𑁫𑁦𑁩. 𑀲𑀢𑁆𑀢𑀺𑀕𑀼𑀫𑁆𑀩𑀚𑀸𑀢𑀓𑀁 (𑁭)

𑁧𑁫𑁯. 𑀫𑀺𑀕𑀮𑀼𑀤𑁆𑀤𑁄 𑀫𑀳𑀸𑀭𑀸𑀚𑀸, 𑀧𑀜𑁆𑀘𑀸𑀮𑀸𑀦𑀁 𑀭𑀣𑁂𑀲𑀪𑁄;

𑀦𑀺𑀓𑁆𑀔𑀦𑁆𑀢𑁄 𑀲𑀳 𑀲𑁂𑀦𑀸𑀬, 𑀑𑀕𑀡𑁄 𑀯𑀦𑀫𑀸𑀕𑀫𑀸.

𑁧𑁬𑁦. 𑀢𑀢𑁆𑀣𑀤𑁆𑀤𑀲𑀸 𑀅𑀭𑀜𑁆𑀜𑀲𑁆𑀫𑀺𑀁, 𑀢𑀓𑁆𑀓𑀭𑀸𑀦𑀁 𑀓𑀼𑀝𑀺𑀁 𑀓𑀢𑀁;

𑀢𑀲𑁆𑀲𑀸 [𑀢𑀲𑁆𑀫𑀸 (𑀲𑁆𑀬𑀸. 𑀧𑀻. 𑀓.)] 𑀓𑀼𑀝𑀺𑀬𑀸 𑀦𑀺𑀓𑁆𑀔𑀫𑁆𑀫, 𑀲𑀼𑀯𑁄 𑀮𑀼𑀤𑁆𑀤𑀸𑀦𑀺 𑀪𑀸𑀲𑀢𑀺.

𑁧𑁬𑁧. 𑀲𑀫𑁆𑀧𑀦𑁆𑀦𑀯𑀸𑀳𑀦𑁄 𑀧𑁄𑀲𑁄, 𑀬𑀼𑀯𑀸 𑀲𑀫𑁆𑀫𑀝𑁆𑀞𑀓𑀼𑀡𑁆𑀟𑀮𑁄 [𑀓𑀼𑀡𑁆𑀟𑀮𑀻 (𑀲𑁆𑀬𑀸. 𑀓.)];

𑀲𑁄𑀪𑀢𑀺 𑀮𑁄𑀳𑀺𑀢𑀼𑀡𑁆𑀳𑀻𑀲𑁄, 𑀤𑀺𑀯𑀸 𑀲𑀽𑀭𑀺𑀬𑁄𑀯 𑀪𑀸𑀲𑀢𑀺.

𑁧𑁬𑁨. 𑀫𑀚𑁆𑀛𑀦𑁆𑀳𑀺𑀓𑁂 [𑀫𑀚𑁆𑀛𑀦𑁆𑀢𑀺𑀓𑁂 (𑀲𑀩𑁆𑀩𑀢𑁆𑀣)] 𑀲𑀫𑁆𑀧𑀢𑀺𑀓𑁂, 𑀲𑀼𑀢𑁆𑀢𑁄 𑀭𑀸𑀚𑀸 𑀲𑀲𑀸𑀭𑀣𑀺;

𑀳𑀦𑁆𑀤𑀲𑁆𑀲𑀸𑀪𑀭𑀡𑀁 𑀲𑀩𑁆𑀩𑀁, 𑀕𑀡𑁆𑀳𑀸𑀫 𑀲𑀸𑀳𑀲𑀸 [𑀲𑀳𑀲𑀸 (𑀲𑀻. 𑀲𑁆𑀬𑀸. 𑀧𑀻.)] 𑀫𑀬𑀁.

𑁧𑁬𑁩. 𑀦𑀺𑀲𑀻𑀣𑁂𑀧𑀺 𑀭𑀳𑁄 𑀤𑀸𑀦𑀺, 𑀲𑀼𑀢𑁆𑀢𑁄 𑀭𑀸𑀚𑀸 𑀲𑀲𑀸𑀭𑀣𑀺;

𑀆𑀤𑀸𑀬 𑀯𑀢𑁆𑀣𑀁 𑀫𑀡𑀺𑀓𑀼𑀡𑁆𑀟𑀮𑀜𑁆𑀘, 𑀳𑀦𑁆𑀢𑁆𑀯𑀸𑀦 𑀲𑀸𑀔𑀸𑀳𑀺 𑀅𑀯𑀢𑁆𑀣𑀭𑀸𑀫.

𑁧𑁬𑁪. 𑀓𑀺𑀦𑁆𑀦𑀼 𑀉𑀫𑁆𑀫𑀢𑁆𑀢𑀭𑀽𑀧𑁄𑀯, 𑀲𑀢𑁆𑀢𑀺𑀕𑀼𑀫𑁆𑀩 𑀧𑀪𑀸𑀲𑀲𑀺;

𑀤𑀼𑀭𑀸𑀲𑀤𑀸 𑀳𑀺 𑀭𑀸𑀚𑀸𑀦𑁄, 𑀅𑀕𑁆𑀕𑀺 𑀧𑀚𑁆𑀚𑀮𑀺𑀢𑁄 𑀬𑀣𑀸.

𑁧𑁬𑁫. 𑀅𑀣 𑀢𑁆𑀯𑀁 𑀧𑀢𑀺𑀓𑁄𑀮𑀫𑁆𑀩, 𑀫𑀢𑁆𑀢𑁄 𑀣𑀼𑀮𑁆𑀮𑀸𑀦𑀺 𑀕𑀚𑁆𑀚𑀲𑀺;

𑀫𑀸𑀢𑀭𑀺 𑀫𑀬𑁆𑀳𑀁 𑀦𑀕𑁆𑀕𑀸𑀬, 𑀓𑀺𑀦𑁆𑀦𑀼 𑀢𑁆𑀯𑀁 𑀯𑀺𑀚𑀺𑀕𑀼𑀘𑁆𑀙𑀲𑁂.

𑁧𑁬𑁬. 𑀉𑀝𑁆𑀞𑁂𑀳𑀺 𑀲𑀫𑁆𑀫 𑀢𑀭𑀫𑀸𑀦𑁄, 𑀭𑀣𑀁 𑀬𑁄𑀚𑁂𑀳𑀺 𑀲𑀸𑀭𑀣𑀺;

𑀲𑀓𑀼𑀡𑁄 𑀫𑁂 𑀦 𑀭𑀼𑀘𑁆𑀘𑀢𑀺, 𑀅𑀜𑁆𑀜𑀁 𑀕𑀘𑁆𑀙𑀸𑀫 𑀅𑀲𑁆𑀲𑀫𑀁.

𑁧𑁬𑁭. 𑀬𑀼𑀢𑁆𑀢𑁄 𑀭𑀣𑁄 𑀫𑀳𑀸𑀭𑀸𑀚, 𑀬𑀼𑀢𑁆𑀢𑁄 𑀘 𑀩𑀮𑀯𑀸𑀳𑀦𑁄;

𑀅𑀥𑀺𑀢𑀺𑀝𑁆𑀞 𑀫𑀳𑀸𑀭𑀸𑀚, 𑀅𑀜𑁆𑀜𑀁 𑀕𑀘𑁆𑀙𑀸𑀫 𑀅𑀲𑁆𑀲𑀫𑀁.

𑁧𑁬𑁮. 𑀓𑁄 𑀦𑀼𑀫𑁂𑀯 𑀕𑀢𑀸 [𑀓𑁆𑀯 𑀦𑀼’𑀫𑁂’𑀧𑀕𑀢𑀸 (?)] 𑀲𑀩𑁆𑀩𑁂, 𑀬𑁂 𑀅𑀲𑁆𑀫𑀺𑀁 𑀧𑀭𑀺𑀘𑀸𑀭𑀓𑀸;

𑀏𑀲 𑀕𑀘𑁆𑀙𑀢𑀺 𑀧𑀜𑁆𑀘𑀸𑀮𑁄, 𑀫𑀼𑀢𑁆𑀢𑁄 𑀢𑁂𑀲𑀁 𑀅𑀤𑀲𑁆𑀲𑀦𑀸.

𑁧𑁬𑁯. 𑀓𑁄𑀤𑀡𑁆𑀟𑀓𑀸𑀦𑀺 𑀕𑀡𑁆𑀳𑀣, 𑀲𑀢𑁆𑀢𑀺𑀬𑁄 𑀢𑁄𑀫𑀭𑀸𑀦𑀺 𑀘;

𑀏𑀲 𑀕𑀘𑁆𑀙𑀢𑀺 𑀧𑀜𑁆𑀘𑀸𑀮𑁄, 𑀫𑀸 𑀯𑁄 𑀫𑀼𑀜𑁆𑀘𑀺𑀢𑁆𑀣 𑀚𑀻𑀯𑀢𑀁 [𑀚𑀻𑀯𑀺𑀢𑀁 (𑀩𑀳𑀽𑀲𑀼)].

𑁧𑁭𑁦. 𑀅𑀣𑀸𑀧𑀭𑁄 𑀧𑀝𑀺𑀦𑀦𑁆𑀤𑀺𑀢𑁆𑀣, 𑀲𑀼𑀯𑁄 𑀮𑁄𑀳𑀺𑀢𑀢𑀼𑀡𑁆𑀟𑀓𑁄;

𑀲𑁆𑀯𑀸𑀕𑀢𑀁 𑀢𑁂 𑀫𑀳𑀸𑀭𑀸𑀚, 𑀅𑀣𑁄 𑀢𑁂 𑀅𑀤𑀼𑀭𑀸𑀕𑀢𑀁;

𑀇𑀲𑁆𑀲𑀭𑁄𑀲𑀺 𑀅𑀦𑀼𑀧𑁆𑀧𑀢𑁆𑀢𑁄, 𑀬𑀁 𑀇𑀥𑀢𑁆𑀣𑀺 𑀧𑀯𑁂𑀤𑀬.

𑁧𑁭𑁧. 𑀢𑀺𑀦𑁆𑀤𑀼𑀓𑀸𑀦𑀺 𑀧𑀺𑀬𑀸𑀮𑀸𑀦𑀺, 𑀫𑀥𑀼𑀓𑁂 𑀓𑀸𑀲𑀼𑀫𑀸𑀭𑀺𑀬𑁄;

𑀨𑀮𑀸𑀦𑀺 𑀔𑀼𑀤𑁆𑀤𑀓𑀧𑁆𑀧𑀸𑀦𑀺, 𑀪𑀼𑀜𑁆𑀚 𑀭𑀸𑀚 𑀯𑀭𑀁 𑀯𑀭𑀁.

𑁧𑁭𑁨. 𑀇𑀤𑀫𑁆𑀧𑀺 𑀧𑀸𑀦𑀻𑀬𑀁 𑀲𑀻𑀢𑀁, 𑀆𑀪𑀢𑀁 𑀕𑀺𑀭𑀺𑀕𑀩𑁆𑀪𑀭𑀸;

𑀢𑀢𑁄 𑀧𑀺𑀯 𑀫𑀳𑀸𑀭𑀸𑀚, 𑀲𑀘𑁂 𑀢𑁆𑀯𑀁 𑀅𑀪𑀺𑀓𑀗𑁆𑀔𑀲𑀺.

𑁧𑁭𑁩. 𑀅𑀭𑀜𑁆𑀜𑀁 𑀉𑀜𑁆𑀙𑀸𑀬 𑀕𑀢𑀸, 𑀬𑁂 𑀅𑀲𑁆𑀫𑀺𑀁 𑀧𑀭𑀺𑀘𑀸𑀭𑀓𑀸;

𑀲𑀬𑀁 𑀉𑀝𑁆𑀞𑀸𑀬 𑀕𑀡𑁆𑀳𑀯𑁆𑀳𑁄, 𑀳𑀢𑁆𑀣𑀸 𑀫𑁂 𑀦𑀢𑁆𑀣𑀺 𑀤𑀸𑀢𑀯𑁂.

𑁧𑁭𑁪. 𑀪𑀤𑁆𑀤𑀓𑁄 𑀯𑀢𑀬𑀁 𑀧𑀓𑁆𑀔𑀻, 𑀤𑀺𑀚𑁄 𑀧𑀭𑀫𑀥𑀫𑁆𑀫𑀺𑀓𑁄;

𑀅𑀣𑁂𑀲𑁄 𑀇𑀢𑀭𑁄 𑀧𑀓𑁆𑀔𑀻, 𑀲𑀼𑀯𑁄 𑀮𑀼𑀤𑁆𑀤𑀸𑀦𑀺 𑀪𑀸𑀲𑀢𑀺.

𑁧𑁭𑁫. ‘‘𑀏𑀢𑀁 𑀳𑀦𑀣 𑀩𑀦𑁆𑀥𑀣, 𑀫𑀸 𑀯𑁄 𑀫𑀼𑀜𑁆𑀘𑀺𑀢𑁆𑀣 𑀚𑀻𑀯𑀢𑀁’’;

𑀇𑀘𑁆𑀘𑁂𑀯𑀁 𑀯𑀺𑀮𑀧𑀦𑁆𑀢𑀲𑁆𑀲, 𑀲𑁄𑀢𑁆𑀣𑀺𑀁 [𑀲𑁄𑀢𑁆𑀣𑀻 (𑀲𑁆𑀬𑀸.)] 𑀧𑀢𑁆𑀢𑁄𑀲𑁆𑀫𑀺 𑀅𑀲𑁆𑀲𑀫𑀁.

𑁧𑁭𑁬. 𑀪𑀸𑀢𑀭𑁄𑀲𑁆𑀫 𑀫𑀳𑀸𑀭𑀸𑀚, 𑀲𑁄𑀤𑀭𑀺𑀬𑀸 𑀏𑀓𑀫𑀸𑀢𑀼𑀓𑀸;

𑀏𑀓𑀭𑀼𑀓𑁆𑀔𑀲𑁆𑀫𑀺𑀁 𑀲𑀁𑀯𑀟𑁆𑀠𑀸, 𑀦𑀸𑀦𑀸𑀔𑁂𑀢𑁆𑀢𑀕𑀢𑀸 𑀉𑀪𑁄.

𑁧𑁭𑁭. 𑀲𑀢𑁆𑀢𑀺𑀕𑀼𑀫𑁆𑀩𑁄 𑀘 𑀘𑁄𑀭𑀸𑀦𑀁, 𑀅𑀳𑀜𑁆𑀘 𑀇𑀲𑀻𑀦𑀁 𑀇𑀥;

𑀅𑀲𑀢𑀁 𑀲𑁄, 𑀲𑀢𑀁 𑀅𑀳𑀁, 𑀢𑁂𑀦 𑀥𑀫𑁆𑀫𑁂𑀦 𑀦𑁄 𑀯𑀺𑀦𑀸.

𑁧𑁭𑁮. 𑀢𑀢𑁆𑀣 𑀯𑀥𑁄 𑀘 𑀩𑀦𑁆𑀥𑁄 𑀘, 𑀦𑀺𑀓𑀢𑀻 𑀯𑀜𑁆𑀘𑀦𑀸𑀦𑀺 𑀘;

𑀆𑀮𑁄𑀧𑀸 𑀲𑀸𑀳𑀲𑀸𑀓𑀸𑀭𑀸, 𑀢𑀸𑀦𑀺 𑀲𑁄 𑀢𑀢𑁆𑀣 𑀲𑀺𑀓𑁆𑀔𑀢𑀺.

𑁧𑁭𑁯. 𑀇𑀥 𑀲𑀘𑁆𑀘𑀜𑁆𑀘 𑀥𑀫𑁆𑀫𑁄 𑀘, 𑀅𑀳𑀺𑀁𑀲𑀸 𑀲𑀁𑀬𑀫𑁄 𑀤𑀫𑁄;

𑀆𑀲𑀦𑀽𑀤𑀓𑀤𑀸𑀬𑀻𑀦𑀁, 𑀅𑀗𑁆𑀓𑁂 𑀯𑀤𑁆𑀥𑁄𑀲𑁆𑀫𑀺 𑀪𑀸𑀭𑀥 [𑀪𑀸𑀭𑀢 (𑀲𑀻. 𑀲𑁆𑀬𑀸. 𑀧𑀻.)].

𑁧𑁮𑁦. 𑀬𑀁 𑀬𑀜𑁆𑀳𑀺 𑀭𑀸𑀚 𑀪𑀚𑀢𑀺, 𑀲𑀦𑁆𑀢𑀁 𑀯𑀸 𑀬𑀤𑀺 𑀯𑀸 𑀅𑀲𑀁;

𑀲𑀻𑀮𑀯𑀦𑁆𑀢𑀁 𑀯𑀺𑀲𑀻𑀮𑀁 𑀯𑀸, 𑀯𑀲𑀁 𑀢𑀲𑁆𑀲𑁂𑀯 𑀕𑀘𑁆𑀙𑀢𑀺.

𑁧𑁮𑁧. 𑀬𑀸𑀤𑀺𑀲𑀁 𑀓𑀼𑀭𑀼𑀢𑁂 𑀫𑀺𑀢𑁆𑀢𑀁, 𑀬𑀸𑀤𑀺𑀲𑀁 𑀘𑀽𑀧𑀲𑁂𑀯𑀢𑀺;

𑀲𑁄𑀧𑀺 𑀢𑀸𑀤𑀺𑀲𑀓𑁄 𑀳𑁄𑀢𑀺, 𑀲𑀳𑀯𑀸𑀲𑁄 𑀳𑀺 [𑀲𑀳𑀯𑀸𑀲𑁄𑀧𑀺 (𑀲𑁆𑀬𑀸. 𑀓.)] 𑀢𑀸𑀤𑀺𑀲𑁄.

𑁧𑁮𑁨. 𑀲𑁂𑀯𑀫𑀸𑀦𑁄 𑀲𑁂𑀯𑀫𑀸𑀦𑀁, 𑀲𑀫𑁆𑀨𑀼𑀝𑁆𑀞𑁄 𑀲𑀫𑁆𑀨𑀼𑀲𑀁 𑀧𑀭𑀁;

𑀲𑀭𑁄 𑀤𑀺𑀤𑁆𑀥𑁄 𑀓𑀮𑀸𑀧𑀁𑀯, 𑀅𑀮𑀺𑀢𑁆𑀢𑀫𑀼𑀧𑀮𑀺𑀫𑁆𑀧𑀢𑀺;

𑀉𑀧𑀮𑁂𑀧𑀪𑀬𑀸 [𑀉𑀧𑀮𑀺𑀫𑁆𑀧𑀪𑀬𑀸 (𑀲𑁆𑀬𑀸. 𑀓.)] 𑀥𑀻𑀭𑁄, 𑀦𑁂𑀯 𑀧𑀸𑀧𑀲𑀔𑀸 𑀲𑀺𑀬𑀸.

𑁧𑁮𑁩. 𑀧𑀽𑀢𑀺𑀫𑀘𑁆𑀙𑀁 𑀓𑀼𑀲𑀕𑁆𑀕𑁂𑀦, 𑀬𑁄 𑀦𑀭𑁄 𑀉𑀧𑀦𑀬𑁆𑀳𑀢𑀺;

𑀓𑀼𑀲𑀸𑀧𑀺 𑀧𑀽𑀢𑀺 [𑀧𑀽𑀢𑀻 (𑀲𑀻. 𑀧𑀻.)] 𑀯𑀸𑀬𑀦𑁆𑀢𑀺, 𑀏𑀯𑀁 𑀩𑀸𑀮𑀽𑀧𑀲𑁂𑀯𑀦𑀸.

𑁧𑁮𑁪. 𑀢𑀕𑀭𑀜𑁆𑀘 𑀧𑀮𑀸𑀲𑁂𑀦, 𑀬𑁄 𑀦𑀭𑁄 𑀉𑀧𑀦𑀬𑁆𑀳𑀢𑀺;

𑀧𑀢𑁆𑀢𑀸𑀧𑀺 𑀲𑀼𑀭𑀪𑀺 [𑀲𑀼𑀭𑀪𑀻 (𑀲𑀻. 𑀲𑁆𑀬𑀸. 𑀧𑀻.)] 𑀯𑀸𑀬𑀦𑁆𑀢𑀺, 𑀏𑀯𑀁 𑀥𑀻𑀭𑀽𑀧𑀲𑁂𑀯𑀦𑀸.

𑁧𑁮𑁫. 𑀢𑀲𑁆𑀫𑀸 𑀧𑀢𑁆𑀢𑀧𑀼𑀝𑀲𑁆𑀲𑁂𑀯 [𑀨𑀮𑀧𑀼𑀝𑀲𑁆𑀲𑁂𑀯 (𑀲𑀻. 𑀧𑀻.), 𑀧𑀮𑀧𑀼𑀝𑀲𑁆𑀲𑁂𑀯 (𑀓. 𑀅𑀝𑁆𑀞.), 𑀧𑀮𑀸𑀲𑀧𑀼𑀝𑀲𑁆𑀲𑁂𑀯 (𑀲𑁆𑀬𑀸. 𑀓.)], 𑀜𑀢𑁆𑀯𑀸 𑀲𑀫𑁆𑀧𑀸𑀓𑀫𑀢𑁆𑀢𑀦𑁄;

𑀅𑀲𑀦𑁆𑀢𑁂 𑀦𑁄𑀧𑀲𑁂𑀯𑁂𑀬𑁆𑀬, 𑀲𑀦𑁆𑀢𑁂 𑀲𑁂𑀯𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀅𑀲𑀦𑁆𑀢𑁄 𑀦𑀺𑀭𑀬𑀁 𑀦𑁂𑀦𑁆𑀢𑀺, 𑀲𑀦𑁆𑀢𑁄 𑀧𑀸𑀧𑁂𑀦𑁆𑀢𑀺 𑀲𑀼𑀕𑁆𑀕𑀢𑀺𑀦𑁆𑀢𑀺.

𑀲𑀢𑁆𑀢𑀺𑀕𑀼𑀫𑁆𑀩𑀚𑀸𑀢𑀓𑀁 𑀲𑀢𑁆𑀢𑀫𑀁.