𑁪. 𑀅𑀲𑀤𑀺𑀲𑀯𑀕𑁆𑀕𑁄

𑁧𑁮𑁧. 𑀅𑀲𑀤𑀺𑀲𑀚𑀸𑀢𑀓𑀁 (𑁨-𑁪-𑁧)

𑁬𑁧. 𑀥𑀦𑀼𑀕𑁆𑀕𑀳𑁄 𑀅𑀲𑀤𑀺𑀲𑁄, 𑀭𑀸𑀚𑀧𑀼𑀢𑁆𑀢𑁄 𑀫𑀳𑀩𑁆𑀩𑀮𑁄;

𑀤𑀽𑀭𑁂𑀧𑀸𑀢𑀻 𑀅𑀓𑁆𑀔𑀡𑀯𑁂𑀥𑀻, 𑀫𑀳𑀸𑀓𑀸𑀬𑀧𑁆𑀧𑀤𑀸𑀮𑀦𑁄.

𑁬𑁨. 𑀲𑀩𑁆𑀩𑀸𑀫𑀺𑀢𑁆𑀢𑁂 𑀭𑀡𑀁 𑀓𑀢𑁆𑀯𑀸, 𑀦 𑀘 𑀓𑀜𑁆𑀘𑀺 𑀯𑀺𑀳𑁂𑀞𑀬𑀺;

𑀪𑀸𑀢𑀭𑀁 𑀲𑁄𑀢𑁆𑀣𑀺𑀁 𑀓𑀢𑁆𑀯𑀸𑀦, 𑀲𑀁𑀬𑀫𑀁 𑀅𑀚𑁆𑀛𑀼𑀧𑀸𑀕𑀫𑀻𑀢𑀺.

𑀅𑀲𑀤𑀺𑀲𑀚𑀸𑀢𑀓𑀁 𑀧𑀞𑀫𑀁.

𑁧𑁮𑁨. 𑀲𑀗𑁆𑀕𑀸𑀫𑀸𑀯𑀘𑀭𑀚𑀸𑀢𑀓𑀁 (𑁨-𑁪-𑁨)

𑁬𑁩. 𑀲𑀗𑁆𑀕𑀸𑀫𑀸𑀯𑀘𑀭𑁄 𑀲𑀽𑀭𑁄, 𑀩𑀮𑀯𑀸 𑀇𑀢𑀺 𑀯𑀺𑀲𑁆𑀲𑀼𑀢𑁄;

𑀓𑀺𑀁 𑀦𑀼 𑀢𑁄𑀭𑀡𑀫𑀸𑀲𑀚𑁆𑀚, 𑀧𑀝𑀺𑀓𑁆𑀓𑀫𑀲𑀺 𑀓𑀼𑀜𑁆𑀚𑀭.

𑁬𑁪. 𑀑𑀫𑀤𑁆𑀤 𑀔𑀺𑀧𑁆𑀧𑀁 𑀧𑀮𑀺𑀖𑀁, 𑀏𑀲𑀺𑀓𑀸𑀦𑀺 𑀘 𑀅𑀩𑁆𑀩𑀳 [𑀉𑀩𑁆𑀩𑀳 (𑀲𑁆𑀬𑀸.), 𑀅𑀩𑁆𑀪𑀼𑀳 (𑀓.)];

𑀢𑁄𑀭𑀡𑀸𑀦𑀺 𑀘 𑀫𑀤𑁆𑀤𑀺𑀢𑁆𑀯𑀸, 𑀔𑀺𑀧𑁆𑀧𑀁 𑀧𑀯𑀺𑀲 𑀓𑀼𑀜𑁆𑀚𑀭𑀸𑀢𑀺.

𑀲𑀗𑁆𑀕𑀸𑀫𑀸𑀯𑀘𑀭𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁧𑁮𑁩. 𑀯𑀸𑀮𑁄𑀤𑀓𑀚𑀸𑀢𑀓𑀁 (𑁨-𑁪-𑁩)

𑁬𑁫. 𑀯𑀸𑀮𑁄𑀤𑀓𑀁 𑀅𑀧𑁆𑀧𑀭𑀲𑀁 𑀦𑀺𑀳𑀻𑀦𑀁, 𑀧𑀺𑀢𑁆𑀯𑀸 [𑀧𑀻𑀢𑁆𑀯𑀸 (𑀲𑀻. 𑀧𑀻.)] 𑀫𑀤𑁄 𑀚𑀸𑀬𑀢𑀺 𑀕𑀤𑁆𑀭𑀪𑀸𑀦𑀁;

𑀇𑀫𑀜𑁆𑀘 𑀧𑀺𑀢𑁆𑀯𑀸𑀦 𑀭𑀲𑀁 𑀧𑀡𑀻𑀢𑀁, 𑀫𑀤𑁄 𑀦 𑀲𑀜𑁆𑀚𑀸𑀬𑀢𑀺 𑀲𑀺𑀦𑁆𑀥𑀯𑀸𑀦𑀁.

𑁬𑁬. 𑀅𑀧𑁆𑀧𑀁 𑀧𑀺𑀯𑀺𑀢𑁆𑀯𑀸𑀦 𑀦𑀺𑀳𑀻𑀦𑀚𑀘𑁆𑀘𑁄, 𑀲𑁄 𑀫𑀚𑁆𑀚𑀢𑀻 𑀢𑁂𑀦 𑀚𑀦𑀺𑀦𑁆𑀤 𑀧𑀼𑀝𑁆𑀞𑁄 [𑀨𑀼𑀝𑁆𑀞𑁄 (𑀲𑀻. 𑀲𑁆𑀬𑀸.), 𑀫𑀼𑀝𑁆𑀞𑁄 (𑀓.)];

𑀥𑁄𑀭𑀬𑁆𑀳𑀲𑀻𑀮𑀻 𑀘 𑀓𑀼𑀮𑀫𑁆𑀳𑀺 𑀚𑀸𑀢𑁄, 𑀦 𑀫𑀚𑁆𑀚𑀢𑀻 𑀅𑀕𑁆𑀕𑀭𑀲𑀁 𑀧𑀺𑀯𑀺𑀢𑁆𑀯𑀸𑀢𑀺.

𑀯𑀸𑀮𑁄𑀤𑀓𑀚𑀸𑀢𑀓𑀁 𑀢𑀢𑀺𑀬𑀁.

𑁧𑁮𑁪. 𑀕𑀺𑀭𑀺𑀤𑀢𑁆𑀢𑀚𑀸𑀢𑀓𑀁 (𑁨-𑁪-𑁪)

𑁬𑁭. 𑀤𑀽𑀲𑀺𑀢𑁄 𑀕𑀺𑀭𑀺𑀤𑀢𑁆𑀢𑁂𑀦 [𑀕𑀺𑀭𑀺𑀤𑀦𑁆𑀢𑁂𑀦 (𑀧𑀻.)], 𑀳𑀬𑁄 𑀲𑀸𑀫𑀲𑁆𑀲 𑀧𑀡𑁆𑀟𑀯𑁄;

𑀧𑁄𑀭𑀸𑀡𑀁 𑀧𑀓𑀢𑀺𑀁 𑀳𑀺𑀢𑁆𑀯𑀸, 𑀢𑀲𑁆𑀲𑁂𑀯𑀸𑀦𑀼𑀯𑀺𑀥𑀺𑀬𑁆𑀬𑀢𑀺 [𑀦𑀼𑀯𑀺𑀥𑀻𑀬𑀢𑀺 (𑀲𑀻. 𑀧𑀻.)].

𑁬𑁮. 𑀲𑀘𑁂 𑀘 𑀢𑀦𑀼𑀚𑁄 𑀧𑁄𑀲𑁄, 𑀲𑀺𑀔𑀭𑀸𑀓𑀸𑀭 [𑀲𑀺𑀗𑁆𑀕𑀸𑀭𑀸𑀓𑀸𑀭 (𑀲𑁆𑀬𑀸.)] 𑀓𑀧𑁆𑀧𑀺𑀢𑁄;

𑀆𑀦𑀦𑁂 𑀦𑀁 [𑀢𑀁 (𑀲𑀻. 𑀲𑁆𑀬𑀸. 𑀧𑀻.)] 𑀕𑀳𑁂𑀢𑁆𑀯𑀸𑀦, 𑀫𑀡𑁆𑀟𑀮𑁂 𑀧𑀭𑀺𑀯𑀢𑁆𑀢𑀬𑁂;

𑀔𑀺𑀧𑁆𑀧𑀫𑁂𑀯 𑀧𑀳𑀦𑁆𑀢𑁆𑀯𑀸𑀦, 𑀢𑀲𑁆𑀲𑁂𑀯𑀸𑀦𑀼𑀯𑀺𑀥𑀺𑀬𑁆𑀬𑀢𑀻𑀢𑀺.

𑀕𑀺𑀭𑀺𑀤𑀢𑁆𑀢𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁧𑁮𑁫. 𑀅𑀦𑀪𑀺𑀭𑀢𑀺𑀚𑀸𑀢𑀓𑀁 (𑁨-𑁪-𑁫)

𑁬𑁯. 𑀬𑀣𑁄𑀤𑀓𑁂 𑀆𑀯𑀺𑀮𑁂 𑀅𑀧𑁆𑀧𑀲𑀦𑁆𑀦𑁂, 𑀦 𑀧𑀲𑁆𑀲𑀢𑀺 𑀲𑀺𑀧𑁆𑀧𑀺𑀓𑀲𑀫𑁆𑀩𑀼𑀓𑀜𑁆𑀘;

𑀲𑀓𑁆𑀔𑀭𑀁 𑀯𑀸𑀮𑀼𑀓𑀁 𑀫𑀘𑁆𑀙𑀕𑀼𑀫𑁆𑀩𑀁, 𑀏𑀯𑀁 𑀆𑀯𑀺𑀮𑀫𑁆𑀳𑀺 [𑀆𑀯𑀺𑀮𑁂 𑀳𑀺 (𑀲𑀻.)] 𑀘𑀺𑀢𑁆𑀢𑁂;

𑀦 𑀧𑀲𑁆𑀲𑀢𑀺 𑀅𑀢𑁆𑀢𑀤𑀢𑁆𑀣𑀁 𑀧𑀭𑀢𑁆𑀣𑀁.

𑁭𑁦. 𑀬𑀣𑁄𑀤𑀓𑁂 𑀅𑀘𑁆𑀙𑁂 𑀯𑀺𑀧𑁆𑀧𑀲𑀦𑁆𑀦𑁂, 𑀲𑁄 𑀧𑀲𑁆𑀲𑀢𑀺 𑀲𑀺𑀧𑁆𑀧𑀺𑀓𑀲𑀫𑁆𑀩𑀼𑀓𑀜𑁆𑀘;

𑀲𑀓𑁆𑀔𑀭𑀁 𑀯𑀸𑀮𑀼𑀓𑀁 𑀫𑀘𑁆𑀙𑀕𑀼𑀫𑁆𑀩𑀁, 𑀏𑀯𑀁 𑀅𑀦𑀸𑀯𑀺𑀮𑀫𑁆𑀳𑀺 𑀘𑀺𑀢𑁆𑀢𑁂;

𑀲𑁄 𑀧𑀲𑁆𑀲𑀢𑀺 𑀅𑀢𑁆𑀢𑀤𑀢𑁆𑀣𑀁 𑀧𑀭𑀢𑁆𑀣𑀦𑁆𑀢𑀺.

𑀅𑀦𑀪𑀺𑀭𑀢𑀺𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁧𑁮𑁬. 𑀤𑀥𑀺𑀯𑀸𑀳𑀦𑀚𑀸𑀢𑀓𑀁 (𑁨-𑁪-𑁬)

𑁭𑁧. 𑀯𑀡𑁆𑀡𑀕𑀦𑁆𑀥𑀭𑀲𑀽𑀧𑁂𑀢𑁄, 𑀅𑀫𑁆𑀩𑁄𑀬𑀁 𑀅𑀳𑀼𑀯𑀸 𑀧𑀼𑀭𑁂;

𑀢𑀫𑁂𑀯 𑀧𑀽𑀚𑀁 𑀮𑀪𑀫𑀸𑀦𑁄, 𑀓𑁂𑀦𑀫𑁆𑀩𑁄 𑀓𑀝𑀼𑀓𑀧𑁆𑀨𑀮𑁄.

𑁭𑁨. 𑀧𑀼𑀘𑀺𑀫𑀦𑁆𑀤𑀧𑀭𑀺𑀯𑀸𑀭𑁄, 𑀅𑀫𑁆𑀩𑁄 𑀢𑁂 𑀤𑀥𑀺𑀯𑀸𑀳𑀦;

𑀫𑀽𑀮𑀁 𑀫𑀽𑀮𑁂𑀦 𑀲𑀁𑀲𑀝𑁆𑀞𑀁, 𑀲𑀸𑀔𑀸 𑀲𑀸𑀔𑀸 [𑀲𑀸𑀔𑀁 (𑀲𑁆𑀬𑀸. 𑀓.)] 𑀦𑀺𑀲𑁂𑀯𑀭𑁂 [𑀦𑀺𑀯𑀻𑀲𑀭𑁂 (𑀓.)];

𑀅𑀲𑀸𑀢𑀲𑀦𑁆𑀦𑀺𑀯𑀸𑀲𑁂𑀦, 𑀢𑁂𑀦𑀫𑁆𑀩𑁄 𑀓𑀝𑀼𑀓𑀧𑁆𑀨𑀮𑁄𑀢𑀺.

𑀤𑀥𑀺𑀯𑀸𑀳𑀦𑀚𑀸𑀢𑀓𑀁 𑀙𑀝𑁆𑀞𑀁.

𑁧𑁮𑁭. 𑀘𑀢𑀼𑀫𑀝𑁆𑀞𑀚𑀸𑀢𑀓𑀁 (𑁨-𑁪-𑁭)

𑁭𑁩. 𑀉𑀘𑁆𑀘𑁂 𑀯𑀺𑀝𑀪𑀺𑀫𑀸𑀭𑀼𑀬𑁆𑀳, 𑀫𑀦𑁆𑀢𑀬𑀯𑁆𑀳𑁄 𑀭𑀳𑁄𑀕𑀢𑀸;

𑀦𑀻𑀘𑁂 𑀑𑀭𑀼𑀬𑁆𑀳 𑀫𑀦𑁆𑀢𑀯𑁆𑀳𑁄, 𑀫𑀺𑀕𑀭𑀸𑀚𑀸𑀧𑀺 𑀲𑁄𑀲𑁆𑀲𑀢𑀺.

𑁭𑁪. 𑀬𑀁 𑀲𑀼𑀯𑀡𑁆𑀡𑁄 𑀲𑀼𑀯𑀡𑁆𑀡𑁂𑀦 [𑀬𑀁 𑀲𑀼𑀧𑀡𑁆𑀡𑁄 𑀲𑀼𑀧𑀡𑁆𑀡𑁂𑀦 (𑀲𑀻. 𑀲𑁆𑀬𑀸. 𑀧𑀻.)], 𑀤𑁂𑀯𑁄 𑀤𑁂𑀯𑁂𑀦 𑀫𑀦𑁆𑀢𑀬𑁂;

𑀓𑀺𑀁 𑀢𑁂𑀢𑁆𑀣 𑀘𑀢𑀼𑀫𑀝𑁆𑀞𑀲𑁆𑀲, 𑀩𑀺𑀮𑀁 𑀧𑀯𑀺𑀲 𑀚𑀫𑁆𑀩𑀼𑀓𑀸𑀢𑀺.

𑀘𑀢𑀼𑀫𑀝𑁆𑀞𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁧𑁮𑁮. 𑀲𑀻𑀳𑀓𑁄𑀢𑁆𑀣𑀼𑀚𑀸𑀢𑀓𑀁 (𑁨-𑁪-𑁮)

𑁭𑁫. 𑀲𑀻𑀳𑀗𑁆𑀕𑀼𑀮𑀻 𑀲𑀻𑀳𑀦𑀔𑁄, 𑀲𑀻𑀳𑀧𑀸𑀤𑀧𑀢𑀺𑀝𑁆𑀞𑀺𑀢𑁄;

𑀲𑁄 𑀲𑀻𑀳𑁄 𑀲𑀻𑀳𑀲𑀗𑁆𑀖𑀫𑁆𑀳𑀺, 𑀏𑀓𑁄 𑀦𑀤𑀢𑀺 𑀅𑀜𑁆𑀜𑀣𑀸.

𑁭𑁬. 𑀫𑀸 𑀢𑁆𑀯𑀁 𑀦𑀤𑀺 𑀭𑀸𑀚𑀧𑀼𑀢𑁆𑀢, 𑀅𑀧𑁆𑀧𑀲𑀤𑁆𑀤𑁄 𑀯𑀦𑁂 𑀯𑀲;

𑀲𑀭𑁂𑀦 𑀔𑁄 [𑀫𑀸 (𑀓.)] 𑀢𑀁 𑀚𑀸𑀦𑁂𑀬𑁆𑀬𑀼𑀁, 𑀦 𑀳𑀺 𑀢𑁂 𑀧𑁂𑀢𑁆𑀢𑀺𑀓𑁄 𑀲𑀭𑁄𑀢𑀺.

𑀲𑀻𑀳𑀓𑁄𑀢𑁆𑀣𑀼𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁧𑁮𑁯. 𑀲𑀻𑀳𑀘𑀫𑁆𑀫𑀚𑀸𑀢𑀓𑀁 (𑁨-𑁪-𑁯)

𑁭𑁭. 𑀦𑁂𑀢𑀁 𑀲𑀻𑀳𑀲𑁆𑀲 𑀦𑀤𑀺𑀢𑀁, 𑀦 𑀩𑁆𑀬𑀕𑁆𑀖𑀲𑁆𑀲 𑀦 [𑀩𑁆𑀬𑀕𑁆𑀖𑀲𑁆𑀲 𑀦 𑀘 (𑀓.)] 𑀤𑀻𑀧𑀺𑀦𑁄;

𑀧𑀸𑀭𑀼𑀢𑁄 𑀲𑀻𑀳𑀘𑀫𑁆𑀫𑁂𑀦, 𑀚𑀫𑁆𑀫𑁄 𑀦𑀤𑀢𑀺 𑀕𑀤𑁆𑀭𑀪𑁄.

𑁭𑁮. 𑀘𑀺𑀭𑀫𑁆𑀧𑀺 𑀔𑁄 𑀢𑀁 𑀔𑀸𑀤𑁂𑀬𑁆𑀬, 𑀕𑀤𑁆𑀭𑀪𑁄 𑀳𑀭𑀺𑀢𑀁 𑀬𑀯𑀁;

𑀧𑀸𑀭𑀼𑀢𑁄 𑀲𑀻𑀳𑀘𑀫𑁆𑀫𑁂𑀦, 𑀭𑀯𑀫𑀸𑀦𑁄𑀯 𑀤𑀽𑀲𑀬𑀻𑀢𑀺.

𑀲𑀻𑀳𑀘𑀫𑁆𑀫𑀚𑀸𑀢𑀓𑀁 𑀦𑀯𑀫𑀁.

𑁧𑁯𑁦. 𑀲𑀻𑀮𑀸𑀦𑀺𑀲𑀁𑀲𑀚𑀸𑀢𑀓𑀁 (𑁨-𑁪-𑁧𑁦)

𑁭𑁯. 𑀧𑀲𑁆𑀲 𑀲𑀤𑁆𑀥𑀸𑀬 𑀲𑀻𑀮𑀲𑁆𑀲, 𑀘𑀸𑀕𑀲𑁆𑀲 𑀘 𑀅𑀬𑀁 𑀨𑀮𑀁;

𑀦𑀸𑀕𑁄 𑀦𑀸𑀯𑀸𑀬 𑀯𑀡𑁆𑀡𑁂𑀦, 𑀲𑀤𑁆𑀥𑀁 𑀯𑀳𑀢𑀼𑀧𑀸𑀲𑀓𑀁.

𑁮𑁦. 𑀲𑀩𑁆𑀪𑀺𑀭𑁂𑀯 𑀲𑀫𑀸𑀲𑁂𑀣, 𑀲𑀩𑁆𑀪𑀺 𑀓𑀼𑀩𑁆𑀩𑁂𑀣 𑀲𑀦𑁆𑀣𑀯𑀁;

𑀲𑀢𑀜𑁆𑀳𑀺 𑀲𑀦𑁆𑀦𑀺𑀯𑀸𑀲𑁂𑀦, 𑀲𑁄𑀢𑁆𑀣𑀺𑀁 𑀕𑀘𑁆𑀙𑀢𑀺 𑀦𑁆𑀳𑀸𑀧𑀺𑀢𑁄𑀢𑀺.

𑀲𑀻𑀮𑀸𑀦𑀺𑀲𑀁𑀲𑀚𑀸𑀢𑀓𑀁 𑀤𑀲𑀫𑀁.

𑀅𑀲𑀤𑀺𑀲𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀥𑀦𑀼𑀕𑁆𑀕𑀳 𑀓𑀼𑀜𑁆𑀚𑀭 𑀅𑀧𑁆𑀧𑀭𑀲𑁄, 𑀕𑀺𑀭𑀺𑀤𑀢𑁆𑀢𑀫𑀦𑀸𑀯𑀺𑀮𑀘𑀺𑀢𑁆𑀢𑀯𑀭𑀁;

𑀤𑀥𑀺𑀯𑀸𑀳𑀦 𑀚𑀫𑁆𑀩𑀽𑀓 𑀲𑀻𑀳𑀦𑀔𑁄, 𑀳𑀭𑀺𑀢𑀬𑀯 𑀦𑀸𑀕𑀯𑀭𑁂𑀦 𑀤𑀲𑀸𑀢𑀺.