𑁪𑁯𑁬. 𑀪𑀺𑀓𑁆𑀔𑀸𑀧𑀭𑀫𑁆𑀧𑀭𑀚𑀸𑀢𑀓𑀁 (𑁧𑁩)

𑁨𑁭𑁦. 𑀲𑀼𑀔𑀼𑀫𑀸𑀮𑀭𑀽𑀧𑀁 𑀤𑀺𑀲𑁆𑀯𑀸 [𑀤𑀺𑀲𑁆𑀯𑀸𑀦 (𑀓. 𑀲𑀻. 𑀅𑀝𑁆𑀞.)], 𑀭𑀝𑁆𑀞𑀸 𑀯𑀺𑀯𑀦𑀫𑀸𑀕𑀢𑀁;

𑀓𑀽𑀝𑀸𑀕𑀸𑀭𑀯𑀭𑀽𑀧𑁂𑀢𑀁, 𑀫𑀳𑀸𑀲𑀬𑀦𑀫𑀼𑀧𑀸𑀲𑀺𑀢𑀁 [𑀫𑀼𑀧𑁄𑀘𑀺𑀢𑀁 (𑀩𑀳𑀽𑀲𑀼)].

𑁨𑁭𑁧. 𑀢𑀲𑁆𑀲 𑀢𑁂 𑀧𑁂𑀫𑀓𑁂𑀦𑀸𑀳𑀁, 𑀅𑀤𑀸𑀲𑀺𑀁 𑀯𑀟𑁆𑀠𑀫𑁄𑀤𑀦𑀁 [𑀩𑀤𑁆𑀥𑀫𑁄𑀤𑀦𑀁 (𑀲𑀻. 𑀧𑀻.)];

𑀲𑀸𑀮𑀻𑀦𑀁 𑀯𑀺𑀘𑀺𑀢𑀁 𑀪𑀢𑁆𑀢𑀁, 𑀲𑀼𑀘𑀺𑀁 𑀫𑀁𑀲𑀽𑀧𑀲𑁂𑀘𑀦𑀁.

𑁨𑁭𑁨. 𑀢𑀁 𑀢𑁆𑀯𑀁 𑀪𑀢𑁆𑀢𑀁 𑀧𑀝𑀺𑀕𑁆𑀕𑀬𑁆𑀳, 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀤𑀸𑀲𑀬𑀺 [𑀅𑀤𑀸𑀧𑀬𑀺 (𑀲𑀻. 𑀲𑁆𑀬𑀸. 𑀧𑀻.)];

𑀅𑀢𑁆𑀢𑀸𑀦𑀁 [𑀅𑀢𑁆𑀢𑀦𑀸 (𑀧𑀻. 𑀅𑀝𑁆𑀞. 𑀧𑀸𑀞𑀦𑁆𑀢𑀭𑀁)] 𑀅𑀦𑀲𑀺𑀢𑁆𑀯𑀸𑀦, 𑀓𑁄𑀬𑀁 𑀥𑀫𑁆𑀫𑁄 𑀦𑀫𑀢𑁆𑀣𑀼 𑀢𑁂.

𑁨𑁭𑁩. 𑀆𑀘𑀭𑀺𑀬𑁄 𑀩𑁆𑀭𑀸𑀳𑁆𑀫𑀡𑁄 𑀫𑀬𑁆𑀳𑀁, 𑀓𑀺𑀘𑁆𑀘𑀸𑀓𑀺𑀘𑁆𑀘𑁂𑀲𑀼 𑀩𑁆𑀬𑀸𑀯𑀝𑁄 [𑀯𑀸𑀯𑀝𑁄 (𑀓.)];

𑀕𑀭𑀼 𑀘 𑀆𑀫𑀦𑁆𑀢𑀦𑀻𑀬𑁄 [𑀆𑀫𑀦𑁆𑀢𑀡𑀻𑀬𑁄 (𑀲𑀻. 𑀧𑀻.)] 𑀘, 𑀤𑀸𑀢𑀼𑀫𑀭𑀳𑀸𑀫𑀺 𑀪𑁄𑀚𑀦𑀁.

𑁨𑁭𑁪. 𑀩𑁆𑀭𑀸𑀳𑁆𑀫𑀡𑀁 𑀤𑀸𑀦𑀺 𑀧𑀼𑀘𑁆𑀙𑀸𑀫𑀺, 𑀕𑁄𑀢𑀫𑀁 𑀭𑀸𑀚𑀧𑀽𑀚𑀺𑀢𑀁;

𑀭𑀸𑀚𑀸 𑀢𑁂 𑀪𑀢𑁆𑀢𑀁 𑀧𑀸𑀤𑀸𑀲𑀺, 𑀲𑀼𑀘𑀺𑀁 𑀫𑀁𑀲𑀽𑀧𑀲𑁂𑀘𑀦𑀁.

𑁨𑁭𑁫. 𑀢𑀁 𑀢𑁆𑀯𑀁 𑀪𑀢𑁆𑀢𑀁 𑀧𑀝𑀺𑀕𑁆𑀕𑀬𑁆𑀳, 𑀇𑀲𑀺𑀲𑁆𑀲 𑀪𑁄𑀚𑀦𑀁 𑀅𑀤𑀸;

𑀅𑀔𑁂𑀢𑁆𑀢𑀜𑁆𑀜𑀽𑀲𑀺 𑀤𑀸𑀦𑀲𑁆𑀲, 𑀓𑁄𑀬𑀁 𑀥𑀫𑁆𑀫𑁄 𑀦𑀫𑀢𑁆𑀣𑀼 𑀢𑁂.

𑁨𑁭𑁬. 𑀪𑀭𑀸𑀫𑀺 𑀧𑀼𑀢𑁆𑀢 [𑀧𑀼𑀢𑁆𑀢𑁂 (𑀲𑀻. 𑀧𑀻.)] 𑀤𑀸𑀭𑁂 𑀘, 𑀖𑀭𑁂𑀲𑀼 𑀕𑀥𑀺𑀢𑁄 [𑀕𑀣𑀺𑀢𑁄 (𑀲𑀻. 𑀧𑀻.)] 𑀅𑀳𑀁;

𑀪𑀼𑀜𑁆𑀚𑁂 𑀫𑀸𑀦𑀼𑀲𑀓𑁂 𑀓𑀸𑀫𑁂, 𑀅𑀦𑀼𑀲𑀸𑀲𑀸𑀫𑀺 𑀭𑀸𑀚𑀺𑀦𑁄.

𑁨𑁭𑁭. 𑀆𑀭𑀜𑁆𑀜𑀺𑀓𑀲𑁆𑀲 [𑀆𑀭𑀜𑁆𑀜𑀓𑀲𑁆𑀲 (𑀲𑀻. 𑀧𑀻.)] 𑀇𑀲𑀺𑀦𑁄, 𑀘𑀺𑀭𑀭𑀢𑁆𑀢𑀁 𑀢𑀧𑀲𑁆𑀲𑀺𑀦𑁄;

𑀯𑀼𑀟𑁆𑀠𑀲𑁆𑀲 𑀪𑀸𑀯𑀺𑀢𑀢𑁆𑀢𑀲𑁆𑀲, 𑀤𑀸𑀢𑀼𑀫𑀭𑀳𑀸𑀫𑀺 𑀪𑁄𑀚𑀦𑀁.

𑁨𑁭𑁮. 𑀇𑀲𑀺𑀜𑁆𑀘 𑀤𑀸𑀦𑀺 𑀧𑀼𑀘𑁆𑀙𑀸𑀫𑀺, 𑀓𑀺𑀲𑀁 𑀥𑀫𑀦𑀺𑀲𑀦𑁆𑀣𑀢𑀁;

𑀧𑀭𑀽𑀴𑁆𑀳𑀓𑀘𑁆𑀙𑀦𑀔𑀮𑁄𑀫𑀁, 𑀧𑀗𑁆𑀓𑀤𑀦𑁆𑀢𑀁 𑀭𑀚𑀲𑁆𑀲𑀺𑀭𑀁.

𑁨𑁭𑁯. 𑀏𑀓𑁄 𑀅𑀭𑀜𑁆𑀜𑁂 𑀯𑀺𑀳𑀭𑀲𑀺 [𑀯𑀺𑀳𑀸𑀲𑀺 (𑀓.)], 𑀦𑀸𑀯𑀓𑀗𑁆𑀔𑀲𑀺 𑀚𑀻𑀯𑀺𑀢𑀁;

𑀪𑀺𑀓𑁆𑀔𑀼 𑀓𑁂𑀦 𑀢𑀬𑀸 𑀲𑁂𑀬𑁆𑀬𑁄, 𑀬𑀲𑁆𑀲 𑀢𑁆𑀯𑀁 𑀪𑁄𑀚𑀦𑀁 𑀅𑀤𑀸.

𑁨𑁮𑁦. 𑀔𑀡𑀦𑁆𑀢𑀸𑀮𑀼𑀓𑀮𑀫𑁆𑀩𑀸𑀦𑀺 [𑀔𑀡𑀫𑀸𑀮𑀼𑀓𑀮𑀫𑁆𑀩𑀸𑀦𑀺 (𑀲𑁆𑀬𑀸. 𑀓.)], 𑀩𑀺𑀮𑀸𑀮𑀺𑀢𑀓𑁆𑀓𑀮𑀸𑀦𑀺 𑀘 [𑀩𑀺𑀴𑀸𑀮𑀺𑀢𑀓𑁆𑀓𑀴𑀸𑀦𑀺 𑀘 (𑀲𑀻. 𑀧𑀻.)];

𑀥𑀼𑀦𑀁 𑀲𑀸𑀫𑀸𑀓𑀦𑀻𑀯𑀸𑀭𑀁, 𑀲𑀗𑁆𑀖𑀸𑀭𑀺𑀬𑀁 𑀧𑀲𑀸𑀭𑀺𑀬𑀁 [𑀲𑀁𑀳𑀸𑀭𑀺𑀬𑀁 𑀧𑀳𑀸𑀭𑀺𑀬𑀁 (𑀲𑁆𑀬𑀸.), 𑀲𑀁𑀲𑀸𑀭𑀺𑀬𑀁 𑀧𑀲𑀸𑀭𑀺𑀬𑀁 (𑀓.)].

𑁨𑁮𑁧. 𑀲𑀸𑀓𑀁 𑀪𑀺𑀲𑀁 𑀫𑀥𑀼𑀁 𑀫𑀁𑀲𑀁, 𑀩𑀤𑀭𑀸𑀫𑀮𑀓𑀸𑀦𑀺 𑀘;

𑀢𑀸𑀦𑀺 𑀆𑀳𑀭𑀺𑀢𑁆𑀯𑀸 [𑀆𑀳𑀢𑁆𑀯 (𑀲𑀻. 𑀲𑁆𑀬𑀸.)] 𑀪𑀼𑀜𑁆𑀚𑀸𑀫𑀺, 𑀅𑀢𑁆𑀣𑀺 𑀫𑁂 𑀲𑁄 𑀧𑀭𑀺𑀕𑁆𑀕𑀳𑁄.

𑁨𑁮𑁨. 𑀧𑀘𑀦𑁆𑀢𑁄 𑀅𑀧𑀘𑀦𑁆𑀢𑀲𑁆𑀲, 𑀅𑀫𑀫𑀲𑁆𑀲 𑀲𑀓𑀺𑀜𑁆𑀘𑀦𑁄 [𑀅𑀓𑀺𑀜𑁆𑀘𑀦𑁄 (𑀓.)];

𑀅𑀦𑀸𑀤𑀸𑀦𑀲𑁆𑀲 𑀲𑀸𑀤𑀸𑀦𑁄, 𑀤𑀸𑀢𑀼𑀫𑀭𑀳𑀸𑀫𑀺 𑀪𑁄𑀚𑀦𑀁.

𑁨𑁮𑁩. 𑀪𑀺𑀓𑁆𑀔𑀼𑀜𑁆𑀘 𑀤𑀸𑀦𑀺 𑀧𑀼𑀘𑁆𑀙𑀸𑀫𑀺, 𑀢𑀼𑀡𑁆𑀳𑀻𑀫𑀸𑀲𑀻𑀦 𑀲𑀼𑀩𑁆𑀩𑀢𑀁;

𑀇𑀲𑀺 𑀢𑁂 𑀪𑀢𑁆𑀢𑀁 𑀧𑀸𑀤𑀸𑀲𑀺, 𑀲𑀼𑀘𑀺𑀁 𑀫𑀁𑀲𑀽𑀧𑀲𑁂𑀘𑀦𑀁.

𑁨𑁮𑁪. 𑀢𑀁 𑀢𑁆𑀯𑀁 𑀪𑀢𑁆𑀢𑀁 𑀧𑀝𑀺𑀕𑁆𑀕𑀬𑁆𑀳, 𑀢𑀼𑀡𑁆𑀳𑀻 𑀪𑀼𑀜𑁆𑀚𑀲𑀺 𑀏𑀓𑀓𑁄;

𑀦𑀸𑀜𑁆𑀜𑀁 𑀓𑀜𑁆𑀘𑀺 [𑀓𑀺𑀜𑁆𑀘𑀺 (𑀓.)] 𑀦𑀺𑀫𑀦𑁆𑀢𑁂𑀲𑀺, 𑀓𑁄𑀬𑀁 𑀥𑀫𑁆𑀫𑁄 𑀦𑀫𑀢𑁆𑀣𑀼 𑀢𑁂.

𑁨𑁮𑁫. 𑀦 𑀧𑀘𑀸𑀫𑀺 𑀦 𑀧𑀸𑀘𑁂𑀫𑀺, 𑀦 𑀙𑀺𑀦𑁆𑀤𑀸𑀫𑀺 𑀦 𑀙𑁂𑀤𑀬𑁂;

𑀢𑀁 𑀫𑀁 𑀅𑀓𑀺𑀜𑁆𑀘𑀦𑀁 𑀜𑀢𑁆𑀯𑀸, 𑀲𑀩𑁆𑀩𑀧𑀸𑀧𑁂𑀳𑀺 𑀆𑀭𑀢𑀁.

𑁨𑁮𑁬. 𑀯𑀸𑀫𑁂𑀦 𑀪𑀺𑀓𑁆𑀔𑀫𑀸𑀤𑀸𑀬, 𑀤𑀓𑁆𑀔𑀺𑀡𑁂𑀦 𑀓𑀫𑀡𑁆𑀟𑀮𑀼𑀁;

𑀇𑀲𑀺 𑀫𑁂 𑀪𑀢𑁆𑀢𑀁 𑀧𑀸𑀤𑀸𑀲𑀺, 𑀲𑀼𑀘𑀺𑀁 𑀫𑀁𑀲𑀽𑀧𑀲𑁂𑀘𑀦𑀁.

𑁨𑁮𑁭. 𑀏𑀢𑁂 𑀳𑀺 𑀤𑀸𑀢𑀼𑀫𑀭𑀳𑀦𑁆𑀢𑀺, 𑀲𑀫𑀫𑀸 𑀲𑀧𑀭𑀺𑀕𑁆𑀕𑀳𑀸;

𑀧𑀘𑁆𑀘𑀦𑀻𑀓𑀫𑀳𑀁 𑀫𑀜𑁆𑀜𑁂, 𑀬𑁄 𑀤𑀸𑀢𑀸𑀭𑀁 𑀦𑀺𑀫𑀦𑁆𑀢𑀬𑁂.

𑁨𑁮𑁮. 𑀅𑀢𑁆𑀣𑀸𑀬 𑀯𑀢 𑀫𑁂 𑀅𑀚𑁆𑀚, 𑀇𑀥𑀸𑀕𑀘𑁆𑀙𑀺 𑀭𑀣𑁂𑀲𑀪𑁄;

𑀲𑁄𑀳𑀁 𑀅𑀚𑁆𑀚 𑀧𑀚𑀸𑀦𑀸𑀫𑀺 [𑀇𑀢𑁄 𑀧𑀼𑀩𑁆𑀩𑁂 𑀦 𑀚𑀸𑀦𑀸𑀫𑀺 (𑀲𑀻. 𑀧𑀻.)], 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁.

𑁨𑁮𑁯. 𑀭𑀝𑁆𑀞𑁂𑀲𑀼 𑀕𑀺𑀤𑁆𑀥𑀸 𑀭𑀸𑀚𑀸𑀦𑁄, 𑀓𑀺𑀘𑁆𑀘𑀸𑀓𑀺𑀘𑁆𑀘𑁂𑀲𑀼 𑀩𑁆𑀭𑀸𑀳𑁆𑀫𑀡𑀸;

𑀇𑀲𑀻 𑀫𑀽𑀮𑀨𑀮𑁂 𑀕𑀺𑀤𑁆𑀥𑀸, 𑀯𑀺𑀧𑁆𑀧𑀫𑀼𑀢𑁆𑀢𑀸 𑀘 𑀪𑀺𑀓𑁆𑀔𑀯𑁄𑀢𑀺.

𑀪𑀺𑀓𑁆𑀔𑀸𑀧𑀭𑀫𑁆𑀧𑀭𑀚𑀸𑀢𑀓𑀁 𑀢𑁂𑀭𑀲𑀫𑀁.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀼𑀯 𑀓𑀺𑀦𑁆𑀦𑀭 𑀫𑀼𑀓𑁆𑀓 𑀔𑀭𑀸𑀚𑀺𑀦𑀲𑁄, 𑀪𑀺𑀲𑀚𑀸𑀢 𑀫𑀳𑁂𑀲𑀺 𑀓𑀧𑁄𑀢𑀯𑀭𑁄;

𑀅𑀣 𑀫𑁄𑀭 𑀲𑀢𑀘𑁆𑀙𑀓 𑀯𑀸𑀡𑀺𑀚𑀓𑁄, 𑀅𑀣 𑀭𑀸𑀚 𑀲𑀩𑁆𑀭𑀸𑀳𑁆𑀫𑀡 𑀪𑀺𑀓𑁆𑀔𑀧𑀭𑀦𑁆𑀢𑀺.

𑀧𑀓𑀺𑀡𑁆𑀡𑀓𑀦𑀺𑀧𑀸𑀢𑀁 𑀦𑀺𑀝𑁆𑀞𑀺𑀢𑀁.