𑁫𑁧𑁩. 𑀚𑀬𑀤𑁆𑀤𑀺𑀲𑀚𑀸𑀢𑀓𑀁 (𑁩)

𑁬𑁪. 𑀘𑀺𑀭𑀲𑁆𑀲𑀁 𑀯𑀢 𑀫𑁂 𑀉𑀤𑀧𑀸𑀤𑀺 𑀅𑀚𑁆𑀚, 𑀪𑀓𑁆𑀔𑁄 𑀫𑀳𑀸 𑀲𑀢𑁆𑀢𑀫𑀺𑀪𑀢𑁆𑀢𑀓𑀸𑀮𑁂;

𑀓𑀼𑀢𑁄𑀲𑀺 𑀓𑁄 𑀯𑀸𑀲𑀺 𑀢𑀤𑀺𑀗𑁆𑀖 𑀩𑁆𑀭𑀽𑀳𑀺, 𑀆𑀘𑀺𑀓𑁆𑀔 𑀚𑀸𑀢𑀺𑀁 𑀯𑀺𑀤𑀺𑀢𑁄 𑀬𑀣𑀸𑀲𑀺.

𑁬𑁫. 𑀧𑀜𑁆𑀘𑀸𑀮𑀭𑀸𑀚𑀸 𑀫𑀺𑀕𑀯𑀁 𑀧𑀯𑀺𑀝𑁆𑀞𑁄, 𑀚𑀬𑀤𑁆𑀤𑀺𑀲𑁄 𑀦𑀸𑀫 𑀬𑀤𑀺𑀲𑁆𑀲𑀼𑀢𑁄 𑀢𑁂;

𑀘𑀭𑀸𑀫𑀺 𑀓𑀘𑁆𑀙𑀸𑀦𑀺 𑀯𑀦𑀸𑀦𑀺 𑀘𑀸𑀳𑀁, 𑀧𑀲𑀤𑀁 𑀇𑀫𑀁 𑀔𑀸𑀤 𑀫𑀫𑀚𑁆𑀚 𑀫𑀼𑀜𑁆𑀘.

𑁬𑁬. 𑀲𑁂𑀦𑁂𑀯 𑀢𑁆𑀯𑀁 𑀧𑀡𑀲𑀺 𑀲𑀲𑁆𑀲𑀫𑀸𑀦𑁄 [𑀲𑀬𑁆𑀳𑀫𑀸𑀦𑁄 (𑀲𑁆𑀬𑀸. 𑀓.)], 𑀫𑀫𑁂𑀲 𑀪𑀓𑁆𑀔𑁄 𑀧𑀲𑀤𑁄 𑀬𑀁 𑀯𑀤𑁂𑀲𑀺;

𑀢𑀁 𑀔𑀸𑀤𑀺𑀬𑀸𑀦 𑀧𑀲𑀤𑀁 𑀚𑀺𑀖𑀜𑁆𑀜𑀁 [𑀚𑀺𑀖𑀘𑁆𑀙𑀁 (?)], 𑀔𑀸𑀤𑀺𑀲𑁆𑀲𑀁 𑀧𑀘𑁆𑀙𑀸 𑀦 𑀯𑀺𑀮𑀸𑀧𑀓𑀸𑀮𑁄.

𑁬𑁭. 𑀦 𑀘𑀢𑁆𑀣𑀺 𑀫𑁄𑀓𑁆𑀔𑁄 𑀫𑀫 𑀦𑀺𑀓𑁆𑀓𑀬𑁂𑀦 [𑀯𑀺𑀓𑁆𑀓𑀬𑁂𑀦 (𑀲𑀻.)], 𑀕𑀦𑁆𑀢𑁆𑀯𑀸𑀦 𑀧𑀘𑁆𑀘𑀸𑀕𑀫𑀦𑀸𑀬 𑀧𑀡𑁆𑀳𑁂;

𑀢𑀁 𑀲𑀗𑁆𑀓𑀭𑀁 [𑀲𑀗𑁆𑀕𑀭𑀁 (𑀲𑀻. 𑀲𑁆𑀬𑀸. 𑀧𑀻.)] 𑀩𑁆𑀭𑀸𑀳𑁆𑀫𑀡𑀲𑁆𑀲𑀧𑁆𑀧𑀤𑀸𑀬, 𑀲𑀘𑁆𑀘𑀸𑀦𑀼𑀭𑀓𑁆𑀔𑀻 𑀧𑀼𑀦𑀭𑀸𑀯𑀚𑀺𑀲𑁆𑀲𑀁.

𑁬𑁮. 𑀓𑀺𑀁 𑀓𑀫𑁆𑀫𑀚𑀸𑀢𑀁 𑀅𑀦𑀼𑀢𑀧𑁆𑀧𑀢𑁂 𑀢𑁆𑀯𑀁 [𑀅𑀦𑀼𑀢𑀧𑁆𑀧𑀢𑀻 𑀢𑀁 (𑀲𑀻. 𑀧𑀻.)], 𑀧𑀢𑁆𑀢𑀁 𑀲𑀫𑀻𑀧𑀁 𑀫𑀭𑀡𑀲𑁆𑀲 𑀭𑀸𑀚;

𑀆𑀘𑀺𑀓𑁆𑀔 𑀫𑁂 𑀢𑀁 𑀅𑀧𑀺 𑀲𑀓𑁆𑀓𑀼𑀡𑁂𑀫𑀼, 𑀅𑀦𑀼𑀚𑀸𑀦𑀺𑀢𑀼𑀁 𑀆𑀕𑀫𑀦𑀸𑀬 𑀧𑀡𑁆𑀳𑁂.

𑁬𑁯. 𑀓𑀢𑀸 𑀫𑀬𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀦𑀸𑀲𑀸, 𑀢𑀁 𑀲𑀗𑁆𑀓𑀭𑀁 𑀧𑀝𑀺𑀫𑀼𑀓𑁆𑀓𑀁 𑀦 𑀫𑀼𑀢𑁆𑀢𑀁;

𑀢𑀁 𑀲𑀗𑁆𑀓𑀭𑀁 𑀩𑁆𑀭𑀸𑀳𑁆𑀫𑀡𑀲𑁆𑀲𑀧𑁆𑀧𑀤𑀸𑀬, 𑀲𑀘𑁆𑀘𑀸𑀦𑀼𑀭𑀓𑁆𑀔𑀻 𑀧𑀼𑀦𑀭𑀸𑀯𑀚𑀺𑀲𑁆𑀲𑀁.

𑁭𑁦. 𑀬𑀸 𑀢𑁂 𑀓𑀢𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀦𑀸𑀲𑀸, 𑀢𑀁 𑀲𑀗𑁆𑀓𑀭𑀁 𑀧𑀝𑀺𑀫𑀼𑀓𑁆𑀓𑀁 𑀦 𑀫𑀼𑀢𑁆𑀢𑀁;

𑀢𑀁 𑀲𑀗𑁆𑀓𑀭𑀁 𑀩𑁆𑀭𑀸𑀳𑁆𑀫𑀡𑀲𑁆𑀲𑀧𑁆𑀧𑀤𑀸𑀬, 𑀲𑀘𑁆𑀘𑀸𑀦𑀼𑀭𑀓𑁆𑀔𑀻 𑀧𑀼𑀦𑀭𑀸𑀯𑀚𑀲𑁆𑀲𑀼.

𑁭𑁧. 𑀫𑀼𑀢𑁆𑀢𑁄 𑀘 𑀲𑁄 𑀧𑁄𑀭𑀺𑀲𑀸𑀤𑀲𑁆𑀲 [𑀧𑀼𑀭𑀺𑀲𑀸𑀤𑀲𑁆𑀲 (𑀧𑀻.)] 𑀳𑀢𑁆𑀣𑀸, 𑀕𑀦𑁆𑀢𑁆𑀯𑀸 𑀲𑀓𑀁 𑀫𑀦𑁆𑀤𑀺𑀭𑀁 𑀓𑀸𑀫𑀓𑀸𑀫𑀻;

𑀢𑀁 𑀲𑀗𑁆𑀓𑀭𑀁 𑀩𑁆𑀭𑀸𑀳𑁆𑀫𑀡𑀲𑁆𑀲𑀧𑁆𑀧𑀤𑀸𑀬, 𑀆𑀫𑀦𑁆𑀢𑀬𑀻 𑀧𑀼𑀢𑁆𑀢𑀫𑀮𑀻𑀦𑀲𑀢𑁆𑀢𑀁 [𑀲𑀢𑁆𑀢𑀼𑀁 (𑀲𑁆𑀬𑀸. 𑀧𑀻. 𑀓.)].

𑁭𑁨. 𑀅𑀚𑁆𑀚𑁂𑀯 𑀭𑀚𑁆𑀚𑀁 𑀅𑀪𑀺𑀲𑀺𑀜𑁆𑀘𑀬𑀲𑁆𑀲𑀼, 𑀥𑀫𑁆𑀫𑀁 𑀘𑀭 𑀲𑁂𑀲𑀼 𑀧𑀭𑁂𑀲𑀼 𑀘𑀸𑀧𑀺;

𑀅𑀥𑀫𑁆𑀫𑀓𑀸𑀭𑁄 𑀘 𑀢𑁂 𑀫𑀸𑀳𑀼 𑀭𑀝𑁆𑀞𑁂, 𑀕𑀘𑁆𑀙𑀸𑀫𑀳𑀁 𑀧𑁄𑀭𑀺𑀲𑀸𑀤𑀲𑁆𑀲 𑀜𑀢𑁆𑀢𑁂 [𑀜𑀦𑁆𑀢𑁂 (𑀲𑁆𑀬𑀸.)].

𑁭𑁩. 𑀓𑀺𑀁 𑀓𑀫𑁆𑀫 𑀓𑀼𑀩𑁆𑀩𑀁 𑀢𑀯 𑀤𑁂𑀯 𑀧𑀸𑀯 [𑀤𑁂𑀯𑀧𑀸𑀤𑁂 (𑀲𑀻. 𑀲𑁆𑀬𑀸. 𑀧𑀻.)], 𑀦𑀸𑀭𑀸𑀥𑀬𑀻 𑀢𑀁 𑀢𑀤𑀺𑀘𑁆𑀙𑀸𑀫𑀺 𑀲𑁄𑀢𑀼𑀁;

𑀬𑀫𑀚𑁆𑀚 𑀭𑀚𑁆𑀚𑀫𑁆𑀳𑀺 𑀉𑀤𑀲𑁆𑀲𑀬𑁂 𑀢𑀼𑀯𑀁, 𑀭𑀚𑁆𑀚𑀫𑁆𑀧𑀺 𑀦𑀺𑀘𑁆𑀙𑁂𑀬𑁆𑀬𑀁 𑀢𑀬𑀸 𑀯𑀺𑀦𑀸𑀳𑀁.

𑁭𑁪. 𑀦 𑀓𑀫𑁆𑀫𑀼𑀦𑀸 𑀯𑀸 𑀯𑀘𑀲𑀸 𑀯 𑀢𑀸𑀢, 𑀅𑀧𑀭𑀸𑀥𑀺𑀢𑁄𑀳𑀁 𑀢𑀼𑀯𑀺𑀬𑀁 𑀲𑀭𑀸𑀫𑀺;

𑀲𑀦𑁆𑀥𑀺𑀜𑁆𑀘 [𑀲𑀤𑁆𑀥𑀺𑀁 𑀘 (𑀓.)] 𑀓𑀢𑁆𑀯𑀸 𑀧𑀼𑀭𑀺𑀲𑀸𑀤𑀓𑁂𑀦, 𑀲𑀘𑁆𑀘𑀸𑀦𑀼𑀭𑀓𑁆𑀔𑀻 𑀧𑀼𑀦𑀸𑀳𑀁 𑀕𑀫𑀺𑀲𑁆𑀲𑀁.

𑁭𑁫. 𑀅𑀳𑀁 𑀕𑀫𑀺𑀲𑁆𑀲𑀸𑀫𑀺 𑀇𑀥𑁂𑀯 𑀳𑁄𑀳𑀺, 𑀦𑀢𑁆𑀣𑀺 𑀢𑀢𑁄 𑀚𑀻𑀯𑀢𑁄 𑀯𑀺𑀧𑁆𑀧𑀫𑁄𑀓𑁆𑀔𑁄;

𑀲𑀘𑁂 𑀢𑀼𑀯𑀁 𑀕𑀘𑁆𑀙𑀲𑀺𑀬𑁂𑀯 𑀭𑀸𑀚, 𑀅𑀳𑀫𑁆𑀧𑀺 𑀕𑀘𑁆𑀙𑀸𑀫𑀺 𑀉𑀪𑁄 𑀦 𑀳𑁄𑀫.

𑁭𑁬. 𑀅𑀤𑁆𑀥𑀸 𑀳𑀺 𑀢𑀸𑀢 𑀲𑀢𑀸𑀦𑁂𑀲 𑀥𑀫𑁆𑀫𑁄, 𑀫𑀭𑀡𑀸 𑀘 𑀫𑁂 𑀤𑀼𑀓𑁆𑀔𑀢𑀭𑀁 𑀢𑀤𑀲𑁆𑀲;

𑀓𑀫𑁆𑀫𑀸𑀲𑀧𑀸𑀤𑁄 𑀢𑀁 𑀬𑀤𑀸 𑀧𑀘𑀺𑀢𑁆𑀯𑀸, 𑀧𑀲𑀬𑁆𑀳 𑀔𑀸𑀤𑁂 𑀪𑀺𑀤𑀸 𑀭𑀼𑀓𑁆𑀔𑀲𑀽𑀮𑁂.

𑁭𑁭. 𑀧𑀸𑀡𑁂𑀦 𑀢𑁂 𑀧𑀸𑀡𑀫𑀳𑀁 𑀦𑀺𑀫𑀺𑀲𑁆𑀲𑀁, 𑀫𑀸 𑀢𑁆𑀯𑀁 𑀅𑀕𑀸 𑀧𑁄𑀭𑀺𑀲𑀸𑀤𑀲𑁆𑀲 𑀜𑀢𑁆𑀢𑁂;

𑀏𑀢𑀜𑁆𑀘 𑀢𑁂 𑀧𑀸𑀡𑀫𑀳𑀁 𑀦𑀺𑀫𑀺𑀲𑁆𑀲𑀁, 𑀢𑀲𑁆𑀫𑀸 𑀫𑀢𑀁 𑀚𑀻𑀯𑀺𑀢𑀲𑁆𑀲 𑀯𑀡𑁆𑀡𑁂𑀫𑀺 [𑀯𑀭𑁂𑀫𑀺 (𑀲𑀻.)].

𑁭𑁮. 𑀢𑀢𑁄 𑀳𑀯𑁂 𑀥𑀺𑀢𑀺𑀫𑀸 𑀭𑀸𑀚𑀧𑀼𑀢𑁆𑀢𑁄, 𑀯𑀦𑁆𑀤𑀺𑀢𑁆𑀯𑀸 𑀫𑀸𑀢𑀼 𑀘 𑀧𑀺𑀢𑀼 𑀘 [𑀯𑀦𑁆𑀤𑀺𑀢𑁆𑀣 𑀫𑀸𑀢𑀼𑀘𑁆𑀘 𑀧𑀺𑀢𑀼𑀘𑁆𑀘 (𑀲𑀻. 𑀧𑀻.)] 𑀧𑀸𑀤𑁂;

𑀤𑀼𑀔𑀺𑀦𑀺𑀲𑁆𑀲 𑀫𑀸𑀢𑀸 𑀦𑀺𑀧𑀢𑀸 [𑀦𑀺𑀧𑀢𑀻 (𑀲𑀻. 𑀧𑀻.)] 𑀧𑀣𑀩𑁆𑀬𑀸, 𑀧𑀺𑀢𑀸𑀲𑁆𑀲 𑀧𑀕𑁆𑀕𑀬𑁆𑀳 𑀪𑀼𑀚𑀸𑀦𑀺 𑀓𑀦𑁆𑀤𑀢𑀺.

𑁭𑁯. 𑀢𑀁 𑀕𑀘𑁆𑀙𑀦𑁆𑀢𑀁 𑀢𑀸𑀯 𑀧𑀺𑀢𑀸 𑀯𑀺𑀤𑀺𑀢𑁆𑀯𑀸, 𑀧𑀭𑀫𑁆𑀫𑀼𑀔𑁄 𑀯𑀦𑁆𑀤𑀢𑀺 𑀧𑀜𑁆𑀚𑀮𑀻𑀓𑁄;

𑀲𑁄𑀫𑁄 𑀘 𑀭𑀸𑀚𑀸 𑀯𑀭𑀼𑀡𑁄 𑀘 𑀭𑀸𑀚𑀸, 𑀧𑀚𑀸𑀧𑀢𑀻 𑀘𑀦𑁆𑀤𑀺𑀫𑀸 𑀲𑀽𑀭𑀺𑀬𑁄 𑀘;

𑀏𑀢𑁂𑀳𑀺 𑀕𑀼𑀢𑁆𑀢𑁄 𑀧𑀼𑀭𑀺𑀲𑀸𑀤𑀓𑀫𑁆𑀳𑀸, 𑀅𑀦𑀼𑀜𑁆𑀜𑀸𑀢𑁄 𑀲𑁄𑀢𑁆𑀣𑀺 𑀧𑀘𑁆𑀘𑁂𑀳𑀺 𑀢𑀸𑀢.

𑁮𑁦. 𑀬𑀁 𑀤𑀡𑁆𑀟𑀓𑀺𑀭𑀜𑁆𑀜𑁄 𑀕𑀢𑀲𑁆𑀲 [𑀬𑀁 𑀤𑀡𑁆𑀟𑀓𑀸𑀭𑀜𑁆𑀜𑀕𑀢𑀲𑁆𑀲 (𑀧𑀻.)] 𑀫𑀸𑀢𑀸, 𑀭𑀸𑀫𑀲𑁆𑀲𑀓𑀸𑀲𑀺 𑀲𑁄𑀢𑁆𑀣𑀸𑀦𑀁 𑀲𑀼𑀕𑀼𑀢𑁆𑀢𑀸;

𑀢𑀁 𑀢𑁂 𑀅𑀳𑀁 𑀲𑁄𑀢𑁆𑀣𑀸𑀦𑀁 𑀓𑀭𑁄𑀫𑀺, 𑀏𑀢𑁂𑀦 𑀲𑀘𑁆𑀘𑁂𑀦 𑀲𑀭𑀦𑁆𑀢𑀼 𑀤𑁂𑀯𑀸;

𑀅𑀦𑀼𑀜𑁆𑀜𑀸𑀢𑁄 𑀲𑁄𑀢𑁆𑀣𑀺 𑀧𑀘𑁆𑀘𑁂𑀳𑀺 𑀧𑀼𑀢𑁆𑀢.

𑁮𑁧. 𑀆𑀯𑀻 𑀭𑀳𑁄 𑀯𑀸𑀧𑀻 𑀫𑀦𑁄𑀧𑀤𑁄𑀲𑀁, 𑀦𑀸𑀳𑀁 𑀲𑀭𑁂 𑀚𑀸𑀢𑀼 𑀫𑀮𑀻𑀦𑀲𑀢𑁆𑀢𑁂;

𑀏𑀢𑁂𑀦 𑀲𑀘𑁆𑀘𑁂𑀦 𑀲𑀭𑀦𑁆𑀢𑀼 𑀤𑁂𑀯𑀸, 𑀅𑀦𑀼𑀜𑁆𑀜𑀸𑀢𑁄 𑀲𑁄𑀢𑁆𑀣𑀺 𑀧𑀘𑁆𑀘𑁂𑀳𑀺 𑀪𑀸𑀢𑀺𑀓 [𑀪𑀸𑀢 (𑀲𑀻.), 𑀪𑀸𑀢𑀸 (𑀲𑁆𑀬𑀸. 𑀧𑀻.)].

𑁮𑁨. 𑀬𑀲𑁆𑀫𑀸 𑀘 𑀫𑁂 𑀅𑀦𑀥𑀺𑀫𑀦𑁄𑀲𑀺 𑀲𑀸𑀫𑀺, 𑀦 𑀘𑀸𑀧𑀺 𑀫𑁂 𑀫𑀦𑀲𑀸 𑀅𑀧𑁆𑀧𑀺𑀬𑁄𑀲𑀺;

𑀏𑀢𑁂𑀦 𑀲𑀘𑁆𑀘𑁂𑀦 𑀲𑀭𑀦𑁆𑀢𑀼 𑀤𑁂𑀯𑀸, 𑀅𑀦𑀼𑀜𑁆𑀜𑀸𑀢𑁄 𑀲𑁄𑀢𑁆𑀣𑀺 𑀧𑀘𑁆𑀘𑁂𑀳𑀺 𑀲𑀸𑀫𑀺.

𑁮𑁩. 𑀩𑁆𑀭𑀳𑀸 𑀉𑀚𑀽 𑀘𑀸𑀭𑀼𑀫𑀼𑀔𑁄 𑀓𑀼𑀢𑁄𑀲𑀺, 𑀦 𑀫𑀁 𑀧𑀚𑀸𑀦𑀸𑀲𑀺 𑀯𑀦𑁂 𑀯𑀲𑀦𑁆𑀢𑀁;

𑀮𑀼𑀤𑁆𑀤𑀁 𑀫𑀁 𑀜𑀢𑁆𑀯𑀸 ‘‘𑀧𑀼𑀭𑀺𑀲𑀸𑀤𑀓𑁄’’𑀢𑀺, 𑀓𑁄 𑀲𑁄𑀢𑁆𑀣𑀺 𑀫𑀸𑀚𑀸𑀦𑀫𑀺𑀥𑀸’𑀯𑀚𑁂𑀬𑁆𑀬.

𑁮𑁪. 𑀚𑀸𑀦𑀸𑀫𑀺 𑀮𑀼𑀤𑁆𑀤 𑀧𑀼𑀭𑀺𑀲𑀸𑀤𑀓𑁄 𑀢𑁆𑀯𑀁, 𑀦 𑀢𑀁 𑀦 𑀚𑀸𑀦𑀸𑀫𑀺 𑀯𑀦𑁂 𑀯𑀲𑀦𑁆𑀢𑀁;

𑀅𑀳𑀜𑁆𑀘 𑀧𑀼𑀢𑁆𑀢𑁄𑀲𑁆𑀫𑀺 𑀚𑀬𑀤𑁆𑀤𑀺𑀲𑀲𑁆𑀲, 𑀫𑀫𑀚𑁆𑀚 𑀔𑀸𑀤 𑀧𑀺𑀢𑀼𑀦𑁄 𑀧𑀫𑁄𑀓𑁆𑀔𑀸.

𑁮𑁫. 𑀚𑀸𑀦𑀸𑀫𑀺 𑀧𑀼𑀢𑁆𑀢𑁄𑀢𑀺 [𑀧𑀼𑀢𑁆𑀢𑁄𑀲𑀺 (𑀲𑁆𑀬𑀸. 𑀓.)] 𑀚𑀬𑀤𑁆𑀤𑀺𑀲𑀲𑁆𑀲, 𑀢𑀣𑀸 𑀳𑀺 𑀯𑁄 𑀫𑀼𑀔𑀯𑀡𑁆𑀡𑁄 𑀉𑀪𑀺𑀦𑁆𑀦𑀁;

𑀲𑀼𑀤𑀼𑀓𑁆𑀓𑀭𑀜𑁆𑀜𑁂𑀯 [𑀲𑀼𑀤𑀼𑀓𑁆𑀓𑀭𑀜𑁆𑀘𑁂𑀯 (𑀲𑁆𑀬𑀸. 𑀧𑀻. 𑀓.)] 𑀓𑀢𑀁 𑀢𑀯𑁂𑀤𑀁, 𑀬𑁄 𑀫𑀢𑁆𑀢𑀼𑀫𑀺𑀘𑁆𑀙𑁂 𑀧𑀺𑀢𑀼𑀦𑁄 𑀧𑀫𑁄𑀓𑁆𑀔𑀸.

𑁮𑁬. 𑀦 𑀤𑀼𑀓𑁆𑀓𑀭𑀁 𑀓𑀺𑀜𑁆𑀘𑀺 𑀫𑀳𑁂𑀢𑁆𑀣 𑀫𑀜𑁆𑀜𑁂, 𑀬𑁄 𑀫𑀢𑁆𑀢𑀼𑀫𑀺𑀘𑁆𑀙𑁂 𑀧𑀺𑀢𑀼𑀦𑁄 𑀧𑀫𑁄𑀓𑁆𑀔𑀸;

𑀫𑀸𑀢𑀼 𑀘 [𑀫𑀸𑀢𑀼𑀘𑁆𑀘 (𑀲𑀻.)] 𑀳𑁂𑀢𑀼 𑀧𑀭𑀮𑁄𑀓 𑀕𑀦𑁆𑀢𑁆𑀯𑀸 [𑀕𑀫𑁆𑀬𑀸 (𑀲𑀻. 𑀲𑁆𑀬𑀸.), 𑀕𑀫𑁆𑀬 (𑀧𑀻.)], 𑀲𑀼𑀔𑁂𑀦 𑀲𑀕𑁆𑀕𑁂𑀦 𑀘 𑀲𑀫𑁆𑀧𑀬𑀼𑀢𑁆𑀢𑁄.

𑁮𑁭. 𑀅𑀳𑀜𑁆𑀘 𑀔𑁄 𑀅𑀢𑁆𑀢𑀦𑁄 𑀧𑀸𑀧𑀓𑀺𑀭𑀺𑀬𑀁, 𑀆𑀯𑀻 𑀭𑀳𑁄 𑀯𑀸𑀧𑀺 𑀲𑀭𑁂 𑀦 𑀚𑀸𑀢𑀼;

𑀲𑀗𑁆𑀔𑀸𑀢𑀚𑀸𑀢𑀻𑀫𑀭𑀡𑁄𑀳𑀫𑀲𑁆𑀫𑀺, 𑀬𑀣𑁂𑀯 𑀫𑁂 𑀇𑀥 𑀢𑀣𑀸 𑀧𑀭𑀢𑁆𑀣.

𑁮𑁮. 𑀔𑀸𑀤𑀚𑁆𑀚 𑀫𑀁 𑀤𑀸𑀦𑀺 𑀫𑀳𑀸𑀦𑀼𑀪𑀸𑀯, 𑀓𑀭𑀲𑁆𑀲𑀼 𑀓𑀺𑀘𑁆𑀘𑀸𑀦𑀺 𑀇𑀫𑀁 𑀲𑀭𑀻𑀭𑀁;

𑀭𑀼𑀓𑁆𑀔𑀲𑁆𑀲 𑀯𑀸 𑀢𑁂 𑀧𑀧𑀢𑀸𑀫𑀺 𑀅𑀕𑁆𑀕𑀸, 𑀙𑀸𑀤𑀬𑀫𑀸𑀦𑁄 𑀫𑀬𑁆𑀳𑀁 𑀢𑁆𑀯𑀫𑀤𑁂𑀲𑀺 𑀫𑀁𑀲𑀁.

𑁮𑁯. 𑀇𑀤𑀜𑁆𑀘 𑀢𑁂 𑀭𑀼𑀘𑁆𑀘𑀢𑀺 𑀭𑀸𑀚𑀧𑀼𑀢𑁆𑀢, 𑀘𑀚𑁂𑀲𑀺 [𑀘𑀚𑀸𑀲𑀺 (𑀲𑀻. 𑀧𑀻.)] 𑀧𑀸𑀡𑀁 𑀧𑀺𑀢𑀼𑀦𑁄 𑀧𑀫𑁄𑀓𑁆𑀔𑀸;

𑀢𑀲𑁆𑀫𑀸 𑀳𑀺 𑀲𑁄 [𑀢𑀲𑁆𑀫𑀸𑀢𑀺𑀳 (𑀲𑀻. 𑀲𑁆𑀬𑀸.)] 𑀢𑁆𑀯𑀁 𑀢𑀭𑀫𑀸𑀦𑀭𑀽𑀧𑁄, 𑀲𑀫𑁆𑀪𑀜𑁆𑀚 𑀓𑀝𑁆𑀞𑀸𑀦𑀺 𑀚𑀮𑁂𑀳𑀺 𑀅𑀕𑁆𑀕𑀺𑀁.

𑁯𑁦. 𑀢𑀢𑁄 𑀳𑀯𑁂 𑀥𑀺𑀢𑀺𑀫𑀸 𑀭𑀸𑀚𑀧𑀼𑀢𑁆𑀢𑁄, 𑀤𑀸𑀭𑀼𑀁 𑀲𑀫𑀸𑀳𑀢𑁆𑀯𑀸 𑀫𑀳𑀦𑁆𑀢𑀫𑀕𑁆𑀕𑀺𑀁;

𑀲𑀦𑁆𑀤𑀻𑀧𑀬𑀺𑀢𑁆𑀯𑀸 𑀧𑀝𑀺𑀯𑁂𑀤𑀬𑀺𑀢𑁆𑀣, 𑀆𑀤𑀻𑀧𑀺𑀢𑁄 𑀤𑀸𑀦𑀺 𑀫𑀳𑀸𑀬𑀫𑀕𑁆𑀕𑀺 [𑀫𑀬𑀸 𑀬𑀓𑁆𑀔𑀫𑀕𑁆𑀕𑀺 (𑀓.)].

𑁯𑁧. 𑀔𑀸𑀤𑀚𑁆𑀚 𑀫𑀁 𑀤𑀸𑀦𑀺 𑀧𑀲𑀬𑁆𑀳𑀓𑀸𑀭𑀻, 𑀓𑀺𑀁 𑀫𑀁 𑀫𑀼𑀳𑀼𑀁 𑀧𑁂𑀓𑁆𑀔𑀲𑀺 𑀳𑀝𑁆𑀞𑀮𑁄𑀫𑁄;

𑀢𑀣𑀸 𑀢𑀣𑀸 𑀢𑀼𑀬𑁆𑀳𑀫𑀳𑀁 𑀓𑀭𑁄𑀫𑀺, 𑀬𑀣𑀸 𑀬𑀣𑀸 𑀫𑀁 𑀙𑀸𑀤𑀬𑀫𑀸𑀦𑁄 𑀅𑀤𑁂𑀲𑀺.

𑁯𑁨. 𑀓𑁄 𑀢𑀸𑀤𑀺𑀲𑀁 𑀅𑀭𑀳𑀢𑀺 𑀔𑀸𑀤𑀺𑀢𑀸𑀬𑁂, 𑀥𑀫𑁆𑀫𑁂 𑀞𑀺𑀢𑀁 𑀲𑀘𑁆𑀘𑀯𑀸𑀤𑀺𑀁 𑀯𑀤𑀜𑁆𑀜𑀼𑀁;

𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀨𑀮𑁂𑀬𑁆𑀬 𑀲𑀢𑁆𑀢𑀥𑀸, 𑀬𑁄 𑀢𑀸𑀤𑀺𑀲𑀁 𑀲𑀘𑁆𑀘𑀯𑀸𑀤𑀺𑀁 𑀅𑀤𑁂𑀬𑁆𑀬.

𑁯𑁩. 𑀇𑀤𑀜𑁆𑀳𑀺 𑀲𑁄 𑀩𑁆𑀭𑀸𑀳𑁆𑀫𑀡𑀁 𑀫𑀜𑁆𑀜𑀫𑀸𑀦𑁄, 𑀲𑀲𑁄 𑀅𑀯𑀸𑀲𑁂𑀲𑀺 𑀲𑀓𑁂 𑀲𑀭𑀻𑀭𑁂;

𑀢𑁂𑀦𑁂𑀯 𑀲𑁄 𑀘𑀦𑁆𑀤𑀺𑀫𑀸 𑀤𑁂𑀯𑀧𑀼𑀢𑁆𑀢𑁄, 𑀲𑀲𑀢𑁆𑀣𑀼𑀢𑁄 [𑀲𑀲𑀝𑁆𑀞𑀓𑁄 (𑀲𑁆𑀬𑀸.)] 𑀓𑀸𑀫𑀤𑀼𑀳𑀚𑁆𑀚 [𑀓𑀸𑀫𑀭𑀼𑀳𑀚𑁆𑀚 (𑀓.)] 𑀬𑀓𑁆𑀔.

𑁯𑁪. 𑀘𑀦𑁆𑀤𑁄 𑀬𑀣𑀸 𑀭𑀸𑀳𑀼𑀫𑀼𑀔𑀸 𑀧𑀫𑀼𑀢𑁆𑀢𑁄, 𑀯𑀺𑀭𑁄𑀘𑀢𑁂 𑀧𑀦𑁆𑀦𑀭𑀲𑁂𑀯 𑀪𑀸𑀡𑀼𑀫𑀸 [𑀪𑀸𑀦𑀼𑀫𑀸 (𑀲𑀻. 𑀧𑀻.)];

𑀏𑀯𑀁 𑀢𑀼𑀯𑀁 𑀧𑁄𑀭𑀺𑀲𑀸𑀤𑀸 𑀧𑀫𑀼𑀢𑁆𑀢𑁄, 𑀯𑀺𑀭𑁄𑀘 𑀓𑀧𑀺𑀮𑁂 [𑀓𑀫𑁆𑀧𑀺𑀮𑁆𑀮 (𑀲𑀻. 𑀧𑀻.), 𑀓𑀧𑀺𑀮𑁆𑀮𑁂 (𑀲𑁆𑀬𑀸.)] 𑀫𑀳𑀸𑀦𑀼𑀪𑀸𑀯;

𑀆𑀫𑁄𑀤𑀬𑀁 𑀧𑀺𑀢𑀭𑀁 𑀫𑀸𑀢𑀭𑀜𑁆𑀘, 𑀲𑀩𑁆𑀩𑁄 𑀘 𑀢𑁂 𑀦𑀦𑁆𑀤𑀢𑀼 𑀜𑀸𑀢𑀺𑀧𑀓𑁆𑀔𑁄.

𑁯𑁫. 𑀢𑀢𑁄 𑀳𑀯𑁂 𑀥𑀺𑀢𑀺𑀫𑀸 𑀭𑀸𑀚𑀧𑀼𑀢𑁆𑀢𑁄, 𑀓𑀢𑀜𑁆𑀚𑀮𑀻 𑀧𑀭𑀺𑀬𑀸𑀬 [𑀧𑀭𑀺𑀬𑀕𑀸 (𑀲𑀻.), 𑀧𑀕𑁆𑀕𑀬𑁆𑀳 (𑀲𑁆𑀬𑀸. 𑀧𑀻.)] 𑀧𑁄𑀭𑀺𑀲𑀸𑀤𑀁;

𑀅𑀦𑀼𑀜𑁆𑀜𑀸𑀢𑁄 𑀲𑁄𑀢𑁆𑀣𑀺 𑀲𑀼𑀔𑀻 𑀅𑀭𑁄𑀕𑁄, 𑀧𑀘𑁆𑀘𑀸𑀕𑀫𑀸 [𑀧𑀘𑁆𑀘𑀸𑀕 (𑀧𑀻.)] 𑀓𑀧𑀺𑀮𑀫𑀮𑀻𑀦𑀲𑀢𑁆𑀢𑀸 [𑀓𑀫𑁆𑀧𑀺𑀮𑁆𑀮’𑀫𑀮𑀻𑀦𑀲𑀢𑁆𑀢𑁄 (𑀲𑀻. 𑀧𑀻.), 𑀓𑀧𑀺𑀮’𑀫𑀮𑀻𑀦𑀲𑀢𑁆𑀢𑀸 (𑀓.)].

𑁯𑁬. 𑀢𑀁 𑀦𑁂𑀕𑀫𑀸 𑀚𑀸𑀦𑀧𑀤𑀸 𑀘 𑀲𑀩𑁆𑀩𑁂, 𑀳𑀢𑁆𑀣𑀸𑀭𑁄𑀳𑀸 𑀭𑀣𑀺𑀓𑀸 𑀧𑀢𑁆𑀢𑀺𑀓𑀸 𑀘;

𑀦𑀫𑀲𑁆𑀲𑀫𑀸𑀦𑀸 𑀧𑀜𑁆𑀚𑀮𑀺𑀓𑀸 𑀉𑀧𑀸𑀕𑀫𑀼𑀁, 𑀦𑀫𑀢𑁆𑀣𑀼 𑀢𑁂 𑀤𑀼𑀓𑁆𑀓𑀭𑀓𑀸𑀭𑀓𑁄𑀲𑀻𑀢𑀺.

𑀚𑀬𑀤𑁆𑀤𑀺𑀲𑀚𑀸𑀢𑀓𑀁 [𑀚𑀬𑀤𑀺𑀲𑀚𑀸𑀢𑀓𑀁 (𑀓.)] 𑀢𑀢𑀺𑀬𑀁.