𑁫𑁦𑁨. 𑀘𑀽𑀴𑀳𑀁𑀲𑀚𑀸𑀢𑀓𑀁 (𑁬)

𑁧𑁩𑁩. 𑀏𑀢𑁂 𑀳𑀁𑀲𑀸 𑀧𑀓𑁆𑀓𑀫𑀦𑁆𑀢𑀺, 𑀯𑀓𑁆𑀓𑀗𑁆𑀕𑀸 𑀪𑀬𑀫𑁂𑀭𑀺𑀢𑀸;

𑀳𑀭𑀺𑀢𑁆𑀢𑀘 𑀳𑁂𑀫𑀯𑀡𑁆𑀡, 𑀓𑀸𑀫𑀁 𑀲𑀼𑀫𑀼𑀔 𑀧𑀓𑁆𑀓𑀫.

𑁧𑁩𑁪. 𑀑𑀳𑀸𑀬 𑀫𑀁 𑀜𑀸𑀢𑀺𑀕𑀡𑀸, 𑀏𑀓𑀁 𑀧𑀸𑀲𑀯𑀲𑀁 𑀕𑀢𑀁;

𑀅𑀦𑀧𑁂𑀓𑁆𑀔𑀫𑀸𑀦𑀸 [𑀦𑀸𑀧𑁂𑀓𑁆𑀔𑀫𑀸𑀦𑀸 (𑀓.)] 𑀕𑀘𑁆𑀙𑀦𑁆𑀢𑀺, 𑀓𑀺𑀁 𑀏𑀲𑁄 𑀅𑀯𑀳𑀺𑀬𑁆𑀬𑀲𑀺.

𑁧𑁩𑁫. 𑀧𑀢𑁂𑀯 𑀧𑀢𑀢𑀁 𑀲𑁂𑀝𑁆𑀞, 𑀦𑀢𑁆𑀣𑀺 𑀩𑀤𑁆𑀥𑁂 𑀲𑀳𑀸𑀬𑀢𑀸 [𑀲𑀳𑀸𑀬𑀓𑀸 (𑀲𑁆𑀬𑀸.)];

𑀫𑀸 𑀅𑀦𑀻𑀖𑀸𑀬 𑀳𑀸𑀧𑁂𑀲𑀺, 𑀓𑀸𑀫𑀁 𑀲𑀼𑀫𑀼𑀔 𑀧𑀓𑁆𑀓𑀫.

𑁧𑁩𑁬. 𑀦𑀸𑀳𑀁 ‘‘𑀤𑀼𑀓𑁆𑀔𑀧𑀭𑁂𑀢𑁄’’𑀢𑀺 [𑀤𑀼𑀓𑁆𑀔𑀧𑀭𑁂𑀢𑁄𑀧𑀺 (𑀓.)], 𑀥𑀢𑀭𑀝𑁆𑀞 𑀢𑀼𑀯𑀁 [𑀢𑀯𑀁 (𑀲𑀻. 𑀧𑀻.)] 𑀚𑀳𑁂;

𑀚𑀻𑀯𑀺𑀢𑀁 𑀫𑀭𑀡𑀁 𑀯𑀸 𑀫𑁂, 𑀢𑀬𑀸 𑀲𑀤𑁆𑀥𑀺𑀁 𑀪𑀯𑀺𑀲𑁆𑀲𑀢𑀺.

𑁧𑁩𑁭. 𑀏𑀢𑀤𑀭𑀺𑀬𑀲𑁆𑀲 𑀓𑀮𑁆𑀬𑀸𑀡𑀁, 𑀬𑀁 𑀢𑁆𑀯𑀁 𑀲𑀼𑀫𑀼𑀔 𑀪𑀸𑀲𑀲𑀺;

𑀢𑀜𑁆𑀘 𑀯𑀻𑀫𑀁𑀲𑀫𑀸𑀦𑁄𑀳𑀁, ‘‘𑀧𑀢𑀢𑁂𑀢𑀁’’ 𑀅𑀯𑀲𑁆𑀲𑀚𑀺𑀁.

𑁧𑁩𑁮. 𑀅𑀧𑀤𑁂𑀦 𑀧𑀤𑀁 𑀬𑀸𑀢𑀺, 𑀅𑀦𑁆𑀢𑀮𑀺𑀓𑁆𑀔𑀘𑀭𑁄 [𑀅𑀦𑁆𑀢𑀮𑀺𑀓𑁆𑀔𑁂 𑀘𑀭𑁄 (𑀲𑀻. 𑀧𑀻.)] 𑀤𑀺𑀚𑁄;

𑀆𑀭𑀸 𑀧𑀸𑀲𑀁 𑀦 𑀩𑀼𑀚𑁆𑀛𑀺 𑀢𑁆𑀯𑀁, 𑀳𑀁𑀲𑀸𑀦𑀁 𑀧𑀯𑀭𑀼𑀢𑁆𑀢𑀫 [𑀧𑀯𑀭𑀼𑀢𑁆𑀢𑀫𑁄 (𑀓. 𑀲𑀻. 𑀧𑀻.)].

𑁧𑁩𑁯. 𑀬𑀤𑀸 𑀧𑀭𑀸𑀪𑀯𑁄 𑀳𑁄𑀢𑀺, 𑀧𑁄𑀲𑁄 𑀚𑀻𑀯𑀺𑀢𑀲𑀗𑁆𑀔𑀬𑁂;

𑀅𑀣 𑀚𑀸𑀮𑀜𑁆𑀘 𑀧𑀸𑀲𑀜𑁆𑀘, 𑀆𑀲𑀚𑁆𑀚𑀸𑀧𑀺 𑀦 𑀩𑀼𑀚𑁆𑀛𑀢𑀺.

𑁧𑁪𑁦. 𑀏𑀢𑁂 𑀳𑀁𑀲𑀸 𑀧𑀓𑁆𑀓𑀫𑀦𑁆𑀢𑀺, 𑀯𑀓𑁆𑀓𑀗𑁆𑀕𑀸 𑀪𑀬𑀫𑁂𑀭𑀺𑀢𑀸;

𑀳𑀭𑀺𑀢𑁆𑀢𑀘 𑀳𑁂𑀫𑀯𑀡𑁆𑀡, 𑀢𑁆𑀯𑀜𑁆𑀜𑁂𑀯 [𑀢𑁆𑀯𑀜𑁆𑀘 𑀢𑀁 (𑀲𑀻.), 𑀢𑁆𑀯𑀜𑁆𑀘 (𑀧𑀻.)] 𑀅𑀯𑀳𑀺𑀬𑁆𑀬𑀲𑀺.

𑁧𑁪𑁧. 𑀏𑀢𑁂 𑀪𑀼𑀢𑁆𑀯𑀸 𑀘 𑀧𑀺𑀢𑁆𑀯𑀸 𑀘, 𑀧𑀓𑁆𑀓𑀫𑀦𑁆𑀢𑀺 𑀯𑀺𑀳𑀗𑁆𑀕𑀫𑀸;

𑀅𑀦𑀧𑁂𑀓𑁆𑀔𑀫𑀸𑀦𑀸 𑀯𑀓𑁆𑀓𑀗𑁆𑀕𑀸, 𑀢𑁆𑀯𑀜𑁆𑀜𑁂𑀯𑁂𑀓𑁄 𑀉𑀧𑀸𑀲𑀲𑀺.

𑁧𑁪𑁨. 𑀓𑀺𑀦𑁆𑀦𑀼 𑀢𑁆𑀬𑀸𑀬𑀁 [𑀢𑀸𑀬𑀁 (𑀲𑀻. 𑀲𑁆𑀬𑀸. 𑀧𑀻.)] 𑀤𑀺𑀚𑁄 𑀳𑁄𑀢𑀺, 𑀫𑀼𑀢𑁆𑀢𑁄 𑀩𑀤𑁆𑀥𑀁 𑀉𑀧𑀸𑀲𑀲𑀺;

𑀑𑀳𑀸𑀬 𑀲𑀓𑀼𑀡𑀸 𑀬𑀦𑁆𑀢𑀺, 𑀓𑀺𑀁 𑀏𑀓𑁄 𑀅𑀯𑀳𑀺𑀬𑁆𑀬𑀲𑀺.

𑁧𑁪𑁩. 𑀭𑀸𑀚𑀸 𑀫𑁂 𑀲𑁄 𑀤𑀺𑀚𑁄 𑀫𑀺𑀢𑁆𑀢𑁄, 𑀲𑀔𑀸 𑀧𑀸𑀡𑀲𑀫𑁄 𑀘 𑀫𑁂;

𑀦𑁂𑀯 𑀦𑀁 𑀯𑀺𑀚𑀳𑀺𑀲𑁆𑀲𑀸𑀫𑀺, 𑀬𑀸𑀯 𑀓𑀸𑀮𑀲𑁆𑀲 𑀧𑀭𑀺𑀬𑀸𑀬𑀁.

𑁧𑁪𑁪. 𑀬𑁄 𑀘 𑀢𑁆𑀯𑀁 𑀲𑀔𑀺𑀦𑁄 𑀳𑁂𑀢𑀼, 𑀧𑀸𑀡𑀁 𑀘𑀚𑀺𑀢𑀼𑀫𑀺𑀘𑁆𑀙𑀲𑀺;

𑀲𑁄 𑀢𑁂 𑀲𑀳𑀸𑀬𑀁 𑀫𑀼𑀜𑁆𑀘𑀸𑀫𑀺, 𑀳𑁄𑀢𑀼 𑀭𑀸𑀚𑀸 𑀢𑀯𑀸𑀦𑀼𑀕𑁄.

𑁧𑁪𑁫. 𑀏𑀯𑀁 𑀮𑀼𑀤𑁆𑀤𑀓 𑀦𑀦𑁆𑀤𑀲𑁆𑀲𑀼, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀺;

𑀬𑀣𑀸𑀳𑀫𑀚𑁆𑀚 𑀦𑀦𑁆𑀤𑀸𑀫𑀺, 𑀤𑀺𑀲𑁆𑀯𑀸 𑀫𑀼𑀢𑁆𑀢𑀁 𑀤𑀺𑀚𑀸𑀥𑀺𑀧𑀁.

𑁧𑁪𑁬. 𑀓𑀘𑁆𑀘𑀺𑀦𑁆𑀦𑀼 𑀪𑁄𑀢𑁄 𑀓𑀼𑀲𑀮𑀁, 𑀓𑀘𑁆𑀘𑀺 𑀪𑁄𑀢𑁄 𑀅𑀦𑀸𑀫𑀬𑀁;

𑀓𑀘𑁆𑀘𑀺 𑀭𑀝𑁆𑀞𑀫𑀺𑀤𑀁 𑀨𑀻𑀢𑀁, 𑀥𑀫𑁆𑀫𑁂𑀦 𑀫𑀦𑀼𑀲𑀸𑀲𑀲𑀺.

𑁧𑁪𑁭. 𑀓𑀼𑀲𑀮𑀜𑁆𑀘𑁂𑀯 𑀫𑁂 𑀳𑀁𑀲, 𑀅𑀣𑁄 𑀳𑀁𑀲 𑀅𑀦𑀸𑀫𑀬𑀁;

𑀅𑀣𑁄 𑀭𑀝𑁆𑀞𑀫𑀺𑀤𑀁 𑀨𑀻𑀢𑀁, 𑀥𑀫𑁆𑀫𑁂𑀦 𑀫𑀦𑀼𑀲𑀸𑀲𑀳𑀁.

𑁧𑁪𑁮. 𑀓𑀘𑁆𑀘𑀺 𑀪𑁄𑀢𑁄 𑀅𑀫𑀘𑁆𑀘𑁂𑀲𑀼, 𑀤𑁄𑀲𑁄 𑀓𑁄𑀘𑀺 𑀦 𑀯𑀺𑀚𑁆𑀚𑀢𑀺;

𑀓𑀘𑁆𑀘𑀺 𑀆𑀭𑀸 𑀅𑀫𑀺𑀢𑁆𑀢𑀸 𑀢𑁂, 𑀙𑀸𑀬𑀸 𑀤𑀓𑁆𑀔𑀺𑀡𑀢𑁄𑀭𑀺𑀯.

𑁧𑁪𑁯. 𑀅𑀣𑁄𑀧𑀺 𑀫𑁂 𑀅𑀫𑀘𑁆𑀘𑁂𑀲𑀼, 𑀤𑁄𑀲𑁄 𑀓𑁄𑀘𑀺 𑀦 𑀯𑀺𑀚𑁆𑀚𑀢𑀺;

𑀅𑀣𑁄 𑀆𑀭𑀸 𑀅𑀫𑀺𑀢𑁆𑀢𑀸 𑀫𑁂, 𑀙𑀸𑀬𑀸 𑀤𑀓𑁆𑀔𑀺𑀡𑀢𑁄𑀭𑀺𑀯.

𑁧𑁫𑁦. 𑀓𑀘𑁆𑀘𑀺 𑀢𑁂 𑀲𑀸𑀤𑀺𑀲𑀻 𑀪𑀭𑀺𑀬𑀸, 𑀅𑀲𑁆𑀲𑀯𑀸 𑀧𑀺𑀬𑀪𑀸𑀡𑀺𑀦𑀻;

𑀧𑀼𑀢𑁆𑀢𑀭𑀽𑀧𑀬𑀲𑀽𑀧𑁂𑀢𑀸, 𑀢𑀯 𑀙𑀦𑁆𑀤𑀯𑀲𑀸𑀦𑀼𑀕𑀸.

𑁧𑁫𑁧. 𑀅𑀣𑁄 𑀫𑁂 𑀲𑀸𑀤𑀺𑀲𑀻 𑀪𑀭𑀺𑀬𑀸, 𑀅𑀲𑁆𑀲𑀯𑀸 𑀧𑀺𑀬𑀪𑀸𑀡𑀺𑀦𑀻;

𑀧𑀼𑀢𑁆𑀢𑀭𑀽𑀧𑀬𑀲𑀽𑀧𑁂𑀢𑀸, 𑀫𑀫 𑀙𑀦𑁆𑀤𑀯𑀲𑀸𑀦𑀼𑀕𑀸.

𑁧𑁫𑁨. 𑀓𑀘𑁆𑀘𑀺 𑀢𑁂 𑀩𑀳𑀯𑁄 𑀧𑀼𑀢𑁆𑀢𑀸, 𑀲𑀼𑀚𑀸𑀢𑀸 𑀭𑀝𑁆𑀞𑀯𑀟𑁆𑀠𑀦;

𑀧𑀜𑁆𑀜𑀸𑀚𑀯𑁂𑀦 𑀲𑀫𑁆𑀧𑀦𑁆𑀦𑀸, 𑀲𑀫𑁆𑀫𑁄𑀤𑀦𑁆𑀢𑀺 𑀢𑀢𑁄 𑀢𑀢𑁄.

𑁧𑁫𑁩. 𑀲𑀢𑀫𑁂𑀓𑁄 𑀘 𑀫𑁂 𑀧𑀼𑀢𑁆𑀢𑀸, 𑀥𑀢𑀭𑀝𑁆𑀞 𑀫𑀬𑀸 𑀲𑀼𑀢𑀸;

𑀢𑁂𑀲𑀁 𑀢𑁆𑀯𑀁 𑀓𑀺𑀘𑁆𑀘𑀫𑀓𑁆𑀔𑀸𑀳𑀺, 𑀦𑀸𑀯𑀭𑀼𑀚𑁆𑀛𑀦𑁆𑀢𑀺 [𑀦𑀸𑀯𑀭𑀚𑁆𑀛𑀦𑁆𑀢𑀺 (𑀓. 𑀲𑀻. 𑀧𑀻.)] 𑀢𑁂 𑀯𑀘𑁄.

𑁧𑁫𑁪. 𑀉𑀧𑀧𑀦𑁆𑀦𑁄𑀧𑀺 𑀘𑁂 𑀳𑁄𑀢𑀺, 𑀚𑀸𑀢𑀺𑀬𑀸 𑀯𑀺𑀦𑀬𑁂𑀦 𑀯𑀸;

𑀅𑀣 𑀧𑀘𑁆𑀙𑀸 𑀓𑀼𑀭𑀼𑀢𑁂 𑀬𑁄𑀕𑀁, 𑀓𑀺𑀘𑁆𑀙𑁂 [𑀓𑀺𑀘𑁆𑀘𑁂 (𑀲𑀻. 𑀲𑁆𑀬𑀸. 𑀧𑀻.)] 𑀆𑀧𑀸𑀲𑀼 [𑀆𑀯𑀸𑀲𑀼 (𑀲𑁆𑀬𑀸.), 𑀆𑀧𑀤𑀸𑀲𑀼 (𑀓.)] 𑀲𑀻𑀤𑀢𑀺.

𑁧𑁫𑁫. 𑀢𑀲𑁆𑀲 𑀲𑀁𑀳𑀻𑀭𑀧𑀜𑁆𑀜𑀲𑁆𑀲, 𑀯𑀺𑀯𑀭𑁄 𑀚𑀸𑀬𑀢𑁂 𑀫𑀳𑀸;

𑀭𑀢𑁆𑀢𑀺𑀫𑀦𑁆𑀥𑁄𑀯 [𑀦𑀢𑁆𑀢𑀫𑀦𑁆𑀥𑁄𑀯 (𑀲𑀻. 𑀧𑀻.)] 𑀭𑀽𑀧𑀸𑀦𑀺, 𑀣𑀽𑀮𑀸𑀦𑀺 𑀫𑀦𑀼𑀧𑀲𑁆𑀲𑀢𑀺.

𑁧𑁫𑁬. 𑀅𑀲𑀸𑀭𑁂 𑀲𑀸𑀭𑀬𑁄𑀕𑀜𑁆𑀜𑀽, 𑀫𑀢𑀺𑀁 𑀦 𑀢𑁆𑀯𑁂𑀯 𑀯𑀺𑀦𑁆𑀤𑀢𑀺;

𑀲𑀭𑀪𑁄𑀯 𑀕𑀺𑀭𑀺𑀤𑀼𑀕𑁆𑀕𑀲𑁆𑀫𑀺𑀁, 𑀅𑀦𑁆𑀢𑀭𑀸𑀬𑁂𑀯 𑀲𑀻𑀤𑀢𑀺.

𑁧𑁫𑁭. 𑀳𑀻𑀦𑀚𑀘𑁆𑀘𑁄𑀧𑀺 𑀘𑁂 𑀳𑁄𑀢𑀺, 𑀉𑀝𑁆𑀞𑀸𑀢𑀸 𑀥𑀺𑀢𑀺𑀫𑀸 𑀦𑀭𑁄;

𑀆𑀘𑀸𑀭𑀲𑀻𑀮𑀲𑀫𑁆𑀧𑀦𑁆𑀦𑁄, 𑀦𑀺𑀲𑁂 𑀅𑀕𑁆𑀕𑀻𑀯 𑀪𑀸𑀲𑀢𑀺.

𑁧𑁫𑁮. 𑀏𑀢𑀁 𑀫𑁂 𑀉𑀧𑀫𑀁 𑀓𑀢𑁆𑀯𑀸, 𑀧𑀼𑀢𑁆𑀢𑁂 𑀯𑀺𑀚𑁆𑀚𑀸𑀲𑀼 𑀯𑀸𑀘𑀬 [𑀞𑀸𑀧𑀲 (𑀲𑁆𑀬𑀸. 𑀓.)];

𑀲𑀁𑀯𑀺𑀭𑀽𑀴𑁆𑀳𑁂𑀣 𑀫𑁂𑀥𑀸𑀯𑀻, 𑀔𑁂𑀢𑁆𑀢𑁂 𑀩𑀻𑀚𑀁𑀯 [𑀔𑁂𑀢𑁆𑀢𑀩𑀻𑀚𑀁𑀯 (𑀲𑀻. 𑀧𑀻.)] 𑀯𑀼𑀝𑁆𑀞𑀺𑀬𑀸𑀢𑀺.

𑀘𑀽𑀴𑀳𑀁𑀲𑀚𑀸𑀢𑀓𑀁 𑀙𑀝𑁆𑀞𑀁.