𑁫𑁧𑁭. 𑀤𑀓𑀭𑀓𑁆𑀔𑀲𑀚𑀸𑀢𑀓𑀁 (𑁭)

𑁨𑁨𑁪. 𑀲𑀘𑁂 𑀯𑁄 𑀯𑀼𑀬𑁆𑀳𑀫𑀸𑀦𑀸𑀦𑀁, 𑀲𑀢𑁆𑀢𑀦𑁆𑀦𑀁 𑀉𑀤𑀓𑀡𑁆𑀡𑀯𑁂;

𑀫𑀦𑀼𑀲𑁆𑀲𑀩𑀮𑀺𑀫𑁂𑀲𑀸𑀦𑁄, 𑀦𑀸𑀯𑀁 𑀕𑀡𑁆𑀳𑁂𑀬𑁆𑀬 𑀭𑀓𑁆𑀔𑀲𑁄;

𑀅𑀦𑀼𑀧𑀼𑀩𑁆𑀩𑀁 𑀓𑀣𑀁 𑀤𑀢𑁆𑀯𑀸, 𑀫𑀼𑀜𑁆𑀘𑁂𑀲𑀺 𑀤𑀓𑀭𑀓𑁆𑀔𑀲𑀸 [𑀤𑀓𑀭𑀓𑁆𑀔𑀢𑁄 (𑀧𑀻.)].

𑁨𑁨𑁫. 𑀫𑀸𑀢𑀭𑀁 𑀧𑀞𑀫𑀁 𑀤𑀚𑁆𑀚𑀁, 𑀪𑀭𑀺𑀬𑀁 𑀤𑀢𑁆𑀯𑀸𑀦 𑀪𑀸𑀢𑀭𑀁;

𑀢𑀢𑁄 𑀲𑀳𑀸𑀬𑀁 𑀤𑀢𑁆𑀯𑀸𑀦, 𑀧𑀜𑁆𑀘𑀫𑀁 𑀤𑀚𑁆𑀚𑀁 [𑀤𑀚𑁆𑀚 (𑀲𑁆𑀬𑀸.)] 𑀩𑁆𑀭𑀸𑀳𑁆𑀫𑀡𑀁;

𑀙𑀝𑁆𑀞𑀸𑀳𑀁 𑀤𑀚𑁆𑀚𑀫𑀢𑁆𑀢𑀸𑀦𑀁, 𑀦𑁂𑀯 𑀤𑀚𑁆𑀚𑀁 𑀫𑀳𑁄𑀲𑀥𑀁.

𑁨𑁨𑁬. 𑀧𑁄𑀲𑁂𑀢𑀸 𑀢𑁂 𑀚𑀦𑁂𑀢𑁆𑀢𑀻 𑀘, 𑀤𑀻𑀖𑀭𑀢𑁆𑀢𑀸𑀦𑀼𑀓𑀫𑁆𑀧𑀺𑀓𑀸;

𑀙𑀩𑁆𑀪𑀻 𑀢𑀬𑀺 𑀧𑀤𑀼𑀲𑁆𑀲𑀢𑀺 [𑀧𑀤𑀼𑀝𑁆𑀞𑀲𑁆𑀫𑀺𑀁 (𑀲𑀻. 𑀲𑁆𑀬𑀸.)], 𑀧𑀡𑁆𑀟𑀺𑀢𑀸 𑀅𑀢𑁆𑀣𑀤𑀲𑁆𑀲𑀺𑀦𑀻;

𑀅𑀜𑁆𑀜𑀁 𑀉𑀧𑀦𑀺𑀲𑀁 𑀓𑀢𑁆𑀯𑀸, 𑀯𑀥𑀸 𑀢𑀁 𑀧𑀭𑀺𑀫𑁄𑀘𑀬𑀺.

𑁨𑁨𑁭. 𑀢𑀁 𑀢𑀸𑀤𑀺𑀲𑀺𑀁 [𑀢𑀸𑀤𑀺𑀲𑀁 (𑀓.)] 𑀧𑀸𑀡𑀤𑀤𑀺𑀁, 𑀑𑀭𑀲𑀁 𑀕𑀩𑁆𑀪𑀥𑀸𑀭𑀺𑀦𑀺𑀁 [𑀕𑀩𑁆𑀪𑀥𑀸𑀭𑀺𑀡𑀺𑀁 (𑀲𑀻. 𑀲𑁆𑀬𑀸.)];

𑀫𑀸𑀢𑀭𑀁 𑀓𑁂𑀦 𑀤𑁄𑀲𑁂𑀦, 𑀤𑀚𑁆𑀚𑀸𑀲𑀺 𑀤𑀓𑀭𑀓𑁆𑀔𑀺𑀦𑁄 [𑀤𑀓𑀭𑀓𑁆𑀔𑀢𑁄 (𑀧𑀻.)].

𑁨𑁨𑁮. 𑀤𑀳𑀭𑀸 𑀯𑀺𑀬𑀮𑀗𑁆𑀓𑀸𑀭𑀁, 𑀥𑀸𑀭𑁂𑀢𑀺 𑀅𑀧𑀺𑀴𑀦𑁆𑀥𑀦𑀁;

𑀤𑁄𑀯𑀸𑀭𑀺𑀓𑁂 𑀅𑀦𑀻𑀓𑀝𑁆𑀞𑁂, 𑀅𑀢𑀺𑀯𑁂𑀮𑀁 𑀧𑀚𑀕𑁆𑀖𑀢𑀺 [𑀲𑀜𑁆𑀚𑀕𑁆𑀖𑀢𑀺 (𑀓.)].

𑁨𑁨𑁯. 𑀅𑀣𑁄𑀧𑀺 𑀧𑀝𑀺𑀭𑀸𑀚𑀽𑀦𑀁, 𑀲𑀬𑀁 𑀤𑀽𑀢𑀸𑀦𑀺 𑀲𑀸𑀲𑀢𑀺;

𑀫𑀸𑀢𑀭𑀁 𑀢𑁂𑀦 𑀤𑁄𑀲𑁂𑀦, 𑀤𑀚𑁆𑀚𑀸𑀳𑀁 𑀤𑀓𑀭𑀓𑁆𑀔𑀺𑀦𑁄.

𑁨𑁩𑁦. 𑀇𑀢𑁆𑀣𑀺𑀕𑀼𑀫𑁆𑀩𑀲𑁆𑀲 𑀧𑀯𑀭𑀸, 𑀅𑀘𑁆𑀘𑀦𑁆𑀢𑀁 𑀧𑀺𑀬𑀪𑀸𑀡𑀺𑀦𑀻 [𑀅𑀘𑁆𑀘𑀦𑁆𑀢𑀧𑀺𑀬𑀯𑀸𑀤𑀺𑀦𑀻 (𑀲𑀻. 𑀧𑀻.)];

𑀅𑀦𑀼𑀕𑁆𑀕𑀢𑀸 [𑀅𑀦𑀼𑀩𑁆𑀩𑀢𑀸 (𑀲𑁆𑀬𑀸.), 𑀅𑀦𑀼𑀧𑀼𑀩𑁆𑀩𑀢𑀸 (𑀓.)] 𑀲𑀻𑀮𑀯𑀢𑀻, 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻.

𑁨𑁩𑁧. 𑀅𑀓𑁆𑀓𑁄𑀥𑀦𑀸 𑀧𑀼𑀜𑁆𑀜𑀯𑀢𑀻 [𑀧𑀜𑁆𑀜𑀯𑀢𑀻 (𑀲𑀻. 𑀧𑀻.)], 𑀧𑀡𑁆𑀟𑀺𑀢𑀸 𑀅𑀢𑁆𑀣𑀤𑀲𑁆𑀲𑀺𑀦𑀻;

𑀉𑀩𑁆𑀩𑀭𑀺𑀁 [𑀉𑀧𑁆𑀧𑀭𑀺𑀁 (𑀲𑀻.)] 𑀓𑁂𑀦 𑀤𑁄𑀲𑁂𑀦, 𑀤𑀚𑁆𑀚𑀸𑀲𑀺 𑀤𑀓𑀭𑀓𑁆𑀔𑀺𑀦𑁄.

𑁨𑁩𑁨. 𑀔𑀺𑀟𑁆𑀟𑀸𑀭𑀢𑀺𑀲𑀫𑀸𑀧𑀦𑁆𑀦𑀁, 𑀅𑀦𑀢𑁆𑀣𑀯𑀲𑀫𑀸𑀕𑀢𑀁;

𑀲𑀸 𑀫𑀁 𑀲𑀓𑀸𑀦 𑀧𑀼𑀢𑁆𑀢𑀸𑀦𑀁, 𑀅𑀬𑀸𑀘𑀁 𑀬𑀸𑀘𑀢𑁂 𑀥𑀦𑀁.

𑁨𑁩𑁩. 𑀲𑁄𑀳𑀁 𑀤𑀤𑀸𑀫𑀺 𑀲𑀸𑀭𑀢𑁆𑀢𑁄 [𑀲𑀸𑀭𑀢𑁄 (𑀲𑁆𑀬𑀸.)], 𑀩𑀳𑀼𑀁 𑀉𑀘𑁆𑀘𑀸𑀯𑀘𑀁 𑀥𑀦𑀁;

𑀲𑀼𑀤𑀼𑀘𑁆𑀘𑀚𑀁 𑀘𑀚𑀺𑀢𑁆𑀯𑀸𑀦, 𑀧𑀘𑁆𑀙𑀸 𑀲𑁄𑀘𑀸𑀫𑀺 𑀤𑀼𑀫𑁆𑀫𑀦𑁄;

𑀉𑀩𑁆𑀩𑀭𑀺𑀁 𑀢𑁂𑀦 𑀤𑁄𑀲𑁂𑀦, 𑀤𑀚𑁆𑀚𑀸𑀳𑀁 𑀤𑀓𑀭𑀓𑁆𑀔𑀺𑀦𑁄.

𑁨𑁩𑁪. 𑀬𑁂𑀦𑁄𑀘𑀺𑀢𑀸 𑀚𑀦𑀧𑀤𑀸 [𑀚𑀸𑀦𑀧𑀤𑀸 (𑀲𑀻. 𑀲𑁆𑀬𑀸. 𑀧𑀻.)], 𑀆𑀦𑀻𑀢𑀸 𑀘 𑀧𑀝𑀺𑀕𑁆𑀕𑀳𑀁;

𑀆𑀪𑀢𑀁 𑀧𑀭𑀭𑀚𑁆𑀚𑁂𑀪𑀺, 𑀅𑀪𑀺𑀝𑁆𑀞𑀸𑀬 𑀩𑀳𑀼𑀁 𑀥𑀦𑀁.

𑁨𑁩𑁫. 𑀥𑀦𑀼𑀕𑁆𑀕𑀳𑀸𑀦𑀁 𑀧𑀯𑀭𑀁, 𑀲𑀽𑀭𑀁 𑀢𑀺𑀔𑀺𑀡𑀫𑀦𑁆𑀢𑀺𑀦𑀁;

𑀪𑀸𑀢𑀭𑀁 𑀓𑁂𑀦 𑀤𑁄𑀲𑁂𑀦, 𑀤𑀚𑁆𑀚𑀸𑀲𑀺 𑀤𑀓𑀭𑀓𑁆𑀔𑀺𑀦𑁄.

𑁨𑁩𑁬. 𑀬𑁂𑀦𑁄𑀘𑀺𑀢𑀸 [𑀫𑀬𑁄𑀘𑀺𑀢𑀸 (𑀲𑀻.), 𑀫𑀬𑀸𑀘𑀺𑀢𑀸 (𑀧𑀻.)] 𑀚𑀦𑀧𑀤𑀸, 𑀆𑀦𑀻𑀢𑀸 𑀘 𑀧𑀝𑀺𑀕𑁆𑀕𑀳𑀁;

𑀆𑀪𑀢𑀁 𑀧𑀭𑀭𑀚𑁆𑀚𑁂𑀪𑀺, 𑀅𑀪𑀺𑀝𑁆𑀞𑀸𑀬 𑀩𑀳𑀼𑀁 𑀥𑀦𑀁.

𑁨𑁩𑁭. 𑀥𑀦𑀼𑀕𑁆𑀕𑀳𑀸𑀦𑀁 𑀧𑀯𑀭𑁄, 𑀲𑀽𑀭𑁄 𑀢𑀺𑀔𑀺𑀡𑀫𑀦𑁆𑀢𑀺 𑀘 [𑀢𑀺𑀔𑀺𑀡𑀫𑀦𑁆𑀢𑀺𑀦𑁄 (𑀓.)];

𑀫𑀬𑀸𑀬𑀁 [𑀫𑀬𑀸 𑀲𑁄 (𑀲𑀻. 𑀧𑀻.)] 𑀲𑀼𑀔𑀺𑀢𑁄 𑀭𑀸𑀚𑀸, 𑀅𑀢𑀺𑀫𑀜𑁆𑀜𑀢𑀺 𑀤𑀸𑀭𑀓𑁄.

𑁨𑁩𑁮. 𑀉𑀧𑀝𑁆𑀞𑀸𑀦𑀫𑁆𑀧𑀺 𑀫𑁂 𑀅𑀬𑁆𑀬𑁂, 𑀦 𑀲𑁄 𑀏𑀢𑀺 𑀬𑀣𑀸 𑀧𑀼𑀭𑁂;

𑀪𑀸𑀢𑀭𑀁 𑀢𑁂𑀦 𑀤𑁄𑀲𑁂𑀦, 𑀤𑀚𑁆𑀚𑀸𑀳𑀁 𑀤𑀓𑀭𑀓𑁆𑀔𑀺𑀦𑁄.

𑁨𑁩𑁯. 𑀏𑀓𑀭𑀢𑁆𑀢𑁂𑀦 𑀉𑀪𑀬𑁄, 𑀢𑁆𑀯𑀜𑁆𑀘𑁂𑀯 𑀥𑀦𑀼𑀲𑁂𑀔 𑀘 [𑀥𑀦𑀼𑀲𑁂𑀔𑀯𑀸 (𑀲𑀻. 𑀲𑁆𑀬𑀸. 𑀧𑀻.)];

𑀉𑀪𑁄 𑀚𑀸𑀢𑁂𑀢𑁆𑀣 𑀧𑀜𑁆𑀘𑀸𑀮𑀸, 𑀲𑀳𑀸𑀬𑀸 𑀲𑀼𑀲𑀫𑀸𑀯𑀬𑀸.

𑁨𑁪𑁦. 𑀘𑀭𑀺𑀬𑀸 𑀢𑀁 𑀅𑀦𑀼𑀩𑀦𑁆𑀥𑀺𑀢𑁆𑀣𑁄 [𑀅𑀦𑀼𑀩𑀦𑁆𑀥𑁄 (𑀓.)], 𑀏𑀓𑀤𑀼𑀓𑁆𑀔𑀲𑀼𑀔𑁄 𑀢𑀯;

𑀉𑀲𑁆𑀲𑀼𑀓𑁆𑀓𑁄 𑀢𑁂 𑀤𑀺𑀯𑀸𑀭𑀢𑁆𑀢𑀺𑀁, 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀩𑁆𑀬𑀸𑀯𑀝𑁄;

𑀲𑀳𑀸𑀬𑀁 𑀓𑁂𑀦 𑀤𑁄𑀲𑁂𑀦, 𑀤𑀚𑁆𑀚𑀸𑀲𑀺 𑀤𑀓𑀭𑀓𑁆𑀔𑀺𑀦𑁄.

𑁨𑁪𑁧. 𑀘𑀭𑀺𑀬𑀸 𑀫𑀁 𑀅𑀬𑀁 [𑀘𑀭𑀺𑀬𑀸𑀬 𑀅𑀬𑀁 (𑀲𑀻. 𑀧𑀻.)] 𑀅𑀬𑁆𑀬𑁂, 𑀧𑀚𑀕𑁆𑀖𑀺𑀢𑁆𑀣𑁄 [𑀲𑀜𑁆𑀚𑀕𑁆𑀖𑀺𑀢𑁆𑀣𑁄 (𑀲𑁆𑀬𑀸.)] 𑀫𑀬𑀸 𑀲𑀳;

𑀅𑀚𑁆𑀚𑀸𑀧𑀺 𑀢𑁂𑀦 𑀯𑀡𑁆𑀡𑁂𑀦, 𑀅𑀢𑀺𑀯𑁂𑀮𑀁 𑀧𑀚𑀕𑁆𑀖𑀢𑀺.

𑁨𑁪𑁨. 𑀉𑀩𑁆𑀩𑀭𑀺𑀬𑀸𑀧𑀺𑀳𑀁 𑀅𑀬𑁆𑀬𑁂, 𑀫𑀦𑁆𑀢𑀬𑀸𑀫𑀺 𑀭𑀳𑁄𑀕𑀢𑁄;

𑀅𑀦𑀸𑀫𑀦𑁆𑀢𑁄 [𑀅𑀦𑀸𑀫𑀦𑁆𑀢𑀸 (𑀲𑀻.)] 𑀧𑀯𑀺𑀲𑀢𑀺, 𑀧𑀼𑀩𑁆𑀩𑁂 𑀅𑀧𑁆𑀧𑀝𑀺𑀯𑁂𑀤𑀺𑀢𑁄.

𑁨𑁪𑁩. 𑀮𑀤𑁆𑀥𑀤𑁆𑀯𑀸𑀭𑁄 [𑀮𑀤𑁆𑀥𑀯𑀸𑀭𑁄 (𑀲𑀻. 𑀧𑀻.)] 𑀓𑀢𑁄𑀓𑀸𑀲𑁄, 𑀅𑀳𑀺𑀭𑀺𑀓𑀁 𑀅𑀦𑀸𑀤𑀭𑀁;

𑀲𑀳𑀸𑀬𑀁 𑀢𑁂𑀦 𑀤𑁄𑀲𑁂𑀦, 𑀤𑀚𑁆𑀚𑀸𑀳𑀁 𑀤𑀓𑀭𑀓𑁆𑀔𑀺𑀦𑁄.

𑁨𑁪𑁪. 𑀓𑀼𑀲𑀮𑁄 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁, 𑀭𑀼𑀢𑀜𑁆𑀜𑀽 [𑀭𑀼𑀤𑀜𑁆𑀜𑀽 (𑀲𑀻. 𑀲𑁆𑀬𑀸. 𑀧𑀻.)] 𑀆𑀕𑀢𑀸𑀕𑀫𑁄;

𑀉𑀧𑁆𑀧𑀸𑀢𑁂 𑀲𑀼𑀧𑀺𑀦𑁂 𑀬𑀼𑀢𑁆𑀢𑁄, 𑀦𑀺𑀬𑁆𑀬𑀸𑀦𑁂 𑀘 𑀧𑀯𑁂𑀲𑀦𑁂.

𑁨𑁪𑁫. 𑀧𑀝𑁆𑀞𑁄 [𑀧𑀤𑁆𑀥𑁄 (𑀲𑀻. 𑀧𑀻.)] 𑀪𑀽𑀫𑀦𑁆𑀢𑀮𑀺𑀓𑁆𑀔𑀲𑁆𑀫𑀺𑀁, 𑀦𑀓𑁆𑀔𑀢𑁆𑀢𑀧𑀤𑀓𑁄𑀯𑀺𑀤𑁄;

𑀩𑁆𑀭𑀸𑀳𑁆𑀫𑀡𑀁 𑀓𑁂𑀦 𑀤𑁄𑀲𑁂𑀦, 𑀤𑀚𑁆𑀚𑀸𑀲𑀺 𑀤𑀓𑀭𑀓𑁆𑀔𑀺𑀦𑁄.

𑁨𑁪𑁬. 𑀧𑀭𑀺𑀲𑀸𑀬𑀫𑁆𑀧𑀺 𑀫𑁂 𑀅𑀬𑁆𑀬𑁂, 𑀉𑀫𑁆𑀫𑀻𑀮𑀺𑀢𑁆𑀯𑀸 𑀉𑀤𑀺𑀓𑁆𑀔𑀢𑀺;

𑀢𑀲𑁆𑀫𑀸 𑀅𑀘𑁆𑀘𑀪𑀫𑀼𑀁 𑀮𑀼𑀤𑁆𑀤𑀁, 𑀤𑀚𑁆𑀚𑀸𑀳𑀁 𑀤𑀓𑀭𑀓𑁆𑀔𑀺𑀦𑁄.

𑁨𑁪𑁭. 𑀲𑀲𑀫𑀼𑀤𑁆𑀤𑀧𑀭𑀺𑀬𑀸𑀬𑀁, 𑀫𑀳𑀺𑀁 𑀲𑀸𑀕𑀭𑀓𑀼𑀡𑁆𑀟𑀮𑀁;

𑀯𑀲𑀼𑀦𑁆𑀥𑀭𑀁 𑀆𑀯𑀲𑀲𑀺, 𑀅𑀫𑀘𑁆𑀘𑀧𑀭𑀺𑀯𑀸𑀭𑀺𑀢𑁄.

𑁨𑁪𑁮. 𑀘𑀸𑀢𑀼𑀭𑀦𑁆𑀢𑁄 𑀫𑀳𑀸𑀭𑀝𑁆𑀞𑁄, 𑀯𑀺𑀚𑀺𑀢𑀸𑀯𑀻 𑀫𑀳𑀩𑁆𑀩𑀮𑁄;

𑀧𑀣𑀩𑁆𑀬𑀸 𑀏𑀓𑀭𑀸𑀚𑀸𑀲𑀺, 𑀬𑀲𑁄 𑀢𑁂 𑀯𑀺𑀧𑀼𑀮𑀁 𑀕𑀢𑁄.

𑁨𑁪𑁯. 𑀲𑁄𑀴𑀲𑀺𑀢𑁆𑀣𑀺𑀲𑀳𑀲𑁆𑀲𑀸𑀦𑀺, 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸;

𑀦𑀸𑀦𑀸𑀚𑀦𑀧𑀤𑀸 𑀦𑀸𑀭𑀻, 𑀤𑁂𑀯𑀓𑀜𑁆𑀜𑀽𑀧𑀫𑀸 𑀲𑀼𑀪𑀸.

𑁨𑁫𑁦. 𑀏𑀯𑀁 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀁, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀁;

𑀲𑀼𑀔𑀺𑀢𑀸𑀦𑀁 𑀧𑀺𑀬𑀁 𑀤𑀻𑀖𑀁, 𑀚𑀻𑀯𑀺𑀢𑀁 𑀆𑀳𑀼 𑀔𑀢𑁆𑀢𑀺𑀬.

𑁨𑁫𑁧. 𑀅𑀣 𑀢𑁆𑀯𑀁 𑀓𑁂𑀦 𑀯𑀡𑁆𑀡𑁂𑀦, 𑀓𑁂𑀦 𑀯𑀸 𑀧𑀦 𑀳𑁂𑀢𑀼𑀦𑀸;

𑀧𑀡𑁆𑀟𑀺𑀢𑀁 𑀅𑀦𑀼𑀭𑀓𑁆𑀔𑀦𑁆𑀢𑁄, 𑀧𑀸𑀡𑀁 𑀘𑀚𑀲𑀺 𑀤𑀼𑀘𑁆𑀘𑀚𑀁.

𑁨𑁫𑁨. 𑀬𑀢𑁄𑀧𑀺 𑀆𑀕𑀢𑁄 𑀅𑀬𑁆𑀬𑁂, 𑀫𑀫 𑀳𑀢𑁆𑀣𑀁 𑀫𑀳𑁄𑀲𑀥𑁄;

𑀦𑀸𑀪𑀺𑀚𑀸𑀦𑀸𑀫𑀺 𑀥𑀻𑀭𑀲𑁆𑀲, 𑀅𑀦𑀼𑀫𑀢𑁆𑀢𑀫𑁆𑀧𑀺 𑀤𑀼𑀓𑁆𑀓𑀝𑀁.

𑁨𑁫𑁩. 𑀲𑀘𑁂 𑀘 𑀓𑀺𑀲𑁆𑀫𑀺𑀘𑀺 𑀓𑀸𑀮𑁂, 𑀫𑀭𑀡𑀁 𑀫𑁂 𑀧𑀼𑀭𑁂 𑀲𑀺𑀬𑀸;

𑀲𑁄 𑀫𑁂 𑀧𑀼𑀢𑁆𑀢𑁂 [𑀧𑀼𑀢𑁆𑀢𑁂 𑀘 𑀫𑁂 (𑀲𑀻. 𑀲𑁆𑀬𑀸. 𑀧𑀻.] 𑀧𑀧𑀼𑀢𑁆𑀢𑁂 𑀘, 𑀲𑀼𑀔𑀸𑀧𑁂𑀬𑁆𑀬 𑀫𑀳𑁄𑀲𑀥𑁄.

𑁨𑁫𑁪. 𑀅𑀦𑀸𑀕𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀲𑀩𑁆𑀩𑀫𑀢𑁆𑀣𑀫𑁆𑀧𑀺 𑀧𑀲𑁆𑀲𑀢𑀺 [𑀲𑀩𑁆𑀩𑀫𑀢𑁆𑀣𑀁 𑀯𑀺𑀧𑀲𑁆𑀲𑀢𑀺 (𑀲𑀻. 𑀲𑁆𑀬𑀸. 𑀧𑀻.)];

𑀅𑀦𑀸𑀧𑀭𑀸𑀥𑀓𑀫𑁆𑀫𑀦𑁆𑀢𑀁, 𑀦 𑀤𑀚𑁆𑀚𑀁 𑀤𑀓𑀭𑀓𑁆𑀔𑀺𑀦𑁄.

𑁨𑁫𑁫. 𑀇𑀤𑀁 𑀲𑀼𑀡𑀸𑀣 𑀧𑀜𑁆𑀘𑀸𑀮𑀸, 𑀘𑀽𑀴𑀦𑁂𑀬𑁆𑀬𑀲𑁆𑀲 [𑀘𑀽𑀴𑀦𑀻𑀬𑀲𑁆𑀲 (𑀲𑀻.)] 𑀪𑀸𑀲𑀺𑀢𑀁;

𑀧𑀡𑁆𑀟𑀺𑀢𑀁 𑀅𑀦𑀼𑀭𑀓𑁆𑀔𑀦𑁆𑀢𑁄, 𑀧𑀸𑀡𑀁 𑀘𑀚𑀢𑀺 𑀤𑀼𑀘𑁆𑀘𑀚𑀁.

𑁨𑁫𑁬. 𑀫𑀸𑀢𑀼 𑀪𑀭𑀺𑀬𑀸𑀬 𑀪𑀸𑀢𑀼𑀘𑁆𑀘, 𑀲𑀔𑀺𑀦𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘;

𑀅𑀢𑁆𑀢𑀦𑁄 𑀘𑀸𑀧𑀺 𑀧𑀜𑁆𑀘𑀸𑀮𑁄, 𑀙𑀦𑁆𑀦𑀁 𑀘𑀚𑀢𑀺 𑀚𑀻𑀯𑀺𑀢𑀁.

𑁨𑁫𑁭. 𑀏𑀯𑀁 𑀫𑀳𑀢𑁆𑀣𑀺𑀓𑀸 [𑀔𑀳𑀺𑀤𑁆𑀥𑀺𑀬𑀸 (𑀲𑁆𑀬𑀸.), 𑀫𑀳𑀺𑀤𑁆𑀥𑀺𑀓𑀸 (𑀓.)] 𑀧𑀜𑁆𑀜𑀸, 𑀦𑀺𑀧𑀼𑀡𑀸 𑀲𑀸𑀥𑀼𑀘𑀺𑀦𑁆𑀢𑀺𑀦𑀻;

𑀤𑀺𑀝𑁆𑀞𑀥𑀫𑁆𑀫𑀳𑀺𑀢𑀢𑁆𑀣𑀸𑀬, 𑀲𑀫𑁆𑀧𑀭𑀸𑀬𑀲𑀼𑀔𑀸𑀬 𑀘𑀸𑀢𑀺.

𑀤𑀓𑀭𑀓𑁆𑀔𑀲𑀚𑀸𑀢𑀓𑀁 𑀲𑀢𑁆𑀢𑀫𑀁.