𑁫𑁦𑁭. 𑀫𑀳𑀸𑀧𑀮𑁄𑀪𑀦𑀚𑀸𑀢𑀓𑀁 (𑁧𑁧)

𑁨𑁮𑁪. 𑀩𑁆𑀭𑀳𑁆𑀫𑀮𑁄𑀓𑀸 𑀘𑀯𑀺𑀢𑁆𑀯𑀸𑀦, 𑀤𑁂𑀯𑀧𑀼𑀢𑁆𑀢𑁄 𑀫𑀳𑀺𑀤𑁆𑀥𑀺𑀓𑁄;

𑀭𑀜𑁆𑀜𑁄 𑀧𑀼𑀢𑁆𑀢𑁄 𑀉𑀤𑀧𑀸𑀤𑀺, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀲𑀼.

𑁨𑁮𑁫. 𑀓𑀸𑀫𑀸 𑀯𑀸 𑀓𑀸𑀫𑀲𑀜𑁆𑀜𑀸 𑀯𑀸, 𑀩𑁆𑀭𑀳𑁆𑀫𑀮𑁄𑀓𑁂 𑀦 𑀯𑀺𑀚𑁆𑀚𑀢𑀺;

𑀲𑁆𑀯𑀸𑀲𑁆𑀲𑀼 [𑀬𑁆𑀯𑀸𑀲𑁆𑀲 (𑀲𑀻.)] 𑀢𑀸𑀬𑁂𑀯 𑀲𑀜𑁆𑀜𑀸𑀬, 𑀓𑀸𑀫𑁂𑀳𑀺 𑀯𑀺𑀚𑀺𑀕𑀼𑀘𑁆𑀙𑀣.

𑁨𑁮𑁬. 𑀢𑀲𑁆𑀲 𑀘𑀦𑁆𑀢𑁂𑀧𑀼𑀭𑁂 𑀆𑀲𑀺, 𑀛𑀸𑀦𑀸𑀕𑀸𑀭𑀁 𑀲𑀼𑀫𑀸𑀧𑀺𑀢𑀁;

𑀲𑁄 𑀢𑀢𑁆𑀣 𑀧𑀝𑀺𑀲𑀮𑁆𑀮𑀻𑀦𑁄 [𑀧𑀝𑀺𑀲𑀮𑁆𑀮𑀸𑀦𑁄 (𑀓.)], 𑀏𑀓𑁄 𑀭𑀳𑀲𑀺 𑀛𑀸𑀬𑀣.

𑁨𑁮𑁭. 𑀲 𑀭𑀸𑀚𑀸 𑀧𑀭𑀺𑀤𑁂𑀯𑁂𑀲𑀺, 𑀧𑀼𑀢𑁆𑀢𑀲𑁄𑀓𑁂𑀦 𑀅𑀝𑁆𑀝𑀺𑀢𑁄;

𑀏𑀓𑀧𑀼𑀢𑁆𑀢𑁄 𑀘𑀬𑀁 𑀫𑀬𑁆𑀳𑀁, 𑀦 𑀘 𑀓𑀸𑀫𑀸𑀦𑀺 𑀪𑀼𑀜𑁆𑀚𑀢𑀺.

𑁨𑁮𑁮. 𑀓𑁄 𑀦𑀼 𑀔𑁆𑀯𑁂𑀢𑁆𑀣 [𑀔𑁂𑀢𑁆𑀣 (𑀲𑀻. 𑀧𑀻.)] 𑀉𑀧𑀸𑀬𑁄 𑀲𑁄, 𑀓𑁄 𑀯𑀸 𑀚𑀸𑀦𑀸𑀢𑀺 𑀓𑀺𑀜𑁆𑀘𑀦𑀁;

𑀬𑁄 [𑀓𑁄 (𑀲𑀻. 𑀧𑀻.)] 𑀫𑁂 𑀧𑀼𑀢𑁆𑀢𑀁 𑀧𑀮𑁄𑀪𑁂𑀬𑁆𑀬, 𑀬𑀣𑀸 𑀓𑀸𑀫𑀸𑀦𑀺 𑀧𑀢𑁆𑀣𑀬𑁂.

𑁨𑁮𑁯. 𑀅𑀳𑀼 𑀓𑀼𑀫𑀸𑀭𑀻 𑀢𑀢𑁆𑀣𑁂𑀯, 𑀯𑀡𑁆𑀡𑀭𑀽𑀧𑀲𑀫𑀸𑀳𑀺𑀢𑀸;

𑀓𑀼𑀲𑀮𑀸 𑀦𑀘𑁆𑀘𑀕𑀻𑀢𑀲𑁆𑀲, 𑀯𑀸𑀤𑀺𑀢𑁂 𑀘 𑀧𑀤𑀓𑁆𑀔𑀺𑀡𑀸.

𑁨𑁯𑁦. 𑀲𑀸 𑀢𑀢𑁆𑀣 𑀉𑀧𑀲𑀗𑁆𑀓𑀫𑁆𑀫, 𑀭𑀸𑀚𑀸𑀦𑀁 𑀏𑀢𑀤𑀩𑁆𑀭𑀯𑀺;

𑀅𑀳𑀁 𑀔𑁄 𑀦𑀁 𑀧𑀮𑁄𑀪𑁂𑀬𑁆𑀬𑀁, 𑀲𑀘𑁂 𑀪𑀢𑁆𑀢𑀸 𑀪𑀯𑀺𑀲𑁆𑀲𑀢𑀺.

𑁨𑁯𑁧. 𑀢𑀁 𑀢𑀣𑀸𑀯𑀸𑀤𑀺𑀦𑀺𑀁 𑀭𑀸𑀚𑀸, 𑀓𑀼𑀫𑀸𑀭𑀺𑀁 𑀏𑀢𑀤𑀩𑁆𑀭𑀯𑀺;

𑀢𑁆𑀯𑀜𑁆𑀜𑁂𑀯 𑀦𑀁 𑀧𑀮𑁄𑀪𑁂𑀳𑀺, 𑀢𑀯 𑀪𑀢𑁆𑀢𑀸 𑀪𑀯𑀺𑀲𑁆𑀲𑀢𑀺.

𑁨𑁯𑁨. 𑀲𑀸 𑀘 𑀅𑀦𑁆𑀢𑁂𑀧𑀼𑀭𑀁 𑀕𑀦𑁆𑀢𑁆𑀯𑀸, 𑀩𑀳𑀼𑀁 𑀓𑀸𑀫𑀼𑀧𑀲𑀁𑀳𑀺𑀢𑀁;

𑀳𑀤𑀬𑀗𑁆𑀕𑀫𑀸 𑀧𑁂𑀫𑀦𑀻𑀬𑀸, 𑀘𑀺𑀢𑁆𑀭𑀸 𑀕𑀸𑀣𑀸 𑀅𑀪𑀸𑀲𑀣.

𑁨𑁯𑁩. 𑀢𑀲𑁆𑀲𑀸 𑀘 𑀕𑀸𑀬𑀫𑀸𑀦𑀸𑀬, 𑀲𑀤𑁆𑀤𑀁 𑀲𑀼𑀢𑁆𑀯𑀸𑀦 𑀦𑀸𑀭𑀺𑀬𑀸;

𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀉𑀧𑁆𑀧𑀚𑁆𑀚𑀺, 𑀚𑀦𑀁 𑀲𑁄 𑀧𑀭𑀺𑀧𑀼𑀘𑁆𑀙𑀣.

𑁨𑁯𑁪. 𑀓𑀲𑁆𑀲𑁂𑀲𑁄 𑀲𑀤𑁆𑀤𑁄 𑀓𑁄 𑀯𑀸 𑀲𑁄, 𑀪𑀡𑀢𑀺 𑀉𑀘𑁆𑀘𑀸𑀯𑀘𑀁 𑀩𑀳𑀼𑀁;

𑀳𑀤𑀬𑀗𑁆𑀕𑀫𑀁 𑀧𑁂𑀫𑀦𑀻𑀬𑀁, 𑀅𑀳𑁄 [𑀅𑀣𑁄 (𑀲𑀻. 𑀧𑀻.)] 𑀓𑀡𑁆𑀡𑀲𑀼𑀔𑀁 𑀫𑀫.

𑁨𑁯𑁫. 𑀏𑀲𑀸 𑀔𑁄 𑀧𑀫𑀤𑀸 𑀤𑁂𑀯, 𑀔𑀺𑀟𑁆𑀟𑀸 𑀏𑀲𑀸 𑀅𑀦𑀧𑁆𑀧𑀺𑀓𑀸 [𑀅𑀦𑀧𑁆𑀧𑀓𑀸 (𑀓.)];

𑀲𑀘𑁂 𑀢𑁆𑀯𑀁 𑀓𑀸𑀫𑁂 𑀪𑀼𑀜𑁆𑀚𑁂𑀬𑁆𑀬, 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀙𑀸𑀤𑁂𑀬𑁆𑀬𑀼 𑀢𑀁.

𑁨𑁯𑁬. 𑀇𑀗𑁆𑀖 𑀆𑀕𑀘𑁆𑀙𑀢𑁄𑀭𑁂𑀦 [𑀆𑀕𑀘𑁆𑀙𑀢𑁄𑀭𑁂𑀦𑀁 (𑀓.) 𑀆𑀕𑀘𑁆𑀙𑀢𑀼 + 𑀑𑀭𑁂𑀦], 𑀅𑀯𑀺𑀤𑀽𑀭𑀫𑁆𑀳𑀺 𑀕𑀸𑀬𑀢𑀼;

𑀅𑀲𑁆𑀲𑀫𑀲𑁆𑀲 𑀲𑀫𑀻𑀧𑀫𑁆𑀳𑀺, 𑀲𑀦𑁆𑀢𑀺𑀓𑁂 𑀫𑀬𑁆𑀳𑀁 𑀕𑀸𑀬𑀢𑀼.

𑁨𑁯𑁭. 𑀢𑀺𑀭𑁄𑀓𑀼𑀝𑁆𑀝𑀫𑁆𑀳𑀺 𑀕𑀸𑀬𑀺𑀢𑁆𑀯𑀸, 𑀛𑀸𑀦𑀸𑀕𑀸𑀭𑀫𑁆𑀳𑀺 𑀧𑀸𑀯𑀺𑀲𑀺;

𑀩𑀦𑁆𑀥𑀺 𑀦𑀁 [𑀪𑀦𑁆𑀥𑀺𑀢𑀼𑀁 (𑀲𑁆𑀬𑀸. 𑀓.)] 𑀅𑀦𑀼𑀧𑀼𑀩𑁆𑀩𑁂𑀦, 𑀆𑀭𑀜𑁆𑀜𑀫𑀺𑀯 𑀓𑀼𑀜𑁆𑀚𑀭𑀁.

𑁨𑁯𑁮. 𑀢𑀲𑁆𑀲 [𑀢𑀲𑁆𑀲𑀸 (𑀲𑁆𑀬𑀸.)] 𑀓𑀸𑀫𑀭𑀲𑀁 𑀜𑀢𑁆𑀯𑀸, 𑀇𑀲𑁆𑀲𑀸𑀥𑀫𑁆𑀫𑁄 𑀅𑀚𑀸𑀬𑀣;

‘‘𑀅𑀳𑀫𑁂𑀯 𑀓𑀸𑀫𑁂 𑀪𑀼𑀜𑁆𑀚𑁂𑀬𑁆𑀬𑀁, 𑀫𑀸 𑀅𑀜𑁆𑀜𑁄 𑀧𑀼𑀭𑀺𑀲𑁄 𑀅𑀳𑀼’’.

𑁨𑁯𑁯. 𑀢𑀢𑁄 𑀅𑀲𑀺𑀁 𑀕𑀳𑁂𑀢𑁆𑀯𑀸𑀦, 𑀧𑀼𑀭𑀺𑀲𑁂 𑀳𑀦𑁆𑀢𑀼𑀁 𑀉𑀧𑀓𑁆𑀓𑀫𑀺;

𑀅𑀳𑀫𑁂𑀯𑁂𑀓𑁄 𑀪𑀼𑀜𑁆𑀚𑀺𑀲𑁆𑀲𑀁, 𑀫𑀸 𑀅𑀜𑁆𑀜𑁄 𑀧𑀼𑀭𑀺𑀲𑁄 𑀲𑀺𑀬𑀸.

𑁩𑁦𑁦. 𑀢𑀢𑁄 𑀚𑀸𑀦𑀧𑀤𑀸 𑀲𑀩𑁆𑀩𑁂, 𑀯𑀺𑀓𑁆𑀓𑀦𑁆𑀤𑀺𑀁𑀲𑀼 𑀲𑀫𑀸𑀕𑀢𑀸;

𑀧𑀼𑀢𑁆𑀢𑁄 𑀢𑁆𑀬𑀸𑀬𑀁 𑀫𑀳𑀸𑀭𑀸𑀚, 𑀚𑀦𑀁 𑀳𑁂𑀞𑁂𑀢𑁆𑀬𑀤𑀽𑀲𑀓𑀁.

𑁩𑁦𑁧. 𑀢𑀜𑁆𑀘 𑀭𑀸𑀚𑀸 𑀯𑀺𑀯𑀸𑀳𑁂𑀲𑀺 [𑀦𑀺𑀯𑀸𑀳𑁂𑀲𑀺 (𑀲𑁆𑀬𑀸.), 𑀯𑀺𑀳𑀸𑀳𑁂𑀲𑀺 (𑀧𑀻.)], 𑀲𑀫𑁆𑀳𑀸 𑀭𑀝𑁆𑀞𑀸 𑀘 [𑀭𑀝𑁆𑀞𑀸𑀢𑁄 (𑀲𑀻. 𑀧𑀻.), 𑀭𑀝𑁆𑀞𑀢𑁄 (𑀓.)] 𑀔𑀢𑁆𑀢𑀺𑀬𑁄;

𑀬𑀸𑀯𑀢𑀸 𑀯𑀺𑀚𑀺𑀢𑀁 𑀫𑀬𑁆𑀳𑀁, 𑀦 𑀢𑁂 𑀯𑀢𑁆𑀣𑀩𑁆𑀩 [𑀯𑀢𑁆𑀢𑀩𑁆𑀩 (𑀲𑀻. 𑀧𑀻.)] 𑀢𑀸𑀯𑀤𑁂.

𑁩𑁦𑁨. 𑀢𑀢𑁄 𑀲𑁄 𑀪𑀭𑀺𑀬𑀫𑀸𑀤𑀸𑀬, 𑀲𑀫𑀼𑀤𑁆𑀤𑀁 𑀉𑀧𑀲𑀗𑁆𑀓𑀫𑀺;

𑀧𑀡𑁆𑀡𑀲𑀸𑀮𑀁 𑀓𑀭𑀺𑀢𑁆𑀯𑀸𑀦, 𑀯𑀦𑀫𑀼𑀜𑁆𑀙𑀸𑀬 𑀧𑀸𑀯𑀺𑀲𑀺.

𑁩𑁦𑁩. 𑀅𑀣𑁂𑀢𑁆𑀣 𑀇𑀲𑀺 𑀫𑀸𑀕𑀘𑁆𑀙𑀺, 𑀲𑀫𑀼𑀤𑁆𑀤𑀁 𑀉𑀧𑀭𑀽𑀧𑀭𑀺;

𑀲𑁄 𑀢𑀲𑁆𑀲 𑀕𑁂𑀳𑀁 𑀧𑀸𑀯𑁂𑀓𑁆𑀔𑀺, 𑀪𑀢𑁆𑀢𑀓𑀸𑀮𑁂 𑀉𑀧𑀝𑁆𑀞𑀺𑀢𑁂.

𑁩𑁦𑁪. 𑀢𑀜𑁆𑀘 𑀪𑀭𑀺𑀬𑀸 𑀧𑀮𑁄𑀪𑁂𑀲𑀺, 𑀧𑀲𑁆𑀲 𑀬𑀸𑀯 𑀲𑀼𑀤𑀸𑀭𑀼𑀡𑀁;

𑀘𑀼𑀢𑁄 𑀲𑁄 𑀩𑁆𑀭𑀳𑁆𑀫𑀘𑀭𑀺𑀬𑀫𑁆𑀳𑀸, 𑀇𑀤𑁆𑀥𑀺𑀬𑀸 𑀧𑀭𑀺𑀳𑀸𑀬𑀣.

𑁩𑁦𑁫. 𑀭𑀸𑀚𑀧𑀼𑀢𑁆𑀢𑁄 𑀘 𑀉𑀜𑁆𑀙𑀸𑀢𑁄, 𑀯𑀦𑀫𑀽𑀮𑀨𑀮𑀁 𑀩𑀳𑀼𑀁;

𑀲𑀸𑀬𑀁 𑀓𑀸𑀚𑁂𑀦 [𑀓𑀸𑀘𑁂𑀦 (𑀧𑀻.)] 𑀆𑀤𑀸𑀬, 𑀅𑀲𑁆𑀲𑀫𑀁 𑀉𑀧𑀲𑀗𑁆𑀓𑀫𑀺.

𑁩𑁦𑁬. 𑀇𑀲𑀻 𑀘 𑀔𑀢𑁆𑀢𑀺𑀬𑀁 𑀤𑀺𑀲𑁆𑀯𑀸, 𑀲𑀫𑀼𑀤𑁆𑀤𑀁 𑀉𑀧𑀲𑀗𑁆𑀓𑀫𑀺;

‘‘𑀯𑁂𑀳𑀸𑀬𑀲𑀁 𑀕𑀫𑀺𑀲𑁆𑀲’’𑀦𑁆𑀢𑀺, 𑀲𑀻𑀤𑀢𑁂 𑀲𑁄 𑀫𑀳𑀡𑁆𑀡𑀯𑁂.

𑁩𑁦𑁭. 𑀔𑀢𑁆𑀢𑀺𑀬𑁄 𑀘 𑀇𑀲𑀺𑀁 𑀤𑀺𑀲𑁆𑀯𑀸, 𑀲𑀻𑀤𑀫𑀸𑀦𑀁 𑀫𑀳𑀡𑁆𑀡𑀯𑁂;

𑀢𑀲𑁆𑀲𑁂𑀯 𑀅𑀦𑀼𑀓𑀫𑁆𑀧𑀸𑀬, 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀣.

𑁩𑁦𑁮. 𑀅𑀪𑀺𑀚𑁆𑀚𑀫𑀸𑀦𑁂 𑀯𑀸𑀭𑀺𑀲𑁆𑀫𑀺𑀁, 𑀲𑀬𑀁 𑀆𑀕𑀫𑁆𑀫 𑀇𑀤𑁆𑀥𑀺𑀬𑀸;

𑀫𑀺𑀲𑁆𑀲𑀻𑀪𑀸𑀯𑀺𑀢𑁆𑀣𑀺𑀬𑀸 𑀕𑀦𑁆𑀢𑁆𑀯𑀸, 𑀲𑀁𑀲𑀻𑀤𑀲𑀺 𑀫𑀳𑀡𑁆𑀡𑀯𑁂.

𑁩𑁦𑁯. 𑀆𑀯𑀝𑁆𑀝𑀦𑀻 𑀫𑀳𑀸𑀫𑀸𑀬𑀸, 𑀩𑁆𑀭𑀳𑁆𑀫𑀘𑀭𑀺𑀬𑀯𑀺𑀓𑁄𑀧𑀦𑀸;

𑀲𑀻𑀤𑀦𑁆𑀢𑀺 𑀦𑀁 𑀯𑀺𑀤𑀺𑀢𑁆𑀯𑀸𑀦, 𑀆𑀭𑀓𑀸 𑀧𑀭𑀺𑀯𑀚𑁆𑀚𑀬𑁂.

𑁩𑁧𑁦. 𑀅𑀦𑀮𑀸 𑀫𑀼𑀤𑀼𑀲𑀫𑁆𑀪𑀸𑀲𑀸, 𑀤𑀼𑀧𑁆𑀧𑀽𑀭𑀸 𑀢𑀸 𑀦𑀤𑀻𑀲𑀫𑀸;

𑀲𑀻𑀤𑀦𑁆𑀢𑀺 𑀦𑀁 𑀯𑀺𑀤𑀺𑀢𑁆𑀯𑀸𑀦, 𑀆𑀭𑀓𑀸 𑀧𑀭𑀺𑀯𑀚𑁆𑀚𑀬𑁂.

𑁩𑁧𑁧. 𑀬𑀁 𑀏𑀢𑀸 𑀉𑀧𑀲𑁂𑀯𑀦𑁆𑀢𑀺, 𑀙𑀦𑁆𑀤𑀲𑀸 𑀯𑀸 𑀥𑀦𑁂𑀦 𑀯𑀸;

𑀚𑀸𑀢𑀯𑁂𑀤𑁄𑀯 𑀲𑀁 𑀞𑀸𑀦𑀁, 𑀔𑀺𑀧𑁆𑀧𑀁 𑀅𑀦𑀼𑀤𑀳𑀦𑁆𑀢𑀺 𑀦𑀁.

𑁩𑁧𑁨. 𑀔𑀢𑁆𑀢𑀺𑀬𑀲𑁆𑀲 𑀯𑀘𑁄 𑀲𑀼𑀢𑁆𑀯𑀸, 𑀇𑀲𑀺𑀲𑁆𑀲 𑀦𑀺𑀩𑁆𑀩𑀺𑀤𑀸 𑀅𑀳𑀼;

𑀮𑀤𑁆𑀥𑀸 𑀧𑁄𑀭𑀸𑀡𑀓𑀁 𑀫𑀕𑁆𑀕𑀁, 𑀕𑀘𑁆𑀙𑀢𑁂 𑀲𑁄 𑀯𑀺𑀳𑀸𑀬𑀲𑀁.

𑁩𑁧𑁩. 𑀔𑀢𑁆𑀢𑀺𑀬𑁄 𑀘 𑀇𑀲𑀺𑀁 𑀤𑀺𑀲𑁆𑀯𑀸, 𑀕𑀘𑁆𑀙𑀫𑀸𑀦𑀁 𑀯𑀺𑀳𑀸𑀬𑀲𑀁;

𑀲𑀁𑀯𑁂𑀕𑀁 𑀅𑀮𑀪𑀻 𑀥𑀻𑀭𑁄, 𑀧𑀩𑁆𑀩𑀚𑁆𑀚𑀁 𑀲𑀫𑀭𑁄𑀘𑀬𑀺.

𑁩𑁧𑁪. 𑀢𑀢𑁄 𑀲𑁄 𑀧𑀩𑁆𑀩𑀚𑀺𑀢𑁆𑀯𑀸𑀦, 𑀓𑀸𑀫𑀭𑀸𑀕𑀁 𑀯𑀺𑀭𑀸𑀚𑀬𑀺;

𑀓𑀸𑀫𑀭𑀸𑀕𑀁 𑀯𑀺𑀭𑀸𑀚𑁂𑀢𑁆𑀯𑀸, 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑀽𑀢𑀺.

𑀫𑀳𑀸𑀧𑀮𑁄𑀪𑀦𑀚𑀸𑀢𑀓𑀁 𑀏𑀓𑀸𑀤𑀲𑀫𑀁.