𑁫𑁧𑁫. 𑀲𑀫𑁆𑀪𑀯𑀚𑀸𑀢𑀓𑀁 (𑁫)

𑁧𑁩𑁮. 𑀭𑀚𑁆𑀚𑀜𑁆𑀘 𑀧𑀝𑀺𑀧𑀦𑁆𑀦𑀸𑀲𑁆𑀫, 𑀆𑀥𑀺𑀧𑀘𑁆𑀘𑀁 𑀲𑀼𑀘𑀻𑀭𑀢;

𑀫𑀳𑀢𑁆𑀢𑀁 𑀧𑀢𑁆𑀢𑀼𑀫𑀺𑀘𑁆𑀙𑀸𑀫𑀺, 𑀯𑀺𑀚𑁂𑀢𑀼𑀁 𑀧𑀣𑀯𑀺𑀁 𑀇𑀫𑀁.

𑁧𑁩𑁯. 𑀥𑀫𑁆𑀫𑁂𑀦 𑀦𑁄 𑀅𑀥𑀫𑁆𑀫𑁂𑀦, 𑀅𑀥𑀫𑁆𑀫𑁄 𑀫𑁂 𑀦 𑀭𑀼𑀘𑁆𑀘𑀢𑀺;

𑀓𑀺𑀘𑁆𑀘𑁄𑀯 𑀥𑀫𑁆𑀫𑁄 𑀘𑀭𑀺𑀢𑁄, 𑀭𑀜𑁆𑀜𑁄 𑀳𑁄𑀢𑀺 𑀲𑀼𑀘𑀻𑀭𑀢.

𑁧𑁪𑁦. 𑀇𑀥 𑀘𑁂𑀯𑀸𑀦𑀺𑀦𑁆𑀤𑀺𑀢𑀸 𑀬𑁂𑀦, 𑀧𑁂𑀘𑁆𑀘 𑀬𑁂𑀦 𑀅𑀦𑀺𑀦𑁆𑀤𑀺𑀢𑀸;

𑀬𑀲𑀁 𑀤𑁂𑀯𑀫𑀦𑀼𑀲𑁆𑀲𑁂𑀲𑀼, 𑀬𑁂𑀦 𑀧𑀧𑁆𑀧𑁄𑀫𑀼 [𑀧𑀧𑁆𑀧𑁂𑀫𑀼 (𑀲𑀻. 𑀅𑀝𑁆𑀞.)] 𑀩𑁆𑀭𑀸𑀳𑁆𑀫𑀡.

𑁧𑁪𑁧. 𑀬𑁄𑀳𑀁 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘, 𑀓𑀢𑁆𑀢𑀼𑀫𑀺𑀘𑁆𑀙𑀸𑀫𑀺 𑀩𑁆𑀭𑀸𑀳𑁆𑀫𑀡;

𑀢𑀁 𑀢𑁆𑀯𑀁 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘, 𑀩𑁆𑀭𑀸𑀳𑁆𑀫𑀡𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄.

𑁧𑁪𑁨. 𑀦𑀸𑀜𑁆𑀜𑀢𑁆𑀭 𑀯𑀺𑀥𑀼𑀭𑀸 𑀭𑀸𑀚, 𑀏𑀢𑀤𑀓𑁆𑀔𑀸𑀢𑀼𑀫𑀭𑀳𑀢𑀺;

𑀬𑀁 𑀢𑁆𑀯𑀁 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘, 𑀓𑀢𑁆𑀢𑀼𑀫𑀺𑀘𑁆𑀙𑀲𑀺 𑀔𑀢𑁆𑀢𑀺𑀬.

𑁧𑁪𑁩. 𑀏𑀳𑀺 𑀔𑁄 𑀧𑀳𑀺𑀢𑁄 𑀕𑀘𑁆𑀙, 𑀯𑀺𑀥𑀼𑀭𑀲𑁆𑀲 𑀉𑀧𑀦𑁆𑀢𑀺𑀓𑀁;

𑀦𑀺𑀓𑁆𑀔𑀜𑁆𑀘𑀺𑀫𑀁 [𑀦𑀺𑀓𑁆𑀔𑀁 𑀭𑀢𑁆𑀢 (𑀲𑀻.), 𑀦𑀺𑀓𑁆𑀔𑀫𑀺𑀫𑀁 (𑀧𑀻.)] 𑀲𑀼𑀯𑀡𑁆𑀡𑀲𑁆𑀲, 𑀳𑀭𑀁 𑀕𑀘𑁆𑀙 𑀲𑀼𑀘𑀻𑀭𑀢;

𑀅𑀪𑀺𑀳𑀸𑀭𑀁 𑀇𑀫𑀁 𑀤𑀚𑁆𑀚𑀸, 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀺𑀝𑁆𑀞𑀺𑀬𑀸.

𑁧𑁪𑁪. 𑀲𑁆𑀯𑀸𑀥𑀺𑀧𑁆𑀧𑀸𑀕𑀸 𑀪𑀸𑀭𑀤𑁆𑀯𑀸𑀚𑁄, 𑀯𑀺𑀥𑀼𑀭𑀲𑁆𑀲 𑀉𑀧𑀦𑁆𑀢𑀺𑀓𑀁;

𑀢𑀫𑀤𑁆𑀤𑀲 𑀫𑀳𑀸𑀩𑁆𑀭𑀳𑁆𑀫𑀸, 𑀅𑀲𑀫𑀸𑀦𑀁 𑀲𑀓𑁂 𑀖𑀭𑁂.

𑁧𑁪𑁫. 𑀭𑀜𑁆𑀜𑁄𑀳𑀁 𑀧𑀳𑀺𑀢𑁄 𑀤𑀽𑀢𑁄, 𑀓𑁄𑀭𑀩𑁆𑀬𑀲𑁆𑀲 𑀬𑀲𑀲𑁆𑀲𑀺𑀦𑁄;

‘‘𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀧𑀼𑀘𑁆𑀙𑁂𑀲𑀺’’, 𑀇𑀘𑁆𑀘𑀩𑁆𑀭𑀯𑀺 𑀬𑀼𑀥𑀺𑀝𑁆𑀞𑀺𑀮𑁄;

𑀢𑀁 𑀢𑁆𑀯𑀁 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘, 𑀯𑀺𑀥𑀼𑀭𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄.

𑁧𑁪𑁬. 𑀕𑀗𑁆𑀕𑀁 𑀫𑁂 𑀧𑀺𑀤𑀳𑀺𑀲𑁆𑀲𑀦𑁆𑀢𑀺, 𑀦 𑀢𑀁 𑀲𑀓𑁆𑀓𑁄𑀫𑀺 𑀩𑁆𑀭𑀸𑀳𑁆𑀫𑀡;

𑀅𑀧𑀺𑀥𑁂𑀢𑀼𑀁 𑀫𑀳𑀸𑀲𑀺𑀦𑁆𑀥𑀼𑀁, 𑀢𑀁 𑀓𑀣𑀁 𑀲𑁄 𑀪𑀯𑀺𑀲𑁆𑀲𑀢𑀺.

𑁧𑁪𑁭. 𑀦 𑀢𑁂 𑀲𑀓𑁆𑀓𑁄𑀫𑀺 𑀅𑀓𑁆𑀔𑀸𑀢𑀼𑀁, 𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀧𑀼𑀘𑁆𑀙𑀺𑀢𑁄;

𑀪𑀤𑁆𑀭𑀓𑀸𑀭𑁄 𑀘 𑀫𑁂 𑀧𑀼𑀢𑁆𑀢𑁄, 𑀑𑀭𑀲𑁄 𑀫𑀫 𑀅𑀢𑁆𑀭𑀚𑁄;

𑀢𑀁 𑀢𑁆𑀯𑀁 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘, 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀲𑁆𑀲𑀼 𑀩𑁆𑀭𑀸𑀳𑁆𑀫𑀡.

𑁧𑁪𑁮. 𑀲𑁆𑀯𑀸𑀥𑀺𑀧𑁆𑀧𑀸𑀕𑀸 𑀪𑀸𑀭𑀤𑁆𑀯𑀸𑀚𑁄, 𑀪𑀤𑁆𑀭𑀓𑀸𑀭𑀲𑁆𑀲𑀼𑀧𑀦𑁆𑀢𑀺𑀓𑀁 [𑀪𑀤𑁆𑀭𑀓𑀸𑀭𑀲𑁆𑀲 𑀲𑀦𑁆𑀢𑀺𑀓𑀁 (𑀲𑀻. 𑀲𑁆𑀬𑀸.)];

𑀢𑀫𑀤𑁆𑀤𑀲 𑀫𑀳𑀸𑀩𑁆𑀭𑀳𑁆𑀫𑀸, 𑀦𑀺𑀲𑀺𑀦𑁆𑀦𑀁 𑀲𑀫𑁆𑀳𑀺 𑀯𑁂𑀲𑁆𑀫𑀦𑀺.

𑁧𑁪𑁯. 𑀭𑀜𑁆𑀜𑁄𑀳𑀁 𑀧𑀳𑀺𑀢𑁄 𑀤𑀽𑀢𑁄, 𑀓𑁄𑀭𑀩𑁆𑀬𑀲𑁆𑀲 𑀬𑀲𑀲𑁆𑀲𑀺𑀦𑁄;

‘‘𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀧𑀼𑀘𑁆𑀙𑁂𑀲𑀺’’, 𑀇𑀘𑁆𑀘𑀩𑁆𑀭𑀯𑀺 𑀬𑀼𑀥𑀺𑀝𑁆𑀞𑀺𑀮𑁄;

𑀢𑀁 𑀢𑁆𑀯𑀁 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘, 𑀪𑀤𑁆𑀭𑀓𑀸𑀭 𑀧𑀩𑁆𑀭𑀽𑀳𑀺 [𑀩𑁆𑀭𑀯𑀻𑀳𑀺 (𑀲𑀻. 𑀧𑀻.)] 𑀫𑁂.

𑁧𑁫𑁦. 𑀫𑀁𑀲𑀓𑀸𑀚𑀁 [𑀫𑀁𑀲𑀓𑀸𑀘𑀁 (𑀧𑀻.)] 𑀅𑀯𑀳𑀸𑀬, 𑀕𑁄𑀥𑀁 𑀅𑀦𑀼𑀧𑀢𑀸𑀫𑀳𑀁;

𑀦 𑀢𑁂 𑀲𑀓𑁆𑀓𑁄𑀫𑀺 𑀅𑀓𑁆𑀔𑀸𑀢𑀼𑀁, 𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀧𑀼𑀘𑁆𑀙𑀺𑀢𑁄.

𑁧𑁫𑁧. 𑀲𑀜𑁆𑀘𑀬𑁄 [𑀲𑀜𑁆𑀚𑀬𑁄 (𑀲𑀻. 𑀲𑁆𑀬𑀸. 𑀧𑀻.)] 𑀦𑀸𑀫 𑀫𑁂 𑀪𑀸𑀢𑀸, 𑀓𑀦𑀺𑀝𑁆𑀞𑁄 𑀫𑁂 𑀲𑀼𑀘𑀻𑀭𑀢;

𑀢𑀁 𑀢𑁆𑀯𑀁 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘, 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀲𑁆𑀲𑀼 𑀩𑁆𑀭𑀸𑀳𑁆𑀫𑀡.

𑁧𑁫𑁨. 𑀲𑁆𑀯𑀸𑀥𑀺𑀧𑁆𑀧𑀸𑀕𑀸 𑀪𑀸𑀭𑀤𑁆𑀯𑀸𑀚𑁄, 𑀲𑀜𑁆𑀘𑀬𑀲𑁆𑀲 𑀉𑀧𑀦𑁆𑀢𑀺𑀓𑀁;

𑀢𑀫𑀤𑁆𑀤𑀲 𑀫𑀳𑀸𑀩𑁆𑀭𑀳𑁆𑀫𑀸, 𑀦𑀺𑀲𑀺𑀦𑁆𑀦𑀁 𑀲𑀫𑁆𑀳𑀺 𑀯𑁂𑀲𑁆𑀫𑀦𑀺 [𑀧𑀭𑀺𑀲𑀢𑀺 (𑀲𑁆𑀬𑀸.), 𑀧𑀭𑀻𑀲𑀢𑀺 (𑀧𑀻.)].

𑁧𑁫𑁩. 𑀭𑀜𑁆𑀜𑁄𑀳𑀁 𑀧𑀳𑀺𑀢𑁄 𑀤𑀽𑀢𑁄, 𑀓𑁄𑀭𑀩𑁆𑀬𑀲𑁆𑀲 𑀬𑀲𑀲𑁆𑀲𑀺𑀦𑁄;

‘‘𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀧𑀼𑀘𑁆𑀙𑁂𑀲𑀺’’, 𑀇𑀘𑁆𑀘𑀩𑁆𑀭𑀯𑀺 𑀬𑀼𑀥𑀺𑀝𑁆𑀞𑀺𑀮𑁄;

𑀢𑀁 𑀢𑁆𑀯𑀁 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘, 𑀲𑀜𑁆𑀘𑀬𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄.

𑁧𑁫𑁪. 𑀲𑀤𑀸 𑀫𑀁 𑀕𑀺𑀮𑀢𑁂 [𑀕𑀺𑀮𑀢𑀻 (𑀲𑀻.), 𑀕𑀺𑀮𑀢𑀺 (𑀧𑀻.)] 𑀫𑀘𑁆𑀘𑀼, 𑀲𑀸𑀬𑀁 𑀧𑀸𑀢𑁄 𑀲𑀼𑀘𑀻𑀭𑀢;

𑀦 𑀢𑁂 𑀲𑀓𑁆𑀓𑁄𑀫𑀺 𑀅𑀓𑁆𑀔𑀸𑀢𑀼𑀁, 𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀧𑀼𑀘𑁆𑀙𑀺𑀢𑁄.

𑁧𑁫𑁫. 𑀲𑀫𑁆𑀪𑀯𑁄 𑀦𑀸𑀫 𑀫𑁂 𑀪𑀸𑀢𑀸, 𑀓𑀦𑀺𑀝𑁆𑀞𑁄 𑀫𑁂 𑀲𑀼𑀘𑀻𑀭𑀢;

𑀢𑀁 𑀢𑁆𑀯𑀁 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘, 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀲𑁆𑀲𑀼 𑀩𑁆𑀭𑀸𑀳𑁆𑀫𑀡.

𑁧𑁫𑁬. 𑀅𑀩𑁆𑀪𑀼𑀢𑁄 𑀯𑀢 𑀪𑁄 𑀥𑀫𑁆𑀫𑁄, 𑀦𑀸𑀬𑀁 𑀅𑀲𑁆𑀫𑀸𑀓 𑀭𑀼𑀘𑁆𑀘𑀢𑀺;

𑀢𑀬𑁄 𑀚𑀦𑀸 𑀧𑀺𑀢𑀸𑀧𑀼𑀢𑁆𑀢𑀸, 𑀢𑁂𑀲𑀼 𑀧𑀜𑁆𑀜𑀸𑀬 𑀦𑁄 𑀯𑀺𑀤𑀽.

𑁧𑁫𑁭. 𑀦 𑀢𑀁 𑀲𑀓𑁆𑀓𑁄𑀣 𑀅𑀓𑁆𑀔𑀸𑀢𑀼𑀁, 𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀧𑀼𑀘𑁆𑀙𑀺𑀢𑀸;

𑀓𑀣𑀁 𑀦𑀼 𑀤𑀳𑀭𑁄 𑀚𑀜𑁆𑀜𑀸, 𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀧𑀼𑀘𑁆𑀙𑀺𑀢𑁄.

𑁧𑁫𑁮. 𑀫𑀸 𑀦𑀁 𑀤𑀳𑀭𑁄𑀢𑀺 𑀉𑀜𑁆𑀜𑀸𑀲𑀺 [𑀫𑀜𑁆𑀜𑀸𑀲𑀺 (𑀲𑁆𑀬𑀸. 𑀓.)], 𑀅𑀧𑀼𑀘𑁆𑀙𑀺𑀢𑁆𑀯𑀸𑀦 𑀲𑀫𑁆𑀪𑀯𑀁;

𑀧𑀼𑀘𑁆𑀙𑀺𑀢𑁆𑀯𑀸 𑀲𑀫𑁆𑀪𑀯𑀁 𑀚𑀜𑁆𑀜𑀸, 𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀩𑁆𑀭𑀸𑀳𑁆𑀫𑀡.

𑁧𑁫𑁯. 𑀬𑀣𑀸𑀧𑀺 𑀘𑀦𑁆𑀤𑁄 𑀯𑀺𑀫𑀮𑁄, 𑀕𑀘𑁆𑀙𑀁 𑀆𑀓𑀸𑀲𑀥𑀸𑀢𑀼𑀬𑀸;

𑀲𑀩𑁆𑀩𑁂 𑀢𑀸𑀭𑀸𑀕𑀡𑁂 𑀮𑁄𑀓𑁂, 𑀆𑀪𑀸𑀬 𑀅𑀢𑀺𑀭𑁄𑀘𑀢𑀺.

𑁧𑁬𑁦. 𑀏𑀯𑀫𑁆𑀧𑀺 𑀤𑀳𑀭𑀽𑀧𑁂𑀢𑁄, 𑀧𑀜𑁆𑀜𑀸𑀬𑁄𑀕𑁂𑀦 𑀲𑀫𑁆𑀪𑀯𑁄;

𑀫𑀸 𑀦𑀁 𑀤𑀳𑀭𑁄𑀢𑀺 𑀉𑀜𑁆𑀜𑀸𑀲𑀺, 𑀅𑀧𑀼𑀘𑁆𑀙𑀺𑀢𑁆𑀯𑀸𑀦 𑀲𑀫𑁆𑀪𑀯𑀁;

𑀧𑀼𑀘𑁆𑀙𑀺𑀢𑁆𑀯𑀸 𑀲𑀫𑁆𑀪𑀯𑀁 𑀚𑀜𑁆𑀜𑀸, 𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀩𑁆𑀭𑀸𑀳𑁆𑀫𑀡.

𑁧𑁬𑁧. 𑀬𑀣𑀸𑀧𑀺 𑀭𑀫𑁆𑀫𑀓𑁄 𑀫𑀸𑀲𑁄, 𑀕𑀺𑀫𑁆𑀳𑀸𑀦𑀁 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡;

𑀅𑀢𑁂𑀯𑀜𑁆𑀜𑁂𑀳𑀺 𑀫𑀸𑀲𑁂𑀳𑀺, 𑀤𑀼𑀫𑀧𑀼𑀧𑁆𑀨𑁂𑀳𑀺 𑀲𑁄𑀪𑀢𑀺.

𑁧𑁬𑁨. 𑀏𑀯𑀫𑁆𑀧𑀺 𑀤𑀳𑀭𑀽𑀧𑁂𑀢𑁄, 𑀧𑀜𑁆𑀜𑀸𑀬𑁄𑀕𑁂𑀦 𑀲𑀫𑁆𑀪𑀯𑁄;

𑀫𑀸 𑀦𑀁 𑀤𑀳𑀭𑁄𑀢𑀺 𑀉𑀜𑁆𑀜𑀸𑀲𑀺, 𑀅𑀧𑀼𑀘𑁆𑀙𑀺𑀢𑁆𑀯𑀸𑀦 𑀲𑀫𑁆𑀪𑀯𑀁;

𑀧𑀼𑀘𑁆𑀙𑀺𑀢𑁆𑀯𑀸 𑀲𑀫𑁆𑀪𑀯𑀁 𑀚𑀜𑁆𑀜𑀸, 𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀩𑁆𑀭𑀸𑀳𑁆𑀫𑀡.

𑁧𑁬𑁩. 𑀬𑀣𑀸𑀧𑀺 𑀳𑀺𑀫𑀯𑀸 𑀩𑁆𑀭𑀳𑁆𑀫𑁂, 𑀧𑀩𑁆𑀩𑀢𑁄 𑀕𑀦𑁆𑀥𑀫𑀸𑀤𑀦𑁄;

𑀦𑀸𑀦𑀸𑀭𑀼𑀓𑁆𑀔𑁂𑀳𑀺 𑀲𑀜𑁆𑀙𑀦𑁆𑀦𑁄, 𑀫𑀳𑀸𑀪𑀽𑀢𑀕𑀡𑀸𑀮𑀬𑁄;

𑀑𑀲𑀥𑁂𑀳𑀺 𑀘 𑀤𑀺𑀩𑁆𑀩𑁂𑀳𑀺, 𑀤𑀺𑀲𑀸 𑀪𑀸𑀢𑀺 𑀧𑀯𑀸𑀢𑀺 𑀘.

𑁧𑁬𑁪. 𑀏𑀯𑀫𑁆𑀧𑀺 𑀤𑀳𑀭𑀽𑀧𑁂𑀢𑁄, 𑀧𑀜𑁆𑀜𑀸𑀬𑁄𑀕𑁂𑀦 𑀲𑀫𑁆𑀪𑀯𑁄;

𑀫𑀸 𑀦𑀁 𑀤𑀳𑀭𑁄𑀢𑀺 𑀉𑀜𑁆𑀜𑀸𑀲𑀺, 𑀅𑀧𑀼𑀘𑁆𑀙𑀺𑀢𑁆𑀯𑀸𑀦 𑀲𑀫𑁆𑀪𑀯𑀁;

𑀧𑀼𑀘𑁆𑀙𑀺𑀢𑁆𑀯𑀸 𑀲𑀫𑁆𑀪𑀯𑀁 𑀚𑀜𑁆𑀜𑀸, 𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀩𑁆𑀭𑀸𑀳𑁆𑀫𑀡.

𑁧𑁬𑁫. 𑀬𑀣𑀸𑀧𑀺 𑀧𑀸𑀯𑀓𑁄 𑀩𑁆𑀭𑀳𑁆𑀫𑁂, 𑀅𑀘𑁆𑀘𑀺𑀫𑀸𑀮𑀻 𑀬𑀲𑀲𑁆𑀲𑀺𑀫𑀸;

𑀚𑀮𑀫𑀸𑀦𑁄 𑀯𑀦𑁂 𑀕𑀘𑁆𑀙𑁂 [𑀘𑀭𑀁 𑀓𑀘𑁆𑀙𑁂 (𑀧𑀻.)], 𑀅𑀦𑀮𑁄 𑀓𑀡𑁆𑀳𑀯𑀢𑁆𑀢𑀦𑀻.

𑁧𑁬𑁬. 𑀖𑀢𑀸𑀲𑀦𑁄 𑀥𑀽𑀫𑀓𑁂𑀢𑀼, 𑀉𑀢𑁆𑀢𑀫𑀸𑀳𑁂𑀯𑀦𑀦𑁆𑀤𑀳𑁄;

𑀦𑀺𑀲𑀻𑀣𑁂 [𑀦𑀺𑀲𑁆𑀲𑀻𑀯𑁂 (𑀲𑁆𑀬𑀸.), 𑀦𑀺𑀲𑀺𑀯𑁂 (𑀓.)] 𑀧𑀩𑁆𑀩𑀢𑀕𑁆𑀕𑀲𑁆𑀫𑀺𑀁, 𑀧𑀳𑀽𑀢𑁂𑀥𑁄 [𑀩𑀳𑀼𑀢𑁂𑀚𑁄 (𑀲𑁆𑀬𑀸. 𑀓.)] 𑀯𑀺𑀭𑁄𑀘𑀢𑀺.

𑁧𑁬𑁭. 𑀏𑀯𑀫𑁆𑀧𑀺 𑀤𑀳𑀭𑀽𑀧𑁂𑀢𑁄, 𑀧𑀜𑁆𑀜𑀸𑀬𑁄𑀕𑁂𑀦 𑀲𑀫𑁆𑀪𑀯𑁄;

𑀫𑀸 𑀦𑀁 𑀤𑀳𑀭𑁄𑀢𑀺 𑀉𑀜𑁆𑀜𑀸𑀲𑀺, 𑀅𑀧𑀼𑀘𑁆𑀙𑀺𑀢𑁆𑀯𑀸𑀦 𑀲𑀫𑁆𑀪𑀯𑀁;

𑀧𑀼𑀘𑁆𑀙𑀺𑀢𑁆𑀯𑀸 𑀲𑀫𑁆𑀪𑀯𑀁 𑀚𑀜𑁆𑀜𑀸, 𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀩𑁆𑀭𑀸𑀳𑁆𑀫𑀡.

𑁧𑁬𑁮. 𑀚𑀯𑁂𑀦 𑀪𑀤𑁆𑀭𑀁 𑀚𑀸𑀦𑀦𑁆𑀢𑀺, 𑀩𑀮𑀺𑀩𑀤𑁆𑀤𑀜𑁆𑀘 [𑀩𑀮𑀺𑀯𑀤𑁆𑀤𑀜𑁆𑀘 (𑀲𑀻. 𑀧𑀻.)] 𑀯𑀸𑀳𑀺𑀬𑁂;

𑀤𑁄𑀳𑁂𑀦 𑀥𑁂𑀦𑀼𑀁 𑀚𑀸𑀦𑀦𑁆𑀢𑀺, 𑀪𑀸𑀲𑀫𑀸𑀦𑀜𑁆𑀘 𑀧𑀡𑁆𑀟𑀺𑀢𑀁.

𑁧𑁬𑁯. 𑀏𑀯𑀫𑁆𑀧𑀺 𑀤𑀳𑀭𑀽𑀧𑁂𑀢𑁄, 𑀧𑀜𑁆𑀜𑀸𑀬𑁄𑀕𑁂𑀦 𑀲𑀫𑁆𑀪𑀯𑁄;

𑀫𑀸 𑀦𑀁 𑀤𑀳𑀭𑁄𑀢𑀺 𑀉𑀜𑁆𑀜𑀸𑀲𑀺, 𑀅𑀧𑀼𑀘𑁆𑀙𑀺𑀢𑁆𑀯𑀸𑀦 𑀲𑀫𑁆𑀪𑀯𑀁;

𑀧𑀼𑀘𑁆𑀙𑀺𑀢𑁆𑀯𑀸 𑀲𑀫𑁆𑀪𑀯𑀁 𑀚𑀜𑁆𑀜𑀸, 𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀩𑁆𑀭𑀸𑀳𑁆𑀫𑀡.

𑁧𑁭𑁦. 𑀲𑁆𑀯𑀸𑀥𑀺𑀧𑁆𑀧𑀸𑀕𑀸 𑀪𑀸𑀭𑀤𑁆𑀯𑀸𑀚𑁄, 𑀲𑀫𑁆𑀪𑀯𑀲𑁆𑀲 𑀉𑀧𑀦𑁆𑀢𑀺𑀓𑀁;

𑀢𑀫𑀤𑁆𑀤𑀲 𑀫𑀳𑀸𑀩𑁆𑀭𑀳𑁆𑀫𑀸, 𑀓𑀻𑀴𑀫𑀸𑀦𑀁 𑀩𑀳𑀻𑀧𑀼𑀭𑁂.

𑁧𑁭𑁧. 𑀭𑀜𑁆𑀜𑁄𑀳𑀁 𑀧𑀳𑀺𑀢𑁄 𑀤𑀽𑀢𑁄, 𑀓𑁄𑀭𑀩𑁆𑀬𑀲𑁆𑀲 𑀬𑀲𑀲𑁆𑀲𑀺𑀦𑁄;

‘‘𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀧𑀼𑀘𑁆𑀙𑁂𑀲𑀺’’, 𑀇𑀘𑁆𑀘𑀩𑁆𑀭𑀯𑀺 𑀬𑀼𑀥𑀺𑀝𑁆𑀞𑀺𑀮𑁄;

𑀢𑀁 𑀢𑁆𑀯𑀁 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘, 𑀲𑀫𑁆𑀪𑀯𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄.

𑁧𑁭𑁨. 𑀢𑀕𑁆𑀖 𑀢𑁂 𑀅𑀳𑀫𑀓𑁆𑀔𑀺𑀲𑁆𑀲𑀁, 𑀬𑀣𑀸𑀧𑀺 𑀓𑀼𑀲𑀮𑁄 𑀢𑀣𑀸;

𑀭𑀸𑀚𑀸 𑀘 𑀔𑁄 𑀢𑀁 𑀚𑀸𑀦𑀸𑀢𑀺, 𑀬𑀤𑀺 𑀓𑀸𑀳𑀢𑀺 𑀯𑀸 𑀦 𑀯𑀸.

𑁧𑁭𑁩. ‘‘𑀅𑀚𑁆𑀚 𑀲𑀼𑀯𑁂’’𑀢𑀺 𑀲𑀁𑀲𑁂𑀬𑁆𑀬, 𑀭𑀜𑁆𑀜𑀸 𑀧𑀼𑀝𑁆𑀞𑁄 𑀲𑀼𑀘𑀻𑀭𑀢;

𑀫𑀸 𑀓𑀢𑁆𑀯𑀸 𑀅𑀯𑀲𑀻 𑀭𑀸𑀚𑀸, 𑀅𑀢𑁆𑀣𑁂 𑀚𑀸𑀢𑁂 𑀬𑀼𑀥𑀺𑀝𑁆𑀞𑀺𑀮𑁄.

𑁧𑁭𑁪. 𑀅𑀚𑁆𑀛𑀢𑁆𑀢𑀜𑁆𑀜𑁂𑀯 𑀲𑀁𑀲𑁂𑀬𑁆𑀬, 𑀭𑀜𑁆𑀜𑀸 𑀧𑀼𑀝𑁆𑀞𑁄 𑀲𑀼𑀘𑀻𑀭𑀢;

𑀓𑀼𑀫𑁆𑀫𑀕𑁆𑀕𑀁 𑀦 𑀦𑀺𑀯𑁂𑀲𑁂𑀬𑁆𑀬, 𑀬𑀣𑀸 𑀫𑀽𑀴𑁆𑀳𑁄 𑀅𑀘𑁂𑀢𑀲𑁄 [𑀅𑀘𑁂𑀢𑀦𑁄 (𑀓.)].

𑁧𑁭𑁫. 𑀅𑀢𑁆𑀢𑀸𑀦𑀁 𑀦𑀸𑀢𑀺𑀯𑀢𑁆𑀢𑁂𑀬𑁆𑀬, 𑀅𑀥𑀫𑁆𑀫𑀁 𑀦 𑀲𑀫𑀸𑀘𑀭𑁂;

𑀅𑀢𑀺𑀢𑁆𑀣𑁂 𑀦𑀧𑁆𑀧𑀢𑀸𑀭𑁂𑀬𑁆𑀬, 𑀅𑀦𑀢𑁆𑀣𑁂 𑀦 𑀬𑀼𑀢𑁄 𑀲𑀺𑀬𑀸.

𑁧𑁭𑁬. 𑀬𑁄 𑀘 𑀏𑀢𑀸𑀦𑀺 𑀞𑀸𑀦𑀸𑀦𑀺, 𑀓𑀢𑁆𑀢𑀼𑀁 𑀚𑀸𑀦𑀸𑀢𑀺 𑀔𑀢𑁆𑀢𑀺𑀬𑁄;

𑀲𑀤𑀸 𑀲𑁄 𑀯𑀟𑁆𑀠𑀢𑁂 𑀭𑀸𑀚𑀸, 𑀲𑀼𑀓𑁆𑀓𑀧𑀓𑁆𑀔𑁂𑀯 𑀘𑀦𑁆𑀤𑀺𑀫𑀸.

𑁧𑁭𑁭. 𑀜𑀸𑀢𑀻𑀦𑀜𑁆𑀘 𑀧𑀺𑀬𑁄 𑀳𑁄𑀢𑀺, 𑀫𑀺𑀢𑁆𑀢𑁂𑀲𑀼 𑀘 𑀯𑀺𑀭𑁄𑀘𑀢𑀺;

𑀓𑀸𑀬𑀲𑁆𑀲 𑀪𑁂𑀤𑀸 𑀲𑀧𑁆𑀧𑀜𑁆𑀜𑁄, 𑀲𑀕𑁆𑀕𑀁 𑀲𑁄 𑀉𑀧𑀧𑀚𑁆𑀚𑀢𑀻𑀢𑀺.

𑀲𑀫𑁆𑀪𑀯𑀚𑀸𑀢𑀓𑀁 𑀧𑀜𑁆𑀘𑀫𑀁.