄𑀡𑀲𑁆𑀲 𑀲𑀕𑁄𑀘𑀭𑁄.

𑁧𑁬. 𑀧𑀓𑁆𑀔𑀦𑁆𑀤𑀺𑀦𑀸 𑀧𑀕𑀩𑁆𑀪𑁂𑀦, 𑀦𑀺𑀘𑁆𑀘𑀁 𑀲𑀦𑁆𑀤𑀸𑀦𑀔𑀸𑀤𑀺𑀦𑀸;

𑀲𑀫𑁂𑀢𑀺 𑀧𑀸𑀧𑀁 𑀧𑀸𑀧𑁂𑀦, 𑀲𑀫𑁂𑀢𑀺 𑀅𑀲𑀢𑀸 𑀅𑀲𑀦𑁆𑀢𑀺.

𑀲𑀼𑀳𑀦𑀼𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁧𑁫𑁯. 𑀫𑁄𑀭𑀚𑀸𑀢𑀓𑀁 (𑁨-𑁧-𑁯)

𑁧𑁭. 𑀉𑀤𑁂𑀢𑀬𑀁 𑀘𑀓𑁆𑀔𑀼𑀫𑀸 𑀏𑀓𑀭𑀸𑀚𑀸, 𑀳𑀭𑀺𑀲𑁆𑀲𑀯𑀡𑁆𑀡𑁄 𑀧𑀣𑀯𑀺𑀧𑁆𑀧𑀪𑀸𑀲𑁄 [𑀧𑀞𑀯𑀺𑀧𑁆𑀧𑀪𑀸𑀲𑁄 (𑀲𑀻. 𑀲𑁆𑀬𑀸. 𑀧𑀻.)];

𑀢𑀁 𑀢𑀁 𑀦𑀫𑀲𑁆𑀲𑀸𑀫𑀺 𑀳𑀭𑀺𑀲𑁆𑀲𑀯𑀡𑁆𑀡𑀁 𑀧𑀣𑀯𑀺𑀧𑁆𑀧𑀪𑀸𑀲𑀁, 𑀢𑀬𑀸𑀚𑁆𑀚 𑀕𑀼𑀢𑁆𑀢𑀸 𑀯𑀺𑀳𑀭𑁂𑀫𑀼 𑀤𑀺𑀯𑀲𑀁.

𑀬𑁂 𑀩𑁆𑀭𑀸𑀳𑁆𑀫𑀡𑀸 𑀯𑁂𑀤𑀕𑀽 𑀲𑀩𑁆𑀩𑀥𑀫𑁆𑀫𑁂, 𑀢𑁂 𑀫𑁂 𑀦𑀫𑁄 𑀢𑁂 𑀘 𑀫𑀁 𑀧𑀸𑀮𑀬𑀦𑁆𑀢𑀼;

𑀦𑀫𑀢𑁆𑀣𑀼 𑀩𑀼𑀤𑁆𑀥𑀸𑀦𑀁 [𑀩𑀼𑀤𑁆𑀥𑀸𑀦 (?)] 𑀦𑀫𑀢𑁆𑀣𑀼 𑀩𑁄𑀥𑀺𑀬𑀸, 𑀦𑀫𑁄 𑀯𑀺𑀫𑀼𑀢𑁆𑀢𑀸𑀦𑀁 [𑀯𑀺𑀫𑀼𑀢𑁆𑀢𑀸𑀦 (?)] 𑀦𑀫𑁄 𑀯𑀺𑀫𑀼𑀢𑁆𑀢𑀺𑀬𑀸;

𑀇𑀫𑀁 𑀲𑁄 𑀧𑀭𑀺𑀢𑁆𑀢𑀁 𑀓𑀢𑁆𑀯𑀸, 𑀫𑁄𑀭𑁄 𑀘𑀭𑀢𑀺 𑀏𑀲𑀦𑀸.

𑁧𑁮. 𑀅𑀧𑁂𑀢𑀬𑀁 𑀘𑀓𑁆𑀔𑀼𑀫𑀸 𑀏𑀓𑀭𑀸𑀚𑀸, 𑀳𑀭𑀺𑀲𑁆𑀲𑀯𑀡𑁆𑀡𑁄 𑀧𑀣𑀯𑀺𑀧𑁆𑀧𑀪𑀸𑀲𑁄;

𑀢𑀁 𑀢𑀁 𑀦𑀫𑁆𑀫𑀲𑁆𑀲𑀸𑀫𑀺 𑀳𑀭𑀺𑀲𑁆𑀲𑀯𑀡𑁆𑀡𑀁 𑀧𑀣𑀯𑀺𑀧𑁆𑀧𑀪𑀸𑀲𑀁, 𑀢𑀬𑀸𑀚𑁆𑀚 𑀕𑀼𑀢𑁆𑀢𑀸 𑀯𑀺𑀳𑀭𑁂𑀫𑀼 𑀭𑀢𑁆𑀢𑀺𑀁.

𑀬𑁂 𑀩𑁆𑀭𑀸𑀳𑁆𑀫𑀡𑀸 𑀯𑁂𑀤𑀕𑀽 𑀲𑀩𑁆𑀩𑀥𑀫𑁆𑀫𑁂, 𑀢𑁂 𑀫𑁂 𑀦𑀫𑁄 𑀢𑁂 𑀘 𑀫𑀁 𑀧𑀸𑀮𑀬𑀦𑁆𑀢𑀼;

𑀦𑀫𑀢𑁆𑀣𑀼 𑀩𑀼𑀤𑁆𑀥𑀸𑀦𑀁 𑀦𑀫𑀢𑁆𑀣𑀼 𑀩𑁄𑀥𑀺𑀬𑀸, 𑀦𑀫𑁄 𑀯𑀺𑀫𑀼𑀢𑁆𑀢𑀸𑀦𑀁 𑀦𑀫𑁄 𑀯𑀺𑀫𑀼𑀢𑁆𑀢𑀺𑀬𑀸;

𑀇𑀫𑀁 𑀲𑁄 𑀧𑀭𑀺𑀢𑁆𑀢𑀁 𑀓𑀢𑁆𑀯𑀸, 𑀫𑁄𑀭𑁄 𑀯𑀸𑀲𑀫𑀓𑀧𑁆𑀧𑀬𑀻𑀢𑀺.

𑀫𑁄𑀭𑀚𑀸𑀢𑀓𑀁 𑀦𑀯𑀫𑀁.

𑁧𑁬𑁦. 𑀯𑀺𑀦𑀻𑀮𑀚𑀸𑀢𑀓𑀁 (𑁨-𑁧-𑁧𑁦)

𑁧𑁯. 𑀏𑀯𑀫𑁂𑀯 𑀦𑀽𑀦 [𑀦𑀼 (𑀓.)] 𑀭𑀸𑀚𑀸𑀦𑀁, 𑀯𑁂𑀤𑁂𑀳𑀁 𑀫𑀺𑀣𑀺𑀮𑀕𑁆𑀕𑀳𑀁;

𑀅𑀲𑁆𑀲𑀸 𑀯𑀳𑀦𑁆𑀢𑀺 𑀆𑀚𑀜𑁆𑀜𑀸, 𑀬𑀣𑀸 𑀳𑀁𑀲𑀸 𑀯𑀺𑀦𑀻𑀮𑀓𑀁.

𑁨𑁦. 𑀯𑀺𑀦𑀻𑀮 𑀤𑀼𑀕𑁆𑀕𑀁 𑀪𑀚𑀲𑀺, 𑀅𑀪𑀽𑀫𑀺𑀁 𑀢𑀸𑀢 𑀲𑁂𑀯𑀲𑀺;

𑀕𑀸𑀫𑀦𑁆𑀢𑀓𑀸𑀦𑀺 [𑀕𑀸𑀫𑀦𑁆𑀢𑀺𑀓𑀸𑀦𑀺 (𑀲𑀻.), 𑀕𑀸𑀫𑀦𑁆𑀢𑀭𑀸𑀦𑀺 (𑀓.)] 𑀲𑁂𑀯𑀲𑁆𑀲𑀼, 𑀏𑀢𑀁 𑀫𑀸𑀢𑀸𑀮𑀬𑀁 𑀢𑀯𑀸𑀢𑀺.

𑀯𑀺𑀦𑀻𑀮𑀚𑀸𑀢𑀓𑀁 𑀤𑀲𑀫𑀁.

𑀤𑀴𑁆𑀳𑀯𑀕𑁆𑀕𑁄 𑀧𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀯𑀭𑀩𑀮𑁆𑀮𑀺𑀓 𑀤𑀤𑁆𑀤𑀭 𑀲𑀽𑀓𑀭𑀓𑁄, 𑀉𑀭𑀕𑀽𑀢𑁆𑀢𑀫 𑀧𑀜𑁆𑀘𑀫𑀪𑀕𑁆𑀕𑀯𑀭𑁄;

𑀫𑀳𑀢𑀻𑀘𑀫𑀼 𑀬𑀸𑀯 𑀲𑀺𑀗𑁆𑀕𑀸𑀮𑀯𑀭𑁄, 𑀲𑀼𑀳𑀦𑀼𑀢𑁆𑀢𑀫 𑀫𑁄𑀭 𑀯𑀺𑀦𑀻𑀮𑀁 𑀤𑀲𑀸𑀢𑀺.

𑁨. 𑀲𑀦𑁆𑀣𑀯𑀯𑀕𑁆𑀕𑁄

𑁧𑁬𑁧. 𑀇𑀦𑁆𑀤𑀲𑀫𑀸𑀦𑀕𑁄𑀢𑁆𑀢𑀚𑀸𑀢𑀓𑀁 (𑁨-𑁨-𑁧)

𑁨𑁧. 𑀦 𑀲𑀦𑁆𑀣𑀯𑀁 [𑀲𑀦𑁆𑀥𑀯𑀁 (𑀓.)] 𑀓𑀸𑀧𑀼𑀭𑀺𑀲𑁂𑀦 𑀓𑀬𑀺𑀭𑀸, 𑀅𑀭𑀺𑀬𑁄 𑀅𑀦𑀭𑀺𑀬𑁂𑀦 𑀧𑀚𑀸𑀦𑀫𑀢𑁆𑀣𑀁;

𑀘𑀺𑀭𑀸𑀦𑀼𑀯𑀼𑀢𑁆𑀣𑁄𑀧𑀺 𑀓𑀭𑁄𑀢𑀺 𑀧𑀸𑀧𑀁, 𑀕𑀚𑁄 𑀬𑀣𑀸 𑀇𑀦𑁆𑀤𑀲𑀫𑀸𑀦𑀕𑁄𑀢𑁆𑀢𑀁.

𑁨𑁨. 𑀬𑀁 𑀢𑁆𑀯𑁂𑀯 𑀚𑀜𑁆𑀜𑀸 𑀲𑀤𑀺𑀲𑁄 𑀫𑀫𑀦𑁆𑀢𑀺, 𑀲𑀻𑀮𑁂𑀦 𑀧𑀜𑁆𑀜𑀸𑀬 𑀲𑀼𑀢𑁂𑀦 𑀘𑀸𑀧𑀺;

𑀢𑁂𑀦𑁂𑀯 𑀫𑁂𑀢𑁆𑀢𑀺𑀁 𑀓𑀬𑀺𑀭𑀸𑀣 𑀲𑀤𑁆𑀥𑀺𑀁, 𑀲𑀼𑀔𑁄 𑀳𑀯𑁂 𑀲𑀧𑁆𑀧𑀼𑀭𑀺𑀲𑁂𑀦 𑀲𑀗𑁆𑀕𑀫𑁄𑀢𑀺.

𑀇𑀦𑁆𑀤𑀲𑀫𑀸𑀦𑀕𑁄𑀢𑁆𑀢𑀚𑀸𑀢𑀓𑀁 𑀧𑀞𑀫𑀁.

𑁧𑁬𑁨. 𑀲𑀦𑁆𑀣𑀯𑀚𑀸𑀢𑀓𑀁 (𑁨-𑁨-𑁨)

𑁨𑁩. 𑀦 𑀲𑀦𑁆𑀣𑀯𑀲𑁆𑀫𑀸 𑀧𑀭𑀫𑀢𑁆𑀣𑀺 𑀧𑀸𑀧𑀺𑀬𑁄, 𑀬𑁄 𑀲𑀦𑁆𑀣𑀯𑁄 [𑀲𑀦𑁆𑀥𑀯𑁄 (𑀓.)] 𑀓𑀸𑀧𑀼𑀭𑀺𑀲𑁂𑀦 𑀳𑁄𑀢𑀺;

𑀲𑀦𑁆𑀢𑀧𑁆𑀧𑀺𑀢𑁄 𑀲𑀧𑁆𑀧𑀺𑀦𑀸 𑀧𑀸𑀬𑀲𑁂𑀦 [𑀧𑀸𑀬𑀸𑀲𑁂𑀦 (𑀓.)], 𑀓𑀺𑀘𑁆𑀙𑀸𑀓𑀢𑀁 𑀧𑀡𑁆𑀡𑀓𑀼𑀝𑀺𑀁 𑀅𑀤𑀬𑁆𑀳𑀺 [𑀅𑀤𑀟𑁆𑀠𑀳𑀺 (𑀲𑀻. 𑀲𑁆𑀬𑀸.), 𑀅𑀤𑀝𑁆𑀞𑀳𑀺 (𑀧𑀻.), 𑀅𑀤𑀤𑁆𑀤𑀳𑀺 (?)].

𑁨𑁪. 𑀦 𑀲𑀦𑁆𑀣𑀯𑀲𑁆𑀫𑀸 𑀧𑀭𑀫𑀢𑁆𑀣𑀺 𑀲𑁂𑀬𑁆𑀬𑁄, 𑀬𑁄 𑀲𑀦𑁆𑀣𑀯𑁄 𑀲𑀧𑁆𑀧𑀼𑀭𑀺𑀲𑁂𑀦 𑀳𑁄𑀢𑀺;

𑀲𑀻𑀳𑀲𑁆𑀲 𑀩𑁆𑀬𑀕𑁆𑀖𑀲𑁆𑀲 𑀘 𑀤𑀻𑀧𑀺𑀦𑁄 𑀘, 𑀲𑀸𑀫𑀸 𑀫𑀼𑀔𑀁 𑀮𑁂𑀳𑀢𑀺 𑀲𑀦𑁆𑀣𑀯𑁂𑀦𑀸𑀢𑀺.

𑀲𑀦𑁆𑀣𑀯𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁧𑁬𑁩. 𑀲𑀼𑀲𑀻𑀫𑀚𑀸𑀢𑀓𑀁 (𑁨-𑁨-𑁩)

𑁨𑁫. 𑀓𑀸𑀴𑀸 𑀫𑀺𑀕𑀸 𑀲𑁂𑀢𑀤𑀦𑁆𑀢𑀸 𑀢𑀯𑀻𑀫𑁂 [𑀢𑀯 𑀇𑀫𑁂 (𑀲𑀻. 𑀲𑁆𑀬𑀸. 𑀧𑀻.)], 𑀧𑀭𑁄𑀲𑀢𑀁 𑀳𑁂𑀫𑀚𑀸𑀮𑀸𑀪𑀺𑀙𑀦𑁆𑀦𑀸 [𑀳𑁂𑀫𑀚𑀸𑀮𑀸𑀪𑀺𑀲𑀜𑁆𑀙𑀦𑁆𑀦𑀸 (𑀲𑀻.)];

𑀢𑁂 𑀢𑁂 𑀤𑀤𑀸𑀫𑀻𑀢𑀺 𑀲𑀼𑀲𑀻𑀫 𑀩𑁆𑀭𑀽𑀲𑀺, 𑀅𑀦𑀼𑀲𑁆𑀲𑀭𑀁 𑀧𑁂𑀢𑁆𑀢𑀺𑀧𑀺𑀢𑀸𑀫𑀳𑀸𑀦𑀁.

𑁨𑁬. 𑀓𑀸𑀴𑀸 𑀫𑀺𑀕𑀸 𑀲𑁂𑀢𑀤𑀦𑁆𑀢𑀸 𑀫𑀫𑀻𑀫𑁂 [𑀫𑀫 𑀇𑀫𑁂 (𑀲𑀻. 𑀧𑀻.)], 𑀧𑀭𑁄𑀲𑀢𑀁 𑀳𑁂𑀫𑀚𑀸𑀮𑀸𑀪𑀺𑀘𑁆𑀙𑀦𑁆𑀦𑀸;

𑀢𑁂 𑀢𑁂 𑀤𑀤𑀸𑀫𑀻𑀢𑀺 𑀯𑀤𑀸𑀫𑀺 𑀫𑀸𑀡𑀯, 𑀅𑀦𑀼𑀲𑁆𑀲𑀭𑀁 𑀧𑁂𑀢𑁆𑀢𑀺𑀧𑀺𑀢𑀸𑀫𑀳𑀸𑀦𑀦𑁆𑀢𑀺.

𑀲𑀼𑀲𑀻𑀫𑀚𑀸𑀢𑀓𑀁 𑀢𑀢𑀺𑀬𑀁.

𑁧𑁬𑁪. 𑀕𑀺𑀚𑁆𑀛𑀚𑀸𑀢𑀓𑀁 (𑁨-𑁨-𑁪)

𑁨𑁭. 𑀬𑀁 𑀦𑀼 𑀕𑀺𑀚𑁆𑀛𑁄 𑀬𑁄𑀚𑀦𑀲𑀢𑀁, 𑀓𑀼𑀡𑀧𑀸𑀦𑀺 𑀅𑀯𑁂𑀓𑁆𑀔𑀢𑀺;

𑀓𑀲𑁆𑀫𑀸 𑀚𑀸𑀮𑀜𑁆𑀘 𑀧𑀸𑀲𑀜𑁆𑀘, 𑀆𑀲𑀚𑁆𑀚𑀸𑀧𑀺 𑀦 𑀩𑀼𑀚𑁆𑀛𑀲𑀺.

𑁨𑁮. 𑀬𑀤𑀸 𑀧𑀭𑀸𑀪𑀯𑁄 𑀳𑁄𑀢𑀺, 𑀧𑁄𑀲𑁄 𑀚𑀻𑀯𑀺𑀢𑀲𑀗𑁆𑀔𑀬𑁂;

𑀅𑀣 𑀚𑀸𑀮𑀜𑁆𑀘 𑀧𑀸𑀲𑀜𑁆𑀘, 𑀆𑀲𑀚𑁆𑀚𑀸𑀧𑀺 𑀦 𑀩𑀼𑀚𑁆𑀛𑀢𑀻𑀢𑀺.

𑀕𑀺𑀚𑁆𑀛𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁧𑁬𑁫. 𑀦𑀓𑀼𑀮𑀚𑀸𑀢𑀓𑀁 (𑁨-𑁨-𑁫)

𑁨𑁯. 𑀲𑀦𑁆𑀥𑀺𑀁 𑀓𑀢𑁆𑀯𑀸 𑀅𑀫𑀺𑀢𑁆𑀢𑁂𑀦, 𑀅𑀡𑁆𑀟𑀚𑁂𑀦 𑀚𑀮𑀸𑀩𑀼𑀚;

𑀯𑀺𑀯𑀭𑀺𑀬 𑀤𑀸𑀞𑀁 𑀲𑁂𑀲𑀺 [𑀲𑀬𑀲𑀺 (𑀲𑀻. 𑀲𑁆𑀬𑀸. 𑀧𑀻.)], 𑀓𑀼𑀢𑁄 𑀢𑁂 𑀪𑀬𑀫𑀸𑀕𑀢𑀁.

𑁩𑁦. 𑀲𑀗𑁆𑀓𑁂𑀣𑁂𑀯 [𑀲𑀗𑁆𑀓𑀢𑁂𑀯 (𑀓.)] 𑀅𑀫𑀺𑀢𑁆𑀢𑀲𑁆𑀫𑀺𑀁, 𑀫𑀺𑀢𑁆𑀢𑀲𑁆𑀫𑀺𑀫𑁆𑀧𑀺 𑀦 𑀯𑀺𑀲𑁆𑀲𑀲𑁂;

𑀅𑀪𑀬𑀸 𑀪𑀬𑀫𑀼𑀧𑁆𑀧𑀦𑁆𑀦𑀁, 𑀅𑀧𑀺 𑀫𑀽𑀮𑀸𑀦𑀺 𑀓𑀦𑁆𑀢𑀢𑀻𑀢𑀺 [𑀫𑀽𑀮𑀁 𑀦𑀺𑀓𑀦𑁆𑀢𑀢𑀻𑀢𑀺 (𑀲𑀻.)].

𑀦𑀓𑀼𑀮𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁧𑁬𑁬. 𑀉𑀧𑀲𑀸𑀴𑀓𑀚𑀸𑀢𑀓𑀁 (𑁨-𑁨-𑁬)

𑁩𑁧. 𑀉𑀧𑀲𑀸𑀴𑀓𑀦𑀸𑀫𑀸𑀦𑀺 [𑀉𑀧𑀲𑀸𑀴𑁆𑀳𑀓𑀦𑀸𑀫𑀸𑀦𑀁 (𑀲𑀻. 𑀲𑁆𑀬𑀸. 𑀧𑀻.)], 𑀲𑀳𑀲𑁆𑀲𑀸𑀦𑀺 𑀘𑀢𑀼𑀤𑁆𑀤𑀲;

𑀅𑀲𑁆𑀫𑀺𑀁 𑀧𑀤𑁂𑀲𑁂 𑀤𑀟𑁆𑀠𑀸𑀦𑀺, 𑀦𑀢𑁆𑀣𑀺 𑀮𑁄𑀓𑁂 𑀅𑀦𑀸𑀫𑀢𑀁.

𑁩𑁨. 𑀬𑀫𑁆𑀳𑀺 𑀲𑀘𑁆𑀘𑀜𑁆𑀘 𑀥𑀫𑁆𑀫𑁄 𑀘, 𑀅𑀳𑀺𑀁𑀲𑀸 𑀲𑀁𑀬𑀫𑁄 𑀤𑀫𑁄;

𑀏𑀢𑀁 𑀅𑀭𑀺𑀬𑀸 𑀲𑁂𑀯𑀦𑁆𑀢𑀺, 𑀏𑀢𑀁 𑀮𑁄𑀓𑁂 𑀅𑀦𑀸𑀫𑀢𑀦𑁆𑀢𑀺.

𑀉𑀧𑀲𑀸𑀴𑀓𑀚𑀸𑀢𑀓𑀁 𑀙𑀝𑁆𑀞𑀁.

𑁧𑁬𑁭. 𑀲𑀫𑀺𑀤𑁆𑀥𑀺𑀚𑀸𑀢𑀓𑀁 (𑁨-𑁨-𑁭)

𑁩𑁩. 𑀅𑀪𑀼𑀢𑁆𑀯𑀸 𑀪𑀺𑀓𑁆𑀔𑀲𑀺 𑀪𑀺𑀓𑁆𑀔𑀼, 𑀦 𑀳𑀺 𑀪𑀼𑀢𑁆𑀯𑀸𑀦 𑀪𑀺𑀓𑁆𑀔𑀲𑀺;

𑀪𑀼𑀢𑁆𑀯𑀸𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀲𑁆𑀲𑀼, 𑀫𑀸 𑀢𑀁 𑀓𑀸𑀮𑁄 𑀉𑀧𑀘𑁆𑀘𑀕𑀸.

𑁩𑁪. 𑀓𑀸𑀮𑀁 𑀯𑁄𑀳𑀁 𑀦 𑀚𑀸𑀦𑀸𑀫𑀺, 𑀙𑀦𑁆𑀦𑁄 𑀓𑀸𑀮𑁄 𑀦 𑀤𑀺𑀲𑁆𑀲𑀢𑀺;

𑀢𑀲𑁆𑀫𑀸 𑀅𑀪𑀼𑀢𑁆𑀯𑀸 𑀪𑀺𑀓𑁆𑀔𑀸𑀫𑀺, 𑀫𑀸 𑀫𑀁 𑀓𑀸𑀮𑁄 𑀉𑀧𑀘𑁆𑀘𑀕𑀸𑀢𑀺.

𑀲𑀫𑀺𑀤𑁆𑀥𑀺𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁧𑁬𑁮. 𑀲𑀓𑀼𑀡𑀕𑁆𑀖𑀺𑀚𑀸𑀢𑀓𑀁 (𑁨-𑁨-𑁮)

𑁩𑁫. 𑀲𑁂𑀦𑁄 𑀩𑀮𑀲𑀸 𑀧𑀢𑀫𑀸𑀦𑁄, 𑀮𑀸𑀧𑀁 𑀕𑁄𑀘𑀭𑀞𑀸𑀬𑀺𑀦𑀁;

𑀲𑀳𑀲𑀸 𑀅𑀚𑁆𑀛𑀧𑁆𑀧𑀢𑁆𑀢𑁄𑀯, 𑀫𑀭𑀡𑀁 𑀢𑁂𑀦𑀼𑀧𑀸𑀕𑀫𑀺.

𑁩𑁬. 𑀲𑁄𑀳𑀁 𑀦𑀬𑁂𑀦 𑀲𑀫𑁆𑀧𑀦𑁆𑀦𑁄, 𑀧𑁂𑀢𑁆𑀢𑀺𑀓𑁂 𑀕𑁄𑀘𑀭𑁂 𑀭𑀢𑁄;

𑀅𑀧𑁂𑀢𑀲𑀢𑁆𑀢𑀼 𑀫𑁄𑀤𑀸𑀫𑀺, 𑀲𑀫𑁆𑀧𑀲𑁆𑀲𑀁 𑀅𑀢𑁆𑀣𑀫𑀢𑁆𑀢𑀦𑁄𑀢𑀺.

𑀲𑀓𑀼𑀡𑀕𑁆𑀖𑀺𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁧𑁬𑁯. 𑀅𑀭𑀓𑀚𑀸𑀢𑀓𑀁 (𑁨-𑁨-𑁯)

𑁩𑁭. 𑀬𑁄 𑀯𑁂 𑀫𑁂𑀢𑁆𑀢𑁂𑀦 𑀘𑀺𑀢𑁆𑀢𑁂𑀦, 𑀲𑀩𑁆𑀩𑀮𑁄𑀓𑀸𑀦𑀼𑀓𑀫𑁆𑀧𑀢𑀺;

𑀉𑀤𑁆𑀥𑀁 𑀅𑀥𑁄 𑀘 𑀢𑀺𑀭𑀺𑀬𑀁, 𑀅𑀧𑁆𑀧𑀫𑀸𑀡𑁂𑀦 𑀲𑀩𑁆𑀩𑀲𑁄.

𑁩𑁮. 𑀅𑀧𑁆𑀧𑀫𑀸𑀡𑀁 𑀳𑀺𑀢𑀁 𑀘𑀺𑀢𑁆𑀢𑀁, 𑀧𑀭𑀺𑀧𑀼𑀡𑁆𑀡𑀁 𑀲𑀼𑀪𑀸𑀯𑀺𑀢𑀁;

𑀬𑀁 𑀧𑀫𑀸𑀡𑀓𑀢𑀁 𑀓𑀫𑁆𑀫𑀁, 𑀦 𑀢𑀁 𑀢𑀢𑁆𑀭𑀸𑀯𑀲𑀺𑀲𑁆𑀲𑀢𑀻𑀢𑀺.

𑀅𑀭𑀓𑀚𑀸𑀢𑀓𑀁 𑀦𑀯𑀫𑀁.

𑁧𑁭𑁦. 𑀓𑀓𑀡𑁆𑀝𑀓𑀚𑀸𑀢𑀓𑀁 (𑁨-𑁨-𑁧𑁦)

𑁩𑁯. 𑀦𑀸𑀬𑀁 𑀧𑀼𑀭𑁂 𑀉𑀡𑁆𑀡𑀫𑀢𑀺 [𑀉𑀦𑁆𑀦𑀫𑀢𑀺 (𑀲𑁆𑀬𑀸.)], 𑀢𑁄𑀭𑀡𑀕𑁆𑀕𑁂 𑀓𑀓𑀡𑁆𑀝𑀓𑁄;

𑀫𑀳𑁄𑀲𑀥 𑀯𑀺𑀚𑀸𑀦𑀸𑀳𑀺, 𑀓𑁂𑀦 𑀣𑀤𑁆𑀥𑁄 𑀓𑀓𑀡𑁆𑀝𑀓𑁄.

𑁪𑁦. 𑀅𑀮𑀤𑁆𑀥𑀧𑀼𑀩𑁆𑀩𑀁 𑀮𑀤𑁆𑀥𑀸𑀦, 𑀅𑀟𑁆𑀠𑀫𑀸𑀲𑀁 𑀓𑀓𑀡𑁆𑀝𑀓𑁄;

𑀅𑀢𑀺𑀫𑀜𑁆𑀜𑀢𑀺 𑀭𑀸𑀚𑀸𑀦𑀁, 𑀯𑁂𑀤𑁂𑀳𑀁 𑀫𑀺𑀣𑀺𑀮𑀕𑁆𑀕𑀳𑀦𑁆𑀢𑀺.

𑀓𑀓𑀡𑁆𑀝𑀓𑀚𑀸𑀢𑀓𑀁 𑀤𑀲𑀫𑀁.

𑀲𑀦𑁆𑀣𑀯𑀯𑀕𑁆𑀕𑁄 𑀤𑀼𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀣 𑀇𑀦𑁆𑀤𑀲𑀫𑀸𑀦 𑀲𑀧𑀡𑁆𑀡𑀓𑀼𑀝𑀺, 𑀲𑀼𑀲𑀺𑀫𑀼𑀢𑁆𑀢𑀫 𑀕𑀺𑀚𑁆𑀛 𑀚𑀮𑀸𑀩𑀼𑀚𑀓𑁄;

𑀉𑀧𑀲𑀸𑀴𑀓 𑀪𑀺𑀓𑁆𑀔𑀼 𑀲𑀮𑀸𑀧𑀯𑀭𑁄, 𑀅𑀣 𑀫𑁂𑀢𑁆𑀢𑀯𑀭𑁄 𑀤𑀲𑀧𑀼𑀡𑁆𑀡𑀫𑀢𑀻𑀢𑀺.

𑁩. 𑀓𑀮𑁆𑀬𑀸𑀡𑀯𑀕𑁆𑀕𑁄

𑁧𑁭𑁧. 𑀓𑀮𑁆𑀬𑀸𑀡𑀥𑀫𑁆𑀫𑀚𑀸𑀢𑀓𑀁 (𑁨-𑁩-𑁧)

𑁪𑁧. 𑀓𑀮𑁆𑀬𑀸𑀡𑀥𑀫𑁆𑀫𑁄𑀢𑀺 𑀬𑀤𑀸 𑀚𑀦𑀺𑀦𑁆𑀤, 𑀮𑁄𑀓𑁂 𑀲𑀫𑀜𑁆𑀜𑀁 𑀅𑀦𑀼𑀧𑀸𑀧𑀼𑀡𑀸𑀢𑀺;

𑀢𑀲𑁆𑀫𑀸 𑀦 𑀳𑀺𑀬𑁆𑀬𑁂𑀣 [𑀳𑀻𑀬𑁂𑀣 (𑀲𑀻.)] 𑀦𑀭𑁄 𑀲𑀧𑀜𑁆𑀜𑁄, 𑀳𑀺𑀭𑀺𑀬𑀸𑀧𑀺 𑀲𑀦𑁆𑀢𑁄 𑀥𑀼𑀭𑀫𑀸𑀤𑀺𑀬𑀦𑁆𑀢𑀺.

𑁪𑁨. 𑀲𑀸𑀬𑀁 𑀲𑀫𑀜𑁆𑀜𑀸 𑀇𑀥 𑀫𑀚𑁆𑀚 𑀧𑀢𑁆𑀢𑀸, 𑀓𑀮𑁆𑀬𑀸𑀡𑀥𑀫𑁆𑀫𑁄𑀢𑀺 𑀚𑀦𑀺𑀦𑁆𑀤 𑀮𑁄𑀓𑁂;

𑀢𑀸𑀳𑀁 𑀲𑀫𑁂𑀓𑁆𑀔𑀁 𑀇𑀥 𑀧𑀩𑁆𑀩𑀚𑀺𑀲𑁆𑀲𑀁, 𑀦 𑀳𑀺 𑀫𑀢𑁆𑀣𑀺 𑀙𑀦𑁆𑀤𑁄 𑀇𑀥 𑀓𑀸𑀫𑀪𑁄𑀕𑁂𑀢𑀺.

𑀓𑀮𑁆𑀬𑀸𑀡𑀥𑀫𑁆𑀫𑀚𑀸𑀢𑀓𑀁 𑀧𑀞𑀫𑀁.

𑁧𑁭𑁨. 𑀤𑀤𑁆𑀤𑀭𑀚𑀸𑀢𑀓𑀁 (𑁨-𑁩-𑁨)

𑁪𑁩. 𑀓𑁄 𑀦𑀼 𑀲𑀤𑁆𑀤𑁂𑀦 𑀫𑀳𑀢𑀸, 𑀅𑀪𑀺𑀦𑀸𑀤𑁂𑀢𑀺 𑀤𑀤𑁆𑀤𑀭𑀁;