𑁫𑁦𑁬. 𑀘𑀫𑁆𑀧𑁂𑀬𑁆𑀬𑀚𑀸𑀢𑀓𑀁 (𑁧𑁦)

𑁨𑁪𑁦. 𑀓𑀸 𑀦𑀼 𑀯𑀺𑀚𑁆𑀚𑀼𑀭𑀺𑀯𑀸𑀪𑀸𑀲𑀺, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸;

𑀤𑁂𑀯𑀢𑀸 𑀦𑀼𑀲𑀺 𑀕𑀦𑁆𑀥𑀩𑁆𑀩𑀻, 𑀦 𑀢𑀁 𑀫𑀜𑁆𑀜𑀸𑀫𑀺 𑀫𑀸𑀦𑀼𑀲𑀺𑀁 [𑀫𑀸𑀦𑀼𑀲𑀻 (𑀲𑁆𑀬𑀸. 𑀓.)].

𑁨𑁪𑁧. 𑀦𑀫𑁆𑀳𑀺 𑀤𑁂𑀯𑀻 𑀦 𑀕𑀦𑁆𑀥𑀩𑁆𑀩𑀻, 𑀦 𑀫𑀳𑀸𑀭𑀸𑀚 𑀫𑀸𑀦𑀼𑀲𑀻;

𑀦𑀸𑀕𑀓𑀜𑁆𑀜𑀸𑀲𑁆𑀫𑀺 𑀪𑀤𑁆𑀤𑀦𑁆𑀢𑁂, 𑀅𑀢𑁆𑀣𑁂𑀦𑀫𑁆𑀳𑀺 𑀇𑀥𑀸𑀕𑀢𑀸.

𑁨𑁪𑁨. 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑀸 𑀓𑀼𑀧𑀺𑀢𑀺𑀦𑁆𑀤𑁆𑀭𑀺𑀬𑀸𑀲𑀺, 𑀦𑁂𑀢𑁆𑀢𑁂𑀳𑀺 𑀢𑁂 𑀯𑀸𑀭𑀺𑀕𑀡𑀸 𑀲𑀯𑀦𑁆𑀢𑀺;

𑀓𑀺𑀁 𑀢𑁂 𑀦𑀝𑁆𑀞𑀁 𑀓𑀺𑀁 𑀧𑀦 𑀧𑀢𑁆𑀣𑀬𑀸𑀦𑀸, 𑀇𑀥𑀸𑀕𑀢𑀸 𑀦𑀸𑀭𑀺 𑀢𑀤𑀺𑀗𑁆𑀖 𑀩𑁆𑀭𑀽𑀳𑀺.

𑁨𑁪𑁩. 𑀬𑀫𑀼𑀕𑁆𑀕𑀢𑁂𑀚𑁄 𑀉𑀭𑀕𑁄𑀢𑀺 𑀘𑀸𑀳𑀼, 𑀦𑀸𑀕𑁄𑀢𑀺 𑀦𑀁 𑀆𑀳𑀼 𑀚𑀦𑀸 𑀚𑀦𑀺𑀦𑁆𑀤;

𑀢𑀫𑀕𑁆𑀕𑀳𑀻 𑀧𑀼𑀭𑀺𑀲𑁄 𑀚𑀻𑀯𑀺𑀓𑀢𑁆𑀣𑁄, 𑀢𑀁 𑀩𑀦𑁆𑀥𑀦𑀸 𑀫𑀼𑀜𑁆𑀘 𑀧𑀢𑀻 𑀫𑀫𑁂𑀲𑁄.

𑁨𑁪𑁪. 𑀓𑀣𑀁 𑀦𑁆𑀯𑀬𑀁 𑀩𑀮𑀯𑀺𑀭𑀺𑀬𑀽𑀧𑀧𑀦𑁆𑀦𑁄, 𑀳𑀢𑁆𑀣𑀢𑁆𑀢 [𑀳𑀢𑁆𑀣𑀢𑁆𑀣 (𑀲𑀻. 𑀲𑁆𑀬𑀸. 𑀧𑀻.)] 𑀫𑀸𑀕𑀘𑁆𑀙𑀺 𑀯𑀦𑀺𑀩𑁆𑀩𑀓𑀲𑁆𑀲;

𑀅𑀓𑁆𑀔𑀸𑀳𑀺 𑀫𑁂 𑀦𑀸𑀕𑀓𑀜𑁆𑀜𑁂 𑀢𑀫𑀢𑁆𑀣𑀁, 𑀓𑀣𑀁 𑀯𑀺𑀚𑀸𑀦𑁂𑀫𑀼 𑀕𑀳𑀻𑀢𑀦𑀸𑀕𑀁.

𑁨𑁪𑁫. 𑀦𑀕𑀭𑀫𑁆𑀧𑀺 𑀦𑀸𑀕𑁄 𑀪𑀲𑁆𑀫𑀁 𑀓𑀭𑁂𑀬𑁆𑀬, 𑀢𑀣𑀸 𑀳𑀺 𑀲𑁄 𑀩𑀮𑀯𑀺𑀭𑀺𑀬𑀽𑀧𑀧𑀦𑁆𑀦𑁄;

𑀥𑀫𑁆𑀫𑀜𑁆𑀘 𑀦𑀸𑀕𑁄 𑀅𑀧𑀘𑀸𑀬𑀫𑀸𑀦𑁄, 𑀢𑀲𑁆𑀫𑀸 𑀧𑀭𑀓𑁆𑀓𑀫𑁆𑀫 𑀢𑀧𑁄 𑀓𑀭𑁄𑀢𑀺.

𑁨𑁪𑁬. 𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑀲𑀺𑀁 [𑀧𑀦𑁆𑀦𑀭𑀲𑀺𑀁 (𑀲𑀻. 𑀲𑁆𑀬𑀸. 𑀧𑀻.)] 𑀘 𑀭𑀸𑀚, 𑀘𑀢𑀼𑀧𑁆𑀧𑀣𑁂 𑀲𑀫𑁆𑀫𑀢𑀺 𑀦𑀸𑀕𑀭𑀸𑀚𑀸;

𑀢𑀫𑀕𑁆𑀕𑀳𑀻 𑀧𑀼𑀭𑀺𑀲𑁄 𑀚𑀻𑀯𑀺𑀓𑀢𑁆𑀣𑁄, 𑀢𑀁 𑀩𑀦𑁆𑀥𑀦𑀸 𑀫𑀼𑀜𑁆𑀘 𑀧𑀢𑀻 𑀫𑀫𑁂𑀲𑁄.

𑁨𑁪𑁭. 𑀲𑁄𑀴𑀲𑀺𑀢𑁆𑀣𑀺𑀲𑀳𑀲𑁆𑀲𑀸𑀦𑀺, 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸;

𑀯𑀸𑀭𑀺𑀕𑁂𑀳𑀲𑀬𑀸 𑀦𑀸𑀭𑀻 [𑀦𑀸𑀭𑀺𑀬𑁄 (𑀧𑀻.)], 𑀢𑀸𑀧𑀺 𑀢𑀁 𑀲𑀭𑀡𑀁 𑀕𑀢𑀸.

𑁨𑁪𑁮. 𑀥𑀫𑁆𑀫𑁂𑀦 𑀫𑁄𑀘𑁂𑀳𑀺 𑀅𑀲𑀸𑀳𑀲𑁂𑀦, 𑀕𑀸𑀫𑁂𑀦 𑀦𑀺𑀓𑁆𑀔𑁂𑀦 𑀕𑀯𑀁 𑀲𑀢𑁂𑀦;

𑀑𑀲𑁆𑀲𑀝𑁆𑀞𑀓𑀸𑀬𑁄 𑀉𑀭𑀕𑁄 𑀘𑀭𑀸𑀢𑀼, 𑀧𑀼𑀜𑁆𑀜𑀢𑁆𑀣𑀺𑀓𑁄 𑀫𑀼𑀜𑁆𑀘𑀢𑀼 𑀩𑀦𑁆𑀥𑀦𑀲𑁆𑀫𑀸.

𑁨𑁪𑁯. 𑀥𑀫𑁆𑀫𑁂𑀦 𑀫𑁄𑀘𑁂𑀫𑀺 𑀅𑀲𑀸𑀳𑀲𑁂𑀦, 𑀕𑀸𑀫𑁂𑀦 𑀦𑀺𑀓𑁆𑀔𑁂𑀦 𑀕𑀯𑀁 𑀲𑀢𑁂𑀦;

𑀑𑀲𑁆𑀲𑀝𑁆𑀞𑀓𑀸𑀬𑁄 𑀉𑀭𑀕𑁄 𑀘𑀭𑀸𑀢𑀼, 𑀧𑀼𑀜𑁆𑀜𑀢𑁆𑀣𑀺𑀓𑁄 𑀫𑀼𑀜𑁆𑀘𑀢𑀼 𑀩𑀦𑁆𑀥𑀦𑀲𑁆𑀫𑀸.

𑁨𑁫𑁦. 𑀤𑀫𑁆𑀫𑀺 𑀦𑀺𑀓𑁆𑀔𑀲𑀢𑀁 𑀮𑀼𑀤𑁆𑀤, 𑀣𑀽𑀮𑀜𑁆𑀘 𑀫𑀡𑀺𑀓𑀼𑀡𑁆𑀟𑀮𑀁;

𑀘𑀢𑀼𑀲𑁆𑀲𑀤𑀜𑁆𑀘 𑀧𑀮𑁆𑀮𑀗𑁆𑀓𑀁, 𑀉𑀫𑀸𑀧𑀼𑀧𑁆𑀨𑀲𑀭𑀺𑀦𑁆𑀦𑀺𑀪𑀁.

𑁨𑁫𑁧. 𑀤𑁆𑀯𑁂 𑀘 𑀲𑀸𑀤𑀺𑀲𑀺𑀬𑁄 𑀪𑀭𑀺𑀬𑀸, 𑀉𑀲𑀪𑀜𑁆𑀘 𑀕𑀯𑀁 𑀲𑀢𑀁;

𑀑𑀲𑁆𑀲𑀝𑁆𑀞𑀓𑀸𑀬𑁄 𑀉𑀭𑀕𑁄 𑀘𑀭𑀸𑀢𑀼, 𑀧𑀼𑀜𑁆𑀜𑀢𑁆𑀣𑀺𑀓𑁄 𑀫𑀼𑀜𑁆𑀘𑀢𑀼 𑀩𑀦𑁆𑀥𑀦𑀲𑁆𑀫𑀸.

𑁨𑁫𑁨. 𑀯𑀺𑀦𑀸𑀧𑀺 𑀤𑀸𑀦𑀸 𑀢𑀯 𑀯𑀘𑀦𑀁 𑀚𑀦𑀺𑀦𑁆𑀤, 𑀫𑀼𑀜𑁆𑀘𑁂𑀫𑀼 𑀦𑀁 𑀉𑀭𑀕𑀁 𑀩𑀦𑁆𑀥𑀦𑀲𑁆𑀫𑀸;

𑀑𑀲𑁆𑀲𑀝𑁆𑀞𑀓𑀸𑀬𑁄 𑀉𑀭𑀕𑁄 𑀘𑀭𑀸𑀢𑀼, 𑀧𑀼𑀜𑁆𑀜𑀢𑁆𑀣𑀺𑀓𑁄 𑀫𑀼𑀜𑁆𑀘𑀢𑀼 𑀩𑀦𑁆𑀥𑀦𑀲𑁆𑀫𑀸.

𑁨𑁫𑁩. 𑀫𑀼𑀢𑁆𑀢𑁄 𑀘𑀫𑁆𑀧𑁂𑀬𑁆𑀬𑀓𑁄 𑀦𑀸𑀕𑁄, 𑀭𑀸𑀚𑀸𑀦𑀁 𑀏𑀢𑀤𑀩𑁆𑀭𑀯𑀺;

𑀦𑀫𑁄 𑀢𑁂 𑀓𑀸𑀲𑀺𑀭𑀸𑀚𑀢𑁆𑀣𑀼, 𑀦𑀫𑁄 𑀢𑁂 𑀓𑀸𑀲𑀺𑀯𑀟𑁆𑀠𑀦;

𑀅𑀜𑁆𑀚𑀮𑀺𑀁 𑀢𑁂 𑀧𑀕𑁆𑀕𑀡𑁆𑀳𑀸𑀫𑀺, 𑀧𑀲𑁆𑀲𑁂𑀬𑁆𑀬𑀁 𑀫𑁂 𑀦𑀺𑀯𑁂𑀲𑀦𑀁.

𑁨𑁫𑁪. 𑀅𑀤𑁆𑀥𑀸 𑀳𑀺 𑀤𑀼𑀩𑁆𑀩𑀺𑀲𑁆𑀲𑀲𑀫𑁂𑀢𑀫𑀸𑀳𑀼, 𑀬𑀁 𑀫𑀸𑀦𑀼𑀲𑁄 𑀯𑀺𑀲𑁆𑀲𑀲𑁂 𑀅𑀫𑀸𑀦𑀼𑀲𑀫𑁆𑀳𑀺;

𑀲𑀘𑁂 𑀘 𑀫𑀁 𑀬𑀸𑀘𑀲𑀺 𑀏𑀢𑀫𑀢𑁆𑀣𑀁, 𑀤𑀓𑁆𑀔𑁂𑀫𑀼 𑀢𑁂 𑀦𑀸𑀕 𑀦𑀺𑀯𑁂𑀲𑀦𑀸𑀦𑀺.

𑁨𑁫𑁫. 𑀲𑀘𑁂𑀧𑀺 [𑀲𑀘𑁂 𑀳𑀺 (𑀲𑀻. 𑀧𑀻. 𑀅𑀝𑁆𑀞.)] 𑀯𑀸𑀢𑁄 𑀕𑀺𑀭𑀺𑀫𑀸𑀯𑀳𑁂𑀬𑁆𑀬, 𑀘𑀦𑁆𑀤𑁄 𑀘 𑀲𑀼𑀭𑀺𑀬𑁄 𑀘 𑀙𑀫𑀸 𑀧𑀢𑁂𑀬𑁆𑀬𑀼𑀁;

𑀲𑀩𑁆𑀩𑀸 𑀘 𑀦𑀚𑁆𑀚𑁄 𑀧𑀝𑀺𑀲𑁄𑀢𑀁 𑀯𑀚𑁂𑀬𑁆𑀬𑀼𑀁, 𑀦 𑀢𑁆𑀯𑁂𑀯𑀳𑀁 𑀭𑀸𑀚 𑀫𑀼𑀲𑀸 𑀪𑀡𑁂𑀬𑁆𑀬𑀁.

𑁨𑁫𑁬. 𑀦𑀪𑀁 𑀨𑀮𑁂𑀬𑁆𑀬 𑀉𑀤𑀥𑀻𑀧𑀺 𑀲𑀼𑀲𑁆𑀲𑁂, 𑀲𑀁𑀯𑀝𑁆𑀝𑀬𑁂 [𑀲𑀁𑀯𑀝𑁆𑀝𑁂𑀬𑀁 (𑀲𑀻. 𑀧𑀻.), 𑀲𑀁𑀯𑀝𑁆𑀝𑁂𑀬𑁆𑀬 (𑀲𑁆𑀬𑀸. 𑀓.)] 𑀪𑀽𑀢𑀥𑀭𑀸 𑀯𑀲𑀼𑀦𑁆𑀥𑀭𑀸;

𑀲𑀺𑀮𑀼𑀘𑁆𑀘𑀬𑁄 𑀫𑁂𑀭𑀼 𑀲𑀫𑀽𑀮𑀫𑀼𑀧𑁆𑀧𑀢𑁂 [𑀫𑀼𑀩𑁆𑀩𑀳𑁂 (𑀲𑀻. 𑀲𑁆𑀬𑀸. 𑀧𑀻. 𑀓. 𑀅𑀝𑁆𑀞.), 𑀫𑀼𑀝𑁆𑀞𑀳𑁂 (𑀓.)], 𑀦 𑀢𑁆𑀯𑁂𑀯𑀳𑀁 𑀭𑀸𑀚 𑀫𑀼𑀲𑀸 𑀪𑀡𑁂𑀬𑁆𑀬𑀁.

𑁨𑁫𑁭. 𑀅𑀤𑁆𑀥𑀸 𑀳𑀺 𑀤𑀼𑀩𑁆𑀩𑀺𑀲𑁆𑀲𑀲𑀫𑁂𑀢𑀫𑀸𑀳𑀼, 𑀬𑀁 𑀫𑀸𑀦𑀼𑀲𑁄 𑀯𑀺𑀲𑁆𑀲𑀲𑁂 𑀅𑀫𑀸𑀦𑀼𑀲𑀫𑁆𑀳𑀺;

𑀲𑀘𑁂 𑀘 𑀫𑀁 𑀬𑀸𑀘𑀲𑀺 𑀏𑀢𑀫𑀢𑁆𑀣𑀁, 𑀤𑀓𑁆𑀔𑁂𑀫𑀼 𑀢𑁂 𑀦𑀸𑀕 𑀦𑀺𑀯𑁂𑀲𑀦𑀸𑀦𑀺.

𑁨𑁫𑁮. 𑀢𑀼𑀫𑁆𑀳𑁂 𑀔𑁄𑀢𑁆𑀣 𑀖𑁄𑀭𑀯𑀺𑀲𑀸 𑀉𑀴𑀸𑀭𑀸, 𑀫𑀳𑀸𑀢𑁂𑀚𑀸 𑀔𑀺𑀧𑁆𑀧𑀓𑁄𑀧𑀻 𑀘 𑀳𑁄𑀣;

𑀫𑀁𑀓𑀸𑀭𑀡𑀸 [𑀫𑀫 𑀓𑀸𑀭𑀡𑀸 (𑀲𑀻. 𑀲𑁆𑀬𑀸. 𑀧𑀻.)] 𑀩𑀦𑁆𑀥𑀦𑀲𑁆𑀫𑀸 𑀧𑀫𑀼𑀢𑁆𑀢𑁄, 𑀅𑀭𑀳𑀲𑀺 𑀦𑁄 𑀚𑀸𑀦𑀺𑀢𑀼𑀬𑁂 [𑀚𑀸𑀦𑀺𑀢𑀸𑀬𑁂 (𑀲𑀻.), 𑀚𑀸𑀦𑀺𑀢𑀯𑁂 (𑀲𑁆𑀬𑀸.), 𑀚𑀸𑀦𑀺𑀢𑀬𑁂 (𑀧𑀻.)] 𑀓𑀢𑀸𑀦𑀺.

𑁨𑁫𑁯. 𑀲𑁄 𑀧𑀘𑁆𑀘𑀢𑀁 𑀦𑀺𑀭𑀬𑁂 𑀖𑁄𑀭𑀭𑀽𑀧𑁂, 𑀫𑀸 𑀓𑀸𑀬𑀺𑀓𑀁 𑀲𑀸𑀢𑀫𑀮𑀢𑁆𑀣 𑀓𑀺𑀜𑁆𑀘𑀺;

𑀧𑁂𑀴𑀸𑀬 𑀩𑀤𑁆𑀥𑁄 𑀫𑀭𑀡𑀁 𑀉𑀧𑁂𑀢𑀼, 𑀬𑁄 𑀢𑀸𑀤𑀺𑀲𑀁 𑀓𑀫𑁆𑀫𑀓𑀢𑀁 𑀦 𑀚𑀸𑀦𑁂.

𑁨𑁬𑁦. 𑀲𑀘𑁆𑀘𑀧𑁆𑀧𑀝𑀺𑀜𑁆𑀜𑀸 𑀢𑀯𑀫𑁂𑀲 𑀳𑁄𑀢𑀼, 𑀅𑀓𑁆𑀓𑁄𑀥𑀦𑁄 𑀳𑁄𑀳𑀺 𑀅𑀦𑀼𑀧𑀦𑀸𑀳𑀻;

𑀲𑀩𑁆𑀩𑀜𑁆𑀘 𑀢𑁂 𑀦𑀸𑀕𑀓𑀼𑀮𑀁 𑀲𑀼𑀧𑀡𑁆𑀡𑀸, 𑀅𑀕𑁆𑀕𑀺𑀁𑀯 𑀕𑀺𑀫𑁆𑀳𑁂𑀲𑀼 [𑀕𑀺𑀫𑁆𑀳𑀸𑀲𑀼 (𑀲𑀻. 𑀲𑁆𑀬𑀸. 𑀧𑀻.)] 𑀯𑀺𑀯𑀚𑁆𑀚𑀬𑀦𑁆𑀢𑀼.

𑁨𑁬𑁧. 𑀅𑀦𑀼𑀓𑀫𑁆𑀧𑀲𑀻 𑀦𑀸𑀕𑀓𑀼𑀮𑀁 𑀚𑀦𑀺𑀦𑁆𑀤, 𑀫𑀸𑀢𑀸 𑀬𑀣𑀸 𑀲𑀼𑀧𑁆𑀧𑀺𑀬𑀁 𑀏𑀓𑀧𑀼𑀢𑁆𑀢𑀁;

𑀅𑀳𑀜𑁆𑀘 𑀢𑁂 𑀦𑀸𑀕𑀓𑀼𑀮𑁂𑀦 𑀲𑀤𑁆𑀥𑀺𑀁, 𑀓𑀸𑀳𑀸𑀫𑀺 𑀯𑁂𑀬𑁆𑀬𑀸𑀯𑀝𑀺𑀓𑀁 𑀉𑀴𑀸𑀭𑀁.

𑁨𑁬𑁨. 𑀬𑁄𑀚𑁂𑀦𑁆𑀢𑀼 𑀯𑁂 𑀭𑀸𑀚𑀭𑀣𑁂 𑀲𑀼𑀘𑀺𑀢𑁆𑀢𑁂, 𑀓𑀫𑁆𑀩𑁄𑀚𑀓𑁂 𑀅𑀲𑁆𑀲𑀢𑀭𑁂 𑀲𑀼𑀤𑀦𑁆𑀢𑁂;

𑀦𑀸𑀕𑁂 𑀘 𑀬𑁄𑀚𑁂𑀦𑁆𑀢𑀼 𑀲𑀼𑀯𑀡𑁆𑀡𑀓𑀧𑁆𑀧𑀦𑁂, 𑀤𑀓𑁆𑀔𑁂𑀫𑀼 𑀦𑀸𑀕𑀲𑁆𑀲 𑀦𑀺𑀯𑁂𑀲𑀦𑀸𑀦𑀺.

𑁨𑁬𑁩. 𑀪𑁂𑀭𑀻 𑀫𑀼𑀤𑀺𑀗𑁆𑀕𑀸 [𑀫𑀼𑀢𑀺𑀗𑁆𑀕𑀸 (𑀲𑀻. 𑀧𑀻.)] 𑀧𑀡𑀯𑀸 𑀘 𑀲𑀗𑁆𑀔𑀸, 𑀅𑀯𑀚𑁆𑀚𑀬𑀺𑀁𑀲𑀼 𑀉𑀕𑁆𑀕𑀲𑁂𑀦𑀲𑁆𑀲 𑀭𑀜𑁆𑀜𑁄;

𑀧𑀸𑀬𑀸𑀲𑀺 𑀭𑀸𑀚𑀸 𑀩𑀳𑀼𑀲𑁄𑀪𑀫𑀸𑀦𑁄, 𑀧𑀼𑀭𑀓𑁆𑀔𑀢𑁄 𑀦𑀸𑀭𑀺𑀕𑀡𑀲𑁆𑀲 𑀫𑀚𑁆𑀛𑁂.

𑁨𑁬𑁪. 𑀲𑀼𑀯𑀡𑁆𑀡𑀘𑀺𑀢𑀓𑀁 𑀪𑀽𑀫𑀺𑀁, 𑀅𑀤𑁆𑀤𑀓𑁆𑀔𑀺 𑀓𑀸𑀲𑀺𑀯𑀟𑁆𑀠𑀦𑁄;

𑀲𑁄𑀯𑀡𑁆𑀡𑀫𑀬𑀧𑀸𑀲𑀸𑀤𑁂, 𑀯𑁂𑀴𑀼𑀭𑀺𑀬𑀨𑀮𑀓𑀢𑁆𑀣𑀢𑁂.

𑁨𑁬𑁫. 𑀲 𑀭𑀸𑀚𑀸 𑀧𑀸𑀯𑀺𑀲𑀺 𑀩𑁆𑀬𑀫𑁆𑀳𑀁, 𑀘𑀫𑁆𑀧𑁂𑀬𑁆𑀬𑀲𑁆𑀲 𑀦𑀺𑀯𑁂𑀲𑀦𑀁;

𑀆𑀤𑀺𑀘𑁆𑀘𑀯𑀡𑁆𑀡𑀲𑀦𑁆𑀦𑀺𑀪𑀁, 𑀓𑀁𑀲𑀯𑀺𑀚𑁆𑀚𑀼 𑀧𑀪𑀲𑁆𑀲𑀭𑀁.

𑁨𑁬𑁬. 𑀦𑀸𑀦𑀸𑀭𑀼𑀓𑁆𑀔𑁂𑀳𑀺 𑀲𑀜𑁆𑀙𑀦𑁆𑀦𑀁, 𑀦𑀸𑀦𑀸𑀕𑀦𑁆𑀥𑀲𑀫𑀻𑀭𑀺𑀢𑀁;

𑀲𑁄 𑀧𑀸𑀯𑁂𑀓𑁆𑀔𑀺 𑀓𑀸𑀲𑀺𑀭𑀸𑀚𑀸, 𑀘𑀫𑁆𑀧𑁂𑀬𑁆𑀬𑀲𑁆𑀲 𑀦𑀺𑀯𑁂𑀲𑀦𑀁.

𑁨𑁬𑁭. 𑀧𑀯𑀺𑀝𑁆𑀞𑀲𑁆𑀫𑀺𑀁 𑀓𑀸𑀲𑀺𑀭𑀜𑁆𑀜𑁂, 𑀘𑀫𑁆𑀧𑁂𑀬𑁆𑀬𑀲𑁆𑀲 𑀦𑀺𑀯𑁂𑀲𑀦𑀁;

𑀤𑀺𑀩𑁆𑀩𑀸 𑀢𑀽𑀭𑀺𑀬𑀸 𑀧𑀯𑀚𑁆𑀚𑀺𑀁𑀲𑀼, 𑀦𑀸𑀕𑀓𑀜𑁆𑀜𑀸 𑀘 𑀦𑀘𑁆𑀘𑀺𑀲𑀼𑀁 [𑀦𑀘𑁆𑀘𑀬𑀼𑀁 (𑀲𑀻. 𑀧𑀻. 𑀓.)].

𑁨𑁬𑁮. 𑀢𑀁 𑀦𑀸𑀕𑀓𑀜𑁆𑀜𑀸 𑀘𑀭𑀺𑀢𑀁 𑀕𑀡𑁂𑀦, 𑀅𑀦𑁆𑀯𑀸𑀭𑀼𑀳𑀻 𑀓𑀸𑀲𑀺𑀭𑀸𑀚𑀸 𑀧𑀲𑀦𑁆𑀦𑁄;

𑀦𑀺𑀲𑀻𑀤𑀺 𑀲𑁄𑀯𑀡𑁆𑀡𑀫𑀬𑀫𑁆𑀳𑀺 𑀧𑀻𑀞𑁂, 𑀲𑀸𑀧𑀲𑁆𑀲𑀬𑁂 [𑀲𑁄𑀧𑀲𑁆𑀲𑀬𑁂 (𑀓.)] 𑀘𑀦𑁆𑀤𑀦𑀲𑀸𑀭𑀮𑀺𑀢𑁆𑀢𑁂.

𑁨𑁬𑁯. 𑀲𑁄 𑀢𑀢𑁆𑀣 𑀪𑀼𑀢𑁆𑀯𑀸 𑀘 𑀅𑀣𑁄 𑀭𑀫𑀺𑀢𑁆𑀯𑀸, 𑀘𑀫𑁆𑀧𑁂𑀬𑁆𑀬𑀓𑀁 𑀓𑀸𑀲𑀺𑀭𑀸𑀚𑀸 𑀅𑀯𑁄𑀘;

𑀯𑀺𑀫𑀸𑀦𑀲𑁂𑀝𑁆𑀞𑀸𑀦𑀺 𑀇𑀫𑀸𑀦𑀺 𑀢𑀼𑀬𑁆𑀳𑀁, 𑀆𑀤𑀺𑀘𑁆𑀘𑀯𑀡𑁆𑀡𑀸𑀦𑀺 𑀧𑀪𑀲𑁆𑀲𑀭𑀸𑀦𑀺;

𑀦𑁂𑀢𑀸𑀤𑀺𑀲𑀁 𑀅𑀢𑁆𑀣𑀺 𑀫𑀦𑀼𑀲𑁆𑀲𑀮𑁄𑀓𑁂, 𑀓𑀺𑀁 𑀧𑀢𑁆𑀣𑀬𑀁 [𑀓𑀺𑀫𑀢𑁆𑀣𑀺𑀬𑀁 (𑀲𑀻. 𑀲𑁆𑀬𑀸. 𑀧𑀻.)] 𑀦𑀸𑀕 𑀢𑀧𑁄 𑀓𑀭𑁄𑀲𑀺.

𑁨𑁭𑁦. 𑀢𑀸 𑀓𑀫𑁆𑀩𑀼𑀓𑀸𑀬𑀽𑀭𑀥𑀭𑀸 𑀲𑀼𑀯𑀢𑁆𑀣𑀸, 𑀯𑀝𑁆𑀝𑀗𑁆𑀕𑀼𑀮𑀻 𑀢𑀫𑁆𑀩𑀢𑀮𑀽𑀧𑀧𑀦𑁆𑀦𑀸;

𑀧𑀕𑁆𑀕𑀬𑁆𑀳 𑀧𑀸𑀬𑁂𑀦𑁆𑀢𑀺 𑀅𑀦𑁄𑀫𑀯𑀡𑁆𑀡𑀸, 𑀦𑁂𑀢𑀸𑀤𑀺𑀲𑀁 𑀅𑀢𑁆𑀣𑀺 𑀫𑀦𑀼𑀲𑁆𑀲𑀮𑁄𑀓𑁂;

𑀓𑀺𑀁 𑀧𑀢𑁆𑀣𑀬𑀁 𑀦𑀸𑀕 𑀢𑀧𑁄 𑀓𑀭𑁄𑀲𑀺.

𑁨𑁭𑁧. 𑀦𑀚𑁆𑀚𑁄 𑀘 𑀢𑁂𑀫𑀸 𑀧𑀼𑀣𑀼𑀮𑁄𑀫𑀫𑀘𑁆𑀙𑀸, 𑀆𑀝𑀸 [𑀆𑀤𑀸 (𑀲𑁆𑀬𑀸.), 𑀅𑀤𑀸 (𑀧𑀻.)] 𑀲𑀓𑀼𑀦𑁆𑀢𑀸𑀪𑀺𑀭𑀼𑀤𑀸 𑀲𑀼𑀢𑀺𑀢𑁆𑀣𑀸;

𑀦𑁂𑀢𑀸𑀤𑀺𑀲𑀁 𑀅𑀢𑁆𑀣𑀺 𑀫𑀦𑀼𑀲𑁆𑀲𑀮𑁄𑀓𑁂, 𑀓𑀺𑀁 𑀧𑀢𑁆𑀣𑀬𑀁 𑀦𑀸𑀕 𑀢𑀧𑁄 𑀓𑀭𑁄𑀲𑀺.

𑁨𑁭𑁨. 𑀓𑁄𑀜𑁆𑀘𑀸 𑀫𑀬𑀽𑀭𑀸 𑀤𑀺𑀯𑀺𑀬𑀸 𑀘 𑀳𑀁𑀲𑀸, 𑀯𑀕𑁆𑀕𑀼𑀲𑁆𑀲𑀭𑀸 𑀓𑁄𑀓𑀺𑀮𑀸 𑀲𑀫𑁆𑀧𑀢𑀦𑁆𑀢𑀺;

𑀦𑁂𑀢𑀸𑀤𑀺𑀲𑀁 𑀅𑀢𑁆𑀣𑀺 𑀫𑀦𑀼𑀲𑁆𑀲𑀮𑁄𑀓𑁂, 𑀓𑀺𑀁 𑀧𑀢𑁆𑀣𑀬𑀁 𑀦𑀸𑀕 𑀢𑀧𑁄 𑀓𑀭𑁄𑀲𑀺.

𑁨𑁭𑁩. 𑀅𑀫𑁆𑀩𑀸 𑀘 𑀲𑀸𑀮𑀸 𑀢𑀺𑀮𑀓𑀸 𑀘 𑀚𑀫𑁆𑀩𑀼𑀬𑁄, 𑀉𑀤𑁆𑀤𑀸𑀮𑀓𑀸 𑀧𑀸𑀝𑀮𑀺𑀬𑁄 𑀘 𑀨𑀼𑀮𑁆𑀮𑀸;

𑀦𑁂𑀢𑀸𑀤𑀺𑀲𑀁 𑀅𑀢𑁆𑀣𑀺 𑀫𑀦𑀼𑀲𑁆𑀲𑀮𑁄𑀓𑁂, 𑀓𑀺𑀁 𑀧𑀢𑁆𑀣𑀬𑀁 𑀦𑀸𑀕 𑀢𑀧𑁄 𑀓𑀭𑁄𑀲𑀺.

𑁨𑁭𑁪. 𑀇𑀫𑀸 𑀘 𑀢𑁂 𑀧𑁄𑀓𑁆𑀔𑀭𑀜𑁆𑀜𑁄 𑀲𑀫𑀦𑁆𑀢𑀢𑁄, 𑀤𑀺𑀩𑁆𑀩𑀸 [𑀤𑀺𑀩𑁆𑀬𑀸 (𑀲𑁆𑀬𑀸.), 𑀤𑀺𑀯𑀺𑀬𑀸 (𑀧𑀻.)] 𑀘 𑀕𑀦𑁆𑀥𑀸 𑀲𑀢𑀢𑀁 𑀧𑀯𑀸𑀬𑀦𑁆𑀢𑀺;

𑀦𑁂𑀢𑀸𑀤𑀺𑀲𑀁 𑀅𑀢𑁆𑀣𑀺 𑀫𑀦𑀼𑀲𑁆𑀲𑀮𑁄𑀓𑁂, 𑀓𑀺𑀁 𑀧𑀢𑁆𑀣𑀬𑀁 𑀦𑀸𑀕 𑀢𑀧𑁄 𑀓𑀭𑁄𑀲𑀺.

𑁨𑁭𑁫. 𑀦 𑀧𑀼𑀢𑁆𑀢𑀳𑁂𑀢𑀼 𑀦 𑀥𑀦𑀲𑁆𑀲 𑀳𑁂𑀢𑀼, 𑀦 𑀆𑀬𑀼𑀦𑁄 𑀘𑀸𑀧𑀺 [𑀯𑀸𑀧𑀺 (𑀲𑀻. 𑀧𑀻.)] 𑀚𑀦𑀺𑀦𑁆𑀤 𑀳𑁂𑀢𑀼;

𑀫𑀦𑀼𑀲𑁆𑀲𑀬𑁄𑀦𑀺𑀁 𑀅𑀪𑀺𑀧𑀢𑁆𑀣𑀬𑀸𑀦𑁄, 𑀢𑀲𑁆𑀫𑀸 𑀧𑀭𑀓𑁆𑀓𑀫𑁆𑀫 𑀢𑀧𑁄 𑀓𑀭𑁄𑀫𑀺.

𑁨𑁭𑁬. 𑀢𑁆𑀯𑀁 𑀮𑁄𑀳𑀺𑀢𑀓𑁆𑀔𑁄 𑀯𑀺𑀳𑀢𑀦𑁆𑀢𑀭𑀁𑀲𑁄, 𑀅𑀮𑀗𑁆𑀓𑀢𑁄 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀼;

𑀲𑀼𑀭𑁄𑀲𑀺𑀢𑁄 𑀮𑁄𑀳𑀺𑀢𑀘𑀦𑁆𑀤𑀦𑁂𑀦, 𑀕𑀦𑁆𑀥𑀩𑁆𑀩𑀭𑀸𑀚𑀸𑀯 𑀤𑀺𑀲𑀸 𑀧𑀪𑀸𑀲𑀲𑀺.

𑁨𑁭𑁭. 𑀤𑁂𑀯𑀺𑀤𑁆𑀥𑀺𑀧𑀢𑁆𑀢𑁄𑀲𑀺 𑀫𑀳𑀸𑀦𑀼𑀪𑀸𑀯𑁄, 𑀲𑀩𑁆𑀩𑁂𑀳𑀺 𑀓𑀸𑀫𑁂𑀳𑀺 𑀲𑀫𑀗𑁆𑀕𑀺𑀪𑀽𑀢𑁄;

𑀧𑀼𑀘𑁆𑀙𑀸𑀫𑀺 𑀢𑀁 𑀦𑀸𑀕𑀭𑀸𑀚𑁂𑀢𑀫𑀢𑁆𑀣𑀁, 𑀲𑁂𑀬𑁆𑀬𑁄 𑀇𑀢𑁄 𑀓𑁂𑀦 𑀫𑀦𑀼𑀲𑁆𑀲𑀮𑁄𑀓𑁄.

𑁨𑁭𑁮. 𑀚𑀦𑀺𑀦𑁆𑀤 𑀦𑀸𑀜𑁆𑀜𑀢𑁆𑀭 𑀫𑀦𑀼𑀲𑁆𑀲𑀮𑁄𑀓𑀸, 𑀲𑀼𑀤𑁆𑀥𑀻 𑀯 𑀲𑀁𑀯𑀺𑀚𑁆𑀚𑀢𑀺 𑀲𑀁𑀬𑀫𑁄 𑀯𑀸;

𑀅𑀳𑀜𑁆𑀘 𑀮𑀤𑁆𑀥𑀸𑀦 𑀫𑀦𑀼𑀲𑁆𑀲𑀬𑁄𑀦𑀺𑀁, 𑀓𑀸𑀳𑀸𑀫𑀺 𑀚𑀸𑀢𑀺𑀫𑀭𑀡𑀲𑁆𑀲 𑀅𑀦𑁆𑀢𑀁.

𑁨𑁭𑁯. 𑀅𑀤𑁆𑀥𑀸 𑀳𑀯𑁂 𑀲𑁂𑀯𑀺𑀢𑀩𑁆𑀩𑀸 𑀲𑀧𑀜𑁆𑀜𑀸, 𑀩𑀳𑀼𑀲𑁆𑀲𑀼𑀢𑀸 𑀬𑁂 𑀩𑀳𑀼𑀞𑀸𑀦𑀘𑀺𑀦𑁆𑀢𑀺𑀦𑁄;

𑀦𑀸𑀭𑀺𑀬𑁄 𑀘 𑀤𑀺𑀲𑁆𑀯𑀸𑀦 𑀢𑀼𑀯𑀜𑁆𑀘 𑀦𑀸𑀕, 𑀓𑀸𑀳𑀸𑀫𑀺 𑀧𑀼𑀜𑁆𑀜𑀸𑀦𑀺 𑀅𑀦𑀧𑁆𑀧𑀓𑀸𑀦𑀺.

𑁨𑁮𑁦. 𑀅𑀤𑁆𑀥𑀸 𑀳𑀯𑁂 𑀲𑁂𑀯𑀺𑀢𑀩𑁆𑀩𑀸 𑀲𑀧𑀜𑁆𑀜𑀸, 𑀩𑀳𑀼𑀲𑁆𑀲𑀼𑀢𑀸 𑀬𑁂 𑀩𑀳𑀼𑀞𑀸𑀦𑀘𑀺𑀦𑁆𑀢𑀺𑀦𑁄;

𑀦𑀸𑀭𑀺𑀬𑁄 𑀘 𑀤𑀺𑀲𑁆𑀯𑀸𑀦 𑀫𑀫𑀜𑁆𑀘 𑀭𑀸𑀚, 𑀓𑀭𑁄𑀳𑀺 𑀧𑀼𑀜𑁆𑀜𑀸𑀦𑀺 𑀅𑀦𑀧𑁆𑀧𑀓𑀸𑀦𑀺.

𑁨𑁮𑁧. 𑀇𑀤𑀜𑁆𑀘 𑀫𑁂 𑀚𑀸𑀢𑀭𑀽𑀧𑀁 𑀧𑀳𑀽𑀢𑀁, 𑀭𑀸𑀲𑀻 𑀲𑀼𑀯𑀡𑁆𑀡𑀲𑁆𑀲 𑀘 𑀢𑀸𑀮𑀫𑀢𑁆𑀢𑀸;

[𑀇𑀢𑁄 𑀳𑀭𑀺𑀢𑁆𑀯𑀸 𑀲𑁄𑀯𑀡𑁆𑀡𑀖𑀭𑀸𑀦𑀺 𑀓𑀸𑀭𑀬, 𑀭𑀽𑀧𑀺𑀬𑀲𑁆𑀲 𑀘 𑀧𑀸𑀓𑀸𑀭𑀁 𑀓𑀭𑁄𑀦𑁆𑀢𑀼 (𑀲𑀻. 𑀲𑁆𑀬𑀸.) 𑀇𑀢𑁄 𑀳𑀭𑀺𑀢𑁆𑀯𑀸 𑀲𑁄𑀯𑀡𑁆𑀡𑀖𑀭𑀸𑀦𑀺, [𑀓𑀸𑀭𑀬] 𑀭𑀽𑀧𑀺𑀬𑀲𑁆𑀲 𑀘 𑀧𑀸𑀓𑀸𑀭𑀁 𑀓𑀭𑁄𑀦𑁆𑀢𑀼 (𑀧𑀻.)] 𑀇𑀢𑁄 𑀳𑀭𑀺𑀢𑁆𑀯𑀸𑀦 𑀲𑀼𑀯𑀡𑁆𑀡𑀖𑀭𑀸𑀦𑀺, 𑀓𑀭𑀲𑁆𑀲𑀼 𑀭𑀽𑀧𑀺𑀬𑀧𑀸𑀓𑀸𑀭𑀁 𑀓𑀭𑁄𑀦𑁆𑀢𑀼 [𑀇𑀢𑁄 𑀳𑀭𑀺𑀢𑁆𑀯𑀸 𑀲𑁄𑀯𑀡𑁆𑀡𑀖𑀭𑀸𑀦𑀺 𑀓𑀸𑀭𑀬, 𑀭𑀽𑀧𑀺𑀬𑀲𑁆𑀲 𑀘 𑀧𑀸𑀓𑀸𑀭𑀁 𑀓𑀭𑁄𑀦𑁆𑀢𑀼 (𑀲𑀻. 𑀲𑁆𑀬𑀸.) 𑀇𑀢𑁄 𑀳𑀭𑀺𑀢𑁆𑀯𑀸 𑀲𑁄𑀯𑀡𑁆𑀡𑀖𑀭𑀸𑀦𑀺, [𑀓𑀸𑀭𑀬] 𑀭𑀽𑀧𑀺𑀬𑀲𑁆𑀲 𑀘 𑀧𑀸𑀓𑀸𑀭𑀁 𑀓𑀭𑁄𑀦𑁆𑀢𑀼 (𑀧𑀻.)].

𑁨𑁮𑁨. 𑀫𑀼𑀢𑁆𑀢𑀸 𑀘 [𑀫𑀼𑀢𑁆𑀢𑀸𑀦𑀜𑁆𑀘 (𑀲𑀻. 𑀲𑁆𑀬𑀸.)] 𑀯𑀸𑀳𑀲𑀳𑀲𑁆𑀲𑀸𑀦𑀺 𑀧𑀜𑁆𑀘, 𑀯𑁂𑀴𑀼𑀭𑀺𑀬𑀫𑀺𑀲𑁆𑀲𑀸𑀦𑀺 𑀇𑀢𑁄 𑀳𑀭𑀺𑀢𑁆𑀯𑀸;

𑀅𑀦𑁆𑀢𑁂𑀧𑀼𑀭𑁂 𑀪𑀽𑀫𑀺𑀬𑀁 𑀲𑀦𑁆𑀣𑀭𑀦𑁆𑀢𑀼, 𑀦𑀺𑀓𑁆𑀓𑀤𑁆𑀤𑀫𑀸 𑀳𑁂𑀳𑀺𑀢𑀺 𑀦𑀻𑀭𑀚𑀸 𑀘.

𑁨𑁮𑁩. 𑀏𑀢𑀸𑀤𑀺𑀲𑀁 𑀆𑀯𑀲 𑀭𑀸𑀚𑀲𑁂𑀝𑁆𑀞, 𑀯𑀺𑀫𑀸𑀦𑀲𑁂𑀝𑁆𑀞𑀁 𑀩𑀳𑀼 𑀲𑁄𑀪𑀫𑀸𑀦𑀁;

𑀩𑀸𑀭𑀸𑀡𑀲𑀺𑀁 𑀦𑀕𑀭𑀁 𑀇𑀤𑁆𑀥𑀁 𑀨𑀻𑀢𑀁, 𑀭𑀚𑁆𑀚𑀜𑁆𑀘 𑀓𑀸𑀭𑁂𑀳𑀺 𑀅𑀦𑁄𑀫𑀧𑀜𑁆𑀜𑀸𑀢𑀺.

𑀘𑀫𑁆𑀧𑁂𑀬𑁆𑀬𑀚𑀸𑀢𑀓𑀁 𑀤𑀲𑀫𑀁.