𑁩. 𑀓𑀮𑁆𑀬𑀸𑀡𑀯𑀕𑁆𑀕𑁄

𑁧𑁭𑁧. 𑀓𑀮𑁆𑀬𑀸𑀡𑀥𑀫𑁆𑀫𑀚𑀸𑀢𑀓𑀁 (𑁨-𑁩-𑁧)

𑁪𑁧. 𑀓𑀮𑁆𑀬𑀸𑀡𑀥𑀫𑁆𑀫𑁄𑀢𑀺 𑀬𑀤𑀸 𑀚𑀦𑀺𑀦𑁆𑀤, 𑀮𑁄𑀓𑁂 𑀲𑀫𑀜𑁆𑀜𑀁 𑀅𑀦𑀼𑀧𑀸𑀧𑀼𑀡𑀸𑀢𑀺;

𑀢𑀲𑁆𑀫𑀸 𑀦 𑀳𑀺𑀬𑁆𑀬𑁂𑀣 [𑀳𑀻𑀬𑁂𑀣 (𑀲𑀻.)] 𑀦𑀭𑁄 𑀲𑀧𑀜𑁆𑀜𑁄, 𑀳𑀺𑀭𑀺𑀬𑀸𑀧𑀺 𑀲𑀦𑁆𑀢𑁄 𑀥𑀼𑀭𑀫𑀸𑀤𑀺𑀬𑀦𑁆𑀢𑀺.

𑁪𑁨. 𑀲𑀸𑀬𑀁 𑀲𑀫𑀜𑁆𑀜𑀸 𑀇𑀥 𑀫𑀚𑁆𑀚 𑀧𑀢𑁆𑀢𑀸, 𑀓𑀮𑁆𑀬𑀸𑀡𑀥𑀫𑁆𑀫𑁄𑀢𑀺 𑀚𑀦𑀺𑀦𑁆𑀤 𑀮𑁄𑀓𑁂;

𑀢𑀸𑀳𑀁 𑀲𑀫𑁂𑀓𑁆𑀔𑀁 𑀇𑀥 𑀧𑀩𑁆𑀩𑀚𑀺𑀲𑁆𑀲𑀁, 𑀦 𑀳𑀺 𑀫𑀢𑁆𑀣𑀺 𑀙𑀦𑁆𑀤𑁄 𑀇𑀥 𑀓𑀸𑀫𑀪𑁄𑀕𑁂𑀢𑀺.

𑀓𑀮𑁆𑀬𑀸𑀡𑀥𑀫𑁆𑀫𑀚𑀸𑀢𑀓𑀁 𑀧𑀞𑀫𑀁.

𑁧𑁭𑁨. 𑀤𑀤𑁆𑀤𑀭𑀚𑀸𑀢𑀓𑀁 (𑁨-𑁩-𑁨)

𑁪𑁩. 𑀓𑁄 𑀦𑀼 𑀲𑀤𑁆𑀤𑁂𑀦 𑀫𑀳𑀢𑀸, 𑀅𑀪𑀺𑀦𑀸𑀤𑁂𑀢𑀺 𑀤𑀤𑁆𑀤𑀭𑀁;

𑀢𑀁 𑀲𑀻𑀳𑀸 𑀦𑀧𑁆𑀧𑀝𑀺𑀦𑀤𑀦𑁆𑀢𑀺 [𑀓𑀺𑀁 𑀲𑀻𑀳𑀸 𑀦𑀧𑁆𑀧𑀝𑀺𑀦𑀤𑀦𑁆𑀢𑀺 (𑀲𑀻. 𑀧𑀻.), 𑀦 𑀲𑀻𑀳𑀸 𑀧𑀝𑀺𑀦𑀤𑀦𑁆𑀢𑀺 (𑀓.)], 𑀓𑁄 𑀦𑀸𑀫𑁂𑀲𑁄 𑀫𑀺𑀕𑀸𑀥𑀺𑀪𑀽.

𑁪𑁪. 𑀅𑀥𑀫𑁄 𑀫𑀺𑀕𑀚𑀸𑀢𑀸𑀦𑀁, 𑀲𑀺𑀗𑁆𑀕𑀸𑀮𑁄 𑀢𑀸𑀢 𑀯𑀲𑁆𑀲𑀢𑀺;

𑀚𑀸𑀢𑀺𑀫𑀲𑁆𑀲 𑀚𑀺𑀕𑀼𑀘𑁆𑀙𑀦𑁆𑀢𑀸, 𑀢𑀼𑀡𑁆𑀳𑀻 𑀲𑀻𑀳𑀸 𑀲𑀫𑀘𑁆𑀙𑀭𑁂𑀢𑀺.

𑀤𑀤𑁆𑀤𑀭𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁧𑁭𑁩. 𑀫𑀓𑁆𑀓𑀝𑀚𑀸𑀢𑀓𑀁 (𑁨-𑁩-𑁩)

𑁪𑁫. 𑀢𑀸𑀢 𑀫𑀸𑀡𑀯𑀓𑁄 𑀏𑀲𑁄, 𑀢𑀸𑀮𑀫𑀽𑀮𑀁 𑀅𑀧𑀲𑁆𑀲𑀺𑀢𑁄;

𑀅𑀕𑀸𑀭𑀓𑀜𑁆𑀘𑀺𑀤𑀁 𑀅𑀢𑁆𑀣𑀺, 𑀳𑀦𑁆𑀤 𑀤𑁂𑀫𑀲𑁆𑀲𑀕𑀸𑀭𑀓𑀁.

𑁪𑁬. 𑀫𑀸 𑀔𑁄 𑀢𑁆𑀯𑀁 𑀢𑀸𑀢 𑀧𑀓𑁆𑀓𑁄𑀲𑀺, 𑀤𑀽𑀲𑁂𑀬𑁆𑀬 𑀦𑁄 𑀅𑀕𑀸𑀭𑀓𑀁;

𑀦𑁂𑀢𑀸𑀤𑀺𑀲𑀁 𑀫𑀼𑀔𑀁 𑀳𑁄𑀢𑀺, 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀼𑀲𑀻𑀮𑀺𑀦𑁄𑀢𑀺.

𑀫𑀓𑁆𑀓𑀝𑀚𑀸𑀢𑀓𑀁 𑀢𑀢𑀺𑀬𑀁.

𑁧𑁭𑁪. 𑀤𑀼𑀩𑁆𑀪𑀺𑀬𑀫𑀓𑁆𑀓𑀝𑀚𑀸𑀢𑀓𑀁 (𑁨-𑁩-𑁪)

𑁪𑁭. 𑀅𑀤𑀫𑁆𑀳 𑀢𑁂 𑀯𑀸𑀭𑀺 𑀧𑀳𑀽𑀢𑀭𑀽𑀧𑀁, 𑀖𑀫𑁆𑀫𑀸𑀪𑀺𑀢𑀢𑁆𑀢𑀲𑁆𑀲 𑀧𑀺𑀧𑀸𑀲𑀺𑀢𑀲𑁆𑀲;

𑀲𑁄 𑀤𑀸𑀦𑀺 𑀧𑀺𑀢𑁆𑀯𑀸𑀦 [𑀧𑀻𑀢𑁆𑀯𑀸𑀦 (𑀲𑀻. 𑀧𑀻.)] 𑀓𑀺𑀭𑀺𑀗𑁆𑀓𑀭𑁄𑀲𑀺 [𑀓𑀺𑀓𑀺𑀁𑀓𑀭𑁄𑀲𑀺 (𑀲𑀻. 𑀲𑁆𑀬𑀸. 𑀧𑀻.)], 𑀅𑀲𑀗𑁆𑀕𑀫𑁄 𑀧𑀸𑀧𑀚𑀦𑁂𑀦 𑀲𑁂𑀬𑁆𑀬𑁄.

𑁪𑁮. 𑀓𑁄 𑀢𑁂 𑀲𑀼𑀢𑁄 𑀯𑀸 𑀤𑀺𑀝𑁆𑀞𑁄 𑀯𑀸, 𑀲𑀻𑀮𑀯𑀸 𑀦𑀸𑀫 𑀫𑀓𑁆𑀓𑀝𑁄;

𑀇𑀤𑀸𑀦𑀺 𑀔𑁄 𑀢𑀁 𑀑𑀳𑀘𑁆𑀙𑀁 [𑀊𑀳𑀘𑁆𑀘 (𑀲𑀻. 𑀧𑀻.), 𑀑𑀳𑀘𑁆𑀘𑀁 (𑀲𑁆𑀬𑀸.), 𑀉𑀳𑀚𑁆𑀚𑀁 (𑀓.)], 𑀏𑀲𑀸 𑀅𑀲𑁆𑀫𑀸𑀓 𑀥𑀫𑁆𑀫𑀢𑀸𑀢𑀺.

𑀤𑀼𑀩𑁆𑀪𑀺𑀬𑀫𑀓𑁆𑀓𑀝𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁧𑁭𑁫. 𑀆𑀤𑀺𑀘𑁆𑀘𑀼𑀧𑀝𑁆𑀞𑀸𑀦𑀚𑀸𑀢𑀓𑀁 (𑁨-𑁩-𑁫)

𑁪𑁯. 𑀲𑀩𑁆𑀩𑁂𑀲𑀼 𑀓𑀺𑀭 𑀪𑀽𑀢𑁂𑀲𑀼, 𑀲𑀦𑁆𑀢𑀺 𑀲𑀻𑀮𑀲𑀫𑀸𑀳𑀺𑀢𑀸;

𑀧𑀲𑁆𑀲 𑀲𑀸𑀔𑀸𑀫𑀺𑀕𑀁 𑀚𑀫𑁆𑀫𑀁, 𑀆𑀤𑀺𑀘𑁆𑀘𑀫𑀼𑀧𑀢𑀺𑀝𑁆𑀞𑀢𑀺.

𑁫𑁦. 𑀦𑀸𑀲𑁆𑀲 𑀲𑀻𑀮𑀁 𑀯𑀺𑀚𑀸𑀦𑀸𑀣, 𑀅𑀦𑀜𑁆𑀜𑀸𑀬 𑀧𑀲𑀁𑀲𑀣;

𑀅𑀕𑁆𑀕𑀺𑀳𑀼𑀢𑁆𑀢𑀜𑁆𑀘 𑀉𑀳𑀦𑁆𑀦𑀁 [𑀊𑀳𑀦𑁆𑀢𑀁 (𑀲𑀻.), 𑀊𑀳𑀦𑀁 (𑀲𑁆𑀬𑀸.), 𑀊𑀳𑀦𑁆𑀢𑀺 (𑀧𑀻.), 𑀉𑀳𑀤𑀁 (𑀓.)], 𑀤𑁆𑀯𑁂 𑀘 𑀪𑀺𑀦𑁆𑀦𑀸 𑀓𑀫𑀡𑁆𑀟𑀮𑀽𑀢𑀺.

𑀆𑀤𑀺𑀘𑁆𑀘𑀼𑀧𑀝𑁆𑀞𑀸𑀦𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁧𑁭𑁬. 𑀓𑀴𑀸𑀬𑀫𑀼𑀝𑁆𑀞𑀺𑀚𑀸𑀢𑀓𑀁 (𑁨-𑁩-𑁬)

𑁫𑁧. 𑀩𑀸𑀮𑁄 𑀯𑀢𑀸𑀬𑀁 𑀤𑀼𑀫𑀲𑀸𑀔𑀕𑁄𑀘𑀭𑁄, 𑀧𑀜𑁆𑀜𑀸 𑀚𑀦𑀺𑀦𑁆𑀤 𑀦𑀬𑀺𑀫𑀲𑁆𑀲 𑀯𑀺𑀚𑁆𑀚𑀢𑀺;

𑀓𑀴𑀸𑀬𑀫𑀼𑀝𑁆𑀞𑀺𑀁 [𑀓𑀮𑀸𑀬𑀫𑀼𑀝𑁆𑀞𑀺𑀁 (𑀲𑀻. 𑀧𑀻.)] 𑀅𑀯𑀓𑀺𑀭𑀺𑀬 𑀓𑁂𑀯𑀮𑀁, 𑀏𑀓𑀁 𑀓𑀴𑀸𑀬𑀁 𑀧𑀢𑀺𑀢𑀁 𑀕𑀯𑁂𑀲𑀢𑀺.

𑁫𑁨. 𑀏𑀯𑀫𑁂𑀯 𑀫𑀬𑀁 𑀭𑀸𑀚, 𑀬𑁂 𑀘𑀜𑁆𑀜𑁂 𑀅𑀢𑀺𑀮𑁄𑀪𑀺𑀦𑁄;

𑀅𑀧𑁆𑀧𑁂𑀦 𑀩𑀳𑀼𑀁 𑀚𑀺𑀬𑁆𑀬𑀸𑀫, 𑀓𑀴𑀸𑀬𑁂𑀦𑁂𑀯 𑀯𑀸𑀦𑀭𑁄𑀢𑀺.

𑀓𑀴𑀸𑀬𑀫𑀼𑀝𑁆𑀞𑀺𑀚𑀸𑀢𑀓𑀁 𑀙𑀝𑁆𑀞𑀁.

𑁧𑁭𑁭. 𑀢𑀺𑀦𑁆𑀤𑀼𑀓𑀚𑀸𑀢𑀓𑀁 (𑁨-𑁩-𑁭)

𑁫𑁩. 𑀥𑀦𑀼𑀳𑀢𑁆𑀣𑀓𑀮𑀸𑀧𑁂𑀳𑀺, 𑀦𑁂𑀢𑁆𑀢𑀺𑀁 𑀲𑀯𑀭𑀥𑀸𑀭𑀺𑀪𑀺;

𑀲𑀫𑀦𑁆𑀢𑀸 𑀧𑀭𑀺𑀓𑀺𑀡𑁆𑀡𑀫𑁆𑀳, 𑀓𑀣𑀁 𑀫𑁄𑀓𑁆𑀔𑁄 𑀪𑀯𑀺𑀲𑁆𑀲𑀢𑀺.

𑁫𑁪. 𑀅𑀧𑁆𑀧𑁂𑀯 𑀩𑀳𑀼𑀓𑀺𑀘𑁆𑀘𑀸𑀦𑀁, 𑀅𑀢𑁆𑀣𑁄 𑀚𑀸𑀬𑁂𑀣 𑀓𑁄𑀘𑀺 𑀦𑀁;

𑀅𑀢𑁆𑀣𑀺 𑀭𑀼𑀓𑁆𑀔𑀲𑁆𑀲 𑀅𑀘𑁆𑀙𑀺𑀦𑁆𑀦𑀁, 𑀔𑀚𑁆𑀚𑀣𑀜𑁆𑀜𑁂𑀯 𑀢𑀺𑀦𑁆𑀤𑀼𑀓𑀦𑁆𑀢𑀺.

𑀢𑀺𑀦𑁆𑀤𑀼𑀓𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁧𑁭𑁮. 𑀓𑀘𑁆𑀙𑀧𑀚𑀸𑀢𑀓𑀁 (𑁨-𑁩-𑁮)

𑁫𑁫. 𑀚𑀦𑀺𑀢𑁆𑀢𑀁 𑀫𑁂 𑀪𑀯𑀺𑀢𑁆𑀢𑀁 𑀫𑁂, 𑀇𑀢𑀺 𑀧𑀗𑁆𑀓𑁂 𑀅𑀯𑀲𑁆𑀲𑀬𑀺𑀁;

𑀢𑀁 𑀫𑀁 𑀧𑀗𑁆𑀓𑁄 𑀅𑀚𑁆𑀛𑀪𑀯𑀺, 𑀬𑀣𑀸 𑀤𑀼𑀩𑁆𑀩𑀮𑀓𑀁 𑀢𑀣𑀸;

𑀢𑀁 𑀢𑀁 𑀯𑀤𑀸𑀫𑀺 𑀪𑀕𑁆𑀕𑀯, 𑀲𑀼𑀡𑁄𑀳𑀺 𑀯𑀘𑀦𑀁 𑀫𑀫.

𑁫𑁬. 𑀕𑀸𑀫𑁂 𑀯𑀸 𑀬𑀤𑀺 𑀯𑀸 𑀭𑀜𑁆𑀜𑁂, 𑀲𑀼𑀔𑀁 𑀬𑀢𑁆𑀭𑀸𑀥𑀺𑀕𑀘𑁆𑀙𑀢𑀺;

𑀢𑀁 𑀚𑀦𑀺𑀢𑁆𑀢𑀁 𑀪𑀯𑀺𑀢𑁆𑀢𑀜𑁆𑀘, 𑀧𑀼𑀭𑀺𑀲𑀲𑁆𑀲 𑀧𑀚𑀸𑀦𑀢𑁄;

𑀬𑀫𑁆𑀳𑀺 𑀚𑀻𑀯𑁂 𑀢𑀫𑁆𑀳𑀺 𑀕𑀘𑁆𑀙𑁂, 𑀦 𑀦𑀺𑀓𑁂𑀢𑀳𑀢𑁄 𑀲𑀺𑀬𑀸𑀢𑀺.

𑀓𑀘𑁆𑀙𑀧𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁧𑁭𑁯. 𑀲𑀢𑀥𑀫𑁆𑀫𑀚𑀸𑀢𑀓𑀁 (𑁨-𑁩-𑁯)

𑁫𑁭. 𑀢𑀜𑁆𑀘 𑀅𑀧𑁆𑀧𑀜𑁆𑀘 𑀉𑀘𑁆𑀙𑀺𑀝𑁆𑀞𑀁, 𑀢𑀜𑁆𑀘 𑀓𑀺𑀘𑁆𑀙𑁂𑀦 𑀦𑁄 𑀅𑀤𑀸;

𑀲𑁄𑀳𑀁 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀓𑁄, 𑀬𑀁 𑀪𑀼𑀢𑁆𑀢𑀁 𑀢𑀫𑁆𑀧𑀺 𑀉𑀕𑁆𑀕𑀢𑀁.

𑁫𑁮. 𑀏𑀯𑀁 𑀥𑀫𑁆𑀫𑀁 𑀦𑀺𑀭𑀁𑀓𑀢𑁆𑀯𑀸 [𑀦𑀺𑀭𑀸𑀓𑀢𑁆𑀯𑀸 (?) 𑀦𑀺 + 𑀆 + 𑀓𑀭 + 𑀢𑁆𑀯𑀸], 𑀬𑁄 𑀅𑀥𑀫𑁆𑀫𑁂𑀦 𑀚𑀻𑀯𑀢𑀺;

𑀲𑀢𑀥𑀫𑁆𑀫𑁄𑀯 𑀮𑀸𑀪𑁂𑀦, 𑀮𑀤𑁆𑀥𑁂𑀦𑀧𑀺 𑀦 𑀦𑀦𑁆𑀤𑀢𑀻𑀢𑀺.

𑀲𑀢𑀥𑀫𑁆𑀫𑀚𑀸𑀢𑀓𑀁 𑀦𑀯𑀫𑀁.

𑁧𑁮𑁦. 𑀤𑀼𑀤𑁆𑀤𑀤𑀚𑀸𑀢𑀓𑀁 (𑁨-𑁩-𑁧𑁦)

𑁫𑁯. 𑀤𑀼𑀤𑁆𑀤𑀤𑀁 𑀤𑀤𑀫𑀸𑀦𑀸𑀦𑀁, 𑀤𑀼𑀓𑁆𑀓𑀭𑀁 𑀓𑀫𑁆𑀫 𑀓𑀼𑀩𑁆𑀩𑀢𑀁;

𑀅𑀲𑀦𑁆𑀢𑁄 𑀦𑀸𑀦𑀼𑀓𑀼𑀩𑁆𑀩𑀦𑁆𑀢𑀺, 𑀲𑀢𑀁 𑀥𑀫𑁆𑀫𑁄 𑀤𑀼𑀭𑀦𑁆𑀦𑀬𑁄.

𑁬𑁦. 𑀢𑀲𑁆𑀫𑀸 𑀲𑀢𑀜𑁆𑀘 𑀅𑀲𑀢𑀁, 𑀦𑀸𑀦𑀸 𑀳𑁄𑀢𑀺 𑀇𑀢𑁄 𑀕𑀢𑀺;

𑀅𑀲𑀦𑁆𑀢𑁄 𑀦𑀺𑀭𑀬𑀁 𑀬𑀦𑁆𑀢𑀺, 𑀲𑀦𑁆𑀢𑁄 𑀲𑀕𑁆𑀕𑀧𑀭𑀸𑀬𑀡𑀸𑀢𑀺 [𑀧𑀭𑀸𑀬𑀦𑀸 (𑀲𑁆𑀬𑀸. 𑀓.)].

𑀤𑀼𑀤𑁆𑀤𑀤𑀚𑀸𑀢𑀓𑀁 𑀤𑀲𑀫𑀁.

𑀓𑀮𑁆𑀬𑀸𑀡𑀯𑀕𑁆𑀕𑁄 𑀢𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀼𑀲𑀫𑀜𑁆𑀜𑀫𑀺𑀕𑀸𑀥𑀺𑀪𑀽 𑀫𑀸𑀡𑀯𑀓𑁄, 𑀯𑀸𑀭𑀺𑀧𑀳𑀽𑀢𑀭𑀽𑀧𑀸𑀤𑀺𑀘𑁆𑀘𑀼𑀧𑀝𑁆𑀞𑀸𑀦𑀸;

𑀲𑀓𑀴𑀸𑀬𑀲𑀢𑀺𑀦𑁆𑀤𑀼𑀓𑀧𑀗𑁆𑀓 𑀧𑀼𑀦, 𑀲𑀢𑀥𑀫𑁆𑀫 𑀲𑀼𑀤𑀼𑀤𑁆𑀤𑀤𑀓𑁂𑀦 𑀤𑀲𑀸𑀢𑀺.