𑁫𑁧𑁯. 𑀲𑀫𑁆𑀩𑀼𑀮𑀸𑀚𑀸𑀢𑀓𑀁 (𑁯)

𑁨𑁯𑁭. 𑀓𑀸 𑀯𑁂𑀥𑀫𑀸𑀦𑀸 𑀕𑀺𑀭𑀺𑀓𑀦𑁆𑀤𑀭𑀸𑀬𑀁, 𑀏𑀓𑀸 𑀢𑀼𑀯𑀁 𑀢𑀺𑀝𑁆𑀞𑀲𑀺 𑀲𑀁𑀳𑀺𑀢𑀽𑀭𑀼 [𑀲𑀜𑁆𑀜𑀢𑀽𑀭 (𑀲𑀻. 𑀧𑀻.), 𑀲𑀜𑁆𑀘𑀺𑀢𑀽𑀭𑀼 (𑀲𑁆𑀬𑀸.)];

𑀧𑀼𑀝𑁆𑀞𑀸𑀲𑀺 𑀫𑁂 𑀧𑀸𑀡𑀺𑀧𑀫𑁂𑀬𑁆𑀬𑀫𑀚𑁆𑀛𑁂, 𑀅𑀓𑁆𑀔𑀸𑀳𑀺 𑀫𑁂 𑀦𑀸𑀫𑀜𑁆𑀘 𑀩𑀦𑁆𑀥𑀯𑁂 𑀘.

𑁨𑁯𑁮. 𑀑𑀪𑀸𑀲𑀬𑀁 𑀯𑀦𑀁 𑀭𑀫𑁆𑀫𑀁, 𑀲𑀻𑀳𑀩𑁆𑀬𑀕𑁆𑀖𑀦𑀺𑀲𑁂𑀯𑀺𑀢𑀁;

𑀓𑀸 𑀯𑀸 𑀢𑁆𑀯𑀫𑀲𑀺 𑀓𑀮𑁆𑀬𑀸𑀡𑀺, 𑀓𑀲𑁆𑀲 𑀯𑀸 𑀢𑁆𑀯𑀁 𑀲𑀼𑀫𑀚𑁆𑀛𑀺𑀫𑁂;

𑀅𑀪𑀺𑀯𑀸𑀤𑁂𑀫𑀺 𑀢𑀁 𑀪𑀤𑁆𑀤𑁂, 𑀤𑀸𑀦𑀯𑀸𑀳𑀁 𑀦𑀫𑀢𑁆𑀣𑀼 𑀢𑁂.

𑁨𑁯𑁯. 𑀬𑁄 𑀧𑀼𑀢𑁆𑀢𑁄 𑀓𑀸𑀲𑀺𑀭𑀸𑀚𑀲𑁆𑀲, 𑀲𑁄𑀢𑁆𑀣𑀺𑀲𑁂𑀦𑁄𑀢𑀺 𑀢𑀁 𑀯𑀺𑀤𑀽;

𑀢𑀲𑁆𑀲𑀸𑀳𑀁 𑀲𑀫𑁆𑀩𑀼𑀮𑀸 𑀪𑀭𑀺𑀬𑀸, 𑀏𑀯𑀁 𑀚𑀸𑀦𑀸𑀳𑀺 𑀤𑀸𑀦𑀯;

𑀅𑀪𑀺𑀯𑀸𑀤𑁂𑀫𑀺 𑀢𑀁 𑀪𑀦𑁆𑀢𑁂 [𑀪𑀤𑁆𑀤𑀦𑁆𑀢𑁂 (𑀲𑀻. 𑀲𑁆𑀬𑀸.)], 𑀲𑀫𑁆𑀩𑀼𑀮𑀸𑀳𑀁 𑀦𑀫𑀢𑁆𑀣𑀼 𑀢𑁂.

𑁩𑁦𑁦. 𑀯𑁂𑀤𑁂𑀳𑀧𑀼𑀢𑁆𑀢𑁄 𑀪𑀤𑁆𑀤𑀦𑁆𑀢𑁂, 𑀯𑀦𑁂 𑀯𑀲𑀢𑀺 𑀆𑀢𑀼𑀭𑁄;

𑀢𑀫𑀳𑀁 𑀭𑁄𑀕𑀲𑀫𑁆𑀫𑀢𑁆𑀢𑀁, 𑀏𑀓𑀸 𑀏𑀓𑀁 𑀉𑀧𑀝𑁆𑀞𑀳𑀁 [𑀉𑀧𑀝𑁆𑀞𑀳𑀺𑀁 (𑀲𑀻.)].

𑁩𑁦𑁧. 𑀅𑀳𑀜𑁆𑀘 𑀯𑀦𑀫𑀼𑀜𑁆𑀙𑀸𑀬, 𑀫𑀥𑀼𑀫𑀁𑀲𑀁 𑀫𑀺𑀕𑀸𑀩𑀺𑀮𑀁 [𑀫𑀺𑀕𑀸𑀯𑀺𑀮𑀁 (𑀲𑀻.)];

𑀬𑀤𑀸 𑀳𑀭𑀸𑀫𑀺 𑀢𑀁 𑀪𑀓𑁆𑀔𑁄, 𑀢𑀲𑁆𑀲 𑀦𑀽𑀦𑀚𑁆𑀚 𑀦𑀸𑀥𑀢𑀺 [𑀦𑀸𑀣𑀢𑀺 (𑀓.)].

𑁩𑁦𑁨. 𑀓𑀺𑀁 𑀯𑀦𑁂 𑀭𑀸𑀚𑀧𑀼𑀢𑁆𑀢𑁂𑀦, 𑀆𑀢𑀼𑀭𑁂𑀦 𑀓𑀭𑀺𑀲𑁆𑀲𑀲𑀺;

𑀲𑀫𑁆𑀩𑀼𑀮𑁂 𑀧𑀭𑀺𑀘𑀺𑀡𑁆𑀡𑁂𑀦, 𑀅𑀳𑀁 𑀪𑀢𑁆𑀢𑀸 𑀪𑀯𑀸𑀫𑀺 𑀢𑁂.

𑁩𑁦𑁩. 𑀲𑁄𑀓𑀝𑁆𑀝𑀸𑀬 𑀤𑀼𑀭𑀢𑁆𑀢𑀸𑀬, 𑀓𑀺𑀁 𑀭𑀽𑀧𑀁 𑀯𑀺𑀚𑁆𑀚𑀢𑁂 𑀫𑀫;

𑀅𑀜𑁆𑀜𑀁 𑀧𑀭𑀺𑀬𑁂𑀲 𑀪𑀤𑁆𑀤𑀦𑁆𑀢𑁂, 𑀅𑀪𑀺𑀭𑀽𑀧𑀢𑀭𑀁 𑀫𑀬𑀸.

𑁩𑁦𑁪. 𑀏𑀳𑀺𑀫𑀁 𑀕𑀺𑀭𑀺𑀫𑀸𑀭𑀼𑀬𑁆𑀳, 𑀪𑀭𑀺𑀬𑀸 𑀫𑁂 [𑀫𑀬𑁆𑀳𑀁 (𑀲𑀻. 𑀲𑁆𑀬𑀸. 𑀧𑀻.)] 𑀘𑀢𑀼𑀲𑁆𑀲𑀢𑀸;

𑀢𑀸𑀲𑀁 𑀢𑁆𑀯𑀁 𑀧𑀯𑀭𑀸 𑀳𑁄𑀳𑀺, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀻.

𑁩𑁦𑁫. 𑀦𑀽𑀦 [𑀦𑀦𑀼 (𑀲𑀻. 𑀲𑁆𑀬𑀸. 𑀧𑀻. 𑀓.)] 𑀢𑀸𑀭𑀓𑀯𑀡𑁆𑀡𑀸𑀪𑁂 [𑀳𑀸𑀝𑀓𑀯𑀡𑁆𑀡𑀸𑀪𑁂 (𑀧𑀻.)], 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺;

𑀲𑀩𑁆𑀩𑀁 𑀢𑀁 𑀧𑀘𑀼𑀭𑀁 𑀫𑀬𑁆𑀳𑀁, 𑀭𑀫𑀲𑁆𑀲𑁆𑀯𑀚𑁆𑀚 [𑀭𑀫𑀲𑀼𑀚𑁆𑀚 (𑀲𑀻. 𑀲𑁆𑀬𑀸.)] 𑀫𑀬𑀸 𑀲𑀳.

𑁩𑁦𑁬. 𑀦𑁄 𑀘𑁂 𑀢𑀼𑀯𑀁 𑀫𑀳𑁂𑀲𑁂𑀬𑁆𑀬𑀁, 𑀲𑀫𑁆𑀩𑀼𑀮𑁂 𑀓𑀸𑀭𑀬𑀺𑀲𑁆𑀲𑀲𑀺;

𑀅𑀮𑀁 𑀢𑁆𑀯𑀁 𑀧𑀸𑀢𑀭𑀸𑀲𑀸𑀬, 𑀧𑀡𑁆𑀳𑁂 [𑀫𑀜𑁆𑀜𑁂 (𑀲𑀻. 𑀧𑀻.)] 𑀪𑀓𑁆𑀔𑀸 𑀪𑀯𑀺𑀲𑁆𑀲𑀲𑀺.

𑁩𑁦𑁭. 𑀢𑀜𑁆𑀘 𑀲𑀢𑁆𑀢𑀚𑀝𑁄 𑀮𑀼𑀤𑁆𑀤𑁄, 𑀓𑀴𑀸𑀭𑁄 𑀧𑀼𑀭𑀺𑀲𑀸𑀤𑀓𑁄;

𑀯𑀦𑁂 𑀦𑀸𑀣𑀁 𑀅𑀧𑀲𑁆𑀲𑀦𑁆𑀢𑀺𑀁, 𑀲𑀫𑁆𑀩𑀼𑀮𑀁 𑀅𑀕𑁆𑀕𑀳𑀻 𑀪𑀼𑀚𑁂.

𑁩𑁦𑁮. 𑀅𑀥𑀺𑀧𑀦𑁆𑀦𑀸 𑀧𑀺𑀲𑀸𑀘𑁂𑀦, 𑀮𑀼𑀤𑁆𑀤𑁂𑀦𑀸𑀫𑀺𑀲𑀘𑀓𑁆𑀔𑀼𑀦𑀸;

𑀲𑀸 𑀘 𑀲𑀢𑁆𑀢𑀼𑀯𑀲𑀫𑁆𑀧𑀢𑁆𑀢𑀸, 𑀧𑀢𑀺𑀫𑁂𑀯𑀸𑀦𑀼𑀲𑁄𑀘𑀢𑀺.

𑁩𑁦𑁯. 𑀦 𑀫𑁂 𑀇𑀤𑀁 𑀢𑀣𑀸 𑀤𑀼𑀓𑁆𑀔𑀁, 𑀬𑀁 𑀫𑀁 𑀔𑀸𑀤𑁂𑀬𑁆𑀬 𑀭𑀓𑁆𑀔𑀲𑁄;

𑀬𑀜𑁆𑀘 𑀫𑁂 𑀅𑀬𑁆𑀬𑀧𑀼𑀢𑁆𑀢𑀲𑁆𑀲, 𑀫𑀦𑁄 𑀳𑁂𑀲𑁆𑀲𑀢𑀺 𑀅𑀜𑁆𑀜𑀣𑀸.

𑁩𑁧𑁦. 𑀦 𑀲𑀦𑁆𑀢𑀺 𑀤𑁂𑀯𑀸 𑀧𑀯𑀲𑀦𑁆𑀢𑀺 𑀦𑀽𑀦, 𑀦 𑀳𑀺 𑀦𑀽𑀦 𑀲𑀦𑁆𑀢𑀺 𑀇𑀥 𑀮𑁄𑀓𑀧𑀸𑀮𑀸;

𑀲𑀳𑀲𑀸 𑀓𑀭𑁄𑀦𑁆𑀢𑀸𑀦𑀫𑀲𑀜𑁆𑀜𑀢𑀸𑀦𑀁, 𑀦 𑀳𑀺 𑀦𑀽𑀦 𑀲𑀦𑁆𑀢𑀺 𑀧𑀝𑀺𑀲𑁂𑀥𑀺𑀢𑀸𑀭𑁄.

𑁩𑁧𑁧. 𑀇𑀢𑁆𑀣𑀻𑀦𑀫𑁂𑀲𑀸 𑀧𑀯𑀭𑀸 𑀬𑀲𑀲𑁆𑀲𑀺𑀦𑀻, 𑀲𑀦𑁆𑀢𑀸 𑀲𑀫𑀸 𑀅𑀕𑁆𑀕𑀺𑀭𑀺𑀯𑀼𑀕𑁆𑀕𑀢𑁂𑀚𑀸;

𑀢𑀜𑁆𑀘𑁂 𑀢𑀼𑀯𑀁 𑀭𑀓𑁆𑀔𑀲𑀸𑀤𑁂𑀲𑀺 𑀓𑀜𑁆𑀜𑀁, 𑀫𑀼𑀤𑁆𑀥𑀸 𑀘 𑀳𑀺 𑀲𑀢𑁆𑀢𑀥𑀸 𑀢𑁂 𑀨𑀮𑁂𑀬𑁆𑀬;

𑀫𑀸 𑀢𑁆𑀯𑀁 𑀤𑀳𑀻 [𑀚𑀳𑀻 (𑀧𑀻.)] 𑀫𑀼𑀜𑁆𑀘 𑀧𑀢𑀺𑀩𑁆𑀩𑀢𑀸𑀬 [𑀧𑀢𑀺𑀩𑁆𑀩𑀢𑀸 𑀲𑀸 (𑀲𑀻.), 𑀧𑀢𑀺𑀩𑁆𑀩𑀢𑀸 𑀬𑀸 (𑀧𑀻.)].

𑁩𑁧𑁨. 𑀲𑀸 𑀘 𑀅𑀲𑁆𑀲𑀫𑀫𑀸𑀕𑀘𑁆𑀙𑀺, 𑀧𑀫𑀼𑀢𑁆𑀢𑀸 𑀧𑀼𑀭𑀺𑀲𑀸𑀤𑀓𑀸;

𑀦𑀻𑀴𑀁 [𑀦𑀺𑀟𑁆𑀟𑀁 (𑀲𑁆𑀬𑀸. 𑀓.)] 𑀧𑀴𑀺𑀦𑀁 𑀲𑀓𑀼𑀡𑀻𑀯 [𑀨𑀮𑀺𑀦𑀲𑀓𑀼𑀡𑀻𑀯 (𑀲𑀻. 𑀲𑁆𑀬𑀸. 𑀧𑀻.)], 𑀕𑀢𑀲𑀺𑀗𑁆𑀕𑀁𑀯 𑀆𑀮𑀬𑀁.

𑁩𑁧𑁩. 𑀲𑀸 𑀢𑀢𑁆𑀣 𑀧𑀭𑀺𑀤𑁂𑀯𑁂𑀲𑀺, 𑀭𑀸𑀚𑀧𑀼𑀢𑁆𑀢𑀻 𑀬𑀲𑀲𑁆𑀲𑀺𑀦𑀻;

𑀲𑀫𑁆𑀩𑀼𑀮𑀸 𑀉𑀢𑀼𑀫𑀢𑁆𑀢𑀓𑁆𑀔𑀸, 𑀯𑀦𑁂 𑀦𑀸𑀣𑀁 𑀅𑀧𑀲𑁆𑀲𑀦𑁆𑀢𑀻 [𑀅𑀧𑀲𑁆𑀲𑀢𑀻 (𑀲𑀻.)].

𑁩𑁧𑁪. 𑀲𑀫𑀡𑁂 𑀩𑁆𑀭𑀸𑀳𑁆𑀫𑀡𑁂 𑀯𑀦𑁆𑀤𑁂, 𑀲𑀫𑁆𑀧𑀦𑁆𑀦𑀘𑀭𑀡𑁂 𑀇𑀲𑁂;

𑀭𑀸𑀚𑀧𑀼𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀢𑀼𑀫𑁆𑀳𑀁𑀫𑁆𑀳𑀺 [𑀢𑀼𑀫𑁆𑀳𑀁 𑀳𑀺 (𑀧𑀻.)] 𑀲𑀭𑀡𑀁 𑀕𑀢𑀸.

𑁩𑁧𑁫. 𑀯𑀦𑁆𑀤𑁂 𑀲𑀻𑀳𑁂 𑀘 𑀩𑁆𑀬𑀕𑁆𑀖𑁂 𑀘, 𑀬𑁂 𑀘 𑀅𑀜𑁆𑀜𑁂 𑀯𑀦𑁂 𑀫𑀺𑀕𑀸;

𑀭𑀸𑀚𑀧𑀼𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀢𑀼𑀫𑁆𑀳𑀁𑀫𑁆𑀳𑀺 𑀲𑀭𑀡𑀁 𑀕𑀢𑀸.

𑁩𑁧𑁬. 𑀢𑀺𑀡𑀸 [𑀢𑀺𑀡 (𑀧𑀻.)] 𑀮𑀢𑀸𑀦𑀺 𑀑𑀲𑀥𑁆𑀬𑁄, 𑀧𑀩𑁆𑀩𑀢𑀸𑀦𑀺 𑀯𑀦𑀸𑀦𑀺 𑀘;

𑀭𑀸𑀚𑀧𑀼𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀢𑀼𑀫𑁆𑀳𑀁𑀫𑁆𑀳𑀺 𑀲𑀭𑀡𑀁 𑀕𑀢𑀸.

𑁩𑁧𑁭. 𑀯𑀦𑁆𑀤𑁂 𑀇𑀦𑁆𑀤𑀻𑀯𑀭𑀻𑀲𑀸𑀫𑀁, 𑀭𑀢𑁆𑀢𑀺𑀁 𑀦𑀓𑁆𑀔𑀢𑁆𑀢𑀫𑀸𑀮𑀺𑀦𑀺𑀁;

𑀭𑀸𑀚𑀧𑀼𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀢𑀼𑀫𑁆𑀳𑀁𑀫𑁆𑀳𑀺 𑀲𑀭𑀡𑀁 𑀕𑀢𑀸.

𑁩𑁧𑁮. 𑀯𑀦𑁆𑀤𑁂 𑀪𑀸𑀕𑀻𑀭𑀣𑀺𑀁 𑀕𑀗𑁆𑀕𑀁, 𑀲𑀯𑀦𑁆𑀢𑀻𑀦𑀁 𑀧𑀝𑀺𑀕𑁆𑀕𑀳𑀁;

𑀭𑀸𑀚𑀧𑀼𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀢𑀼𑀫𑁆𑀳𑀁𑀫𑁆𑀳𑀺 𑀲𑀭𑀡𑀁 𑀕𑀢𑀸.

𑁩𑁧𑁯. 𑀯𑀦𑁆𑀤𑁂 𑀅𑀳𑀁 𑀧𑀩𑁆𑀩𑀢𑀭𑀸𑀚𑀲𑁂𑀝𑁆𑀞𑀁, 𑀳𑀺𑀫𑀯𑀦𑁆𑀢𑀁 𑀲𑀺𑀮𑀼𑀘𑁆𑀘𑀬𑀁;

𑀭𑀸𑀚𑀧𑀼𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑀻, 𑀢𑀼𑀫𑁆𑀳𑀁𑀫𑁆𑀳𑀺 𑀲𑀭𑀡𑀁 𑀕𑀢𑀸.

𑁩𑁨𑁦. 𑀅𑀢𑀺𑀲𑀸𑀬𑀁 𑀯𑀢𑀸𑀕𑀘𑁆𑀙𑀺, 𑀭𑀸𑀚𑀧𑀼𑀢𑁆𑀢𑀺 𑀬𑀲𑀲𑁆𑀲𑀺𑀦𑀺;

𑀓𑁂𑀦 𑀦𑀼𑀚𑁆𑀚 𑀲𑀫𑀸𑀕𑀘𑁆𑀙𑀺 [𑀲𑀫𑀸𑀕𑀘𑁆𑀙𑀺 (𑀲𑀻. 𑀧𑀻.)], 𑀓𑁄 𑀢𑁂 𑀧𑀺𑀬𑀢𑀭𑁄 𑀫𑀬𑀸.

𑁩𑁨𑁧. 𑀇𑀤𑀁 𑀔𑁄𑀳𑀁 𑀢𑀤𑀸𑀯𑁄𑀘𑀁 [𑀢𑀤𑀯𑁄𑀘𑀁 (𑀲𑀻. 𑀲𑁆𑀬𑀸.)], 𑀕𑀳𑀺𑀢𑀸 𑀢𑁂𑀦 𑀲𑀢𑁆𑀢𑀼𑀦𑀸;

𑀦 𑀫𑁂 𑀇𑀤𑀁 𑀢𑀣𑀸 𑀤𑀼𑀓𑁆𑀔𑀁, 𑀬𑀁 𑀫𑀁 𑀔𑀸𑀤𑁂𑀬𑁆𑀬 𑀭𑀓𑁆𑀔𑀲𑁄;

𑀬𑀜𑁆𑀘 𑀫𑁂 𑀅𑀬𑁆𑀬𑀧𑀼𑀢𑁆𑀢𑀲𑁆𑀲, 𑀫𑀦𑁄 𑀳𑁂𑀲𑁆𑀲𑀢𑀺 𑀅𑀜𑁆𑀜𑀣𑀸.

𑁩𑁨𑁨. 𑀘𑁄𑀭𑀻𑀦𑀁 𑀩𑀳𑀼𑀩𑀼𑀤𑁆𑀥𑀻𑀦𑀁, 𑀬𑀸𑀲𑀼 𑀲𑀘𑁆𑀘𑀁 𑀲𑀼𑀤𑀼𑀮𑁆𑀮𑀪𑀁;

𑀣𑀻𑀦𑀁 𑀪𑀸𑀯𑁄 𑀤𑀼𑀭𑀸𑀚𑀸𑀦𑁄, 𑀫𑀘𑁆𑀙𑀲𑁆𑀲𑁂𑀯𑁄𑀤𑀓𑁂 𑀕𑀢𑀁.

𑁩𑁨𑁩. 𑀢𑀣𑀸 𑀫𑀁 𑀲𑀘𑁆𑀘𑀁 𑀧𑀸𑀮𑁂𑀢𑀼, 𑀧𑀸𑀮𑀬𑀺𑀲𑁆𑀲𑀢𑀺 𑀘𑁂 𑀫𑀫𑀁;

𑀬𑀣𑀸𑀳𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀅𑀜𑁆𑀜𑀁 𑀧𑀺𑀬𑀢𑀭𑀁 𑀢𑀬𑀸;

𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀩𑁆𑀬𑀸𑀥𑀺 𑀢𑁂 𑀯𑀽𑀧𑀲𑀫𑁆𑀫𑀢𑀼.

𑁩𑁨𑁪. 𑀬𑁂 𑀓𑀼𑀜𑁆𑀚𑀭𑀸 𑀲𑀢𑁆𑀢𑀲𑀢𑀸 𑀉𑀴𑀸𑀭𑀸, 𑀭𑀓𑁆𑀔𑀦𑁆𑀢𑀺 𑀭𑀢𑁆𑀢𑀺𑀦𑁆𑀤𑀺𑀯𑀫𑀼𑀬𑁆𑀬𑀼𑀢𑀸𑀯𑀼𑀥𑀸;

𑀥𑀦𑀼𑀕𑁆𑀕𑀳𑀸𑀦𑀜𑁆𑀘 𑀲𑀢𑀸𑀦𑀺 𑀲𑁄𑀴𑀲, 𑀓𑀣𑀁𑀯𑀺𑀥𑁂 𑀧𑀲𑁆𑀲𑀲𑀺 𑀪𑀤𑁆𑀤𑁂 𑀲𑀢𑁆𑀢𑀯𑁄.

𑁩𑁨𑁫. 𑀅𑀮𑀗𑁆𑀓𑀢𑀸𑀬𑁄 𑀧𑀤𑀼𑀫𑀼𑀢𑁆𑀢𑀭𑀢𑁆𑀢𑀘𑀸, 𑀯𑀺𑀭𑀸𑀕𑀺𑀢𑀸 𑀧𑀲𑁆𑀲𑀢𑀺 𑀳𑀁𑀲𑀕𑀕𑁆𑀕𑀭𑀸;

𑀢𑀸𑀲𑀁 𑀲𑀼𑀡𑀺𑀢𑁆𑀯𑀸 𑀫𑀺𑀢𑀕𑀻𑀢𑀯𑀸𑀤𑀺𑀢𑀁 [𑀫𑀺𑀢𑀕𑀻𑀢𑀯𑀸𑀤𑀺𑀦𑀁 (𑀧𑀻.)], 𑀦 𑀤𑀸𑀦𑀺 𑀫𑁂 𑀢𑀸𑀢 𑀢𑀣𑀸 𑀬𑀣𑀸 𑀧𑀼𑀭𑁂.

𑁩𑁨𑁬. 𑀲𑀼𑀯𑀡𑁆𑀡𑀲𑀁𑀓𑀘𑁆𑀘𑀥𑀭𑀸 𑀲𑀼𑀯𑀺𑀕𑁆𑀕𑀳𑀸, 𑀅𑀮𑀗𑁆𑀓𑀢𑀸 𑀫𑀸𑀦𑀼𑀲𑀺𑀬𑀘𑁆𑀙𑀭𑀽𑀧𑀫𑀸;

𑀲𑁂𑀦𑁄𑀧𑀺𑀬𑀸 [𑀲𑁂𑀦𑀽𑀧𑀺𑀬𑀸 (𑀧𑀻.)] 𑀢𑀸𑀢 𑀅𑀦𑀺𑀦𑁆𑀤𑀺𑀢𑀗𑁆𑀕𑀺𑀬𑁄, 𑀔𑀢𑁆𑀢𑀺𑀬𑀓𑀜𑁆𑀜𑀸 𑀧𑀝𑀺𑀮𑁄𑀪𑀬𑀦𑁆𑀢𑀺 [𑀧𑀝𑀺𑀮𑀸𑀪𑀬𑀦𑁆𑀢𑀺 (𑀧𑀻.)] 𑀦𑀁.

𑁩𑁨𑁭. 𑀲𑀘𑁂 𑀅𑀳𑀁 𑀢𑀸𑀢 𑀢𑀣𑀸 𑀬𑀣𑀸 𑀧𑀼𑀭𑁂, 𑀧𑀢𑀺𑀁 𑀢𑀫𑀼𑀜𑁆𑀙𑀸𑀬 𑀧𑀼𑀦𑀸 𑀯𑀦𑁂 𑀪𑀭𑁂;

𑀲𑀫𑁆𑀫𑀸𑀦𑀬𑁂 𑀫𑀁 𑀦 𑀘 𑀫𑀁 𑀯𑀺𑀫𑀸𑀦𑀬𑁂, 𑀇𑀢𑁄𑀧𑀺 𑀫𑁂 𑀢𑀸𑀢 𑀢𑀢𑁄 𑀯𑀭𑀁 𑀲𑀺𑀬𑀸.

𑁩𑁨𑁮. 𑀬𑀫𑀦𑁆𑀦𑀧𑀸𑀦𑁂 𑀯𑀺𑀧𑀼𑀮𑀲𑁆𑀫𑀺 𑀑𑀳𑀺𑀢𑁂, 𑀦𑀸𑀭𑀻 𑀯𑀺𑀫𑀝𑁆𑀞𑀸𑀪𑀭𑀡𑀸 𑀅𑀮𑀗𑁆𑀓𑀢𑀸;

𑀲𑀩𑁆𑀩𑀗𑁆𑀕𑀼𑀧𑁂𑀢𑀸 [𑀧𑀜𑁆𑀘𑀗𑁆𑀕𑀼𑀧𑁂𑀢𑀸 (𑀲𑀻. 𑀲𑁆𑀬𑀸. 𑀧𑀻.)] 𑀧𑀢𑀺𑀦𑁄 𑀘 𑀅𑀧𑁆𑀧𑀺𑀬𑀸, 𑀅𑀩𑀚𑁆𑀛 [𑀅𑀯𑀚𑁆𑀛 (𑀲𑁆𑀬𑀸.), 𑀆𑀩𑀚𑁆𑀛 (𑀧𑀻.)] 𑀢𑀲𑁆𑀲𑀸 𑀫𑀭𑀡𑀁 𑀢𑀢𑁄 𑀯𑀭𑀁.

𑁩𑁨𑁯. 𑀅𑀧𑀺 𑀘𑁂 𑀤𑀮𑀺𑀤𑁆𑀤𑀸 𑀓𑀧𑀡𑀸 𑀅𑀦𑀸𑀴𑁆𑀳𑀺𑀬𑀸, 𑀓𑀝𑀸𑀤𑀼𑀢𑀻𑀬𑀸 𑀧𑀢𑀺𑀦𑁄 𑀘 𑀲𑀸 𑀧𑀺𑀬𑀸;

𑀲𑀩𑁆𑀩𑀗𑁆𑀕𑀼𑀧𑁂𑀢𑀸𑀬𑀧𑀺 𑀅𑀧𑁆𑀧𑀺𑀬𑀸𑀬, 𑀅𑀬𑀫𑁂𑀯 𑀲𑁂𑀬𑁆𑀬𑀸 [𑀲𑁂𑀬𑁆𑀬𑁄 (𑀲𑁆𑀬𑀸. 𑀓.)] 𑀓𑀧𑀡𑀸𑀧𑀺 𑀬𑀸 𑀧𑀺𑀬𑀸 [𑀓𑀧𑀡𑀸𑀧𑀺 𑀬𑀸 (𑀓.)].

𑁩𑁩𑁦. 𑀲𑀼𑀤𑀼𑀮𑁆𑀮𑀪𑀺𑀢𑁆𑀣𑀻 𑀧𑀼𑀭𑀺𑀲𑀲𑁆𑀲 𑀬𑀸 𑀳𑀺𑀢𑀸, 𑀪𑀢𑁆𑀢𑀺𑀢𑁆𑀣𑀺𑀬𑀸 𑀤𑀼𑀮𑁆𑀮𑀪𑁄 𑀬𑁄 𑀳𑀺𑀢𑁄 𑀘;

𑀳𑀺𑀢𑀸 𑀘 𑀢𑁂 𑀲𑀻𑀮𑀯𑀢𑀻 𑀘 𑀪𑀭𑀺𑀬𑀸, 𑀚𑀦𑀺𑀦𑁆𑀤 𑀥𑀫𑁆𑀫𑀁 𑀘𑀭 𑀲𑀫𑁆𑀩𑀼𑀮𑀸𑀬.

𑁩𑁩𑁧. 𑀲𑀘𑁂 𑀢𑀼𑀯𑀁 𑀯𑀺𑀧𑀼𑀮𑁂 𑀮𑀤𑁆𑀥𑀪𑁄𑀕𑁂, 𑀇𑀲𑁆𑀲𑀸𑀯𑀢𑀺𑀡𑁆𑀡𑀸 𑀫𑀭𑀡𑀁 𑀉𑀧𑁂𑀲𑀺;

𑀅𑀳𑀜𑁆𑀘 𑀢𑁂 𑀪𑀤𑁆𑀤𑁂 𑀇𑀫𑀸 𑀭𑀸𑀚𑀓𑀜𑁆𑀜𑀸 [𑀇𑀫𑀸 𑀘 𑀓𑀜𑁆𑀜𑀸 (𑀧𑀻.)], 𑀲𑀩𑁆𑀩𑁂 [𑀲𑀩𑁆𑀩𑁂𑀯 (𑀲𑀻. 𑀲𑁆𑀬𑀸. 𑀧𑀻.)] 𑀢𑁂 𑀯𑀘𑀦𑀓𑀭𑀸 𑀪𑀯𑀸𑀫𑀸𑀢𑀺.

𑀲𑀫𑁆𑀩𑀼𑀮𑀸𑀚𑀸𑀢𑀓𑀁 𑀦𑀯𑀫𑀁.