𑁮. 𑀓𑀸𑀲𑀸𑀯𑀯𑀕𑁆𑀕𑁄

𑁨𑁨𑁧. 𑀓𑀸𑀲𑀸𑀯𑀚𑀸𑀢𑀓𑀁 (𑁨-𑁮-𑁧)

𑁧𑁪𑁧. 𑀅𑀦𑀺𑀓𑁆𑀓𑀲𑀸𑀯𑁄 𑀓𑀸𑀲𑀸𑀯𑀁, 𑀬𑁄 𑀯𑀢𑁆𑀣𑀁 𑀧𑀭𑀺𑀤𑀳𑀺𑀲𑁆𑀲𑀢𑀺 [𑀧𑀭𑀺𑀤𑀳𑁂𑀲𑁆𑀲𑀢𑀺 (𑀲𑀻. 𑀧𑀻.)];

𑀅𑀧𑁂𑀢𑁄 𑀤𑀫𑀲𑀘𑁆𑀘𑁂𑀦, 𑀦 𑀲𑁄 𑀓𑀸𑀲𑀸𑀯𑀫𑀭𑀳𑀢𑀺.

𑁧𑁪𑁨. 𑀬𑁄 𑀘 𑀯𑀦𑁆𑀢𑀓𑀲𑀸𑀯𑀲𑁆𑀲, 𑀲𑀻𑀮𑁂𑀲𑀼 𑀲𑀼𑀲𑀫𑀸𑀳𑀺𑀢𑁄;

𑀉𑀧𑁂𑀢𑁄 𑀤𑀫𑀲𑀘𑁆𑀘𑁂𑀦, 𑀲 𑀯𑁂 𑀓𑀸𑀲𑀸𑀯𑀫𑀭𑀳𑀢𑀻𑀢𑀺.

𑀓𑀸𑀲𑀸𑀯𑀚𑀸𑀢𑀓𑀁 𑀧𑀞𑀫𑀁.

𑁨𑁨𑁨. 𑀘𑀽𑀴𑀦𑀦𑁆𑀤𑀺𑀬𑀚𑀸𑀢𑀓𑀁 (𑁨-𑁮-𑁨)

𑁧𑁪𑁩. 𑀇𑀤𑀁 𑀢𑀤𑀸𑀘𑀭𑀺𑀬𑀯𑀘𑁄, 𑀧𑀸𑀭𑀸𑀲𑀭𑀺𑀬𑁄 𑀬𑀤𑀩𑁆𑀭𑀯𑀺 [𑀧𑁄𑀭𑀸𑀡𑀸𑀘𑀭𑀺𑀬𑁄𑀩𑁆𑀭𑀯𑀺 (𑀓.)];

𑀫𑀸𑀲𑀼 𑀢𑁆𑀯𑀁 𑀅𑀓𑀭𑀺 [𑀅𑀓𑀭𑀸 (𑀲𑀻. 𑀧𑀻.)] 𑀧𑀸𑀧𑀁, 𑀬𑀁 𑀢𑁆𑀯𑀁 𑀧𑀘𑁆𑀙𑀸 𑀓𑀢𑀁 𑀢𑀧𑁂.

𑁧𑁪𑁪. 𑀬𑀸𑀦𑀺 𑀓𑀭𑁄𑀢𑀺 𑀧𑀼𑀭𑀺𑀲𑁄, 𑀢𑀸𑀦𑀺 𑀅𑀢𑁆𑀢𑀦𑀺 𑀧𑀲𑁆𑀲𑀢𑀺;

𑀓𑀮𑁆𑀬𑀸𑀡𑀓𑀸𑀭𑀻 𑀓𑀮𑁆𑀬𑀸𑀡𑀁, 𑀧𑀸𑀧𑀓𑀸𑀭𑀻 𑀘 𑀧𑀸𑀧𑀓𑀁;

𑀬𑀸𑀤𑀺𑀲𑀁 𑀯𑀧𑀢𑁂 𑀩𑀻𑀚𑀁, 𑀢𑀸𑀤𑀺𑀲𑀁 𑀳𑀭𑀢𑁂 𑀨𑀮𑀦𑁆𑀢𑀺.

𑀘𑀽𑀴𑀦𑀦𑁆𑀤𑀺𑀬𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁨𑁨𑁩. 𑀧𑀼𑀝𑀪𑀢𑁆𑀢𑀚𑀸𑀢𑀓𑀁 (𑁨-𑁮-𑁩)

𑁧𑁪𑁫. 𑀦𑀫𑁂 𑀦𑀫𑀦𑁆𑀢𑀲𑁆𑀲 𑀪𑀚𑁂 𑀪𑀚𑀦𑁆𑀢𑀁, 𑀓𑀺𑀘𑁆𑀘𑀸𑀦𑀼𑀓𑀼𑀩𑁆𑀩𑀲𑁆𑀲 𑀓𑀭𑁂𑀬𑁆𑀬 𑀓𑀺𑀘𑁆𑀘𑀁;

𑀦𑀸𑀦𑀢𑁆𑀣𑀓𑀸𑀫𑀲𑁆𑀲 𑀓𑀭𑁂𑀬𑁆𑀬 𑀅𑀢𑁆𑀣𑀁, 𑀅𑀲𑀫𑁆𑀪𑀚𑀦𑁆𑀢𑀫𑁆𑀧𑀺 𑀦 𑀲𑀫𑁆𑀪𑀚𑁂𑀬𑁆𑀬.

𑁧𑁪𑁬. 𑀘𑀚𑁂 𑀘𑀚𑀦𑁆𑀢𑀁 𑀯𑀦𑀣𑀁 𑀦 𑀓𑀬𑀺𑀭𑀸, 𑀅𑀧𑁂𑀢𑀘𑀺𑀢𑁆𑀢𑁂𑀦 𑀦 𑀲𑀫𑁆𑀪𑀚𑁂𑀬𑁆𑀬;

𑀤𑀺𑀚𑁄 𑀤𑀼𑀫𑀁 𑀔𑀻𑀡𑀨𑀮𑀦𑁆𑀢𑀺 𑀜𑀢𑁆𑀯𑀸, 𑀅𑀜𑁆𑀜𑀁 𑀲𑀫𑁂𑀓𑁆𑀔𑁂𑀬𑁆𑀬 𑀫𑀳𑀸 𑀳𑀺 𑀮𑁄𑀓𑁄𑀢𑀺.

𑀧𑀼𑀝𑀪𑀢𑁆𑀢𑀚𑀸𑀢𑀓𑀁 𑀢𑀢𑀺𑀬𑀁.

𑁨𑁨𑁪. 𑀓𑀼𑀫𑁆𑀪𑀺𑀮𑀚𑀸𑀢𑀓𑀁 (𑁨-𑁮-𑁪)

𑁧𑁪𑁭. 𑀬𑀲𑁆𑀲𑁂𑀢𑁂 𑀘𑀢𑀼𑀭𑁄 𑀥𑀫𑁆𑀫𑀸, 𑀯𑀸𑀦𑀭𑀺𑀦𑁆𑀤 𑀬𑀣𑀸 𑀢𑀯;

𑀲𑀘𑁆𑀘𑀁 𑀥𑀫𑁆𑀫𑁄 𑀥𑀺𑀢𑀺 𑀘𑀸𑀕𑁄, 𑀤𑀺𑀝𑁆𑀞𑀁 𑀲𑁄 𑀅𑀢𑀺𑀯𑀢𑁆𑀢𑀢𑀺.

𑁧𑁪𑁮. 𑀬𑀲𑁆𑀲 𑀘𑁂𑀢𑁂 𑀦 𑀯𑀺𑀚𑁆𑀚𑀦𑁆𑀢𑀺, 𑀕𑀼𑀡𑀸 𑀧𑀭𑀫𑀪𑀤𑁆𑀤𑀓𑀸;

𑀲𑀘𑁆𑀘𑀁 𑀥𑀫𑁆𑀫𑁄 𑀥𑀺𑀢𑀺 𑀘𑀸𑀕𑁄, 𑀤𑀺𑀝𑁆𑀞𑀁 𑀲𑁄 𑀦𑀸𑀢𑀺𑀯𑀢𑁆𑀢𑀢𑀻𑀢𑀺.

𑀓𑀼𑀫𑁆𑀪𑀺𑀮𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁨𑁨𑁫. 𑀔𑀦𑁆𑀢𑀺𑀯𑀡𑁆𑀡𑀚𑀸𑀢𑀓𑀁 (𑁨-𑁮-𑁫)

𑁧𑁪𑁯. 𑀅𑀢𑁆𑀣𑀺 𑀫𑁂 𑀧𑀼𑀭𑀺𑀲𑁄 𑀤𑁂𑀯, 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀩𑁆𑀬𑀸𑀯𑀝𑁄 [𑀯𑀸𑀯𑀝𑁄 (𑀓.)];

𑀢𑀲𑁆𑀲 𑀘𑁂𑀓𑁄𑀧𑀭𑀸𑀥𑀢𑁆𑀣𑀺, 𑀢𑀢𑁆𑀣 𑀢𑁆𑀯𑀁 𑀓𑀺𑀦𑁆𑀢𑀺 𑀫𑀜𑁆𑀜𑀲𑀺.

𑁧𑁫𑁦. 𑀅𑀫𑁆𑀳𑀸𑀓𑀫𑁆𑀧𑀢𑁆𑀣𑀺 𑀧𑀼𑀭𑀺𑀲𑁄, 𑀏𑀤𑀺𑀲𑁄 𑀇𑀥 𑀯𑀺𑀚𑁆𑀚𑀢𑀺;

𑀤𑀼𑀮𑁆𑀮𑀪𑁄 𑀅𑀗𑁆𑀕𑀲𑀫𑁆𑀧𑀦𑁆𑀦𑁄, 𑀔𑀦𑁆𑀢𑀺𑀭𑀲𑁆𑀫𑀸𑀓 𑀭𑀼𑀘𑁆𑀘𑀢𑀻𑀢𑀺.

𑀔𑀦𑁆𑀢𑀺𑀯𑀡𑁆𑀡𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁨𑁨𑁬. 𑀓𑁄𑀲𑀺𑀬𑀚𑀸𑀢𑀓𑀁 (𑁨-𑁮-𑁬)

𑁧𑁫𑁧. 𑀓𑀸𑀮𑁂 𑀦𑀺𑀓𑁆𑀔𑀫𑀦𑀸 𑀲𑀸𑀥𑀼, 𑀦𑀸𑀓𑀸𑀮𑁂 𑀲𑀸𑀥𑀼 𑀦𑀺𑀓𑁆𑀔𑀫𑁄;

𑀅𑀓𑀸𑀮𑁂𑀦 𑀳𑀺 𑀦𑀺𑀓𑁆𑀔𑀫𑁆𑀫, 𑀏𑀓𑀓𑀫𑁆𑀧𑀺 𑀩𑀳𑀼𑀚𑁆𑀚𑀦𑁄;

𑀦 𑀓𑀺𑀜𑁆𑀘𑀺 𑀅𑀢𑁆𑀣𑀁 𑀚𑁄𑀢𑁂𑀢𑀺, 𑀥𑀗𑁆𑀓𑀲𑁂𑀦𑀸𑀯 𑀓𑁄𑀲𑀺𑀬𑀁.

𑁧𑁫𑁨. 𑀥𑀻𑀭𑁄 𑀘 𑀯𑀺𑀥𑀺𑀯𑀺𑀥𑀸𑀦𑀜𑁆𑀜𑀽, 𑀧𑀭𑁂𑀲𑀁 𑀯𑀺𑀯𑀭𑀸𑀦𑀼𑀕𑀽;

𑀲𑀩𑁆𑀩𑀸𑀫𑀺𑀢𑁆𑀢𑁂 𑀯𑀲𑀻𑀓𑀢𑁆𑀯𑀸, 𑀓𑁄𑀲𑀺𑀬𑁄𑀯 𑀲𑀼𑀔𑀻 𑀲𑀺𑀬𑀸𑀢𑀺.

𑀓𑁄𑀲𑀺𑀬𑀚𑀸𑀢𑀓𑀁 𑀙𑀝𑁆𑀞𑀁.

𑁨𑁨𑁭. 𑀕𑀽𑀣𑀧𑀸𑀡𑀚𑀸𑀢𑀓𑀁 (𑁨-𑁮-𑁭)

𑁧𑁫𑁩. 𑀲𑀽𑀭𑁄 𑀲𑀽𑀭𑁂𑀦 𑀲𑀗𑁆𑀕𑀫𑁆𑀫, 𑀯𑀺𑀓𑁆𑀓𑀦𑁆𑀢𑁂𑀦 𑀧𑀳𑀸𑀭𑀺𑀦𑀸;

𑀏𑀳𑀺 𑀦𑀸𑀕 𑀦𑀺𑀯𑀢𑁆𑀢𑀲𑁆𑀲𑀼, 𑀓𑀺𑀁 𑀦𑀼 𑀪𑀻𑀢𑁄 𑀧𑀮𑀸𑀬𑀲𑀺;

𑀧𑀲𑁆𑀲𑀦𑁆𑀢𑀼 𑀅𑀗𑁆𑀕𑀫𑀕𑀥𑀸, 𑀫𑀫 𑀢𑀼𑀬𑁆𑀳𑀜𑁆𑀘 𑀯𑀺𑀓𑁆𑀓𑀫𑀁.

𑁧𑁫𑁪. 𑀦 𑀢𑀁 𑀧𑀸𑀤𑀸 𑀯𑀥𑀺𑀲𑁆𑀲𑀸𑀫𑀺, 𑀦 𑀤𑀦𑁆𑀢𑁂𑀳𑀺 𑀦 𑀲𑁄𑀡𑁆𑀟𑀺𑀬𑀸;

𑀫𑀻𑀴𑁆𑀳𑁂𑀦 𑀢𑀁 𑀯𑀥𑀺𑀲𑁆𑀲𑀸𑀫𑀺, 𑀧𑀽𑀢𑀺 𑀳𑀜𑁆𑀜𑀢𑀼 𑀧𑀽𑀢𑀺𑀦𑀸𑀢𑀺.

𑀕𑀽𑀣𑀧𑀸𑀡𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁨𑁨𑁮. 𑀓𑀸𑀫𑀦𑀻𑀢𑀚𑀸𑀢𑀓𑀁 (𑁨-𑁮-𑁮)

𑁧𑁫𑁫. 𑀢𑀬𑁄 𑀕𑀺𑀭𑀺𑀁 𑀅𑀦𑁆𑀢𑀭𑀁 𑀓𑀸𑀫𑀬𑀸𑀫𑀺, 𑀧𑀜𑁆𑀘𑀸𑀮𑀸 𑀓𑀼𑀭𑀼𑀬𑁄 𑀓𑁂𑀓𑀓𑁂 𑀘 [𑀓𑀼𑀭𑀬𑁄 𑀓𑁂𑀓𑀬𑁂 𑀘 (𑀲𑀻.)];

𑀢𑀢𑀼𑀢𑁆𑀢𑀭𑀺𑀁 [𑀢𑀤𑀼𑀢𑁆𑀢𑀭𑀺𑀁 (𑀓.)] 𑀩𑁆𑀭𑀸𑀳𑁆𑀫𑀡 𑀓𑀸𑀫𑀬𑀸𑀫𑀺, 𑀢𑀺𑀓𑀺𑀘𑁆𑀙 𑀫𑀁 𑀩𑁆𑀭𑀸𑀳𑁆𑀫𑀡 𑀓𑀸𑀫𑀦𑀻𑀢𑀁.

𑁧𑁫𑁬. 𑀓𑀡𑁆𑀳𑀸𑀳𑀺𑀤𑀝𑁆𑀞𑀲𑁆𑀲 𑀓𑀭𑁄𑀦𑁆𑀢𑀺 𑀳𑁂𑀓𑁂, 𑀅𑀫𑀦𑀼𑀲𑁆𑀲𑀧𑀯𑀺𑀝𑁆𑀞𑀲𑁆𑀲 [𑀅𑀫𑀦𑀼𑀲𑁆𑀲𑀯𑀤𑁆𑀥𑀲𑁆𑀲 (𑀲𑀻. 𑀧𑀻.), 𑀅𑀫𑀦𑀼𑀲𑁆𑀲𑀯𑀺𑀝𑁆𑀞𑀲𑁆𑀲 (𑀲𑁆𑀬𑀸.)] 𑀓𑀭𑁄𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀦 𑀓𑀸𑀫𑀦𑀻𑀢𑀲𑁆𑀲 𑀓𑀭𑁄𑀢𑀺 𑀓𑁄𑀘𑀺, 𑀑𑀓𑁆𑀓𑀦𑁆𑀢𑀲𑀼𑀓𑁆𑀓𑀲𑁆𑀲 𑀳𑀺 𑀓𑀸 𑀢𑀺𑀓𑀺𑀘𑁆𑀙𑀸𑀢𑀺.

𑀓𑀸𑀫𑀦𑀻𑀢𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁨𑁨𑁯. 𑀧𑀮𑀸𑀬𑀺𑀢𑀚𑀸𑀢𑀓𑀁 (𑁨-𑁮-𑁯)

𑁧𑁫𑁭. 𑀕𑀚𑀕𑁆𑀕𑀫𑁂𑀖𑁂𑀳𑀺 𑀳𑀬𑀕𑁆𑀕𑀫𑀸𑀮𑀺𑀪𑀺, 𑀭𑀣𑀽𑀫𑀺𑀚𑀸𑀢𑁂𑀳𑀺 𑀲𑀭𑀸𑀪𑀺𑀯𑀲𑁆𑀲𑁂𑀪𑀺 [𑀲𑀭𑀸𑀪𑀺𑀯𑀲𑁆𑀲𑀪𑀺 (𑀲𑁆𑀬𑀸. 𑀲𑀻. 𑀅𑀝𑁆𑀞.), 𑀲𑀭𑀸𑀪𑀺𑀯𑀲𑁆𑀲𑀺𑀪𑀺 (?)];

𑀣𑀭𑀼𑀕𑁆𑀕𑀳𑀸𑀯𑀝𑁆𑀝 [𑀥𑀦𑀼𑀕𑁆𑀕𑀳𑀸𑀯𑀝𑁆𑀝 (𑀓.)] 𑀤𑀴𑁆𑀳𑀧𑁆𑀧𑀳𑀸𑀭𑀺𑀪𑀺, 𑀧𑀭𑀺𑀯𑀸𑀭𑀺𑀢𑀸 𑀢𑀓𑁆𑀓𑀲𑀺𑀮𑀸 𑀲𑀫𑀦𑁆𑀢𑀢𑁄.

𑁧𑁫𑁮. [𑀅𑀪𑀺𑀥𑀸𑀯𑀣𑀸 𑀘 𑀧𑀢𑀣𑀸 𑀘, 𑀯𑀺𑀯𑀺𑀥𑀯𑀺𑀦𑀤𑀺𑀢𑀸 𑀘 𑀤𑀦𑁆𑀢𑀺𑀪𑀺; 𑀯𑀢𑁆𑀢𑀢𑀚𑁆𑀚 𑀢𑀼𑀫𑀼𑀮𑁄 𑀖𑁄𑀲𑁄, 𑀬𑀣𑀸 𑀯𑀺𑀚𑁆𑀚𑀼𑀢𑀸 𑀚𑀮𑀥𑀭𑀲𑁆𑀲 𑀕𑀚𑁆𑀚𑀢𑁄𑀢𑀺; (𑀲𑀻. 𑀧𑀻. 𑀓.)] 𑀅𑀪𑀺𑀥𑀸𑀯𑀣 𑀘𑀽𑀧𑀥𑀸𑀯𑀣 𑀘 [𑀅𑀪𑀺𑀥𑀸𑀯𑀣𑀸 𑀘𑀼𑀧𑁆𑀧𑀢𑀣𑀸 𑀘 (𑀲𑁆𑀬𑀸.)], 𑀯𑀺𑀯𑀺𑀥𑀸 𑀯𑀺𑀦𑀸𑀤𑀺𑀢𑀸 [𑀯𑀺𑀦𑀸𑀤𑀺𑀢𑀢𑁆𑀣 (𑀓.)] 𑀯𑀤𑀦𑁆𑀢𑀺𑀪𑀺;

𑀯𑀢𑁆𑀢𑀢𑀚𑁆𑀚 𑀢𑀼𑀫𑀼𑀮𑁄 𑀖𑁄𑀲𑁄 𑀬𑀣𑀸, 𑀯𑀺𑀚𑁆𑀚𑀼𑀮𑀢𑀸 𑀚𑀮𑀥𑀭𑀲𑁆𑀲 𑀕𑀚𑁆𑀚𑀢𑁄𑀢𑀺 [𑀅𑀪𑀺𑀥𑀸𑀯𑀣𑀸 𑀘 𑀧𑀢𑀣𑀸 𑀘, 𑀯𑀺𑀯𑀺𑀥𑀯𑀺𑀦𑀤𑀺𑀢𑀸 𑀘 𑀤𑀦𑁆𑀢𑀺𑀪𑀺; 𑀯𑀢𑁆𑀢𑀢𑀚𑁆𑀚 𑀢𑀼𑀫𑀼𑀮𑁄 𑀖𑁄𑀲𑁄, 𑀬𑀣𑀸 𑀯𑀺𑀚𑁆𑀚𑀼𑀢𑀸 𑀚𑀮𑀥𑀭𑀲𑁆𑀲 𑀕𑀚𑁆𑀚𑀢𑁄𑀢𑀺; (𑀲𑀻. 𑀧𑀻. 𑀓.)].

𑀧𑀮𑀸𑀬𑀺𑀢𑀚𑀸𑀢𑀓𑀁 𑀦𑀯𑀫𑀁.

𑁨𑁩𑁦. 𑀤𑀼𑀢𑀺𑀬𑀧𑀮𑀸𑀬𑀺𑀢𑀚𑀸𑀢𑀓𑀁 (𑁨-𑁮-𑁧𑁦)

𑁧𑁫𑁯. 𑀥𑀚𑀫𑀧𑀭𑀺𑀫𑀺𑀢𑀁 𑀅𑀦𑀦𑁆𑀢𑀧𑀸𑀭𑀁, 𑀤𑀼𑀧𑁆𑀧𑀲𑀳𑀁𑀥𑀗𑁆𑀓𑁂𑀳𑀺 𑀲𑀸𑀕𑀭𑀁𑀯 [𑀲𑀸𑀕𑀭𑀫𑀺𑀯 (𑀲𑀻. 𑀲𑁆𑀬𑀸. 𑀧𑀻.)];

𑀕𑀺𑀭𑀺𑀫𑀺𑀯𑀅𑀦𑀺𑀮𑁂𑀦 𑀤𑀼𑀧𑁆𑀧𑀲𑀬𑁆𑀳𑁄 [𑀤𑀼𑀧𑁆𑀧𑀲𑀳𑁄 (𑀲𑀻. 𑀧𑀻. 𑀓.)], 𑀤𑀼𑀧𑁆𑀧𑀲𑀳𑁄 𑀅𑀳𑀫𑀚𑁆𑀚𑀢𑀸𑀤𑀺𑀲𑁂𑀦.

𑁧𑁬𑁦. 𑀫𑀸 𑀩𑀸𑀮𑀺𑀬𑀁 𑀯𑀺𑀮𑀧𑀺 [𑀯𑀺𑀧𑁆𑀧𑀮𑀧𑀺 (𑀩𑀳𑀽𑀲𑀼)] 𑀦 𑀳𑀺𑀲𑁆𑀲 𑀢𑀸𑀤𑀺𑀲𑀁, 𑀯𑀺𑀟𑀬𑁆𑀳𑀲𑁂 [𑀯𑀺𑀴𑀬𑁆𑀳𑀲𑁂 (𑀲𑀻. 𑀧𑀻.)] 𑀦 𑀳𑀺 𑀮𑀪𑀲𑁂 𑀦𑀺𑀲𑁂𑀥𑀓𑀁;

𑀆𑀲𑀚𑁆𑀚𑀲𑀺 𑀕𑀚𑀫𑀺𑀯 𑀏𑀓𑀘𑀸𑀭𑀺𑀦𑀁, 𑀬𑁄 𑀢𑀁 𑀧𑀤𑀸 𑀦𑀴𑀫𑀺𑀯 𑀧𑁄𑀣𑀬𑀺𑀲𑁆𑀲𑀢𑀻𑀢𑀺.

𑀤𑀼𑀢𑀺𑀬𑀧𑀮𑀸𑀬𑀺𑀢𑀚𑀸𑀢𑀓𑀁 𑀤𑀲𑀫𑀁.

𑀓𑀸𑀲𑀸𑀯𑀯𑀕𑁆𑀕𑁄 𑀅𑀝𑁆𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀯𑀭𑀯𑀢𑁆𑀣𑀯𑀘𑁄 𑀤𑀼𑀫𑀔𑀻𑀡𑀨𑀮𑀁, 𑀘𑀢𑀼𑀭𑁄𑀥𑀫𑁆𑀫𑀯𑀭𑀁 𑀧𑀼𑀭𑀺𑀲𑀼𑀢𑁆𑀢𑀫;

𑀥𑀗𑁆𑀓𑀫𑀕𑀥𑀸 𑀘 𑀢𑀬𑁄𑀕𑀺𑀭𑀺𑀦𑀸𑀫, 𑀕𑀚𑀕𑁆𑀕𑀯𑀭𑁄 𑀥𑀚𑀯𑀭𑁂𑀦 𑀤𑀲𑀸𑀢𑀺.