𑁫𑁨𑁦. 𑀕𑀦𑁆𑀥𑀢𑀺𑀦𑁆𑀤𑀼𑀓𑀚𑀸𑀢𑀓𑀁 (𑁧𑁦)

𑁩𑁩𑁨. 𑀅𑀧𑁆𑀧𑀫𑀸𑀤𑁄 𑀅𑀫𑀢𑀁 𑀧𑀤𑀁 [𑀅𑀫𑀢𑀧𑀤𑀁 (𑀲𑀻. 𑀧𑀻.)], 𑀧𑀫𑀸𑀤𑁄 𑀫𑀘𑁆𑀘𑀼𑀦𑁄 𑀧𑀤𑀁;

𑀅𑀧𑁆𑀧𑀫𑀢𑁆𑀢𑀸 𑀦 𑀫𑀻𑀬𑀦𑁆𑀢𑀺, 𑀬𑁂 𑀧𑀫𑀢𑁆𑀢𑀸 𑀬𑀣𑀸 𑀫𑀢𑀸.

𑁩𑁩𑁩. 𑀫𑀤𑀸 𑀧𑀫𑀸𑀤𑁄 𑀚𑀸𑀬𑁂𑀣, 𑀧𑀫𑀸𑀤𑀸 𑀚𑀸𑀬𑀢𑁂 𑀔𑀬𑁄;

𑀔𑀬𑀸 𑀧𑀤𑁄𑀲𑀸 [𑀔𑀬𑀸 𑀘 𑀤𑁄𑀲𑀸 (𑀲𑀻.)] 𑀚𑀸𑀬𑀦𑁆𑀢𑀺, 𑀫𑀸 𑀧𑀫𑀸𑀤𑁄 [𑀫𑀸 𑀫𑀤𑁄 (𑀲𑀻. 𑀲𑁆𑀬𑀸. 𑀧𑀻.)] 𑀪𑀭𑀢𑀽𑀲𑀪 [𑀪𑀸𑀭𑀥𑀽𑀲𑀪 (𑀓.)].

𑁩𑁩𑁪. 𑀩𑀳𑀽 𑀳𑀺 𑀔𑀢𑁆𑀢𑀺𑀬𑀸 𑀚𑀻𑀦𑀸, 𑀅𑀢𑁆𑀣𑀁 𑀭𑀝𑁆𑀞𑀁 𑀧𑀫𑀸𑀤𑀺𑀦𑁄;

𑀅𑀣𑁄𑀧𑀺 𑀕𑀸𑀫𑀺𑀦𑁄 𑀕𑀸𑀫𑀸, 𑀅𑀦𑀕𑀸𑀭𑀸 𑀅𑀕𑀸𑀭𑀺𑀦𑁄.

𑁩𑁩𑁫. 𑀔𑀢𑁆𑀢𑀺𑀬𑀲𑁆𑀲 𑀧𑀫𑀢𑁆𑀢𑀲𑁆𑀲, 𑀭𑀝𑁆𑀞𑀲𑁆𑀫𑀺𑀁 𑀭𑀝𑁆𑀞𑀯𑀟𑁆𑀠𑀦;

𑀲𑀩𑁆𑀩𑁂 𑀪𑁄𑀕𑀸 𑀯𑀺𑀦𑀲𑁆𑀲𑀦𑁆𑀢𑀺, 𑀭𑀜𑁆𑀜𑁄 𑀢𑀁 𑀯𑀼𑀘𑁆𑀘𑀢𑁂 𑀅𑀖𑀁.

𑁩𑁩𑁬. 𑀦𑁂𑀲 𑀥𑀫𑁆𑀫𑁄 𑀫𑀳𑀸𑀭𑀸𑀚, 𑀅𑀢𑀺𑀯𑁂𑀮𑀁 𑀧𑀫𑀚𑁆𑀚𑀲𑀺;

𑀇𑀤𑁆𑀥𑀁 𑀨𑀻𑀢𑀁 𑀚𑀦𑀧𑀤𑀁, 𑀘𑁄𑀭𑀸 𑀯𑀺𑀤𑁆𑀥𑀁𑀲𑀬𑀦𑁆𑀢𑀺 𑀦𑀁.

𑁩𑁩𑁭. 𑀦 𑀢𑁂 𑀧𑀼𑀢𑁆𑀢𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀦 𑀳𑀺𑀭𑀜𑁆𑀜𑀁 𑀦 𑀥𑀸𑀦𑀺𑀬𑀁 [𑀦 𑀳𑀺𑀭𑀜𑁆𑀜𑀦𑀺𑀥𑀸𑀦𑀺𑀬𑀸 (𑀓.)];

𑀭𑀝𑁆𑀞𑁂 𑀯𑀺𑀮𑀼𑀧𑁆𑀧𑀫𑀸𑀦𑀫𑁆𑀳𑀺, 𑀲𑀩𑁆𑀩𑀪𑁄𑀕𑁂𑀳𑀺 𑀚𑀺𑀬𑁆𑀬𑀲𑀺.

𑁩𑁩𑁮. 𑀲𑀩𑁆𑀩𑀪𑁄𑀕𑀸 𑀧𑀭𑀺𑀚𑀺𑀡𑁆𑀡𑀁, 𑀭𑀸𑀚𑀸𑀦𑀁 𑀯𑀸𑀧𑀺 𑀔𑀢𑁆𑀢𑀺𑀬𑀁 [𑀔𑀢𑁆𑀢𑀺𑀬 (𑀓.)];

𑀜𑀸𑀢𑀺𑀫𑀺𑀢𑁆𑀢𑀸 𑀲𑀼𑀳𑀚𑁆𑀚𑀸 𑀘, 𑀦 𑀢𑀁 𑀫𑀜𑁆𑀜𑀦𑁆𑀢𑀺 𑀫𑀸𑀦𑀺𑀬𑀁 [𑀫𑀦𑁆𑀢𑀺𑀬𑀁 (𑀲𑁆𑀬𑀸.)].

𑁩𑁩𑁯. 𑀳𑀢𑁆𑀣𑀸𑀭𑁄𑀳𑀸 𑀅𑀦𑀻𑀓𑀝𑁆𑀞𑀸, 𑀭𑀣𑀺𑀓𑀸 𑀧𑀢𑁆𑀢𑀺𑀓𑀸𑀭𑀓𑀸;

𑀢𑀫𑁂𑀯𑀫𑀼𑀧𑀚𑀻𑀯𑀦𑁆𑀢𑀸, 𑀦 𑀢𑀁 𑀫𑀜𑁆𑀜𑀦𑁆𑀢𑀺 𑀫𑀸𑀦𑀺𑀬𑀁.

𑁩𑁪𑁦. 𑀅𑀲𑀁𑀯𑀺𑀳𑀺𑀢𑀓𑀫𑁆𑀫𑀦𑁆𑀢𑀁, 𑀩𑀸𑀮𑀁 𑀤𑀼𑀫𑁆𑀫𑀦𑁆𑀢𑀺𑀫𑀦𑁆𑀢𑀺𑀦𑀁;

𑀲𑀺𑀭𑀻 𑀚𑀳𑀢𑀺 𑀤𑀼𑀫𑁆𑀫𑁂𑀥𑀁, 𑀚𑀺𑀡𑁆𑀡𑀁𑀯 𑀉𑀭𑀕𑁄 𑀢𑀘𑀁.

𑁩𑁪𑁧. 𑀲𑀼𑀲𑀁𑀯𑀺𑀳𑀺𑀢𑀓𑀫𑁆𑀫𑀦𑁆𑀢𑀁, 𑀓𑀸𑀮𑀼𑀝𑁆𑀞𑀸𑀬𑀺𑀁 𑀅𑀢𑀦𑁆𑀤𑀺𑀢𑀁;

𑀲𑀩𑁆𑀩𑁂 𑀪𑁄𑀕𑀸𑀪𑀺𑀯𑀟𑁆𑀠𑀦𑁆𑀢𑀺, 𑀕𑀸𑀯𑁄 𑀲𑀉𑀲𑀪𑀸𑀫𑀺𑀯.

𑁩𑁪𑁨. 𑀉𑀧𑀲𑁆𑀲𑀼𑀢𑀺𑀁 𑀫𑀳𑀸𑀭𑀸𑀚, 𑀭𑀝𑁆𑀞𑁂 𑀚𑀦𑀧𑀤𑁂 𑀘𑀭;

𑀢𑀢𑁆𑀣 𑀤𑀺𑀲𑁆𑀯𑀸 𑀘 𑀲𑀼𑀢𑁆𑀯𑀸 𑀘, 𑀢𑀢𑁄 𑀢𑀁 [𑀢𑁆𑀯𑀁 (𑀓.)] 𑀧𑀝𑀺𑀧𑀚𑁆𑀚𑀲𑀺.

𑁩𑁪𑁩. 𑀏𑀯𑀁 𑀯𑁂𑀤𑁂𑀢𑀼 𑀧𑀜𑁆𑀘𑀸𑀮𑁄, 𑀲𑀗𑁆𑀕𑀸𑀫𑁂 𑀲𑀭𑀫𑀧𑁆𑀧𑀺𑀢𑁄 [𑀲𑀫𑀧𑁆𑀧𑀺𑀢𑁄 (𑀲𑀻. 𑀧𑀻.)];

𑀬𑀣𑀸𑀳𑀫𑀚𑁆𑀚 𑀯𑁂𑀤𑁂𑀫𑀺, 𑀓𑀡𑁆𑀝𑀓𑁂𑀦 𑀲𑀫𑀧𑁆𑀧𑀺𑀢𑁄.

𑁩𑁪𑁪. 𑀚𑀺𑀡𑁆𑀡𑁄 𑀤𑀼𑀩𑁆𑀩𑀮𑀘𑀓𑁆𑀔𑀽𑀲𑀺, 𑀦 𑀭𑀽𑀧𑀁 𑀲𑀸𑀥𑀼 𑀧𑀲𑁆𑀲𑀲𑀺;

𑀓𑀺𑀁 𑀢𑀢𑁆𑀣 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲, 𑀬𑀁 𑀢𑀁 𑀫𑀕𑁆𑀕𑁂𑀬𑁆𑀬 [𑀫𑀕𑁆𑀖𑁂𑀬𑁆𑀬 (𑀧𑀻.)] 𑀓𑀡𑁆𑀝𑀓𑁄 [𑀓𑀡𑁆𑀟𑀓𑁄 (𑀲𑀻. 𑀲𑁆𑀬𑀸. 𑀧𑀻.)].

𑁩𑁪𑁫. 𑀩𑀳𑁆𑀯𑁂𑀢𑁆𑀣 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲, 𑀲𑁄𑀳𑀁 [𑀬𑁄𑀳𑀁 (𑀲𑀻. 𑀲𑁆𑀬𑀸. 𑀧𑀻.)] 𑀫𑀕𑁆𑀕𑀲𑁆𑀫𑀺 [𑀫𑀕𑁆𑀕𑁄𑀲𑁆𑀫𑀺 (𑀧𑀻.)] 𑀩𑁆𑀭𑀸𑀳𑁆𑀫𑀡;

𑀅𑀭𑀓𑁆𑀔𑀺𑀢𑀸 𑀚𑀸𑀦𑀧𑀤𑀸, 𑀅𑀥𑀫𑁆𑀫𑀩𑀮𑀺𑀦𑀸 𑀳𑀢𑀸.

𑁩𑁪𑁬. 𑀭𑀢𑁆𑀢𑀺𑀜𑁆𑀳𑀺 [𑀭𑀢𑁆𑀢𑀺𑀜𑁆𑀘 (𑀲𑀻.)] 𑀘𑁄𑀭𑀸 𑀔𑀸𑀤𑀦𑁆𑀢𑀺, 𑀤𑀺𑀯𑀸 𑀔𑀸𑀤𑀦𑁆𑀢𑀺 𑀢𑀼𑀡𑁆𑀟𑀺𑀬𑀸;

𑀭𑀝𑁆𑀞𑀲𑁆𑀫𑀺𑀁 𑀓𑀽𑀝𑀭𑀸𑀚𑀲𑁆𑀲, 𑀩𑀳𑀼 𑀅𑀥𑀫𑁆𑀫𑀺𑀓𑁄 𑀚𑀦𑁄.

𑁩𑁪𑁭. 𑀏𑀢𑀸𑀤𑀺𑀲𑁂 𑀪𑀬𑁂 𑀚𑀸𑀢𑁂 [𑀢𑀸𑀢 (𑀲𑀻. 𑀧𑀻.)], 𑀪𑀬𑀝𑁆𑀝𑀸 𑀢𑀸𑀢 [𑀢𑀸𑀯 (𑀲𑀻. 𑀧𑀻.)] 𑀫𑀸𑀡𑀯𑀸;

𑀦𑀺𑀮𑁆𑀮𑁂𑀦𑀓𑀸𑀦𑀺 𑀓𑀼𑀩𑁆𑀩𑀦𑁆𑀢𑀺, 𑀯𑀦𑁂 𑀆𑀳𑀢𑁆𑀯 𑀓𑀡𑁆𑀝𑀓𑀁.

𑁩𑁪𑁮. 𑀓𑀤𑀸𑀲𑁆𑀲𑀼 𑀦𑀸𑀫𑀬𑀁 𑀭𑀸𑀚𑀸, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀫𑀭𑀺𑀲𑁆𑀲𑀢𑀺;

𑀬𑀲𑁆𑀲 𑀭𑀝𑁆𑀞𑀫𑁆𑀳𑀺 𑀚𑀺𑀬𑁆𑀬𑀦𑁆𑀢𑀺, 𑀅𑀧𑁆𑀧𑀢𑀺𑀓𑀸 𑀓𑀼𑀫𑀸𑀭𑀺𑀓𑀸.

𑁩𑁪𑁯. 𑀤𑀼𑀩𑁆𑀪𑀸𑀲𑀺𑀢𑀜𑁆𑀳𑀺 𑀢𑁂 𑀚𑀫𑁆𑀫𑀺, 𑀅𑀦𑀢𑁆𑀣𑀧𑀤𑀓𑁄𑀯𑀺𑀤𑁂;

𑀓𑀼𑀳𑀺𑀁 𑀭𑀸𑀚𑀸 𑀓𑀼𑀫𑀸𑀭𑀻𑀦𑀁, 𑀪𑀢𑁆𑀢𑀸𑀭𑀁 𑀧𑀭𑀺𑀬𑁂𑀲𑀢𑀺.

𑁩𑁫𑁦. 𑀦 𑀫𑁂 𑀤𑀼𑀩𑁆𑀪𑀸𑀲𑀺𑀢𑀁 𑀩𑁆𑀭𑀳𑁆𑀫𑁂, 𑀓𑁄𑀯𑀺𑀤𑀢𑁆𑀣𑀧𑀤𑀸 𑀅𑀳𑀁;

𑀅𑀭𑀓𑁆𑀔𑀺𑀢𑀸 𑀚𑀸𑀦𑀧𑀤𑀸, 𑀅𑀥𑀫𑁆𑀫𑀩𑀮𑀺𑀦𑀸 𑀳𑀢𑀸.

𑁩𑁫𑁧. 𑀭𑀢𑁆𑀢𑀺𑀜𑁆𑀳𑀺 𑀘𑁄𑀭𑀸 𑀔𑀸𑀤𑀦𑁆𑀢𑀺, 𑀤𑀺𑀯𑀸 𑀔𑀸𑀤𑀦𑁆𑀢𑀺 𑀢𑀼𑀡𑁆𑀟𑀺𑀬𑀸;

𑀭𑀝𑁆𑀞𑀲𑁆𑀫𑀺𑀁 𑀓𑀽𑀝𑀭𑀸𑀚𑀲𑁆𑀲, 𑀩𑀳𑀼 𑀅𑀥𑀫𑁆𑀫𑀺𑀓𑁄 𑀚𑀦𑁄;

𑀤𑀼𑀚𑁆𑀚𑀻𑀯𑁂 𑀤𑀼𑀩𑁆𑀪𑀭𑁂 𑀤𑀸𑀭𑁂, 𑀓𑀼𑀢𑁄 𑀪𑀢𑁆𑀢𑀸 𑀓𑀼𑀫𑀸𑀭𑀺𑀬𑁄.

𑁩𑁫𑁨. 𑀏𑀯𑀁 𑀲𑀬𑀢𑀼 𑀧𑀜𑁆𑀘𑀸𑀮𑁄, 𑀲𑀗𑁆𑀕𑀸𑀫𑁂 𑀲𑀢𑁆𑀢𑀺𑀬𑀸 𑀳𑀢𑁄;

𑀬𑀣𑀸𑀬𑀁 𑀓𑀧𑀡𑁄 𑀲𑁂𑀢𑀺, 𑀳𑀢𑁄 𑀨𑀸𑀮𑁂𑀦 𑀲𑀸𑀮𑀺𑀬𑁄.

𑁩𑁫𑁩. 𑀅𑀥𑀫𑁆𑀫𑁂𑀦 𑀢𑀼𑀯𑀁 𑀚𑀫𑁆𑀫, 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀓𑀼𑀚𑁆𑀛𑀲𑀺;

𑀬𑁄 𑀢𑁆𑀯𑀁 𑀲𑀧𑀲𑀺 𑀭𑀸𑀚𑀸𑀦𑀁, 𑀅𑀧𑀭𑀚𑁆𑀛𑀺𑀢𑁆𑀯𑀸𑀦 𑀅𑀢𑁆𑀢𑀦𑁄 [𑀅𑀢𑁆𑀢𑀦𑀸 (𑀧𑀻.)].

𑁩𑁫𑁪. 𑀥𑀫𑁆𑀫𑁂𑀦 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲, 𑀅𑀳𑀁 𑀓𑀼𑀚𑁆𑀛𑀸𑀫𑀺 𑀩𑁆𑀭𑀸𑀳𑁆𑀫𑀡;

𑀅𑀭𑀓𑁆𑀔𑀺𑀢𑀸 𑀚𑀸𑀦𑀧𑀤𑀸, 𑀅𑀥𑀫𑁆𑀫𑀩𑀮𑀺𑀦𑀸 𑀳𑀢𑀸.

𑁩𑁫𑁫. 𑀭𑀢𑁆𑀢𑀺𑀜𑁆𑀳𑀺 𑀘𑁄𑀭𑀸 𑀔𑀸𑀤𑀦𑁆𑀢𑀺, 𑀤𑀺𑀯𑀸 𑀔𑀸𑀤𑀦𑁆𑀢𑀺 𑀢𑀼𑀡𑁆𑀟𑀺𑀬𑀸;

𑀭𑀝𑁆𑀞𑀲𑁆𑀫𑀺𑀁 𑀓𑀽𑀝𑀭𑀸𑀚𑀲𑁆𑀲, 𑀩𑀳𑀼 𑀅𑀥𑀫𑁆𑀫𑀺𑀓𑁄 𑀚𑀦𑁄.

𑁩𑁫𑁬. 𑀲𑀸 𑀦𑀽𑀦 𑀧𑀼𑀦 𑀭𑁂 𑀧𑀓𑁆𑀓𑀸, 𑀯𑀺𑀓𑀸𑀮𑁂 𑀪𑀢𑁆𑀢𑀫𑀸𑀳𑀭𑀺;

𑀪𑀢𑁆𑀢𑀳𑀸𑀭𑀺𑀁 𑀅𑀧𑁂𑀓𑁆𑀔𑀦𑁆𑀢𑁄, 𑀳𑀢𑁄 𑀨𑀸𑀮𑁂𑀦 𑀲𑀸𑀮𑀺𑀬𑁄.

𑁩𑁫𑁭. 𑀏𑀯𑀁 𑀳𑀜𑁆𑀜𑀢𑀼 𑀧𑀜𑁆𑀘𑀸𑀮𑁄, 𑀲𑀗𑁆𑀕𑀸𑀫𑁂 𑀅𑀲𑀺𑀦𑀸 𑀳𑀢𑁄 [𑀤𑀴𑁆𑀳𑀁 (𑀧𑀻.)];

𑀬𑀣𑀸𑀳𑀫𑀚𑁆𑀚 𑀧𑀳𑀢𑁄, 𑀔𑀻𑀭𑀜𑁆𑀘 𑀫𑁂 𑀧𑀯𑀝𑁆𑀝𑀺𑀢𑀁.

𑁩𑁫𑁮. 𑀬𑀁 𑀧𑀲𑀼 𑀔𑀻𑀭𑀁 𑀙𑀟𑁆𑀟𑁂𑀢𑀺, 𑀧𑀲𑀼𑀧𑀸𑀮𑀁 𑀯𑀺𑀳𑀺𑀁𑀲𑀢𑀺 [𑀧𑀲𑀼𑀧𑀸𑀮𑀜𑁆𑀘 𑀳𑀺𑀁𑀲𑀢𑀺 (𑀲𑀻.), 𑀧𑀲𑀼 𑀨𑀸𑀮𑀜𑁆𑀘 𑀳𑀺𑀁𑀲𑀢𑀺 (𑀧𑀻.)];

𑀓𑀺𑀁 𑀢𑀢𑁆𑀣 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲, 𑀬𑀁 𑀦𑁄 𑀕𑀭𑀳𑀢𑁂 [𑀕𑀭𑀳𑀢𑁄 (𑀧𑀻.)] 𑀪𑀯𑀁.

𑁩𑁫𑁯. 𑀕𑀸𑀭𑀬𑁆𑀳𑁄 𑀩𑁆𑀭𑀳𑁆𑀫𑁂 𑀧𑀜𑁆𑀘𑀸𑀮𑁄, 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀭𑀸𑀚𑀺𑀦𑁄;

𑀅𑀭𑀓𑁆𑀔𑀺𑀢𑀸 𑀚𑀸𑀦𑀧𑀤𑀸, 𑀅𑀥𑀫𑁆𑀫𑀩𑀮𑀺𑀦𑀸 𑀳𑀢𑀸.

𑁩𑁬𑁦. 𑀭𑀢𑁆𑀢𑀺𑀜𑁆𑀳𑀺 𑀘𑁄𑀭𑀸 𑀔𑀸𑀤𑀦𑁆𑀢𑀺, 𑀤𑀺𑀯𑀸 𑀔𑀸𑀤𑀦𑁆𑀢𑀺 𑀢𑀼𑀡𑁆𑀟𑀺𑀬𑀸;

𑀭𑀝𑁆𑀞𑀲𑁆𑀫𑀺𑀁 𑀓𑀽𑀝𑀭𑀸𑀚𑀲𑁆𑀲, 𑀩𑀳𑀼 𑀅𑀥𑀫𑁆𑀫𑀺𑀓𑁄 𑀚𑀦𑁄.

𑁩𑁬𑁧. 𑀘𑀡𑁆𑀟𑀸 𑀅𑀝𑀦𑀓𑀸 [𑀅𑀝𑀦𑀓 (𑀧𑀻.), 𑀅𑀓𑀝𑀦𑀸 (𑀓.)] 𑀕𑀸𑀯𑀻, 𑀬𑀁 𑀧𑀼𑀭𑁂 𑀦 𑀤𑀼𑀳𑀸𑀫𑀲𑁂;

𑀢𑀁 𑀤𑀸𑀦𑀺 𑀅𑀚𑁆𑀚 𑀤𑁄𑀳𑀸𑀫, 𑀔𑀻𑀭𑀓𑀸𑀫𑁂𑀳𑀼𑀧𑀤𑁆𑀤𑀼𑀢𑀸.

𑁩𑁬𑁨. 𑀏𑀯𑀁 𑀓𑀦𑁆𑀤𑀢𑀼 𑀧𑀜𑁆𑀘𑀸𑀮𑁄, 𑀯𑀺𑀧𑀼𑀢𑁆𑀢𑁄 𑀯𑀺𑀧𑁆𑀧𑀲𑀼𑀓𑁆𑀔𑀢𑀼;

𑀬𑀣𑀸𑀬𑀁 𑀓𑀧𑀡𑀸 𑀕𑀸𑀯𑀻, 𑀯𑀺𑀧𑀼𑀢𑁆𑀢𑀸 𑀧𑀭𑀺𑀥𑀸𑀯𑀢𑀺.

𑁩𑁬𑁩. 𑀬𑀁 𑀧𑀲𑀼 𑀧𑀲𑀼𑀧𑀸𑀮𑀲𑁆𑀲, 𑀲𑀫𑁆𑀪𑀫𑁂𑀬𑁆𑀬 [𑀧𑀩𑁆𑀪𑀫𑁂𑀬𑁆𑀬 (𑀲𑀻. 𑀧𑀻.)] 𑀭𑀯𑁂𑀬𑁆𑀬 𑀯𑀸;

𑀓𑁄 𑀦𑀻𑀥 𑀅𑀧𑀭𑀸𑀥𑀢𑁆𑀣𑀺, 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀭𑀸𑀚𑀺𑀦𑁄.

𑁩𑁬𑁪. 𑀅𑀧𑀭𑀸𑀥𑁄 𑀫𑀳𑀸𑀩𑁆𑀭𑀳𑁆𑀫𑁂, 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀭𑀸𑀚𑀺𑀦𑁄;

𑀅𑀭𑀓𑁆𑀔𑀺𑀢𑀸 𑀚𑀸𑀦𑀧𑀤𑀸, 𑀅𑀥𑀫𑁆𑀫𑀩𑀮𑀺𑀦𑀸 𑀳𑀢𑀸.

𑁩𑁬𑁫. 𑀭𑀢𑁆𑀢𑀺𑀜𑁆𑀳𑀺 𑀘𑁄𑀭𑀸 𑀔𑀸𑀤𑀦𑁆𑀢𑀺, 𑀤𑀺𑀯𑀸 𑀔𑀸𑀤𑀦𑁆𑀢𑀺 𑀢𑀼𑀡𑁆𑀟𑀺𑀬𑀸;

𑀭𑀝𑁆𑀞𑀲𑁆𑀫𑀺𑀁 𑀓𑀽𑀝𑀭𑀸𑀚𑀲𑁆𑀲, 𑀩𑀳𑀼 𑀅𑀥𑀫𑁆𑀫𑀺𑀓𑁄 𑀚𑀦𑁄;

𑀓𑀣𑀁 𑀦𑁄 𑀅𑀲𑀺𑀓𑁄𑀲𑀢𑁆𑀣𑀸, 𑀔𑀻𑀭𑀧𑀸 𑀳𑀜𑁆𑀜𑀢𑁂 𑀧𑀚𑀸.

𑁩𑁬𑁬. 𑀏𑀯𑀁 𑀔𑀚𑁆𑀚𑀢𑀼 𑀧𑀜𑁆𑀘𑀸𑀮𑁄, 𑀳𑀢𑁄 𑀬𑀼𑀤𑁆𑀥𑁂 𑀲𑀧𑀼𑀢𑁆𑀢𑀓𑁄;

𑀬𑀣𑀸𑀳𑀫𑀚𑁆𑀚 𑀔𑀚𑁆𑀚𑀸𑀫𑀺, 𑀕𑀸𑀫𑀺𑀓𑁂𑀳𑀺 [𑀕𑀸𑀫𑀓𑁂𑀳𑀺 (𑀲𑀻. 𑀧𑀻.)] 𑀅𑀭𑀜𑁆𑀜𑀚𑁄.

𑁩𑁬𑁭. 𑀦 𑀲𑀩𑁆𑀩𑀪𑀽𑀢𑁂𑀲𑀼 𑀯𑀺𑀥𑁂𑀦𑁆𑀢𑀺 [𑀯𑀺𑀥𑀦𑁆𑀢𑀺 (𑀓.)] 𑀭𑀓𑁆𑀔𑀁, 𑀭𑀸𑀚𑀸𑀦𑁄 𑀫𑀡𑁆𑀟𑀽𑀓 𑀫𑀦𑀼𑀲𑁆𑀲𑀮𑁄𑀓𑁂;

𑀦𑁂𑀢𑁆𑀢𑀸𑀯𑀢𑀸 𑀭𑀸𑀚𑀸 𑀅𑀥𑀫𑁆𑀫𑀘𑀸𑀭𑀻, 𑀬𑀁 𑀢𑀸𑀤𑀺𑀲𑀁 𑀚𑀻𑀯𑀫𑀤𑁂𑀬𑁆𑀬𑀼 𑀥𑀗𑁆𑀓𑀸.

𑁩𑁬𑁮. 𑀅𑀥𑀫𑁆𑀫𑀭𑀽𑀧𑁄 𑀯𑀢 𑀩𑁆𑀭𑀳𑁆𑀫𑀘𑀸𑀭𑀻, 𑀅𑀦𑀼𑀧𑁆𑀧𑀺𑀬𑀁 𑀪𑀸𑀲𑀲𑀺 𑀔𑀢𑁆𑀢𑀺𑀬𑀲𑁆𑀲;

𑀯𑀺𑀮𑀼𑀧𑁆𑀧𑀫𑀸𑀦𑀸𑀬 𑀧𑀼𑀣𑀼𑀧𑁆𑀧𑀚𑀸𑀬, 𑀧𑀽𑀚𑁂𑀲𑀺 𑀭𑀸𑀚𑀁 𑀧𑀭𑀫𑀧𑁆𑀧𑀫𑀸𑀤𑀁 [𑀭𑀸𑀚𑀁 𑀧𑀭𑀫𑀧𑁆𑀧𑀯𑀸𑀤𑀁 (𑀲𑀻.), 𑀭𑀸𑀚𑀸 𑀧𑀭𑀫𑀧𑁆𑀧𑀯𑀸𑀤𑀺𑀁 (𑀲𑁆𑀬𑀸.)].

𑁩𑁬𑁯. 𑀲𑀘𑁂 𑀇𑀫𑀁 𑀩𑁆𑀭𑀳𑁆𑀫𑁂 𑀲𑀼𑀭𑀚𑁆𑀚𑀓𑀁 𑀲𑀺𑀬𑀸, 𑀨𑀻𑀢𑀁 𑀭𑀝𑁆𑀞𑀁 𑀫𑀼𑀤𑀺𑀢𑀁 [𑀧𑀽𑀭𑀺𑀢𑀁 (𑀓.)] 𑀯𑀺𑀧𑁆𑀧𑀲𑀦𑁆𑀦𑀁;

𑀪𑀼𑀢𑁆𑀯𑀸 𑀩𑀮𑀺𑀁 𑀅𑀕𑁆𑀕𑀧𑀺𑀡𑁆𑀟𑀜𑁆𑀘 𑀓𑀸𑀓𑀸, 𑀦 𑀫𑀸𑀤𑀺𑀲𑀁 𑀚𑀻𑀯𑀫𑀤𑁂𑀬𑁆𑀬𑀼 𑀥𑀗𑁆𑀓𑀸𑀢𑀺.

𑀕𑀦𑁆𑀥𑀢𑀺𑀦𑁆𑀤𑀼𑀓𑀚𑀸𑀢𑀓𑀁 𑀤𑀲𑀫𑀁.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀓𑀺𑀁𑀙𑀦𑁆𑀤 𑀓𑀼𑀫𑁆𑀪 𑀚𑀬𑀤𑁆𑀤𑀺𑀲 𑀙𑀤𑁆𑀤𑀦𑁆𑀢, 𑀅𑀣 𑀧𑀡𑁆𑀟𑀺𑀢𑀲𑀫𑁆𑀪𑀯 𑀲𑀺𑀭𑀓𑀧𑀺;

𑀤𑀓𑀭𑀓𑁆𑀔𑀲 𑀧𑀡𑁆𑀟𑀭𑀦𑀸𑀕𑀯𑀭𑁄, 𑀅𑀣 𑀲𑀫𑁆𑀩𑀼𑀮 𑀢𑀺𑀦𑁆𑀤𑀼𑀓𑀤𑁂𑀯𑀲𑀼𑀢𑁄𑀢𑀺.

𑀢𑀺𑀁𑀲𑀦𑀺𑀧𑀸𑀢𑀁 𑀦𑀺𑀝𑁆𑀞𑀺𑀢𑀁.