𑁫. 𑀭𑀼𑀳𑀓𑀯𑀕𑁆𑀕𑁄

𑁧𑁯𑁧. 𑀭𑀼𑀳𑀓𑀚𑀸𑀢𑀓𑀁 (𑁨-𑁫-𑁧)

𑁮𑁧. 𑀅𑀧𑀺 [𑀅𑀫𑁆𑀪𑁄 (𑀲𑁆𑀬𑀸. 𑀓. 𑀲𑀻.)] 𑀭𑀼𑀳𑀓 𑀙𑀺𑀦𑁆𑀦𑀸𑀧𑀺, 𑀚𑀺𑀬𑀸 𑀲𑀦𑁆𑀥𑀻𑀬𑀢𑁂 𑀧𑀼𑀦;

𑀲𑀦𑁆𑀥𑀻𑀬𑀲𑁆𑀲𑀼 𑀧𑀼𑀭𑀸𑀡𑀺𑀬𑀸, 𑀫𑀸 𑀓𑁄𑀥𑀲𑁆𑀲 𑀯𑀲𑀁 𑀕𑀫𑀺.

𑁮𑁨. 𑀯𑀺𑀚𑁆𑀚𑀫𑀸𑀦𑁂𑀲𑀼 𑀯𑀸𑀓𑁂𑀲𑀼 [𑀯𑀺𑀚𑁆𑀚𑀫𑀸𑀦𑀸𑀲𑀼 𑀫𑀭𑀼𑀯𑀸𑀲𑀼 (𑀲𑀻.), 𑀯𑀺𑀚𑁆𑀚𑀫𑀸𑀦𑀸𑀲𑀼 𑀫𑀭𑀽𑀤𑁆𑀯𑀸𑀲𑀼 (𑀧𑀻.)], 𑀯𑀺𑀚𑁆𑀚𑀫𑀸𑀦𑁂𑀲𑀼 𑀓𑀸𑀭𑀺𑀲𑀼;

𑀅𑀜𑁆𑀜𑀁 𑀚𑀺𑀬𑀁 𑀓𑀭𑀺𑀲𑁆𑀲𑀸𑀫𑀺, 𑀅𑀮𑀜𑁆𑀜𑁂𑀯 𑀧𑀼𑀭𑀸𑀡𑀺𑀬𑀸𑀢𑀺.

𑀭𑀼𑀳𑀓𑀚𑀸𑀢𑀓𑀁 𑀧𑀞𑀫𑀁.

𑁧𑁯𑁨. 𑀲𑀺𑀭𑀺𑀓𑀸𑀴𑀓𑀡𑁆𑀡𑀺𑀚𑀸𑀢𑀓𑀁 (𑁨-𑁫-𑁨)

𑁮𑁩. 𑀇𑀢𑁆𑀣𑀻 𑀲𑀺𑀬𑀸 𑀭𑀽𑀧𑀯𑀢𑀻, 𑀲𑀸 𑀘 𑀲𑀻𑀮𑀯𑀢𑀻 𑀲𑀺𑀬𑀸;

𑀧𑀼𑀭𑀺𑀲𑁄 𑀢𑀁 𑀦 𑀇𑀘𑁆𑀙𑁂𑀬𑁆𑀬, 𑀲𑀤𑁆𑀤𑀳𑀸𑀲𑀺 𑀫𑀳𑁄𑀲𑀥.

𑁮𑁪. 𑀲𑀤𑁆𑀤𑀳𑀸𑀫𑀺 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀤𑀼𑀩𑁆𑀪𑀕𑁄 𑀲𑀺𑀬𑀸;

𑀲𑀺𑀭𑀻 𑀘 𑀓𑀸𑀴𑀓𑀡𑁆𑀡𑀻 𑀘, 𑀦 𑀲𑀫𑁂𑀦𑁆𑀢𑀺 𑀓𑀼𑀤𑀸𑀘𑀦𑀦𑁆𑀢𑀺.

𑀲𑀺𑀭𑀺𑀓𑀸𑀴𑀓𑀡𑁆𑀡𑀺𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁧𑁯𑁩. 𑀘𑀽𑀴𑀧𑀤𑀼𑀫𑀚𑀸𑀢𑀓𑀁 (𑁨-𑁫-𑁩)

𑁮𑁫. 𑀅𑀬𑀫𑁂𑀯 𑀲𑀸 𑀅𑀳𑀫𑀧𑀺 [𑀅𑀳𑀫𑁆𑀧𑀺 (𑀲𑀻. 𑀲𑁆𑀬𑀸. 𑀧𑀻.), 𑀅𑀳𑀲𑁆𑀫𑀺 (𑀓.)] 𑀲𑁄 𑀅𑀦𑀜𑁆𑀜𑁄, 𑀅𑀬𑀫𑁂𑀯 𑀲𑁄 𑀳𑀢𑁆𑀣𑀘𑁆𑀙𑀺𑀦𑁆𑀦𑁄 𑀅𑀦𑀜𑁆𑀜𑁄;

𑀬𑀫𑀸𑀳 ‘‘𑀓𑁄𑀫𑀸𑀭𑀧𑀢𑀻 𑀫𑀫’’𑀦𑁆𑀢𑀺, 𑀯𑀚𑁆𑀛𑀺𑀢𑁆𑀣𑀺𑀬𑁄 𑀦𑀢𑁆𑀣𑀺 𑀇𑀢𑁆𑀣𑀻𑀲𑀼 𑀲𑀘𑁆𑀘𑀁.

𑁮𑁬. 𑀇𑀫𑀜𑁆𑀘 𑀚𑀫𑁆𑀫𑀁 𑀫𑀼𑀲𑀮𑁂𑀦 𑀳𑀦𑁆𑀢𑁆𑀯𑀸, 𑀮𑀼𑀤𑁆𑀤𑀁 𑀙𑀯𑀁 𑀧𑀭𑀤𑀸𑀭𑀽𑀧𑀲𑁂𑀯𑀺𑀁;

𑀇𑀫𑀺𑀲𑁆𑀲𑀸 𑀘 𑀦𑀁 𑀧𑀸𑀧𑀧𑀢𑀺𑀩𑁆𑀩𑀢𑀸𑀬, 𑀚𑀻𑀯𑀦𑁆𑀢𑀺𑀬𑀸 𑀙𑀺𑀦𑁆𑀤𑀣 𑀓𑀡𑁆𑀡𑀦𑀸𑀲𑀦𑁆𑀢𑀺.

𑀘𑀽𑀴𑀧𑀤𑀼𑀫𑀚𑀸𑀢𑀓𑀁 𑀢𑀢𑀺𑀬𑀁.

𑁧𑁯𑁪. 𑀫𑀡𑀺𑀘𑁄𑀭𑀚𑀸𑀢𑀓𑀁 (𑁨-𑁫-𑁪)

𑁮𑁭. 𑀦 𑀲𑀦𑁆𑀢𑀺 𑀤𑁂𑀯𑀸 𑀧𑀯𑀲𑀦𑁆𑀢𑀺 𑀦𑀽𑀦, 𑀦 𑀳𑀺 𑀦𑀽𑀦 𑀲𑀦𑁆𑀢𑀺 𑀇𑀥 𑀮𑁄𑀓𑀧𑀸𑀮𑀸;

𑀲𑀳𑀲𑀸 𑀓𑀭𑁄𑀦𑁆𑀢𑀸𑀦𑀫𑀲𑀜𑁆𑀜𑀢𑀸𑀦𑀁, 𑀦 𑀳𑀺 𑀦𑀽𑀦 𑀲𑀦𑁆𑀢𑀻 𑀧𑀝𑀺𑀲𑁂𑀥𑀺𑀢𑀸𑀭𑁄.

𑁮𑁮. 𑀅𑀓𑀸𑀮𑁂 𑀯𑀲𑁆𑀲𑀢𑀻 𑀢𑀲𑁆𑀲, 𑀓𑀸𑀮𑁂 𑀢𑀲𑁆𑀲 𑀦 𑀯𑀲𑁆𑀲𑀢𑀺;

𑀲𑀕𑁆𑀕𑀸 𑀘 𑀘𑀯𑀢𑀺 𑀞𑀸𑀦𑀸, 𑀦𑀦𑀼 𑀲𑁄 𑀢𑀸𑀯𑀢𑀸 𑀳𑀢𑁄𑀢𑀺.

𑀫𑀡𑀺𑀘𑁄𑀭𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁧𑁯𑁫. 𑀧𑀩𑁆𑀩𑀢𑀽𑀧𑀢𑁆𑀣𑀭𑀚𑀸𑀢𑀓𑀁 (𑁨-𑁫-𑁫)

𑁮𑁯. 𑀧𑀩𑁆𑀩𑀢𑀽𑀧𑀢𑁆𑀣𑀭𑁂 [𑀧𑀩𑁆𑀩𑀢𑀧𑀢𑁆𑀣𑀭𑁂 (𑀲𑀻. 𑀲𑁆𑀬𑀸. 𑀧𑀻.)] 𑀭𑀫𑁆𑀫𑁂, 𑀚𑀸𑀢𑀸 𑀧𑁄𑀓𑁆𑀔𑀭𑀡𑀻 𑀲𑀺𑀯𑀸;

𑀢𑀁 𑀲𑀺𑀗𑁆𑀕𑀸𑀮𑁄 𑀅𑀧𑀸𑀧𑀸𑀬𑀺 [𑀅𑀧𑀸𑀧𑀸𑀲𑀺 (𑀲𑀻. 𑀲𑁆𑀬𑀸. 𑀧𑀻.)], 𑀚𑀸𑀦𑀁 𑀲𑀻𑀳𑁂𑀦 𑀭𑀓𑁆𑀔𑀺𑀢𑀁.

𑁯𑁦. 𑀧𑀺𑀯𑀦𑁆𑀢𑀺 𑀘𑁂 [𑀧𑀺𑀯𑀦𑁆𑀢𑀺 𑀯𑁂 (𑀲𑀻.), 𑀧𑀺𑀯𑀦𑁆𑀢𑀺𑀯 (𑀧𑀻.), 𑀧𑀺𑀯𑀦𑁆𑀢𑁂𑀯 (?)] 𑀫𑀳𑀸𑀭𑀸𑀚, 𑀲𑀸𑀧𑀤𑀸𑀦𑀺 𑀫𑀳𑀸𑀦𑀤𑀺𑀁;

𑀦 𑀢𑁂𑀦 𑀅𑀦𑀤𑀻 𑀳𑁄𑀢𑀺, 𑀔𑀫𑀲𑁆𑀲𑀼 𑀬𑀤𑀺 𑀢𑁂 𑀧𑀺𑀬𑀸𑀢𑀺.

𑀧𑀩𑁆𑀩𑀢𑀽𑀧𑀢𑁆𑀣𑀭 [𑀧𑀩𑁆𑀩𑀢𑀧𑀢𑁆𑀣𑀭 (𑀲𑀻. 𑀲𑁆𑀬𑀸. 𑀧𑀻.)] 𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁧𑁯𑁬. 𑀯𑀮𑀸𑀳𑀓𑀲𑁆𑀲𑀚𑀸𑀢𑀓𑀁 (𑁨-𑁫-𑁬)

𑁯𑁧. 𑀬𑁂 𑀦 𑀓𑀸𑀳𑀦𑁆𑀢𑀺 𑀑𑀯𑀸𑀤𑀁, 𑀦𑀭𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀁;

𑀩𑁆𑀬𑀲𑀦𑀁 𑀢𑁂 𑀕𑀫𑀺𑀲𑁆𑀲𑀦𑁆𑀢𑀺, 𑀭𑀓𑁆𑀔𑀲𑀻𑀳𑀺𑀯 𑀯𑀸𑀡𑀺𑀚𑀸.

𑁯𑁨. 𑀬𑁂 𑀘 𑀓𑀸𑀳𑀦𑁆𑀢𑀺 𑀑𑀯𑀸𑀤𑀁, 𑀦𑀭𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀁;

𑀲𑁄𑀢𑁆𑀣𑀺𑀁 𑀧𑀸𑀭𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀯𑀮𑀸𑀳𑁂𑀦𑁂𑀯 [𑀯𑀸𑀮𑀸𑀳𑁂𑀦𑁂𑀯 (𑀲𑀻. 𑀧𑀻.)] 𑀯𑀸𑀡𑀺𑀚𑀸𑀢𑀺.

𑀯𑀮𑀸𑀳𑀓𑀲𑁆𑀲 [𑀯𑀸𑀮𑀸𑀳𑀲𑁆𑀲 (𑀲𑀻. 𑀧𑀻.)] 𑀚𑀸𑀢𑀓𑀁 𑀙𑀝𑁆𑀞𑀁.

𑁧𑁯𑁭. 𑀫𑀺𑀢𑁆𑀢𑀸𑀫𑀺𑀢𑁆𑀢𑀚𑀸𑀢𑀓𑀁 (𑁨-𑁫-𑁭)

𑁯𑁩. 𑀦 𑀦𑀁 𑀉𑀫𑁆𑀳𑀬𑀢𑁂 𑀤𑀺𑀲𑁆𑀯𑀸, 𑀦 𑀘 𑀦𑀁 𑀧𑀝𑀺𑀦𑀦𑁆𑀤𑀢𑀺;

𑀘𑀓𑁆𑀔𑀽𑀦𑀺 𑀘𑀲𑁆𑀲 𑀦 𑀤𑀤𑀸𑀢𑀺, 𑀧𑀝𑀺𑀮𑁄𑀫𑀜𑁆𑀘 𑀯𑀢𑁆𑀢𑀢𑀺.

𑁯𑁪. 𑀏𑀢𑁂 𑀪𑀯𑀦𑁆𑀢𑀺 𑀆𑀓𑀸𑀭𑀸, 𑀅𑀫𑀺𑀢𑁆𑀢𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑀸;

𑀬𑁂𑀳𑀺 𑀅𑀫𑀺𑀢𑁆𑀢𑀁 𑀚𑀸𑀦𑁂𑀬𑁆𑀬, 𑀤𑀺𑀲𑁆𑀯𑀸 𑀲𑀼𑀢𑁆𑀯𑀸 𑀘 𑀧𑀡𑁆𑀟𑀺𑀢𑁄𑀢𑀺.

𑀫𑀺𑀢𑁆𑀢𑀸𑀫𑀺𑀢𑁆𑀢𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁧𑁯𑁮. 𑀭𑀸𑀥𑀚𑀸𑀢𑀓𑀁 (𑁨-𑁫-𑁮)

𑁯𑁫. 𑀧𑀯𑀸𑀲𑀸 𑀆𑀕𑀢𑁄 𑀢𑀸𑀢, 𑀇𑀤𑀸𑀦𑀺 𑀦𑀘𑀺𑀭𑀸𑀕𑀢𑁄;

𑀓𑀘𑁆𑀘𑀺𑀦𑁆𑀦𑀼 𑀢𑀸𑀢 𑀢𑁂 𑀫𑀸𑀢𑀸, 𑀦 𑀅𑀜𑁆𑀜𑀫𑀼𑀧𑀲𑁂𑀯𑀢𑀺.

𑁯𑁬. 𑀦 𑀔𑁄 𑀧𑀦𑁂𑀢𑀁 𑀲𑀼𑀪𑀡𑀁, 𑀕𑀺𑀭𑀁 𑀲𑀘𑁆𑀘𑀼𑀧𑀲𑀁𑀳𑀺𑀢𑀁;

𑀲𑀬𑁂𑀣 𑀧𑁄𑀝𑁆𑀞𑀧𑀸𑀤𑁄𑀯, 𑀫𑀼𑀫𑁆𑀫𑀼𑀭𑁂 [𑀫𑀼𑀫𑁆𑀫𑀼𑀭𑁂 (𑀲𑁆𑀬𑀸.), 𑀫𑀁 𑀧𑀼𑀭𑁂 (𑀓.) 𑀫𑀼𑀫𑁆𑀫𑀼𑀭𑀲𑀤𑁆𑀤𑁄 𑀣𑀼𑀲𑀕𑁆𑀕𑀺𑀫𑁆𑀳𑀺 𑀓𑀼𑀓𑁆𑀓𑀼𑀴𑁂 𑀘 𑀯𑀢𑁆𑀢𑀢𑀻𑀢𑀺 𑀲𑀓𑁆𑀓𑀢𑀸𑀪𑀺𑀥𑀸𑀦𑁂𑀲𑀼] 𑀉𑀧𑀓𑀽𑀣𑀺𑀢𑁄𑀢𑀺 [𑀉𑀧𑀓𑀽𑀲𑀺𑀢𑁄𑀢𑀺 (𑀲𑀻. 𑀲𑁆𑀬𑀸. 𑀧𑀻.), 𑀉𑀧𑀓𑀽𑀮𑀺𑀢𑁄 (𑀓.)].

𑀭𑀸𑀥𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁧𑁯𑁯. 𑀕𑀳𑀧𑀢𑀺𑀚𑀸𑀢𑀓𑀁 (𑁨-𑁫-𑁯)

𑁯𑁭. 𑀉𑀪𑀬𑀁 𑀫𑁂 𑀦 𑀔𑀫𑀢𑀺, 𑀉𑀪𑀬𑀁 𑀫𑁂 𑀦 𑀭𑀼𑀘𑁆𑀘𑀢𑀺;

𑀬𑀸𑀘𑀸𑀬𑀁 𑀓𑁄𑀝𑁆𑀞𑀫𑁄𑀢𑀺𑀡𑁆𑀡𑀸, 𑀦𑀸𑀤𑁆𑀤𑀲𑀁 𑀇𑀢𑀺 𑀪𑀸𑀲𑀢𑀺.

𑁯𑁮. 𑀢𑀁 𑀢𑀁 𑀕𑀸𑀫𑀧𑀢𑀺 𑀩𑁆𑀭𑀽𑀫𑀺, 𑀓𑀤𑀭𑁂 𑀅𑀧𑁆𑀧𑀲𑁆𑀫𑀺 𑀚𑀻𑀯𑀺𑀢𑁂;

𑀤𑁆𑀯𑁂 𑀫𑀸𑀲𑁂 𑀲𑀗𑁆𑀕𑀭𑀁 𑀓𑀢𑁆𑀯𑀸 [𑀓𑀸𑀭𑀁 𑀓𑀢𑁆𑀯𑀸𑀦 (𑀲𑀻. 𑀧𑀻.), 𑀲𑀁𑀓𑀭𑀁 𑀓𑀢𑁆𑀯𑀸 (𑀓.)], 𑀫𑀁𑀲𑀁 𑀚𑀭𑀕𑁆𑀕𑀯𑀁 𑀓𑀺𑀲𑀁;

𑀅𑀧𑁆𑀧𑀢𑁆𑀢𑀓𑀸𑀮𑁂 𑀘𑁄𑀤𑁂𑀲𑀺, 𑀢𑀫𑁆𑀧𑀺 𑀫𑀬𑁆𑀳𑀁 𑀦 𑀭𑀼𑀘𑁆𑀘𑀢𑀻𑀢𑀺.

𑀕𑀳𑀧𑀢𑀺𑀚𑀸𑀢𑀓𑀁 𑀦𑀯𑀫𑀁.

𑁨𑁦𑁦. 𑀲𑀸𑀥𑀼𑀲𑀻𑀮𑀚𑀸𑀢𑀓𑀁 (𑁨-𑁫-𑁧𑁦)

𑁯𑁯. 𑀲𑀭𑀻𑀭𑀤𑀩𑁆𑀬𑀁 𑀯𑀼𑀟𑁆𑀠𑀩𑁆𑀬𑀁 [𑀯𑀤𑁆𑀥𑀩𑁆𑀬𑀁 (𑀲𑀻. 𑀧𑀻.)], 𑀲𑁄𑀚𑀘𑁆𑀘𑀁 𑀲𑀸𑀥𑀼𑀲𑀻𑀮𑀺𑀬𑀁;

𑀩𑁆𑀭𑀸𑀳𑁆𑀫𑀡𑀁 𑀢𑁂𑀯 𑀧𑀼𑀘𑁆𑀙𑀸𑀫, 𑀓𑀦𑁆𑀦𑀼 𑀢𑁂𑀲𑀁 𑀯𑀦𑀺𑀫𑁆𑀳𑀲𑁂 [𑀯𑀡𑀺𑀫𑁆𑀳𑀲𑁂 (𑀲𑀻. 𑀧𑀻.)].

𑁧𑁦𑁦. 𑀅𑀢𑁆𑀣𑁄 𑀅𑀢𑁆𑀣𑀺 𑀲𑀭𑀻𑀭𑀲𑁆𑀫𑀺𑀁, 𑀯𑀼𑀟𑁆𑀠𑀩𑁆𑀬𑀲𑁆𑀲 𑀦𑀫𑁄 𑀓𑀭𑁂;

𑀅𑀢𑁆𑀣𑁄 𑀅𑀢𑁆𑀣𑀺 𑀲𑀼𑀚𑀸𑀢𑀲𑁆𑀫𑀺𑀁, 𑀲𑀻𑀮𑀁 𑀅𑀲𑁆𑀫𑀸𑀓 𑀭𑀼𑀘𑁆𑀘𑀢𑀻𑀢𑀺.

𑀲𑀸𑀥𑀼𑀲𑀻𑀮𑀚𑀸𑀢𑀓𑀁 𑀤𑀲𑀫𑀁.

𑀭𑀼𑀳𑀓𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀧𑀺𑀭𑀼𑀳𑀓 𑀭𑀽𑀧𑀯𑀢𑀻 𑀫𑀼𑀲𑀮𑁄, 𑀧𑀯𑀲𑀦𑁆𑀢𑀺 𑀲𑀧𑀜𑁆𑀘𑀫𑀧𑁄𑀓𑁆𑀔𑀭𑀡𑀻;

𑀅𑀣 𑀫𑀼𑀢𑁆𑀢𑀺𑀫𑀯𑀸𑀡𑀺𑀚 𑀉𑀫𑁆𑀳𑀬𑀢𑁂, 𑀘𑀺𑀭𑀆𑀕𑀢 𑀓𑁄𑀝𑁆𑀞 𑀲𑀭𑀻𑀭 𑀤𑀲𑀸𑀢𑀺.