𑁬. 𑀦𑀢𑀁𑀤𑀴𑁆𑀳𑀯𑀕𑁆𑀕𑁄

𑁨𑁦𑁧. 𑀩𑀦𑁆𑀥𑀦𑀸𑀕𑀸𑀭𑀚𑀸𑀢𑀓𑀁 (𑁨-𑁬-𑁧)

𑁧𑁦𑁧. 𑀦 𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸, 𑀬𑀤𑀸𑀬𑀲𑀁 𑀤𑀸𑀭𑀼𑀚𑀧𑀩𑁆𑀩𑀚𑀜𑁆𑀘 [𑀩𑀩𑁆𑀩𑀚𑀜𑁆𑀘 (𑀲𑀻.)];

𑀲𑀸𑀭𑀢𑁆𑀢𑀭𑀢𑁆𑀢𑀸 𑀫𑀡𑀺𑀓𑀼𑀡𑁆𑀟𑀮𑁂𑀲𑀼, 𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸.

𑁧𑁦𑁨. 𑀏𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸, 𑀑𑀳𑀸𑀭𑀺𑀦𑀁 𑀲𑀺𑀣𑀺𑀮𑀁 𑀤𑀼𑀧𑁆𑀧𑀫𑀼𑀜𑁆𑀘𑀁;

𑀏𑀢𑀫𑁆𑀧𑀺 𑀙𑁂𑀢𑁆𑀯𑀸𑀦 𑀯𑀚𑀦𑁆𑀢𑀺 𑀥𑀻𑀭𑀸, 𑀅𑀦𑀧𑁂𑀓𑁆𑀔𑀺𑀦𑁄 𑀓𑀸𑀫𑀲𑀼𑀔𑀁 𑀧𑀳𑀸𑀬𑀸𑀢𑀺.

𑀩𑀦𑁆𑀥𑀦𑀸𑀕𑀸𑀭𑀚𑀸𑀢𑀓𑀁 𑀧𑀞𑀫𑀁.

𑁨𑁦𑁨. 𑀓𑁂𑀴𑀺𑀲𑀻𑀮𑀚𑀸𑀢𑀓𑀁 (𑁨-𑁬-𑁨)

𑁧𑁦𑁩. 𑀳𑀁𑀲𑀸 𑀓𑁄𑀜𑁆𑀘𑀸 𑀫𑀬𑀽𑀭𑀸 𑀘, 𑀳𑀢𑁆𑀣𑀬𑁄 [𑀳𑀢𑁆𑀣𑀺𑀦𑁄 (𑀲𑀻.), 𑀳𑀢𑁆𑀣𑀺𑀬𑁄 (𑀲𑁆𑀬𑀸. 𑀧𑀻.)] 𑀧𑀲𑀤𑀸 𑀫𑀺𑀕𑀸;

𑀲𑀩𑁆𑀩𑁂 𑀲𑀻𑀳𑀲𑁆𑀲 𑀪𑀸𑀬𑀦𑁆𑀢𑀺, 𑀦𑀢𑁆𑀣𑀺 𑀓𑀸𑀬𑀲𑁆𑀫𑀺 𑀢𑀼𑀮𑁆𑀬𑀢𑀸.

𑁧𑁦𑁪. 𑀏𑀯𑀫𑁂𑀯 𑀫𑀦𑀼𑀲𑁆𑀲𑁂𑀲𑀼, 𑀤𑀳𑀭𑁄 𑀘𑁂𑀧𑀺 𑀧𑀜𑁆𑀜𑀯𑀸;

𑀲𑁄 𑀳𑀺 𑀢𑀢𑁆𑀣 𑀫𑀳𑀸 𑀳𑁄𑀢𑀺, 𑀦𑁂𑀯 𑀩𑀸𑀮𑁄 𑀲𑀭𑀻𑀭𑀯𑀸𑀢𑀺.

𑀓𑁂𑀴𑀺𑀲𑀻𑀮𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁨𑁦𑁩. 𑀔𑀡𑁆𑀟𑀚𑀸𑀢𑀓𑀁 (𑁨-𑁬-𑁩)

𑁧𑁦𑁫. 𑀯𑀺𑀭𑀽𑀧𑀓𑁆𑀔𑁂𑀳𑀺 𑀫𑁂 𑀫𑁂𑀢𑁆𑀢𑀁, 𑀫𑁂𑀢𑁆𑀢𑀁 𑀏𑀭𑀸𑀧𑀣𑁂𑀳𑀺 𑀫𑁂;

𑀙𑀩𑁆𑀬𑀸𑀧𑀼𑀢𑁆𑀢𑁂𑀳𑀺 𑀫𑁂 𑀫𑁂𑀢𑁆𑀢𑀁, 𑀫𑁂𑀢𑁆𑀢𑀁 𑀓𑀡𑁆𑀳𑀸𑀕𑁄𑀢𑀫𑀓𑁂𑀳𑀺 𑀘.

𑀅𑀧𑀸𑀤𑀓𑁂𑀳𑀺 𑀫𑁂 𑀫𑁂𑀢𑁆𑀢𑀁, 𑀫𑁂𑀢𑁆𑀢𑀁 𑀤𑁆𑀯𑀺𑀧𑀸𑀤𑀓𑁂𑀳𑀺 𑀫𑁂;

𑀘𑀢𑀼𑀧𑁆𑀧𑀤𑁂𑀳𑀺 𑀫𑁂 𑀫𑁂𑀢𑁆𑀢𑀁, 𑀫𑁂𑀢𑁆𑀢𑀁 𑀩𑀳𑀼𑀧𑁆𑀧𑀤𑁂𑀳𑀺 𑀫𑁂.

𑀫𑀸 𑀫𑀁 𑀅𑀧𑀸𑀤𑀓𑁄 𑀳𑀺𑀁𑀲𑀺, 𑀫𑀸 𑀫𑀁 𑀳𑀺𑀁𑀲𑀺 𑀤𑁆𑀯𑀺𑀧𑀸𑀤𑀓𑁄;

𑀫𑀸 𑀫𑀁 𑀘𑀢𑀼𑀧𑁆𑀧𑀤𑁄 𑀳𑀺𑀁𑀲𑀺, 𑀫𑀸 𑀫𑀁 𑀳𑀺𑀁𑀲𑀺 𑀩𑀳𑀼𑀧𑁆𑀧𑀤𑁄.

𑀲𑀩𑁆𑀩𑁂 𑀲𑀢𑁆𑀢𑀸 𑀲𑀩𑁆𑀩𑁂 𑀧𑀸𑀡𑀸, 𑀲𑀩𑁆𑀩𑁂 𑀪𑀽𑀢𑀸 𑀘 𑀓𑁂𑀯𑀮𑀸;

𑀲𑀩𑁆𑀩𑁂 𑀪𑀤𑁆𑀭𑀸𑀦𑀺 𑀧𑀲𑁆𑀲𑀦𑁆𑀢𑀼, 𑀫𑀸 𑀓𑀜𑁆𑀘𑀺 [𑀓𑀺𑀜𑁆𑀘𑀺 (𑀲𑁆𑀬𑀸. 𑀓.)] 𑀧𑀸𑀧𑀫𑀸𑀕𑀫𑀸.

𑁧𑁦𑁬. 𑀅𑀧𑁆𑀧𑀫𑀸𑀡𑁄 𑀩𑀼𑀤𑁆𑀥𑁄, 𑀅𑀧𑁆𑀧𑀫𑀸𑀡𑁄 𑀥𑀫𑁆𑀫𑁄;

𑀅𑀧𑁆𑀧𑀫𑀸𑀡𑁄 𑀲𑀗𑁆𑀖𑁄, 𑀧𑀫𑀸𑀡𑀯𑀦𑁆𑀢𑀸𑀦𑀺 𑀲𑀭𑀻𑀲𑀧𑀸𑀦𑀺 [𑀲𑀺𑀭𑀺𑀲𑀧𑀸𑀦𑀺 (𑀲𑀻. 𑀲𑁆𑀬𑀸. 𑀧𑀻.)];

𑀅𑀳𑀺𑀯𑀺𑀘𑁆𑀙𑀺𑀓𑀲𑀢𑀧𑀤𑀻, 𑀉𑀡𑁆𑀡𑀦𑀸𑀪𑀺 [𑀉𑀡𑁆𑀡𑀸𑀦𑀸𑀪𑀺 (𑀲𑀻. 𑀲𑁆𑀬𑀸. 𑀧𑀻.)] 𑀲𑀭𑀩𑀽𑀫𑀽𑀲𑀺𑀓𑀸.

𑀓𑀢𑀸 𑀫𑁂 𑀭𑀓𑁆𑀔𑀸 𑀓𑀢𑀸 𑀫𑁂 𑀧𑀭𑀺𑀢𑁆𑀢𑀸, 𑀧𑀝𑀺𑀓𑁆𑀓𑀫𑀦𑁆𑀢𑀼 𑀪𑀽𑀢𑀸𑀦𑀺;

𑀲𑁄𑀳𑀁 𑀦𑀫𑁄 𑀪𑀕𑀯𑀢𑁄, 𑀦𑀫𑁄 𑀲𑀢𑁆𑀢𑀦𑁆𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀦𑁆𑀢𑀺.

𑀔𑀡𑁆𑀟𑀚𑀸𑀢𑀓𑀁 𑀢𑀢𑀺𑀬𑀁.

𑁨𑁦𑁪. 𑀯𑀻𑀭𑀓𑀚𑀸𑀢𑀓𑀁 (𑁨-𑁬-𑁪)

𑁧𑁦𑁭. 𑀅𑀧𑀺 𑀯𑀻𑀭𑀓 𑀧𑀲𑁆𑀲𑁂𑀲𑀺, 𑀲𑀓𑀼𑀡𑀁 𑀫𑀜𑁆𑀚𑀼𑀪𑀸𑀡𑀓𑀁;

𑀫𑀬𑀽𑀭𑀕𑀻𑀯𑀲𑀗𑁆𑀓𑀸𑀲𑀁, 𑀧𑀢𑀺𑀁 𑀫𑀬𑁆𑀳𑀁 𑀲𑀯𑀺𑀝𑁆𑀞𑀓𑀁.

𑁧𑁦𑁮. 𑀉𑀤𑀓𑀣𑀮𑀘𑀭𑀲𑁆𑀲 𑀧𑀓𑁆𑀔𑀺𑀦𑁄, 𑀦𑀺𑀘𑁆𑀘𑀁 𑀆𑀫𑀓𑀫𑀘𑁆𑀙𑀪𑁄𑀚𑀺𑀦𑁄;

𑀢𑀲𑁆𑀲𑀸𑀦𑀼𑀓𑀭𑀁 𑀲𑀯𑀺𑀝𑁆𑀞𑀓𑁄, 𑀲𑁂𑀯𑀸𑀮𑁂 𑀧𑀮𑀺𑀕𑀼𑀡𑁆𑀞𑀺𑀢𑁄 𑀫𑀢𑁄𑀢𑀺.

𑀯𑀻𑀭𑀓𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁨𑁦𑁫. 𑀕𑀗𑁆𑀕𑁂𑀬𑁆𑀬𑀚𑀸𑀢𑀓𑀁 (𑁨-𑁬-𑁫)

𑁧𑁦𑁯. 𑀲𑁄𑀪𑀢𑀺 𑀫𑀘𑁆𑀙𑁄 𑀕𑀗𑁆𑀕𑁂𑀬𑁆𑀬𑁄, 𑀅𑀣𑁄 𑀲𑁄𑀪𑀢𑀺 𑀬𑀸𑀫𑀼𑀦𑁄 [𑀲𑁄𑀪𑀦𑁆𑀢𑀺 𑀫𑀘𑁆𑀙𑀸 𑀕𑀗𑁆𑀕𑁂𑀬𑁆𑀬𑀸, 𑀅𑀣𑁄 𑀲𑁄𑀪𑀦𑁆𑀢𑀺 𑀬𑀸𑀫𑀼𑀦𑀸 (𑀲𑁆𑀬𑀸. 𑀧𑀻.)];

𑀘𑀢𑀼𑀧𑁆𑀧𑀤𑁄𑀬𑀁 𑀧𑀼𑀭𑀺𑀲𑁄, 𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄;

𑀈𑀲𑀓𑀸𑀬𑀢 [𑀈𑀲𑀫𑀸𑀬𑀢 (𑀓.)] 𑀕𑀻𑀯𑁄 𑀘, 𑀲𑀩𑁆𑀩𑁂𑀯 𑀅𑀢𑀺𑀭𑁄𑀘𑀢𑀺.

𑁧𑁧𑁦. 𑀬𑀁 𑀧𑀼𑀘𑁆𑀙𑀺𑀢𑁄 𑀦 𑀢𑀁 𑀅𑀓𑁆𑀔𑀸𑀲𑀺 [𑀅𑀓𑁆𑀔𑀸 (𑀲𑀻. 𑀲𑁆𑀬𑀸. 𑀧𑀻.)], 𑀅𑀜𑁆𑀜𑀁 𑀅𑀓𑁆𑀔𑀸𑀲𑀺 [𑀅𑀓𑁆𑀔𑀸𑀢𑀺 (𑀲𑁆𑀬𑀸. 𑀧𑀻.)] 𑀧𑀼𑀘𑁆𑀙𑀺𑀢𑁄;

𑀅𑀢𑁆𑀢𑀧𑁆𑀧𑀲𑀁𑀲𑀓𑁄 𑀧𑁄𑀲𑁄, 𑀦𑀸𑀬𑀁 𑀅𑀲𑁆𑀫𑀸𑀓 𑀭𑀼𑀘𑁆𑀘𑀢𑀻𑀢𑀺.

𑀕𑀗𑁆𑀕𑁂𑀬𑁆𑀬𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁨𑁦𑁬. 𑀓𑀼𑀭𑀼𑀗𑁆𑀕𑀫𑀺𑀕𑀚𑀸𑀢𑀓𑀁 (𑁨-𑁬-𑁬)

𑁧𑁧𑁧. 𑀇𑀗𑁆𑀖 𑀯𑀤𑁆𑀥𑀫𑀬𑀁 [𑀯𑀤𑁆𑀥𑀫𑀬𑀁 (𑀲𑀻. 𑀲𑁆𑀬𑀸. 𑀧𑀻.)] 𑀧𑀸𑀲𑀁, 𑀙𑀺𑀦𑁆𑀤 𑀤𑀦𑁆𑀢𑁂𑀳𑀺 𑀓𑀘𑁆𑀙𑀧;

𑀅𑀳𑀁 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺, 𑀬𑀣𑀸 𑀦𑁂𑀳𑀺𑀢𑀺 𑀮𑀼𑀤𑁆𑀤𑀓𑁄.

𑁧𑁧𑁨. 𑀓𑀘𑁆𑀙𑀧𑁄 𑀧𑀸𑀯𑀺𑀲𑀻 𑀯𑀸𑀭𑀺𑀁, 𑀓𑀼𑀭𑀼𑀗𑁆𑀕𑁄 𑀧𑀸𑀯𑀺𑀲𑀻 𑀯𑀦𑀁;

𑀲𑀢𑀧𑀢𑁆𑀢𑁄 𑀤𑀼𑀫𑀕𑁆𑀕𑀫𑁆𑀳𑀸, 𑀤𑀽𑀭𑁂 𑀧𑀼𑀢𑁆𑀢𑁂 𑀅𑀧𑀸𑀦𑀬𑀻𑀢𑀺.

𑀓𑀼𑀭𑀼𑀗𑁆𑀕𑀫𑀺𑀕𑀚𑀸𑀢𑀓𑀁 𑀙𑀝𑁆𑀞𑀁.

𑁨𑁦𑁭. 𑀅𑀲𑁆𑀲𑀓𑀚𑀸𑀢𑀓𑀁 (𑁨-𑁬-𑁭)

𑁧𑁧𑁩. 𑀅𑀬𑀫𑀲𑁆𑀲𑀓𑀭𑀸𑀚𑁂𑀦, 𑀤𑁂𑀲𑁄 𑀯𑀺𑀘𑀭𑀺𑀢𑁄 𑀫𑀬𑀸;

𑀅𑀦𑀼𑀓𑀸𑀫𑀬 𑀓𑀸𑀫𑁂𑀦 [𑀅𑀦𑀼𑀓𑀸𑀫𑀬𑀯𑀦𑀼𑀓𑀸𑀫𑁂𑀦 (𑀲𑀻. 𑀧𑀻.)], 𑀧𑀺𑀬𑁂𑀦 𑀧𑀢𑀺𑀦𑀸 𑀲𑀳.

𑁧𑁧𑁪. 𑀦𑀯𑁂𑀦 𑀲𑀼𑀔𑀤𑀼𑀓𑁆𑀔𑁂𑀦, 𑀧𑁄𑀭𑀸𑀡𑀁 𑀅𑀧𑀺𑀥𑀻𑀬𑀢𑀺 [𑀅𑀧𑀺𑀣𑀻𑀬𑀢𑀺 (𑀲𑀻. 𑀧𑀻.), 𑀅𑀧𑀺𑀣𑀺𑀬𑁆𑀬𑀢𑀺 (𑀲𑁆𑀬𑀸.)];

𑀢𑀲𑁆𑀫𑀸 𑀅𑀲𑁆𑀲𑀓𑀭𑀜𑁆𑀜𑀸𑀯, 𑀓𑀻𑀝𑁄 𑀧𑀺𑀬𑀢𑀭𑁄 𑀫𑀫𑀸𑀢𑀺.

𑀅𑀲𑁆𑀲𑀓𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁨𑁦𑁮. 𑀲𑀼𑀲𑀼𑀫𑀸𑀭𑀚𑀸𑀢𑀓𑀁 (𑁨-𑁬-𑁮)

𑁧𑁧𑁫. 𑀅𑀮𑀁 𑀫𑁂𑀢𑁂𑀳𑀺 𑀅𑀫𑁆𑀩𑁂𑀳𑀺, 𑀚𑀫𑁆𑀩𑀽𑀳𑀺 𑀧𑀦𑀲𑁂𑀳𑀺 𑀘;

𑀬𑀸𑀦𑀺 𑀧𑀸𑀭𑀁 𑀲𑀫𑀼𑀤𑁆𑀤𑀲𑁆𑀲, 𑀯𑀭𑀁 𑀫𑀬𑁆𑀳𑀁 𑀉𑀤𑀼𑀫𑁆𑀩𑀭𑁄.

𑁧𑁧𑁬. 𑀫𑀳𑀢𑀻 𑀯𑀢 𑀢𑁂 𑀩𑁄𑀦𑁆𑀤𑀺, 𑀦 𑀘 𑀧𑀜𑁆𑀜𑀸 𑀢𑀤𑀽𑀧𑀺𑀓𑀸;

𑀲𑀼𑀲𑀼𑀫𑀸𑀭 [𑀲𑀼𑀁𑀲𑀼𑀫𑀸𑀭 (𑀲𑀻. 𑀲𑁆𑀬𑀸. 𑀧𑀻.)] 𑀯𑀜𑁆𑀘𑀺𑀢𑁄 𑀫𑁂𑀲𑀺, 𑀕𑀘𑁆𑀙 𑀤𑀸𑀦𑀺 𑀬𑀣𑀸𑀲𑀼𑀔𑀦𑁆𑀢𑀺.

𑀲𑀼𑀲𑀼𑀫𑀸𑀭𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁨𑁦𑁯. 𑀓𑀼𑀓𑁆𑀓𑀼𑀝𑀚𑀸𑀢𑀓𑀁 (𑁨-𑁬-𑁯)

𑁧𑁧𑁭. 𑀤𑀺𑀝𑁆𑀞𑀸 𑀫𑀬𑀸 𑀯𑀦𑁂 𑀭𑀼𑀓𑁆𑀔𑀸, 𑀅𑀲𑁆𑀲𑀓𑀡𑁆𑀡𑀸 𑀯𑀺𑀪𑀻𑀝𑀓𑀸 [𑀯𑀺𑀪𑁂𑀤𑀓𑀸 (𑀲𑁆𑀬𑀸. 𑀓.)];

𑀦 𑀢𑀸𑀦𑀺 𑀏𑀯𑀁 𑀲𑀓𑁆𑀓𑀦𑁆𑀢𑀺, 𑀬𑀣𑀸 𑀢𑁆𑀯𑀁 𑀭𑀼𑀓𑁆𑀔 𑀲𑀓𑁆𑀓𑀲𑀺.

𑁧𑁧𑁮. 𑀧𑀼𑀭𑀸𑀡𑀓𑀼𑀓𑁆𑀓𑀼𑀝𑁄 [𑀓𑀓𑁆𑀓𑀭𑁄 (𑀲𑀻. 𑀲𑁆𑀬𑀸. 𑀧𑀻.)] 𑀅𑀬𑀁, 𑀪𑁂𑀢𑁆𑀯𑀸 𑀧𑀜𑁆𑀚𑀭𑀫𑀸𑀕𑀢𑁄;

𑀓𑀼𑀲𑀮𑁄 𑀯𑀸𑀴𑀧𑀸𑀲𑀸𑀦𑀁, 𑀅𑀧𑀓𑁆𑀓𑀫𑀢𑀺 𑀪𑀸𑀲𑀢𑀻𑀢𑀺.

𑀓𑀼𑀓𑁆𑀓𑀼𑀝 [𑀓𑀓𑁆𑀓𑀭 (𑀲𑀻. 𑀲𑁆𑀬𑀸. 𑀧𑀻.)] 𑀚𑀸𑀢𑀓𑀁 𑀦𑀯𑀫𑀁.

𑁨𑁧𑁦. 𑀓𑀦𑁆𑀤𑀕𑀮𑀓𑀚𑀸𑀢𑀓𑀁 (𑁨-𑁬-𑁧𑁦)

𑁧𑁧𑁯. 𑀅𑀫𑁆𑀪𑁄 𑀓𑁄 𑀦𑀸𑀫 𑀬𑀁 𑀭𑀼𑀓𑁆𑀔𑁄, 𑀲𑀺𑀦𑁆𑀦𑀧𑀢𑁆𑀢𑁄 [𑀲𑀻𑀦𑀧𑀢𑁆𑀢𑁄 (𑀲𑀻. 𑀧𑀻.)] 𑀲𑀓𑀡𑁆𑀝𑀓𑁄;

𑀬𑀢𑁆𑀣 𑀏𑀓𑀧𑁆𑀧𑀳𑀸𑀭𑁂𑀦, 𑀉𑀢𑁆𑀢𑀫𑀗𑁆𑀕𑀁 𑀯𑀺𑀪𑀺𑀚𑁆𑀚𑀺𑀢𑀁 [𑀯𑀺𑀲𑀸𑀝𑀺𑀓𑀁 (𑀲𑀻. 𑀲𑁆𑀬𑀸. 𑀧𑀻.), 𑀯𑀺𑀖𑀸𑀝𑀺𑀢𑀁 (𑀲𑀻. 𑀦𑀺𑀬𑁆𑀬)].

𑁧𑁨𑁦. 𑀅𑀘𑀸𑀭𑀺 𑀯𑀢𑀸𑀬𑀁 𑀯𑀺𑀢𑀼𑀤𑀁 𑀯𑀦𑀸𑀦𑀺, 𑀓𑀝𑁆𑀞𑀗𑁆𑀕𑀭𑀼𑀓𑁆𑀔𑁂𑀲𑀼 𑀅𑀲𑀸𑀭𑀓𑁂𑀲𑀼;

𑀅𑀣𑀸𑀲𑀤𑀸 𑀔𑀤𑀺𑀭𑀁 𑀚𑀸𑀢𑀲𑀸𑀭𑀁 [𑀚𑀸𑀢𑀺𑀲𑀸𑀭𑀁 (𑀓.)], 𑀬𑀢𑁆𑀣𑀩𑁆𑀪𑀺𑀤𑀸 𑀕𑀭𑀼𑀴𑁄 𑀉𑀢𑁆𑀢𑀫𑀗𑁆𑀕𑀦𑁆𑀢𑀺.

𑀓𑀦𑁆𑀤𑀕𑀮𑀓 [𑀓𑀦𑁆𑀤𑀮𑀓 (𑀓.)] 𑀚𑀸𑀢𑀓𑀁 𑀤𑀲𑀫𑀁.

𑀦𑀢𑀁𑀤𑀴𑁆𑀳𑀯𑀕𑁆𑀕𑁄 𑀙𑀝𑁆𑀞𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀤𑀴𑁆𑀳𑀩𑀦𑁆𑀥𑀦 𑀳𑀁𑀲𑀯𑀭𑁄 𑀘 𑀧𑀼𑀦, 𑀯𑀺𑀭𑀽𑀧𑀓𑁆𑀔 𑀲𑀯𑀺𑀝𑁆𑀞𑀓 𑀫𑀘𑁆𑀙𑀯𑀭𑁄;

𑀲𑀓𑀼𑀭𑀼𑀗𑁆𑀕 𑀲𑀅𑀲𑁆𑀲𑀓 𑀅𑀫𑁆𑀩𑀯𑀭𑁄, 𑀧𑀼𑀦 𑀓𑀼𑀓𑁆𑀓𑀼𑀝𑀓𑁄 𑀕𑀭𑀼𑀴𑁂𑀦 𑀤𑀲𑀸𑀢𑀺.