𑁫𑁦𑁪. 𑀪𑀮𑁆𑀮𑀸𑀢𑀺𑀬𑀚𑀸𑀢𑀓𑀁 (𑁮)

𑁧𑁮𑁬. 𑀪𑀮𑁆𑀮𑀸𑀢𑀺𑀬𑁄 [𑀪𑀮𑁆𑀮𑀸𑀝𑀺𑀬𑁄 (𑀲𑀻. 𑀧𑀻.)] 𑀦𑀸𑀫 𑀅𑀳𑁄𑀲𑀺 𑀭𑀸𑀚𑀸, 𑀭𑀝𑁆𑀞𑀁 𑀧𑀳𑀸𑀬 𑀫𑀺𑀕𑀯𑀁 𑀅𑀘𑀸𑀭𑀺 𑀲𑁄;

𑀅𑀕𑀫𑀸 𑀕𑀺𑀭𑀺𑀯𑀭𑀁 𑀕𑀦𑁆𑀥𑀫𑀸𑀤𑀦𑀁, 𑀲𑀼𑀧𑀼𑀧𑁆𑀨𑀺𑀢𑀁 [𑀲𑀫𑁆𑀧𑀼𑀧𑁆𑀨𑀺𑀢𑀁 (𑀲𑀻. 𑀧𑀻.)] 𑀓𑀺𑀫𑁆𑀧𑀼𑀭𑀺𑀲𑀸𑀦𑀼𑀘𑀺𑀡𑁆𑀡𑀁.

𑁧𑁮𑁭. 𑀲𑀸𑀴𑀽𑀭𑀲𑀗𑁆𑀖𑀜𑁆𑀘 𑀦𑀺𑀲𑁂𑀥𑀬𑀺𑀢𑁆𑀯𑀸, 𑀥𑀦𑀼𑀁 [𑀥𑀦𑀼 (𑀲𑀻. 𑀲𑁆𑀬𑀸. 𑀧𑀻.)] 𑀓𑀮𑀸𑀧𑀜𑁆𑀘 𑀲𑁄 𑀦𑀺𑀓𑁆𑀔𑀺𑀧𑀺𑀢𑁆𑀯𑀸;

𑀉𑀧𑀸𑀕𑀫𑀺 𑀯𑀘𑀦𑀁 𑀯𑀢𑁆𑀢𑀼𑀓𑀸𑀫𑁄, 𑀬𑀢𑁆𑀣𑀝𑁆𑀞𑀺𑀢𑀸 𑀓𑀺𑀫𑁆𑀧𑀼𑀭𑀺𑀲𑀸 𑀅𑀳𑁂𑀲𑀼𑀁.

𑁧𑁮𑁮. 𑀳𑀺𑀫𑀘𑁆𑀘𑀬𑁂 𑀳𑁂𑀫𑀯𑀢𑀸𑀬 𑀢𑀻𑀭𑁂, 𑀓𑀺𑀫𑀺𑀥𑀝𑁆𑀞𑀺𑀢𑀸 𑀫𑀦𑁆𑀢𑀬𑀯𑁆𑀳𑁄 𑀅𑀪𑀺𑀡𑁆𑀳𑀁;

𑀧𑀼𑀘𑁆𑀙𑀸𑀫𑀺 𑀯𑁄 𑀫𑀸𑀦𑀼𑀲𑀤𑁂𑀳𑀯𑀡𑁆𑀡𑁂, 𑀓𑀣𑀁 𑀦𑀼 [𑀓𑀣𑀁 𑀯𑁄 (𑀲𑀻. 𑀲𑁆𑀬𑀸. 𑀧𑀻.)] 𑀚𑀸𑀦𑀦𑁆𑀢𑀺 𑀫𑀦𑀼𑀲𑁆𑀲𑀮𑁄𑀓𑁂.

𑁧𑁮𑁯. 𑀫𑀮𑁆𑀮𑀁 𑀕𑀺𑀭𑀺𑀁 𑀧𑀡𑁆𑀟𑀭𑀓𑀁 𑀢𑀺𑀓𑀽𑀝𑀁, 𑀲𑀻𑀢𑁄𑀤𑀓𑀸 [𑀲𑀻𑀢𑁄𑀤𑀺𑀬𑀸 (𑀲𑀻. 𑀧𑀻.), 𑀲𑀻𑀢𑁄𑀤𑀺𑀓𑀸 (?)] 𑀅𑀦𑀼𑀯𑀺𑀘𑀭𑀸𑀫 𑀦𑀚𑁆𑀚𑁄;

𑀫𑀺𑀕𑀸 𑀫𑀦𑀼𑀲𑁆𑀲𑀸𑀯 𑀦𑀺𑀪𑀸𑀲𑀯𑀡𑁆𑀡𑀸, 𑀚𑀸𑀦𑀦𑁆𑀢𑀺 𑀦𑁄 𑀓𑀺𑀫𑁆𑀧𑀼𑀭𑀺𑀲𑀸𑀢𑀺 𑀮𑀼𑀤𑁆𑀤.

𑁧𑁯𑁦. 𑀲𑀼𑀓𑀺𑀘𑁆𑀙𑀭𑀽𑀧𑀁 𑀧𑀭𑀺𑀤𑁂𑀯𑀬𑀯𑁆𑀳𑁄 [𑀧𑀭𑀺𑀤𑁂𑀯𑀣𑀯𑁆𑀳𑁄 (?) 𑀫𑁄𑀕𑁆𑀕𑀮𑁆𑀮𑀸𑀦𑀩𑁆𑀬𑀸𑀓𑀭𑀡𑁂 𑁬.𑁩𑁮 𑀲𑀼𑀢𑁆𑀢𑀁], 𑀆𑀮𑀺𑀗𑁆𑀕𑀺𑀢𑁄 𑀘𑀸𑀲𑀺 𑀧𑀺𑀬𑁄 𑀧𑀺𑀬𑀸𑀬;

𑀧𑀼𑀘𑁆𑀙𑀸𑀫𑀺 𑀯𑁄 𑀫𑀸𑀦𑀼𑀲𑀤𑁂𑀳𑀯𑀡𑁆𑀡𑁂, 𑀓𑀺𑀫𑀺𑀥 𑀯𑀦𑁂 𑀭𑁄𑀤𑀣 𑀅𑀧𑁆𑀧𑀢𑀻𑀢𑀸.

𑁧𑁯𑁧. 𑀲𑀼𑀓𑀺𑀘𑁆𑀙𑀭𑀽𑀧𑀁 𑀧𑀭𑀺𑀤𑁂𑀯𑀬𑀯𑁆𑀳𑁄, 𑀆𑀮𑀺𑀗𑁆𑀕𑀺𑀢𑁄 𑀘𑀸𑀲𑀺 𑀧𑀺𑀬𑁄 𑀧𑀺𑀬𑀸𑀬;

𑀧𑀼𑀘𑁆𑀙𑀸𑀫𑀺 𑀯𑁄 𑀫𑀸𑀦𑀼𑀲𑀤𑁂𑀳𑀯𑀡𑁆𑀡𑁂, 𑀓𑀺𑀫𑀺𑀥 𑀯𑀦𑁂 𑀯𑀺𑀮𑀧𑀣 𑀅𑀧𑁆𑀧𑀢𑀻𑀢𑀸.

𑁧𑁯𑁨. 𑀲𑀼𑀓𑀺𑀘𑁆𑀙𑀭𑀽𑀧𑀁 𑀧𑀭𑀺𑀤𑁂𑀯𑀬𑀯𑁆𑀳𑁄, 𑀆𑀮𑀺𑀗𑁆𑀕𑀺𑀢𑁄 𑀘𑀸𑀲𑀺 𑀧𑀺𑀬𑁄 𑀧𑀺𑀬𑀸𑀬;

𑀧𑀼𑀘𑁆𑀙𑀸𑀫𑀺 𑀯𑁄 𑀫𑀸𑀦𑀼𑀲𑀤𑁂𑀳𑀯𑀡𑁆𑀡𑁂, 𑀓𑀺𑀫𑀺𑀥 𑀯𑀦𑁂 𑀲𑁄𑀘𑀣 𑀅𑀧𑁆𑀧𑀢𑀻𑀢𑀸.

𑁧𑁯𑁩. 𑀫𑀬𑁂𑀓𑀭𑀢𑁆𑀢𑀁 [𑀭𑀢𑁆𑀢𑀺𑀁 (𑀧𑀻.)] 𑀯𑀺𑀧𑁆𑀧𑀯𑀲𑀺𑀫𑁆𑀳 𑀮𑀼𑀤𑁆𑀤, 𑀅𑀓𑀸𑀫𑀓𑀸 𑀅𑀜𑁆𑀜𑀫𑀜𑁆𑀜𑀁 𑀲𑀭𑀦𑁆𑀢𑀸;

𑀢𑀫𑁂𑀓𑀭𑀢𑁆𑀢𑀁 𑀅𑀦𑀼𑀢𑀧𑁆𑀧𑀫𑀸𑀦𑀸, 𑀲𑁄𑀘𑀸𑀫 ‘‘𑀲𑀸 𑀭𑀢𑁆𑀢𑀺 𑀧𑀼𑀦𑀁 𑀦 𑀳𑁂𑀲𑁆𑀲𑀢𑀺’’.

𑁧𑁯𑁪. 𑀬𑀫𑁂𑀓𑀭𑀢𑁆𑀢𑀁 𑀅𑀦𑀼𑀢𑀧𑁆𑀧𑀣𑁂𑀢𑀁, 𑀥𑀦𑀁 𑀯 𑀦𑀝𑁆𑀞𑀁 𑀧𑀺𑀢𑀭𑀁 𑀯 𑀧𑁂𑀢𑀁;

𑀧𑀼𑀘𑁆𑀙𑀸𑀫𑀺 𑀯𑁄 𑀫𑀸𑀦𑀼𑀲𑀤𑁂𑀳𑀯𑀡𑁆𑀡𑁂, 𑀓𑀣𑀁 𑀯𑀺𑀦𑀸 𑀯𑀸𑀲𑀫𑀓𑀧𑁆𑀧𑀬𑀺𑀢𑁆𑀣.

𑁧𑁯𑁫. 𑀬𑀫𑀺𑀫𑀁 [𑀬𑀬𑀺𑀫𑀁 (𑀓. 𑀲𑀻.)] 𑀦𑀤𑀺𑀁 𑀧𑀲𑁆𑀲𑀲𑀺 𑀲𑀻𑀖𑀲𑁄𑀢𑀁, 𑀦𑀸𑀦𑀸𑀤𑀼𑀫𑀘𑁆𑀙𑀸𑀤𑀦𑀁 𑀲𑁂𑀮𑀓𑀽𑀮𑀁 [𑀤𑀼𑀫𑀘𑁆𑀙𑀤𑀦𑀁 𑀲𑁂𑀮𑀓𑀽𑀝𑀁 (𑀲𑀻. 𑀧𑀻.), 𑀤𑀼𑀫𑀲𑀜𑁆𑀙𑀦𑁆𑀦𑀁 𑀲𑁂𑀮𑀓𑀽𑀮𑀁 (𑀓.)];

𑀢𑀁 𑀫𑁂 𑀧𑀺𑀬𑁄 𑀉𑀢𑁆𑀢𑀭𑀺 𑀯𑀲𑁆𑀲𑀓𑀸𑀮𑁂, 𑀫𑀫𑀜𑁆𑀘 𑀫𑀜𑁆𑀜𑀁 𑀅𑀦𑀼𑀩𑀦𑁆𑀥𑀢𑀻𑀢𑀺.

𑁧𑁯𑁬. 𑀅𑀳𑀜𑁆𑀘 𑀅𑀗𑁆𑀓𑁄𑀮𑀓𑀫𑁄𑀘𑀺𑀦𑀸𑀫𑀺, 𑀅𑀢𑀺𑀫𑀼𑀢𑁆𑀢𑀓𑀁 𑀲𑀢𑁆𑀢𑀮𑀺𑀬𑁄𑀣𑀺𑀓𑀜𑁆𑀘;

‘‘𑀧𑀺𑀬𑁄 𑀘 𑀫𑁂 𑀳𑁂𑀳𑀺𑀢𑀺 𑀫𑀸𑀮𑀪𑀸𑀭𑀻, 𑀅𑀳𑀜𑁆𑀘 𑀦𑀁 𑀫𑀸𑀮𑀺𑀦𑀻 𑀅𑀚𑁆𑀛𑀼𑀧𑁂𑀲𑁆𑀲𑀁’’.

𑁧𑁯𑁭. 𑀅𑀳𑀜𑁆𑀘𑀺𑀤𑀁 𑀓𑀼𑀭𑀯𑀓𑀫𑁄𑀘𑀺𑀦𑀸𑀫𑀺, 𑀉𑀤𑁆𑀤𑀸𑀮𑀓𑀸 𑀧𑀸𑀝𑀮𑀺𑀲𑀺𑀦𑁆𑀥𑀼𑀯𑀸𑀭𑀓𑀸 [𑀲𑀺𑀦𑁆𑀥𑀼𑀯𑀸𑀭𑀺𑀢𑀸 (𑀲𑁆𑀬𑀸. 𑀧𑀻. 𑀓.)];

‘‘𑀧𑀺𑀬𑁄 𑀘 𑀫𑁂 𑀳𑁂𑀳𑀺𑀢𑀺 𑀫𑀸𑀮𑀪𑀸𑀭𑀻, 𑀅𑀳𑀜𑁆𑀘 𑀦𑀁 𑀫𑀸𑀮𑀺𑀦𑀻 𑀅𑀚𑁆𑀛𑀼𑀧𑁂𑀲𑁆𑀲𑀁’’.

𑁧𑁯𑁮. 𑀅𑀳𑀜𑁆𑀘 𑀲𑀸𑀮𑀲𑁆𑀲 𑀲𑀼𑀧𑀼𑀧𑁆𑀨𑀺𑀢𑀲𑁆𑀲, 𑀑𑀘𑁂𑀬𑁆𑀬 𑀧𑀼𑀧𑁆𑀨𑀸𑀦𑀺 𑀓𑀭𑁄𑀫𑀺 𑀫𑀸𑀮𑀁;

‘‘𑀧𑀺𑀬𑁄 𑀘 𑀫𑁂 𑀳𑁂𑀳𑀺𑀢𑀺 𑀫𑀸𑀮𑀪𑀸𑀭𑀻, 𑀅𑀳𑀜𑁆𑀘 𑀦𑀁 𑀫𑀸𑀮𑀺𑀦𑀻 𑀅𑀚𑁆𑀛𑀼𑀧𑁂𑀲𑁆𑀲𑀁’’.

𑁧𑁯𑁯. 𑀅𑀳𑀜𑁆𑀘 𑀲𑀸𑀮𑀲𑁆𑀲 𑀲𑀼𑀧𑀼𑀧𑁆𑀨𑀺𑀢𑀲𑁆𑀲, 𑀑𑀘𑁂𑀬𑁆𑀬 𑀧𑀼𑀧𑁆𑀨𑀸𑀦𑀺 𑀓𑀭𑁄𑀫𑀺 𑀪𑀸𑀭𑀁;

𑀇𑀤𑀜𑁆𑀘 𑀦𑁄 𑀳𑁂𑀳𑀺𑀢𑀺 𑀲𑀦𑁆𑀣𑀭𑀢𑁆𑀣𑀁, 𑀬𑀢𑁆𑀣𑀚𑁆𑀚𑀺𑀫𑀁 [𑀬𑀢𑁆𑀣𑀚𑁆𑀚𑀫𑀁 (𑀲𑀻. 𑀧𑀻.)] 𑀯𑀺𑀳𑀭𑀺𑀲𑁆𑀲𑀸𑀫 [𑀯𑀺𑀳𑀭𑀺𑀲𑁆𑀲𑀸𑀫𑀼 (𑀧𑀻.)] 𑀭𑀢𑁆𑀢𑀺𑀁.

𑁨𑁦𑁦. 𑀅𑀳𑀜𑁆𑀘 𑀔𑁄 𑀅𑀕𑀴𑀼𑀁 [𑀅𑀕𑁆𑀕𑀮𑀼 (𑀲𑁆𑀬𑀸. 𑀓.), 𑀅𑀓𑀮𑀼𑀁 (𑀧𑀻.)] 𑀘𑀦𑁆𑀤𑀦𑀜𑁆𑀘, 𑀲𑀺𑀮𑀸𑀬 𑀧𑀺𑀁𑀲𑀸𑀫𑀺 𑀧𑀫𑀢𑁆𑀢𑀭𑀽𑀧𑀸;

‘‘𑀧𑀺𑀬𑁄 𑀘 𑀫𑁂 𑀳𑁂𑀳𑀺𑀢𑀺 𑀭𑁄𑀲𑀺𑀢𑀗𑁆𑀕𑁄, 𑀅𑀳𑀜𑁆𑀘 𑀦𑀁 𑀭𑁄𑀲𑀺𑀢𑀸 𑀅𑀚𑁆𑀛𑀼𑀧𑁂𑀲𑁆𑀲𑀁’’.

𑁨𑁦𑁧. 𑀅𑀣𑀸𑀕𑀫𑀸 𑀲𑀮𑀺𑀮𑀁 𑀲𑀻𑀖𑀲𑁄𑀢𑀁, 𑀦𑀼𑀤𑀁 𑀲𑀸𑀮𑁂 𑀲𑀮𑀴𑁂 𑀓𑀡𑁆𑀡𑀺𑀓𑀸𑀭𑁂;

𑀆𑀧𑀽𑀭𑀣 [𑀅𑀧𑀽𑀭𑀣 (𑀲𑀻. 𑀧𑀻.), 𑀆𑀧𑀽𑀭𑀣𑁂 (𑀲𑁆𑀬𑀸.)] 𑀢𑁂𑀦 𑀫𑀼𑀳𑀼𑀢𑁆𑀢𑀓𑁂𑀦, 𑀲𑀸𑀬𑀁 𑀦𑀤𑀻 𑀆𑀲𑀺 𑀫𑀬𑀸 𑀲𑀼𑀤𑀼𑀢𑁆𑀢𑀭𑀸.

𑁨𑁦𑁨. 𑀉𑀪𑁄𑀲𑀼 𑀢𑀻𑀭𑁂𑀲𑀼 𑀫𑀬𑀁 𑀢𑀤𑀸 𑀞𑀺𑀢𑀸, 𑀲𑀫𑁆𑀧𑀲𑁆𑀲𑀦𑁆𑀢𑀸 𑀉𑀪𑀬𑁄 𑀅𑀜𑁆𑀜𑀫𑀜𑁆𑀜𑀁;

𑀲𑀓𑀺𑀫𑁆𑀧𑀺 𑀭𑁄𑀤𑀸𑀫 𑀲𑀓𑀺𑀁 𑀳𑀲𑀸𑀫, 𑀓𑀺𑀘𑁆𑀙𑁂𑀦 𑀦𑁄 𑀆𑀕𑀫𑀸 [𑀅𑀕𑀫𑀸 (𑀲𑀻. 𑀲𑁆𑀬𑀸. 𑀧𑀻.)] 𑀲𑀁𑀯𑀭𑀻 𑀲𑀸.

𑁨𑁦𑁩. 𑀧𑀸𑀢𑁄𑀯 [𑀧𑀸𑀢𑁄 𑀘 (𑀲𑀻. 𑀲𑁆𑀬𑀸. 𑀧𑀻.)] 𑀔𑁄 𑀉𑀕𑁆𑀕𑀢𑁂 𑀲𑀽𑀭𑀺𑀬𑀫𑁆𑀳𑀺, 𑀘𑀢𑀼𑀓𑁆𑀓𑀁 𑀦𑀤𑀺𑀁 𑀉𑀢𑁆𑀢𑀭𑀺𑀬𑀸𑀦 𑀮𑀼𑀤𑁆𑀤;

𑀆𑀮𑀺𑀗𑁆𑀕𑀺𑀬𑀸 𑀅𑀜𑁆𑀜𑀫𑀜𑁆𑀜𑀁 𑀫𑀬𑀁 𑀉𑀪𑁄, 𑀲𑀓𑀺𑀫𑁆𑀧𑀺 𑀭𑁄𑀤𑀸𑀫 𑀲𑀓𑀺𑀁 𑀳𑀲𑀸𑀫.

𑁨𑁦𑁪. 𑀢𑀻𑀳𑀽𑀦𑀓𑀁 𑀲𑀢𑁆𑀢𑀲𑀢𑀸𑀦𑀺 𑀮𑀼𑀤𑁆𑀤, 𑀬𑀫𑀺𑀥 𑀫𑀬𑀁 𑀯𑀺𑀧𑁆𑀧𑀯𑀲𑀺𑀫𑁆𑀳 𑀧𑀼𑀩𑁆𑀩𑁂;

𑀯𑀲𑁆𑀲𑁂𑀓𑀺𑀫𑀁 [𑀯𑀸𑀲𑁂𑀓𑀺𑀫𑀁 (𑀲𑀻. 𑀧𑀻.)] 𑀚𑀻𑀯𑀺𑀢𑀁 𑀪𑀽𑀫𑀺𑀧𑀸𑀮, 𑀓𑁄 𑀦𑀻𑀥 𑀓𑀦𑁆𑀢𑀸𑀬 𑀯𑀺𑀦𑀸 𑀯𑀲𑁂𑀬𑁆𑀬.

𑁨𑁦𑁫. 𑀆𑀬𑀼𑀜𑁆𑀘 𑀯𑁄 𑀓𑀻𑀯𑀢𑀓𑁄 𑀦𑀼 𑀲𑀫𑁆𑀫, 𑀲𑀘𑁂𑀧𑀺 𑀚𑀸𑀦𑀸𑀣 𑀯𑀤𑁂𑀣 𑀆𑀬𑀼𑀁;

𑀅𑀦𑀼𑀲𑁆𑀲𑀯𑀸 𑀯𑀼𑀟𑁆𑀠𑀢𑁄 𑀆𑀕𑀫𑀸 𑀯𑀸, 𑀅𑀓𑁆𑀔𑀸𑀣 𑀫𑁂 𑀢𑀁 𑀅𑀯𑀺𑀓𑀫𑁆𑀧𑀫𑀸𑀦𑀸.

𑁨𑁦𑁬. 𑀆𑀬𑀼𑀜𑁆𑀘 𑀦𑁄 𑀯𑀲𑁆𑀲𑀲𑀳𑀲𑁆𑀲𑀁 𑀮𑀼𑀤𑁆𑀤, 𑀦 𑀘𑀦𑁆𑀢𑀭𑀸 𑀧𑀸𑀧𑀓𑁄 𑀅𑀢𑁆𑀣𑀺 𑀭𑁄𑀕𑁄;

𑀅𑀧𑁆𑀧𑀜𑁆𑀘 [𑀅𑀧𑁆𑀧𑀁𑀯 (𑀲𑁆𑀬𑀸. 𑀓.)] 𑀤𑀼𑀓𑁆𑀔𑀁 𑀲𑀼𑀔𑀫𑁂𑀯 𑀪𑀺𑀬𑁆𑀬𑁄, 𑀅𑀯𑀻𑀢𑀭𑀸𑀕𑀸 𑀯𑀺𑀚𑀳𑀸𑀫 𑀚𑀻𑀯𑀺𑀢𑀁.

𑁨𑁦𑁭. 𑀇𑀤𑀜𑁆𑀘 𑀲𑀼𑀢𑁆𑀯𑀸𑀦 𑀅𑀫𑀸𑀦𑀼𑀲𑀸𑀦𑀁, 𑀪𑀮𑁆𑀮𑀸𑀢𑀺𑀬𑁄 𑀇𑀢𑁆𑀢𑀭 𑀚𑀻𑀯𑀺𑀢𑀦𑁆𑀢𑀺;

𑀦𑀺𑀯𑀢𑁆𑀢𑀣 𑀦 𑀫𑀺𑀕𑀯𑀁 𑀅𑀘𑀭𑀺, 𑀅𑀤𑀸𑀲𑀺 𑀤𑀸𑀦𑀸𑀦𑀺 𑀅𑀪𑀼𑀜𑁆𑀚𑀺 𑀪𑁄𑀕𑁂.

𑁨𑁦𑁮. 𑀇𑀤𑀜𑁆𑀘 𑀲𑀼𑀢𑁆𑀯𑀸𑀦 𑀅𑀫𑀸𑀦𑀼𑀲𑀸𑀦𑀁, 𑀲𑀫𑁆𑀫𑁄𑀤𑀣 𑀫𑀸 𑀓𑀮𑀳𑀁 𑀅𑀓𑀢𑁆𑀣;

𑀫𑀸 𑀯𑁄 𑀢𑀧𑀻 𑀅𑀢𑁆𑀢𑀓𑀫𑁆𑀫𑀸𑀧𑀭𑀸𑀥𑁄, 𑀬𑀣𑀸𑀧𑀺 𑀢𑁂 𑀓𑀺𑀫𑁆𑀧𑀼𑀭𑀺𑀲𑁂𑀓𑀭𑀢𑁆𑀢𑀁.

𑁨𑁦𑁯. 𑀇𑀤𑀜𑁆𑀘 𑀲𑀼𑀢𑁆𑀯𑀸𑀦 𑀅𑀫𑀸𑀦𑀼𑀲𑀸𑀦𑀁, 𑀲𑀫𑁆𑀫𑁄𑀤𑀣 𑀫𑀸 𑀯𑀺𑀯𑀸𑀤𑀁 𑀅𑀓𑀢𑁆𑀣;

𑀫𑀸 𑀯𑁄 𑀢𑀧𑀻 𑀅𑀢𑁆𑀢𑀓𑀫𑁆𑀫𑀸𑀧𑀭𑀸𑀥𑁄, 𑀬𑀣𑀸𑀧𑀺 𑀢𑁂 𑀓𑀺𑀫𑁆𑀧𑀼𑀭𑀺𑀲𑁂𑀓𑀭𑀢𑁆𑀢𑀁.

𑁨𑁧𑁦. 𑀯𑀺𑀯𑀺𑀥𑀁 [𑀯𑀺𑀯𑀺𑀥 (𑀲𑀻. 𑀲𑁆𑀬𑀸.)] 𑀅𑀥𑀺𑀫𑀦𑀸 𑀲𑀼𑀡𑁄𑀫𑀳𑀁, 𑀯𑀘𑀦𑀧𑀣𑀁 𑀢𑀯 𑀅𑀢𑁆𑀣𑀲𑀁𑀳𑀺𑀢𑀁;

𑀫𑀼𑀜𑁆𑀘𑀁 [𑀫𑀼𑀜𑁆𑀘 (𑀲𑀻. 𑀧𑀻.)] 𑀕𑀺𑀭𑀁 𑀦𑀼𑀤𑀲𑁂𑀯 𑀫𑁂 𑀤𑀭𑀁, 𑀲𑀫𑀡 𑀲𑀼𑀔𑀸𑀯𑀳 𑀚𑀻𑀯 𑀫𑁂 𑀘𑀺𑀭𑀦𑁆𑀢𑀺.

𑀪𑀮𑁆𑀮𑀸𑀢𑀺𑀬𑀚𑀸𑀢𑀓𑀁 𑀅𑀝𑁆𑀞𑀫𑀁.