𑁫𑁧𑁪. 𑀙𑀤𑁆𑀤𑀦𑁆𑀢𑀚𑀸𑀢𑀓𑀁 (𑁪)

𑁯𑁭. 𑀓𑀺𑀁 𑀦𑀼 𑀲𑁄𑀘𑀲𑀺𑀦𑀼𑀘𑁆𑀘𑀗𑁆𑀕𑀺, 𑀧𑀡𑁆𑀟𑀽𑀲𑀺 𑀯𑀭𑀯𑀡𑁆𑀡𑀺𑀦𑀺;

𑀫𑀺𑀮𑀸𑀬𑀲𑀺 𑀯𑀺𑀲𑀸𑀮𑀓𑁆𑀔𑀺, 𑀫𑀸𑀮𑀸𑀯 𑀧𑀭𑀺𑀫𑀤𑁆𑀤𑀺𑀢𑀸.

𑁯𑁮. 𑀤𑁄𑀳𑀴𑁄 𑀫𑁂 𑀫𑀳𑀸𑀭𑀸𑀚, 𑀲𑀼𑀧𑀺𑀦𑀦𑁆𑀢𑁂𑀦𑀼𑀧𑀚𑁆𑀛𑀕𑀸 [𑀦𑀼’𑀧𑀘𑁆𑀘𑀕𑀸 (𑀲𑀻. 𑀲𑁆𑀬𑀸. 𑀧𑀻.)];

𑀦 𑀲𑁄 𑀲𑀼𑀮𑀪𑀭𑀽𑀧𑁄𑀯, 𑀬𑀸𑀤𑀺𑀲𑁄 𑀫𑀫 𑀤𑁄𑀳𑀴𑁄.

𑁯𑁯. 𑀬𑁂 𑀓𑁂𑀘𑀺 𑀫𑀸𑀦𑀼𑀲𑀸 𑀓𑀸𑀫𑀸, 𑀇𑀥 𑀮𑁄𑀓𑀲𑁆𑀫𑀺 𑀦𑀦𑁆𑀤𑀦𑁂;

𑀲𑀩𑁆𑀩𑁂 𑀢𑁂 𑀧𑀘𑀼𑀭𑀸 𑀫𑀬𑁆𑀳𑀁, 𑀅𑀳𑀁 𑀢𑁂 𑀤𑀫𑁆𑀫𑀺 𑀤𑁄𑀳𑀴𑀁.

𑁧𑁦𑁦. 𑀮𑀼𑀤𑁆𑀤𑀸 𑀤𑁂𑀯 𑀲𑀫𑀸𑀬𑀦𑁆𑀢𑀼, 𑀬𑁂 𑀓𑁂𑀘𑀺 𑀯𑀺𑀚𑀺𑀢𑁂 𑀢𑀯;

𑀏𑀢𑁂𑀲𑀁 𑀅𑀳𑀫𑀓𑁆𑀔𑀺𑀲𑁆𑀲𑀁, 𑀬𑀸𑀤𑀺𑀲𑁄 𑀫𑀫 𑀤𑁄𑀳𑀴𑁄.

𑁧𑁦𑁧. 𑀇𑀫𑁂 𑀢𑁂 𑀮𑀼𑀤𑁆𑀤𑀓𑀸 𑀤𑁂𑀯𑀺, 𑀓𑀢𑀳𑀢𑁆𑀣𑀸 𑀯𑀺𑀲𑀸𑀭𑀤𑀸;

𑀯𑀦𑀜𑁆𑀜𑀽 𑀘 𑀫𑀺𑀕𑀜𑁆𑀜𑀽 𑀘, 𑀫𑀫𑀢𑁆𑀣𑁂 [𑀫𑀫 𑀢𑁂 (𑀧𑀻.)] 𑀘𑀢𑁆𑀢𑀚𑀻𑀯𑀺𑀢𑀸.

𑁧𑁦𑁨. 𑀮𑀼𑀤𑁆𑀤𑀧𑀼𑀢𑁆𑀢𑀸 𑀦𑀺𑀲𑀸𑀫𑁂𑀣, 𑀬𑀸𑀯𑀦𑁆𑀢𑁂𑀢𑁆𑀣 𑀲𑀫𑀸𑀕𑀢𑀸;

𑀙𑀩𑁆𑀩𑀺𑀲𑀸𑀡𑀁 𑀕𑀚𑀁 𑀲𑁂𑀢𑀁, 𑀅𑀤𑁆𑀤𑀲𑀁 𑀲𑀼𑀧𑀺𑀦𑁂 𑀅𑀳𑀁;

𑀢𑀲𑁆𑀲 𑀤𑀦𑁆𑀢𑁂𑀳𑀺 𑀫𑁂 𑀅𑀢𑁆𑀣𑁄, 𑀅𑀮𑀸𑀪𑁂 𑀦𑀢𑁆𑀣𑀺 𑀚𑀻𑀯𑀺𑀢𑀁.

𑁧𑁦𑁩. 𑀦 𑀦𑁄 𑀧𑀺𑀢𑀽𑀦𑀁 𑀦 𑀧𑀺𑀢𑀸𑀫𑀳𑀸𑀦𑀁, 𑀤𑀺𑀝𑁆𑀞𑁄 𑀲𑀼𑀢𑁄 𑀓𑀼𑀜𑁆𑀚𑀭𑁄 𑀙𑀩𑁆𑀩𑀺𑀲𑀸𑀡𑁄;

𑀬𑀫𑀤𑁆𑀤𑀲𑀸 𑀲𑀼𑀧𑀺𑀦𑁂 𑀭𑀸𑀚𑀧𑀼𑀢𑁆𑀢𑀻, 𑀅𑀓𑁆𑀔𑀸𑀳𑀺 𑀦𑁄 𑀬𑀸𑀤𑀺𑀲𑁄 𑀳𑀢𑁆𑀣𑀺𑀦𑀸𑀕𑁄.

𑁧𑁦𑁪. 𑀤𑀺𑀲𑀸 𑀘𑀢𑀲𑁆𑀲𑁄 𑀯𑀺𑀤𑀺𑀲𑀸 𑀘𑀢𑀲𑁆𑀲𑁄, 𑀉𑀤𑁆𑀥𑀁 𑀅𑀥𑁄 𑀤𑀲 𑀤𑀺𑀲𑀸 𑀇𑀫𑀸𑀬𑁄;

𑀓𑀢𑀫𑀁 𑀤𑀺𑀲𑀁 𑀢𑀺𑀝𑁆𑀞𑀢𑀺 𑀦𑀸𑀕𑀭𑀸𑀚𑀸, 𑀬𑀫𑀤𑁆𑀤𑀲𑀸 𑀲𑀼𑀧𑀺𑀦𑁂 𑀙𑀩𑁆𑀩𑀺𑀲𑀸𑀡𑀁.

𑁧𑁦𑁫. 𑀇𑀢𑁄 𑀉𑀚𑀼𑀁 𑀉𑀢𑁆𑀢𑀭𑀺𑀬𑀁 𑀤𑀺𑀲𑀸𑀬𑀁, 𑀅𑀢𑀺𑀓𑁆𑀓𑀫𑁆𑀫 𑀲𑁄 𑀲𑀢𑁆𑀢𑀕𑀺𑀭𑀻 𑀩𑁆𑀭𑀳𑀦𑁆𑀢𑁂;

𑀲𑀼𑀯𑀡𑁆𑀡𑀧𑀲𑁆𑀲𑁄 𑀦𑀸𑀫 𑀕𑀺𑀭𑀻 𑀉𑀴𑀸𑀭𑁄, 𑀲𑀼𑀧𑀼𑀧𑁆𑀨𑀺𑀢𑁄 [𑀲𑀫𑁆𑀧𑀼𑀧𑁆𑀨𑀺𑀢𑁄 (𑀲𑁆𑀬𑀸.)] 𑀓𑀺𑀫𑁆𑀧𑀼𑀭𑀺𑀲𑀸𑀦𑀼𑀘𑀺𑀡𑁆𑀡𑁄.

𑁧𑁦𑁬. 𑀆𑀭𑀼𑀬𑁆𑀳 𑀲𑁂𑀮𑀁 𑀪𑀯𑀦𑀁 𑀓𑀺𑀦𑁆𑀦𑀭𑀸𑀦𑀁, 𑀑𑀮𑁄𑀓𑀬 𑀧𑀩𑁆𑀩𑀢𑀧𑀸𑀤𑀫𑀽𑀮𑀁;

𑀅𑀣 𑀤𑀓𑁆𑀔𑀲𑀻 𑀫𑁂𑀖𑀲𑀫𑀸𑀦𑀯𑀡𑁆𑀡𑀁, 𑀦𑀺𑀕𑁆𑀭𑁄𑀥𑀭𑀸𑀚𑀁 𑀅𑀣 𑀲𑀳𑀲𑁆𑀲𑀧𑀸𑀤𑀁 [𑀧𑁄𑀭𑀁 (𑀓.)].

𑁧𑁦𑁭. 𑀢𑀢𑁆𑀣𑀘𑁆𑀙𑀢𑀻 𑀓𑀼𑀜𑁆𑀚𑀭𑁄 𑀙𑀩𑁆𑀩𑀺𑀲𑀸𑀡𑁄, 𑀲𑀩𑁆𑀩𑀲𑁂𑀢𑁄 𑀤𑀼𑀧𑁆𑀧𑀲𑀳𑁄 𑀧𑀭𑁂𑀪𑀺;

𑀭𑀓𑁆𑀔𑀦𑁆𑀢𑀺 𑀦𑀁 𑀅𑀝𑁆𑀞𑀲𑀳𑀲𑁆𑀲𑀦𑀸𑀕𑀸, 𑀈𑀲𑀸𑀤𑀦𑁆𑀢𑀸 𑀯𑀸𑀢𑀚𑀯𑀧𑁆𑀧𑀳𑀸𑀭𑀺𑀦𑁄.

𑁧𑁦𑁮. 𑀢𑀺𑀝𑁆𑀞𑀦𑁆𑀢𑀺 𑀢𑁂 𑀢𑀼𑀫𑀽𑀮𑀁 [𑀢𑀼𑀫𑀽𑀮 (𑀲𑁆𑀬𑀸.), 𑀪𑀺𑀫𑀽𑀮 (𑀧𑀻. 𑀓.)] 𑀧𑀲𑁆𑀲𑀲𑀦𑁆𑀢𑀸, 𑀓𑀼𑀧𑁆𑀧𑀦𑁆𑀢𑀺 𑀯𑀸𑀢𑀲𑁆𑀲𑀧𑀺 𑀏𑀭𑀺𑀢𑀲𑁆𑀲;

𑀫𑀦𑀼𑀲𑁆𑀲𑀪𑀽𑀢𑀁 𑀧𑀦 𑀢𑀢𑁆𑀣 𑀤𑀺𑀲𑁆𑀯𑀸, 𑀪𑀲𑁆𑀫𑀁 𑀓𑀭𑁂𑀬𑁆𑀬𑀼𑀁 𑀦𑀸𑀲𑁆𑀲 𑀭𑀚𑁄𑀧𑀺 𑀢𑀲𑁆𑀲.

𑁧𑁦𑁯. 𑀩𑀳𑀽 𑀳𑀺𑀫𑁂 𑀭𑀸𑀚𑀓𑀼𑀮𑀫𑁆𑀳𑀺 𑀲𑀦𑁆𑀢𑀺, 𑀧𑀺𑀴𑀦𑁆𑀥𑀦𑀸 𑀚𑀸𑀢𑀭𑀽𑀧𑀲𑁆𑀲 𑀤𑁂𑀯𑀻;

𑀫𑀼𑀢𑁆𑀢𑀸𑀫𑀡𑀻𑀯𑁂𑀴𑀼𑀭𑀺𑀬𑀸𑀫𑀬𑀸 𑀘, 𑀓𑀺𑀁 𑀓𑀸𑀳𑀲𑀺 𑀤𑀦𑁆𑀢𑀧𑀺𑀴𑀦𑁆𑀥𑀦𑁂𑀦;

𑀫𑀸𑀭𑁂𑀢𑀼𑀓𑀸𑀫𑀸 𑀓𑀼𑀜𑁆𑀚𑀭𑀁 𑀙𑀩𑁆𑀩𑀺𑀲𑀸𑀡𑀁, 𑀉𑀤𑀸𑀳𑀼 𑀖𑀸𑀢𑁂𑀲𑁆𑀲𑀲𑀺 𑀮𑀼𑀤𑁆𑀤𑀧𑀼𑀢𑁆𑀢𑁂.

𑁧𑁧𑁦. 𑀲𑀸 𑀇𑀲𑁆𑀲𑀺𑀢𑀸 𑀤𑀼𑀓𑁆𑀔𑀺𑀢𑀸 𑀘𑀲𑁆𑀫𑀺 𑀮𑀼𑀤𑁆𑀤, 𑀉𑀤𑁆𑀥𑀜𑁆𑀘 𑀲𑀼𑀲𑁆𑀲𑀸𑀫𑀺 𑀅𑀦𑀼𑀲𑁆𑀲𑀭𑀦𑁆𑀢𑀻;

𑀓𑀭𑁄𑀳𑀺 𑀫𑁂 𑀮𑀼𑀤𑁆𑀤𑀓 𑀏𑀢𑀫𑀢𑁆𑀣𑀁, 𑀤𑀲𑁆𑀲𑀸𑀫𑀺 𑀢𑁂 𑀕𑀸𑀫𑀯𑀭𑀸𑀦𑀺 𑀧𑀜𑁆𑀘.

𑁧𑁧𑁧. 𑀓𑀢𑁆𑀣𑀘𑁆𑀙𑀢𑀻 𑀓𑀢𑁆𑀣𑀫𑀼𑀧𑁂𑀢𑀺 𑀞𑀸𑀦𑀁, 𑀯𑀻𑀣𑀺𑀲𑁆𑀲 𑀓𑀸 𑀦𑁆𑀳𑀸𑀦 [𑀦𑀳𑀸𑀦 (𑀲𑀻. 𑀧𑀻.)] 𑀕𑀢𑀲𑁆𑀲 𑀳𑁄𑀢𑀺;

𑀓𑀣𑀜𑁆𑀳𑀺 𑀲𑁄 𑀦𑁆𑀳𑀸𑀬𑀢𑀺 [𑀦𑀳𑀸𑀬𑀢𑀺 (𑀲𑀻. 𑀧𑀻.)] 𑀦𑀸𑀕𑀭𑀸𑀚𑀸, 𑀓𑀣𑀁 𑀯𑀺𑀚𑀸𑀦𑁂𑀫𑀼 𑀕𑀢𑀺𑀁 𑀕𑀚𑀲𑁆𑀲.

𑁧𑁧𑁨. 𑀢𑀢𑁆𑀣𑁂𑀯 𑀲𑀸 𑀧𑁄𑀓𑁆𑀔𑀭𑀡𑀻 𑀅𑀤𑀽𑀭𑁂 [𑀅𑀯𑀺𑀤𑀽𑀭𑁂 (𑀲𑁆𑀬𑀸. 𑀓.)], 𑀭𑀫𑁆𑀫𑀸 𑀲𑀼𑀢𑀺𑀢𑁆𑀣𑀸 𑀘 𑀫𑀳𑁄𑀤𑀺𑀓𑀸 [𑀫𑀳𑁄𑀤𑀓𑀸 (𑀲𑁆𑀬𑀸. 𑀓.)] 𑀘;

𑀲𑀫𑁆𑀧𑀼𑀧𑁆𑀨𑀺𑀢𑀸 𑀪𑀫𑀭𑀕𑀡𑀸𑀦𑀼𑀘𑀺𑀡𑁆𑀡𑀸 [𑀓𑀺𑀡𑁆𑀡𑀸 (𑀓𑀢𑁆𑀣𑀘𑀺)], 𑀏𑀢𑁆𑀣 𑀳𑀺 𑀲𑁄 𑀦𑁆𑀳𑀸𑀬𑀢𑀺 𑀦𑀸𑀕𑀭𑀸𑀚𑀸.

𑁧𑁧𑁩. 𑀲𑀻𑀲𑀁 𑀦𑀳𑀸𑀢𑀼𑀧𑁆𑀧𑀮 [𑀦𑀳𑀸𑀢𑁄 𑀉𑀧𑁆𑀧𑀮 (𑀲𑀻. 𑀲𑁆𑀬𑀸. 𑀧𑀻.)] 𑀫𑀸𑀮𑀪𑀸𑀭𑀻, 𑀲𑀩𑁆𑀩𑀲𑁂𑀢𑁄 𑀧𑀼𑀡𑁆𑀟𑀭𑀻𑀓𑀢𑁆𑀢𑀘𑀗𑁆𑀕𑀻;

𑀆𑀫𑁄𑀤𑀫𑀸𑀦𑁄 𑀕𑀘𑁆𑀙𑀢𑀺 𑀲𑀦𑁆𑀦𑀺𑀓𑁂𑀢𑀁, 𑀧𑀼𑀭𑀓𑁆𑀔𑀢𑁆𑀯𑀸 𑀫𑀳𑁂𑀲𑀺𑀁 𑀲𑀩𑁆𑀩𑀪𑀤𑁆𑀤𑀁.

𑁧𑁧𑁪. 𑀢𑀢𑁆𑀣𑁂𑀯 𑀲𑁄 𑀉𑀕𑁆𑀕𑀳𑁂𑀢𑁆𑀯𑀸𑀦 𑀯𑀸𑀓𑁆𑀬𑀁, 𑀆𑀤𑀸𑀬 𑀢𑀽𑀡𑀺𑀜𑁆𑀘 𑀥𑀦𑀼𑀜𑁆𑀘 𑀮𑀼𑀤𑁆𑀤𑁄;

𑀯𑀺𑀢𑀼𑀭𑀺𑀬𑀢𑀺 [𑀯𑀺𑀢𑀼𑀭𑀺𑀬 𑀲𑁄 (𑀲𑀻. 𑀅𑀝𑁆𑀞.)] 𑀲𑀢𑁆𑀢𑀕𑀺𑀭𑀻 𑀩𑁆𑀭𑀳𑀦𑁆𑀢𑁂, 𑀲𑀼𑀯𑀡𑁆𑀡𑀧𑀲𑁆𑀲𑀁 𑀦𑀸𑀫 𑀕𑀺𑀭𑀺𑀁 𑀉𑀴𑀸𑀭𑀁.

𑁧𑁧𑁫. 𑀆𑀭𑀼𑀬𑁆𑀳 𑀲𑁂𑀮𑀁 𑀪𑀯𑀦𑀁 𑀓𑀺𑀦𑁆𑀦𑀭𑀸𑀦𑀁, 𑀑𑀮𑁄𑀓𑀬𑀻 𑀧𑀩𑁆𑀩𑀢𑀧𑀸𑀤𑀫𑀽𑀮𑀁;

𑀢𑀢𑁆𑀣𑀤𑁆𑀤𑀲𑀸 𑀫𑁂𑀖𑀲𑀫𑀸𑀦𑀯𑀡𑁆𑀡𑀁, 𑀦𑀺𑀕𑁆𑀭𑁄𑀥𑀭𑀸𑀚𑀁 𑀅𑀝𑁆𑀞𑀲𑀳𑀲𑁆𑀲𑀧𑀸𑀤𑀁.

𑁧𑁧𑁬. 𑀢𑀢𑁆𑀣𑀤𑁆𑀤𑀲𑀸 𑀓𑀼𑀜𑁆𑀚𑀭𑀁 𑀙𑀩𑁆𑀩𑀺𑀲𑀸𑀡𑀁, 𑀲𑀩𑁆𑀩𑀲𑁂𑀢𑀁 𑀤𑀼𑀧𑁆𑀧𑀲𑀳𑀁 𑀧𑀭𑁂𑀪𑀺;

𑀭𑀓𑁆𑀔𑀦𑁆𑀢𑀺 𑀦𑀁 𑀅𑀝𑁆𑀞𑀲𑀳𑀲𑁆𑀲𑀦𑀸𑀕𑀸, 𑀈𑀲𑀸𑀤𑀦𑁆𑀢𑀸 𑀯𑀸𑀢𑀚𑀯𑀧𑁆𑀧𑀳𑀸𑀭𑀺𑀦𑁄.

𑁧𑁧𑁭. 𑀢𑀢𑁆𑀣𑀤𑁆𑀤𑀲𑀸 𑀧𑁄𑀓𑁆𑀔𑀭𑀡𑀺𑀁 𑀅𑀤𑀽𑀭𑁂, 𑀭𑀫𑁆𑀫𑀁 𑀲𑀼𑀢𑀺𑀢𑁆𑀣𑀜𑁆𑀘 𑀫𑀳𑁄𑀤𑀺𑀓𑀜𑁆𑀘;

𑀲𑀫𑁆𑀧𑀼𑀧𑁆𑀨𑀺𑀢𑀁 𑀪𑀫𑀭𑀕𑀡𑀸𑀦𑀼𑀘𑀺𑀡𑁆𑀡𑀁, 𑀬𑀢𑁆𑀣 𑀳𑀺 𑀲𑁄 𑀦𑁆𑀳𑀸𑀬𑀢𑀺 𑀦𑀸𑀕𑀭𑀸𑀚𑀸.

𑁧𑁧𑁮. 𑀤𑀺𑀲𑁆𑀯𑀸𑀦 𑀦𑀸𑀕𑀲𑁆𑀲 𑀕𑀢𑀺𑀁 𑀞𑀺𑀢𑀺𑀜𑁆𑀘, 𑀯𑀻𑀣𑀺𑀲𑁆𑀲 𑀬𑀸 𑀦𑁆𑀳𑀸𑀦𑀕𑀢𑀲𑁆𑀲 𑀳𑁄𑀢𑀺;

𑀑𑀧𑀸𑀢𑀫𑀸𑀕𑀘𑁆𑀙𑀺 𑀅𑀦𑀭𑀺𑀬𑀭𑀽𑀧𑁄, 𑀧𑀬𑁄𑀚𑀺𑀢𑁄 𑀘𑀺𑀢𑁆𑀢𑀯𑀲𑀸𑀦𑀼𑀕𑀸𑀬.

𑁧𑁧𑁯. 𑀔𑀡𑀺𑀢𑁆𑀯𑀸𑀦 𑀓𑀸𑀲𑀼𑀁 𑀨𑀮𑀓𑁂𑀳𑀺 𑀙𑀸𑀤𑀬𑀺, 𑀅𑀢𑁆𑀢𑀸𑀦𑀫𑁄𑀥𑀸𑀬 𑀥𑀦𑀼𑀜𑁆𑀘 𑀮𑀼𑀤𑁆𑀤𑁄;

𑀧𑀲𑁆𑀲𑀸𑀕𑀢𑀁 𑀧𑀼𑀣𑀼𑀲𑀮𑁆𑀮𑁂𑀦 𑀦𑀸𑀕𑀁, 𑀲𑀫𑀧𑁆𑀧𑀬𑀻 𑀤𑀼𑀓𑁆𑀓𑀝𑀓𑀫𑁆𑀫𑀓𑀸𑀭𑀻.

𑁧𑁨𑁦. 𑀯𑀺𑀤𑁆𑀥𑁄 𑀘 𑀦𑀸𑀕𑁄 𑀓𑁄𑀜𑁆𑀘𑀫𑀦𑀸𑀤𑀺 𑀖𑁄𑀭𑀁, 𑀲𑀩𑁆𑀩𑁂 𑀘 [𑀲𑀩𑁆𑀩𑁂𑀯 (𑀲𑀻. 𑀲𑁆𑀬𑀸. 𑀧𑀻.)] 𑀦𑀸𑀕𑀸 𑀦𑀺𑀦𑁆𑀦𑀤𑀼𑀁 [𑀦𑀺𑀦𑁆𑀦𑀸𑀤𑀼 (𑀲𑁆𑀬𑀸.), 𑀦𑀺𑀦𑁆𑀦𑀸𑀤𑀁 (𑀓.)] 𑀖𑁄𑀭𑀭𑀽𑀧𑀁;

𑀢𑀺𑀡𑀜𑁆𑀘 𑀓𑀝𑁆𑀞𑀜𑁆𑀘 𑀭𑀡𑀁 [𑀘𑀼𑀡𑁆𑀡𑀁 (𑀓. 𑀲𑀻. 𑀧𑀻.)] 𑀓𑀭𑁄𑀦𑁆𑀢𑀸, 𑀥𑀸𑀯𑀺𑀁𑀲𑀼 𑀢𑁂 𑀅𑀝𑁆𑀞𑀤𑀺𑀲𑀸 𑀲𑀫𑀦𑁆𑀢𑀢𑁄.

𑁧𑁨𑁧. 𑀯𑀥𑀺𑀲𑁆𑀲𑀫𑁂𑀢𑀦𑁆𑀢𑀺 [𑀯𑀥𑀺𑀲𑁆𑀲𑀫𑁂𑀦𑀦𑁆𑀢𑀺 (𑀲𑁆𑀬𑀸.)] 𑀧𑀭𑀸𑀫𑀲𑀦𑁆𑀢𑁄, 𑀓𑀸𑀲𑀸𑀯𑀫𑀤𑁆𑀤𑀓𑁆𑀔𑀺 𑀥𑀚𑀁 𑀇𑀲𑀻𑀦𑀁;

𑀤𑀼𑀓𑁆𑀔𑁂𑀦 𑀨𑀼𑀝𑁆𑀞𑀲𑁆𑀲𑀼𑀤𑀧𑀸𑀤𑀺 𑀲𑀜𑁆𑀜𑀸, 𑀅𑀭𑀳𑀤𑁆𑀥𑀚𑁄 𑀲𑀩𑁆𑀪𑀺 𑀅𑀯𑀚𑁆𑀛𑀭𑀽𑀧𑁄.

𑁧𑁨𑁨. 𑀅𑀦𑀺𑀓𑁆𑀓𑀲𑀸𑀯𑁄 𑀓𑀸𑀲𑀸𑀯𑀁, 𑀬𑁄 𑀯𑀢𑁆𑀣𑀁 𑀧𑀭𑀺𑀤𑀳𑀺𑀲𑁆𑀲𑀢𑀺 [𑀧𑀭𑀺𑀤𑀳𑁂𑀲𑁆𑀲𑀢𑀺 (𑀲𑀻. 𑀧𑀻.), 𑀧𑀭𑀺𑀥𑀲𑁆𑀲𑀢𑀺 (𑀓𑀢𑁆𑀣𑀘𑀺)];

𑀅𑀧𑁂𑀢𑁄 𑀤𑀫𑀲𑀘𑁆𑀘𑁂𑀦, 𑀦 𑀲𑁄 𑀓𑀸𑀲𑀸𑀯𑀫𑀭𑀳𑀢𑀺.

𑁧𑁨𑁩. 𑀬𑁄 𑀘 𑀯𑀦𑁆𑀢𑀓𑀲𑀸𑀯𑀲𑁆𑀲, 𑀲𑀻𑀮𑁂𑀲𑀼 𑀲𑀼𑀲𑀫𑀸𑀳𑀺𑀢𑁄;

𑀉𑀧𑁂𑀢𑁄 𑀤𑀫𑀲𑀘𑁆𑀘𑁂𑀦, 𑀲 𑀯𑁂 𑀓𑀸𑀲𑀸𑀯𑀫𑀭𑀳𑀢𑀺.

𑁧𑁨𑁪. 𑀲𑀫𑀧𑁆𑀧𑀺𑀢𑁄 𑀧𑀼𑀣𑀼𑀲𑀮𑁆𑀮𑁂𑀦 𑀦𑀸𑀕𑁄, 𑀅𑀤𑀼𑀝𑁆𑀞𑀘𑀺𑀢𑁆𑀢𑁄 𑀮𑀼𑀤𑁆𑀤𑀓𑀫𑀚𑁆𑀛𑀪𑀸𑀲𑀺;

𑀓𑀺𑀫𑀢𑁆𑀣𑀬𑀁 𑀓𑀺𑀲𑁆𑀲 𑀯𑀸 𑀲𑀫𑁆𑀫 𑀳𑁂𑀢𑀼, 𑀫𑀫𑀁 𑀯𑀥𑀻 𑀓𑀲𑁆𑀲 𑀯𑀸𑀬𑀁 𑀧𑀬𑁄𑀕𑁄.

𑁧𑁨𑁫. 𑀓𑀸𑀲𑀺𑀲𑁆𑀲 𑀭𑀜𑁆𑀜𑁄 𑀫𑀳𑁂𑀲𑀻 𑀪𑀤𑀦𑁆𑀢𑁂, 𑀲𑀸 𑀧𑀽𑀚𑀺𑀢𑀸 𑀭𑀸𑀚𑀓𑀼𑀮𑁂 𑀲𑀼𑀪𑀤𑁆𑀤𑀸;

𑀢𑀁 𑀅𑀤𑁆𑀤𑀲𑀸 𑀲𑀸 𑀘 𑀫𑀫𑀁 𑀅𑀲𑀁𑀲𑀺, 𑀤𑀦𑁆𑀢𑁂𑀳𑀺 𑀅𑀢𑁆𑀣𑁄𑀢𑀺 𑀘 𑀫𑀁 [𑀅𑀢𑁆𑀣𑁄𑀢𑀺 𑀫𑀫𑀁 (𑀲𑁆𑀬𑀸. 𑀓.)] 𑀅𑀯𑁄𑀘.

𑁧𑁨𑁬. 𑀩𑀳𑀽 𑀳𑀺 𑀫𑁂 𑀤𑀦𑁆𑀢𑀬𑀼𑀕𑀸 𑀉𑀴𑀸𑀭𑀸, 𑀬𑁂 𑀫𑁂 𑀧𑀺𑀢𑀽𑀦𑀜𑁆𑀘 [𑀧𑀺𑀢𑀼𑀦𑁆𑀦𑀫𑁆𑀧𑀺 (𑀧𑀻.)] 𑀧𑀺𑀢𑀸𑀫𑀳𑀸𑀦𑀁;

𑀚𑀸𑀦𑀸𑀢𑀺 𑀲𑀸 𑀓𑁄𑀥𑀦𑀸 𑀭𑀸𑀚𑀧𑀼𑀢𑁆𑀢𑀻, 𑀯𑀥𑀢𑁆𑀣𑀺𑀓𑀸 𑀯𑁂𑀭𑀫𑀓𑀸𑀲𑀺 𑀩𑀸𑀮𑀸.

𑁧𑁨𑁭. 𑀉𑀝𑁆𑀞𑁂𑀳𑀺 𑀢𑁆𑀯𑀁 𑀮𑀼𑀤𑁆𑀤 𑀔𑀭𑀁 𑀕𑀳𑁂𑀢𑁆𑀯𑀸, 𑀤𑀦𑁆𑀢𑁂 𑀇𑀫𑁂 𑀙𑀺𑀦𑁆𑀤 𑀧𑀼𑀭𑀸 𑀫𑀭𑀸𑀫𑀺;

𑀯𑀚𑁆𑀚𑀸𑀲𑀺 𑀢𑀁 𑀓𑁄𑀥𑀦𑀁 𑀭𑀸𑀚𑀧𑀼𑀢𑁆𑀢𑀺𑀁, ‘‘𑀦𑀸𑀕𑁄 𑀳𑀢𑁄 𑀳𑀦𑁆𑀤 𑀇𑀫𑀲𑁆𑀲 𑀤𑀦𑁆𑀢𑀸’’.

𑁧𑁨𑁮. 𑀉𑀝𑁆𑀞𑀸𑀬 𑀲𑁄 𑀮𑀼𑀤𑁆𑀤𑁄 𑀔𑀭𑀁 𑀕𑀳𑁂𑀢𑁆𑀯𑀸, 𑀙𑁂𑀢𑁆𑀯𑀸𑀦 𑀤𑀦𑁆𑀢𑀸𑀦𑀺 𑀕𑀚𑀼𑀢𑁆𑀢𑀫𑀲𑁆𑀲;

𑀯𑀕𑁆𑀕𑀽 𑀲𑀼𑀪𑁂 𑀅𑀧𑁆𑀧𑀝𑀺𑀫𑁂 𑀧𑀣𑀩𑁆𑀬𑀸, 𑀆𑀤𑀸𑀬 𑀧𑀓𑁆𑀓𑀸𑀫𑀺 𑀢𑀢𑁄 𑀳𑀺 𑀔𑀺𑀧𑁆𑀧𑀁.

𑁧𑁨𑁯. 𑀪𑀬𑀝𑁆𑀝𑀺𑀢𑀸 [𑀪𑀬𑀤𑁆𑀤𑀺𑀢𑀸 (𑀲𑀻. 𑀧𑀻.)] 𑀦𑀸𑀕𑀯𑀥𑁂𑀦 𑀅𑀝𑁆𑀝𑀸, 𑀬𑁂 𑀢𑁂 𑀦𑀸𑀕𑀸 𑀅𑀝𑁆𑀞 𑀤𑀺𑀲𑀸 𑀯𑀺𑀥𑀸𑀯𑀼𑀁;

𑀅𑀤𑀺𑀲𑁆𑀯𑀸𑀦 [𑀅𑀤𑀺𑀲𑁆𑀯 (𑀲𑀻. 𑀧𑀻.)] 𑀧𑁄𑀲𑀁 𑀕𑀚𑀧𑀘𑁆𑀘𑀫𑀺𑀢𑁆𑀢𑀁, 𑀧𑀘𑁆𑀘𑀸𑀕𑀫𑀼𑀁 𑀬𑁂𑀦 𑀲𑁄 𑀦𑀸𑀕𑀭𑀸𑀚𑀸.

𑁧𑁩𑁦. 𑀢𑁂 𑀢𑀢𑁆𑀣 𑀓𑀦𑁆𑀤𑀺𑀢𑁆𑀯𑀸 𑀭𑁄𑀤𑀺𑀢𑁆𑀯𑀸𑀦 [𑀭𑁄𑀤𑀺𑀢𑁆𑀯 (𑀲𑀻. 𑀧𑀻.)] 𑀦𑀸𑀕𑀸, 𑀲𑀻𑀲𑁂 𑀲𑀓𑁂 𑀧𑀁𑀲𑀼𑀓𑀁 𑀑𑀓𑀺𑀭𑀺𑀢𑁆𑀯𑀸;

𑀅𑀕𑀫𑀁𑀲𑀼 𑀢𑁂 𑀲𑀩𑁆𑀩𑁂 𑀲𑀓𑀁 𑀦𑀺𑀓𑁂𑀢𑀁, 𑀧𑀼𑀭𑀓𑁆𑀔𑀢𑁆𑀯𑀸 𑀫𑀳𑁂𑀲𑀺𑀁 𑀲𑀩𑁆𑀩𑀪𑀤𑁆𑀤𑀁.

𑁧𑁩𑁧. 𑀆𑀤𑀸𑀬 𑀤𑀦𑁆𑀢𑀸𑀦𑀺 𑀕𑀚𑀼𑀢𑁆𑀢𑀫𑀲𑁆𑀲, 𑀯𑀕𑁆𑀕𑀽 𑀲𑀼𑀪𑁂 𑀅𑀧𑁆𑀧𑀝𑀺𑀫𑁂 𑀧𑀣𑀩𑁆𑀬𑀸;

𑀲𑀼𑀯𑀡𑁆𑀡𑀭𑀸𑀚𑀻𑀳𑀺 𑀲𑀫𑀦𑁆𑀢𑀫𑁄𑀤𑀭𑁂, 𑀲𑁄 𑀮𑀼𑀤𑁆𑀤𑀓𑁄 𑀓𑀸𑀲𑀺𑀧𑀼𑀭𑀁 𑀉𑀧𑀸𑀕𑀫𑀺;

𑀉𑀧𑀦𑁂𑀲𑀺 𑀲𑁄 𑀭𑀸𑀚𑀓𑀜𑁆𑀜𑀸𑀬 𑀤𑀦𑁆𑀢𑁂, 𑀦𑀸𑀕𑁄 𑀳𑀢𑁄 𑀳𑀦𑁆𑀤 𑀇𑀫𑀲𑁆𑀲 𑀤𑀦𑁆𑀢𑀸.

𑁧𑁩𑁨. 𑀤𑀺𑀲𑁆𑀯𑀸𑀦 𑀤𑀦𑁆𑀢𑀸𑀦𑀺 𑀕𑀚𑀼𑀢𑁆𑀢𑀫𑀲𑁆𑀲, 𑀪𑀢𑁆𑀢𑀼𑀧𑁆𑀧𑀺𑀬𑀲𑁆𑀲 𑀧𑀼𑀭𑀺𑀫𑀸𑀬 𑀚𑀸𑀢𑀺𑀬𑀸;

𑀢𑀢𑁆𑀣𑁂𑀯 𑀢𑀲𑁆𑀲𑀸 𑀳𑀤𑀬𑀁 𑀅𑀨𑀸𑀮𑀺, 𑀢𑁂𑀦𑁂𑀯 𑀲𑀸 𑀓𑀸𑀮𑀫𑀓𑀸𑀲𑀺 𑀩𑀸𑀮𑀸.

𑁧𑁩𑁩. 𑀲𑀫𑁆𑀩𑁄𑀥𑀺𑀧𑀢𑁆𑀢𑁄 𑀲 [𑀘 (𑀲𑀻. 𑀲𑁆𑀬𑀸.), 𑀯 (𑀧𑀻.)] 𑀫𑀳𑀸𑀦𑀼𑀪𑀸𑀯𑁄, 𑀲𑀺𑀢𑀁 𑀅𑀓𑀸𑀲𑀺 𑀧𑀭𑀺𑀲𑀸𑀬 𑀫𑀚𑁆𑀛𑁂;

𑀧𑀼𑀘𑁆𑀙𑀺𑀁𑀲𑀼 𑀪𑀺𑀓𑁆𑀔𑀽 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀸, 𑀦𑀸𑀓𑀸𑀭𑀡𑁂 𑀧𑀸𑀢𑀼𑀓𑀭𑁄𑀦𑁆𑀢𑀺 𑀩𑀼𑀤𑁆𑀥𑀸.

𑁧𑁩𑁪. 𑀬𑀫𑀤𑁆𑀤𑀲𑀸𑀣 𑀤𑀳𑀭𑀺𑀁 𑀓𑀼𑀫𑀸𑀭𑀺𑀁, 𑀓𑀸𑀲𑀸𑀬𑀯𑀢𑁆𑀣𑀁 𑀅𑀦𑀕𑀸𑀭𑀺𑀬𑀁 𑀘𑀭𑀦𑁆𑀢𑀺𑀁;

𑀲𑀸 𑀔𑁄 𑀢𑀤𑀸 𑀭𑀸𑀚𑀓𑀜𑁆𑀜𑀸 𑀅𑀳𑁄𑀲𑀺, 𑀅𑀳𑀁 𑀢𑀤𑀸 𑀦𑀸𑀕𑀭𑀸𑀚𑀸 𑀅𑀳𑁄𑀲𑀺𑀁.

𑁧𑁩𑁫. 𑀆𑀤𑀸𑀬 𑀤𑀦𑁆𑀢𑀸𑀦𑀺 𑀕𑀚𑀼𑀢𑁆𑀢𑀫𑀲𑁆𑀲, 𑀯𑀕𑁆𑀕𑀽 𑀲𑀼𑀪𑁂 𑀅𑀧𑁆𑀧𑀝𑀺𑀫𑁂 𑀧𑀣𑀩𑁆𑀬𑀸;

𑀬𑁄 𑀮𑀼𑀤𑁆𑀤𑀓𑁄 𑀓𑀸𑀲𑀺𑀧𑀼𑀭𑀁 𑀉𑀧𑀸𑀕𑀫𑀺, 𑀲𑁄 𑀔𑁄 𑀢𑀤𑀸 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺.

𑁧𑁩𑁬. 𑀅𑀦𑀸𑀯𑀲𑀽𑀭𑀁 𑀘𑀺𑀭𑀭𑀢𑁆𑀢𑀲𑀁𑀲𑀺𑀢𑀁, 𑀉𑀘𑁆𑀘𑀸𑀯𑀘𑀁 [𑀉𑀘𑀁 𑀦𑀻𑀘𑀁 (𑀲𑀻. 𑀲𑁆𑀬𑀸. 𑀧𑀻.)] 𑀘𑀭𑀺𑀢𑀫𑀺𑀤𑀁 𑀧𑀼𑀭𑀸𑀡𑀁;

𑀯𑀻𑀢𑀤𑁆𑀤𑀭𑁄 𑀯𑀻𑀢𑀲𑁄𑀓𑁄 𑀯𑀺𑀲𑀮𑁆𑀮𑁄, 𑀲𑀬𑀁 𑀅𑀪𑀺𑀜𑁆𑀜𑀸𑀬 𑀅𑀪𑀸𑀲𑀺 𑀩𑀼𑀤𑁆𑀥𑁄.

𑁧𑁩𑁭. 𑀅𑀳𑀁 𑀯𑁄 𑀢𑁂𑀦 𑀓𑀸𑀮𑁂𑀦, 𑀅𑀳𑁄𑀲𑀺𑀁 𑀢𑀢𑁆𑀣 𑀪𑀺𑀓𑁆𑀔𑀯𑁄;

𑀦𑀸𑀕𑀭𑀸𑀚𑀸 𑀢𑀤𑀸 𑀳𑁄𑀫𑀺 [𑀳𑁄𑀲𑀺𑀁 (𑀲𑀻. 𑀲𑁆𑀬𑀸. 𑀧𑀻.)], 𑀏𑀯𑀁 𑀥𑀸𑀭𑁂𑀣 𑀚𑀸𑀢𑀓𑀦𑁆𑀢𑀺.

𑀙𑀤𑁆𑀤𑀦𑁆𑀢𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.