𑁫𑁦𑁧. 𑀭𑁄𑀳𑀡𑀫𑀺𑀕𑀚𑀸𑀢𑀓𑀁 (𑁫)

𑁧𑁦𑁪. 𑀏𑀢𑁂 𑀬𑀽𑀣𑀸 𑀧𑀢𑀺𑀬𑀦𑁆𑀢𑀺, 𑀪𑀻𑀢𑀸 𑀫𑀭𑀡𑀲𑁆𑀲 [𑀫𑀭𑀡𑀸 (𑀲𑁆𑀬𑀸. 𑀧𑀻.), 𑀫𑀭𑀡 (𑀓.)] 𑀘𑀺𑀢𑁆𑀢𑀓;

𑀕𑀘𑁆𑀙 𑀢𑀼𑀯𑀫𑁆𑀧𑀺 𑀫𑀸𑀓𑀗𑁆𑀔𑀺, 𑀚𑀻𑀯𑀺𑀲𑁆𑀲𑀦𑁆𑀢𑀺 𑀢𑀬𑀸 𑀲𑀳.

𑁧𑁦𑁫. 𑀦𑀸𑀳𑀁 𑀭𑁄𑀳𑀡 [𑀭𑁄𑀳𑀦𑁆𑀢 (𑀲𑀻. 𑀧𑀻.), 𑀭𑁄𑀳𑀦 (𑀲𑁆𑀬𑀸.)] 𑀕𑀘𑁆𑀙𑀸𑀫𑀺, 𑀳𑀤𑀬𑀁 𑀫𑁂 𑀅𑀯𑀓𑀲𑁆𑀲𑀢𑀺;

𑀦 𑀢𑀁 𑀅𑀳𑀁 𑀚𑀳𑀺𑀲𑁆𑀲𑀸𑀫𑀺, 𑀇𑀥 𑀳𑀺𑀲𑁆𑀲𑀸𑀫𑀺 𑀚𑀻𑀯𑀺𑀢𑀁.

𑁧𑁦𑁬. 𑀢𑁂 𑀳𑀺 𑀦𑀽𑀦 𑀫𑀭𑀺𑀲𑁆𑀲𑀦𑁆𑀢𑀺, 𑀅𑀦𑁆𑀥𑀸 𑀅𑀧𑀭𑀺𑀡𑀸𑀬𑀓𑀸;

𑀕𑀘𑁆𑀙 𑀢𑀼𑀯𑀫𑁆𑀧𑀺 𑀫𑀸𑀓𑀗𑁆𑀔𑀺, 𑀚𑀻𑀯𑀺𑀲𑁆𑀲𑀦𑁆𑀢𑀺 𑀢𑀬𑀸 𑀲𑀳.

𑁧𑁦𑁭. 𑀦𑀸𑀳𑀁 𑀭𑁄𑀳𑀡 𑀕𑀘𑁆𑀙𑀸𑀫𑀺, 𑀳𑀤𑀬𑀁 𑀫𑁂 𑀅𑀯𑀓𑀲𑁆𑀲𑀢𑀺;

𑀦 𑀢𑀁 𑀩𑀤𑁆𑀥𑀁 [𑀩𑀦𑁆𑀥𑀁 (𑀓.)] 𑀚𑀳𑀺𑀲𑁆𑀲𑀸𑀫𑀺, 𑀇𑀥 𑀳𑀺𑀲𑁆𑀲𑀸𑀫𑀺 𑀚𑀻𑀯𑀺𑀢𑀁.

𑁧𑁦𑁮. 𑀕𑀘𑁆𑀙 𑀪𑀻𑀭𑀼 𑀧𑀮𑀸𑀬𑀲𑁆𑀲𑀼, 𑀓𑀽𑀝𑁂 𑀩𑀤𑁆𑀥𑁄𑀲𑁆𑀫𑀺 𑀆𑀬𑀲𑁂;

𑀕𑀘𑁆𑀙 𑀢𑀼𑀯𑀫𑁆𑀧𑀺 𑀫𑀸𑀓𑀗𑁆𑀔𑀺, 𑀚𑀻𑀯𑀺𑀲𑁆𑀲𑀦𑁆𑀢𑀺 𑀢𑀬𑀸 𑀲𑀳.

𑁧𑁦𑁯. 𑀦𑀸𑀳𑀁 𑀭𑁄𑀳𑀡 𑀕𑀘𑁆𑀙𑀸𑀫𑀺, 𑀳𑀤𑀬𑀁 𑀫𑁂 𑀅𑀯𑀓𑀲𑁆𑀲𑀢𑀺;

𑀦 𑀢𑀁 𑀅𑀳𑀁 𑀚𑀳𑀺𑀲𑁆𑀲𑀸𑀫𑀺, 𑀇𑀥 𑀳𑀺𑀲𑁆𑀲𑀸𑀫𑀺 𑀚𑀻𑀯𑀺𑀢𑀁.

𑁧𑁧𑁦. 𑀢𑁂 𑀳𑀺 𑀦𑀽𑀦 𑀫𑀭𑀺𑀲𑁆𑀲𑀦𑁆𑀢𑀺, 𑀅𑀦𑁆𑀥𑀸 𑀅𑀧𑀭𑀺𑀡𑀸𑀬𑀓𑀸;

𑀕𑀘𑁆𑀙 𑀢𑀼𑀯𑀫𑁆𑀧𑀺 𑀫𑀸𑀓𑀗𑁆𑀔𑀺, 𑀚𑀻𑀯𑀺𑀲𑁆𑀲𑀦𑁆𑀢𑀺 𑀢𑀬𑀸 𑀲𑀳.

𑁧𑁧𑁧. 𑀦𑀸𑀳𑀁 𑀭𑁄𑀳𑀡 𑀕𑀘𑁆𑀙𑀸𑀫𑀺, 𑀳𑀤𑀬𑀁 𑀫𑁂 𑀅𑀯𑀓𑀲𑁆𑀲𑀢𑀺;

𑀦 𑀢𑀁 𑀩𑀤𑁆𑀥𑀁 𑀚𑀳𑀺𑀲𑁆𑀲𑀸𑀫𑀺, 𑀇𑀥 𑀳𑀺𑀲𑁆𑀲𑀸𑀫𑀺 𑀚𑀻𑀯𑀺𑀢𑀁.

𑁧𑁧𑁨. 𑀅𑀬𑀁 𑀲𑁄 𑀮𑀼𑀤𑁆𑀤𑀓𑁄 𑀏𑀢𑀺, 𑀮𑀼𑀤𑁆𑀤𑀭𑀽𑀧𑁄 [𑀭𑀼𑀤𑁆𑀤𑀭𑀽𑀧𑁄 (𑀲𑀻. 𑀧𑀻.)] 𑀲𑀳𑀸𑀯𑀼𑀥𑁄;

𑀬𑁄 𑀦𑁄 𑀯𑀥𑀺𑀲𑁆𑀲𑀢𑀺 𑀅𑀚𑁆𑀚, 𑀉𑀲𑀼𑀦𑀸 𑀲𑀢𑁆𑀢𑀺𑀬𑀸 𑀅𑀧𑀺 [𑀫𑀧𑀺 (𑀲𑀻. 𑀲𑁆𑀬𑀸. 𑀧𑀻.)].

𑁧𑁧𑁩. 𑀲𑀸 𑀫𑀼𑀳𑀼𑀢𑁆𑀢𑀁 𑀧𑀮𑀸𑀬𑀺𑀢𑁆𑀯𑀸, 𑀪𑀬𑀝𑁆𑀝𑀸 [𑀪𑀬𑀝𑁆𑀞𑀸 (𑀧𑀻.)] 𑀪𑀬𑀢𑀚𑁆𑀚𑀺𑀢𑀸;

𑀲𑀼𑀤𑀼𑀓𑁆𑀓𑀭𑀁 𑀅𑀓𑀭𑀸 𑀪𑀻𑀭𑀼, 𑀫𑀭𑀡𑀸𑀬𑀽𑀧𑀦𑀺𑀯𑀢𑁆𑀢𑀣.

𑁧𑁧𑁪. 𑀓𑀺𑀦𑁆𑀦𑀼 𑀢𑁂𑀫𑁂 𑀫𑀺𑀕𑀸 𑀳𑁄𑀦𑁆𑀢𑀺, 𑀫𑀼𑀢𑁆𑀢𑀸 𑀩𑀤𑁆𑀥𑀁 𑀉𑀧𑀸𑀲𑀭𑁂;

𑀦 𑀢𑀁 𑀘𑀚𑀺𑀢𑀼𑀫𑀺𑀘𑁆𑀙𑀦𑁆𑀢𑀺, 𑀚𑀻𑀯𑀺𑀢𑀲𑁆𑀲𑀧𑀺 𑀓𑀸𑀭𑀡𑀸.

𑁧𑁧𑁫. 𑀪𑀸𑀢𑀭𑁄 𑀳𑁄𑀦𑁆𑀢𑀺 𑀫𑁂 𑀮𑀼𑀤𑁆𑀤, 𑀲𑁄𑀤𑀭𑀺𑀬𑀸 𑀏𑀓𑀫𑀸𑀢𑀼𑀓𑀸;

𑀦 𑀫𑀁 𑀘𑀚𑀺𑀢𑀼𑀫𑀺𑀘𑁆𑀙𑀦𑁆𑀢𑀺, 𑀚𑀻𑀯𑀺𑀢𑀲𑁆𑀲𑀧𑀺 𑀓𑀸𑀭𑀡𑀸.

𑁧𑁧𑁬. 𑀢𑁂 𑀳𑀺 𑀦𑀽𑀦 𑀫𑀭𑀺𑀲𑁆𑀲𑀦𑁆𑀢𑀺, 𑀅𑀦𑁆𑀥𑀸 𑀅𑀧𑀭𑀺𑀡𑀸𑀬𑀓𑀸;

𑀧𑀜𑁆𑀘𑀦𑁆𑀦𑀁 𑀚𑀻𑀯𑀺𑀢𑀁 𑀤𑁂𑀳𑀺, 𑀪𑀸𑀢𑀭𑀁 𑀫𑀼𑀜𑁆𑀘 𑀮𑀼𑀤𑁆𑀤𑀓.

𑁧𑁧𑁭. 𑀲𑁄 𑀯𑁄 𑀅𑀳𑀁 𑀧𑀫𑁄𑀓𑁆𑀔𑀸𑀫𑀺, 𑀫𑀸𑀢𑀸𑀧𑁂𑀢𑁆𑀢𑀺𑀪𑀭𑀁 𑀫𑀺𑀕𑀁;

𑀦𑀦𑁆𑀤𑀦𑁆𑀢𑀼 𑀫𑀸𑀢𑀸𑀧𑀺𑀢𑀭𑁄, 𑀫𑀼𑀢𑁆𑀢𑀁 𑀤𑀺𑀲𑁆𑀯𑀸 𑀫𑀳𑀸𑀫𑀺𑀕𑀁.

𑁧𑁧𑁮. 𑀏𑀯𑀁 𑀮𑀼𑀤𑁆𑀤𑀓 𑀦𑀦𑁆𑀤𑀲𑁆𑀲𑀼, 𑀲𑀳 𑀲𑀩𑁆𑀩𑁂𑀳𑀺 𑀜𑀸𑀢𑀺𑀪𑀺;

𑀬𑀣𑀸𑀳𑀫𑀚𑁆𑀚 𑀦𑀦𑁆𑀤𑀸𑀫𑀺, 𑀫𑀼𑀢𑁆𑀢𑀁 𑀤𑀺𑀲𑁆𑀯𑀸 𑀫𑀳𑀸𑀫𑀺𑀕𑀁.

𑁧𑁧𑁯. 𑀓𑀣𑀁 𑀢𑁆𑀯𑀁 𑀧𑀫𑁄𑀓𑁆𑀔𑁄 [𑀓𑀣𑀁 𑀧𑀫𑁄𑀓𑁆𑀔𑁄 (𑀲𑀻. 𑀧𑀻.), 𑀓𑀣𑀁 𑀢𑁂 𑀧𑀭𑁄𑀓𑁆𑀔𑁄 (?)] 𑀆𑀲𑀺, 𑀉𑀧𑀦𑀻𑀢𑀲𑁆𑀫𑀺 𑀚𑀻𑀯𑀺𑀢𑁂;

𑀓𑀣𑀁 𑀧𑀼𑀢𑁆𑀢 𑀅𑀫𑁄𑀘𑁂𑀲𑀺, 𑀓𑀽𑀝𑀧𑀸𑀲𑀫𑁆𑀳 𑀮𑀼𑀤𑁆𑀤𑀓𑁄.

𑁧𑁨𑁦. 𑀪𑀡𑀁 𑀓𑀡𑁆𑀡𑀲𑀼𑀔𑀁 𑀯𑀸𑀘𑀁, 𑀳𑀤𑀬𑀗𑁆𑀕𑀁 𑀳𑀤𑀬𑀲𑁆𑀲𑀺𑀢𑀁;

𑀲𑀼𑀪𑀸𑀲𑀺𑀢𑀸𑀳𑀺 𑀯𑀸𑀘𑀸𑀳𑀺, 𑀘𑀺𑀢𑁆𑀢𑀓𑁄 𑀫𑀁 𑀅𑀫𑁄𑀘𑀬𑀺.

𑁧𑁨𑁧. 𑀪𑀡𑀁 𑀓𑀡𑁆𑀡𑀲𑀼𑀔𑀁 𑀯𑀸𑀘𑀁, 𑀳𑀤𑀬𑀗𑁆𑀕𑀁 𑀳𑀤𑀬𑀲𑁆𑀲𑀺𑀢𑀁;

𑀲𑀼𑀪𑀸𑀲𑀺𑀢𑀸𑀳𑀺 𑀯𑀸𑀘𑀸𑀳𑀺, 𑀲𑀼𑀢𑀦𑀸 𑀫𑀁 𑀅𑀫𑁄𑀘𑀬𑀺.

𑁧𑁨𑁨. 𑀲𑀼𑀢𑁆𑀯𑀸 𑀓𑀡𑁆𑀡𑀲𑀼𑀔𑀁 𑀯𑀸𑀘𑀁, 𑀳𑀤𑀬𑀗𑁆𑀕𑀁 𑀳𑀤𑀬𑀲𑁆𑀲𑀺𑀢𑀁;

𑀲𑀼𑀪𑀸𑀲𑀺𑀢𑀸𑀦𑀺 𑀲𑀼𑀢𑁆𑀯𑀸𑀦, 𑀮𑀼𑀤𑁆𑀤𑀓𑁄 𑀫𑀁 𑀅𑀫𑁄𑀘𑀬𑀺.

𑁧𑁨𑁩. 𑀏𑀯𑀁 𑀆𑀦𑀦𑁆𑀤𑀺𑀢𑁄 𑀳𑁄𑀢𑀼, 𑀲𑀳 𑀤𑀸𑀭𑁂𑀳𑀺 𑀮𑀼𑀤𑁆𑀤𑀓𑁄;

𑀬𑀣𑀸 𑀫𑀬𑀚𑁆𑀚 𑀦𑀦𑁆𑀤𑀸𑀫, 𑀤𑀺𑀲𑁆𑀯𑀸 𑀭𑁄𑀳𑀡𑀫𑀸𑀕𑀢𑀁.

𑁧𑁨𑁪. 𑀦𑀦𑀼 𑀢𑁆𑀯𑀁 𑀅𑀯𑀘 [𑀅𑀯𑀘𑀸 (𑀲𑀻. 𑀧𑀻.)] 𑀮𑀼𑀤𑁆𑀤, ‘‘𑀫𑀺𑀕𑀘𑀫𑁆𑀫𑀸𑀦𑀺 𑀆𑀳𑀭𑀺𑀁’’;

𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀫𑀺𑀕𑀘𑀫𑁆𑀫𑀸𑀦𑀺 𑀦𑀸𑀳𑀭𑀺.

𑁧𑁨𑁫. 𑀆𑀕𑀫𑀸 𑀘𑁂𑀯 𑀳𑀢𑁆𑀣𑀢𑁆𑀣𑀁, 𑀓𑀽𑀝𑀧𑀸𑀲𑀜𑁆𑀘 𑀲𑁄 𑀫𑀺𑀕𑁄;

𑀅𑀩𑀚𑁆𑀛𑀺 𑀢𑀁 [𑀅𑀩𑀚𑁆𑀛𑀺 𑀢𑀜𑁆𑀘 (𑀧𑀻.)] 𑀫𑀺𑀕𑀭𑀸𑀚𑀁, 𑀢𑀜𑁆𑀘 𑀫𑀼𑀢𑁆𑀢𑀸 𑀉𑀧𑀸𑀲𑀭𑁂.

𑁧𑁨𑁬. 𑀢𑀲𑁆𑀲 𑀫𑁂 𑀅𑀳𑀼 𑀲𑀁𑀯𑁂𑀕𑁄, 𑀅𑀩𑁆𑀪𑀼𑀢𑁄 𑀮𑁄𑀫𑀳𑀁𑀲𑀦𑁄;

𑀇𑀫𑀜𑁆𑀘𑀸𑀳𑀁 𑀫𑀺𑀕𑀁 𑀳𑀜𑁆𑀜𑁂, 𑀅𑀚𑁆𑀚 𑀳𑀺𑀲𑁆𑀲𑀸𑀫𑀺 𑀚𑀻𑀯𑀺𑀢𑀁.

𑁧𑁨𑁭. 𑀓𑀻𑀤𑀺𑀲𑀸 𑀢𑁂 𑀫𑀺𑀕𑀸 𑀮𑀼𑀤𑁆𑀤, 𑀓𑀻𑀤𑀺𑀲𑀸 𑀥𑀫𑁆𑀫𑀺𑀓𑀸 𑀫𑀺𑀕𑀸;

𑀓𑀣𑀁𑀯𑀡𑁆𑀡𑀸 𑀓𑀣𑀁𑀲𑀻𑀮𑀸, 𑀩𑀸𑀴𑁆𑀳𑀁 𑀔𑁄 𑀦𑁂 𑀧𑀲𑀁𑀲𑀲𑀺.

𑁧𑁨𑁮. 𑀑𑀤𑀸𑀢𑀲𑀺𑀗𑁆𑀕𑀸 𑀲𑀼𑀘𑀺𑀯𑀸𑀴𑀸, 𑀚𑀸𑀢𑀭𑀽𑀧𑀢𑀘𑀽𑀧𑀫𑀸;

𑀧𑀸𑀤𑀸 𑀮𑁄𑀳𑀺𑀢𑀓𑀸 𑀢𑁂𑀲𑀁, 𑀅𑀜𑁆𑀚𑀺𑀢𑀓𑁆𑀔𑀸 𑀫𑀦𑁄𑀭𑀫𑀸.

𑁧𑁨𑁯. 𑀏𑀤𑀺𑀲𑀸 𑀢𑁂 𑀫𑀺𑀕𑀸 𑀤𑁂𑀯, 𑀏𑀤𑀺𑀲𑀸 𑀥𑀫𑁆𑀫𑀺𑀓𑀸 𑀫𑀺𑀕𑀸;

𑀫𑀸𑀢𑀸𑀧𑁂𑀢𑁆𑀢𑀺𑀪𑀭𑀸 𑀤𑁂𑀯, 𑀦 𑀢𑁂 𑀲𑁄 𑀅𑀪𑀺𑀳𑀸𑀭𑀺𑀢𑀼𑀁 [𑀅𑀪𑀺𑀳𑀸𑀭𑀬𑀼𑀁 (𑀓. 𑀲𑀻.), 𑀅𑀪𑀺𑀳𑀸𑀭𑀬𑀺𑀁 (𑀲𑁆𑀬𑀸.), 𑀅𑀪𑀺𑀳𑀸𑀭𑀬𑀁 (𑀧𑀻.)].

𑁧𑁩𑁦. 𑀤𑀫𑁆𑀫𑀺 𑀦𑀺𑀓𑁆𑀔𑀲𑀢𑀁 𑀮𑀼𑀤𑁆𑀤, 𑀣𑀽𑀮𑀜𑁆𑀘 𑀫𑀡𑀺𑀓𑀼𑀡𑁆𑀟𑀮𑀁;

𑀘𑀢𑀼𑀲𑁆𑀲𑀤𑀜𑁆𑀘 [𑀘𑀢𑀼𑀭𑀲𑁆𑀲𑀜𑁆𑀘 (𑀲𑁆𑀬𑀸. 𑀓.)] 𑀧𑀮𑁆𑀮𑀗𑁆𑀓𑀁, 𑀉𑀫𑀸𑀧𑀼𑀧𑁆𑀨𑀲𑀭𑀺𑀦𑁆𑀦𑀺𑀪𑀁 [𑀉𑀫𑁆𑀫𑀸𑀧𑀼𑀧𑁆𑀨𑀲𑀺𑀭𑀺𑀦𑁆𑀦𑀺𑀪𑀁 (𑀲𑀻. 𑀲𑁆𑀬𑀸. 𑀧𑀻. 𑀓.)].

𑁧𑁩𑁧. 𑀤𑁆𑀯𑁂 𑀘 𑀲𑀸𑀤𑀺𑀲𑀺𑀬𑁄 𑀪𑀭𑀺𑀬𑀸, 𑀉𑀲𑀪𑀜𑁆𑀘 𑀕𑀯𑀁 𑀲𑀢𑀁;

𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀲𑁆𑀲𑀁, 𑀩𑀳𑀼𑀓𑀸𑀭𑁄 𑀫𑁂𑀲𑀺 𑀮𑀼𑀤𑁆𑀤𑀓.

𑁧𑁩𑁨. 𑀓𑀲𑀺𑀯𑀸𑀡𑀺𑀚𑁆𑀚𑀸 [𑀓𑀲𑀻 𑀯𑀡𑀺𑀚𑁆𑀚𑀸 (𑀲𑀻. 𑀲𑁆𑀬𑀸. 𑀧𑀻.)] 𑀇𑀡𑀤𑀸𑀦𑀁, 𑀉𑀜𑁆𑀙𑀸𑀘𑀭𑀺𑀬𑀸 𑀘 𑀮𑀼𑀤𑁆𑀤𑀓;

𑀏𑀢𑁂𑀦 𑀤𑀸𑀭𑀁 𑀧𑁄𑀲𑁂𑀳𑀺, 𑀫𑀸 𑀧𑀸𑀧𑀁 𑀅𑀓𑀭𑀻 𑀧𑀼𑀦𑀸𑀢𑀺 [𑀅𑀓𑀭𑀸 𑀧𑀼𑀦𑀦𑁆𑀢𑀺 (𑀓. 𑀲𑀻. 𑀧𑀻.)].

𑀭𑁄𑀳𑀡𑀫𑀺𑀕𑀚𑀸𑀢𑀓𑀁 [𑀭𑁄𑀳𑀦𑁆𑀢𑀫𑀺𑀕𑀚𑀸𑀢𑀓𑀁 (𑀲𑀻. 𑀧𑀻.)] 𑀧𑀜𑁆𑀘𑀫𑀁.