𑁫𑁦𑁮. 𑀧𑀜𑁆𑀘𑀧𑀡𑁆𑀟𑀺𑀢𑀚𑀸𑀢𑀓𑀁 (𑁧𑁨)

𑁩𑁧𑁫. 𑀧𑀜𑁆𑀘 𑀧𑀡𑁆𑀟𑀺𑀢𑀸 𑀲𑀫𑀸𑀕𑀢𑀸𑀢𑁆𑀣, 𑀧𑀜𑁆𑀳𑀸 𑀫𑁂 𑀧𑀝𑀺𑀪𑀸𑀢𑀺 𑀢𑀁 𑀲𑀼𑀡𑀸𑀣;

𑀦𑀺𑀦𑁆𑀤𑀺𑀬𑀫𑀢𑁆𑀣𑀁 𑀧𑀲𑀁𑀲𑀺𑀬𑀁 𑀯𑀸, 𑀓𑀲𑁆𑀲𑁂𑀯𑀸𑀯𑀺𑀓𑀭𑁂𑀬𑁆𑀬 [𑀓𑀲𑁆𑀲 𑀯𑀸𑀯𑀻𑀓𑀭𑁂𑀬𑁆𑀬 (𑀓.)] 𑀕𑀼𑀬𑁆𑀳𑀫𑀢𑁆𑀣𑀁.

𑁩𑁧𑁬. 𑀢𑁆𑀯𑀁 𑀆𑀯𑀺𑀓𑀭𑁄𑀳𑀺 𑀪𑀽𑀫𑀺𑀧𑀸𑀮, 𑀪𑀢𑁆𑀢𑀸 𑀪𑀸𑀭𑀲𑀳𑁄 𑀢𑀼𑀯𑀁 𑀯𑀤𑁂 𑀢𑀁;

𑀢𑀯 𑀙𑀦𑁆𑀤𑀭𑀼𑀘𑀻𑀦𑀺 [𑀙𑀦𑁆𑀤𑀜𑁆𑀘 𑀭𑀼𑀘𑀺𑀜𑁆𑀘 (𑀲𑀻. 𑀧𑀻.)] 𑀲𑀫𑁆𑀫𑀲𑀺𑀢𑁆𑀯𑀸, 𑀅𑀣 𑀯𑀓𑁆𑀔𑀦𑁆𑀢𑀺 𑀚𑀦𑀺𑀦𑁆𑀤 𑀧𑀜𑁆𑀘 𑀥𑀻𑀭𑀸.

𑁩𑁧𑁭. 𑀬𑀸 𑀲𑀻𑀮𑀯𑀢𑀻 𑀅𑀦𑀜𑁆𑀜𑀣𑁂𑀬𑁆𑀬𑀸 [𑀅𑀦𑀜𑁆𑀜𑀥𑁂𑀬𑁆𑀬𑀸 (𑀲𑀻. 𑀧𑀻.)], 𑀪𑀢𑁆𑀢𑀼𑀘𑁆𑀙𑀦𑁆𑀤𑀯𑀲𑀸𑀦𑀼𑀕𑀸 (𑀧𑀺𑀬𑀸) [( ) 𑀦𑀢𑁆𑀣𑀺 𑀲𑀻. 𑀧𑀻. 𑀧𑁄𑀢𑁆𑀣𑀓𑁂𑀲𑀼] 𑀫𑀦𑀸𑀧𑀸;

𑀦𑀺𑀦𑁆𑀤𑀺𑀬𑀫𑀢𑁆𑀣𑀁 𑀧𑀲𑀁𑀲𑀺𑀬𑀁 𑀯𑀸, 𑀪𑀭𑀺𑀬𑀸𑀬𑀸𑀯𑀺𑀓𑀭𑁂𑀬𑁆𑀬 [𑀪𑀭𑀺𑀬𑀸𑀬 𑀯𑀸𑀯𑀻𑀓𑀭𑁂𑀬𑁆𑀬 (𑀓.)] 𑀕𑀼𑀬𑁆𑀳𑀫𑀢𑁆𑀣𑀁.

𑁩𑁧𑁮. 𑀬𑁄 𑀓𑀺𑀘𑁆𑀙𑀕𑀢𑀲𑁆𑀲 𑀆𑀢𑀼𑀭𑀲𑁆𑀲, 𑀲𑀭𑀡𑀁 𑀳𑁄𑀢𑀺 𑀕𑀢𑀻 𑀧𑀭𑀸𑀬𑀦𑀜𑁆𑀘;

𑀦𑀺𑀦𑁆𑀤𑀺𑀬𑀫𑀢𑁆𑀣𑀁 𑀧𑀲𑀁𑀲𑀺𑀬𑀁 𑀯𑀸, 𑀲𑀔𑀺𑀦𑁄 𑀯𑀸𑀯𑀺𑀓𑀭𑁂𑀬𑁆𑀬 𑀕𑀼𑀬𑁆𑀳𑀫𑀢𑁆𑀣𑀁.

𑁩𑁧𑁯. 𑀚𑁂𑀝𑁆𑀞𑁄 [𑀬𑁄 𑀚𑁂𑀝𑁆𑀞𑁄 (𑀲𑁆𑀬𑀸.)] 𑀅𑀣 𑀫𑀚𑁆𑀛𑀺𑀫𑁄 𑀓𑀦𑀺𑀝𑁆𑀞𑁄, 𑀬𑁄 [𑀲𑁄 (𑀲𑀻. 𑀲𑁆𑀬𑀸. 𑀧𑀻.)] 𑀘𑁂 𑀲𑀻𑀮𑀲𑀫𑀸𑀳𑀺𑀢𑁄 𑀞𑀺𑀢𑀢𑁆𑀢𑁄;

𑀦𑀺𑀦𑁆𑀤𑀺𑀬𑀫𑀢𑁆𑀣𑀁 𑀧𑀲𑀁𑀲𑀺𑀬𑀁 𑀯𑀸, 𑀪𑀸𑀢𑀼 𑀯𑀸𑀯𑀻𑀓𑀭𑁂𑀬𑁆𑀬 𑀕𑀼𑀬𑁆𑀳𑀫𑀢𑁆𑀣𑀁.

𑁩𑁨𑁦. 𑀬𑁄 𑀯𑁂 𑀧𑀺𑀢𑀼𑀳𑀤𑀬𑀲𑁆𑀲 𑀧𑀤𑁆𑀥𑀕𑀽 [𑀧𑀢𑁆𑀣𑀕𑀽 (𑀲𑁆𑀬𑀸.), 𑀧𑀢𑁆𑀢𑀕𑀽 (𑀓.)], 𑀅𑀦𑀼𑀚𑀸𑀢𑁄 𑀧𑀺𑀢𑀭𑀁 𑀅𑀦𑁄𑀫𑀧𑀜𑁆𑀜𑁄;

𑀦𑀺𑀦𑁆𑀤𑀺𑀬𑀫𑀢𑁆𑀣𑀁 𑀧𑀲𑀁𑀲𑀺𑀬𑀁 𑀯𑀸, 𑀧𑀼𑀢𑁆𑀢𑀲𑁆𑀲𑀸𑀯𑀺𑀓𑀭𑁂𑀬𑁆𑀬 [𑀧𑀼𑀢𑁆𑀢𑀲𑁆𑀲 𑀯𑀸𑀯𑀻𑀓𑀭𑁂𑀬𑁆𑀬 (𑀓.)] 𑀕𑀼𑀬𑁆𑀳𑀫𑀢𑁆𑀣𑀁.

𑁩𑁨𑁧. 𑀫𑀸𑀢𑀸 𑀤𑁆𑀯𑀺𑀧𑀤𑀸𑀚𑀦𑀺𑀦𑁆𑀤𑀲𑁂𑀝𑁆𑀞, 𑀬𑀸 𑀦𑀁 [𑀬𑁄 𑀢𑀁 (𑀲𑀻. 𑀧𑀻.)] 𑀧𑁄𑀲𑁂𑀢𑀺 𑀙𑀦𑁆𑀤𑀲𑀸 𑀧𑀺𑀬𑁂𑀦;

𑀦𑀺𑀦𑁆𑀤𑀺𑀬𑀫𑀢𑁆𑀣𑀁 𑀧𑀲𑀁𑀲𑀺𑀬𑀁 𑀯𑀸, 𑀫𑀸𑀢𑀼𑀬𑀸𑀯𑀻𑀓𑀭𑁂𑀬𑁆𑀬 [𑀫𑀸𑀢𑀼𑀬𑀸 𑀯𑀸𑀯𑀻𑀓𑀭𑁂𑀬𑁆𑀬 (𑀓.)] 𑀕𑀼𑀬𑁆𑀳𑀫𑀢𑁆𑀣𑀁.

𑁩𑁨𑁨. 𑀕𑀼𑀬𑁆𑀳𑀲𑁆𑀲 𑀳𑀺 𑀕𑀼𑀬𑁆𑀳𑀫𑁂𑀯 𑀲𑀸𑀥𑀼, 𑀦 𑀳𑀺 𑀕𑀼𑀬𑁆𑀳𑀲𑁆𑀲 𑀧𑀲𑀢𑁆𑀣𑀫𑀸𑀯𑀺𑀓𑀫𑁆𑀫𑀁;

𑀅𑀦𑀺𑀧𑁆𑀨𑀦𑁆𑀦𑀢𑀸 [𑀅𑀦𑀺𑀧𑁆𑀨𑀸𑀤𑀸𑀬 (𑀲𑀻. 𑀧𑀻.), 𑀅𑀦𑀺𑀧𑁆𑀨𑀦𑁆𑀦𑀢𑀸𑀬 (𑀲𑁆𑀬𑀸.), 𑀆 𑀦𑀺𑀧𑁆𑀨𑀸𑀤𑀸 (?)] 𑀲𑀳𑁂𑀬𑁆𑀬 𑀥𑀻𑀭𑁄, 𑀦𑀺𑀧𑁆𑀨𑀦𑁆𑀦𑁄𑀯 [𑀦𑀺𑀧𑁆𑀨𑀦𑁆𑀦𑀢𑁆𑀣𑁄 (𑀲𑀻. 𑀧𑀻.), 𑀦𑀺𑀧𑁆𑀨𑀦𑁆𑀦𑀢𑁆𑀣𑁄𑀯 (𑀲𑁆𑀬𑀸.)] 𑀬𑀣𑀸𑀲𑀼𑀔𑀁 𑀪𑀡𑁂𑀬𑁆𑀬.

𑁩𑁨𑁩. 𑀓𑀺𑀁 𑀢𑁆𑀯𑀁 𑀯𑀺𑀫𑀦𑁄𑀲𑀺 𑀭𑀸𑀚𑀲𑁂𑀝𑁆𑀞, 𑀤𑁆𑀯𑀺𑀧𑀤𑀚𑀦𑀺𑀦𑁆𑀤 [𑀤𑀺𑀧𑀤𑀺𑀦𑁆𑀤 (𑀲𑀻. 𑀲𑁆𑀬𑀸. 𑀧𑀻.)] 𑀯𑀘𑀦𑀁 𑀲𑀼𑀡𑁄𑀫 𑀫𑁂𑀢𑀁 [𑀦𑁂𑀢𑀁 (𑀲𑀻. 𑀧𑀻.), 𑀢𑁂𑀢𑀁 (𑀲𑁆𑀬𑀸.)];

𑀓𑀺𑀁 𑀘𑀺𑀦𑁆𑀢𑀬𑀫𑀸𑀦𑁄 𑀤𑀼𑀫𑁆𑀫𑀦𑁄𑀲𑀺, 𑀦𑀽𑀦 𑀤𑁂𑀯 𑀅𑀧𑀭𑀸𑀥𑁄 𑀅𑀢𑁆𑀣𑀺 𑀫𑀬𑁆𑀳𑀁.

𑁩𑁨𑁪. ‘‘𑀧𑀡𑁆𑀳𑁂 [𑀧𑀜𑁆𑀜𑁄 (𑀲𑀻. 𑀧𑀻.), 𑀧𑀜𑁆𑀳𑁂 (𑀲𑁆𑀬𑀸.), 𑀧𑀦𑁆𑀳𑁂 (𑀓.)] 𑀯𑀚𑁆𑀛𑁄 𑀫𑀳𑁄𑀲𑀥𑁄’’𑀢𑀺, 𑀆𑀡𑀢𑁆𑀢𑁄 𑀫𑁂 𑀯𑀥𑀸𑀬 𑀪𑀽𑀭𑀺𑀧𑀜𑁆𑀜𑁄;

𑀢𑀁 𑀘𑀺𑀦𑁆𑀢𑀬𑀫𑀸𑀦𑁄 𑀤𑀼𑀫𑁆𑀫𑀦𑁄𑀲𑁆𑀫𑀺, 𑀦 𑀳𑀺 𑀤𑁂𑀯𑀻 𑀅𑀧𑀭𑀸𑀥𑁄 𑀅𑀢𑁆𑀣𑀺 𑀢𑀼𑀬𑁆𑀳𑀁.

𑁩𑁨𑁫. 𑀅𑀪𑀺𑀤𑁄𑀲𑀕𑀢𑁄 𑀤𑀸𑀦𑀺 𑀏𑀳𑀺𑀲𑀺, 𑀓𑀺𑀁 𑀲𑀼𑀢𑁆𑀯𑀸 𑀓𑀺𑀁 𑀲𑀗𑁆𑀓𑀢𑁂 𑀫𑀦𑁄 𑀢𑁂;

𑀓𑁄 𑀢𑁂 𑀓𑀺𑀫𑀯𑁄𑀘 𑀪𑀽𑀭𑀺𑀧𑀜𑁆𑀜, 𑀇𑀗𑁆𑀖 𑀯𑀘𑀦𑀁 𑀲𑀼𑀡𑁄𑀫 𑀩𑁆𑀭𑀽𑀳𑀺 𑀫𑁂𑀢𑀁.

𑁩𑁨𑁬. ‘‘𑀧𑀡𑁆𑀳𑁂 𑀯𑀚𑁆𑀛𑁄 𑀫𑀳𑁄𑀲𑀥𑁄’’𑀢𑀺, 𑀬𑀤𑀺 𑀢𑁂 𑀫𑀦𑁆𑀢𑀬𑀺𑀢𑀁 𑀚𑀦𑀺𑀦𑁆𑀤 𑀤𑁄𑀲𑀁;

𑀪𑀭𑀺𑀬𑀸𑀬 𑀭𑀳𑁄𑀕𑀢𑁄 𑀅𑀲𑀁𑀲𑀺, 𑀕𑀼𑀬𑁆𑀳𑀁 𑀧𑀸𑀢𑀼𑀓𑀢𑀁 𑀲𑀼𑀢𑀁 𑀫𑀫𑁂𑀢𑀁.

𑁩𑁨𑁭. 𑀬𑀁 𑀲𑀸𑀮𑀯𑀦𑀲𑁆𑀫𑀺𑀁 𑀲𑁂𑀦𑀓𑁄, 𑀧𑀸𑀧𑀓𑀫𑁆𑀫𑀁 𑀅𑀓𑀸𑀲𑀺 𑀅𑀲𑀩𑁆𑀪𑀺𑀭𑀽𑀧𑀁;

𑀲𑀔𑀺𑀦𑁄𑀯 𑀭𑀳𑁄𑀕𑀢𑁄 𑀅𑀲𑀁𑀲𑀺, 𑀕𑀼𑀬𑁆𑀳𑀁 𑀧𑀸𑀢𑀼𑀓𑀢𑀁 𑀲𑀼𑀢𑀁 𑀫𑀫𑁂𑀢𑀁.

𑁩𑁨𑁮. 𑀧𑀼𑀓𑁆𑀓𑀼𑀲 [𑀧𑀓𑁆𑀓𑀼𑀲 (𑀓.) 𑀚𑀸. 𑁧.𑁭.𑁪𑁧 𑀧𑀡𑁆𑀡𑀚𑀸𑀢𑀓𑁂 𑀧𑀲𑁆𑀲𑀺𑀢𑀩𑁆𑀩𑀁] 𑀧𑀼𑀭𑀺𑀲𑀲𑁆𑀲 𑀢𑁂 𑀚𑀦𑀺𑀦𑁆𑀤, 𑀉𑀧𑁆𑀧𑀦𑁆𑀦𑁄 𑀭𑁄𑀕𑁄 𑀅𑀭𑀸𑀚𑀬𑀼𑀢𑁆𑀢𑁄;

𑀪𑀸𑀢𑀼𑀜𑁆𑀘 [𑀪𑀸𑀢𑀼𑀘𑁆𑀘 (𑀲𑀻. 𑀧𑀻.), 𑀪𑀸𑀢𑀼𑀯 (𑀲𑁆𑀬𑀸.)] 𑀭𑀳𑁄𑀕𑀢𑁄 𑀅𑀲𑀁𑀲𑀺, 𑀕𑀼𑀬𑁆𑀳𑀁 𑀧𑀸𑀢𑀼𑀓𑀢𑀁 𑀲𑀼𑀢𑀁 𑀫𑀫𑁂𑀢𑀁.

𑁩𑁨𑁯. 𑀆𑀩𑀸𑀥𑁄𑀬𑀁 𑀅𑀲𑀩𑁆𑀪𑀺𑀭𑀽𑀧𑁄, 𑀓𑀸𑀫𑀺𑀦𑁆𑀤𑁄 [𑀓𑀸𑀯𑀺𑀦𑁆𑀤𑁄 (𑀲𑀻. 𑀧𑀻.)] 𑀦𑀭𑀤𑁂𑀯𑁂𑀦 𑀨𑀼𑀝𑁆𑀞𑁄;

𑀧𑀼𑀢𑁆𑀢𑀲𑁆𑀲 𑀭𑀳𑁄𑀕𑀢𑁄 𑀅𑀲𑀁𑀲𑀺, 𑀕𑀼𑀬𑁆𑀳𑀁 𑀧𑀸𑀢𑀼𑀓𑀢𑀁 𑀲𑀼𑀢𑀁 𑀫𑀫𑁂𑀢𑀁.

𑁩𑁩𑁦. 𑀅𑀝𑁆𑀞𑀯𑀗𑁆𑀓𑀁 𑀫𑀡𑀺𑀭𑀢𑀦𑀁 𑀉𑀴𑀸𑀭𑀁, 𑀲𑀓𑁆𑀓𑁄 𑀢𑁂 𑀅𑀤𑀤𑀸 𑀧𑀺𑀢𑀸𑀫𑀳𑀲𑁆𑀲;

𑀤𑁂𑀯𑀺𑀦𑁆𑀤𑀲𑁆𑀲 𑀕𑀢𑀁 𑀢𑀤𑀚𑁆𑀚 𑀳𑀢𑁆𑀣𑀁 [𑀤𑁂𑀯𑀺𑀦𑁆𑀤𑀲𑁆𑀲 𑀢𑀤𑀚𑁆𑀚 𑀳𑀢𑁆𑀣𑀕𑀢𑀁 (𑀓.)], 𑀫𑀸𑀢𑀼𑀜𑁆𑀘 𑀭𑀳𑁄𑀕𑀢𑁄 𑀅𑀲𑀁𑀲𑀺;

𑀕𑀼𑀬𑁆𑀳𑀁 𑀧𑀸𑀢𑀼𑀓𑀢𑀁 𑀲𑀼𑀢𑀁 𑀫𑀫𑁂𑀢𑀁.

𑁩𑁩𑁧. 𑀕𑀼𑀬𑁆𑀳𑀲𑁆𑀲 𑀳𑀺 𑀕𑀼𑀬𑁆𑀳𑀫𑁂𑀯 𑀲𑀸𑀥𑀼, 𑀦 𑀳𑀺 𑀕𑀼𑀬𑁆𑀳𑀲𑁆𑀲 𑀧𑀲𑀢𑁆𑀣𑀫𑀸𑀯𑀺𑀓𑀫𑁆𑀫𑀁;

𑀅𑀦𑀺𑀧𑁆𑀨𑀦𑁆𑀦𑀢𑀸 𑀲𑀳𑁂𑀬𑁆𑀬 𑀥𑀻𑀭𑁄, 𑀦𑀺𑀧𑁆𑀨𑀦𑁆𑀦𑁄𑀯 𑀬𑀣𑀸𑀲𑀼𑀔𑀁 𑀪𑀡𑁂𑀬𑁆𑀬.

𑁩𑁩𑁨. 𑀦 𑀕𑀼𑀬𑁆𑀳𑀫𑀢𑁆𑀣𑀁 𑀯𑀺𑀯𑀭𑁂𑀬𑁆𑀬, 𑀭𑀓𑁆𑀔𑁂𑀬𑁆𑀬 𑀦𑀁 𑀬𑀣𑀸 𑀦𑀺𑀥𑀺𑀁;

𑀦 𑀳𑀺 𑀧𑀸𑀢𑀼𑀓𑀢𑁄 𑀲𑀸𑀥𑀼, 𑀕𑀼𑀬𑁆𑀳𑁄 𑀅𑀢𑁆𑀣𑁄 𑀧𑀚𑀸𑀦𑀢𑀸.

𑁩𑁩𑁩. 𑀣𑀺𑀬𑀸 𑀕𑀼𑀬𑁆𑀳𑀁 𑀦 𑀲𑀁𑀲𑁂𑀬𑁆𑀬, 𑀅𑀫𑀺𑀢𑁆𑀢𑀲𑁆𑀲 𑀘 𑀧𑀡𑁆𑀟𑀺𑀢𑁄;

𑀬𑁄 𑀘𑀸𑀫𑀺𑀲𑁂𑀦 𑀲𑀁𑀳𑀻𑀭𑁄, 𑀳𑀤𑀬𑀢𑁆𑀣𑁂𑀦𑁄 𑀘 𑀬𑁄 𑀦𑀭𑁄.

𑁩𑁩𑁪. 𑀕𑀼𑀬𑁆𑀳𑀫𑀢𑁆𑀣𑀁 𑀅𑀲𑀫𑁆𑀩𑀼𑀤𑁆𑀥𑀁, 𑀲𑀫𑁆𑀩𑁄𑀥𑀬𑀢𑀺 𑀬𑁄 𑀦𑀭𑁄;

𑀫𑀦𑁆𑀢𑀪𑁂𑀤𑀪𑀬𑀸 𑀢𑀲𑁆𑀲, 𑀤𑀸𑀲𑀪𑀽𑀢𑁄 𑀢𑀺𑀢𑀺𑀓𑁆𑀔𑀢𑀺.

𑁩𑁩𑁫. 𑀬𑀸𑀯𑀦𑁆𑀢𑁄 𑀧𑀼𑀭𑀺𑀲𑀲𑁆𑀲𑀢𑁆𑀣𑀁, 𑀕𑀼𑀬𑁆𑀳𑀁 𑀚𑀸𑀦𑀦𑁆𑀢𑀺 𑀫𑀦𑁆𑀢𑀺𑀦𑀁;

𑀢𑀸𑀯𑀦𑁆𑀢𑁄 𑀢𑀲𑁆𑀲 𑀉𑀩𑁆𑀩𑁂𑀕𑀸, 𑀢𑀲𑁆𑀫𑀸 𑀕𑀼𑀬𑁆𑀳𑀁 𑀦 𑀯𑀺𑀲𑁆𑀲𑀚𑁂.

𑁩𑁩𑁬. 𑀯𑀺𑀯𑀺𑀘𑁆𑀘 𑀪𑀸𑀲𑁂𑀬𑁆𑀬 𑀤𑀺𑀯𑀸 𑀭𑀳𑀲𑁆𑀲𑀁, 𑀭𑀢𑁆𑀢𑀺𑀁 𑀕𑀺𑀭𑀁 𑀦𑀸𑀢𑀺𑀯𑁂𑀮𑀁 𑀧𑀫𑀼𑀜𑁆𑀘𑁂;

𑀉𑀧𑀲𑁆𑀲𑀼𑀢𑀺𑀓𑀸 𑀳𑀺 𑀲𑀼𑀡𑀦𑁆𑀢𑀺 𑀫𑀦𑁆𑀢𑀁, 𑀢𑀲𑁆𑀫𑀸 𑀫𑀦𑁆𑀢𑁄 𑀔𑀺𑀧𑁆𑀧𑀫𑀼𑀧𑁂𑀢𑀺 𑀪𑁂𑀤𑀦𑁆𑀢𑀺.

𑀧𑀜𑁆𑀘𑀧𑀡𑁆𑀟𑀺𑀢𑀚𑀸𑀢𑀓𑀁 𑀤𑁆𑀯𑀸𑀤𑀲𑀫𑀁.