𑁭. 𑀩𑀻𑀭𑀡𑀣𑀫𑁆𑀪𑀯𑀕𑁆𑀕𑁄

𑁨𑁧𑁧. 𑀲𑁄𑀫𑀤𑀢𑁆𑀢𑀚𑀸𑀢𑀓𑀁 (𑁨-𑁭-𑁧)

𑁧𑁨𑁧. 𑀅𑀓𑀸𑀲𑀺 𑀬𑁄𑀕𑁆𑀕𑀁 𑀥𑀼𑀯𑀫𑀧𑁆𑀧𑀫𑀢𑁆𑀢𑁄, 𑀲𑀁𑀯𑀘𑁆𑀙𑀭𑀁 𑀩𑀻𑀭𑀡𑀣𑀫𑁆𑀪𑀓𑀲𑁆𑀫𑀺𑀁;

𑀩𑁆𑀬𑀸𑀓𑀸𑀲𑀺 𑀲𑀜𑁆𑀜𑀁 𑀧𑀭𑀺𑀲𑀁 𑀯𑀺𑀕𑀬𑁆𑀳, 𑀦 𑀦𑀺𑀬𑁆𑀬𑀫𑁄 𑀢𑀸𑀬𑀢𑀺 𑀅𑀧𑁆𑀧𑀧𑀜𑁆𑀜𑀁.

𑁧𑁨𑁨. 𑀤𑁆𑀯𑀬𑀁 𑀬𑀸𑀘𑀦𑀓𑁄 𑀢𑀸𑀢, 𑀲𑁄𑀫𑀤𑀢𑁆𑀢 𑀦𑀺𑀕𑀘𑁆𑀙𑀢𑀺;

𑀅𑀮𑀸𑀪𑀁 𑀥𑀦𑀮𑀸𑀪𑀁 𑀯𑀸, 𑀏𑀯𑀁 𑀥𑀫𑁆𑀫𑀸 𑀳𑀺 𑀬𑀸𑀘𑀦𑀸𑀢𑀺.

𑀲𑁄𑀫𑀤𑀢𑁆𑀢𑀚𑀸𑀢𑀓𑀁 𑀧𑀞𑀫𑀁.

𑁨𑁧𑁨. 𑀉𑀘𑁆𑀙𑀺𑀝𑁆𑀞𑀪𑀢𑁆𑀢𑀚𑀸𑀢𑀓𑀁 (𑁨-𑁭-𑁨)

𑁧𑁨𑁩. 𑀅𑀜𑁆𑀜𑁄 𑀉𑀧𑀭𑀺𑀫𑁄 𑀯𑀡𑁆𑀡𑁄, 𑀅𑀜𑁆𑀜𑁄 𑀯𑀡𑁆𑀡𑁄 𑀘 𑀳𑁂𑀝𑁆𑀞𑀺𑀫𑁄;

𑀩𑁆𑀭𑀸𑀳𑁆𑀫𑀡𑀻 𑀢𑁆𑀯𑁂𑀯 𑀧𑀼𑀘𑁆𑀙𑀸𑀫𑀺, 𑀓𑀺𑀁 𑀳𑁂𑀝𑁆𑀞𑀸 𑀓𑀺𑀜𑁆𑀘 𑀉𑀧𑁆𑀧𑀭𑀺.

𑁧𑁨𑁪. 𑀅𑀳𑀁 𑀦𑀝𑁄𑀲𑁆𑀫𑀺 𑀪𑀤𑁆𑀤𑀦𑁆𑀢𑁂, 𑀪𑀺𑀓𑁆𑀔𑀓𑁄𑀲𑁆𑀫𑀺 𑀇𑀥𑀸𑀕𑀢𑁄;

𑀅𑀬𑀜𑁆𑀳𑀺 𑀓𑁄𑀝𑁆𑀞𑀫𑁄𑀢𑀺𑀡𑁆𑀡𑁄, 𑀅𑀬𑀁 𑀲𑁄 𑀬𑀁 [𑀢𑁆𑀯𑀁 (𑀓.)] 𑀕𑀯𑁂𑀲𑀲𑀻𑀢𑀺.

𑀉𑀘𑁆𑀙𑀺𑀝𑁆𑀞𑀪𑀢𑁆𑀢𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁨𑁧𑁩. 𑀪𑀭𑀼𑀚𑀸𑀢𑀓𑀁 (𑁨-𑁭-𑁩)

𑁧𑁨𑁫. 𑀇𑀲𑀻𑀦𑀫𑀦𑁆𑀢𑀭𑀁 𑀓𑀢𑁆𑀯𑀸, 𑀪𑀭𑀼𑀭𑀸𑀚𑀸𑀢𑀺 [𑀓𑀼𑀭𑀼𑀭𑀸𑀚𑀸𑀢𑀺 (𑀓.)] 𑀫𑁂 𑀲𑀼𑀢𑀁;

𑀉𑀘𑁆𑀙𑀺𑀦𑁆𑀦𑁄 𑀲𑀳 𑀭𑀝𑁆𑀞𑁂𑀳𑀺 [𑀭𑀝𑁆𑀞𑁂𑀦 (𑀲𑀻. 𑀧𑀻.)], 𑀲𑀭𑀸𑀚𑀸 𑀯𑀺𑀪𑀯𑀗𑁆𑀕𑀢𑁄.

𑁧𑁨𑁬. 𑀢𑀲𑁆𑀫𑀸 𑀳𑀺 𑀙𑀦𑁆𑀤𑀸𑀕𑀫𑀦𑀁, 𑀦𑀧𑁆𑀧𑀲𑀁𑀲𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀅𑀤𑀼𑀝𑁆𑀞𑀘𑀺𑀢𑁆𑀢𑁄 𑀪𑀸𑀲𑁂𑀬𑁆𑀬, 𑀕𑀺𑀭𑀁 𑀲𑀘𑁆𑀘𑀼𑀧𑀲𑀁𑀳𑀺𑀢𑀦𑁆𑀢𑀺.

𑀪𑀭𑀼𑀚𑀸𑀢𑀓𑀁 [𑀓𑀼𑀭𑀼𑀭𑀸𑀢𑀓𑀁 (𑀓.)] 𑀢𑀢𑀺𑀬𑀁.

𑁨𑁧𑁪. 𑀧𑀼𑀡𑁆𑀡𑀦𑀤𑀻𑀚𑀸𑀢𑀓𑀁 (𑁨-𑁭-𑁪)

𑁧𑁨𑁭. 𑀧𑀼𑀡𑁆𑀡𑀁 𑀦𑀤𑀺𑀁 𑀬𑁂𑀦 𑀘 𑀧𑁂𑀬𑁆𑀬𑀫𑀸𑀳𑀼, 𑀚𑀸𑀢𑀁 𑀬𑀯𑀁 𑀬𑁂𑀦 𑀘 𑀕𑀼𑀬𑁆𑀳𑀫𑀸𑀳𑀼;

𑀤𑀽𑀭𑀁 𑀕𑀢𑀁 𑀬𑁂𑀦 𑀘 𑀅𑀯𑁆𑀳𑀬𑀦𑁆𑀢𑀺, 𑀲𑁄 𑀢𑁆𑀬𑀸𑀕𑀢𑁄 [𑀢𑁆𑀬𑀸𑀪𑀢𑁄 (𑀲𑁆𑀬𑀸. 𑀓.) 𑀧𑀳𑁂𑀴𑀺𑀕𑀸𑀣𑀸𑀪𑀸𑀯𑁄 𑀫𑀦𑀲𑀺 𑀓𑀸𑀢𑀩𑁆𑀩𑁄] 𑀳𑀦𑁆𑀤 𑀘 𑀪𑀼𑀜𑁆𑀚 𑀩𑁆𑀭𑀸𑀳𑁆𑀫𑀡.

𑁧𑁨𑁮. 𑀬𑀢𑁄 𑀫𑀁 𑀲𑀭𑀢𑀻 𑀭𑀸𑀚𑀸, 𑀯𑀸𑀬𑀲𑀫𑁆𑀧𑀺 𑀧𑀳𑁂𑀢𑀯𑁂;

𑀳𑀁𑀲𑀸 𑀓𑁄𑀜𑁆𑀘𑀸 𑀫𑀬𑀽𑀭𑀸 𑀘 [𑀳𑀁𑀲𑀓𑁄𑀜𑁆𑀘𑀫𑀬𑀽𑀭𑀸𑀦𑀁 (𑀓. 𑀅𑀝𑁆𑀞. 𑀧𑀸𑀞𑀦𑁆𑀢𑀭𑀁)], 𑀅𑀲𑀢𑀻𑀬𑁂𑀯 𑀧𑀸𑀧𑀺𑀬𑀸𑀢𑀺.

𑀧𑀼𑀡𑁆𑀡𑀦𑀤𑀻𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁨𑁧𑁫. 𑀓𑀘𑁆𑀙𑀧𑀚𑀸𑀢𑀓𑀁 (𑁨-𑁭-𑁫)

𑁧𑁨𑁯. 𑀅𑀯𑀥𑀻 𑀯𑀢 𑀅𑀢𑁆𑀢𑀸𑀦𑀁, 𑀓𑀘𑁆𑀙𑀧𑁄 𑀩𑁆𑀬𑀸𑀳𑀭𑀁 𑀕𑀺𑀭𑀁 [𑀓𑀘𑁆𑀙𑀧𑁄𑀯 𑀧𑀩𑁆𑀬𑀸𑀳𑀭𑀁 (𑀲𑁆𑀬𑀸.), 𑀓𑀘𑁆𑀙𑀧𑁄 𑀲𑁄 𑀧𑀩𑁆𑀬𑀸𑀳𑀭𑀁 (𑀓.)];

𑀲𑀼𑀕𑁆𑀕𑀳𑀻𑀢𑀲𑁆𑀫𑀺𑀁 𑀓𑀝𑁆𑀞𑀲𑁆𑀫𑀺𑀁, 𑀯𑀸𑀘𑀸𑀬 𑀲𑀓𑀺𑀬𑀸𑀯𑀥𑀺.

𑁧𑁩𑁦. 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀦𑀭𑀯𑀻𑀭𑀺𑀬𑀲𑁂𑀝𑁆𑀞, 𑀯𑀸𑀘𑀁 𑀧𑀫𑀼𑀜𑁆𑀘𑁂 𑀓𑀼𑀲𑀮𑀁 𑀦𑀸𑀢𑀺𑀯𑁂𑀮𑀁;

𑀧𑀲𑁆𑀲𑀲𑀺 𑀩𑀳𑀼𑀪𑀸𑀡𑁂𑀦, 𑀓𑀘𑁆𑀙𑀧𑀁 𑀩𑁆𑀬𑀲𑀦𑀁 𑀕𑀢𑀦𑁆𑀢𑀺.

𑀓𑀘𑁆𑀙𑀧𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁨𑁧𑁬. 𑀫𑀘𑁆𑀙𑀚𑀸𑀢𑀓𑀁 (𑁨-𑁭-𑁬)

𑁧𑁩𑁧. 𑀦 𑀫𑀸𑀬𑀫𑀕𑁆𑀕𑀺 𑀢𑀧𑀢𑀺, 𑀦 𑀲𑀽𑀮𑁄 𑀲𑀸𑀥𑀼𑀢𑀘𑁆𑀙𑀺𑀢𑁄;

𑀬𑀜𑁆𑀘 𑀫𑀁 𑀫𑀜𑁆𑀜𑀢𑁂 𑀫𑀘𑁆𑀙𑀻, 𑀅𑀜𑁆𑀜𑀁 𑀲𑁄 𑀭𑀢𑀺𑀬𑀸 𑀕𑀢𑁄.

𑁧𑁩𑁨. 𑀲𑁄 𑀫𑀁 𑀤𑀳𑀢𑀺 𑀭𑀸𑀕𑀕𑁆𑀕𑀺, 𑀘𑀺𑀢𑁆𑀢𑀁 𑀘𑀽𑀧𑀢𑀧𑁂𑀢𑀺 𑀫𑀁;

𑀚𑀸𑀮𑀺𑀦𑁄 𑀫𑀼𑀜𑁆𑀘𑀣𑀸𑀬𑀺𑀭𑀸 𑀫𑀁, 𑀦 𑀓𑀸𑀫𑁂 𑀳𑀜𑁆𑀜𑀢𑁂 𑀓𑁆𑀯𑀘𑀻𑀢𑀺.

𑀫𑀘𑁆𑀙𑀚𑀸𑀢𑀓𑀁 𑀙𑀝𑁆𑀞𑀁.

𑁨𑁧𑁭. 𑀲𑁂𑀕𑁆𑀕𑀼𑀚𑀸𑀢𑀓𑀁 (𑁨-𑁭-𑁭)

𑁧𑁩𑁩. 𑀲𑀩𑁆𑀩𑁄 𑀮𑁄𑀓𑁄 𑀅𑀢𑁆𑀢𑀫𑀦𑁄 𑀅𑀳𑁄𑀲𑀺, 𑀅𑀓𑁄𑀯𑀺𑀤𑀸 𑀕𑀸𑀫𑀥𑀫𑁆𑀫𑀲𑁆𑀲 𑀲𑁂𑀕𑁆𑀕𑀼;

𑀓𑁄𑀫𑀸𑀭𑀺 𑀓𑁄 𑀦𑀸𑀫 [𑀓𑁄𑀫𑀸𑀭𑀺𑀓𑀸 𑀦𑀸𑀫 (𑀓.), 𑀓𑁄𑀫𑀸𑀭𑀺𑀓𑁄 𑀦𑀸𑀫 (𑀲𑁆𑀬𑀸. 𑀧𑀻.)] 𑀢𑀯𑀚𑁆𑀚 𑀥𑀫𑁆𑀫𑁄, 𑀬𑀁 𑀢𑁆𑀯𑀁 𑀕𑀳𑀺𑀢𑀸 𑀧𑀯𑀦𑁂 𑀧𑀭𑁄𑀤𑀲𑀺.

𑁧𑁩𑁪. 𑀬𑁄 𑀤𑀼𑀓𑁆𑀔𑀨𑀼𑀝𑁆𑀞𑀸𑀬 𑀪𑀯𑁂𑀬𑁆𑀬 𑀢𑀸𑀡𑀁, 𑀲𑁄 𑀫𑁂 𑀧𑀺𑀢𑀸 𑀤𑀼𑀩𑁆𑀪𑀺 𑀯𑀦𑁂 𑀓𑀭𑁄𑀢𑀺;

𑀲𑀸 𑀓𑀲𑁆𑀲 𑀓𑀦𑁆𑀤𑀸𑀫𑀺 𑀯𑀦𑀲𑁆𑀲 𑀫𑀚𑁆𑀛𑁂, 𑀬𑁄 𑀢𑀸𑀬𑀺𑀢𑀸 𑀲𑁄 𑀲𑀳𑀲𑀁 𑀓𑀭𑁄𑀢𑀻𑀢𑀺.

𑀲𑁂𑀕𑁆𑀕𑀼𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁨𑁧𑁮. 𑀓𑀽𑀝𑀯𑀸𑀡𑀺𑀚𑀚𑀸𑀢𑀓𑀁 (𑁨-𑁭-𑁮)

𑁧𑁩𑁫. 𑀲𑀞𑀲𑁆𑀲 𑀲𑀸𑀞𑁂𑀬𑁆𑀬𑀫𑀺𑀤𑀁 𑀲𑀼𑀘𑀺𑀦𑁆𑀢𑀺𑀢𑀁, 𑀧𑀘𑁆𑀘𑁄𑀟𑁆𑀟𑀺𑀢𑀁 𑀧𑀝𑀺𑀓𑀽𑀝𑀲𑁆𑀲 𑀓𑀽𑀝𑀁;

𑀨𑀸𑀮𑀜𑁆𑀘𑁂 𑀔𑀸𑀤𑁂𑀬𑁆𑀬𑀼𑀁 [𑀅𑀤𑁂𑀬𑁆𑀬𑀼𑀁 (𑀲𑀻. 𑀧𑀻.)] 𑀫𑀽𑀲𑀺𑀓𑀸, 𑀓𑀲𑁆𑀫𑀸 𑀓𑀼𑀫𑀸𑀭𑀁 𑀓𑀼𑀮𑀮𑀸 𑀦 [𑀦𑁄 (𑀲𑀻. 𑀲𑁆𑀬𑀸. 𑀧𑀻.)] 𑀳𑀭𑁂𑀬𑁆𑀬𑀼𑀁.

𑁧𑁩𑁬. 𑀓𑀽𑀝𑀲𑁆𑀲 𑀳𑀺 𑀲𑀦𑁆𑀢𑀺 [𑀲𑀦𑁆𑀢𑀻𑀥 (𑀓.)] 𑀓𑀽𑀝𑀓𑀽𑀝𑀸, 𑀪𑀯𑀢𑀺 [𑀪𑀯𑀦𑁆𑀢𑀺 (𑀓.)] 𑀘𑀸𑀧𑀺 𑀦𑀺𑀓𑀢𑀺𑀦𑁄 𑀦𑀺𑀓𑀢𑁆𑀬𑀸;

𑀤𑁂𑀳𑀺 𑀧𑀼𑀢𑁆𑀢𑀦𑀝𑁆𑀞 𑀨𑀸𑀮𑀦𑀝𑁆𑀞𑀲𑁆𑀲 𑀨𑀸𑀮𑀁, 𑀫𑀸 𑀢𑁂 𑀧𑀼𑀢𑁆𑀢𑀫𑀳𑀸𑀲𑀺 𑀨𑀸𑀮𑀦𑀝𑁆𑀞𑁄𑀢𑀺.

𑀓𑀽𑀝𑀯𑀸𑀡𑀺𑀚𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁨𑁧𑁯. 𑀕𑀭𑀳𑀺𑀢𑀚𑀸𑀢𑀓𑀁 (𑁨-𑁭-𑁯)

𑁧𑁩𑁭. 𑀳𑀺𑀭𑀜𑁆𑀜𑀁 𑀫𑁂 𑀲𑀼𑀯𑀡𑁆𑀡𑀁 𑀫𑁂, 𑀏𑀲𑀸 𑀭𑀢𑁆𑀢𑀺𑀁 𑀤𑀺𑀯𑀸 𑀓𑀣𑀸;

𑀤𑀼𑀫𑁆𑀫𑁂𑀥𑀸𑀦𑀁 𑀫𑀦𑀼𑀲𑁆𑀲𑀸𑀦𑀁, 𑀅𑀭𑀺𑀬𑀥𑀫𑁆𑀫𑀁 𑀅𑀧𑀲𑁆𑀲𑀢𑀁.

𑁧𑁩𑁮. 𑀤𑁆𑀯𑁂 𑀤𑁆𑀯𑁂 𑀕𑀳𑀧𑀢𑀬𑁄 𑀕𑁂𑀳𑁂, 𑀏𑀓𑁄 𑀢𑀢𑁆𑀣 𑀅𑀫𑀲𑁆𑀲𑀼𑀓𑁄;

𑀮𑀫𑁆𑀩𑀢𑁆𑀣𑀦𑁄 𑀯𑁂𑀡𑀺𑀓𑀢𑁄, 𑀅𑀣𑁄 𑀅𑀗𑁆𑀓𑀺𑀢𑀓𑀡𑁆𑀡𑀓𑁄;

𑀓𑀻𑀢𑁄 𑀥𑀦𑁂𑀦 𑀩𑀳𑀼𑀦𑀸, 𑀲𑁄 𑀢𑀁 𑀯𑀺𑀢𑀼𑀤𑀢𑁂 𑀚𑀦𑀦𑁆𑀢𑀺.

𑀕𑀭𑀳𑀺𑀢𑀚𑀸𑀢𑀓𑀁 𑀦𑀯𑀫𑀁.

𑁨𑁨𑁦. 𑀥𑀫𑁆𑀫𑀥𑀚𑀚𑀸𑀢𑀓𑀁 (𑁨-𑁭-𑁧𑁦)

𑁧𑁩𑁯. 𑀲𑀼𑀔𑀁 𑀚𑀻𑀯𑀺𑀢𑀭𑀽𑀧𑁄𑀲𑀺, 𑀭𑀝𑁆𑀞𑀸 𑀯𑀺𑀯𑀦𑀫𑀸𑀕𑀢𑁄;

𑀲𑁄 𑀏𑀓𑀓𑁄 𑀭𑀼𑀓𑁆𑀔𑀫𑀽𑀮𑁂 [𑀅𑀭𑀜𑁆𑀜𑀲𑁆𑀫𑀺𑀁 (𑀲𑀻. 𑀲𑁆𑀬𑀸. 𑀧𑀻.)], 𑀓𑀧𑀡𑁄 𑀯𑀺𑀬 𑀛𑀸𑀬𑀲𑀺.

𑁧𑁪𑁦. 𑀲𑀼𑀔𑀁 𑀚𑀻𑀯𑀺𑀢𑀭𑀽𑀧𑁄𑀲𑁆𑀫𑀺, 𑀭𑀝𑁆𑀞𑀸 𑀯𑀺𑀯𑀦𑀫𑀸𑀕𑀢𑁄;

𑀲𑁄 𑀏𑀓𑀓𑁄 𑀭𑀼𑀓𑁆𑀔𑀫𑀽𑀮𑁂, 𑀓𑀧𑀡𑁄 𑀯𑀺𑀬 𑀛𑀸𑀬𑀸𑀫𑀺;

𑀲𑀢𑀁 𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀁𑀢𑀺.

𑀥𑀫𑁆𑀫𑀥𑀚𑀚𑀸𑀢𑀓𑀁 𑀤𑀲𑀫𑀁.

𑀩𑀻𑀭𑀡𑀣𑀫𑁆𑀪𑀯𑀕𑁆𑀕𑁄 𑀲𑀢𑁆𑀢𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀣 𑀩𑀻𑀭𑀡𑀣𑀫𑁆𑀪𑀯𑀭𑁄 𑀘 𑀦𑀝𑁄, 𑀪𑀭𑀼𑀭𑀸𑀚𑀯𑀭𑀼𑀢𑁆𑀢𑀫𑀧𑀼𑀡𑁆𑀡𑀦𑀤𑀻;

𑀩𑀳𑀼𑀪𑀸𑀡𑀺 𑀅𑀕𑁆𑀕𑀺𑀧𑀯𑀦𑁂 𑀫𑀽𑀲𑀺𑀓𑀸, 𑀲𑀳𑀮𑀫𑁆𑀩𑀢𑁆𑀣𑀦𑁄 𑀓𑀧𑀡𑁂𑀦 𑀤𑀲𑀸𑀢𑀺.