𑁫𑁦𑁯. 𑀳𑀢𑁆𑀣𑀺𑀧𑀸𑀮𑀚𑀸𑀢𑀓𑀁 (𑁧𑁩)

𑁩𑁩𑁭. 𑀘𑀺𑀭𑀲𑁆𑀲𑀁 𑀯𑀢 𑀧𑀲𑁆𑀲𑀸𑀫, 𑀩𑁆𑀭𑀸𑀳𑁆𑀫𑀡𑀁 𑀤𑁂𑀯𑀯𑀡𑁆𑀡𑀺𑀦𑀁;

𑀫𑀳𑀸𑀚𑀝𑀁 𑀔𑀸𑀭𑀺𑀥𑀭𑀁 [𑀪𑀸𑀭𑀥𑀭𑀁 (𑀧𑀻.)], 𑀧𑀗𑁆𑀓𑀤𑀦𑁆𑀢𑀁 𑀭𑀚𑀲𑁆𑀲𑀺𑀭𑀁.

𑁩𑁩𑁮. 𑀘𑀺𑀭𑀲𑁆𑀲𑀁 𑀯𑀢 𑀧𑀲𑁆𑀲𑀸𑀫, 𑀇𑀲𑀺𑀁 𑀥𑀫𑁆𑀫𑀕𑀼𑀡𑁂 𑀭𑀢𑀁;

𑀓𑀸𑀲𑀸𑀬𑀯𑀢𑁆𑀣𑀯𑀲𑀦𑀁, 𑀯𑀸𑀓𑀘𑀻𑀭𑀁 𑀧𑀝𑀺𑀘𑁆𑀙𑀤𑀁.

𑁩𑁩𑁯. 𑀆𑀲𑀦𑀁 𑀉𑀤𑀓𑀁 𑀧𑀚𑁆𑀚𑀁, 𑀧𑀝𑀺𑀕𑀡𑁆𑀳𑀸𑀢𑀼 𑀦𑁄 𑀪𑀯𑀁;

𑀅𑀕𑁆𑀖𑁂 𑀪𑀯𑀦𑁆𑀢𑀁 𑀧𑀼𑀘𑁆𑀙𑀸𑀫, 𑀅𑀕𑁆𑀖𑀁 𑀓𑀼𑀭𑀼𑀢𑀼 𑀦𑁄 𑀪𑀯𑀁.

𑁩𑁪𑁦. 𑀅𑀥𑀺𑀘𑁆𑀘 𑀯𑁂𑀤𑁂 𑀧𑀭𑀺𑀬𑁂𑀲 𑀯𑀺𑀢𑁆𑀢𑀁, 𑀧𑀼𑀢𑁆𑀢𑁂 𑀕𑀳𑁂 [𑀕𑁂𑀳𑁂 (𑀲𑀻. 𑀲𑁆𑀬𑀸. 𑀧𑀻.)] 𑀢𑀸𑀢 𑀧𑀢𑀺𑀝𑁆𑀞𑀧𑁂𑀢𑁆𑀯𑀸;

𑀕𑀦𑁆𑀥𑁂 𑀭𑀲𑁂 𑀧𑀘𑁆𑀘𑀦𑀼𑀪𑀼𑀬𑁆𑀬 [𑀧𑀘𑁆𑀘𑀦𑀼𑀪𑁄𑀢𑁆𑀯 (𑀲𑁆𑀬𑀸.), 𑀧𑀘𑁆𑀘𑀦𑀼𑀪𑀼𑀢𑁆𑀯 (𑀧𑀻.)] 𑀲𑀩𑁆𑀩𑀁, 𑀅𑀭𑀜𑁆𑀜𑀁 𑀲𑀸𑀥𑀼 𑀫𑀼𑀦𑀺 𑀲𑁄 𑀧𑀲𑀢𑁆𑀣𑁄.

𑁩𑁪𑁧. 𑀯𑁂𑀤𑀸 𑀦 𑀲𑀘𑁆𑀘𑀸 𑀦 𑀘 𑀯𑀺𑀢𑁆𑀢𑀮𑀸𑀪𑁄, 𑀦 𑀧𑀼𑀢𑁆𑀢𑀮𑀸𑀪𑁂𑀦 𑀚𑀭𑀁 𑀯𑀺𑀳𑀦𑁆𑀢𑀺;

𑀕𑀦𑁆𑀥𑁂 𑀭𑀲𑁂 𑀫𑀼𑀘𑁆𑀘𑀦 [𑀫𑀼𑀜𑁆𑀘𑀦 (𑀲𑀻. 𑀓.)] 𑀫𑀸𑀳𑀼 𑀲𑀦𑁆𑀢𑁄, 𑀲𑀓𑀫𑁆𑀫𑀼𑀦𑀸 [𑀲𑀓𑀫𑁆𑀫𑀦𑀸 (𑀲𑀻. 𑀧𑀻.)] 𑀳𑁄𑀢𑀺 𑀨𑀮𑀽𑀧𑀧𑀢𑁆𑀢𑀺.

𑁩𑁪𑁨. 𑀅𑀤𑁆𑀥𑀸 𑀳𑀺 𑀲𑀘𑁆𑀘𑀁 𑀯𑀘𑀦𑀁 𑀢𑀯𑁂𑀢𑀁, 𑀲𑀓𑀫𑁆𑀫𑀼𑀦𑀸 𑀳𑁄𑀢𑀺 𑀨𑀮𑀽𑀧𑀧𑀢𑁆𑀢𑀺;

𑀚𑀺𑀡𑁆𑀡𑀸 𑀘 𑀫𑀸𑀢𑀸𑀧𑀺𑀢𑀭𑁄 𑀢𑀯𑀻𑀫𑁂 [𑀢𑀯𑁂𑀫𑁂 (𑀲𑀻.), 𑀢𑀯 𑀬𑀺𑀫𑁂 (𑀲𑁆𑀬𑀸. 𑀧𑀻.)], 𑀧𑀲𑁆𑀲𑁂𑀬𑁆𑀬𑀼𑀁 𑀢𑀁 𑀯𑀲𑁆𑀲𑀲𑀢𑀁 𑀅𑀭𑁄𑀕𑀁 [𑀅𑀭𑁄𑀕𑁆𑀬𑀁 (𑀲𑁆𑀬𑀸. 𑀓.)].

𑁩𑁪𑁩. 𑀬𑀲𑁆𑀲𑀲𑁆𑀲 𑀲𑀓𑁆𑀔𑀻 𑀫𑀭𑀡𑁂𑀦 𑀭𑀸𑀚, 𑀚𑀭𑀸𑀬 𑀫𑁂𑀢𑁆𑀢𑀻 𑀦𑀭𑀯𑀻𑀭𑀲𑁂𑀝𑁆𑀞;

𑀬𑁄 𑀘𑀸𑀧𑀺 𑀚𑀜𑁆𑀜𑀸 𑀦 𑀫𑀭𑀺𑀲𑁆𑀲𑀁 𑀓𑀤𑀸𑀘𑀺, 𑀧𑀲𑁆𑀲𑁂𑀬𑁆𑀬𑀼𑀁 𑀢𑀁 𑀯𑀲𑁆𑀲𑀲𑀢𑀁 𑀅𑀭𑁄𑀕𑀁.

𑁩𑁪𑁪. 𑀬𑀣𑀸𑀧𑀺 𑀦𑀸𑀯𑀁 𑀧𑀼𑀭𑀺𑀲𑁄 𑀤𑀓𑀫𑁆𑀳𑀺, 𑀏𑀭𑁂𑀢𑀺 𑀘𑁂 𑀦𑀁 𑀉𑀧𑀦𑁂𑀢𑀺 𑀢𑀻𑀭𑀁;

𑀏𑀯𑀫𑁆𑀧𑀺 𑀩𑁆𑀬𑀸𑀥𑀻 𑀲𑀢𑀢𑀁 𑀚𑀭𑀸 𑀘, 𑀉𑀧𑀦𑁂𑀢𑀺 𑀫𑀘𑁆𑀘𑀁 [𑀫𑀘𑁆𑀘𑀼 (𑀲𑁆𑀬𑀸. 𑀧𑀻.)] 𑀯𑀲𑀫𑀦𑁆𑀢𑀓𑀲𑁆𑀲.

𑁩𑁪𑁫. 𑀧𑀗𑁆𑀓𑁄 𑀘 𑀓𑀸𑀫𑀸 𑀧𑀮𑀺𑀧𑁄 𑀘 𑀓𑀸𑀫𑀸, 𑀫𑀦𑁄𑀳𑀭𑀸 𑀤𑀼𑀢𑁆𑀢𑀭𑀸 𑀫𑀘𑁆𑀘𑀼𑀥𑁂𑀬𑁆𑀬𑀸;

𑀏𑀢𑀲𑁆𑀫𑀺𑀁 𑀧𑀗𑁆𑀓𑁂 𑀧𑀮𑀺𑀧𑁂 𑀩𑁆𑀬𑀲𑀦𑁆𑀦𑀸 [𑀯𑀺𑀲𑀦𑁆𑀦𑀸 (𑀲𑁆𑀬𑀸. 𑀓.)], 𑀳𑀻𑀦𑀢𑁆𑀢𑀭𑀽𑀧𑀸 𑀦 𑀢𑀭𑀦𑁆𑀢𑀺 𑀧𑀸𑀭𑀁.

𑁩𑁪𑁬. 𑀅𑀬𑀁 𑀧𑀼𑀭𑁂 𑀮𑀼𑀤𑁆𑀤𑀫𑀓𑀸𑀲𑀺 𑀓𑀫𑁆𑀫𑀁, 𑀲𑁆𑀯𑀸𑀬𑀁 𑀕𑀳𑀻𑀢𑁄 𑀦 𑀳𑀺 𑀫𑁄𑀓𑁆𑀔𑀺𑀢𑁄 𑀫𑁂;

𑀑𑀭𑀼𑀦𑁆𑀥𑀺𑀬𑀸 𑀦𑀁 𑀧𑀭𑀺𑀭𑀓𑁆𑀔𑀺𑀲𑁆𑀲𑀸𑀫𑀺, 𑀫𑀸𑀬𑀁 𑀧𑀼𑀦 𑀮𑀼𑀤𑁆𑀤𑀫𑀓𑀸𑀲𑀺 𑀓𑀫𑁆𑀫𑀁.

𑁩𑁪𑁭. 𑀕𑀯𑀁𑀯 [𑀕𑀸𑀯𑀁𑀯 (𑀲𑀻.)] 𑀦𑀝𑁆𑀞𑀁 𑀧𑀼𑀭𑀺𑀲𑁄 𑀬𑀣𑀸 𑀯𑀦𑁂, 𑀅𑀦𑁆𑀯𑁂𑀲𑀢𑀻 [𑀧𑀭𑀺𑀬𑁂𑀲𑀢𑀻 (𑀲𑀻. 𑀧𑀻.)] 𑀭𑀸𑀚 𑀅𑀧𑀲𑁆𑀲𑀫𑀸𑀦𑁄;

𑀏𑀯𑀁 𑀦𑀝𑁆𑀞𑁄 𑀏𑀲𑀼𑀓𑀸𑀭𑀻 𑀫𑀫𑀢𑁆𑀣𑁄, 𑀲𑁄𑀳𑀁 𑀓𑀣𑀁 𑀦 𑀕𑀯𑁂𑀲𑁂𑀬𑁆𑀬𑀁 𑀭𑀸𑀚.

𑁩𑁪𑁮. 𑀳𑀺𑀬𑁆𑀬𑁄𑀢𑀺 𑀳𑀺𑀬𑁆𑀬𑀢𑀺 [𑀳𑀻𑀬𑁄𑀢𑀺 𑀳𑀻𑀬𑀢𑀺 (𑀲𑀻.)] 𑀧𑁄𑀲𑁄, 𑀧𑀭𑁂𑀢𑀺 𑀧𑀭𑀺𑀳𑀸𑀬𑀢𑀺;

𑀅𑀦𑀸𑀕𑀢𑀁 𑀦𑁂𑀢𑀫𑀢𑁆𑀣𑀻𑀢𑀺 𑀜𑀢𑁆𑀯𑀸, 𑀉𑀧𑁆𑀧𑀦𑁆𑀦𑀙𑀦𑁆𑀤𑀁 𑀓𑁄 𑀧𑀦𑀼𑀤𑁂𑀬𑁆𑀬 𑀥𑀻𑀭𑁄.

𑁩𑁪𑁯. 𑀧𑀲𑁆𑀲𑀸𑀫𑀺 𑀯𑁄𑀳𑀁 𑀤𑀳𑀭𑀁 [𑀤𑀳𑀭𑀻 (𑀲𑁆𑀬𑀸. 𑀧𑀻. 𑀓.)] 𑀓𑀼𑀫𑀸𑀭𑀺𑀁, 𑀫𑀢𑁆𑀢𑀽𑀧𑀫𑀁 𑀓𑁂𑀢𑀓𑀧𑀼𑀧𑁆𑀨𑀦𑁂𑀢𑁆𑀢𑀁;

𑀅𑀪𑀼𑀢𑁆𑀢𑀪𑁄𑀕𑁂 [𑀅𑀪𑀼𑀢𑁆𑀯 𑀪𑁄𑀕𑁂 (𑀲𑁆𑀬𑀸. 𑀓. 𑀅𑀝𑁆𑀞.), 𑀅𑀪𑀼𑀢𑁆𑀯 𑀪𑁄𑀕𑁂 (𑀧𑀻.), 𑀪𑁄𑀕𑁂 𑀅𑀢𑀼𑀢𑁆𑀯𑀸 (𑀓.)] 𑀧𑀞𑀫𑁂 𑀯𑀬𑀲𑁆𑀫𑀺𑀁, 𑀆𑀤𑀸𑀬 𑀫𑀘𑁆𑀘𑀼 𑀯𑀚𑀢𑁂 𑀓𑀼𑀫𑀸𑀭𑀺𑀁.

𑁩𑁫𑁦. 𑀬𑀼𑀯𑀸 𑀲𑀼𑀚𑀸𑀢𑁄 𑀲𑀼𑀫𑀼𑀔𑁄 𑀲𑀼𑀤𑀲𑁆𑀲𑀦𑁄, 𑀲𑀸𑀫𑁄 𑀓𑀼𑀲𑀼𑀫𑁆𑀪𑀧𑀭𑀺𑀓𑀺𑀡𑁆𑀡𑀫𑀲𑁆𑀲𑀼;

𑀳𑀺𑀢𑁆𑀯𑀸𑀦 𑀓𑀸𑀫𑁂 𑀧𑀝𑀺𑀓𑀘𑁆𑀘 [𑀧𑀝𑀺𑀕𑀘𑁆𑀘 (𑀲𑀻.), 𑀧𑀝𑀺𑀕𑀘𑁆𑀙 (𑀲𑁆𑀬𑀸. 𑀧𑀻.)] 𑀕𑁂𑀳𑀁, 𑀅𑀦𑀼𑀚𑀸𑀦 𑀫𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀺 𑀤𑁂𑀯.

𑁩𑁫𑁧. 𑀲𑀸𑀔𑀸𑀳𑀺 𑀭𑀼𑀓𑁆𑀔𑁄 𑀮𑀪𑀢𑁂 𑀲𑀫𑀜𑁆𑀜𑀁, 𑀧𑀳𑀻𑀦𑀲𑀸𑀔𑀁 𑀧𑀦 𑀔𑀸𑀡𑀼𑀫𑀸𑀳𑀼;

𑀧𑀳𑀻𑀦𑀧𑀼𑀢𑁆𑀢𑀲𑁆𑀲 𑀫𑀫𑀚𑁆𑀚 𑀪𑁄𑀢𑀺, 𑀯𑀸𑀲𑁂𑀝𑁆𑀞𑀺 𑀪𑀺𑀓𑁆𑀔𑀸𑀘𑀭𑀺𑀬𑀸𑀬 𑀓𑀸𑀮𑁄.

𑁩𑁫𑁨. 𑀅𑀖𑀲𑁆𑀫𑀺 𑀓𑁄𑀜𑁆𑀘𑀸𑀯 𑀬𑀣𑀸 𑀳𑀺𑀫𑀘𑁆𑀘𑀬𑁂, 𑀓𑀢𑀸𑀦𑀺 [𑀢𑀦𑁆𑀢𑀸𑀦𑀺 (𑀲𑀻. 𑀧𑀻.)] 𑀚𑀸𑀮𑀸𑀦𑀺 𑀧𑀤𑀸𑀮𑀺𑀬 [𑀧𑀤𑀸𑀮𑁂𑀬𑁆𑀬 (𑀲𑀻.)] 𑀳𑀁𑀲𑀸;

𑀕𑀘𑁆𑀙𑀦𑁆𑀢𑀺 𑀧𑀼𑀢𑁆𑀢𑀸 𑀘 𑀧𑀢𑀻 𑀘 𑀫𑀬𑁆𑀳𑀁, 𑀲𑀸𑀳𑀁 𑀓𑀣𑀁 𑀦𑀸𑀦𑀼𑀯𑀚𑁂 𑀧𑀚𑀸𑀦𑀁.

𑁩𑁫𑁩. 𑀏𑀢𑁂 𑀪𑀼𑀢𑁆𑀯𑀸 𑀯𑀫𑀺𑀢𑁆𑀯𑀸 𑀘, 𑀧𑀓𑁆𑀓𑀫𑀦𑁆𑀢𑀺 𑀯𑀺𑀳𑀗𑁆𑀕𑀫𑀸;

𑀬𑁂 𑀘 𑀪𑀼𑀢𑁆𑀯𑀸𑀦 𑀯𑀫𑀺𑀁𑀲𑀼, 𑀢𑁂 𑀫𑁂 𑀳𑀢𑁆𑀣𑀢𑁆𑀢 [𑀳𑀢𑁆𑀣𑀢𑁆𑀣 (𑀲𑀻. 𑀲𑁆𑀬𑀸. 𑀧𑀻.)] 𑀫𑀸𑀕𑀢𑀸.

𑁩𑁫𑁪. 𑀅𑀯𑀫𑀻 𑀩𑁆𑀭𑀸𑀳𑁆𑀫𑀡𑁄 𑀓𑀸𑀫𑁂, 𑀲𑁄 [𑀢𑁂 (𑀲𑀻. 𑀧𑀻.)] 𑀢𑁆𑀯𑀁 𑀧𑀘𑁆𑀘𑀸𑀯𑀫𑀺𑀲𑁆𑀲𑀲𑀺;

𑀯𑀦𑁆𑀢𑀸𑀤𑁄 𑀧𑀼𑀭𑀺𑀲𑁄 𑀭𑀸𑀚, 𑀦 𑀲𑁄 𑀳𑁄𑀢𑀺 𑀧𑀲𑀁𑀲𑀺𑀬𑁄.

𑁩𑁫𑁫. 𑀧𑀗𑁆𑀓𑁂 𑀘 [𑀧𑀗𑁆𑀓𑁂𑀯 (𑀲𑀻. 𑀧𑀻.)] 𑀧𑁄𑀲𑀁 𑀧𑀮𑀺𑀧𑁂 𑀩𑁆𑀬𑀲𑀦𑁆𑀦𑀁, 𑀩𑀮𑀻 𑀬𑀣𑀸 𑀤𑀼𑀩𑁆𑀩𑀮𑀫𑀼𑀤𑁆𑀥𑀭𑁂𑀬𑁆𑀬;

𑀏𑀯𑀫𑁆𑀧𑀺 𑀫𑀁 𑀢𑁆𑀯𑀁 𑀉𑀤𑀢𑀸𑀭𑀺 𑀪𑁄𑀢𑀺, 𑀧𑀜𑁆𑀘𑀸𑀮𑀺 𑀕𑀸𑀣𑀸𑀳𑀺 𑀲𑀼𑀪𑀸𑀲𑀺𑀢𑀸𑀳𑀺.

𑁩𑁫𑁬. 𑀇𑀤𑀁 𑀯𑀢𑁆𑀯𑀸 𑀫𑀳𑀸𑀭𑀸𑀚𑀸, 𑀏𑀲𑀼𑀓𑀸𑀭𑀻 𑀤𑀺𑀲𑀫𑁆𑀧𑀢𑀺;

𑀭𑀝𑁆𑀞𑀁 𑀳𑀺𑀢𑁆𑀯𑀸𑀦 𑀧𑀩𑁆𑀩𑀚𑀺, 𑀦𑀸𑀕𑁄 𑀙𑁂𑀢𑁆𑀯𑀸𑀯 𑀩𑀦𑁆𑀥𑀦𑀁.

𑁩𑁫𑁭. 𑀭𑀸𑀚𑀸 𑀘 𑀧𑀩𑁆𑀩𑀚𑁆𑀚𑀫𑀭𑁄𑀘𑀬𑀺𑀢𑁆𑀣, 𑀭𑀝𑁆𑀞𑀁 𑀧𑀳𑀸𑀬 𑀦𑀭𑀯𑀻𑀭𑀲𑁂𑀝𑁆𑀞𑁄;

𑀢𑀼𑀯𑀫𑁆𑀧𑀺 𑀦𑁄 𑀳𑁄𑀢𑀺 𑀬𑀣𑁂𑀯 𑀭𑀸𑀚𑀸, 𑀅𑀫𑁆𑀳𑁂𑀳𑀺 𑀕𑀼𑀢𑁆𑀢𑀸 𑀅𑀦𑀼𑀲𑀸𑀲 𑀭𑀚𑁆𑀚𑀁.

𑁩𑁫𑁮. 𑀭𑀸𑀚𑀸 𑀘 𑀧𑀩𑁆𑀩𑀚𑁆𑀚𑀫𑀭𑁄𑀘𑀬𑀺𑀢𑁆𑀣, 𑀭𑀝𑁆𑀞𑀁 𑀧𑀳𑀸𑀬 𑀦𑀭𑀯𑀻𑀭𑀲𑁂𑀝𑁆𑀞𑁄;

𑀅𑀳𑀫𑁆𑀧𑀺 𑀏𑀓𑀸 [𑀏𑀓𑀸𑀯 (𑀲𑀻.)] 𑀘𑀭𑀺𑀲𑁆𑀲𑀸𑀫𑀺 𑀮𑁄𑀓𑁂, 𑀳𑀺𑀢𑁆𑀯𑀸𑀦 𑀓𑀸𑀫𑀸𑀦𑀺 𑀫𑀦𑁄𑀭𑀫𑀸𑀦𑀺.

𑁩𑁫𑁯. 𑀭𑀸𑀚𑀸 𑀘 𑀧𑀩𑁆𑀩𑀚𑁆𑀚𑀫𑀭𑁄𑀘𑀬𑀺𑀢𑁆𑀣, 𑀭𑀝𑁆𑀞𑀁 𑀧𑀳𑀸𑀬 𑀦𑀭𑀯𑀻𑀭𑀲𑁂𑀝𑁆𑀞𑁄;

𑀅𑀳𑀫𑁆𑀧𑀺 𑀏𑀓𑀸 𑀘𑀭𑀺𑀲𑁆𑀲𑀸𑀫𑀺 𑀮𑁄𑀓𑁂, 𑀳𑀺𑀢𑁆𑀯𑀸𑀦 𑀓𑀸𑀫𑀸𑀦𑀺 𑀬𑀣𑁄𑀥𑀺𑀓𑀸𑀦𑀺.

𑁩𑁬𑁦. 𑀅𑀘𑁆𑀘𑁂𑀦𑁆𑀢𑀺 𑀓𑀸𑀮𑀸 𑀢𑀭𑀬𑀦𑁆𑀢𑀺 𑀭𑀢𑁆𑀢𑀺𑀬𑁄, 𑀯𑀬𑁄𑀕𑀼𑀡𑀸 𑀅𑀦𑀼𑀧𑀼𑀩𑁆𑀩𑀁 𑀚𑀳𑀦𑁆𑀢𑀺;

𑀅𑀳𑀫𑁆𑀧𑀺 𑀏𑀓𑀸 𑀘𑀭𑀺𑀲𑁆𑀲𑀸𑀫𑀺 𑀮𑁄𑀓𑁂, 𑀳𑀺𑀢𑁆𑀯𑀸𑀦 𑀓𑀸𑀫𑀸𑀦𑀺 𑀫𑀦𑁄𑀭𑀫𑀸𑀦𑀺.

𑁩𑁬𑁧. 𑀅𑀘𑁆𑀘𑁂𑀦𑁆𑀢𑀺 𑀓𑀸𑀮𑀸 𑀢𑀭𑀬𑀦𑁆𑀢𑀺 𑀭𑀢𑁆𑀢𑀺𑀬𑁄, 𑀯𑀬𑁄𑀕𑀼𑀡𑀸 𑀅𑀦𑀼𑀧𑀼𑀩𑁆𑀩𑀁 𑀚𑀳𑀦𑁆𑀢𑀺;

𑀅𑀳𑀫𑁆𑀧𑀺 𑀏𑀓𑀸 𑀘𑀭𑀺𑀲𑁆𑀲𑀸𑀫𑀺 𑀮𑁄𑀓𑁂, 𑀳𑀺𑀢𑁆𑀯𑀸𑀦 𑀓𑀸𑀫𑀸𑀦𑀺 𑀬𑀣𑁄𑀥𑀺𑀓𑀸𑀦𑀺.

𑁩𑁬𑁨. 𑀅𑀘𑁆𑀘𑁂𑀦𑁆𑀢𑀺 𑀓𑀸𑀮𑀸 𑀢𑀭𑀬𑀦𑁆𑀢𑀺 𑀭𑀢𑁆𑀢𑀺𑀬𑁄, 𑀯𑀬𑁄𑀕𑀼𑀡𑀸 𑀅𑀦𑀼𑀧𑀼𑀩𑁆𑀩𑀁 𑀚𑀳𑀦𑁆𑀢𑀺;

𑀅𑀳𑀫𑁆𑀧𑀺 𑀏𑀓𑀸 𑀘𑀭𑀺𑀲𑁆𑀲𑀸𑀫𑀺 𑀮𑁄𑀓𑁂, 𑀲𑀻𑀢𑀺𑀪𑀽𑀢𑀸 [𑀲𑀻𑀢𑀻𑀪𑀽𑀢𑀸 (𑀲𑀻.)] 𑀲𑀩𑁆𑀩𑀫𑀢𑀺𑀘𑁆𑀘 𑀲𑀗𑁆𑀕𑀦𑁆𑀢𑀺.

𑀳𑀢𑁆𑀣𑀺𑀧𑀸𑀮𑀚𑀸𑀢𑀓𑀁 𑀢𑁂𑀭𑀲𑀫𑀁.