𑁫𑁦𑁫. 𑀲𑁄𑀫𑀦𑀲𑁆𑀲𑀚𑀸𑀢𑀓𑀁 (𑁯)

𑁨𑁧𑁧. 𑀓𑁄 𑀢𑀁 𑀳𑀺𑀁𑀲𑀢𑀺 𑀳𑁂𑀞𑁂𑀢𑀺, 𑀓𑀺𑀁 [𑀓𑀺𑀦𑁆𑀦𑀼 (𑀧𑀻. 𑀓.)] 𑀤𑀼𑀫𑁆𑀫𑀦𑁄 𑀲𑁄𑀘𑀲𑀺 𑀅𑀧𑁆𑀧𑀢𑀻𑀢𑁄;

𑀓𑀲𑁆𑀲𑀚𑁆𑀚 𑀫𑀸𑀢𑀸𑀧𑀺𑀢𑀭𑁄 𑀭𑀼𑀤𑀦𑁆𑀢𑀼, 𑀓𑁆𑀯𑀚𑁆𑀚 𑀲𑁂𑀢𑀼 [𑀓𑁄 𑀦𑁆𑀯𑁂𑀚𑁆𑀚 𑀲𑁂𑀢𑀺 (𑀓.), 𑀓𑁄 𑀅𑀚𑁆𑀚 𑀲𑁂𑀢𑀼 (?)] 𑀦𑀺𑀳𑀢𑁄 𑀧𑀣𑀩𑁆𑀬𑀸.

𑁨𑁧𑁨. 𑀢𑀼𑀝𑁆𑀞𑁄𑀲𑁆𑀫𑀺 𑀤𑁂𑀯 𑀢𑀯 𑀤𑀲𑁆𑀲𑀦𑁂𑀦, 𑀘𑀺𑀭𑀲𑁆𑀲𑀁 𑀧𑀲𑁆𑀲𑀸𑀫𑀺 𑀢𑀁 𑀪𑀽𑀫𑀺𑀧𑀸𑀮;

𑀅𑀳𑀺𑀁𑀲𑀓𑁄 𑀭𑁂𑀡𑀼𑀫𑀦𑀼𑀧𑁆𑀧𑀯𑀺𑀲𑁆𑀲, 𑀧𑀼𑀢𑁆𑀢𑁂𑀦 𑀢𑁂 𑀳𑁂𑀞𑀬𑀺𑀢𑁄𑀲𑁆𑀫𑀺 [𑀧𑁄𑀣𑀬𑀺𑀢𑁄𑀲𑁆𑀫𑀺 (𑀓.)] 𑀤𑁂𑀯.

𑁨𑁧𑁩. 𑀆𑀬𑀦𑁆𑀢𑀼 𑀤𑁄𑀯𑀸𑀭𑀺𑀓𑀸 𑀔𑀕𑁆𑀕𑀩𑀦𑁆𑀥𑀸 [𑀔𑀕𑁆𑀕𑀩𑀤𑁆𑀥𑀸 (𑀲𑀻. 𑀧𑀻.)], 𑀓𑀸𑀲𑀸𑀯𑀺𑀬𑀸 𑀬𑀦𑁆𑀢𑀼 [𑀳𑀦𑁆𑀢𑀼 (𑀓.)] 𑀅𑀦𑁆𑀢𑁂𑀧𑀼𑀭𑀦𑁆𑀢𑀁;

𑀳𑀦𑁆𑀢𑁆𑀯𑀸𑀦 𑀢𑀁 𑀲𑁄𑀫𑀦𑀲𑁆𑀲𑀁 𑀓𑀼𑀫𑀸𑀭𑀁, 𑀙𑁂𑀢𑁆𑀯𑀸𑀦 𑀲𑀻𑀲𑀁 𑀯𑀭𑀫𑀸𑀳𑀭𑀦𑁆𑀢𑀼.

𑁨𑁧𑁪. 𑀧𑁂𑀲𑀺𑀢𑀸 𑀭𑀸𑀚𑀺𑀦𑁄 𑀤𑀽𑀢𑀸, 𑀓𑀼𑀫𑀸𑀭𑀁 𑀏𑀢𑀤𑀩𑁆𑀭𑀯𑀼𑀁;

𑀇𑀲𑁆𑀲𑀭𑁂𑀦 𑀯𑀺𑀢𑀺𑀡𑁆𑀡𑁄𑀲𑀺, 𑀯𑀥𑀁 𑀧𑀢𑁆𑀢𑁄𑀲𑀺 𑀔𑀢𑁆𑀢𑀺𑀬.

𑁨𑁧𑁫. 𑀲 𑀭𑀸𑀚𑀧𑀼𑀢𑁆𑀢𑁄 𑀧𑀭𑀺𑀤𑁂𑀯𑀬𑀦𑁆𑀢𑁄, 𑀤𑀲𑀗𑁆𑀕𑀼𑀮𑀺𑀁 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸;

𑀅𑀳𑀫𑁆𑀧𑀺 𑀇𑀘𑁆𑀙𑀸𑀫𑀺 𑀚𑀦𑀺𑀦𑁆𑀤 𑀤𑀝𑁆𑀞𑀼𑀁, 𑀚𑀻𑀯𑀁 𑀫𑀁 𑀦𑁂𑀢𑁆𑀯𑀸 [𑀚𑀻𑀯𑀁 𑀧𑀦𑁂𑀢𑁆𑀯𑀸 (𑀲𑀻. 𑀧𑀻.)] 𑀧𑀝𑀺𑀤𑀲𑁆𑀲𑀬𑁂𑀣.

𑁨𑁧𑁬. 𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀭𑀜𑁆𑀜𑁄 𑀧𑀼𑀢𑁆𑀢𑀁 𑀅𑀤𑀲𑁆𑀲𑀬𑀼𑀁;

𑀧𑀼𑀢𑁆𑀢𑁄 𑀘 𑀧𑀺𑀢𑀭𑀁 𑀤𑀺𑀲𑁆𑀯𑀸, 𑀤𑀽𑀭𑀢𑁄𑀯𑀚𑁆𑀛𑀪𑀸𑀲𑀣.

𑁨𑁧𑁭. 𑀆𑀕𑀘𑁆𑀙𑀼𑀁 [𑀆𑀕𑀜𑁆𑀙𑀼𑀁 (𑀲𑀻.), 𑀆𑀕𑀜𑁆𑀙𑀼 (𑀧𑀻.)] 𑀤𑁄𑀯𑀸𑀭𑀺𑀓𑀸 𑀔𑀕𑁆𑀕𑀩𑀦𑁆𑀥𑀸, 𑀓𑀸𑀲𑀸𑀯𑀺𑀬𑀸 𑀳𑀦𑁆𑀢𑀼 𑀫𑀫𑀁 𑀚𑀦𑀺𑀦𑁆𑀤;

𑀅𑀓𑁆𑀔𑀸𑀳𑀺 𑀫𑁂 𑀧𑀼𑀘𑁆𑀙𑀺𑀢𑁄 𑀏𑀢𑀫𑀢𑁆𑀣𑀁, 𑀅𑀧𑀭𑀸𑀥𑁄 𑀓𑁄 𑀦𑀺𑀥 𑀫𑀫𑀚𑁆𑀚 𑀅𑀢𑁆𑀣𑀺.

𑁨𑁧𑁮. 𑀲𑀸𑀬𑀜𑁆𑀘 𑀧𑀸𑀢𑁄 𑀉𑀤𑀓𑀁 𑀲𑀚𑀸𑀢𑀺, 𑀅𑀕𑁆𑀕𑀺𑀁 𑀲𑀤𑀸 𑀧𑀸𑀭𑀺𑀘𑀭𑀢𑀧𑁆𑀧𑀫𑀢𑁆𑀢𑁄;

𑀢𑀁 𑀢𑀸𑀤𑀺𑀲𑀁 𑀲𑀁𑀬𑀢𑀁 𑀩𑁆𑀭𑀳𑁆𑀫𑀘𑀸𑀭𑀺𑀁, 𑀓𑀲𑁆𑀫𑀸 𑀢𑀼𑀯𑀁 𑀩𑁆𑀭𑀽𑀲𑀺 𑀕𑀳𑀧𑁆𑀧𑀢𑀻𑀢𑀺.

𑁨𑁧𑁯. 𑀢𑀸𑀮𑀸 𑀘 𑀫𑀽𑀮𑀸 𑀘 𑀨𑀮𑀸 𑀘 𑀤𑁂𑀯, 𑀧𑀭𑀺𑀕𑁆𑀕𑀳𑀸 𑀯𑀺𑀯𑀺𑀥𑀸 𑀲𑀦𑁆𑀢𑀺𑀫𑀲𑁆𑀲;

𑀢𑁂 𑀭𑀓𑁆𑀔𑀢𑀺 𑀕𑁄𑀧𑀬𑀢𑀧𑁆𑀧𑀫𑀢𑁆𑀢𑁄, [𑀩𑁆𑀭𑀸𑀳𑁆𑀫𑀡𑁄 𑀕𑀳𑀧𑀢𑀺 𑀢𑁂𑀦 𑀳𑁄𑀢𑀺 (𑀲𑀻. 𑀲𑁆𑀬𑀸. 𑀧𑀻.)] 𑀢𑀲𑁆𑀫𑀸 𑀅𑀳𑀁 𑀩𑁆𑀭𑀽𑀫𑀺 𑀕𑀳𑀧𑁆𑀧𑀢𑀻𑀢𑀺 [𑀩𑁆𑀭𑀸𑀳𑁆𑀫𑀡𑁄 𑀕𑀳𑀧𑀢𑀺 𑀢𑁂𑀦 𑀳𑁄𑀢𑀺 (𑀲𑀻. 𑀲𑁆𑀬𑀸. 𑀧𑀻.)].

𑁨𑁨𑁦. 𑀲𑀘𑁆𑀘𑀁 𑀔𑁄 𑀏𑀢𑀁 𑀯𑀤𑀲𑀺 𑀓𑀼𑀫𑀸𑀭, 𑀧𑀭𑀺𑀕𑁆𑀕𑀳𑀸 𑀯𑀺𑀯𑀺𑀥𑀸 𑀲𑀦𑁆𑀢𑀺𑀫𑀲𑁆𑀲;

𑀢𑁂 𑀭𑀓𑁆𑀔𑀢𑀺 𑀕𑁄𑀧𑀬𑀢𑀧𑁆𑀧𑀫𑀢𑁆𑀢𑁄, 𑀲 [𑀦𑀢𑁆𑀣𑀺 𑀇𑀤𑀁 𑀲𑀻. 𑀲𑁆𑀬𑀸. 𑀧𑀻. 𑀧𑁄𑀢𑁆𑀣𑀓𑁂𑀲𑀼] 𑀩𑁆𑀭𑀸𑀳𑁆𑀫𑀡𑁄 𑀕𑀳𑀧𑀢𑀺 𑀢𑁂𑀦 𑀳𑁄𑀢𑀺.

𑁨𑁨𑁧. 𑀲𑀼𑀡𑀦𑁆𑀢𑀼 𑀫𑀬𑁆𑀳𑀁 𑀧𑀭𑀺𑀲𑀸 𑀲𑀫𑀸𑀕𑀢𑀸, 𑀲𑀦𑁂𑀕𑀫𑀸 𑀚𑀸𑀦𑀧𑀤𑀸 𑀘 𑀲𑀩𑁆𑀩𑁂;

𑀩𑀸𑀮𑀸𑀬𑀁 𑀩𑀸𑀮𑀲𑁆𑀲 𑀯𑀘𑁄 𑀦𑀺𑀲𑀫𑁆𑀫, 𑀅𑀳𑁂𑀢𑀼𑀦𑀸 𑀖𑀸𑀢𑀬𑀢𑁂 𑀫𑀁 [𑀖𑀸𑀢𑀬𑀢𑁂 (𑀲𑀻. 𑀧𑀻.)] 𑀚𑀦𑀺𑀦𑁆𑀤𑁄.

𑁨𑁨𑁨. 𑀤𑀴𑁆𑀳𑀲𑁆𑀫𑀺 𑀫𑀽𑀮𑁂 𑀯𑀺𑀲𑀝𑁂 𑀯𑀺𑀭𑀽𑀴𑁆𑀳𑁂, 𑀤𑀼𑀦𑁆𑀦𑀺𑀓𑁆𑀓𑀬𑁄 𑀯𑁂𑀴𑀼 𑀧𑀲𑀸𑀔𑀚𑀸𑀢𑁄;

𑀯𑀦𑁆𑀤𑀸𑀫𑀺 𑀧𑀸𑀤𑀸𑀦𑀺 𑀢𑀯 [𑀢𑀯𑀁 (𑀲𑀻. 𑀧𑀻.)] 𑀚𑀦𑀺𑀦𑁆𑀤, 𑀅𑀦𑀼𑀚𑀸𑀦 𑀫𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀺 𑀤𑁂𑀯.

𑁨𑁨𑁩. 𑀪𑀼𑀜𑁆𑀚𑀲𑁆𑀲𑀼 𑀪𑁄𑀕𑁂 𑀯𑀺𑀧𑀼𑀮𑁂 𑀓𑀼𑀫𑀸𑀭, 𑀲𑀩𑁆𑀩𑀜𑁆𑀘 𑀢𑁂 𑀇𑀲𑁆𑀲𑀭𑀺𑀬𑀁 𑀤𑀤𑀸𑀫𑀺;

𑀅𑀚𑁆𑀚𑁂𑀯 𑀢𑁆𑀯𑀁 𑀓𑀼𑀭𑀽𑀦𑀁 𑀳𑁄𑀳𑀺 𑀭𑀸𑀚𑀸, 𑀫𑀸 𑀧𑀩𑁆𑀩𑀚𑀻 𑀧𑀩𑁆𑀩𑀚𑁆𑀚𑀸 𑀳𑀺 𑀤𑀼𑀓𑁆𑀔𑀸.

𑁨𑁨𑁪. 𑀓𑀺𑀦𑁆𑀦𑀽𑀥 𑀤𑁂𑀯 𑀢𑀯𑀫𑀢𑁆𑀣𑀺 𑀪𑁄𑀕𑀸, 𑀧𑀼𑀩𑁆𑀩𑁂𑀯𑀳𑀁 [𑀧𑀼𑀩𑁆𑀩𑁂 𑀘𑀳𑀁 (𑀓.)] 𑀤𑁂𑀯𑀮𑁄𑀓𑁂 𑀭𑀫𑀺𑀲𑁆𑀲𑀁;

𑀭𑀽𑀧𑁂𑀳𑀺 𑀲𑀤𑁆𑀤𑁂𑀳𑀺 𑀅𑀣𑁄 𑀭𑀲𑁂𑀳𑀺, 𑀕𑀦𑁆𑀥𑁂𑀳𑀺 𑀨𑀲𑁆𑀲𑁂𑀳𑀺 𑀫𑀦𑁄𑀭𑀫𑁂𑀳𑀺.

𑁨𑁨𑁫. 𑀪𑀼𑀢𑁆𑀢𑀸 𑀘 𑀫𑁂 [𑀪𑀼𑀢𑁆𑀢𑀸 (𑀲𑀻. 𑀧𑀻.)] 𑀪𑁄𑀕𑀸 𑀢𑀺𑀤𑀺𑀯𑀲𑁆𑀫𑀺𑀁 𑀤𑁂𑀯, 𑀧𑀭𑀺𑀯𑀸𑀭𑀺𑀢𑀸 [𑀧𑀭𑀺𑀘𑀸𑀭𑀺𑀢𑀸 (𑀓.)] 𑀅𑀘𑁆𑀙𑀭𑀸𑀦𑀁 𑀕𑀡𑁂𑀦 [𑀅𑀘𑁆𑀙𑀭𑀸𑀲𑀁𑀕𑀡𑁂𑀦 (𑀲𑁆𑀬𑀸. 𑀧𑀻. 𑀓.)];

𑀢𑀼𑀯𑀜𑁆𑀘 [𑀢𑀯𑀜𑁆𑀘 (𑀲𑀻. 𑀧𑀻.)] 𑀩𑀸𑀮𑀁 𑀧𑀭𑀦𑁂𑀬𑁆𑀬𑀁 𑀯𑀺𑀤𑀺𑀢𑁆𑀯𑀸, 𑀦 𑀢𑀸𑀤𑀺𑀲𑁂 𑀭𑀸𑀚𑀓𑀼𑀮𑁂 𑀯𑀲𑁂𑀬𑁆𑀬𑀁.

𑁨𑁨𑁬. 𑀲𑀘𑀸𑀳𑀁 𑀩𑀸𑀮𑁄 𑀧𑀭𑀦𑁂𑀬𑁆𑀬𑁄 𑀅𑀲𑁆𑀫𑀺, 𑀏𑀓𑀸𑀧𑀭𑀸𑀥𑀁 [𑀏𑀢𑀸𑀧𑀭𑀸𑀥𑀁 (𑀓.)] 𑀔𑀫 𑀧𑀼𑀢𑁆𑀢 𑀫𑀬𑁆𑀳𑀁;

𑀧𑀼𑀦𑀧𑀺 𑀘𑁂 𑀏𑀤𑀺𑀲𑀓𑀁 𑀪𑀯𑁂𑀬𑁆𑀬, 𑀬𑀣𑀸𑀫𑀢𑀺𑀁 𑀲𑁄𑀫𑀦𑀲𑁆𑀲 𑀓𑀭𑁄𑀳𑀺.

𑁨𑁨𑁭. 𑀅𑀦𑀺𑀲𑀫𑁆𑀫 𑀓𑀢𑀁 𑀓𑀫𑁆𑀫𑀁, 𑀅𑀦𑀯𑀢𑁆𑀣𑀸𑀬 𑀘𑀺𑀦𑁆𑀢𑀺𑀢𑀁;

𑀪𑁂𑀲𑀚𑁆𑀚𑀲𑁆𑀲𑁂𑀯 𑀯𑁂𑀪𑀗𑁆𑀕𑁄, 𑀯𑀺𑀧𑀸𑀓𑁄 𑀳𑁄𑀢𑀺 𑀧𑀸𑀧𑀓𑁄.

𑁨𑁨𑁮. 𑀦𑀺𑀲𑀫𑁆𑀫 𑀘 𑀓𑀢𑀁 𑀓𑀫𑁆𑀫𑀁, 𑀲𑀫𑁆𑀫𑀸𑀯𑀢𑁆𑀣𑀸𑀬 𑀘𑀺𑀦𑁆𑀢𑀺𑀢𑀁;

𑀪𑁂𑀲𑀚𑁆𑀚𑀲𑁆𑀲𑁂𑀯 𑀲𑀫𑁆𑀧𑀢𑁆𑀢𑀺, 𑀯𑀺𑀧𑀸𑀓𑁄 𑀳𑁄𑀢𑀺 𑀪𑀤𑁆𑀭𑀓𑁄.

𑁨𑁨𑁯. 𑀅𑀮𑀲𑁄 𑀕𑀺𑀳𑀻 𑀓𑀸𑀫𑀪𑁄𑀕𑀻 𑀦 𑀲𑀸𑀥𑀼, 𑀅𑀲𑀜𑁆𑀜𑀢𑁄 𑀧𑀩𑁆𑀩𑀚𑀺𑀢𑁄 𑀦 𑀲𑀸𑀥𑀼;

𑀭𑀸𑀚𑀸 𑀦 𑀲𑀸𑀥𑀼 𑀅𑀦𑀺𑀲𑀫𑁆𑀫𑀓𑀸𑀭𑀻, 𑀬𑁄 𑀧𑀡𑁆𑀟𑀺𑀢𑁄 𑀓𑁄𑀥𑀦𑁄 𑀢𑀁 𑀦 𑀲𑀸𑀥𑀼.

𑁨𑁩𑁦. 𑀦𑀺𑀲𑀫𑁆𑀫 𑀔𑀢𑁆𑀢𑀺𑀬𑁄 𑀓𑀬𑀺𑀭𑀸, 𑀦𑀸𑀦𑀺𑀲𑀫𑁆𑀫 𑀤𑀺𑀲𑀫𑁆𑀧𑀢𑀺;

𑀦𑀺𑀲𑀫𑁆𑀫𑀓𑀸𑀭𑀺𑀦𑁄 𑀭𑀸𑀚, 𑀬𑀲𑁄 𑀓𑀺𑀢𑁆𑀢𑀺 𑀘 𑀯𑀟𑁆𑀠𑀢𑀺.

𑁨𑁩𑁧. 𑀦𑀺𑀲𑀫𑁆𑀫 𑀤𑀡𑁆𑀟𑀁 𑀧𑀡𑀬𑁂𑀬𑁆𑀬 𑀇𑀲𑁆𑀲𑀭𑁄, 𑀯𑁂𑀕𑀸 𑀓𑀢𑀁 𑀢𑀧𑁆𑀧𑀢𑀺 𑀪𑀽𑀫𑀺𑀧𑀸𑀮;

𑀲𑀫𑁆𑀫𑀸𑀧𑀡𑀻𑀥𑀻 𑀘 𑀦𑀭𑀲𑁆𑀲 𑀅𑀢𑁆𑀣𑀸, 𑀅𑀦𑀸𑀦𑀼𑀢𑀧𑁆𑀧𑀸 𑀢𑁂 𑀪𑀯𑀦𑁆𑀢𑀺 𑀧𑀘𑁆𑀙𑀸.

𑁨𑁩𑁨. 𑀅𑀦𑀸𑀦𑀼𑀢𑀧𑁆𑀧𑀸𑀦𑀺 𑀳𑀺 𑀬𑁂 𑀓𑀭𑁄𑀦𑁆𑀢𑀺, 𑀯𑀺𑀪𑀚𑁆𑀚 𑀓𑀫𑁆𑀫𑀸𑀬𑀢𑀦𑀸𑀦𑀺 𑀮𑁄𑀓𑁂;

𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺 𑀲𑀼𑀔𑀼𑀤𑁆𑀭𑀬𑀸𑀦𑀺, 𑀪𑀯𑀦𑁆𑀢𑀺 𑀩𑀼𑀤𑁆𑀥𑀸𑀦𑀼𑀫𑀢𑀸𑀦𑀺 [𑀯𑀤𑁆𑀥𑀸𑀦𑀼𑀫𑀢𑀸𑀦𑀺 (𑀲𑀻. 𑀧𑀻.)] 𑀢𑀸𑀦𑀺.

𑁨𑁩𑁩. 𑀆𑀕𑀘𑁆𑀙𑀼𑀁 𑀤𑁄𑀯𑀸𑀭𑀺𑀓𑀸 𑀔𑀕𑁆𑀕𑀩𑀦𑁆𑀥𑀸, 𑀓𑀸𑀲𑀸𑀯𑀺𑀬𑀸 𑀳𑀦𑁆𑀢𑀼 𑀫𑀫𑀁 𑀚𑀦𑀺𑀦𑁆𑀤;

𑀫𑀸𑀢𑀼𑀜𑁆𑀘 [𑀫𑀸𑀢𑀼𑀘𑁆𑀘 (𑀧𑀻.)] 𑀅𑀗𑁆𑀓𑀲𑁆𑀫𑀺𑀫𑀳𑀁 𑀦𑀺𑀲𑀺𑀦𑁆𑀦𑁄, 𑀆𑀓𑀟𑁆𑀠𑀺𑀢𑁄 𑀲𑀳𑀲𑀸 𑀢𑁂𑀳𑀺 𑀤𑁂𑀯.

𑁨𑁩𑁪. 𑀓𑀝𑀼𑀓𑀜𑁆𑀳𑀺 𑀲𑀫𑁆𑀩𑀸𑀥𑀁 𑀲𑀼𑀓𑀺𑀘𑁆𑀙𑀁 [𑀲𑀼𑀓𑀺𑀘𑁆𑀙 (𑀲𑀻. 𑀧𑀻.)] 𑀧𑀢𑁆𑀢𑁄, 𑀫𑀥𑀼𑀭𑀫𑁆𑀧𑀺 𑀬𑀁 𑀚𑀻𑀯𑀺𑀢𑀁 𑀮𑀤𑁆𑀥 𑀭𑀸𑀚;

𑀓𑀺𑀘𑁆𑀙𑁂𑀦𑀳𑀁 𑀅𑀚𑁆𑀚 𑀯𑀥𑀸 𑀧𑀫𑀼𑀢𑁆𑀢𑁄, 𑀧𑀩𑁆𑀩𑀚𑁆𑀚𑀫𑁂𑀯𑀸𑀪𑀺𑀫𑀦𑁄𑀳𑀫𑀲𑁆𑀫𑀺.

𑁨𑁩𑁫. 𑀧𑀼𑀢𑁆𑀢𑁄 𑀢𑀯𑀸𑀬𑀁 𑀢𑀭𑀼𑀡𑁄 𑀲𑀼𑀥𑀫𑁆𑀫𑁂, 𑀅𑀦𑀼𑀓𑀫𑁆𑀧𑀓𑁄 𑀲𑁄𑀫𑀦𑀲𑁆𑀲𑁄 𑀓𑀼𑀫𑀸𑀭𑁄;

𑀢𑀁 𑀬𑀸𑀘𑀫𑀸𑀦𑁄 𑀦 𑀮𑀪𑀸𑀫𑀺 𑀲𑁆𑀯𑀚𑁆𑀚 [𑀲𑀚𑁆𑀚 (𑀲𑀻. 𑀧𑀻.)], 𑀅𑀭𑀳𑀲𑀺 𑀦𑀁 𑀬𑀸𑀘𑀺𑀢𑀯𑁂 [𑀬𑀸𑀘𑀺𑀢𑀼𑀬𑁂 (𑀓.)] 𑀢𑀼𑀯𑀫𑁆𑀧𑀺.

𑁨𑁩𑁬. 𑀭𑀫𑀲𑁆𑀲𑀼 𑀪𑀺𑀓𑁆𑀔𑀸𑀘𑀭𑀺𑀬𑀸𑀬 𑀧𑀼𑀢𑁆𑀢, 𑀦𑀺𑀲𑀫𑁆𑀫 𑀥𑀫𑁆𑀫𑁂𑀲𑀼 𑀧𑀭𑀺𑀩𑁆𑀩𑀚𑀲𑁆𑀲𑀼;

𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀁, 𑀅𑀦𑀺𑀦𑁆𑀤𑀺𑀢𑁄 𑀩𑁆𑀭𑀳𑁆𑀫𑀫𑀼𑀧𑁂𑀳𑀺 𑀞𑀸𑀦𑀁.

𑁨𑁩𑁭. 𑀅𑀘𑁆𑀙𑁂𑀭 [𑀅𑀘𑁆𑀙𑀭𑀺𑀬 (𑀲𑀻. 𑀲𑁆𑀬𑀸. 𑀧𑀻.)] 𑀭𑀽𑀧𑀁 𑀯𑀢 𑀬𑀸𑀤𑀺𑀲𑀜𑁆𑀘, 𑀤𑀼𑀓𑁆𑀔𑀺𑀢𑀁 𑀫𑀁 𑀤𑀼𑀓𑁆𑀔𑀸𑀧𑀬𑀲𑁂 𑀲𑀼𑀥𑀫𑁆𑀫𑁂;

𑀬𑀸𑀘𑀲𑁆𑀲𑀼 𑀧𑀼𑀢𑁆𑀢𑀁 𑀇𑀢𑀺 𑀯𑀼𑀘𑁆𑀘𑀫𑀸𑀦𑀸, 𑀪𑀺𑀬𑁆𑀬𑁄𑀯 𑀉𑀲𑁆𑀲𑀸𑀳𑀬𑀲𑁂 𑀓𑀼𑀫𑀸𑀭𑀁.

𑁨𑁩𑁮. 𑀬𑁂 𑀯𑀺𑀧𑁆𑀧𑀫𑀼𑀢𑁆𑀢𑀸 𑀅𑀦𑀯𑀚𑁆𑀚𑀪𑁄𑀕𑀺𑀦𑁄 [𑀪𑁄𑀚𑀺𑀦𑁄 (𑀲𑀻. 𑀲𑁆𑀬𑀸. 𑀧𑀻.)], 𑀧𑀭𑀺𑀦𑀺𑀩𑁆𑀩𑀼𑀢𑀸 𑀮𑁄𑀓𑀫𑀺𑀫𑀁 𑀘𑀭𑀦𑁆𑀢𑀺;

𑀢𑀫𑀭𑀺𑀬𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀫𑀸𑀦𑀁, 𑀦 𑀉𑀲𑁆𑀲𑀳𑁂 𑀯𑀸𑀭𑀬𑀺𑀢𑀼𑀁 𑀓𑀼𑀫𑀸𑀭𑀁.

𑁨𑁩𑁯. 𑀅𑀤𑁆𑀥𑀸 𑀳𑀯𑁂 𑀲𑁂𑀯𑀺𑀢𑀩𑁆𑀩𑀸 𑀲𑀧𑀜𑁆𑀜𑀸, 𑀩𑀳𑀼𑀲𑁆𑀲𑀼𑀢𑀸 𑀬𑁂 𑀩𑀳𑀼𑀞𑀸𑀦𑀘𑀺𑀦𑁆𑀢𑀺𑀦𑁄;

𑀬𑁂𑀲𑀸𑀬𑀁 𑀲𑀼𑀢𑁆𑀯𑀸𑀦 𑀲𑀼𑀪𑀸𑀲𑀺𑀢𑀸𑀦𑀺, 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀸 𑀯𑀻𑀢𑀲𑁄𑀓𑀸 𑀲𑀼𑀥𑀫𑁆𑀫𑀸𑀢𑀺.

𑀲𑁄𑀫𑀦𑀲𑁆𑀲𑀚𑀸𑀢𑀓𑀁 𑀦𑀯𑀫𑀁.