𑁫𑁧𑁦. 𑀅𑀬𑁄𑀖𑀭𑀚𑀸𑀢𑀓𑀁 (𑁧𑁪)

𑁩𑁬𑁩. 𑀬𑀫𑁂𑀓𑀭𑀢𑁆𑀢𑀺𑀁 𑀧𑀞𑀫𑀁, 𑀕𑀩𑁆𑀪𑁂 𑀯𑀲𑀢𑀺 𑀫𑀸𑀡𑀯𑁄;

𑀅𑀩𑁆𑀪𑀼𑀝𑁆𑀞𑀺𑀢𑁄𑀯 𑀲𑁄 𑀬𑀸𑀢𑀺 [𑀲𑀬𑀢𑀺 (𑀲𑀻. 𑀧𑀻.), 𑀲 𑀬𑀸𑀢𑀺 (𑀓𑀢𑁆𑀣𑀘𑀺)], 𑀲𑀕𑀘𑁆𑀙𑀁 𑀦 𑀦𑀺𑀯𑀢𑁆𑀢𑀢𑀺.

𑁩𑁬𑁪. 𑀦 𑀬𑀼𑀚𑁆𑀛𑀫𑀸𑀦𑀸 𑀦 𑀩𑀮𑁂𑀦𑀯𑀲𑁆𑀲𑀺𑀢𑀸, 𑀦𑀭𑀸 𑀦 𑀚𑀻𑀭𑀦𑁆𑀢𑀺 𑀦 𑀘𑀸𑀧𑀺 𑀫𑀺𑀬𑁆𑀬𑀭𑁂;

𑀲𑀩𑁆𑀩𑀁 𑀳𑀺𑀤𑀁 [𑀳𑀺 𑀢𑀁 (𑀲𑀻. 𑀧𑀻.)] 𑀚𑀸𑀢𑀺𑀚𑀭𑀸𑀬𑀼𑀧𑀤𑁆𑀤𑀼𑀢𑀁, 𑀢𑀁 𑀫𑁂 𑀫𑀢𑀻 𑀳𑁄𑀢𑀺 𑀘𑀭𑀸𑀫𑀺 𑀥𑀫𑁆𑀫𑀁.

𑁩𑁬𑁫. 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀼𑀪𑀺𑀁𑀲𑀭𑀽𑀧𑀁, 𑀚𑀬𑀦𑁆𑀢𑀺 𑀭𑀝𑁆𑀞𑀸𑀥𑀺𑀧𑀢𑀻 𑀧𑀲𑀬𑁆𑀳;

𑀦 𑀫𑀘𑁆𑀘𑀼𑀦𑁄 𑀚𑀬𑀺𑀢𑀼𑀫𑀼𑀲𑁆𑀲𑀳𑀦𑁆𑀢𑀺, 𑀢𑀁 𑀫𑁂 𑀫𑀢𑀻 𑀳𑁄𑀢𑀺 𑀘𑀭𑀸𑀫𑀺 𑀥𑀫𑁆𑀫𑀁.

𑁩𑁬𑁬. 𑀳𑀢𑁆𑀣𑀻𑀳𑀺 𑀅𑀲𑁆𑀲𑁂𑀳𑀺 𑀭𑀣𑁂𑀳𑀺 𑀧𑀢𑁆𑀢𑀺𑀪𑀺, 𑀧𑀭𑀺𑀯𑀸𑀭𑀺𑀢𑀸 𑀫𑀼𑀘𑁆𑀘𑀭𑁂 𑀏𑀓𑀘𑁆𑀘𑁂𑀬𑁆𑀬𑀸 [𑀏𑀓𑀘𑁂𑀬𑁆𑀬𑀸 (𑀲𑀻. 𑀧𑀻.)];

𑀦 𑀫𑀘𑁆𑀘𑀼𑀦𑁄 [𑀦 𑀫𑀘𑁆𑀘𑀼𑀢𑁄 (𑀲𑀻.)] 𑀫𑀼𑀘𑁆𑀘𑀺𑀢𑀼𑀫𑀼𑀲𑁆𑀲𑀳𑀦𑁆𑀢𑀺, 𑀢𑀁 𑀫𑁂 𑀫𑀢𑀻 𑀳𑁄𑀢𑀺 𑀘𑀭𑀸𑀫𑀺 𑀥𑀫𑁆𑀫𑀁.

𑁩𑁬𑁭. 𑀳𑀢𑁆𑀣𑀻𑀳𑀺 𑀅𑀲𑁆𑀲𑁂𑀳𑀺 𑀭𑀣𑁂𑀳𑀺 𑀧𑀢𑁆𑀢𑀺𑀪𑀺, 𑀲𑀽𑀭𑀸 [𑀧𑀼𑀭𑀸 (𑀓.)] 𑀧𑀪𑀜𑁆𑀚𑀦𑁆𑀢𑀺 𑀧𑀥𑀁𑀲𑀬𑀦𑁆𑀢𑀺;

𑀦 𑀫𑀘𑁆𑀘𑀼𑀦𑁄 𑀪𑀜𑁆𑀚𑀺𑀢𑀼𑀫𑀼𑀲𑁆𑀲𑀳𑀦𑁆𑀢𑀺, 𑀢𑀁 𑀫𑁂 𑀫𑀢𑀻 𑀳𑁄𑀢𑀺 𑀘𑀭𑀸𑀫𑀺 𑀥𑀫𑁆𑀫𑀁.

𑁩𑁬𑁮. 𑀫𑀢𑁆𑀢𑀸 𑀕𑀚𑀸 𑀪𑀺𑀦𑁆𑀦𑀕𑀴𑀸 [𑀧𑀪𑀺𑀦𑁆𑀦𑀕𑀮𑀸 (𑀲𑀻.)] 𑀧𑀪𑀺𑀦𑁆𑀦𑀸, 𑀦𑀕𑀭𑀸𑀦𑀺 𑀫𑀤𑁆𑀤𑀦𑁆𑀢𑀺 𑀚𑀦𑀁 𑀳𑀦𑀦𑁆𑀢𑀺;

𑀦 𑀫𑀘𑁆𑀘𑀼𑀦𑁄 𑀫𑀤𑁆𑀤𑀺𑀢𑀼𑀫𑀼𑀲𑁆𑀲𑀳𑀦𑁆𑀢𑀺, 𑀢𑀁 𑀫𑁂 𑀫𑀢𑀻 𑀳𑁄𑀢𑀺 𑀘𑀭𑀸𑀫𑀺 𑀥𑀫𑁆𑀫𑀁.

𑁩𑁬𑁯. 𑀇𑀲𑁆𑀲𑀸𑀲𑀺𑀦𑁄 𑀓𑀢𑀳𑀢𑁆𑀣𑀸𑀧𑀺 𑀯𑀻𑀭𑀸 [𑀯𑀻𑀭𑀸 (𑀲𑀻. 𑀧𑀻.)], 𑀤𑀽𑀭𑁂𑀧𑀸𑀢𑀻 [𑀧𑀢𑀻 (𑀓.)] 𑀅𑀓𑁆𑀔𑀡𑀯𑁂𑀥𑀺𑀦𑁄𑀧𑀺;

𑀦 𑀫𑀘𑁆𑀘𑀼𑀦𑁄 𑀯𑀺𑀚𑁆𑀛𑀺𑀢𑀼𑀫𑀼𑀲𑁆𑀲𑀳𑀦𑁆𑀢𑀺, 𑀢𑀁 𑀫𑁂 𑀫𑀢𑀻 𑀳𑁄𑀢𑀺 𑀘𑀭𑀸𑀫𑀺 𑀥𑀫𑁆𑀫𑀁.

𑁩𑁭𑁦. 𑀲𑀭𑀸𑀦𑀺 𑀔𑀻𑀬𑀦𑁆𑀢𑀺 𑀲𑀲𑁂𑀮𑀓𑀸𑀦𑀦𑀸, 𑀲𑀩𑁆𑀩𑀁 𑀳𑀺𑀤𑀁 [𑀳𑀺 𑀢𑀁 (𑀲𑀻. 𑀧𑀻.), 𑀧𑀺𑀢𑀁 (𑀲𑁆𑀬𑀸.)] 𑀔𑀻𑀬𑀢𑀺 𑀤𑀻𑀖𑀫𑀦𑁆𑀢𑀭𑀁;

𑀲𑀩𑁆𑀩𑀁 𑀳𑀺𑀤𑀁 [𑀳𑀺 𑀢𑀁 (𑀲𑀻. 𑀧𑀻.), 𑀧𑀺𑀢𑀁 (𑀲𑁆𑀬𑀸.)] 𑀪𑀜𑁆𑀚𑀭𑁂 𑀓𑀸𑀮𑀧𑀭𑀺𑀬𑀸𑀬𑀁, 𑀢𑀁 𑀫𑁂 𑀫𑀢𑀻 𑀳𑁄𑀢𑀺 𑀘𑀭𑀸𑀫𑀺 𑀥𑀫𑁆𑀫𑀁.

𑁩𑁭𑁧. 𑀲𑀩𑁆𑀩𑁂 𑀲𑀫𑁂𑀯𑀁 𑀳𑀺 𑀦𑀭𑀸𑀦𑀦𑀸𑀭𑀺𑀦𑀁 [𑀦𑀭𑀸𑀦𑀭𑀻𑀦𑀁 (𑀧𑀻.), 𑀦𑀸𑀭𑀻 𑀦𑀭𑀸𑀦𑀁 (𑀲𑁆𑀬𑀸.), 𑀦𑀭𑀦𑀸𑀭𑀻𑀦𑀁 (𑀓.)], 𑀘𑀮𑀸𑀘𑀮𑀁 𑀧𑀸𑀡𑀪𑀼𑀦𑁄𑀥 𑀚𑀻𑀯𑀺𑀢𑀁;

𑀧𑀝𑁄𑀯 𑀥𑀼𑀢𑁆𑀢𑀲𑁆𑀲 𑀤𑀼𑀫𑁄𑀯 𑀓𑀽𑀮𑀚𑁄, 𑀢𑀁 𑀫𑁂 𑀫𑀢𑀻 𑀳𑁄𑀢𑀺 𑀘𑀭𑀸𑀫𑀺 𑀥𑀫𑁆𑀫𑀁.

𑁩𑁭𑁨. 𑀤𑀼𑀫𑀧𑁆𑀨𑀮𑀸𑀦𑁂𑀯 𑀧𑀢𑀦𑁆𑀢𑀺 𑀫𑀸𑀡𑀯𑀸, 𑀤𑀳𑀭𑀸 𑀘 𑀯𑀼𑀤𑁆𑀥𑀸 𑀘 𑀲𑀭𑀻𑀭𑀪𑁂𑀤𑀸;

𑀦𑀸𑀭𑀺𑀬𑁄 𑀦𑀭𑀸 𑀫𑀚𑁆𑀛𑀺𑀫𑀧𑁄𑀭𑀺𑀲𑀸 𑀘, 𑀢𑀁 𑀫𑁂 𑀫𑀢𑀻 𑀳𑁄𑀢𑀺 𑀘𑀭𑀸𑀫𑀺 𑀥𑀫𑁆𑀫𑀁.

𑁩𑁭𑁩. 𑀦𑀸𑀬𑀁 𑀯𑀬𑁄 𑀢𑀸𑀭𑀓𑀭𑀸𑀚𑀲𑀦𑁆𑀦𑀺𑀪𑁄, 𑀬𑀤𑀩𑁆𑀪𑀢𑀻𑀢𑀁 𑀕𑀢𑀫𑁂𑀯 𑀤𑀸𑀦𑀺 𑀢𑀁;

𑀚𑀺𑀡𑁆𑀡𑀲𑁆𑀲 𑀳𑀻 𑀦𑀢𑁆𑀣𑀺 𑀭𑀢𑀻 𑀓𑀼𑀢𑁄 𑀲𑀼𑀔𑀁, 𑀢𑀁 𑀫𑁂 𑀫𑀢𑀻 𑀳𑁄𑀢𑀺 𑀘𑀭𑀸𑀫𑀺 𑀥𑀫𑁆𑀫𑀁.

𑁩𑁭𑁪. 𑀬𑀓𑁆𑀔𑀸 𑀧𑀺𑀲𑀸𑀘𑀸 𑀅𑀣𑀯𑀸𑀧𑀺 𑀧𑁂𑀢𑀸, 𑀓𑀼𑀧𑀺𑀢𑀸𑀢𑁂 [𑀓𑀼𑀧𑀺𑀢𑀸𑀧𑀺 𑀢𑁂 (𑀲𑀻. 𑀧𑀻.)] 𑀅𑀲𑁆𑀲𑀲𑀦𑁆𑀢𑀺 𑀫𑀦𑀼𑀲𑁆𑀲𑁂;

𑀦 𑀫𑀘𑁆𑀘𑀼𑀦𑁄 𑀅𑀲𑁆𑀲𑀲𑀺𑀢𑀼𑀲𑁆𑀲𑀳𑀦𑁆𑀢𑀺, 𑀢𑀁 𑀫𑁂 𑀫𑀢𑀻 𑀳𑁄𑀢𑀺 𑀘𑀭𑀸𑀫𑀺 𑀥𑀫𑁆𑀫𑀁.

𑁩𑁭𑁫. 𑀬𑀓𑁆𑀔𑁂 𑀧𑀺𑀲𑀸𑀘𑁂 𑀅𑀣𑀯𑀸𑀧𑀺 𑀧𑁂𑀢𑁂, 𑀓𑀼𑀧𑀺𑀢𑁂𑀧𑀺 𑀢𑁂 𑀦𑀺𑀚𑁆𑀛𑀧𑀦𑀁 𑀓𑀭𑁄𑀦𑁆𑀢𑀺;

𑀦 𑀫𑀘𑁆𑀘𑀼𑀦𑁄 𑀦𑀺𑀚𑁆𑀛𑀧𑀦𑀁 𑀓𑀭𑁄𑀦𑁆𑀢𑀺, 𑀢𑀁 𑀫𑁂 𑀫𑀢𑀻 𑀳𑁄𑀢𑀺 𑀘𑀭𑀸𑀫𑀺 𑀥𑀫𑁆𑀫𑀁.

𑁩𑁭𑁬. 𑀅𑀧𑀭𑀸𑀥𑀓𑁂 𑀤𑀽𑀲𑀓𑁂 𑀳𑁂𑀞𑀓𑁂 𑀘, 𑀭𑀸𑀚𑀸𑀦𑁄 𑀤𑀡𑁆𑀟𑁂𑀦𑁆𑀢𑀺 𑀯𑀺𑀤𑀺𑀢𑁆𑀯𑀸𑀦 𑀤𑁄𑀲𑀁;

𑀦 𑀫𑀘𑁆𑀘𑀼𑀦𑁄 𑀤𑀡𑁆𑀟𑀬𑀺𑀢𑀼𑀲𑁆𑀲𑀳𑀦𑁆𑀢𑀺, 𑀢𑀁 𑀫𑁂 𑀫𑀢𑀻 𑀳𑁄𑀢𑀺 𑀘𑀭𑀸𑀫𑀺 𑀥𑀫𑁆𑀫𑀁.

𑁩𑁭𑁭. 𑀅𑀧𑀭𑀸𑀥𑀓𑀸 𑀤𑀽𑀲𑀓𑀸 𑀳𑁂𑀝𑁆𑀞𑀓𑀸 𑀘, 𑀮𑀪𑀦𑁆𑀢𑀺 𑀢𑁂 𑀭𑀸𑀚𑀺𑀦𑁄 𑀦𑀺𑀚𑁆𑀛𑀧𑁂𑀢𑀼𑀁;

𑀦 𑀫𑀘𑁆𑀘𑀼𑀦𑁄 𑀦𑀺𑀚𑁆𑀛𑀧𑀦𑀁 𑀓𑀭𑁄𑀦𑁆𑀢𑀺, 𑀢𑀁 𑀫𑁂 𑀫𑀢𑀻 𑀳𑁄𑀢𑀺 𑀘𑀭𑀸𑀫𑀺 𑀥𑀫𑁆𑀫𑀁.

𑁩𑁭𑁮. 𑀦 𑀔𑀢𑁆𑀢𑀺𑀬𑁄𑀢𑀺 𑀦 𑀘 𑀩𑁆𑀭𑀸𑀳𑁆𑀫𑀡𑁄𑀢𑀺, 𑀦 𑀅𑀟𑁆𑀠𑀓𑀸 𑀩𑀮𑀯𑀸 𑀢𑁂𑀚𑀯𑀸𑀧𑀺;

𑀦 𑀫𑀘𑁆𑀘𑀼𑀭𑀸𑀚𑀲𑁆𑀲 𑀅𑀧𑁂𑀓𑁆𑀔𑀫𑀢𑁆𑀣𑀺, 𑀢𑀁 𑀫𑁂 𑀫𑀢𑀻 𑀳𑁄𑀢𑀺 𑀘𑀭𑀸𑀫𑀺 𑀥𑀫𑁆𑀫𑀁.

𑁩𑁭𑁯. 𑀲𑀻𑀳𑀸 𑀘 𑀩𑁆𑀬𑀕𑁆𑀖𑀸 𑀘 𑀅𑀣𑁄𑀧𑀺 𑀤𑀻𑀧𑀺𑀬𑁄, 𑀧𑀲𑀬𑁆𑀳 𑀔𑀸𑀤𑀦𑁆𑀢𑀺 𑀯𑀺𑀧𑁆𑀨𑀦𑁆𑀤𑀫𑀸𑀦𑀁;

𑀦 𑀫𑀘𑁆𑀘𑀼𑀦𑁄 𑀔𑀸𑀤𑀺𑀢𑀼𑀫𑀼𑀲𑁆𑀲𑀳𑀦𑁆𑀢𑀺, 𑀢𑀁 𑀫𑁂 𑀫𑀢𑀻 𑀳𑁄𑀢𑀺 𑀘𑀭𑀸𑀫𑀺 𑀥𑀫𑁆𑀫𑀁.

𑁩𑁮𑁦. 𑀫𑀸𑀬𑀸𑀓𑀸𑀭𑀸 𑀭𑀗𑁆𑀕𑀫𑀚𑁆𑀛𑁂 𑀓𑀭𑁄𑀦𑁆𑀢𑀸, 𑀫𑁄𑀳𑁂𑀦𑁆𑀢𑀺 𑀘𑀓𑁆𑀔𑀽𑀦𑀺 𑀚𑀦𑀲𑁆𑀲 𑀢𑀸𑀯𑀤𑁂;

𑀦 𑀫𑀘𑁆𑀘𑀼𑀦𑁄 𑀫𑁄𑀳𑀬𑀺𑀢𑀼𑀲𑁆𑀲𑀳𑀦𑁆𑀢𑀺, 𑀢𑀁 𑀫𑁂 𑀫𑀢𑀻 𑀳𑁄𑀢𑀺 𑀘𑀭𑀸𑀫𑀺 𑀥𑀫𑁆𑀫𑀁.

𑁩𑁮𑁧. 𑀆𑀲𑀻𑀯𑀺𑀲𑀸 𑀓𑀼𑀧𑀺𑀢𑀸 𑀉𑀕𑁆𑀕𑀢𑁂𑀚𑀸, 𑀟𑀁𑀲𑀦𑁆𑀢𑀺 𑀫𑀸𑀭𑁂𑀦𑁆𑀢𑀺𑀧𑀺 𑀢𑁂 𑀫𑀦𑀼𑀲𑁆𑀲𑁂;

𑀦 𑀫𑀘𑁆𑀘𑀼𑀦𑁄 𑀟𑀁𑀲𑀺𑀢𑀼𑀫𑀼𑀲𑁆𑀲𑀳𑀦𑁆𑀢𑀺, 𑀢𑀁 𑀫𑁂 𑀫𑀢𑀻 𑀳𑁄𑀢𑀺 𑀘𑀭𑀸𑀫𑀺 𑀥𑀫𑁆𑀫𑀁.

𑁩𑁮𑁨. 𑀆𑀲𑀻𑀯𑀺𑀲𑀸 𑀓𑀼𑀧𑀺𑀢𑀸 𑀬𑀁 𑀟𑀁𑀲𑀦𑁆𑀢𑀺, 𑀢𑀺𑀓𑀺𑀘𑁆𑀙𑀓𑀸 𑀢𑁂𑀲 𑀯𑀺𑀲𑀁 𑀳𑀦𑀦𑁆𑀢𑀺;

𑀦 𑀫𑀘𑁆𑀘𑀼𑀦𑁄 𑀤𑀝𑁆𑀞𑀯𑀺𑀲𑀁 [𑀤𑀝𑁆𑀞𑀲𑁆𑀲 𑀯𑀺𑀲𑀁 (𑀓.)] 𑀳𑀦𑀦𑁆𑀢𑀺, 𑀢𑀁 𑀫𑁂 𑀫𑀢𑀻 𑀳𑁄𑀢𑀺 𑀘𑀭𑀸𑀫𑀺 𑀥𑀫𑁆𑀫𑀁.

𑁩𑁮𑁩. 𑀥𑀫𑁆𑀫𑀦𑁆𑀢𑀭𑀻 𑀯𑁂𑀢𑁆𑀢𑀭𑀡𑀻 [𑀯𑁂𑀢𑀭𑀡𑀻 (𑀲𑀻. 𑀧𑀻.)] 𑀘 𑀪𑁄𑀚𑁄, 𑀯𑀺𑀲𑀸𑀦𑀺 𑀳𑀦𑁆𑀢𑁆𑀯𑀸𑀦 𑀪𑀼𑀚𑀗𑁆𑀕𑀫𑀸𑀦𑀁;

𑀲𑀼𑀬𑁆𑀬𑀦𑁆𑀢𑀺 𑀢𑁂 𑀓𑀸𑀮𑀓𑀢𑀸 𑀢𑀣𑁂𑀯, 𑀢𑀁 𑀫𑁂 𑀫𑀢𑀻 𑀳𑁄𑀢𑀺 𑀘𑀭𑀸𑀫𑀺 𑀥𑀫𑁆𑀫𑀁.

𑁩𑁮𑁪. 𑀯𑀺𑀚𑁆𑀚𑀸𑀥𑀭𑀸 𑀖𑁄𑀭𑀫𑀥𑀻𑀬𑀫𑀸𑀦𑀸, 𑀅𑀤𑀲𑁆𑀲𑀦𑀁 𑀑𑀲𑀥𑁂𑀳𑀺 𑀯𑀚𑀦𑁆𑀢𑀺;

𑀦 𑀫𑀘𑁆𑀘𑀼𑀭𑀸𑀚𑀲𑁆𑀲 𑀯𑀚𑀦𑁆𑀢𑀤𑀲𑁆𑀲𑀦𑀁 [𑀯𑀚𑀦𑁆𑀢𑀺 𑀅𑀤𑀲𑁆𑀲𑀦𑀁 (𑀲𑁆𑀬𑀸. 𑀓.)], 𑀢𑀁 𑀫𑁂 𑀫𑀢𑀻 𑀳𑁄𑀢𑀺 𑀘𑀭𑀸𑀫𑀺 𑀥𑀫𑁆𑀫𑀁.

𑁩𑁮𑁫. 𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺𑀁, 𑀥𑀫𑁆𑀫𑁄 𑀲𑀼𑀘𑀺𑀡𑁆𑀡𑁄 𑀲𑀼𑀔𑀫𑀸𑀯𑀳𑀸𑀢𑀺;

𑀏𑀲𑀸𑀦𑀺𑀲𑀁𑀲𑁄 𑀥𑀫𑁆𑀫𑁂 𑀲𑀼𑀘𑀺𑀡𑁆𑀡𑁂, 𑀦 𑀤𑀼𑀕𑁆𑀕𑀢𑀺𑀁 𑀕𑀘𑁆𑀙𑀢𑀺 𑀥𑀫𑁆𑀫𑀘𑀸𑀭𑀻.

𑁩𑁮𑁬. 𑀦 𑀳𑀺 𑀥𑀫𑁆𑀫𑁄 𑀅𑀥𑀫𑁆𑀫𑁄 𑀘, 𑀉𑀪𑁄 𑀲𑀫𑀯𑀺𑀧𑀸𑀓𑀺𑀦𑁄;

𑀅𑀥𑀫𑁆𑀫𑁄 𑀦𑀺𑀭𑀬𑀁 𑀦𑁂𑀢𑀺, 𑀥𑀫𑁆𑀫𑁄 𑀧𑀸𑀧𑁂𑀢𑀺 𑀲𑀼𑀕𑁆𑀕𑀢𑀺𑀦𑁆𑀢𑀺.

𑀅𑀬𑁄𑀖𑀭𑀚𑀸𑀢𑀓𑀁 𑀘𑀼𑀤𑁆𑀤𑀲𑀫𑀁.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀫𑀸𑀢𑀗𑁆𑀕 𑀲𑀫𑁆𑀪𑀽𑀢 𑀲𑀺𑀯𑀺 𑀲𑀺𑀭𑀺𑀫𑀦𑁆𑀢𑁄, 𑀭𑁄𑀳𑀡 𑀳𑀁𑀲 𑀲𑀢𑁆𑀢𑀺𑀕𑀼𑀫𑁆𑀩𑁄 𑀪𑀮𑁆𑀮𑀸𑀢𑀺𑀬;

𑀲𑁄𑀫𑀦𑀲𑁆𑀲 𑀘𑀫𑁆𑀧𑁂𑀬𑁆𑀬 𑀩𑁆𑀭𑀳𑁆𑀫 𑀧𑀜𑁆𑀘-𑀧𑀡𑁆𑀟𑀺𑀢 𑀘𑀺𑀭𑀲𑁆𑀲𑀁𑀯𑀢 𑀅𑀬𑁄𑀖𑀭𑀸𑀢𑀺.

𑀯𑀻𑀲𑀢𑀺𑀦𑀺𑀧𑀸𑀢𑀁 𑀦𑀺𑀝𑁆𑀞𑀺𑀢𑀁.