𑁪𑁯𑁩. 𑀫𑀳𑀸𑀯𑀸𑀡𑀺𑀚𑀚𑀸𑀢𑀓𑀁 (𑁧𑁦)

𑁧𑁮𑁦. 𑀯𑀸𑀡𑀺𑀚𑀸 𑀲𑀫𑀺𑀢𑀺𑀁 𑀓𑀢𑁆𑀯𑀸, 𑀦𑀸𑀦𑀸𑀭𑀝𑁆𑀞𑀢𑁄 𑀆𑀕𑀢𑀸;

𑀥𑀦𑀸𑀳𑀭𑀸 𑀧𑀓𑁆𑀓𑀫𑀺𑀁𑀲𑀼, 𑀏𑀓𑀁 𑀓𑀢𑁆𑀯𑀸𑀦 𑀕𑀸𑀫𑀡𑀺𑀁.

𑁧𑁮𑁧. 𑀢𑁂 𑀢𑀁 𑀓𑀦𑁆𑀢𑀸𑀭𑀫𑀸𑀕𑀫𑁆𑀫, 𑀅𑀧𑁆𑀧𑀪𑀓𑁆𑀔𑀁 𑀅𑀦𑁄𑀤𑀓𑀁;

𑀫𑀳𑀸𑀦𑀺𑀕𑁆𑀭𑁄𑀥𑀫𑀤𑁆𑀤𑀓𑁆𑀔𑀼𑀁, 𑀲𑀻𑀢𑀘𑁆𑀙𑀸𑀬𑀁 𑀫𑀦𑁄𑀭𑀫𑀁.

𑁧𑁮𑁨. 𑀢𑁂 𑀘 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸, 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀙𑀸𑀬𑀬𑀸 [𑀙𑀸𑀤𑀺𑀬𑀸 (𑀲𑀻. 𑀲𑁆𑀬𑀸. 𑀧𑀻.)];

𑀯𑀸𑀡𑀺𑀚𑀸 𑀲𑀫𑀘𑀺𑀦𑁆𑀢𑁂𑀲𑀼𑀁, 𑀩𑀸𑀮𑀸 𑀫𑁄𑀳𑁂𑀦 𑀧𑀸𑀭𑀼𑀢𑀸.

𑁧𑁮𑁩. 𑀅𑀮𑁆𑀮𑀸𑀬𑀢𑁂 [𑀅𑀤𑁆𑀤𑀸𑀬𑀢𑁂 (𑀲𑀻. 𑀧𑀻.)] 𑀅𑀬𑀁 𑀭𑀼𑀓𑁆𑀔𑁄, 𑀅𑀧𑀺 𑀯𑀸𑀭𑀻𑀯 [𑀯𑀸𑀭𑀺 𑀘 (𑀲𑀻. 𑀧𑀻.)] 𑀲𑀦𑁆𑀤𑀢𑀺;

𑀇𑀗𑁆𑀖𑀲𑁆𑀲 𑀧𑀼𑀭𑀺𑀫𑀁 𑀲𑀸𑀔𑀁, 𑀫𑀬𑀁 𑀙𑀺𑀦𑁆𑀤𑀸𑀫 𑀯𑀸𑀡𑀺𑀚𑀸.

𑁧𑁮𑁪. 𑀲𑀸 𑀘 𑀙𑀺𑀦𑁆𑀦𑀸𑀯 𑀧𑀕𑁆𑀖𑀭𑀺, 𑀅𑀘𑁆𑀙𑀁 𑀯𑀸𑀭𑀺𑀁 𑀅𑀦𑀸𑀯𑀺𑀮𑀁;

𑀢𑁂 𑀢𑀢𑁆𑀣 𑀦𑁆𑀳𑀢𑁆𑀯𑀸 𑀧𑀺𑀯𑀺𑀢𑁆𑀯𑀸, 𑀬𑀸𑀯𑀢𑀺𑀘𑁆𑀙𑀺𑀁𑀲𑀼 𑀯𑀸𑀡𑀺𑀚𑀸.

𑁧𑁮𑁫. 𑀤𑀼𑀢𑀺𑀬𑀁 𑀲𑀫𑀘𑀺𑀦𑁆𑀢𑁂𑀲𑀼𑀁, 𑀩𑀸𑀮𑀸 𑀫𑁄𑀳𑁂𑀦 𑀧𑀸𑀭𑀼𑀢𑀸;

𑀇𑀗𑁆𑀖𑀲𑁆𑀲 𑀤𑀓𑁆𑀔𑀺𑀡𑀁 𑀲𑀸𑀔𑀁, 𑀫𑀬𑀁 𑀙𑀺𑀦𑁆𑀤𑀸𑀫 𑀯𑀸𑀡𑀺𑀚𑀸.

𑁧𑁮𑁬. 𑀲𑀸 𑀘 𑀙𑀺𑀦𑁆𑀦𑀸𑀯 𑀧𑀕𑁆𑀖𑀭𑀺, 𑀲𑀸𑀮𑀺𑀫𑀁𑀲𑁄𑀤𑀦𑀁 𑀩𑀳𑀼𑀁;

𑀅𑀧𑁆𑀧𑁄𑀤𑀯𑀡𑁆𑀡𑁂 𑀓𑀼𑀫𑁆𑀫𑀸𑀲𑁂, 𑀲𑀺𑀗𑁆𑀕𑀺𑀁 𑀯𑀺𑀤𑀮𑀲𑀽𑀧𑀺𑀬𑁄 [𑀲𑀺𑀗𑁆𑀕𑀺𑀁 𑀩𑀺𑀤𑀮𑀲𑀽𑀧𑀺𑀬𑁄 (𑀲𑀻. 𑀧𑀻.), 𑀲𑀺𑀗𑁆𑀕𑀻𑀯𑁂𑀭𑀁 𑀮𑀲𑀽𑀧𑀺𑀬𑁄 (𑀓.) 𑀲𑀺𑀗𑁆𑀕𑀻𑀦𑁆𑀢𑀺 𑀲𑀺𑀗𑁆𑀕𑀻𑀯𑁂𑀭𑀸𑀤𑀺𑀓𑀁 𑀉𑀢𑁆𑀢𑀭𑀺𑀪𑀗𑁆𑀕𑀁; 𑀯𑀺𑀤𑀮𑀲𑀽𑀧𑀺𑀬𑁄𑀢𑀺 𑀫𑀼𑀕𑁆𑀕𑀲𑀽𑀧𑀸𑀤𑀬𑁄 (𑀅𑀝𑁆𑀞.) 𑀯𑀺𑀤𑀮𑀁 𑀓𑀮𑀸𑀬𑀸𑀤𑀺𑀫𑁆𑀳𑀺 𑀯𑀢𑁆𑀢𑀢𑀻𑀢𑀺 𑀲𑀓𑁆𑀓𑀢𑀸𑀪𑀺𑀥𑀸𑀦𑁂].

𑁧𑁮𑁭. 𑀢𑁂 𑀢𑀢𑁆𑀣 𑀪𑀼𑀢𑁆𑀯𑀸 𑀔𑀸𑀤𑀺𑀢𑁆𑀯𑀸 [𑀪𑀼𑀢𑁆𑀯𑀸 𑀘 𑀧𑀺𑀯𑀺𑀢𑁆𑀯𑀸 𑀘 (𑀧𑀻.)], 𑀬𑀸𑀯𑀢𑀺𑀘𑁆𑀙𑀺𑀁𑀲𑀼 𑀯𑀸𑀡𑀺𑀚𑀸;

𑀢𑀢𑀺𑀬𑀁 𑀲𑀫𑀘𑀺𑀦𑁆𑀢𑁂𑀲𑀼𑀁, 𑀩𑀸𑀮𑀸 𑀫𑁄𑀳𑁂𑀦 𑀧𑀸𑀭𑀼𑀢𑀸;

𑀇𑀗𑁆𑀖𑀲𑁆𑀲 𑀧𑀘𑁆𑀙𑀺𑀫𑀁 𑀲𑀸𑀔𑀁, 𑀫𑀬𑀁 𑀙𑀺𑀦𑁆𑀤𑀸𑀫 𑀯𑀸𑀡𑀺𑀚𑀸.

𑁧𑁮𑁮. 𑀲𑀸 𑀘 𑀙𑀺𑀦𑁆𑀦𑀸𑀯 𑀧𑀕𑁆𑀖𑀭𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀯𑀺𑀘𑀺𑀢𑁆𑀭𑀯𑀢𑁆𑀣𑀸𑀪𑀭𑀡𑀸, 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸.

𑁧𑁮𑁯. 𑀅𑀧𑀺 𑀲𑀼 𑀯𑀸𑀡𑀺𑀚𑀸 𑀏𑀓𑀸, 𑀦𑀸𑀭𑀺𑀬𑁄 𑀧𑀡𑁆𑀡𑀯𑀻𑀲𑀢𑀺;

𑀲𑀫𑀦𑁆𑀢𑀸 𑀧𑀭𑀺𑀯𑀸𑀭𑀺𑀁𑀲𑀼 [𑀧𑀭𑀺𑀓𑀭𑀺𑀁𑀲𑀼 (𑀲𑀻. 𑀲𑁆𑀬𑀸. 𑀧𑀻.)], 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀙𑀸𑀬𑀬𑀸 [𑀙𑀸𑀤𑀺𑀬𑀸 (𑀲𑀻. 𑀲𑁆𑀬𑀸. 𑀧𑀻.)].

𑁧𑁯𑁦. 𑀢𑁂 𑀢𑀸𑀳𑀺 𑀧𑀭𑀺𑀘𑀸𑀭𑁂𑀢𑁆𑀯𑀸 [𑀧𑀭𑀺𑀯𑀸𑀭𑁂𑀢𑁆𑀯𑀸 (𑀲𑀻. 𑀲𑁆𑀬𑀸. 𑀧𑀻.)], 𑀬𑀸𑀯𑀢𑀺𑀘𑁆𑀙𑀺𑀁𑀲𑀼 𑀯𑀸𑀡𑀺𑀚𑀸;

𑀘𑀢𑀼𑀢𑁆𑀣𑀁 𑀲𑀫𑀘𑀺𑀦𑁆𑀢𑁂𑀲𑀼𑀁, 𑀩𑀸𑀮𑀸 𑀫𑁄𑀳𑁂𑀦 𑀧𑀸𑀭𑀼𑀢𑀸;

𑀇𑀗𑁆𑀖𑀲𑁆𑀲 𑀉𑀢𑁆𑀢𑀭𑀁 𑀲𑀸𑀔𑀁, 𑀫𑀬𑀁 𑀙𑀺𑀦𑁆𑀤𑀸𑀫 𑀯𑀸𑀡𑀺𑀚𑀸.

𑁧𑁯𑁧. 𑀲𑀸 𑀘 𑀙𑀺𑀦𑁆𑀦𑀸𑀯 𑀧𑀕𑁆𑀖𑀭𑀺, 𑀫𑀼𑀢𑁆𑀢𑀸 𑀯𑁂𑀴𑀼𑀭𑀺𑀬𑀸 𑀩𑀳𑀽;

𑀭𑀚𑀢𑀁 𑀚𑀸𑀢𑀭𑀽𑀧𑀜𑁆𑀘, 𑀓𑀼𑀢𑁆𑀢𑀺𑀬𑁄 𑀧𑀝𑀺𑀬𑀸𑀦𑀺 𑀘.

𑁧𑁯𑁨. 𑀓𑀸𑀲𑀺𑀓𑀸𑀦𑀺 𑀘 𑀯𑀢𑁆𑀣𑀸𑀦𑀺, 𑀉𑀤𑁆𑀤𑀺𑀬𑀸𑀦𑀺 𑀘 𑀓𑀫𑁆𑀩𑀮𑀸 [𑀉𑀤𑁆𑀤𑀺𑀬𑀸𑀦𑁂 𑀘 𑀓𑀫𑁆𑀩𑀮𑁂 (𑀲𑀻. 𑀧𑀻.)];

𑀢𑁂 𑀢𑀢𑁆𑀣 𑀪𑀸𑀭𑁂 𑀩𑀦𑁆𑀥𑀺𑀢𑁆𑀯𑀸, 𑀬𑀸𑀯𑀢𑀺𑀘𑁆𑀙𑀺𑀁𑀲𑀼 𑀯𑀸𑀡𑀺𑀚𑀸.

𑁧𑁯𑁩. 𑀧𑀜𑁆𑀘𑀫𑀁 𑀲𑀫𑀘𑀺𑀦𑁆𑀢𑁂𑀲𑀼𑀁, 𑀩𑀸𑀮𑀸 𑀫𑁄𑀳𑁂𑀦 𑀧𑀸𑀭𑀼𑀢𑀸;

𑀇𑀗𑁆𑀖𑀲𑁆𑀲 𑀫𑀽𑀮𑁂 [𑀫𑀽𑀮𑀁 (𑀲𑀻. 𑀧𑀻. 𑀓.)] 𑀙𑀺𑀦𑁆𑀤𑀸𑀫, 𑀅𑀧𑀺 𑀪𑀺𑀬𑁆𑀬𑁄 𑀮𑀪𑀸𑀫𑀲𑁂.

𑁧𑁯𑁪. 𑀅𑀣𑀼𑀝𑁆𑀞𑀳𑀺 𑀲𑀢𑁆𑀣𑀯𑀸𑀳𑁄, 𑀬𑀸𑀘𑀫𑀸𑀦𑁄 𑀓𑀢𑀜𑁆𑀚𑀮𑀻;

𑀦𑀺𑀕𑁆𑀭𑁄𑀥𑁄 𑀓𑀺𑀁 𑀧𑀭𑀚𑁆𑀛𑀢𑀺 [𑀅𑀧𑀭𑀚𑁆𑀛𑀣 (𑀲𑀻.), 𑀅𑀧𑀭𑀚𑁆𑀛𑀢𑀺 (𑀲𑁆𑀬𑀸. 𑀧𑀻.)], 𑀯𑀸𑀡𑀺𑀚𑀸 𑀪𑀤𑁆𑀤𑀫𑀢𑁆𑀣𑀼 𑀢𑁂.

𑁧𑁯𑁫. 𑀯𑀸𑀭𑀺𑀤𑀸 𑀧𑀼𑀭𑀺𑀫𑀸 𑀲𑀸𑀔𑀸, 𑀅𑀦𑁆𑀦𑀧𑀸𑀦𑀜𑁆𑀘 𑀤𑀓𑁆𑀔𑀺𑀡𑀸;

𑀦𑀸𑀭𑀺𑀤𑀸 𑀧𑀘𑁆𑀙𑀺𑀫𑀸 𑀲𑀸𑀔𑀸, 𑀲𑀩𑁆𑀩𑀓𑀸𑀫𑁂 𑀘 𑀉𑀢𑁆𑀢𑀭𑀸;

𑀦𑀺𑀕𑁆𑀭𑁄𑀥𑁄 𑀓𑀺𑀁 𑀧𑀭𑀚𑁆𑀛𑀢𑀺, 𑀯𑀸𑀡𑀺𑀚𑀸 𑀪𑀤𑁆𑀤𑀫𑀢𑁆𑀣𑀼 𑀢𑁂.

𑁧𑁯𑁬. 𑀬𑀲𑁆𑀲 𑀭𑀼𑀓𑁆𑀔𑀲𑁆𑀲 𑀙𑀸𑀬𑀸𑀬, 𑀦𑀺𑀲𑀻𑀤𑁂𑀬𑁆𑀬 𑀲𑀬𑁂𑀬𑁆𑀬 𑀯𑀸;

𑀦 𑀢𑀲𑁆𑀲 𑀲𑀸𑀔𑀁 𑀪𑀜𑁆𑀚𑁂𑀬𑁆𑀬, 𑀫𑀺𑀢𑁆𑀢𑀤𑀼𑀩𑁆𑀪𑁄 𑀳𑀺 𑀧𑀸𑀧𑀓𑁄.

𑁧𑁯𑁭. 𑀢𑁂 𑀘 𑀢𑀲𑁆𑀲𑀸𑀦𑀸𑀤𑀺𑀬𑀺𑀢𑁆𑀯𑀸 [𑀢𑀲𑁆𑀲 𑀅𑀦𑀸𑀤𑀺𑀢𑁆𑀯𑀸 (𑀲𑀻. 𑀲𑁆𑀬𑀸.)], 𑀏𑀓𑀲𑁆𑀲 𑀯𑀘𑀦𑀁 𑀩𑀳𑀽;

𑀦𑀺𑀲𑀺𑀢𑀸𑀳𑀺 𑀓𑀼𑀞𑀸𑀭𑀻𑀳𑀺 [𑀓𑀼𑀥𑀸𑀭𑀻𑀳𑀺 (𑀓.)], 𑀫𑀽𑀮𑀢𑁄 𑀦𑀁 𑀉𑀧𑀓𑁆𑀓𑀫𑀼𑀁.

𑁧𑁯𑁮. 𑀢𑀢𑁄 𑀦𑀸𑀕𑀸 𑀦𑀺𑀓𑁆𑀔𑀫𑀺𑀁𑀲𑀼, 𑀲𑀦𑁆𑀦𑀤𑁆𑀥𑀸 𑀧𑀡𑁆𑀡𑀯𑀻𑀲𑀢𑀺;

𑀥𑀦𑀼𑀕𑁆𑀕𑀳𑀸𑀦𑀁 𑀢𑀺𑀲𑀢𑀸, 𑀙𑀲𑀳𑀲𑁆𑀲𑀸 𑀘 𑀯𑀫𑁆𑀫𑀺𑀦𑁄.

𑁧𑁯𑁯. 𑀏𑀢𑁂 𑀳𑀦𑀣 𑀩𑀦𑁆𑀥𑀣, 𑀫𑀸 𑀯𑁄 𑀫𑀼𑀜𑁆𑀘𑀺𑀢𑁆𑀣 [𑀫𑀼𑀘𑁆𑀘𑀺𑀢𑁆𑀣 (𑀧𑀻.)] 𑀚𑀻𑀯𑀺𑀢𑀁;

𑀞𑀧𑁂𑀢𑁆𑀯𑀸 𑀲𑀢𑁆𑀣𑀯𑀸𑀳𑀁𑀯, 𑀲𑀩𑁆𑀩𑁂 𑀪𑀲𑁆𑀫𑀁 [𑀪𑀲𑁆𑀫𑀻 (𑀲𑀻.)] 𑀓𑀭𑁄𑀣 𑀦𑁂.

𑁨𑁦𑁦. 𑀢𑀲𑁆𑀫𑀸 𑀳𑀺 𑀧𑀡𑁆𑀟𑀺𑀢𑁄 𑀧𑁄𑀲𑁄, 𑀲𑀫𑁆𑀧𑀲𑁆𑀲𑀁 𑀅𑀢𑁆𑀣𑀫𑀢𑁆𑀢𑀦𑁄;

𑀮𑁄𑀪𑀲𑁆𑀲 𑀦 𑀯𑀲𑀁 𑀕𑀘𑁆𑀙𑁂, 𑀳𑀦𑁂𑀬𑁆𑀬𑀸𑀭𑀺𑀲𑀓𑀁 [𑀳𑀦𑁂𑀬𑁆𑀬 𑀤𑀺𑀲𑀢𑀁 (𑀲𑀻.), 𑀳𑀦𑁂𑀬𑁆𑀬 𑀤𑀺𑀲𑀓𑀁 (𑀲𑁆𑀬𑀸.)] 𑀫𑀦𑀁.

𑁨𑁦𑁧. 𑀏𑀯 [𑀏𑀢 (𑀲𑀻. 𑀧𑀻.)] 𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀢𑀡𑁆𑀳𑀸 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑀁;

𑀯𑀻𑀢𑀢𑀡𑁆𑀳𑁄 𑀅𑀦𑀸𑀤𑀸𑀦𑁄, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂𑀢𑀺.

𑀫𑀳𑀸𑀯𑀸𑀡𑀺𑀚𑀚𑀸𑀢𑀓𑀁 𑀤𑀲𑀫𑀁.