𑁪𑁯𑁯. 𑀲𑀺𑀯𑀺𑀚𑀸𑀢𑀓𑀁 (𑁩)

𑁫𑁨. 𑀤𑀽𑀭𑁂 𑀅𑀧𑀲𑁆𑀲𑀁 𑀣𑁂𑀭𑁄𑀯, 𑀘𑀓𑁆𑀔𑀼𑀁 𑀬𑀸𑀘𑀺𑀢𑀼𑀫𑀸𑀕𑀢𑁄;

𑀏𑀓𑀦𑁂𑀢𑁆𑀢𑀸 𑀪𑀯𑀺𑀲𑁆𑀲𑀸𑀫, 𑀘𑀓𑁆𑀔𑀼𑀁 𑀫𑁂 𑀤𑁂𑀳𑀺 𑀬𑀸𑀘𑀺𑀢𑁄.

𑁫𑁩. 𑀓𑁂𑀦𑀸𑀦𑀼𑀲𑀺𑀝𑁆𑀞𑁄 𑀇𑀥 𑀫𑀸𑀕𑀢𑁄𑀲𑀺, 𑀯𑀦𑀺𑀩𑁆𑀩𑀓 [𑀯𑀡𑀺𑀩𑁆𑀩𑀓 (𑀲𑀻.)] 𑀘𑀓𑁆𑀔𑀼𑀧𑀣𑀸𑀦𑀺 𑀬𑀸𑀘𑀺𑀢𑀼𑀁;

𑀲𑀼𑀤𑀼𑀘𑁆𑀘𑀚𑀁 𑀬𑀸𑀘𑀲𑀺 𑀉𑀢𑁆𑀢𑀫𑀗𑁆𑀕𑀁, 𑀬𑀫𑀸𑀳𑀼 𑀦𑁂𑀢𑁆𑀢𑀁 𑀧𑀼𑀭𑀺𑀲𑁂𑀦 𑀤𑀼𑀘𑁆𑀘𑀚𑀁.

𑁫𑁪. 𑀬𑀫𑀸𑀳𑀼 𑀤𑁂𑀯𑁂𑀲𑀼 𑀲𑀼𑀚𑀫𑁆𑀧𑀢𑀻𑀢𑀺, 𑀫𑀖𑀯𑀸𑀢𑀺 𑀦𑀁 𑀆𑀳𑀼 𑀫𑀦𑀼𑀲𑁆𑀲𑀮𑁄𑀓𑁂;

𑀢𑁂𑀦𑀸𑀦𑀼𑀲𑀺𑀝𑁆𑀞𑁄 𑀇𑀥 𑀫𑀸𑀕𑀢𑁄𑀲𑁆𑀫𑀺, 𑀯𑀦𑀺𑀩𑁆𑀩𑀓𑁄 𑀘𑀓𑁆𑀔𑀼𑀧𑀣𑀸𑀦𑀺 𑀬𑀸𑀘𑀺𑀢𑀼𑀁.

𑁫𑁫. 𑀯𑀦𑀺𑀩𑁆𑀩𑀢𑁄 [𑀯𑀦𑀺𑀩𑁆𑀩𑀓𑁄 (𑀲𑁆𑀬𑀸. 𑀧𑀻.)] 𑀫𑀬𑁆𑀳 𑀯𑀦𑀺𑀁 [𑀯𑀦𑀁 (𑀓.), 𑀯𑀡𑀺𑀁 (𑀲𑀻. 𑀲𑁆𑀬𑀸. 𑀧𑀻.)] 𑀅𑀦𑀼𑀢𑁆𑀢𑀭𑀁, 𑀤𑀤𑀸𑀳𑀺 𑀢𑁂 𑀘𑀓𑁆𑀔𑀼𑀧𑀣𑀸𑀦𑀺 𑀬𑀸𑀘𑀺𑀢𑁄;

𑀤𑀤𑀸𑀳𑀺 𑀫𑁂 𑀘𑀓𑁆𑀔𑀼𑀧𑀣𑀁 𑀅𑀦𑀼𑀢𑁆𑀢𑀭𑀁, 𑀬𑀫𑀸𑀳𑀼 𑀦𑁂𑀢𑁆𑀢𑀁 𑀧𑀼𑀭𑀺𑀲𑁂𑀦 𑀤𑀼𑀘𑁆𑀘𑀚𑀁.

𑁫𑁬. 𑀬𑁂𑀦 𑀅𑀢𑁆𑀣𑁂𑀦 𑀆𑀕𑀘𑁆𑀙𑀺 [𑀆𑀕𑀜𑁆𑀙𑀺 (𑀲𑀻. 𑀧𑀻.)], 𑀬𑀫𑀢𑁆𑀣𑀫𑀪𑀺𑀧𑀢𑁆𑀣𑀬𑀁;

𑀢𑁂 𑀢𑁂 𑀇𑀚𑁆𑀛𑀦𑁆𑀢𑀼 𑀲𑀗𑁆𑀓𑀧𑁆𑀧𑀸, 𑀮𑀪 𑀘𑀓𑁆𑀔𑀽𑀦𑀺 𑀩𑁆𑀭𑀸𑀳𑁆𑀫𑀡.

𑁫𑁭. 𑀏𑀓𑀁 𑀢𑁂 𑀬𑀸𑀘𑀫𑀸𑀦𑀲𑁆𑀲, 𑀉𑀪𑀬𑀸𑀦𑀺 𑀤𑀤𑀸𑀫𑀳𑀁;

𑀲 𑀘𑀓𑁆𑀔𑀼𑀫𑀸 𑀕𑀘𑁆𑀙 𑀚𑀦𑀲𑁆𑀲 𑀧𑁂𑀓𑁆𑀔𑀢𑁄, 𑀬𑀤𑀺𑀘𑁆𑀙𑀲𑁂 𑀢𑁆𑀯𑀁 𑀢𑀤𑀢𑁂 𑀲𑀫𑀺𑀚𑁆𑀛𑀢𑀼.

𑁫𑁮. 𑀫𑀸 𑀦𑁄 𑀤𑁂𑀯 𑀅𑀤𑀸 𑀘𑀓𑁆𑀔𑀼𑀁, 𑀫𑀸 𑀦𑁄 𑀲𑀩𑁆𑀩𑁂 𑀧𑀭𑀸𑀓𑀭𑀺 [𑀧𑀭𑀓𑁆𑀓𑀭𑀺 (𑀲𑁆𑀬𑀸. 𑀓. 𑀅𑀝𑁆𑀞.), 𑀧𑀭𑀺𑀓𑁆𑀓𑀭𑀺 (𑀓.) 𑀧𑀭𑀺 + 𑀆 + 𑀓𑀭𑀺 = 𑀧𑀭𑀸𑀓𑀭𑀺];

𑀥𑀦𑀁 𑀤𑁂𑀳𑀺 𑀫𑀳𑀸𑀭𑀸𑀚, 𑀫𑀼𑀢𑁆𑀢𑀸 𑀯𑁂𑀴𑀼𑀭𑀺𑀬𑀸 𑀩𑀳𑀽.

𑁫𑁯. 𑀬𑀼𑀢𑁆𑀢𑁂 𑀤𑁂𑀯 𑀭𑀣𑁂 𑀤𑁂𑀳𑀺, 𑀆𑀚𑀸𑀦𑀻𑀬𑁂 𑀘𑀮𑀗𑁆𑀓𑀢𑁂;

𑀦𑀸𑀕𑁂 𑀤𑁂𑀳𑀺 𑀫𑀳𑀸𑀭𑀸𑀚, 𑀳𑁂𑀫𑀓𑀧𑁆𑀧𑀦𑀯𑀸𑀲𑀲𑁂.

𑁬𑁦. 𑀬𑀣𑀸 𑀢𑀁 𑀲𑀺𑀯𑀬𑁄 [𑀲𑀻𑀯𑀺𑀬𑁄 (𑀲𑁆𑀬𑀸.)] 𑀲𑀩𑁆𑀩𑁂, 𑀲𑀬𑁄𑀕𑁆𑀕𑀸 𑀲𑀭𑀣𑀸 𑀲𑀤𑀸;

𑀲𑀫𑀦𑁆𑀢𑀸 𑀧𑀭𑀺𑀓𑀺𑀭𑁂𑀬𑁆𑀬𑀼𑀁 [𑀧𑀭𑀺𑀓𑀭𑁂𑀬𑁆𑀬𑀼𑀁 (𑀲𑁆𑀬𑀸. 𑀧𑀻.)], 𑀏𑀯𑀁 𑀤𑁂𑀳𑀺 𑀭𑀣𑁂𑀲𑀪.

𑁬𑁧. 𑀬𑁄 𑀯𑁂 𑀤𑀲𑁆𑀲𑀦𑁆𑀢𑀺 𑀯𑀢𑁆𑀯𑀸𑀦, 𑀅𑀤𑀸𑀦𑁂 𑀓𑀼𑀭𑀼𑀢𑁂 𑀫𑀦𑁄;

𑀪𑀽𑀫𑁆𑀬𑀁 [𑀪𑀽𑀫𑁆𑀬𑀸 (𑀲𑀻. 𑀧𑀻.)] 𑀲𑁄 𑀧𑀢𑀺𑀢𑀁 𑀧𑀸𑀲𑀁, 𑀕𑀻𑀯𑀸𑀬𑀁 𑀧𑀝𑀺𑀫𑀼𑀜𑁆𑀘𑀢𑀺.

𑁬𑁨. 𑀬𑁄 𑀯𑁂 𑀤𑀲𑁆𑀲𑀦𑁆𑀢𑀺 𑀯𑀢𑁆𑀯𑀸𑀦, 𑀅𑀤𑀸𑀦𑁂 𑀓𑀼𑀭𑀼𑀢𑁂 𑀫𑀦𑁄;

𑀧𑀸𑀧𑀸 𑀧𑀸𑀧𑀢𑀭𑁄 𑀳𑁄𑀢𑀺, 𑀲𑀫𑁆𑀧𑀢𑁆𑀢𑁄 𑀬𑀫𑀲𑀸𑀥𑀦𑀁.

𑁬𑁩. 𑀬𑀜𑁆𑀳𑀺 𑀬𑀸𑀘𑁂 𑀢𑀜𑁆𑀳𑀺 𑀤𑀤𑁂, 𑀬𑀁 𑀦 𑀬𑀸𑀘𑁂 𑀦 𑀢𑀁 𑀤𑀤𑁂;

𑀲𑁆𑀯𑀸𑀳𑀁 𑀢𑀫𑁂𑀯 𑀤𑀲𑁆𑀲𑀸𑀫𑀺, 𑀬𑀁 𑀫𑀁 𑀬𑀸𑀘𑀢𑀺 𑀩𑁆𑀭𑀸𑀳𑁆𑀫𑀡𑁄.

𑁬𑁪. 𑀆𑀬𑀼𑀁 𑀦𑀼 𑀯𑀡𑁆𑀡𑀁 𑀦𑀼 𑀲𑀼𑀔𑀁 𑀩𑀮𑀁 𑀦𑀼, 𑀓𑀺𑀁 𑀧𑀢𑁆𑀣𑀬𑀸𑀦𑁄 𑀦𑀼 𑀚𑀦𑀺𑀦𑁆𑀤 𑀤𑁂𑀲𑀺;

𑀓𑀣𑀜𑁆𑀳𑀺 𑀭𑀸𑀚𑀸 𑀲𑀺𑀯𑀺𑀦𑀁 𑀅𑀦𑀼𑀢𑁆𑀢𑀭𑁄, 𑀘𑀓𑁆𑀔𑀽𑀦𑀺 𑀤𑀚𑁆𑀚𑀸 𑀧𑀭𑀮𑁄𑀓𑀳𑁂𑀢𑀼.

𑁬𑁫. 𑀦 𑀯𑀸𑀳𑀫𑁂𑀢𑀁 𑀬𑀲𑀲𑀸 𑀤𑀤𑀸𑀫𑀺, 𑀦 𑀧𑀼𑀢𑁆𑀢𑀫𑀺𑀘𑁆𑀙𑁂 𑀦 𑀥𑀦𑀁 𑀦 𑀭𑀝𑁆𑀞𑀁;

𑀲𑀢𑀜𑁆𑀘 𑀥𑀫𑁆𑀫𑁄 𑀘𑀭𑀺𑀢𑁄 𑀧𑀼𑀭𑀸𑀡𑁄, 𑀇𑀘𑁆𑀘𑁂𑀯 𑀤𑀸𑀦𑁂 𑀭𑀫𑀢𑁂 𑀫𑀦𑁄 𑀫𑀫 [𑀫𑀫𑀁 (𑀲𑀻. 𑀧𑀻.)].

𑁬𑁬. 𑀲𑀔𑀸 𑀘 𑀫𑀺𑀢𑁆𑀢𑁄 𑀘 𑀫𑀫𑀸𑀲𑀺 𑀲𑀻𑀯𑀺𑀓 [𑀲𑀻𑀯𑀓 (𑀲𑀻. 𑀧𑀻.)], 𑀲𑀼𑀲𑀺𑀓𑁆𑀔𑀺𑀢𑁄 𑀲𑀸𑀥𑀼 𑀓𑀭𑁄𑀳𑀺 𑀫𑁂 𑀯𑀘𑁄;

𑀉𑀤𑁆𑀥𑀭𑀺𑀢𑁆𑀯𑀸 [𑀉𑀤𑁆𑀥𑀢𑁆𑀯 (𑀲𑀻.), 𑀮𑀤𑁆𑀥 𑀢𑁆𑀯𑀁 (𑀧𑀻.)] 𑀘𑀓𑁆𑀔𑀽𑀦𑀺 𑀫𑀫𑀁 𑀚𑀺𑀕𑀻𑀲𑀢𑁄, 𑀳𑀢𑁆𑀣𑁂𑀲𑀼 𑀞𑀧𑁂𑀳𑀺 [𑀆𑀯𑁂𑀲𑀺 (𑀲𑀻.)] 𑀯𑀦𑀺𑀩𑁆𑀩𑀓𑀲𑁆𑀲.

𑁬𑁭. 𑀘𑁄𑀤𑀺𑀢𑁄 𑀲𑀺𑀯𑀺𑀭𑀸𑀚𑁂𑀦, 𑀲𑀺𑀯𑀺𑀓𑁄 𑀯𑀘𑀦𑀗𑁆𑀓𑀭𑁄;

𑀭𑀜𑁆𑀜𑁄 𑀘𑀓𑁆𑀔𑀽𑀦𑀼𑀤𑁆𑀥𑀭𑀺𑀢𑁆𑀯𑀸 [𑀘𑀓𑁆𑀔𑀽𑀦𑀺 𑀉𑀤𑁆𑀥𑀢𑁆𑀯𑀸 (𑀲𑀻. 𑀧𑀻.)], 𑀩𑁆𑀭𑀸𑀳𑁆𑀫𑀡𑀲𑁆𑀲𑀽𑀧𑀦𑀸𑀫𑀬𑀺;

𑀲𑀘𑀓𑁆𑀔𑀼 𑀩𑁆𑀭𑀸𑀳𑁆𑀫𑀡𑁄 𑀆𑀲𑀺, 𑀅𑀦𑁆𑀥𑁄 𑀭𑀸𑀚𑀸 𑀉𑀧𑀸𑀯𑀺𑀲𑀺.

𑁬𑁮. 𑀢𑀢𑁄 𑀲𑁄 𑀓𑀢𑀺𑀧𑀸𑀳𑀲𑁆𑀲, 𑀉𑀧𑀭𑀽𑀴𑁆𑀳𑁂𑀲𑀼 𑀘𑀓𑁆𑀔𑀼𑀲𑀼;

𑀲𑀽𑀢𑀁 𑀆𑀫𑀦𑁆𑀢𑀬𑀻 𑀭𑀸𑀚𑀸, 𑀲𑀺𑀯𑀻𑀦𑀁 𑀭𑀝𑁆𑀞𑀯𑀟𑁆𑀠𑀦𑁄.

𑁬𑁯. 𑀬𑁄𑀚𑁂𑀳𑀺 𑀲𑀸𑀭𑀣𑀺 𑀬𑀸𑀦𑀁, 𑀬𑀼𑀢𑁆𑀢𑀜𑁆𑀘 𑀧𑀝𑀺𑀯𑁂𑀤𑀬;

𑀉𑀬𑁆𑀬𑀸𑀦𑀪𑀽𑀫𑀺𑀁 𑀕𑀘𑁆𑀙𑀸𑀫, 𑀧𑁄𑀓𑁆𑀔𑀭𑀜𑁆𑀜𑁄 𑀯𑀦𑀸𑀦𑀺 𑀘.

𑁭𑁦. 𑀲𑁄 𑀘 𑀧𑁄𑀓𑁆𑀔𑀭𑀡𑀻𑀢𑀻𑀭𑁂 [𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂 (𑀲𑀻. 𑀧𑀻.)], 𑀧𑀮𑁆𑀮𑀗𑁆𑀓𑁂𑀦 𑀉𑀧𑀸𑀯𑀺𑀲𑀺;

𑀢𑀲𑁆𑀲 𑀲𑀓𑁆𑀓𑁄 𑀧𑀸𑀢𑀼𑀭𑀳𑀼, 𑀤𑁂𑀯𑀭𑀸𑀚𑀸 𑀲𑀼𑀚𑀫𑁆𑀧𑀢𑀺.

𑁭𑁧. 𑀲𑀓𑁆𑀓𑁄𑀳𑀫𑀲𑁆𑀫𑀺 𑀤𑁂𑀯𑀺𑀦𑁆𑀤𑁄, 𑀆𑀕𑀢𑁄𑀲𑁆𑀫𑀺 𑀢𑀯𑀦𑁆𑀢𑀺𑀓𑁂;

𑀯𑀭𑀁 𑀯𑀭𑀲𑁆𑀲𑀼 𑀭𑀸𑀚𑀻𑀲𑀺, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺.

𑁭𑁨. 𑀧𑀳𑀽𑀢𑀁 𑀫𑁂 𑀥𑀦𑀁 𑀲𑀓𑁆𑀓, 𑀩𑀮𑀁 𑀓𑁄𑀲𑁄 𑀘𑀦𑀧𑁆𑀧𑀓𑁄;

𑀅𑀦𑁆𑀥𑀲𑁆𑀲 𑀫𑁂 𑀲𑀢𑁄 𑀤𑀸𑀦𑀺, 𑀫𑀭𑀡𑀜𑁆𑀜𑁂𑀯 𑀭𑀼𑀘𑁆𑀘𑀢𑀺.

𑁭𑁩. 𑀬𑀸𑀦𑀺 𑀲𑀘𑁆𑀘𑀸𑀦𑀺 𑀤𑁆𑀯𑀺𑀧𑀤𑀺𑀦𑁆𑀤, 𑀢𑀸𑀦𑀺 𑀪𑀸𑀲𑀲𑁆𑀲𑀼 𑀔𑀢𑁆𑀢𑀺𑀬;

𑀲𑀘𑁆𑀘𑀁 𑀢𑁂 𑀪𑀡𑀫𑀸𑀦𑀲𑁆𑀲, 𑀧𑀼𑀦 𑀘𑀓𑁆𑀔𑀼 𑀪𑀯𑀺𑀲𑁆𑀲𑀢𑀺.

𑁭𑁪. 𑀬𑁂 𑀫𑀁 𑀬𑀸𑀘𑀺𑀢𑀼𑀫𑀸𑀬𑀦𑁆𑀢𑀺, 𑀦𑀸𑀦𑀸𑀕𑁄𑀢𑁆𑀢𑀸 𑀯𑀦𑀺𑀩𑁆𑀩𑀓𑀸;

𑀬𑁄𑀧𑀺 𑀫𑀁 𑀬𑀸𑀘𑀢𑁂 𑀢𑀢𑁆𑀣, 𑀲𑁄𑀧𑀺 𑀫𑁂 𑀫𑀦𑀲𑁄 𑀧𑀺𑀬𑁄;

𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀘𑀓𑁆𑀔𑀼 𑀫𑁂 𑀉𑀧𑀧𑀚𑁆𑀚𑀣.

𑁭𑁫. 𑀬𑀁 𑀫𑀁 𑀲𑁄 𑀬𑀸𑀘𑀺𑀢𑀼𑀁 𑀆𑀕𑀸, 𑀤𑁂𑀳𑀺 𑀘𑀓𑁆𑀔𑀼𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑁄;

𑀢𑀲𑁆𑀲 𑀘𑀓𑁆𑀔𑀽𑀦𑀺 𑀧𑀸𑀤𑀸𑀲𑀺𑀁, 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀦𑀺𑀩𑁆𑀩𑀢𑁄 [𑀯𑀡𑀺𑀩𑁆𑀩𑀺𑀦𑁄 (𑀲𑀻.), 𑀯𑀦𑀺𑀩𑁆𑀩𑀺𑀦𑁄 (𑀧𑀻.)].

𑁭𑁬. 𑀪𑀺𑀬𑁆𑀬𑁄 𑀫𑀁 𑀆𑀯𑀺𑀲𑀻 𑀧𑀻𑀢𑀺, 𑀲𑁄𑀫𑀦𑀲𑁆𑀲𑀜𑁆𑀘𑀦𑀧𑁆𑀧𑀓𑀁;

𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀤𑀼𑀢𑀺𑀬𑀁 𑀫𑁂 𑀉𑀧𑀧𑀚𑁆𑀚𑀣.

𑁭𑁭. 𑀥𑀫𑁆𑀫𑁂𑀦 𑀪𑀸𑀲𑀺𑀢𑀸 𑀕𑀸𑀣𑀸, 𑀲𑀺𑀯𑀻𑀦𑀁 𑀭𑀝𑁆𑀞𑀯𑀟𑁆𑀠𑀦;

𑀏𑀢𑀸𑀦𑀺 𑀢𑀯 𑀦𑁂𑀢𑁆𑀢𑀸𑀦𑀺, 𑀤𑀺𑀩𑁆𑀩𑀸𑀦𑀺 𑀧𑀝𑀺𑀤𑀺𑀲𑁆𑀲𑀭𑁂.

𑁭𑁮. 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀲𑁂𑀮𑀁, 𑀲𑀫𑀢𑀺𑀕𑁆𑀕𑀬𑁆𑀳 𑀧𑀩𑁆𑀩𑀢𑀁;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀤𑀲𑁆𑀲𑀦𑀁 𑀅𑀦𑀼𑀪𑁄𑀦𑁆𑀢𑀼 𑀢𑁂.

𑁭𑁯. 𑀓𑁄 𑀦𑀻𑀥 𑀯𑀺𑀢𑁆𑀢𑀁 𑀦 𑀤𑀤𑁂𑀬𑁆𑀬 𑀬𑀸𑀘𑀺𑀢𑁄, 𑀅𑀧𑀺 𑀯𑀺𑀲𑀺𑀝𑁆𑀞𑀁 𑀲𑀼𑀧𑀺𑀬𑀫𑁆𑀧𑀺 𑀅𑀢𑁆𑀢𑀦𑁄;

𑀢𑀤𑀺𑀗𑁆𑀖 𑀲𑀩𑁆𑀩𑁂 𑀲𑀺𑀯𑀬𑁄 𑀲𑀫𑀸𑀕𑀢𑀸, 𑀤𑀺𑀩𑁆𑀩𑀸𑀦𑀺 𑀦𑁂𑀢𑁆𑀢𑀸𑀦𑀺 𑀫𑀫𑀚𑁆𑀚 𑀧𑀲𑁆𑀲𑀣.

𑁮𑁦. 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀲𑁂𑀮𑀁, 𑀲𑀫𑀢𑀺𑀕𑁆𑀕𑀬𑁆𑀳 𑀧𑀩𑁆𑀩𑀢𑀁;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀤𑀲𑁆𑀲𑀦𑀁 𑀅𑀦𑀼𑀪𑁄𑀦𑁆𑀢𑀺 𑀫𑁂.

𑁮𑁧. 𑀦 𑀘𑀸𑀕𑀫𑀢𑁆𑀢𑀸 𑀧𑀭𑀫𑀢𑁆𑀣𑀺 𑀓𑀺𑀜𑁆𑀘𑀺, 𑀫𑀘𑁆𑀘𑀸𑀦𑀁 𑀇𑀥 𑀚𑀻𑀯𑀺𑀢𑁂;

𑀤𑀢𑁆𑀯𑀸𑀦 𑀫𑀸𑀦𑀼𑀲𑀁 [𑀤𑀢𑁆𑀯𑀸 𑀫𑀸𑀦𑀼𑀲𑀓𑀁 (𑀲𑀻.)] 𑀘𑀓𑁆𑀔𑀼𑀁, 𑀮𑀤𑁆𑀥𑀁 𑀫𑁂 [𑀫𑁂 𑀇𑀢𑀺 𑀧𑀤𑀁 𑀦𑀢𑁆𑀣𑀺 𑀲𑀻. 𑀧𑁄𑀢𑁆𑀣𑀓𑁂] 𑀘𑀓𑁆𑀔𑀼𑀁 𑀅𑀫𑀸𑀦𑀼𑀲𑀁.

𑁮𑁨. 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀲𑀺𑀯𑀬𑁄, 𑀤𑁂𑀣 𑀤𑀸𑀦𑀸𑀦𑀺 𑀪𑀼𑀜𑁆𑀚𑀣;

𑀤𑀢𑁆𑀯𑀸 𑀘 𑀪𑀼𑀢𑁆𑀯𑀸 𑀘 𑀬𑀣𑀸𑀦𑀼𑀪𑀸𑀯𑀁, 𑀅𑀦𑀺𑀦𑁆𑀤𑀺𑀢𑀸 𑀲𑀕𑁆𑀕𑀫𑀼𑀧𑁂𑀣 𑀞𑀸𑀦𑀦𑁆𑀢𑀺.

𑀲𑀺𑀯𑀺𑀚𑀸𑀢𑀓𑀁 𑀢𑀢𑀺𑀬𑀁.