𑁫𑁦𑁦. 𑀲𑀺𑀭𑀻𑀫𑀦𑁆𑀢𑀚𑀸𑀢𑀓𑀁 (𑁪)

𑁮𑁩. 𑀧𑀜𑁆𑀜𑀸𑀬𑀼𑀧𑁂𑀢𑀁 𑀲𑀺𑀭𑀺𑀬𑀸 𑀯𑀺𑀳𑀻𑀦𑀁, 𑀬𑀲𑀲𑁆𑀲𑀺𑀦𑀁 𑀯𑀸𑀧𑀺 𑀅𑀧𑁂𑀢𑀧𑀜𑁆𑀜𑀁;

𑀧𑀼𑀘𑁆𑀙𑀸𑀫𑀺 𑀢𑀁 𑀲𑁂𑀦𑀓 𑀏𑀢𑀫𑀢𑁆𑀣𑀁, 𑀓𑀫𑁂𑀢𑁆𑀣 𑀲𑁂𑀬𑁆𑀬𑁄 𑀓𑀼𑀲𑀮𑀸 𑀯𑀤𑀦𑁆𑀢𑀺.

𑁮𑁪. 𑀥𑀻𑀭𑀸 𑀘 𑀩𑀸𑀮𑀸 𑀘 𑀳𑀯𑁂 𑀚𑀦𑀺𑀦𑁆𑀤, 𑀲𑀺𑀧𑁆𑀧𑀽𑀧𑀧𑀦𑁆𑀦𑀸 𑀘 𑀅𑀲𑀺𑀧𑁆𑀧𑀺𑀦𑁄 𑀘;

𑀲𑀼𑀚𑀸𑀢𑀺𑀫𑀦𑁆𑀢𑁄𑀧𑀺 𑀅𑀚𑀸𑀢𑀺𑀫𑀲𑁆𑀲, 𑀬𑀲𑀲𑁆𑀲𑀺𑀦𑁄 𑀧𑁂𑀲𑀓𑀭𑀸 [𑀧𑁂𑀲𑁆𑀲𑀓𑀭𑀸 (𑀲𑀻. 𑀧𑀻.)] 𑀪𑀯𑀦𑁆𑀢𑀺;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸𑀦 𑀅𑀳𑀁 𑀯𑀤𑀸𑀫𑀺, 𑀧𑀜𑁆𑀜𑁄 𑀦𑀺𑀳𑀻𑀦𑁄 𑀲𑀺𑀭𑀻𑀫𑀸𑀯 [𑀲𑀺𑀭𑀺𑀫𑀸𑀯 (𑀲𑀻. 𑀲𑁆𑀬𑀸. 𑀧𑀻.)] 𑀲𑁂𑀬𑁆𑀬𑁄.

𑁮𑁫. 𑀢𑀼𑀯𑀫𑁆𑀧𑀺 𑀧𑀼𑀘𑁆𑀙𑀸𑀫𑀺 𑀅𑀦𑁄𑀫𑀧𑀜𑁆𑀜, 𑀫𑀳𑁄𑀲𑀥 𑀓𑁂𑀯𑀮𑀥𑀫𑁆𑀫𑀤𑀲𑁆𑀲𑀺;

𑀩𑀸𑀮𑀁 𑀬𑀲𑀲𑁆𑀲𑀺𑀁 𑀧𑀡𑁆𑀟𑀺𑀢𑀁 𑀅𑀧𑁆𑀧𑀪𑁄𑀕𑀁, 𑀓𑀫𑁂𑀢𑁆𑀣 𑀲𑁂𑀬𑁆𑀬𑁄 𑀓𑀼𑀲𑀮𑀸 𑀯𑀤𑀦𑁆𑀢𑀺.

𑁮𑁬. 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀢𑀺 𑀩𑀸𑀮𑁄 [𑀓𑀭𑁄𑀦𑁆𑀢𑀺 𑀩𑀸𑀮𑀸 (𑀲𑁆𑀬𑀸. 𑀓.)], 𑀇𑀥𑀫𑁂𑀯 [𑀇𑀤𑀫𑁂𑀯 (𑀲𑁆𑀬𑀸. 𑀓. 𑀅𑀝𑁆𑀞.), 𑀇𑀫𑀫𑁂𑀯 (𑀓.)] 𑀲𑁂𑀬𑁆𑀬𑁄 𑀇𑀢𑀺 𑀫𑀜𑁆𑀜𑀫𑀸𑀦𑁄 [𑀫𑀜𑁆𑀜𑀫𑀸𑀦𑀸 (𑀲𑁆𑀬𑀸. 𑀓.)];

𑀇𑀥𑀮𑁄𑀓𑀤𑀲𑁆𑀲𑀻 𑀧𑀭𑀮𑁄𑀓𑀫𑀤𑀲𑁆𑀲𑀻, 𑀉𑀪𑀬𑀢𑁆𑀣 𑀩𑀸𑀮𑁄 𑀓𑀮𑀺𑀫𑀕𑁆𑀕𑀳𑁂𑀲𑀺;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸𑀦 𑀅𑀳𑀁 𑀯𑀤𑀸𑀫𑀺, 𑀧𑀜𑁆𑀜𑁄𑀯 𑀲𑁂𑀬𑁆𑀬𑁄 𑀦 𑀬𑀲𑀲𑁆𑀲𑀺 𑀩𑀸𑀮𑁄.

𑁮𑁭. 𑀦 𑀲𑀺𑀧𑁆𑀧𑀫𑁂𑀢𑀁 𑀯𑀺𑀤𑀥𑀸𑀢𑀺 𑀪𑁄𑀕𑀁, 𑀦 𑀩𑀦𑁆𑀥𑀼𑀯𑀸 [𑀦 𑀩𑀦𑁆𑀥𑀯𑀸 (𑀲𑀻. 𑀲𑁆𑀬𑀸. 𑀓.)] 𑀦 𑀲𑀭𑀻𑀭𑀯𑀡𑁆𑀡𑁄 𑀬𑁄 [𑀦 𑀲𑀭𑀻𑀭𑀸𑀯𑀓𑀸𑀲𑁄 (𑀲𑀻. 𑀲𑁆𑀬𑀸. 𑀧𑀻.)];

𑀧𑀲𑁆𑀲𑁂𑀴𑀫𑀽𑀕𑀁 𑀲𑀼𑀔𑀫𑁂𑀥𑀫𑀸𑀦𑀁, 𑀲𑀺𑀭𑀻 𑀳𑀺 𑀦𑀁 𑀪𑀚𑀢𑁂 𑀕𑁄𑀭𑀯𑀺𑀦𑁆𑀤𑀁 [𑀕𑁄𑀭𑀺𑀫𑀦𑁆𑀤𑀁 (𑀲𑀻. 𑀧𑀻.)];

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸𑀦 𑀅𑀳𑀁 𑀯𑀤𑀸𑀫𑀺, 𑀧𑀜𑁆𑀜𑁄 𑀦𑀺𑀳𑀻𑀦𑁄 𑀲𑀺𑀭𑀻𑀫𑀸𑀯 𑀲𑁂𑀬𑁆𑀬𑁄.

𑁮𑁮. 𑀮𑀤𑁆𑀥𑀸 𑀲𑀼𑀔𑀁 𑀫𑀚𑁆𑀚𑀢𑀺 𑀅𑀧𑁆𑀧𑀧𑀜𑁆𑀜𑁄, 𑀤𑀼𑀓𑁆𑀔𑁂𑀦 𑀨𑀼𑀝𑁆𑀞𑁄𑀧𑀺 𑀧𑀫𑁄𑀳𑀫𑁂𑀢𑀺;

𑀆𑀕𑀦𑁆𑀢𑀼𑀦𑀸 𑀤𑀼𑀓𑁆𑀔𑀲𑀼𑀔𑁂𑀦 𑀨𑀼𑀝𑁆𑀞𑁄, 𑀧𑀯𑁂𑀥𑀢𑀺 𑀯𑀸𑀭𑀺𑀘𑀭𑁄𑀯 𑀖𑀫𑁆𑀫𑁂;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸𑀦 𑀅𑀳𑀁 𑀯𑀤𑀸𑀫𑀺, 𑀧𑀜𑁆𑀜𑁄𑀯 𑀲𑁂𑀬𑁆𑀬𑁄 𑀦 𑀬𑀲𑀲𑁆𑀲𑀺 𑀩𑀸𑀮𑁄.

𑁮𑁯. 𑀤𑀼𑀫𑀁 𑀬𑀣𑀸 𑀲𑀸𑀤𑀼𑀨𑀮𑀁 𑀅𑀭𑀜𑁆𑀜𑁂, 𑀲𑀫𑀦𑁆𑀢𑀢𑁄 𑀲𑀫𑀪𑀺𑀲𑀭𑀦𑁆𑀢𑀺 [𑀲𑀫𑀪𑀺𑀘𑀭𑀦𑁆𑀢𑀺 (𑀲𑀻. 𑀧𑀻.)] 𑀧𑀓𑁆𑀔𑀻;

𑀏𑀯𑀫𑁆𑀧𑀺 𑀅𑀟𑁆𑀠𑀁 𑀲𑀥𑀦𑀁 𑀲𑀪𑁄𑀕𑀁, 𑀩𑀳𑀼𑀚𑁆𑀚𑀦𑁄 𑀪𑀚𑀢𑀺 𑀅𑀢𑁆𑀣𑀳𑁂𑀢𑀼;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸𑀦 𑀅𑀳𑀁 𑀯𑀤𑀸𑀫𑀺, 𑀧𑀜𑁆𑀜𑁄 𑀦𑀺𑀳𑀻𑀦𑁄 𑀲𑀺𑀭𑀻𑀫𑀸𑀯 𑀲𑁂𑀬𑁆𑀬𑁄.

𑁯𑁦. 𑀦 𑀲𑀸𑀥𑀼 𑀩𑀮𑀯𑀸 𑀩𑀸𑀮𑁄, 𑀲𑀸𑀳𑀲𑀸 𑀯𑀺𑀦𑁆𑀤𑀢𑁂 𑀥𑀦𑀁;

𑀓𑀦𑁆𑀤𑀦𑁆𑀢𑀫𑁂𑀢𑀁 𑀤𑀼𑀫𑁆𑀫𑁂𑀥𑀁, 𑀓𑀟𑁆𑀠𑀦𑁆𑀢𑀺 𑀦𑀺𑀭𑀬𑀁 𑀪𑀼𑀲𑀁;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸𑀦 𑀅𑀳𑀁 𑀯𑀤𑀸𑀫𑀺, 𑀧𑀜𑁆𑀜𑁄𑀯 𑀲𑁂𑀬𑁆𑀬𑁄 𑀦 𑀬𑀲𑀲𑁆𑀲𑀺 𑀩𑀸𑀮𑁄.

𑁯𑁧. 𑀬𑀸 𑀓𑀸𑀘𑀺 𑀦𑀚𑁆𑀚𑁄 𑀕𑀗𑁆𑀕𑀫𑀪𑀺𑀲𑁆𑀲𑀯𑀦𑁆𑀢𑀺, 𑀲𑀩𑁆𑀩𑀸𑀯 𑀢𑀸 𑀦𑀸𑀫𑀕𑁄𑀢𑁆𑀢𑀁 𑀚𑀳𑀦𑁆𑀢𑀺;

𑀕𑀗𑁆𑀕𑀸 𑀲𑀫𑀼𑀤𑁆𑀤𑀁 𑀧𑀝𑀺𑀧𑀚𑁆𑀚𑀫𑀸𑀦𑀸, 𑀦 𑀔𑀸𑀬𑀢𑁂 𑀇𑀤𑁆𑀥𑀺𑀁 𑀧𑀜𑁆𑀜𑁄𑀧𑀺 𑀮𑁄𑀓𑁂 [𑀇𑀤𑁆𑀥𑀺𑀧𑀭𑁄 𑀳𑀺 𑀮𑁄𑀓𑁂 (𑀓. 𑀲𑀻. 𑀲𑁆𑀬𑀸.), 𑀇𑀤𑁆𑀥𑀺𑀧𑀭𑁄 𑀳𑀺 𑀮𑁄𑀓𑁄 (𑀲𑀻. 𑀧𑀻. 𑀅𑀝𑁆𑀞.)];

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸𑀦 𑀅𑀳𑀁 𑀯𑀤𑀸𑀫𑀺, 𑀧𑀜𑁆𑀜𑁄 𑀦𑀺𑀳𑀻𑀦𑁄 𑀲𑀺𑀭𑀻𑀫𑀸𑀯 𑀲𑁂𑀬𑁆𑀬𑁄.

𑁯𑁨. 𑀬𑀫𑁂𑀢𑀫𑀓𑁆𑀔𑀸 𑀉𑀤𑀥𑀺𑀁 𑀫𑀳𑀦𑁆𑀢𑀁, 𑀲𑀯𑀦𑁆𑀢𑀺 𑀦𑀚𑁆𑀚𑁄 𑀲𑀩𑁆𑀩𑀓𑀸𑀮𑀫𑀲𑀗𑁆𑀔𑁆𑀬𑀁;

𑀲𑁄 𑀲𑀸𑀕𑀭𑁄 𑀦𑀺𑀘𑁆𑀘𑀫𑀼𑀴𑀸𑀭𑀯𑁂𑀕𑁄, 𑀯𑁂𑀮𑀁 𑀦 𑀅𑀘𑁆𑀘𑁂𑀢𑀺 𑀫𑀳𑀸𑀲𑀫𑀼𑀤𑁆𑀤𑁄.

𑁯𑁩. 𑀏𑀯𑀫𑁆𑀧𑀺 𑀩𑀸𑀮𑀲𑁆𑀲 𑀧𑀚𑀧𑁆𑀧𑀺𑀢𑀸𑀦𑀺, 𑀧𑀜𑁆𑀜𑀁 𑀦 𑀅𑀘𑁆𑀘𑁂𑀢𑀺 𑀲𑀺𑀭𑀻 𑀓𑀤𑀸𑀘𑀺;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸𑀦 𑀅𑀳𑀁 𑀯𑀤𑀸𑀫𑀺, 𑀧𑀜𑁆𑀜𑁄𑀯 𑀲𑁂𑀬𑁆𑀬𑁄 𑀦 𑀬𑀲𑀲𑁆𑀲𑀺 𑀩𑀸𑀮𑁄.

𑁯𑁪. 𑀅𑀲𑀜𑁆𑀜𑀢𑁄 𑀘𑁂𑀧𑀺 𑀧𑀭𑁂𑀲𑀫𑀢𑁆𑀣𑀁, 𑀪𑀡𑀸𑀢𑀺 𑀲𑀦𑁆𑀥𑀸𑀦𑀕𑀢𑁄 [𑀲𑀡𑁆𑀞𑀸𑀦𑀕𑀢𑁄 (𑀲𑁆𑀬𑀸. 𑀧𑀻.), 𑀲𑀦𑁆𑀣𑀸𑀦𑀕𑀢𑁄 (𑀲𑀻.)] 𑀬𑀲𑀲𑁆𑀲𑀻;

𑀢𑀲𑁆𑀲𑁂𑀯 𑀢𑀁 𑀭𑀽𑀳𑀢𑀺 𑀜𑀸𑀢𑀺𑀫𑀚𑁆𑀛𑁂, 𑀲𑀺𑀭𑀻 𑀳𑀺 𑀦𑀁 [𑀲𑀺𑀭𑀺𑀳𑀻𑀦𑀁 (𑀲𑀻. 𑀓.), 𑀲𑀺𑀭𑀻𑀳𑀻𑀦𑀁 (𑀲𑁆𑀬𑀸. 𑀧𑀻.)] 𑀓𑀸𑀭𑀬𑀢𑁂 𑀦 𑀧𑀜𑁆𑀜𑀸 [𑀦 𑀧𑀜𑁆𑀜𑁄 (𑀲𑀻.), 𑀦 𑀧𑀜𑁆𑀜𑀁 (𑀲𑁆𑀬𑀸. 𑀓.)];

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸𑀦 𑀅𑀳𑀁 𑀯𑀤𑀸𑀫𑀺, 𑀧𑀜𑁆𑀜𑁄 𑀦𑀺𑀳𑀻𑀦𑁄 𑀲𑀺𑀭𑀻𑀫𑀸𑀯 𑀲𑁂𑀬𑁆𑀬𑁄.

𑁯𑁫. 𑀧𑀭𑀲𑁆𑀲 𑀯𑀸 𑀅𑀢𑁆𑀢𑀦𑁄 𑀯𑀸𑀧𑀺 𑀳𑁂𑀢𑀼, 𑀩𑀸𑀮𑁄 𑀫𑀼𑀲𑀸 𑀪𑀸𑀲𑀢𑀺 𑀅𑀧𑁆𑀧𑀧𑀜𑁆𑀜𑁄;

𑀲𑁄 𑀦𑀺𑀦𑁆𑀤𑀺𑀢𑁄 𑀳𑁄𑀢𑀺 𑀲𑀪𑀸𑀬 𑀫𑀚𑁆𑀛𑁂, 𑀧𑀘𑁆𑀙𑀸𑀧𑀺 [𑀧𑁂𑀘𑁆𑀘𑀫𑁆𑀧𑀺 (𑀲𑀻. 𑀧𑀻.), 𑀧𑁂𑀘𑁆𑀘𑀸𑀧𑀺 (?)] 𑀲𑁄 𑀤𑀼𑀕𑁆𑀕𑀢𑀺𑀕𑀸𑀫𑀻 𑀳𑁄𑀢𑀺;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸𑀦 𑀅𑀳𑀁 𑀯𑀤𑀸𑀫𑀺, 𑀧𑀜𑁆𑀜𑁄𑀯 𑀲𑁂𑀬𑁆𑀬𑁄 𑀦 𑀬𑀲𑀲𑁆𑀲𑀺 𑀩𑀸𑀮𑁄.

𑁯𑁬. 𑀅𑀢𑁆𑀣𑀫𑁆𑀧𑀺 𑀘𑁂 𑀪𑀸𑀲𑀢𑀺 𑀪𑀽𑀭𑀺𑀧𑀜𑁆𑀜𑁄, 𑀅𑀦𑀸𑀴𑁆𑀳𑀺𑀬𑁄 [𑀅𑀦𑀸𑀮𑀬𑁄 (𑀧𑀻.)] 𑀅𑀧𑁆𑀧𑀥𑀦𑁄 𑀤𑀮𑀺𑀤𑁆𑀤𑁄;

𑀦 𑀢𑀲𑁆𑀲 𑀢𑀁 𑀭𑀽𑀳𑀢𑀺 𑀜𑀸𑀢𑀺𑀫𑀚𑁆𑀛𑁂, 𑀲𑀺𑀭𑀻 𑀘 𑀧𑀜𑁆𑀜𑀸𑀡𑀯𑀢𑁄 𑀦 𑀳𑁄𑀢𑀺;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸𑀦 𑀅𑀳𑀁 𑀯𑀤𑀸𑀫𑀺, 𑀧𑀜𑁆𑀜𑁄 𑀦𑀺𑀳𑀻𑀦𑁄 𑀲𑀺𑀭𑀻𑀫𑀸𑀯 𑀲𑁂𑀬𑁆𑀬𑁄.

𑁯𑁭. 𑀧𑀭𑀲𑁆𑀲 𑀯𑀸 𑀅𑀢𑁆𑀢𑀦𑁄 𑀯𑀸𑀧𑀺 𑀳𑁂𑀢𑀼, 𑀦 𑀪𑀸𑀲𑀢𑀺 𑀅𑀮𑀺𑀓𑀁 𑀪𑀽𑀭𑀺𑀧𑀜𑁆𑀜𑁄;

𑀲𑁄 𑀧𑀽𑀚𑀺𑀢𑁄 𑀳𑁄𑀢𑀺 𑀲𑀪𑀸𑀬 𑀫𑀚𑁆𑀛𑁂, 𑀧𑀘𑁆𑀙𑀸𑀧𑀺 𑀲𑁄 𑀲𑀼𑀕𑁆𑀕𑀢𑀺𑀕𑀸𑀫𑀻 𑀳𑁄𑀢𑀺;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸𑀦 𑀅𑀳𑀁 𑀯𑀤𑀸𑀫𑀺, 𑀧𑀜𑁆𑀜𑁄𑀯 𑀲𑁂𑀬𑁆𑀬𑁄 𑀦 𑀬𑀲𑀲𑁆𑀲𑀺 𑀩𑀸𑀮𑁄.

𑁯𑁮. 𑀳𑀢𑁆𑀣𑀻 𑀕𑀯𑀲𑁆𑀲𑀸 𑀫𑀡𑀺𑀓𑀼𑀡𑁆𑀟𑀮𑀸 𑀘, 𑀣𑀺𑀬𑁄 𑀘 𑀇𑀤𑁆𑀥𑁂𑀲𑀼 𑀓𑀼𑀮𑁂𑀲𑀼 𑀚𑀸𑀢𑀸;

𑀲𑀩𑁆𑀩𑀸𑀯 𑀢𑀸 𑀉𑀧𑀪𑁄𑀕𑀸 𑀪𑀯𑀦𑁆𑀢𑀺, 𑀇𑀤𑁆𑀥𑀲𑁆𑀲 𑀧𑁄𑀲𑀲𑁆𑀲 𑀅𑀦𑀺𑀤𑁆𑀥𑀺𑀫𑀦𑁆𑀢𑁄;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸𑀦 𑀅𑀳𑀁 𑀯𑀤𑀸𑀫𑀺, 𑀧𑀜𑁆𑀜𑁄 𑀦𑀺𑀳𑀻𑀦𑁄 𑀲𑀺𑀭𑀻𑀫𑀸𑀯 𑀲𑁂𑀬𑁆𑀬𑁄.

𑁯𑁯. 𑀅𑀲𑀁𑀯𑀺𑀳𑀺𑀢𑀓𑀫𑁆𑀫𑀦𑁆𑀢𑀁, 𑀩𑀸𑀮𑀁 𑀤𑀼𑀫𑁆𑀫𑁂𑀥𑀫𑀦𑁆𑀢𑀺𑀦𑀁;

𑀲𑀺𑀭𑀻 𑀚𑀳𑀢𑀺 𑀤𑀼𑀫𑁆𑀫𑁂𑀥𑀁, 𑀚𑀺𑀡𑁆𑀡𑀁𑀯 𑀉𑀭𑀕𑁄 𑀢𑀘𑀁;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸𑀦 𑀅𑀳𑀁 𑀯𑀤𑀸𑀫𑀺, 𑀧𑀜𑁆𑀜𑁄𑀯 𑀲𑁂𑀬𑁆𑀬𑁄 𑀦 𑀬𑀲𑀲𑁆𑀲𑀺 𑀩𑀸𑀮𑁄.

𑁧𑁦𑁦. 𑀧𑀜𑁆𑀘 𑀧𑀡𑁆𑀟𑀺𑀢𑀸 𑀫𑀬𑀁 𑀪𑀤𑁆𑀤𑀦𑁆𑀢𑁂, 𑀲𑀩𑁆𑀩𑁂 𑀧𑀜𑁆𑀚𑀮𑀺𑀓𑀸 𑀉𑀧𑀝𑁆𑀞𑀺𑀢𑀸;

𑀢𑁆𑀯𑀁 𑀦𑁄 𑀅𑀪𑀺𑀪𑀼𑀬𑁆𑀬 𑀇𑀲𑁆𑀲𑀭𑁄𑀲𑀺, 𑀲𑀓𑁆𑀓𑁄𑀯 𑀪𑀽𑀢𑀧𑀢𑀺 𑀤𑁂𑀯𑀭𑀸𑀚𑀸;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸𑀦 𑀅𑀳𑀁 𑀯𑀤𑀸𑀫𑀺, 𑀧𑀜𑁆𑀜𑁄 𑀦𑀺𑀳𑀻𑀦𑁄 𑀲𑀺𑀭𑀻𑀫𑀸𑀯 𑀲𑁂𑀬𑁆𑀬𑁄.

𑁧𑁦𑁧. 𑀤𑀸𑀲𑁄𑀯 𑀧𑀜𑁆𑀜𑀲𑁆𑀲 𑀬𑀲𑀲𑁆𑀲𑀺 𑀩𑀸𑀮𑁄, 𑀅𑀢𑁆𑀣𑁂𑀲𑀼 𑀚𑀸𑀢𑁂𑀲𑀼 𑀢𑀣𑀸𑀯𑀺𑀥𑁂𑀲𑀼;

𑀬𑀁 𑀧𑀡𑁆𑀟𑀺𑀢𑁄 𑀦𑀺𑀧𑀼𑀡𑀁 𑀲𑀁𑀯𑀺𑀥𑁂𑀢𑀺, 𑀲𑀫𑁆𑀫𑁄𑀳𑀫𑀸𑀧𑀚𑁆𑀚𑀢𑀺 𑀢𑀢𑁆𑀣 𑀩𑀸𑀮𑁄;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸𑀦 𑀅𑀳𑀁 𑀯𑀤𑀸𑀫𑀺, 𑀧𑀜𑁆𑀜𑁄𑀯 𑀲𑁂𑀬𑁆𑀬𑁄 𑀦 𑀬𑀲𑀲𑁆𑀲𑀺 𑀩𑀸𑀮𑁄.

𑁧𑁦𑁨. 𑀅𑀤𑁆𑀥𑀸 𑀳𑀺 𑀧𑀜𑁆𑀜𑀸𑀯 𑀲𑀢𑀁 𑀧𑀲𑀢𑁆𑀣𑀸, 𑀓𑀦𑁆𑀢𑀸 𑀲𑀺𑀭𑀻 𑀪𑁄𑀕𑀭𑀢𑀸 𑀫𑀦𑀼𑀲𑁆𑀲𑀸;

𑀜𑀸𑀡𑀜𑁆𑀘 𑀩𑀼𑀤𑁆𑀥𑀸𑀦𑀫𑀢𑀼𑀮𑁆𑀬𑀭𑀽𑀧𑀁, 𑀧𑀜𑁆𑀜𑀁 𑀦 𑀅𑀘𑁆𑀘𑁂𑀢𑀺 𑀲𑀺𑀭𑀻 𑀓𑀤𑀸𑀘𑀺.

𑁧𑁦𑁩. 𑀬𑀁 𑀢𑀁 𑀅𑀧𑀼𑀘𑁆𑀙𑀺𑀫𑁆𑀳 𑀅𑀓𑀺𑀢𑁆𑀢𑀬𑀻 𑀦𑁄, 𑀫𑀳𑁄𑀲𑀥 𑀓𑁂𑀯𑀮𑀥𑀫𑁆𑀫𑀤𑀲𑁆𑀲𑀻;

𑀕𑀯𑀁 𑀲𑀳𑀲𑁆𑀲𑀁 𑀉𑀲𑀪𑀜𑁆𑀘 𑀦𑀸𑀕𑀁, 𑀆𑀚𑀜𑁆𑀜𑀬𑀼𑀢𑁆𑀢𑁂 𑀘 𑀭𑀣𑁂 𑀤𑀲 𑀇𑀫𑁂;

𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑁂𑀦 𑀢𑀼𑀝𑁆𑀞𑁄, 𑀤𑀤𑀸𑀫𑀺 𑀢𑁂 𑀕𑀸𑀫𑀯𑀭𑀸𑀦𑀺 𑀲𑁄𑀴𑀲𑀸𑀢𑀺.

𑀲𑀺𑀭𑀻𑀫𑀦𑁆𑀢𑀚𑀸𑀢𑀓𑀁 [𑀲𑀺𑀭𑀺𑀫𑀦𑁆𑀤𑀚𑀸𑀢𑀓𑀁 (𑀲𑀻. 𑀲𑁆𑀬𑀸. 𑀧𑀻.)] 𑀘𑀢𑀼𑀢𑁆𑀣𑀁.