𑁫𑁧𑁮. 𑀧𑀡𑁆𑀟𑀭𑀦𑀸𑀕𑀭𑀸𑀚𑀚𑀸𑀢𑀓𑀁 (𑁮)

𑁨𑁫𑁮. 𑀯𑀺𑀓𑀺𑀡𑁆𑀡𑀯𑀸𑀘𑀁 𑀅𑀦𑀺𑀕𑀼𑀬𑁆𑀳 [𑀅𑀦𑀺𑀕𑀽𑀴𑁆𑀳 (𑀧𑀻.)] 𑀫𑀦𑁆𑀢𑀁, 𑀅𑀲𑀜𑁆𑀜𑀢𑀁 𑀅𑀧𑀭𑀺𑀘𑀓𑁆𑀔𑀺𑀢𑀸𑀭𑀁 [𑀅𑀧𑀭𑀺𑀭𑀓𑁆𑀔𑀺𑀢𑀸𑀭𑀁 (𑀓.)];

𑀪𑀬𑀁 𑀢𑀫𑀦𑁆𑀯𑁂𑀢𑀺 𑀲𑀬𑀁 𑀅𑀩𑁄𑀥𑀁, 𑀦𑀸𑀕𑀁 𑀬𑀣𑀸 𑀧𑀡𑁆𑀟𑀭𑀓𑀁 𑀲𑀼𑀧𑀡𑁆𑀡𑁄 [𑀲𑀼𑀯𑀡𑁆𑀡𑁄 (𑀓.)].

𑁨𑁫𑁯. 𑀬𑁄 𑀕𑀼𑀬𑁆𑀳𑀫𑀦𑁆𑀢𑀁 𑀧𑀭𑀺𑀭𑀓𑁆𑀔𑀦𑁂𑀬𑁆𑀬𑀁, 𑀫𑁄𑀳𑀸 𑀦𑀭𑁄 𑀲𑀁𑀲𑀢𑀺 𑀳𑀸𑀲𑀫𑀸𑀦𑁄 [𑀪𑀸𑀲𑀫𑀸𑀦𑁄 (𑀧𑀻.)];

𑀢𑀁 𑀪𑀺𑀦𑁆𑀦𑀫𑀦𑁆𑀢𑀁 𑀪𑀬𑀫𑀦𑁆𑀯𑁂𑀢𑀺 𑀔𑀺𑀧𑁆𑀧𑀁, 𑀦𑀸𑀕𑀁 𑀬𑀣𑀸 𑀧𑀡𑁆𑀟𑀭𑀓𑀁 𑀲𑀼𑀧𑀡𑁆𑀡𑁄.

𑁨𑁬𑁦. 𑀦𑀸𑀦𑀼𑀫𑀺𑀢𑁆𑀢𑁄 𑀕𑀭𑀼𑀁 𑀅𑀢𑁆𑀣𑀁, 𑀕𑀼𑀬𑁆𑀳𑀁 𑀯𑁂𑀤𑀺𑀢𑀼𑀫𑀭𑀳𑀢𑀺;

𑀲𑀼𑀫𑀺𑀢𑁆𑀢𑁄 𑀘 𑀅𑀲𑀫𑁆𑀩𑀼𑀤𑁆𑀥𑀁, 𑀲𑀫𑁆𑀩𑀼𑀤𑁆𑀥𑀁 𑀯𑀸 𑀅𑀦𑀢𑁆𑀣 𑀯𑀸.

𑁨𑁬𑁧. 𑀯𑀺𑀲𑁆𑀲𑀸𑀲𑀫𑀸𑀧𑀚𑁆𑀚𑀺𑀫𑀳𑀁 𑀅𑀘𑁂𑀮𑀁 [𑀅𑀘𑁂𑀮𑁄 (𑀲𑀻. 𑀧𑀻.)], 𑀲𑀫𑀡𑁄 𑀅𑀬𑀁 𑀲𑀫𑁆𑀫𑀢𑁄 𑀪𑀸𑀯𑀺𑀢𑀢𑁆𑀢𑁄;

𑀢𑀲𑁆𑀲𑀸𑀳𑀫𑀓𑁆𑀔𑀺𑀁 𑀯𑀺𑀯𑀭𑀺𑀁 [𑀯𑀺𑀯𑀭𑀁 (𑀲𑀻.)] 𑀕𑀼𑀬𑁆𑀳𑀫𑀢𑁆𑀣𑀁, 𑀅𑀢𑀻𑀢𑀫𑀢𑁆𑀣𑁄 𑀓𑀧𑀡𑀁 [𑀓𑀧𑀡𑁄 (𑀧𑀻.)] 𑀭𑀼𑀤𑀸𑀫𑀺.

𑁨𑁬𑁨. 𑀢𑀲𑁆𑀲𑀸𑀳𑀁 𑀧𑀭𑀫𑀁 [𑀧𑀼𑀭𑀺𑀫𑀁 (𑀲𑀻.)] 𑀩𑁆𑀭𑀳𑁆𑀫𑁂 𑀕𑀼𑀬𑁆𑀳𑀁, 𑀯𑀸𑀘𑀜𑁆𑀳𑀺 𑀫𑀁 𑀦𑀸𑀲𑀓𑁆𑀔𑀺𑀁 [𑀦𑀸𑀲𑀓𑁆𑀔𑀺 (𑀧𑀻.)] 𑀲𑀁𑀬𑀫𑁂𑀢𑀼𑀁;

𑀢𑀧𑁆𑀧𑀓𑁆𑀔𑀢𑁄 𑀳𑀺 𑀪𑀬𑀫𑀸𑀕𑀢𑀁 𑀫𑀫𑀁, 𑀅𑀢𑀻𑀢𑀫𑀢𑁆𑀣𑁄 𑀓𑀧𑀡𑀁 𑀭𑀼𑀤𑀸𑀫𑀺.

𑁨𑁬𑁩. 𑀬𑁄 𑀯𑁂 𑀦𑀭𑁄 𑀲𑀼𑀳𑀤𑀁 𑀫𑀜𑁆𑀜𑀫𑀸𑀦𑁄, 𑀕𑀼𑀬𑁆𑀳𑀫𑀢𑁆𑀣𑀁 𑀲𑀁𑀲𑀢𑀺 𑀤𑀼𑀓𑁆𑀓𑀼𑀮𑀻𑀦𑁂;

𑀤𑁄𑀲𑀸 𑀪𑀬𑀸 𑀅𑀣𑀯𑀸 𑀭𑀸𑀕𑀭𑀢𑁆𑀢𑀸 [𑀭𑀸𑀕𑀭𑀢𑁆𑀢𑁄 (𑀲𑀻. 𑀲𑁆𑀬𑀸. 𑀧𑀻.)], 𑀧𑀮𑁆𑀮𑀢𑁆𑀣𑀺𑀢𑁄 [𑀧𑀮𑁆𑀮𑀺𑀢𑁆𑀣𑁄 (𑀧𑀻.), 𑀧𑀮𑁆𑀮𑀢𑁆𑀢𑀺𑀢𑁄 (𑀓.)] 𑀩𑀸𑀮𑁄 𑀅𑀲𑀁𑀲𑀬𑀁 𑀲𑁄.

𑁨𑁬𑁪. 𑀢𑀺𑀭𑁄𑀓𑁆𑀔𑀯𑀸𑀘𑁄 𑀅𑀲𑀢𑀁 𑀧𑀯𑀺𑀝𑁆𑀞𑁄, 𑀬𑁄 𑀲𑀗𑁆𑀕𑀢𑀻𑀲𑀼 𑀫𑀼𑀤𑀻𑀭𑁂𑀢𑀺 𑀯𑀸𑀓𑁆𑀬𑀁;

𑀆𑀲𑀻𑀯𑀺𑀲𑁄 𑀤𑀼𑀫𑁆𑀫𑀼𑀔𑁄𑀢𑁆𑀬𑀸𑀳𑀼 𑀢𑀁 𑀦𑀭𑀁, 𑀆𑀭𑀸 𑀆𑀭𑀸 [𑀆𑀭𑀸 𑀅𑀭𑀸 (𑀧𑀻.)] 𑀲𑀁𑀬𑀫𑁂 𑀢𑀸𑀤𑀺𑀲𑀫𑁆𑀳𑀸.

𑁨𑁬𑁫. 𑀅𑀦𑁆𑀦𑀁 𑀧𑀸𑀦𑀁 𑀓𑀸𑀲𑀺𑀓 [𑀓𑀸𑀲𑀺𑀓𑀁 (𑀧𑀻.)] 𑀘𑀦𑁆𑀤𑀦𑀜𑁆𑀘, 𑀫𑀦𑀸𑀧𑀺𑀢𑁆𑀣𑀺𑀬𑁄 𑀫𑀸𑀮𑀫𑀼𑀘𑁆𑀙𑀸𑀤𑀦𑀜𑁆𑀘;

𑀑𑀳𑀸𑀬 𑀕𑀘𑁆𑀙𑀸𑀫𑀲𑁂 𑀲𑀩𑁆𑀩𑀓𑀸𑀫𑁂, 𑀲𑀼𑀧𑀡𑁆𑀡 𑀧𑀸𑀡𑀽𑀧𑀕𑀢𑀸𑀯 𑀢𑁆𑀬𑀫𑁆𑀳𑀸.

𑁨𑁬𑁬. 𑀓𑁄 𑀦𑀻𑀥 𑀢𑀺𑀡𑁆𑀡𑀁 𑀕𑀭𑀳𑀁 𑀉𑀧𑁂𑀢𑀺, 𑀅𑀲𑁆𑀫𑀺𑀁𑀥 𑀮𑁄𑀓𑁂 𑀧𑀸𑀡𑀪𑀽 𑀦𑀸𑀕𑀭𑀸𑀚;

𑀲𑀫𑀡𑁄 𑀲𑀼𑀧𑀡𑁆𑀡𑁄 𑀅𑀣 𑀯𑀸 𑀢𑁆𑀯𑀫𑁂𑀯, 𑀓𑀺𑀁 𑀓𑀸𑀭𑀡𑀸 𑀧𑀡𑁆𑀟𑀭𑀓𑀕𑁆𑀕𑀳𑀻𑀢𑁄.

𑁨𑁬𑁭. 𑀲𑀫𑀡𑁄𑀢𑀺 𑀫𑁂 𑀲𑀫𑁆𑀫𑀢𑀢𑁆𑀢𑁄 𑀅𑀳𑁄𑀲𑀺, 𑀧𑀺𑀬𑁄 𑀘 𑀫𑁂 𑀫𑀦𑀲𑀸 𑀪𑀸𑀯𑀺𑀢𑀢𑁆𑀢𑁄;

𑀢𑀲𑁆𑀲𑀸𑀳𑀫𑀓𑁆𑀔𑀺𑀁 𑀯𑀺𑀯𑀭𑀺𑀁 𑀕𑀼𑀬𑁆𑀳𑀫𑀢𑁆𑀣𑀁, 𑀅𑀢𑀻𑀢𑀫𑀢𑁆𑀣𑁄 𑀓𑀧𑀡𑀁 𑀭𑀼𑀤𑀸𑀫𑀺.

𑁨𑁬𑁮. 𑀦 𑀘𑀢𑁆𑀣𑀺 𑀲𑀢𑁆𑀢𑁄 𑀅𑀫𑀭𑁄 𑀧𑀣𑀩𑁆𑀬𑀸, 𑀧𑀜𑁆𑀜𑀸𑀯𑀺𑀥𑀸 𑀦𑀢𑁆𑀣𑀺 𑀦 𑀦𑀺𑀦𑁆𑀤𑀺𑀢𑀩𑁆𑀩𑀸;

𑀲𑀘𑁆𑀘𑁂𑀦 𑀥𑀫𑁆𑀫𑁂𑀦 𑀥𑀺𑀢𑀺𑀬𑀸 [𑀥𑀺𑀬𑀸 (𑀲𑀻. 𑀧𑀻.)] 𑀤𑀫𑁂𑀦, 𑀅𑀮𑀩𑁆𑀪𑀫𑀩𑁆𑀬𑀸𑀳𑀭𑀢𑀻 𑀦𑀭𑁄 𑀇𑀥.

𑁨𑁬𑁯. 𑀫𑀸𑀢𑀸𑀧𑀺𑀢𑀸 𑀧𑀭𑀫𑀸 𑀩𑀦𑁆𑀥𑀯𑀸𑀦𑀁, 𑀦𑀸𑀲𑁆𑀲 𑀢𑀢𑀺𑀬𑁄 𑀅𑀦𑀼𑀓𑀫𑁆𑀧𑀓𑀢𑁆𑀣𑀺;

𑀢𑁂𑀲𑀫𑁆𑀧𑀺 𑀕𑀼𑀬𑁆𑀳𑀁 𑀧𑀭𑀫𑀁 𑀦 𑀲𑀁𑀲𑁂, 𑀫𑀦𑁆𑀢𑀲𑁆𑀲 𑀪𑁂𑀤𑀁 𑀧𑀭𑀺𑀲𑀗𑁆𑀓𑀫𑀸𑀦𑁄.

𑁨𑁭𑁦. 𑀫𑀸𑀢𑀸𑀧𑀺𑀢𑀸 𑀪𑀕𑀺𑀦𑀻 𑀪𑀸𑀢𑀭𑁄 𑀘, 𑀲𑀳𑀸𑀬𑀸 𑀯𑀸 𑀬𑀲𑁆𑀲 𑀳𑁄𑀦𑁆𑀢𑀺 𑀲𑀧𑀓𑁆𑀔𑀸;

𑀢𑁂𑀲𑀫𑁆𑀧𑀺 𑀕𑀼𑀬𑁆𑀳𑀁 𑀧𑀭𑀫𑀁 𑀦 𑀲𑀁𑀲𑁂, 𑀫𑀦𑁆𑀢𑀲𑁆𑀲 𑀪𑁂𑀤𑀁 𑀧𑀭𑀺𑀲𑀗𑁆𑀓𑀫𑀸𑀦𑁄.

𑁨𑁭𑁧. 𑀪𑀭𑀺𑀬𑀸 𑀘𑁂 𑀧𑀼𑀭𑀺𑀲𑀁 𑀯𑀚𑁆𑀚𑀸, 𑀓𑁄𑀫𑀸𑀭𑀻 𑀧𑀺𑀬𑀪𑀸𑀡𑀺𑀦𑀻;

𑀧𑀼𑀢𑁆𑀢𑀭𑀽𑀧𑀬𑀲𑀽𑀧𑁂𑀢𑀸, 𑀜𑀸𑀢𑀺𑀲𑀗𑁆𑀖𑀧𑀼𑀭𑀓𑁆𑀔𑀢𑀸, 𑀢𑀲𑁆𑀲𑀸𑀧𑀺 𑀕𑀼𑀬𑁆𑀳𑀁 𑀧𑀭𑀫𑀁 𑀦 𑀲𑀁𑀲𑁂;

𑀫𑀦𑁆𑀢𑀲𑁆𑀲 𑀪𑁂𑀤𑀁 𑀧𑀭𑀺𑀲𑀗𑁆𑀓𑀫𑀸𑀦𑁄.

𑁨𑁭𑁨. 𑀦 𑀕𑀼𑀬𑁆𑀳𑀫𑀢𑁆𑀣𑀁 [𑀕𑀼𑀬𑁆𑀳𑀢𑁆𑀣𑀁 (𑀓.)] 𑀯𑀺𑀯𑀭𑁂𑀬𑁆𑀬, 𑀭𑀓𑁆𑀔𑁂𑀬𑁆𑀬 𑀦𑀁 𑀬𑀣𑀸 𑀦𑀺𑀥𑀺𑀁;

𑀦 𑀳𑀺 𑀧𑀸𑀢𑀼𑀓𑀢𑁄 𑀲𑀸𑀥𑀼, 𑀕𑀼𑀬𑁆𑀳𑁄 𑀅𑀢𑁆𑀣𑁄 𑀧𑀚𑀸𑀦𑀢𑀸.

𑁨𑁭𑁩. 𑀣𑀺𑀬𑀸 𑀕𑀼𑀬𑁆𑀳𑀁 𑀦 𑀲𑀁𑀲𑁂𑀬𑁆𑀬, 𑀅𑀫𑀺𑀢𑁆𑀢𑀲𑁆𑀲 𑀘 𑀧𑀡𑁆𑀟𑀺𑀢𑁄;

𑀬𑁄 𑀘𑀸𑀫𑀺𑀲𑁂𑀦 𑀲𑀁𑀳𑀻𑀭𑁄, 𑀳𑀤𑀬𑀢𑁆𑀣𑁂𑀦𑁄 𑀘 𑀬𑁄 𑀦𑀭𑁄.

𑁨𑁭𑁪. 𑀕𑀼𑀬𑁆𑀳𑀫𑀢𑁆𑀣𑀁 𑀅𑀲𑀫𑁆𑀩𑀼𑀤𑁆𑀥𑀁, 𑀲𑀫𑁆𑀩𑁄𑀥𑀬𑀢𑀺 𑀬𑁄 𑀦𑀭𑁄;

𑀫𑀦𑁆𑀢𑀪𑁂𑀤𑀪𑀬𑀸 𑀢𑀲𑁆𑀲, 𑀤𑀸𑀲𑀪𑀽𑀢𑁄 𑀢𑀺𑀢𑀺𑀓𑁆𑀔𑀢𑀺.

𑁨𑁭𑁫. 𑀬𑀸𑀯𑀦𑁆𑀢𑁄 𑀧𑀼𑀭𑀺𑀲𑀲𑁆𑀲𑀢𑁆𑀣𑀁, 𑀕𑀼𑀬𑁆𑀳𑀁 𑀚𑀸𑀦𑀦𑁆𑀢𑀺 𑀫𑀦𑁆𑀢𑀺𑀦𑀁;

𑀢𑀸𑀯𑀦𑁆𑀢𑁄 𑀢𑀲𑁆𑀲 𑀉𑀩𑁆𑀩𑁂𑀕𑀸, 𑀢𑀲𑁆𑀫𑀸 𑀕𑀼𑀬𑁆𑀳𑀁 𑀦 𑀯𑀺𑀲𑁆𑀲𑀚𑁂.

𑁨𑁭𑁬. 𑀯𑀺𑀯𑀺𑀘𑁆𑀘 𑀪𑀸𑀲𑁂𑀬𑁆𑀬 𑀤𑀺𑀯𑀸 𑀭𑀳𑀲𑁆𑀲𑀁, 𑀭𑀢𑁆𑀢𑀺𑀁 𑀕𑀺𑀭𑀁 𑀦𑀸𑀢𑀺𑀯𑁂𑀮𑀁 𑀧𑀫𑀼𑀜𑁆𑀘𑁂;

𑀉𑀧𑀲𑁆𑀲𑀼𑀢𑀺𑀓𑀸 𑀳𑀺 𑀲𑀼𑀡𑀦𑁆𑀢𑀺 𑀫𑀦𑁆𑀢𑀁, 𑀢𑀲𑁆𑀫𑀸 𑀫𑀦𑁆𑀢𑁄 𑀔𑀺𑀧𑁆𑀧𑀫𑀼𑀧𑁂𑀢𑀺 𑀪𑁂𑀤𑀁.

𑁨𑁭𑁭. 𑀬𑀣𑀸𑀧𑀺 𑀅𑀲𑁆𑀲 [𑀅𑀬𑁄 (𑀲𑁆𑀬𑀸.), 𑀅𑀬 (𑀓.)] 𑀦𑀕𑀭𑀁 𑀫𑀳𑀦𑁆𑀢𑀁, 𑀅𑀤𑁆𑀯𑀸𑀭𑀓𑀁 [𑀆𑀴𑀸𑀭𑀓𑀁 (𑀧𑀻.)] 𑀆𑀬𑀲𑀁 𑀪𑀤𑁆𑀤𑀲𑀸𑀮𑀁;

𑀲𑀫𑀦𑁆𑀢𑀔𑀸𑀢𑀸𑀧𑀭𑀺𑀔𑀸𑀉𑀧𑁂𑀢𑀁, 𑀏𑀯𑀫𑁆𑀧𑀺 𑀫𑁂 𑀢𑁂 𑀇𑀥 𑀕𑀼𑀬𑁆𑀳𑀫𑀦𑁆𑀢𑀸.

𑁨𑁭𑁮. 𑀬𑁂 𑀕𑀼𑀬𑁆𑀳𑀫𑀦𑁆𑀢𑀸 𑀅𑀯𑀺𑀓𑀺𑀡𑁆𑀡𑀯𑀸𑀘𑀸, 𑀤𑀴𑁆𑀳𑀸 𑀲𑀤𑀢𑁆𑀣𑁂𑀲𑀼 𑀦𑀭𑀸 𑀤𑀼𑀚𑀺𑀯𑁆𑀳 [𑀤𑀼𑀚𑀺𑀯𑁆𑀳𑀸 (𑀲𑁆𑀬𑀸. 𑀧𑀻.)];

𑀆𑀭𑀸 𑀅𑀫𑀺𑀢𑁆𑀢𑀸 𑀩𑁆𑀬𑀯𑀚𑀦𑁆𑀢𑀺 𑀢𑁂𑀳𑀺, 𑀆𑀲𑀻𑀯𑀺𑀲𑀸 𑀯𑀸 𑀭𑀺𑀯 𑀲𑀢𑁆𑀢𑀼𑀲𑀗𑁆𑀖𑀸 [𑀲𑀢𑁆𑀢𑀲𑀗𑁆𑀖𑀸 (𑀲𑀻. 𑀲𑁆𑀬𑀸.)].

𑁨𑁭𑁯. 𑀳𑀺𑀢𑁆𑀯𑀸 𑀖𑀭𑀁 𑀧𑀩𑁆𑀩𑀚𑀺𑀢𑁄 𑀅𑀘𑁂𑀮𑁄, 𑀦𑀕𑁆𑀕𑁄 𑀫𑀼𑀡𑁆𑀟𑁄 𑀘𑀭𑀢𑀺 𑀖𑀸𑀲𑀳𑁂𑀢𑀼;

𑀢𑀫𑁆𑀳𑀺 [𑀢𑀫𑁆𑀳𑀻 (𑀧𑀻.)] 𑀦𑀼 𑀔𑁄 𑀯𑀺𑀯𑀭𑀺𑀁 𑀕𑀼𑀬𑁆𑀳𑀫𑀢𑁆𑀣𑀁, 𑀅𑀢𑁆𑀣𑀸 𑀘 𑀥𑀫𑁆𑀫𑀸 𑀘 𑀅𑀧𑀕𑁆𑀕𑀢𑀫𑁆𑀳𑀸 [𑀅𑀧𑀸𑀕𑀢𑀫𑁆𑀳𑀸 (𑀲𑀻.), 𑀅𑀧𑀕𑀢𑀫𑁆𑀳𑀸 (𑀲𑁆𑀬𑀸.), 𑀅𑀯𑀸𑀕𑀢𑀫𑁆𑀳𑀸 (𑀧𑀻.)].

𑁨𑁮𑁦. 𑀓𑀣𑀁𑀓𑀭𑁄 𑀳𑁄𑀢𑀺 𑀲𑀼𑀧𑀡𑁆𑀡𑀭𑀸𑀚, 𑀓𑀺𑀁𑀲𑀻𑀮𑁄 𑀓𑁂𑀦 𑀯𑀢𑁂𑀦 𑀯𑀢𑁆𑀢𑀁;

𑀲𑀫𑀡𑁄 𑀘𑀭𑀁 𑀳𑀺𑀢𑁆𑀯𑀸 𑀫𑀫𑀸𑀬𑀺𑀢𑀸𑀦𑀺, 𑀓𑀣𑀁𑀓𑀭𑁄 𑀲𑀕𑁆𑀕𑀫𑀼𑀧𑁂𑀢𑀺 𑀞𑀸𑀦𑀁.

𑁨𑁮𑁧. 𑀳𑀺𑀭𑀺𑀬𑀸 𑀢𑀺𑀢𑀺𑀓𑁆𑀔𑀸𑀬 𑀤𑀫𑁂𑀦𑀼𑀧𑁂𑀢𑁄 [𑀤𑀫𑁂𑀦 𑀔𑀦𑁆𑀢𑀺𑀬𑀸 (𑀲𑀻. 𑀲𑁆𑀬𑀸. 𑀧𑀻.)], 𑀅𑀓𑁆𑀓𑁄𑀥𑀦𑁄 𑀧𑁂𑀲𑀼𑀡𑀺𑀬𑀁 𑀧𑀳𑀸𑀬;

𑀲𑀫𑀡𑁄 𑀘𑀭𑀁 𑀳𑀺𑀢𑁆𑀯𑀸 𑀫𑀫𑀸𑀬𑀺𑀢𑀸𑀦𑀺, 𑀏𑀯𑀁𑀓𑀭𑁄 𑀲𑀕𑁆𑀕𑀫𑀼𑀧𑁂𑀢𑀺 𑀞𑀸𑀦𑀁.

𑁨𑁮𑁨. 𑀫𑀸𑀢𑀸𑀯 𑀧𑀼𑀢𑁆𑀢𑀁 𑀢𑀭𑀼𑀡𑀁 𑀢𑀦𑀼𑀚𑁆𑀚𑀁 [𑀢𑀦𑀽𑀚𑀁 (𑀲𑀻.)], 𑀲𑀫𑁆𑀨𑀲𑁆𑀲𑀢𑀸 [𑀲𑀫𑁆𑀧𑀲𑁆𑀲 𑀢𑀁 (𑀲𑀻. 𑀧𑀻.)] 𑀲𑀩𑁆𑀩𑀕𑀢𑁆𑀢𑀁 𑀨𑀭𑁂𑀢𑀺;

𑀏𑀯𑀫𑁆𑀧𑀺 𑀫𑁂 𑀢𑁆𑀯𑀁 𑀧𑀸𑀢𑀼𑀭𑀳𑀼 𑀤𑀺𑀚𑀺𑀦𑁆𑀤, 𑀫𑀸𑀢𑀸𑀯 𑀧𑀼𑀢𑁆𑀢𑀁 𑀅𑀦𑀼𑀓𑀫𑁆𑀧𑀫𑀸𑀦𑁄.

𑁨𑁮𑁩. 𑀳𑀦𑁆𑀤𑀚𑁆𑀚 𑀢𑁆𑀯𑀁 𑀫𑀼𑀜𑁆𑀘 [𑀫𑀼𑀘𑁆𑀘 (𑀲𑀻.)] 𑀯𑀥𑀸 𑀤𑀼𑀚𑀺𑀯𑁆𑀳, 𑀢𑀬𑁄 𑀳𑀺 𑀧𑀼𑀢𑁆𑀢𑀸 𑀦 𑀳𑀺 𑀅𑀜𑁆𑀜𑁄 𑀅𑀢𑁆𑀣𑀺;

𑀅𑀦𑁆𑀢𑁂𑀯𑀸𑀲𑀻 𑀤𑀺𑀦𑁆𑀦𑀓𑁄 𑀅𑀢𑁆𑀭𑀚𑁄 𑀘, 𑀭𑀚𑁆𑀚𑀲𑁆𑀲𑀼 [𑀭𑀚𑀲𑁆𑀲𑀼 (𑀲𑀻. 𑀲𑁆𑀬𑀸. 𑀧𑀻.)] 𑀧𑀼𑀢𑁆𑀢𑀜𑁆𑀜𑀢𑀭𑁄 𑀫𑁂 𑀅𑀳𑁄𑀲𑀺.

𑁨𑁮𑁪. 𑀇𑀘𑁆𑀘𑁂𑀯 𑀯𑀸𑀓𑁆𑀬𑀁 𑀯𑀺𑀲𑀚𑁆𑀚𑀻 𑀲𑀼𑀧𑀡𑁆𑀡𑁄, 𑀪𑀼𑀫𑁆𑀬𑀁 𑀧𑀢𑀺𑀝𑁆𑀞𑀸𑀬 𑀤𑀺𑀚𑁄 𑀤𑀼𑀚𑀺𑀯𑁆𑀳𑀁;

𑀫𑀼𑀢𑁆𑀢𑀚𑁆𑀚 𑀢𑁆𑀯𑀁 𑀲𑀩𑁆𑀩𑀪𑀬𑀸𑀢𑀺𑀯𑀢𑁆𑀢𑁄, 𑀣𑀮𑀽𑀤𑀓𑁂 𑀳𑁄𑀳𑀺 𑀫𑀬𑀸𑀪𑀺𑀕𑀼𑀢𑁆𑀢𑁄.

𑁨𑁮𑁫. 𑀆𑀢𑀗𑁆𑀓𑀺𑀦𑀁 𑀬𑀣𑀸 𑀓𑀼𑀲𑀮𑁄 𑀪𑀺𑀲𑀓𑁆𑀓𑁄, 𑀧𑀺𑀧𑀸𑀲𑀺𑀢𑀸𑀦𑀁 𑀭𑀳𑀤𑁄𑀯 𑀲𑀻𑀢𑁄;

𑀯𑁂𑀲𑁆𑀫𑀁 𑀬𑀣𑀸 𑀳𑀺𑀫𑀲𑀻𑀢𑀝𑁆𑀝𑀺𑀢𑀸𑀦𑀁 [𑀳𑀺𑀫𑀲𑀺𑀲𑀺𑀭𑀝𑁆𑀝𑀺𑀢𑀸𑀦𑀁 (𑀧𑀻.)], 𑀏𑀯𑀫𑁆𑀧𑀺 𑀢𑁂 𑀲𑀭𑀡𑀫𑀳𑀁 𑀪𑀯𑀸𑀫𑀺.

𑁨𑁮𑁬. 𑀲𑀦𑁆𑀥𑀺𑀁 𑀓𑀢𑁆𑀯𑀸 𑀅𑀫𑀺𑀢𑁆𑀢𑁂𑀦, 𑀅𑀡𑁆𑀟𑀚𑁂𑀦 𑀚𑀮𑀸𑀩𑀼𑀚;

𑀯𑀺𑀯𑀭𑀺𑀬 𑀤𑀸𑀞𑀁 𑀲𑁂𑀲𑀺, 𑀓𑀼𑀢𑁄 𑀢𑀁 𑀪𑀬𑀫𑀸𑀕𑀢𑀁.

𑁨𑁮𑁭. 𑀲𑀗𑁆𑀓𑁂𑀣𑁂𑀯 𑀅𑀫𑀺𑀢𑁆𑀢𑀲𑁆𑀫𑀺𑀁, 𑀫𑀺𑀢𑁆𑀢𑀲𑁆𑀫𑀺𑀫𑁆𑀧𑀺 𑀦 𑀯𑀺𑀲𑁆𑀲𑀲𑁂;

𑀅𑀪𑀬𑀸 𑀪𑀬𑀫𑀼𑀧𑁆𑀧𑀦𑁆𑀦𑀁, 𑀅𑀧𑀺 𑀫𑀽𑀮𑀸𑀦𑀺 𑀓𑀦𑁆𑀢𑀢𑀺.

𑁨𑁮𑁮. 𑀓𑀣𑀁 𑀦𑀼 𑀯𑀺𑀲𑁆𑀲𑀲𑁂 𑀢𑁆𑀬𑀫𑁆𑀳𑀺, 𑀬𑁂𑀦𑀸𑀲𑀺 𑀓𑀮𑀳𑁄 𑀓𑀢𑁄;

𑀦𑀺𑀘𑁆𑀘𑀬𑀢𑁆𑀢𑁂𑀦 𑀞𑀸𑀢𑀩𑁆𑀩𑀁, 𑀲𑁄 𑀤𑀺𑀲𑀩𑁆𑀪𑀺 [𑀲𑁄 𑀤𑀺𑀲𑀫𑁆𑀳𑀺 (𑀧𑀻.)] 𑀦 𑀭𑀚𑁆𑀚𑀢𑀺.

𑁨𑁮𑁯. 𑀯𑀺𑀲𑁆𑀲𑀸𑀲𑀬𑁂 𑀦 𑀘 𑀢𑀁 [𑀦𑀁 (𑀲𑀻. 𑀲𑁆𑀬𑀸. 𑀧𑀻.)] 𑀯𑀺𑀲𑁆𑀲𑀬𑁂𑀬𑁆𑀬, 𑀅𑀲𑀗𑁆𑀓𑀺𑀢𑁄 𑀲𑀗𑁆𑀓𑀺𑀢𑁄 𑀘 [𑀅𑀲𑀗𑁆𑀓𑀺𑀢𑁄 𑀘 𑀲𑀗𑁆𑀓𑀺𑀢𑁄 (𑀲𑀻. 𑀧𑀻.)] 𑀪𑀯𑁂𑀬𑁆𑀬;

𑀢𑀣𑀸 𑀢𑀣𑀸 𑀯𑀺𑀜𑁆𑀜𑀽 𑀧𑀭𑀓𑁆𑀓𑀫𑁂𑀬𑁆𑀬, 𑀬𑀣𑀸 𑀬𑀣𑀸 𑀪𑀸𑀯𑀁 𑀧𑀭𑁄 𑀦 𑀚𑀜𑁆𑀜𑀸.

𑁨𑁯𑁦. 𑀢𑁂 𑀤𑁂𑀯𑀯𑀡𑁆𑀡𑀸 [𑀤𑁂𑀯𑀯𑀡𑁆𑀡𑀻 (𑀧𑀻.)] 𑀲𑀼𑀔𑀼𑀫𑀸𑀮𑀭𑀽𑀧𑀸, 𑀉𑀪𑁄 𑀲𑀫𑀸 𑀲𑀼𑀚𑀬𑀸 [𑀲𑀼𑀚𑀬𑁄 (𑀲𑀻. 𑀲𑁆𑀬𑀸. 𑀧𑀻.)] 𑀧𑀼𑀜𑁆𑀜𑀔𑀦𑁆𑀥𑀸 [𑀧𑀼𑀜𑁆𑀜𑀕𑀦𑁆𑀥𑀸 (𑀧𑀻.)];

𑀉𑀧𑀸𑀕𑀫𑀼𑀁 𑀓𑀭𑀫𑁆𑀧𑀺𑀬𑀁 [𑀓𑀸𑀤𑀫𑁆𑀩𑀺𑀬𑀁 (𑀲𑀻.), 𑀓𑀸𑀭𑀫𑁆𑀩𑀺𑀬𑀁 (𑀧𑀻.)] 𑀅𑀘𑁂𑀮𑀁, 𑀫𑀺𑀲𑁆𑀲𑀻𑀪𑀽𑀢𑀸 𑀅𑀲𑁆𑀲𑀯𑀸𑀳𑀸𑀯 𑀦𑀸𑀕𑀸.

𑁨𑁯𑁧. 𑀢𑀢𑁄 𑀳𑀯𑁂 𑀧𑀡𑁆𑀟𑀭𑀓𑁄 𑀅𑀘𑁂𑀮𑀁, 𑀲𑀬𑀫𑁂𑀯𑀼𑀧𑀸𑀕𑀫𑁆𑀫 𑀇𑀤𑀁 𑀅𑀯𑁄𑀘;

𑀫𑀼𑀢𑁆𑀢𑀚𑁆𑀚𑀳𑀁 𑀲𑀩𑁆𑀩𑀪𑀬𑀸𑀢𑀺𑀯𑀢𑁆𑀢𑁄, 𑀦 𑀳𑀺 [𑀳 (𑀧𑀻.)] 𑀦𑀽𑀦 𑀢𑀼𑀬𑁆𑀳𑀁 𑀫𑀦𑀲𑁄 𑀧𑀺𑀬𑀫𑁆𑀳𑀸.

𑁨𑁯𑁨. 𑀧𑀺𑀬𑁄 𑀳𑀺 𑀫𑁂 𑀆𑀲𑀺 𑀲𑀼𑀧𑀡𑁆𑀡𑀭𑀸𑀚𑀸, 𑀅𑀲𑀁𑀲𑀬𑀁 𑀧𑀡𑁆𑀟𑀭𑀓𑁂𑀦 𑀲𑀘𑁆𑀘𑀁;

𑀲𑁄 𑀭𑀸𑀕𑀭𑀢𑁆𑀢𑁄𑀯 𑀅𑀓𑀸𑀲𑀺𑀫𑁂𑀢𑀁, 𑀧𑀸𑀧𑀓𑀫𑁆𑀫𑀁 [𑀧𑀸𑀧𑀁 𑀓𑀫𑁆𑀫𑀁 (𑀲𑀻. 𑀧𑀻.)] 𑀲𑀫𑁆𑀧𑀚𑀸𑀦𑁄 𑀦 𑀫𑁄𑀳𑀸.

𑁨𑁯𑁩. 𑀦 𑀫𑁂 𑀧𑀺𑀬𑀁 𑀅𑀧𑁆𑀧𑀺𑀬𑀁 𑀯𑀸𑀧𑀺 𑀳𑁄𑀢𑀺, 𑀲𑀫𑁆𑀧𑀲𑁆𑀲𑀢𑁄 𑀮𑁄𑀓𑀫𑀺𑀫𑀁 𑀧𑀭𑀜𑁆𑀘;

𑀲𑀼𑀲𑀜𑁆𑀜𑀢𑀸𑀦𑀜𑁆𑀳𑀺 𑀯𑀺𑀬𑀜𑁆𑀚𑀦𑁂𑀦, 𑀅𑀲𑀜𑁆𑀜𑀢𑁄 𑀮𑁄𑀓𑀫𑀺𑀫𑀁 𑀘𑀭𑀸𑀲𑀺.

𑁨𑁯𑁪. 𑀅𑀭𑀺𑀬𑀸𑀯𑀓𑀸𑀲𑁄𑀲𑀺 𑀅𑀦𑀭𑀺𑀬𑁄𑀯𑀸𑀲𑀺 [𑀅𑀦𑀭𑀺𑀬𑁄 𑀘𑀸𑀲𑀺 (𑀲𑀻. 𑀧𑀻.)], 𑀅𑀲𑀜𑁆𑀜𑀢𑁄 𑀲𑀜𑁆𑀜𑀢𑀲𑀦𑁆𑀦𑀺𑀓𑀸𑀲𑁄;

𑀓𑀡𑁆𑀳𑀸𑀪𑀺𑀚𑀸𑀢𑀺𑀓𑁄𑀲𑀺 𑀅𑀦𑀭𑀺𑀬𑀭𑀽𑀧𑁄, 𑀧𑀸𑀧𑀁 𑀩𑀳𑀼𑀁 𑀤𑀼𑀘𑁆𑀘𑀭𑀺𑀢𑀁 𑀅𑀘𑀸𑀭𑀺.

𑁨𑁯𑁫. 𑀅𑀤𑀼𑀝𑁆𑀞𑀲𑁆𑀲 𑀢𑀼𑀯𑀁 𑀤𑀼𑀩𑁆𑀪𑀺, 𑀤𑀼𑀩𑁆𑀪𑀻 [𑀤𑀽𑀪𑀺, 𑀤𑀽𑀪𑀻 (𑀧𑀻.)] 𑀘 𑀧𑀺𑀲𑀼𑀡𑁄 𑀘𑀲𑀺;

𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀫𑀼𑀤𑁆𑀥𑀸 𑀢𑁂 𑀨𑀮𑀢𑀼 𑀲𑀢𑁆𑀢𑀥𑀸.

𑁨𑁯𑁬. 𑀢𑀲𑁆𑀫𑀸 𑀳𑀺 𑀫𑀺𑀢𑁆𑀢𑀸𑀦𑀁 𑀦 𑀤𑀼𑀩𑁆𑀪𑀺𑀢𑀩𑁆𑀩𑀁, 𑀫𑀺𑀢𑁆𑀢𑀤𑀼𑀩𑁆𑀪𑀸 [𑀫𑀺𑀢𑁆𑀢𑀤𑀼𑀩𑁆𑀪𑀸 𑀳𑀺 (𑀲𑁆𑀬𑀸.)] 𑀧𑀸𑀧𑀺𑀬𑁄 𑀦𑀢𑁆𑀣𑀺 𑀅𑀜𑁆𑀜𑁄;

𑀆𑀲𑀺𑀢𑁆𑀢𑀲𑀢𑁆𑀢𑁄 𑀦𑀺𑀳𑀢𑁄 𑀧𑀣𑀩𑁆𑀬𑀸, 𑀇𑀦𑁆𑀤𑀲𑁆𑀲 𑀯𑀸𑀓𑁆𑀬𑁂𑀦 𑀳𑀺 𑀲𑀁𑀯𑀭𑁄 𑀳𑀢𑁄𑀢𑀺.

𑀧𑀡𑁆𑀟𑀭𑀦𑀸𑀕𑀭𑀸𑀚𑀚𑀸𑀢𑀓𑀁 [𑀧𑀡𑁆𑀟𑀭𑀓𑀚𑀸𑀢𑀓𑀁 (𑀲𑀻. 𑀲𑁆𑀬𑀸. 𑀧𑀻.)] 𑀅𑀝𑁆𑀞𑀫𑀁.