𑁧𑁦. 𑀲𑀺𑀗𑁆𑀕𑀸𑀮𑀯𑀕𑁆𑀕𑁄

𑁨𑁪𑁧. 𑀲𑀩𑁆𑀩𑀤𑀸𑀞𑀺𑀚𑀸𑀢𑀓𑀁 (𑁨-𑁧𑁦-𑁧)

𑁧𑁮𑁨. 𑀲𑀺𑀗𑁆𑀕𑀸𑀮𑁄 𑀫𑀸𑀦𑀣𑀤𑁆𑀥𑁄 𑀘, 𑀧𑀭𑀺𑀯𑀸𑀭𑁂𑀦 𑀅𑀢𑁆𑀣𑀺𑀓𑁄;

𑀧𑀸𑀧𑀼𑀡𑀺 𑀫𑀳𑀢𑀺𑀁 𑀪𑀽𑀫𑀺𑀁, 𑀭𑀸𑀚𑀸𑀲𑀺 𑀲𑀩𑁆𑀩𑀤𑀸𑀞𑀺𑀦𑀁.

𑁧𑁮𑁩. 𑀏𑀯𑀫𑁂𑀯 𑀫𑀦𑀼𑀲𑁆𑀲𑁂𑀲𑀼, 𑀬𑁄 𑀳𑁄𑀢𑀺 𑀧𑀭𑀺𑀯𑀸𑀭𑀯𑀸;

𑀲𑁄 𑀳𑀺 𑀢𑀢𑁆𑀣 𑀫𑀳𑀸 𑀳𑁄𑀢𑀺, 𑀲𑀺𑀗𑁆𑀕𑀸𑀮𑁄 𑀯𑀺𑀬 𑀤𑀸𑀞𑀺𑀦𑀦𑁆𑀢𑀺.

𑀲𑀩𑁆𑀩𑀤𑀸𑀞𑀺𑀚𑀸𑀢𑀓𑀁 𑀧𑀞𑀫𑀁.

𑁨𑁪𑁨. 𑀲𑀼𑀦𑀔𑀚𑀸𑀢𑀓𑀁 (𑁨-𑁧𑁦-𑁨)

𑁧𑁮𑁪. 𑀩𑀸𑀮𑁄 𑀯𑀢𑀸𑀬𑀁 𑀲𑀼𑀦𑀔𑁄, 𑀬𑁄 𑀯𑀭𑀢𑁆𑀢𑀁 [𑀬𑁄 𑀘 𑀬𑁄𑀢𑁆𑀢𑀁 (𑀓.)] 𑀦 𑀔𑀸𑀤𑀢𑀺;

𑀩𑀦𑁆𑀥𑀦𑀸 𑀘 𑀧𑀫𑀼𑀜𑁆𑀘𑁂𑀬𑁆𑀬, 𑀅𑀲𑀺𑀢𑁄 𑀘 𑀖𑀭𑀁 𑀯𑀚𑁂.

𑁧𑁮𑁫. 𑀅𑀝𑁆𑀞𑀺𑀢𑀁 𑀫𑁂 𑀫𑀦𑀲𑁆𑀫𑀺𑀁 𑀫𑁂, 𑀅𑀣𑁄 𑀫𑁂 𑀳𑀤𑀬𑁂 𑀓𑀢𑀁;

𑀓𑀸𑀮𑀜𑁆𑀘 𑀧𑀝𑀺𑀓𑀗𑁆𑀔𑀸𑀫𑀺, 𑀬𑀸𑀯 𑀧𑀲𑁆𑀲𑀼𑀧𑀢𑀽 𑀚𑀦𑁄 [𑀧𑀲𑀼𑀧𑀢𑀼𑀚𑁆𑀚𑀦𑁄 (𑀲𑁆𑀬𑀸. 𑀓.)].

𑀲𑀼𑀦𑀔𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁨𑁪𑁩. 𑀕𑀼𑀢𑁆𑀢𑀺𑀮𑀚𑀸𑀢𑀓𑀁 (𑁨-𑁧𑁦-𑁩)

𑁧𑁮𑁬. 𑀲𑀢𑁆𑀢𑀢𑀦𑁆𑀢𑀺𑀁 𑀲𑀼𑀫𑀥𑀼𑀭𑀁, 𑀭𑀸𑀫𑀡𑁂𑀬𑁆𑀬𑀁 𑀅𑀯𑀸𑀘𑀬𑀺𑀁;

𑀲𑁄 𑀫𑀁 𑀭𑀗𑁆𑀕𑀫𑁆𑀳𑀺 𑀅𑀯𑁆𑀳𑁂𑀢𑀺, 𑀲𑀭𑀡𑀁 𑀫𑁂 𑀳𑁄𑀳𑀺 𑀓𑁄𑀲𑀺𑀬.

𑁧𑁮𑁭. 𑀅𑀳𑀁 𑀢𑀁 𑀲𑀭𑀡𑀁 𑀲𑀫𑁆𑀫 [𑀅𑀳𑀁 𑀢𑁂 𑀲𑀭𑀡𑀁 𑀳𑁄𑀫𑀺 (𑀯𑀺. 𑀯. 𑁩𑁨𑁮)], 𑀅𑀳𑀫𑀸𑀘𑀭𑀺𑀬𑀧𑀽𑀚𑀓𑁄;

𑀦 𑀢𑀁 𑀚𑀬𑀺𑀲𑁆𑀲𑀢𑀺 𑀲𑀺𑀲𑁆𑀲𑁄, 𑀲𑀺𑀲𑁆𑀲𑀫𑀸𑀘𑀭𑀺𑀬 𑀚𑁂𑀲𑁆𑀲𑀲𑀻𑀢𑀺.

𑀕𑀼𑀢𑁆𑀢𑀺𑀮𑀚𑀸𑀢𑀓𑀁 𑀢𑀢𑀺𑀬𑀁.

𑁨𑁪𑁪. 𑀯𑀺𑀕𑀢𑀺𑀘𑁆𑀙𑀚𑀸𑀢𑀓𑀁 (𑁨-𑁧𑁦-𑁪)

𑁧𑁮𑁮. 𑀬𑀁 𑀧𑀲𑁆𑀲𑀢𑀺 𑀦 𑀢𑀁 𑀇𑀘𑁆𑀙𑀢𑀺, 𑀬𑀜𑁆𑀘 𑀦 𑀧𑀲𑁆𑀲𑀢𑀺 𑀢𑀁 𑀓𑀺𑀭𑀺𑀘𑁆𑀙𑀢𑀺;

𑀫𑀜𑁆𑀜𑀸𑀫𑀺 𑀘𑀺𑀭𑀁 𑀘𑀭𑀺𑀲𑁆𑀲𑀢𑀺, 𑀦 𑀳𑀺 𑀢𑀁 𑀮𑀘𑁆𑀙𑀢𑀺 𑀬𑀁 𑀲 𑀇𑀘𑁆𑀙𑀢𑀺.

𑁧𑁮𑁯. 𑀬𑀁 𑀮𑀪𑀢𑀺 𑀦 𑀢𑁂𑀦 𑀢𑀼𑀲𑁆𑀲𑀢𑀺, 𑀬𑀜𑁆𑀘 𑀧𑀢𑁆𑀣𑁂𑀢𑀺 𑀮𑀤𑁆𑀥𑀁 𑀳𑀻𑀴𑁂𑀢𑀺;

𑀇𑀘𑁆𑀙𑀸 𑀳𑀺 𑀅𑀦𑀦𑁆𑀢𑀕𑁄𑀘𑀭𑀸, 𑀯𑀺𑀕𑀢𑀺𑀘𑁆𑀙𑀸𑀦 [𑀯𑀻𑀢𑀺𑀘𑁆𑀙𑀸𑀦𑀁 (𑀲𑀻. 𑀧𑀻.)] 𑀦𑀫𑁄 𑀓𑀭𑁄𑀫𑀲𑁂𑀢𑀺.

𑀯𑀺𑀕𑀢𑀺𑀘𑁆𑀙 [𑀯𑀻𑀢𑀺𑀘𑁆𑀙 (𑀲𑀻. 𑀧𑀻.)] 𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁨𑁪𑁫. 𑀫𑀽𑀮𑀧𑀭𑀺𑀬𑀸𑀬𑀚𑀸𑀢𑀓𑀁 (𑁨-𑁧𑁦-𑁫)

𑁧𑁯𑁦. 𑀓𑀸𑀮𑁄 𑀖𑀲𑀢𑀺 𑀪𑀽𑀢𑀸𑀦𑀺, 𑀲𑀩𑁆𑀩𑀸𑀦𑁂𑀯 𑀲𑀳𑀢𑁆𑀢𑀦𑀸;

𑀬𑁄 𑀘 𑀓𑀸𑀮𑀖𑀲𑁄 𑀪𑀽𑀢𑁄, 𑀲 𑀪𑀽𑀢𑀧𑀘𑀦𑀺𑀁 𑀧𑀘𑀺.

𑁧𑁯𑁧. 𑀩𑀳𑀽𑀦𑀺 𑀦𑀭𑀲𑀻𑀲𑀸𑀦𑀺, 𑀮𑁄𑀫𑀲𑀸𑀦𑀺 𑀩𑁆𑀭𑀳𑀸𑀦𑀺 𑀘;

𑀕𑀻𑀯𑀸𑀲𑀼 𑀧𑀝𑀺𑀫𑀼𑀓𑁆𑀓𑀸𑀦𑀺, 𑀓𑁄𑀘𑀺𑀤𑁂𑀯𑁂𑀢𑁆𑀣 𑀓𑀡𑁆𑀡𑀯𑀸𑀢𑀺.

𑀫𑀽𑀮𑀧𑀭𑀺𑀬𑀸𑀬𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁨𑁪𑁬. 𑀩𑀸𑀮𑁄𑀯𑀸𑀤𑀚𑀸𑀢𑀓𑀁 (𑁨-𑁧𑁦-𑁬)

𑁧𑁯𑁨. 𑀳𑀦𑁆𑀢𑁆𑀯𑀸 𑀙𑁂𑀢𑁆𑀯𑀸 [𑀛𑀢𑁆𑀯𑀸 (𑀲𑀻. 𑀧𑀻.), 𑀖𑀢𑁆𑀯𑀸 (𑀲𑁆𑀬𑀸.)] 𑀯𑀥𑀺𑀢𑁆𑀯𑀸 𑀘, 𑀤𑁂𑀢𑀺 𑀤𑀸𑀦𑀁 𑀅𑀲𑀜𑁆𑀜𑀢𑁄;

𑀏𑀤𑀺𑀲𑀁 𑀪𑀢𑁆𑀢𑀁 𑀪𑀼𑀜𑁆𑀚𑀫𑀸𑀦𑁄, 𑀲 𑀧𑀸𑀧𑀫𑀼𑀧𑀮𑀺𑀫𑁆𑀧𑀢𑀺 [𑀲 𑀧𑀸𑀧𑁂𑀦 𑀉𑀧𑀮𑀺𑀧𑁆𑀧𑀢𑀺 (𑀲𑀻. 𑀧𑀻.)].

𑁧𑁯𑁩. 𑀧𑀼𑀢𑁆𑀢𑀤𑀸𑀭𑀫𑁆𑀧𑀺 𑀘𑁂 𑀳𑀦𑁆𑀢𑁆𑀯𑀸, 𑀤𑁂𑀢𑀺 𑀤𑀸𑀦𑀁 𑀅𑀲𑀜𑁆𑀜𑀢𑁄;

𑀪𑀼𑀜𑁆𑀚𑀫𑀸𑀦𑁄𑀧𑀺 𑀲𑀧𑁆𑀧𑀜𑁆𑀜𑁄, 𑀦 𑀧𑀸𑀧𑀫𑀼𑀧𑀮𑀺𑀫𑁆𑀧𑀢𑀻𑀢𑀺.

𑀩𑀸𑀮𑁄𑀯𑀸𑀤𑀚𑀸𑀢𑀓𑀁 𑀙𑀝𑁆𑀞𑀁.

𑁨𑁪𑁭. 𑀧𑀸𑀤𑀜𑁆𑀚𑀮𑀻𑀚𑀸𑀢𑀓𑀁 (𑁨-𑁧𑁦-𑁭)

𑁧𑁯𑁪. 𑀅𑀤𑁆𑀥𑀸 𑀧𑀸𑀤𑀜𑁆𑀚𑀮𑀻 𑀲𑀩𑁆𑀩𑁂, 𑀧𑀜𑁆𑀜𑀸𑀬 𑀅𑀢𑀺𑀭𑁄𑀘𑀢𑀺;

𑀢𑀣𑀸 𑀳𑀺 𑀑𑀝𑁆𑀞𑀁 𑀪𑀜𑁆𑀚𑀢𑀺, 𑀉𑀢𑁆𑀢𑀭𑀺𑀁 𑀦𑀽𑀦 𑀧𑀲𑁆𑀲𑀢𑀺.

𑁧𑁯𑁫. 𑀦𑀸𑀬𑀁 𑀥𑀫𑁆𑀫𑀁 𑀅𑀥𑀫𑁆𑀫𑀁 𑀯𑀸, 𑀅𑀢𑁆𑀣𑀸𑀦𑀢𑁆𑀣𑀜𑁆𑀘 𑀩𑀼𑀚𑁆𑀛𑀢𑀺;

𑀅𑀜𑁆𑀜𑀢𑁆𑀭 𑀑𑀝𑁆𑀞𑀦𑀺𑀩𑁆𑀪𑁄𑀕𑀸, 𑀦𑀸𑀬𑀁 𑀚𑀸𑀦𑀸𑀢𑀺 𑀓𑀺𑀜𑁆𑀘𑀦𑀦𑁆𑀢𑀺.

𑀧𑀸𑀤𑀜𑁆𑀚𑀮𑀻𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁨𑁪𑁮. 𑀓𑀺𑀁𑀲𑀼𑀓𑁄𑀧𑀫𑀚𑀸𑀢𑀓𑀁 (𑁨-𑁧𑁦-𑁮)

𑁧𑁯𑁬. 𑀲𑀩𑁆𑀩𑁂𑀳𑀺 𑀓𑀺𑀁𑀲𑀼𑀓𑁄 𑀤𑀺𑀝𑁆𑀞𑁄, 𑀓𑀺𑀁𑀦𑁆𑀯𑁂𑀢𑁆𑀣 𑀯𑀺𑀘𑀺𑀓𑀺𑀘𑁆𑀙𑀣;

𑀦 𑀳𑀺 𑀲𑀩𑁆𑀩𑁂𑀲𑀼 𑀞𑀸𑀦𑁂𑀲𑀼, 𑀲𑀸𑀭𑀣𑀻 𑀧𑀭𑀺𑀧𑀼𑀘𑁆𑀙𑀺𑀢𑁄.

𑁧𑁯𑁭. 𑀏𑀯𑀁 𑀲𑀩𑁆𑀩𑁂𑀳𑀺 𑀜𑀸𑀡𑁂𑀳𑀺, 𑀬𑁂𑀲𑀁 𑀥𑀫𑁆𑀫𑀸 𑀅𑀚𑀸𑀦𑀺𑀢𑀸;

𑀢𑁂 𑀯𑁂 𑀥𑀫𑁆𑀫𑁂𑀲𑀼 𑀓𑀗𑁆𑀔𑀦𑁆𑀢𑀺, 𑀓𑀺𑀁𑀲𑀼𑀓𑀲𑁆𑀫𑀺𑀁𑀯 𑀪𑀸𑀢𑀭𑁄𑀢𑀺.

𑀓𑀺𑀁𑀲𑀼𑀓𑁄𑀧𑀫𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁨𑁪𑁯. 𑀲𑀸𑀮𑀓𑀚𑀸𑀢𑀓𑀁 (𑁨-𑁧𑁦-𑁯)

𑁧𑁯𑁮. 𑀏𑀓𑀧𑀼𑀢𑁆𑀢𑀓𑁄 𑀪𑀯𑀺𑀲𑁆𑀲𑀲𑀺, 𑀢𑁆𑀯𑀜𑁆𑀘 𑀦𑁄 𑀳𑁂𑀲𑁆𑀲𑀲𑀺 𑀇𑀲𑁆𑀲𑀭𑁄 𑀓𑀼𑀮𑁂;

𑀑𑀭𑁄𑀳 𑀤𑀼𑀫𑀲𑁆𑀫𑀸 𑀲𑀸𑀮𑀓, 𑀏𑀳𑀺 𑀤𑀸𑀦𑀺 𑀖𑀭𑀓𑀁 𑀯𑀚𑁂𑀫𑀲𑁂.

𑁧𑁯𑁯. 𑀦𑀦𑀼 𑀫𑀁 𑀲𑀼𑀳𑀤𑀬𑁄𑀢𑀺 [𑀦𑀦𑀼 𑀫𑀁 𑀳𑀤𑀬𑁂𑀢𑀺 (𑀲𑀻. 𑀧𑀻.)] 𑀫𑀜𑁆𑀜𑀲𑀺, 𑀬𑀜𑁆𑀘 𑀫𑀁 𑀳𑀦𑀲𑀺 𑀯𑁂𑀴𑀼𑀬𑀝𑁆𑀞𑀺𑀬𑀸;

𑀧𑀓𑁆𑀓𑀫𑁆𑀩𑀯𑀦𑁂 𑀭𑀫𑀸𑀫𑀲𑁂, 𑀕𑀘𑁆𑀙 𑀢𑁆𑀯𑀁 𑀖𑀭𑀓𑀁 𑀬𑀣𑀸𑀲𑀼𑀔𑀦𑁆𑀢𑀺.

𑀲𑀸𑀮𑀓𑀚𑀸𑀢𑀓𑀁 𑀦𑀯𑀫𑀁.

𑁨𑁫𑁦. 𑀓𑀧𑀺𑀚𑀸𑀢𑀓𑀁 (𑁨-𑁧𑁦-𑁧𑁦)

𑁨𑁦𑁦. 𑀅𑀬𑀁 𑀇𑀲𑀻 𑀉𑀧𑀲𑀫𑀲𑀁𑀬𑀫𑁂 𑀭𑀢𑁄, 𑀲 𑀢𑀺𑀝𑁆𑀞𑀢𑀺 [𑀲𑀦𑁆𑀢𑀺𑀝𑁆𑀞𑀢𑀺 (𑀲𑀻. 𑀧𑀻.)] 𑀲𑀺𑀲𑀺𑀭𑀪𑀬𑁂𑀦 𑀅𑀝𑁆𑀝𑀺𑀢𑁄;

𑀳𑀦𑁆𑀤 𑀅𑀬𑀁 𑀧𑀯𑀺𑀲𑀢𑀼𑀫𑀁 𑀅𑀕𑀸𑀭𑀓𑀁, 𑀯𑀺𑀦𑁂𑀢𑀼 𑀲𑀻𑀢𑀁 𑀤𑀭𑀣𑀜𑁆𑀘 𑀓𑁂𑀯𑀮𑀁.

𑁨𑁦𑁧. 𑀦𑀸𑀬𑀁 𑀇𑀲𑀻 𑀉𑀧𑀲𑀫𑀲𑀁𑀬𑀫𑁂 𑀭𑀢𑁄, 𑀓𑀧𑀻 𑀅𑀬𑀁 𑀤𑀼𑀫𑀯𑀭𑀲𑀸𑀔𑀕𑁄𑀘𑀭𑁄;

𑀲𑁄 𑀤𑀽𑀲𑀓𑁄 𑀭𑁄𑀲𑀓𑁄 𑀘𑀸𑀧𑀺 𑀚𑀫𑁆𑀫𑁄, 𑀲𑀘𑁂𑀯𑀚𑁂𑀫𑀫𑁆𑀧𑀺 [𑀲𑀘𑁂 + 𑀆𑀯𑀚𑁂 + 𑀇𑀫𑀫𑁆𑀧𑀺] 𑀤𑀽𑀲𑁂𑀬𑁆𑀬𑀕𑀸𑀭𑀦𑁆𑀢𑀺 [𑀤𑀽𑀲𑀬𑁂 𑀖𑀭𑀦𑁆𑀢𑀺 (𑀲𑀻. 𑀲𑁆𑀬𑀸. 𑀧𑀻.)].

𑀓𑀧𑀺𑀚𑀸𑀢𑀓𑀁 𑀤𑀲𑀫𑀁.

𑀲𑀺𑀗𑁆𑀕𑀸𑀮𑀯𑀕𑁆𑀕𑁄 𑀤𑀲𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀣 𑀭𑀸𑀚𑀸 𑀲𑀺𑀗𑁆𑀕𑀸𑀮𑀯𑀭𑁄 𑀲𑀼𑀦𑀔𑁄, 𑀢𑀣𑀸 𑀓𑁄𑀲𑀺𑀬 𑀇𑀘𑁆𑀙𑀢𑀺 𑀓𑀸𑀮𑀖𑀲𑁄;

𑀅𑀣 𑀤𑀸𑀦𑀯𑀭𑁄𑀝𑁆𑀞𑀧𑀺 𑀲𑀸𑀭𑀣𑀺𑀦𑀸, 𑀧𑀼𑀦𑀫𑁆𑀩𑀯𑀦𑀜𑁆𑀘 𑀲𑀺𑀲𑀺𑀭𑀓𑀧𑀺 𑀤𑀲𑀸𑀢𑀺.

𑀅𑀣 𑀯𑀕𑁆𑀕𑀼𑀤𑁆𑀤𑀸𑀦𑀁 𑁋

𑀤𑀴𑁆𑀳𑀜𑁆𑀘 𑀯𑀕𑁆𑀕𑀁 𑀅𑀧𑀭𑁂𑀦 𑀲𑀦𑁆𑀣𑀯𑀁, 𑀓𑀮𑁆𑀬𑀸𑀡𑀯𑀕𑁆𑀕𑀸𑀲𑀤𑀺𑀲𑁄 𑀘 𑀭𑀽𑀳𑀓𑀁;

𑀦𑀢𑀁𑀤𑀴𑁆𑀳 𑀩𑀻𑀭𑀡𑀣𑀫𑁆𑀪𑀓𑀁 𑀧𑀼𑀦, 𑀓𑀸𑀲𑀸𑀯𑀼𑀧𑀸𑀳𑀦 𑀲𑀺𑀗𑁆𑀕𑀸𑀮𑀓𑁂𑀦 𑀤𑀲𑀸𑀢𑀺.

𑀤𑀼𑀓𑀦𑀺𑀧𑀸𑀢𑀁 𑀦𑀺𑀝𑁆𑀞𑀺𑀢𑀁.