𑁫𑁧𑁬. 𑀫𑀳𑀸𑀓𑀧𑀺𑀚𑀸𑀢𑀓𑀁 (𑁬)

𑁧𑁭𑁮. 𑀩𑀸𑀭𑀸𑀡𑀲𑁆𑀬𑀁 [𑀩𑀸𑀭𑀸𑀡𑀲𑁆𑀲𑀁 (𑀲𑀻. 𑀧𑀻.)] 𑀅𑀳𑀽 𑀭𑀸𑀚𑀸, 𑀓𑀸𑀲𑀻𑀦𑀁 𑀭𑀝𑁆𑀞𑀯𑀟𑁆𑀠𑀦𑁄;

𑀫𑀺𑀢𑁆𑀢𑀸𑀫𑀘𑁆𑀘𑀧𑀭𑀺𑀩𑁆𑀬𑀽𑀴𑁆𑀳𑁄, 𑀅𑀕𑀫𑀸𑀲𑀺 𑀫𑀺𑀕𑀸𑀚𑀺𑀦𑀁 [𑀫𑀺𑀕𑀸𑀚𑀺𑀭𑀁 (𑀲𑀻.), 𑀫𑀺𑀕𑀸𑀘𑀺𑀭𑀁 (𑀧𑀻.)].

𑁧𑁭𑁯. 𑀢𑀢𑁆𑀣 𑀩𑁆𑀭𑀸𑀳𑁆𑀫𑀡𑀫𑀤𑁆𑀤𑀓𑁆𑀔𑀺, 𑀲𑁂𑀢𑀁 𑀘𑀺𑀢𑁆𑀭𑀁 𑀓𑀺𑀮𑀸𑀲𑀺𑀦𑀁;

𑀯𑀺𑀤𑁆𑀥𑀲𑁆𑀢𑀁 𑀓𑁄𑀯𑀺𑀴𑀸𑀭𑀁𑀯, 𑀓𑀺𑀲𑀁 𑀥𑀫𑀦𑀺𑀲𑀦𑁆𑀣𑀢𑀁.

𑁧𑁮𑁦. 𑀧𑀭𑀫𑀓𑀸𑀭𑀼𑀜𑁆𑀜𑀢𑀁 𑀧𑀢𑁆𑀢𑀁, 𑀤𑀺𑀲𑁆𑀯𑀸 𑀓𑀺𑀘𑁆𑀙𑀕𑀢𑀁 𑀦𑀭𑀁;

𑀅𑀯𑀘 𑀩𑁆𑀬𑀫𑁆𑀳𑀺𑀢𑁄 𑀭𑀸𑀚𑀸, ‘‘𑀬𑀓𑁆𑀔𑀸𑀦𑀁 𑀓𑀢𑀫𑁄 𑀦𑀼𑀲𑀺.

𑁧𑁮𑁧. ‘‘𑀳𑀢𑁆𑀣𑀧𑀸𑀤𑀸 𑀘 𑀢𑁂 𑀲𑁂𑀢𑀸, 𑀢𑀢𑁄 𑀲𑁂𑀢𑀢𑀭𑀁 [𑀲𑁂𑀢𑀢𑀭𑁄 (𑀧𑀻.)] 𑀲𑀺𑀭𑁄;

𑀕𑀢𑁆𑀢𑀁 𑀓𑀫𑁆𑀫𑀸𑀲𑀯𑀡𑁆𑀡𑀁 𑀢𑁂, 𑀓𑀺𑀮𑀸𑀲𑀩𑀳𑀼𑀮𑁄 𑀘𑀲𑀺.

𑁧𑁮𑁨. ‘‘𑀯𑀝𑁆𑀝𑀦𑀸𑀯𑀴𑀺 [𑀯𑀝𑁆𑀞𑀦𑀸𑀯𑀮𑀺 (𑀧𑀻.)] 𑀲𑀗𑁆𑀓𑀸𑀲𑀸, 𑀧𑀺𑀝𑁆𑀞𑀺 𑀢𑁂 𑀦𑀺𑀦𑁆𑀦𑀢𑀼𑀦𑁆𑀦𑀢𑀸;

𑀓𑀸𑀴𑀧𑀩𑁆𑀩𑀸𑀯 [𑀓𑀸𑀴𑀧𑀩𑁆𑀩𑀸 𑀘 (𑀲𑁆𑀬𑀸.), 𑀓𑀸𑀴𑀸 𑀧𑀩𑁆𑀩𑀸 𑀘 (𑀧𑀻.)] 𑀢𑁂 𑀅𑀗𑁆𑀕𑀸, 𑀦𑀸𑀜𑁆𑀜𑀁 𑀧𑀲𑁆𑀲𑀸𑀫𑀺 𑀏𑀤𑀺𑀲𑀁.

𑁧𑁮𑁩. ‘‘𑀉𑀕𑁆𑀖𑀝𑁆𑀝𑀧𑀸𑀤𑁄 𑀢𑀲𑀺𑀢𑁄, 𑀓𑀺𑀲𑁄 𑀥𑀫𑀦𑀺𑀲𑀦𑁆𑀣𑀢𑁄;

𑀙𑀸𑀢𑁄 𑀆𑀢𑀢𑁆𑀢𑀭𑀽𑀧𑁄𑀲𑀺 [𑀆𑀤𑀺𑀢𑁆𑀢𑀭𑀽𑀧𑁄𑀲𑀺 (𑀓.), 𑀅𑀢𑀺𑀢𑁆𑀢𑀭𑀽𑀧𑁄𑀲𑀺 (𑀲𑁆𑀬𑀸. 𑀓. 𑀅𑀝𑁆𑀞.)], 𑀓𑀼𑀢𑁄𑀲𑀺 𑀓𑀢𑁆𑀣 𑀕𑀘𑁆𑀙𑀲𑀺.

𑁧𑁮𑁪. ‘‘𑀤𑀼𑀤𑁆𑀤𑀲𑀻 𑀅𑀧𑁆𑀧𑀓𑀸𑀭𑁄𑀲𑀺, 𑀤𑀼𑀩𑁆𑀩𑀡𑁆𑀡𑁄 𑀪𑀻𑀫𑀤𑀲𑁆𑀲𑀦𑁄;

𑀚𑀦𑁂𑀢𑁆𑀢𑀺 𑀬𑀸𑀧𑀺 𑀢𑁂 𑀫𑀸𑀢𑀸, 𑀦 𑀢𑀁 𑀇𑀘𑁆𑀙𑁂𑀬𑁆𑀬 𑀧𑀲𑁆𑀲𑀺𑀢𑀼𑀁.

𑁧𑁮𑁫. ‘‘𑀓𑀺𑀁 𑀓𑀫𑁆𑀫𑀫𑀓𑀭𑀁 [𑀓𑀫𑁆𑀫𑀫𑀓𑀭𑀸 (𑀲𑀻. 𑀲𑁆𑀬𑀸. 𑀧𑀻.)] 𑀧𑀼𑀩𑁆𑀩𑁂, 𑀓𑀁 𑀅𑀯𑀚𑁆𑀛𑀁 𑀅𑀖𑀸𑀢𑀬𑀺;

𑀓𑀺𑀩𑁆𑀩𑀺𑀲𑀁 𑀬𑀁 𑀓𑀭𑀺𑀢𑁆𑀯𑀸𑀦, 𑀇𑀤𑀁 𑀤𑀼𑀓𑁆𑀔𑀁 𑀉𑀧𑀸𑀕𑀫𑀺’’.

𑁧𑁮𑁬. 𑀢𑀕𑁆𑀖 𑀢𑁂 𑀅𑀳𑀫𑀓𑁆𑀔𑀺𑀲𑁆𑀲𑀁, 𑀬𑀣𑀸𑀧𑀺 𑀓𑀼𑀲𑀮𑁄 𑀢𑀣𑀸;

𑀲𑀘𑁆𑀘𑀯𑀸𑀤𑀺𑀜𑁆𑀳𑀺 𑀮𑁄𑀓𑀲𑁆𑀫𑀺𑀁, 𑀧𑀲𑀁𑀲𑀦𑁆𑀢𑀻𑀥 𑀧𑀡𑁆𑀟𑀺𑀢𑀸.

𑁧𑁮𑁭. 𑀏𑀓𑁄 𑀘𑀭𑀁 𑀕𑁄𑀕𑀯𑁂𑀲𑁄, 𑀫𑀽𑀴𑁆𑀳𑁄 𑀅𑀘𑁆𑀘𑀲𑀭𑀺𑀁 𑀯𑀦𑁂;

𑀅𑀭𑀜𑁆𑀜𑁂 𑀇𑀭𑀻𑀡𑁂 [𑀈𑀭𑀺𑀡𑁂 (𑀲𑀻. 𑀲𑁆𑀬𑀸. 𑀧𑀻.)] 𑀯𑀺𑀯𑀦𑁂, 𑀦𑀸𑀦𑀸𑀓𑀼𑀜𑁆𑀚𑀭𑀲𑁂𑀯𑀺𑀢𑁂.

𑁧𑁮𑁮. 𑀯𑀸𑀴𑀫𑀺𑀕𑀸𑀦𑀼𑀘𑀭𑀺𑀢𑁂, 𑀯𑀺𑀧𑁆𑀧𑀦𑀝𑁆𑀞𑁄𑀲𑁆𑀫𑀺 𑀓𑀸𑀦𑀦𑁂;

𑀅𑀘𑀭𑀺𑀁 𑀢𑀢𑁆𑀣 𑀲𑀢𑁆𑀢𑀸𑀳𑀁, 𑀔𑀼𑀧𑁆𑀧𑀺𑀧𑀸𑀲 [𑀔𑀼𑀧𑁆𑀧𑀺𑀧𑀸𑀲𑀸 (𑀲𑀻. 𑀧𑀻.)] 𑀲𑀫𑀧𑁆𑀧𑀺𑀢𑁄.

𑁧𑁮𑁯. 𑀢𑀢𑁆𑀣 𑀢𑀺𑀦𑁆𑀤𑀼𑀓𑀫𑀤𑁆𑀤𑀓𑁆𑀔𑀺𑀁, 𑀯𑀺𑀲𑀫𑀝𑁆𑀞𑀁 𑀩𑀼𑀪𑀼𑀓𑁆𑀔𑀺𑀢𑁄;

𑀧𑀧𑀸𑀢𑀫𑀪𑀺𑀮𑀫𑁆𑀩𑀦𑁆𑀢𑀁, 𑀲𑀫𑁆𑀧𑀦𑁆𑀦𑀨𑀮𑀥𑀸𑀭𑀺𑀦𑀁.

𑁧𑁯𑁦. 𑀯𑀸𑀢𑀲𑁆𑀲𑀺𑀢𑀸𑀦𑀺 𑀪𑀓𑁆𑀔𑁂𑀲𑀺𑀁, 𑀢𑀸𑀦𑀺 𑀭𑀼𑀘𑁆𑀘𑀺𑀁𑀲𑀼 𑀫𑁂 𑀪𑀼𑀲𑀁;

𑀅𑀢𑀺𑀢𑁆𑀢𑁄 𑀭𑀼𑀓𑁆𑀔𑀫𑀸𑀭𑀽𑀳𑀺𑀁 [𑀫𑀸𑀭𑀼𑀬𑁆𑀳 (𑀲𑀻. 𑀲𑁆𑀬𑀸.)], 𑀢𑀢𑁆𑀣 𑀳𑁂𑀲𑁆𑀲𑀸𑀫𑀺 𑀆𑀲𑀺𑀢𑁄.

𑁧𑁯𑁧. 𑀏𑀓𑀁 𑀫𑁂 𑀪𑀓𑁆𑀔𑀺𑀢𑀁 𑀆𑀲𑀺, 𑀤𑀼𑀢𑀺𑀬𑀁 𑀅𑀪𑀺𑀧𑀢𑁆𑀣𑀺𑀢𑀁;

𑀢𑀢𑁄 𑀲𑀸 𑀪𑀜𑁆𑀚𑀣 𑀲𑀸𑀔𑀸, 𑀙𑀺𑀦𑁆𑀦𑀸 𑀨𑀭𑀲𑀼𑀦𑀸 𑀯𑀺𑀬.

𑁧𑁯𑁨. 𑀲𑁄𑀳𑀁 𑀲𑀳𑀸𑀯 𑀲𑀸𑀔𑀸𑀳𑀺, 𑀉𑀤𑁆𑀥𑀁𑀧𑀸𑀤𑁄 𑀅𑀯𑀁𑀲𑀺𑀭𑁄;

𑀅𑀧𑁆𑀧𑀢𑀺𑀝𑁆𑀞𑁂 𑀅𑀦𑀸𑀮𑀫𑁆𑀩𑁂, 𑀕𑀺𑀭𑀺𑀤𑀼𑀕𑁆𑀕𑀲𑁆𑀫𑀺 𑀧𑀸𑀧𑀢𑀁.

𑁧𑁯𑁩. 𑀬𑀲𑁆𑀫𑀸 𑀘 𑀯𑀸𑀭𑀺 𑀕𑀫𑁆𑀪𑀻𑀭𑀁, 𑀢𑀲𑁆𑀫𑀸 𑀦 𑀲𑀫𑀧𑀚𑁆𑀚𑀺𑀲𑀁 [𑀲𑀫𑀧𑀚𑁆𑀚𑀲𑀺𑀁 (𑀲𑀻.), 𑀲𑀫𑀪𑀚𑁆𑀚𑀺𑀲𑀁 (𑀧𑀻.)];

𑀢𑀢𑁆𑀣 𑀲𑁂𑀲𑀺𑀁 𑀦𑀺𑀭𑀸𑀦𑀦𑁆𑀤𑁄, 𑀅𑀦𑀽𑀦𑀸 [𑀅𑀦𑀸𑀣𑁄 (𑀲𑀻.)] 𑀤𑀲 𑀭𑀢𑁆𑀢𑀺𑀬𑁄.

𑁧𑁯𑁪. 𑀅𑀣𑁂𑀢𑁆𑀣 𑀓𑀧𑀺 𑀫𑀸𑀕𑀜𑁆𑀙𑀺 [𑀫𑀸𑀕𑀘𑁆𑀙𑀺 (𑀲𑁆𑀬𑀸. 𑀓.)], 𑀕𑁄𑀦𑀗𑁆𑀕𑀼𑀮𑁄 𑀤𑀭𑀻𑀘𑀭𑁄;

𑀲𑀸𑀔𑀸𑀳𑀺 𑀲𑀸𑀔𑀁 𑀯𑀺𑀘𑀭𑀦𑁆𑀢𑁄, 𑀔𑀸𑀤𑀫𑀸𑀦𑁄 𑀤𑀼𑀫𑀧𑁆𑀨𑀮𑀁.

𑁧𑁯𑁫. 𑀲𑁄 𑀫𑀁 𑀤𑀺𑀲𑁆𑀯𑀸 𑀓𑀺𑀲𑀁 𑀧𑀡𑁆𑀟𑀼𑀁, 𑀓𑀸𑀭𑀼𑀜𑁆𑀜𑀫𑀓𑀭𑀁 𑀫𑀬𑀺;

𑀅𑀫𑁆𑀪𑁄 𑀓𑁄 𑀦𑀸𑀫 𑀲𑁄 𑀏𑀢𑁆𑀣, 𑀏𑀯𑀁 𑀤𑀼𑀓𑁆𑀔𑁂𑀦 𑀅𑀝𑁆𑀝𑀺𑀢𑁄.

𑁧𑁯𑁬. 𑀫𑀦𑀼𑀲𑁆𑀲𑁄 𑀅𑀫𑀦𑀼𑀲𑁆𑀲𑁄 𑀯𑀸, 𑀅𑀢𑁆𑀢𑀸𑀦𑀁 𑀫𑁂 𑀧𑀯𑁂𑀤𑀬;

𑀢𑀲𑁆𑀲𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁.

𑁧𑁯𑁭. 𑀫𑀦𑀼𑀲𑁆𑀲𑁄𑀳𑀁 𑀩𑁆𑀬𑀲𑀫𑁆𑀧𑀢𑁆𑀢𑁄 [𑀯𑀲𑀫𑁆𑀧𑀢𑁆𑀢𑁄 (𑀲𑁆𑀬𑀸. 𑀓.)], 𑀲𑀸 𑀫𑁂 𑀦𑀢𑁆𑀣𑀺 𑀇𑀢𑁄 𑀕𑀢𑀺;

𑀢𑀁 𑀯𑁄 𑀯𑀤𑀸𑀫𑀺 𑀪𑀤𑁆𑀤𑀁 𑀯𑁄, 𑀢𑁆𑀯𑀜𑁆𑀘 𑀫𑁂 𑀲𑀭𑀡𑀁 𑀪𑀯.

𑁧𑁯𑁮. 𑀕𑀭𑀼𑀁 [𑀕𑀭𑀼 (𑀲𑀻. 𑀧𑀻.)] 𑀲𑀺𑀮𑀁 𑀕𑀳𑁂𑀢𑁆𑀯𑀸𑀦, 𑀯𑀺𑀘𑀭𑀻 [𑀯𑀺𑀘𑀭𑀺 (𑀧𑀻.)] 𑀧𑀩𑁆𑀩𑀢𑁂 𑀓𑀧𑀺;

𑀲𑀺𑀮𑀸𑀬 𑀬𑁄𑀕𑁆𑀕𑀁 𑀓𑀢𑁆𑀯𑀸𑀦, 𑀦𑀺𑀲𑀪𑁄 𑀏𑀢𑀤𑀩𑁆𑀭𑀯𑀺.

𑁧𑁯𑁯. 𑀏𑀳𑀺 𑀫𑁂 𑀧𑀺𑀝𑁆𑀞𑀺𑀫𑀸𑀭𑀼𑀬𑁆𑀳, 𑀕𑀻𑀯𑀁 𑀕𑀡𑁆𑀳𑀸𑀳𑀺 𑀩𑀸𑀳𑀼𑀪𑀺;

𑀅𑀳𑀁 𑀢𑀁 𑀉𑀤𑁆𑀥𑀭𑀺𑀲𑁆𑀲𑀸𑀫𑀺, 𑀕𑀺𑀭𑀺𑀤𑀼𑀕𑁆𑀕𑀢 𑀯𑁂𑀕𑀲𑀸.

𑁨𑁦𑁦. 𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀯𑀸𑀦𑀭𑀺𑀦𑁆𑀤𑀲𑁆𑀲 𑀲𑀺𑀭𑀻𑀫𑀢𑁄;

𑀧𑀺𑀝𑁆𑀞𑀺𑀫𑀸𑀭𑀼𑀬𑁆𑀳 𑀥𑀻𑀭𑀲𑁆𑀲, 𑀕𑀻𑀯𑀁 𑀩𑀸𑀳𑀸𑀳𑀺 𑀅𑀕𑁆𑀕𑀳𑀺𑀁.

𑁨𑁦𑁧. 𑀲𑁄 𑀫𑀁 𑀢𑀢𑁄 𑀲𑀫𑀼𑀝𑁆𑀞𑀸𑀲𑀺, 𑀢𑁂𑀚𑀲𑁆𑀲𑀻 [𑀢𑁂𑀚𑀲𑀻 (𑀲𑁆𑀬𑀸. 𑀧𑀻. 𑀓.)] 𑀩𑀮𑀯𑀸 𑀓𑀧𑀺;

𑀯𑀺𑀳𑀜𑁆𑀜𑀫𑀸𑀦𑁄 𑀓𑀺𑀘𑁆𑀙𑁂𑀦, 𑀕𑀺𑀭𑀺𑀤𑀼𑀕𑁆𑀕𑀢 𑀯𑁂𑀕𑀲𑀸.

𑁨𑁦𑁨. 𑀉𑀤𑁆𑀥𑀭𑀺𑀢𑁆𑀯𑀸𑀦 𑀫𑀁 𑀲𑀦𑁆𑀢𑁄, 𑀦𑀺𑀲𑀪𑁄 𑀏𑀢𑀤𑀩𑁆𑀭𑀯𑀺;

𑀇𑀗𑁆𑀖 𑀫𑀁 𑀲𑀫𑁆𑀫 𑀭𑀓𑁆𑀔𑀲𑁆𑀲𑀼, 𑀧𑀲𑁆𑀲𑀼𑀧𑀺𑀲𑁆𑀲𑀁 𑀫𑀼𑀳𑀼𑀢𑁆𑀢𑀓𑀁.

𑁨𑁦𑁩. 𑀲𑀻𑀳𑀸 𑀩𑁆𑀬𑀕𑁆𑀖𑀸 𑀘 𑀤𑀻𑀧𑀻 𑀘, 𑀅𑀘𑁆𑀙𑀓𑁄𑀓𑀢𑀭𑀘𑁆𑀙𑀬𑁄;

𑀢𑁂 𑀫𑀁 𑀧𑀫𑀢𑁆𑀢𑀁 𑀳𑀺𑀁𑀲𑁂𑀬𑁆𑀬𑀼𑀁, 𑀢𑁂 𑀢𑁆𑀯𑀁 𑀤𑀺𑀲𑁆𑀯𑀸 𑀦𑀺𑀯𑀸𑀭𑀬 [𑀤𑀺𑀲𑁆𑀯𑀸𑀦 𑀯𑀸𑀭𑀬 (𑀧𑀻.)].

𑁨𑁦𑁪. 𑀏𑀯𑀁 𑀫𑁂 𑀧𑀭𑀺𑀢𑁆𑀢𑀸𑀢𑀽𑀦 [𑀧𑀭𑀺𑀢𑁆𑀢𑀸𑀢𑀼𑀦 (𑀓.)], 𑀧𑀲𑁆𑀲𑀼𑀧𑀺 𑀲𑁄 𑀫𑀼𑀳𑀼𑀢𑁆𑀢𑀓𑀁;

𑀢𑀤𑀸𑀳𑀁 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺𑀁, 𑀧𑀝𑀺𑀮𑀘𑁆𑀙𑀺𑀁 𑀅𑀬𑁄𑀦𑀺𑀲𑁄.

𑁨𑁦𑁫. 𑀪𑀓𑁆𑀔𑁄 𑀅𑀬𑀁 𑀫𑀦𑀼𑀲𑁆𑀲𑀸𑀦𑀁, 𑀬𑀣𑀸 𑀘𑀜𑁆𑀜𑁂 𑀯𑀦𑁂 𑀫𑀺𑀕𑀸;

𑀬𑀁 𑀦𑀽𑀦𑀺𑀫𑀁 𑀯𑀥𑀺𑀢𑁆𑀯𑀸𑀦, 𑀙𑀸𑀢𑁄 𑀔𑀸𑀤𑁂𑀬𑁆𑀬 𑀯𑀸𑀦𑀭𑀁.

𑁨𑁦𑁬. 𑀅𑀲𑀺𑀢𑁄 [𑀆𑀲𑀺𑀓𑁄 (𑀧𑀻.)] 𑀘 𑀕𑀫𑀺𑀲𑁆𑀲𑀸𑀫𑀺, 𑀫𑀁𑀲𑀫𑀸𑀤𑀸𑀬 𑀲𑀫𑁆𑀩𑀮𑀁;

𑀓𑀦𑁆𑀢𑀸𑀭𑀁 𑀦𑀺𑀢𑁆𑀣𑀭𑀺𑀲𑁆𑀲𑀸𑀫𑀺, 𑀧𑀸𑀣𑁂𑀬𑁆𑀬𑀁 𑀫𑁂 𑀪𑀯𑀺𑀲𑁆𑀲𑀢𑀺.

𑁨𑁦𑁭. 𑀢𑀢𑁄 𑀲𑀺𑀮𑀁 𑀕𑀳𑁂𑀢𑁆𑀯𑀸𑀦, 𑀫𑀢𑁆𑀣𑀓𑀁 𑀲𑀦𑁆𑀦𑀺𑀢𑀸𑀴𑀬𑀺𑀁;

𑀫𑀫 𑀕𑀢𑁆𑀢 [𑀪𑀢𑁆𑀢 (𑀲𑀻. 𑀲𑁆𑀬𑀸.), 𑀳𑀢𑁆𑀣 (𑀧𑀻.)] 𑀓𑀺𑀮𑀦𑁆𑀢𑀲𑁆𑀲, 𑀧𑀳𑀸𑀭𑁄 𑀤𑀼𑀩𑁆𑀩𑀮𑁄 𑀅𑀳𑀼.

𑁨𑁦𑁮. 𑀲𑁄 𑀘 𑀯𑁂𑀕𑁂𑀦𑀼𑀤𑀧𑁆𑀧𑀢𑁆𑀢𑁄, 𑀓𑀧𑀺 𑀭𑀼𑀳𑀺𑀭 [𑀭𑀼𑀥𑀺𑀭 (𑀲𑀻.)] 𑀫𑀓𑁆𑀔𑀺𑀢𑁄;

𑀅𑀲𑁆𑀲𑀼𑀧𑀼𑀡𑁆𑀡𑁂𑀳𑀺 𑀦𑁂𑀢𑁆𑀢𑁂𑀳𑀺, 𑀭𑁄𑀤𑀦𑁆𑀢𑁄 𑀫𑀁 𑀉𑀤𑀺𑀓𑁆𑀔𑀢𑀺.

𑁨𑁦𑁯. 𑀫𑀸𑀬𑁆𑀬𑁄𑀫𑀁 𑀓𑀭𑀺 𑀪𑀤𑁆𑀤𑀦𑁆𑀢𑁂, 𑀢𑁆𑀯𑀜𑁆𑀘 𑀦𑀸𑀫𑁂𑀤𑀺𑀲𑀁 𑀓𑀭𑀺;

𑀢𑁆𑀯𑀜𑁆𑀘 𑀔𑁄 𑀦𑀸𑀫 𑀤𑀻𑀖𑀸𑀯𑀼 [𑀤𑀻𑀖𑀸𑀬𑀼 (𑀧𑀻.)], 𑀅𑀜𑁆𑀜𑁂 [𑀅𑀜𑁆𑀜𑀁 (𑀧𑀻.)] 𑀯𑀸𑀭𑁂𑀢𑀼𑀫𑀭𑀳𑀲𑀺.

𑁨𑁧𑁦. 𑀅𑀳𑁄 𑀯𑀢 𑀭𑁂 𑀧𑀼𑀭𑀺𑀲, 𑀢𑀸𑀯 𑀤𑀼𑀓𑁆𑀓𑀭𑀓𑀸𑀭𑀓;

𑀏𑀤𑀺𑀲𑀸 𑀯𑀺𑀲𑀫𑀸 𑀤𑀼𑀕𑁆𑀕𑀸, 𑀧𑀧𑀸𑀢𑀸 𑀉𑀤𑁆𑀥𑀢𑁄 [𑀉𑀤𑁆𑀥𑀝𑁄 (𑀧𑀻.)] 𑀫𑀬𑀸.

𑁨𑁧𑁧. 𑀆𑀦𑀻𑀢𑁄 𑀧𑀭𑀮𑁄𑀓𑀸𑀯, 𑀤𑀼𑀩𑁆𑀪𑁂𑀬𑁆𑀬𑀁 𑀫𑀁 𑀅𑀫𑀜𑁆𑀜𑀣;

𑀢𑀁 𑀢𑁂𑀦 𑀧𑀸𑀧𑀥𑀫𑁆𑀫𑁂𑀦, 𑀧𑀸𑀧𑀁 𑀧𑀸𑀧𑁂𑀦 𑀘𑀺𑀦𑁆𑀢𑀺𑀢𑀁.

𑁨𑁧𑁨. 𑀫𑀸 𑀳𑁂𑀯 𑀢𑁆𑀯𑀁 𑀅𑀥𑀫𑁆𑀫𑀝𑁆𑀞, 𑀯𑁂𑀤𑀦𑀁 𑀓𑀝𑀼𑀓𑀁 𑀨𑀼𑀲𑀺;

𑀫𑀸 𑀳𑁂𑀯 𑀧𑀸𑀧𑀓𑀫𑁆𑀫𑀁 𑀢𑀁, 𑀨𑀮𑀁 𑀯𑁂𑀴𑀼𑀁𑀯 𑀢𑀁 𑀯𑀥𑀺.

𑁨𑁧𑁩. 𑀢𑀬𑀺𑀫𑁂 𑀦𑀢𑁆𑀣𑀺 𑀯𑀺𑀲𑁆𑀲𑀸𑀲𑁄, 𑀧𑀸𑀧𑀥𑀫𑁆𑀫 𑀅𑀲𑀜𑁆𑀜𑀢 [𑀧𑀸𑀧𑀥𑀫𑁆𑀫𑀁 𑀅𑀫𑀜𑁆𑀜𑀣 (𑀧𑀻.)];

𑀏𑀳𑀺 𑀫𑁂 𑀧𑀺𑀝𑁆𑀞𑀺𑀢𑁄 𑀕𑀘𑁆𑀙, 𑀤𑀺𑀲𑁆𑀲𑀫𑀸𑀦𑁄𑀯 𑀲𑀦𑁆𑀢𑀺𑀓𑁂.

𑁨𑁧𑁪. 𑀫𑀼𑀢𑁆𑀢𑁄𑀲𑀺 𑀳𑀢𑁆𑀣𑀸 𑀯𑀸𑀴𑀸𑀦𑀁, 𑀧𑀢𑁆𑀢𑁄𑀲𑀺 𑀫𑀸𑀦𑀼𑀲𑀺𑀁 𑀧𑀤𑀁;

𑀏𑀲 𑀫𑀕𑁆𑀕𑁄 𑀅𑀥𑀫𑁆𑀫𑀝𑁆𑀞, 𑀢𑁂𑀦 𑀕𑀘𑁆𑀙 𑀬𑀣𑀸𑀲𑀼𑀔𑀁.

𑁨𑁧𑁫. 𑀇𑀤𑀁 𑀯𑀢𑁆𑀯𑀸 𑀕𑀺𑀭𑀺𑀘𑀭𑁄, 𑀭𑀳𑀤𑁂 [𑀭𑀼𑀳𑀺𑀭𑀁 (𑀲𑁆𑀬𑀸. 𑀓.)] 𑀧𑀓𑁆𑀔𑀮𑁆𑀬 𑀫𑀢𑁆𑀣𑀓𑀁;

𑀅𑀲𑁆𑀲𑀽𑀦𑀺 𑀲𑀫𑁆𑀧𑀫𑀚𑁆𑀚𑀺𑀢𑁆𑀯𑀸, 𑀢𑀢𑁄 𑀧𑀩𑁆𑀩𑀢𑀫𑀸𑀭𑀼𑀳𑀺.

𑁨𑁧𑁬. 𑀲𑁄𑀳𑀁 𑀢𑁂𑀦𑀸𑀪𑀺𑀲𑀢𑁆𑀢𑁄𑀲𑁆𑀫𑀺, 𑀧𑀭𑀺𑀴𑀸𑀳𑁂𑀦 𑀅𑀝𑁆𑀝𑀺𑀢𑁄;

𑀟𑀬𑁆𑀳𑀫𑀸𑀦𑁂𑀦 𑀕𑀢𑁆𑀢𑁂𑀦, 𑀯𑀸𑀭𑀺𑀁 𑀧𑀸𑀢𑀼𑀁 𑀉𑀧𑀸𑀕𑀫𑀺𑀁.

𑁨𑁧𑁭. 𑀅𑀕𑁆𑀕𑀺𑀦𑀸 𑀯𑀺𑀬 𑀲𑀦𑁆𑀢𑀢𑁆𑀢𑁄, 𑀭𑀳𑀤𑁄 𑀭𑀼𑀳𑀺𑀭𑀫𑀓𑁆𑀔𑀺𑀢𑁄;

𑀧𑀼𑀩𑁆𑀩𑀮𑁄𑀳𑀺𑀢𑀲𑀗𑁆𑀓𑀸𑀲𑁄, 𑀲𑀩𑁆𑀩𑁄 𑀫𑁂 𑀲𑀫𑀧𑀚𑁆𑀚𑀣.

𑁨𑁧𑁮. 𑀬𑀸𑀯𑀦𑁆𑀢𑁄 𑀉𑀤𑀩𑀺𑀦𑁆𑀤𑀽𑀦𑀺, 𑀓𑀸𑀬𑀲𑁆𑀫𑀺𑀁 𑀦𑀺𑀧𑀢𑀺𑀁𑀲𑀼 𑀫𑁂;

𑀢𑀸𑀯𑀦𑁆𑀢𑁄 𑀕𑀡𑁆𑀟 [𑀕𑀡𑁆𑀟𑀽 (𑀲𑀻. 𑀧𑀻.), 𑀕𑀡𑁆𑀟𑀼 (𑀲𑁆𑀬𑀸.)] 𑀚𑀸𑀬𑁂𑀣, 𑀅𑀤𑁆𑀥𑀩𑁂𑀮𑀼𑀯𑀲𑀸𑀤𑀺𑀲𑀸.

𑁨𑁧𑁯. 𑀧𑀪𑀺𑀦𑁆𑀦𑀸 𑀧𑀕𑁆𑀖𑀭𑀺𑀁𑀲𑀼 𑀫𑁂, 𑀓𑀼𑀡𑀧𑀸 𑀧𑀼𑀩𑁆𑀩𑀮𑁄𑀳𑀺𑀢𑀸;

𑀬𑁂𑀦 𑀬𑁂𑀦𑁂𑀯 𑀕𑀘𑁆𑀙𑀸𑀫𑀺, 𑀕𑀸𑀫𑁂𑀲𑀼 𑀦𑀺𑀕𑀫𑁂𑀲𑀼 𑀘.

𑁨𑁨𑁦. 𑀤𑀡𑁆𑀟𑀳𑀢𑁆𑀣𑀸 𑀦𑀺𑀯𑀸𑀭𑁂𑀦𑁆𑀢𑀺, 𑀇𑀢𑁆𑀣𑀺𑀬𑁄 𑀧𑀼𑀭𑀺𑀲𑀸 𑀘 𑀫𑀁;

𑀑𑀓𑁆𑀓𑀺𑀢𑀸 [𑀑𑀓𑀺𑀡𑁆𑀡𑀸 (𑀲𑀻.)] 𑀧𑀽𑀢𑀺𑀕𑀦𑁆𑀥𑁂𑀦, 𑀫𑀸𑀲𑁆𑀲𑀼 𑀑𑀭𑁂𑀦 𑀆𑀕𑀫𑀸 [𑀫𑀸𑀕𑀫𑀸 (𑀲𑀻. 𑀧𑀻.)].

𑁨𑁨𑁧. 𑀏𑀢𑀸𑀤𑀺𑀲𑀁 𑀇𑀤𑀁 𑀤𑀼𑀓𑁆𑀔𑀁, 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀤𑀸𑀦𑀺 𑀫𑁂;

𑀅𑀦𑀼𑀪𑁄𑀫𑀺 𑀲𑀓𑀁 𑀓𑀫𑁆𑀫𑀁, 𑀧𑀼𑀩𑁆𑀩𑁂 𑀤𑀼𑀓𑁆𑀓𑀝𑀫𑀢𑁆𑀢𑀦𑁄.

𑁨𑁨𑁨. 𑀢𑀁 𑀯𑁄 𑀯𑀤𑀸𑀫𑀺 𑀪𑀤𑁆𑀤𑀦𑁆𑀢𑁂 [𑀪𑀤𑁆𑀤𑀁 𑀯𑁄 (𑀲𑀻. 𑀧𑀻.)], 𑀬𑀸𑀯𑀦𑁆𑀢𑁂𑀢𑁆𑀣 𑀲𑀫𑀸𑀕𑀢𑀸;

𑀫𑀸𑀲𑁆𑀲𑀼 𑀫𑀺𑀢𑁆𑀢𑀸𑀦 [𑀫𑀺𑀢𑁆𑀢𑀸𑀦𑀁 (𑀲𑀻. 𑀧𑀻.)] 𑀤𑀼𑀩𑁆𑀪𑀺𑀢𑁆𑀣𑁄, 𑀫𑀺𑀢𑁆𑀢𑀤𑀼𑀩𑁆𑀪𑁄 𑀳𑀺 𑀧𑀸𑀧𑀓𑁄.

𑁨𑁨𑁩. 𑀓𑀼𑀝𑁆𑀞𑀻 𑀓𑀺𑀮𑀸𑀲𑀻 𑀪𑀯𑀢𑀺, 𑀬𑁄 𑀫𑀺𑀢𑁆𑀢𑀸𑀦𑀺𑀥 𑀤𑀼𑀩𑁆𑀪𑀢𑀺 [𑀬𑁄 𑀫𑀺𑀢𑁆𑀢𑀸𑀦𑀁 𑀇𑀥𑀤𑁆𑀤𑀼𑀪𑀺 (𑀲𑀻. 𑀅𑀝𑁆𑀞.), 𑀬𑁄 𑀫𑀺𑀢𑁆𑀢𑀸𑀦𑀁 𑀇𑀥 𑀤𑀼𑀩𑁆𑀪𑀢𑀺 (𑀧𑀻.)];

𑀓𑀸𑀬𑀲𑁆𑀲 𑀪𑁂𑀤𑀸 𑀫𑀺𑀢𑁆𑀢𑀤𑁆𑀤𑀼 [𑀫𑀺𑀢𑁆𑀢𑀤𑀼𑀩𑁆𑀪𑀻 (𑀲𑁆𑀬𑀸. 𑀓.)], 𑀦𑀺𑀭𑀬𑀁 𑀲𑁄𑀧𑀧𑀚𑁆𑀚𑀢𑀻𑀢𑀺 [𑀲𑁄 𑀉𑀧𑀧𑀚𑁆𑀚𑀢𑀻𑀢𑀺 (𑀲𑀻. 𑀲𑁆𑀬𑀸. 𑀧𑀻.)].

𑀫𑀳𑀸𑀓𑀧𑀺𑀚𑀸𑀢𑀓𑀁 𑀙𑀝𑁆𑀞𑀁.