𑁪𑁯𑁪. 𑀲𑀸𑀥𑀺𑀦𑀚𑀸𑀢𑀓𑀁 (𑁧𑁧)

𑁨𑁦𑁨. 𑀅𑀩𑁆𑀪𑀼𑀢𑁄 𑀯𑀢 𑀮𑁄𑀓𑀲𑁆𑀫𑀺𑀁, 𑀉𑀧𑁆𑀧𑀚𑁆𑀚𑀺 𑀮𑁄𑀫𑀳𑀁𑀲𑀦𑁄;

𑀤𑀺𑀩𑁆𑀩𑁄 𑀭𑀣𑁄 𑀧𑀸𑀢𑀼𑀭𑀳𑀼, 𑀯𑁂𑀤𑁂𑀳𑀲𑁆𑀲 𑀬𑀲𑀲𑁆𑀲𑀺𑀦𑁄.

𑁨𑁦𑁩. 𑀤𑁂𑀯𑀧𑀼𑀢𑁆𑀢𑁄 𑀫𑀳𑀺𑀤𑁆𑀥𑀺𑀓𑁄, 𑀫𑀸𑀢𑀮𑀺 [𑀫𑀸𑀢𑀮𑀻 (𑀲𑀻.)] 𑀤𑁂𑀯𑀲𑀸𑀭𑀣𑀺;

𑀦𑀺𑀫𑀦𑁆𑀢𑀬𑀺𑀢𑁆𑀣 𑀭𑀸𑀚𑀸𑀦𑀁, 𑀯𑁂𑀤𑁂𑀳𑀁 𑀫𑀺𑀣𑀺𑀮𑀕𑁆𑀕𑀳𑀁.

𑁨𑁦𑁪. 𑀏𑀳𑀺𑀫𑀁 𑀭𑀣𑀫𑀸𑀭𑀼𑀬𑁆𑀳, 𑀭𑀸𑀚𑀲𑁂𑀝𑁆𑀞 𑀤𑀺𑀲𑀫𑁆𑀧𑀢𑀺;

𑀤𑁂𑀯𑀸 𑀤𑀲𑁆𑀲𑀦𑀓𑀸𑀫𑀸 𑀢𑁂, 𑀢𑀸𑀯𑀢𑀺𑀁𑀲𑀸 𑀲𑀇𑀦𑁆𑀤𑀓𑀸;

𑀲𑀭𑀫𑀸𑀦𑀸 𑀳𑀺 𑀢𑁂 𑀤𑁂𑀯𑀸, 𑀲𑀼𑀥𑀫𑁆𑀫𑀸𑀬𑀁 𑀲𑀫𑀘𑁆𑀙𑀭𑁂.

𑁨𑁦𑁫. 𑀢𑀢𑁄 𑀘 𑀭𑀸𑀚𑀸 𑀲𑀸𑀥𑀺𑀦𑁄 [𑀲𑀸𑀥𑀻𑀦𑁄 (𑀲𑀻. 𑀧𑀻.)], 𑀯𑁂𑀤𑁂𑀳𑁄 𑀫𑀺𑀣𑀺𑀮𑀕𑁆𑀕𑀳𑁄 [𑀧𑀫𑀼𑀔𑁄 𑀭𑀣𑀫𑀸𑀭𑀼𑀳𑀺 (𑀲𑀻. 𑀧𑀻.)];

𑀲𑀳𑀲𑁆𑀲𑀬𑀼𑀢𑁆𑀢𑀫𑀸𑀭𑀼𑀬𑁆𑀳 [𑀬𑀼𑀢𑁆𑀢𑀁 𑀅𑀪𑀺𑀭𑀼𑀬𑁆𑀳 (𑀲𑀻.)], 𑀅𑀕𑀸 𑀤𑁂𑀯𑀸𑀦 𑀲𑀦𑁆𑀢𑀺𑀓𑁂;

𑀢𑀁 𑀤𑁂𑀯𑀸 𑀧𑀝𑀺𑀦𑀦𑁆𑀤𑀺𑀁𑀲𑀼, 𑀤𑀺𑀲𑁆𑀯𑀸 𑀭𑀸𑀚𑀸𑀦𑀫𑀸𑀕𑀢𑀁.

𑁨𑁦𑁬. 𑀲𑁆𑀯𑀸𑀕𑀢𑀁 𑀢𑁂 𑀫𑀳𑀸𑀭𑀸𑀚, 𑀅𑀣𑁄 𑀢𑁂 𑀅𑀤𑀼𑀭𑀸𑀕𑀢𑀁;

𑀦𑀺𑀲𑀻𑀤 𑀤𑀸𑀦𑀺 𑀭𑀸𑀚𑀻𑀲𑀺 [𑀭𑀸𑀚𑀺𑀲𑀺 (𑀲𑀻. 𑀲𑁆𑀬𑀸. 𑀧𑀻.)], 𑀤𑁂𑀯𑀭𑀸𑀚𑀲𑁆𑀲 𑀲𑀦𑁆𑀢𑀺𑀓𑁂.

𑁨𑁦𑁭. 𑀲𑀓𑁆𑀓𑁄𑀧𑀺 𑀧𑀝𑀺𑀦𑀦𑁆𑀤𑀺𑀢𑁆𑀣, 𑀯𑁂𑀤𑁂𑀳𑀁 𑀫𑀺𑀣𑀺𑀮𑀕𑁆𑀕𑀳𑀁;

𑀦𑀺𑀫𑀦𑁆𑀢𑀬𑀺𑀢𑁆𑀣 [𑀦𑀺𑀫𑀦𑁆𑀢𑀬𑀻 𑀘 (𑀲𑀻. 𑀧𑀻.)] 𑀓𑀸𑀫𑁂𑀳𑀺, 𑀆𑀲𑀦𑁂𑀦 𑀘 𑀯𑀸𑀲𑀯𑁄.

𑁨𑁦𑁮. 𑀲𑀸𑀥𑀼 𑀔𑁄𑀲𑀺 𑀅𑀦𑀼𑀧𑁆𑀧𑀢𑁆𑀢𑁄, 𑀆𑀯𑀸𑀲𑀁 𑀯𑀲𑀯𑀢𑁆𑀢𑀺𑀦𑀁;

𑀯𑀲 𑀤𑁂𑀯𑁂𑀲𑀼 𑀭𑀸𑀚𑀻𑀲𑀺, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀲𑀼;

𑀢𑀸𑀯𑀢𑀺𑀁𑀲𑁂𑀲𑀼 𑀤𑁂𑀯𑁂𑀲𑀼, 𑀪𑀼𑀜𑁆𑀚 𑀓𑀸𑀫𑁂 𑀅𑀫𑀸𑀦𑀼𑀲𑁂.

𑁨𑁦𑁯. 𑀅𑀳𑀁 𑀧𑀼𑀭𑁂 𑀲𑀕𑁆𑀕𑀕𑀢𑁄 𑀭𑀫𑀸𑀫𑀺, 𑀦𑀘𑁆𑀘𑁂𑀳𑀺 𑀕𑀻𑀢𑁂𑀳𑀺 𑀘 𑀯𑀸𑀤𑀺𑀢𑁂𑀳𑀺;

𑀲𑁄 𑀤𑀸𑀦𑀺 𑀅𑀚𑁆𑀚 𑀦 𑀭𑀫𑀸𑀫𑀺 𑀲𑀕𑁆𑀕𑁂, 𑀆𑀬𑀼𑀁 𑀦𑀼 𑀔𑀻𑀡𑁄 [𑀔𑀻𑀡𑀁 (𑀲𑁆𑀬𑀸.)] 𑀫𑀭𑀡𑀁 𑀦𑀼 𑀲𑀦𑁆𑀢𑀺𑀓𑁂;

𑀉𑀤𑀸𑀳𑀼 𑀫𑀽𑀴𑁆𑀳𑁄𑀲𑁆𑀫𑀺 𑀚𑀦𑀺𑀦𑁆𑀤𑀲𑁂𑀝𑁆𑀞.

𑁨𑁧𑁦. 𑀦 𑀢𑀸𑀬𑀼 [𑀦 𑀘𑀸𑀬𑀼 (𑀲𑀻. 𑀧𑀻. 𑀓.)] 𑀔𑀻𑀡𑀁 𑀫𑀭𑀡𑀜𑁆𑀘 [𑀫𑀭𑀡𑀁 𑀢𑁂 (𑀲𑀻. 𑀧𑀻.)] 𑀤𑀽𑀭𑁂, 𑀦 𑀘𑀸𑀧𑀺 𑀫𑀽𑀴𑁆𑀳𑁄 𑀦𑀭𑀯𑀻𑀭𑀲𑁂𑀝𑁆𑀞;

𑀢𑀼𑀬𑁆𑀳𑀜𑁆𑀘 [𑀢𑀯𑀜𑁆𑀘 (𑀲𑀻. 𑀧𑀻.), 𑀢𑀯 𑀘 (𑀓.)] 𑀧𑀼𑀜𑁆𑀜𑀸𑀦𑀺 𑀧𑀭𑀺𑀢𑁆𑀢𑀓𑀸𑀦𑀺, 𑀬𑁂𑀲𑀁 𑀯𑀺𑀧𑀸𑀓𑀁 𑀇𑀥 𑀯𑁂𑀤𑀬𑀺𑀢𑁆𑀣𑁄 [𑀯𑁂𑀤𑀬𑀢𑁄 (𑀧𑀻. 𑀓.)].

𑁨𑁧𑁧. 𑀯𑀲 𑀤𑁂𑀯𑀸𑀦𑀼𑀪𑀸𑀯𑁂𑀦, 𑀭𑀸𑀚𑀲𑁂𑀝𑁆𑀞 𑀤𑀺𑀲𑀫𑁆𑀧𑀢𑀺;

𑀢𑀸𑀯𑀢𑀺𑀁𑀲𑁂𑀲𑀼 𑀤𑁂𑀯𑁂𑀲𑀼, 𑀪𑀼𑀜𑁆𑀚 𑀓𑀸𑀫𑁂 𑀅𑀫𑀸𑀦𑀼𑀲𑁂.

𑁨𑁧𑁨. 𑀬𑀣𑀸 𑀬𑀸𑀘𑀺𑀢𑀓𑀁 𑀬𑀸𑀦𑀁, 𑀬𑀣𑀸 𑀬𑀸𑀘𑀺𑀢𑀓𑀁 𑀥𑀦𑀁;

𑀏𑀯𑀁 𑀲𑀫𑁆𑀧𑀤𑀫𑁂𑀯𑁂𑀢𑀁, 𑀬𑀁 𑀧𑀭𑀢𑁄 𑀤𑀸𑀦𑀧𑀘𑁆𑀘𑀬𑀸.

𑁨𑁧𑁩. 𑀦 𑀘𑀸𑀳𑀫𑁂𑀢𑀫𑀺𑀘𑁆𑀙𑀸𑀫𑀺, 𑀬𑀁 𑀧𑀭𑀢𑁄 𑀤𑀸𑀦𑀧𑀘𑁆𑀘𑀬𑀸;

𑀲𑀬𑀁𑀓𑀢𑀸𑀦𑀺 𑀧𑀼𑀜𑁆𑀜𑀸𑀦𑀺, 𑀢𑀁 𑀫𑁂 𑀆𑀯𑁂𑀡𑀺𑀓𑀁 [𑀆𑀯𑁂𑀡𑀺𑀬𑀁 (𑀲𑀻. 𑀲𑁆𑀬𑀸. 𑀧𑀻.), 𑀆𑀯𑁂𑀦𑀺𑀓𑀁 (𑀓.)] 𑀥𑀦𑀁.

𑁨𑁧𑁪. 𑀲𑁄𑀳𑀁 𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑁂𑀲𑀼, 𑀓𑀸𑀳𑀸𑀫𑀺 𑀓𑀼𑀲𑀮𑀁 𑀩𑀳𑀼𑀁;

𑀤𑀸𑀦𑁂𑀦 𑀲𑀫𑀘𑀭𑀺𑀬𑀸𑀬, 𑀲𑀁𑀬𑀫𑁂𑀦 𑀤𑀫𑁂𑀦 𑀘;

𑀬𑀁 𑀓𑀢𑁆𑀯𑀸 𑀲𑀼𑀔𑀺𑀢𑁄 𑀳𑁄𑀢𑀺, 𑀦 𑀘 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀺.

𑁨𑁧𑁫. 𑀇𑀫𑀸𑀦𑀺 𑀢𑀸𑀦𑀺 𑀔𑁂𑀢𑁆𑀢𑀸𑀦𑀺, 𑀇𑀫𑀁 𑀦𑀺𑀓𑁆𑀔𑀁 𑀲𑀼𑀓𑀼𑀡𑁆𑀟𑀮𑀁;

𑀇𑀫𑀸 𑀢𑀸 𑀳𑀭𑀺𑀢𑀸𑀦𑀽𑀧𑀸, 𑀇𑀫𑀸 𑀦𑀚𑁆𑀚𑁄 𑀲𑀯𑀦𑁆𑀢𑀺𑀬𑁄.

𑁨𑁧𑁬. 𑀇𑀫𑀸 𑀢𑀸 𑀧𑁄𑀓𑁆𑀔𑀭𑀡𑀻 𑀭𑀫𑁆𑀫𑀸, 𑀘𑀓𑁆𑀓𑀯𑀸𑀓𑀧𑀓𑀽𑀚𑀺𑀢𑀸 [𑀘𑀓𑁆𑀓𑀯𑀸𑀓𑀽𑀧𑀓𑀽𑀚𑀺𑀢𑀸 (𑀲𑀻. 𑀧𑀻.)];

𑀫𑀦𑁆𑀤𑀸𑀮𑀓𑁂𑀳𑀺 𑀲𑀜𑁆𑀙𑀦𑁆𑀦𑀸, 𑀧𑀤𑀼𑀫𑀼𑀧𑁆𑀧𑀮𑀓𑁂𑀳𑀺 𑀘;

𑀬𑀲𑁆𑀲𑀺𑀫𑀸𑀦𑀺 𑀫𑀫𑀸𑀬𑀺𑀁𑀲𑀼, 𑀓𑀺𑀁 𑀦𑀼 𑀢𑁂 𑀤𑀺𑀲𑀢𑀁 𑀕𑀢𑀸.

𑁨𑁧𑁭. 𑀢𑀸𑀦𑀻𑀥 𑀔𑁂𑀢𑁆𑀢𑀸𑀦𑀺 𑀲𑁄 𑀪𑀽𑀫𑀺𑀪𑀸𑀕𑁄, 𑀢𑁂𑀬𑁂𑀯 𑀆𑀭𑀸𑀫𑀯𑀦𑀼𑀧𑀘𑀸𑀭𑀸 [𑀢𑁂 𑀆𑀭𑀸𑀫𑀸 𑀢𑁂 𑀯𑀦’𑀫𑁂 𑀧𑀘𑀸𑀭𑀸 (𑀲𑀻. 𑀧𑀻.), 𑀢𑁂 𑀬𑁂𑀯 𑀆𑀭𑀸𑀫𑀯𑀦𑀸𑀦𑀺 𑀲𑀜𑁆𑀘𑀭𑀸 (𑀓.)];

𑀢𑀫𑁂𑀯 𑀫𑀬𑁆𑀳𑀁 𑀚𑀦𑀢𑀁 𑀅𑀧𑀲𑁆𑀲𑀢𑁄, 𑀲𑀼𑀜𑁆𑀜𑀁𑀯 𑀫𑁂 𑀦𑀸𑀭𑀤 𑀔𑀸𑀬𑀢𑁂 𑀤𑀺𑀲𑀸.

𑁨𑁧𑁮. 𑀤𑀺𑀝𑁆𑀞𑀸 𑀫𑀬𑀸 𑀯𑀺𑀫𑀸𑀦𑀸𑀦𑀺, 𑀑𑀪𑀸𑀲𑁂𑀦𑁆𑀢𑀸 𑀘𑀢𑀼𑀤𑁆𑀤𑀺𑀲𑀸;

𑀲𑀫𑁆𑀫𑀼𑀔𑀸 𑀤𑁂𑀯𑀭𑀸𑀚𑀲𑁆𑀲, 𑀢𑀺𑀤𑀲𑀸𑀦𑀜𑁆𑀘 𑀲𑀫𑁆𑀫𑀼𑀔𑀸.

𑁨𑁧𑁯. 𑀯𑀼𑀢𑁆𑀣𑀁 𑀫𑁂 𑀪𑀯𑀦𑀁 𑀤𑀺𑀩𑁆𑀬𑀁 [𑀤𑀺𑀩𑁆𑀩𑀁 (𑀲𑀻. 𑀧𑀻.)], 𑀪𑀼𑀢𑁆𑀢𑀸 𑀓𑀸𑀫𑀸 𑀅𑀫𑀸𑀦𑀼𑀲𑀸;

𑀢𑀸𑀯𑀢𑀺𑀁𑀲𑁂𑀲𑀼 𑀤𑁂𑀯𑁂𑀲𑀼, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀲𑀼.

𑁨𑁨𑁦. 𑀲𑁄𑀳𑀁 𑀏𑀢𑀸𑀤𑀺𑀲𑀁 𑀳𑀺𑀢𑁆𑀯𑀸, 𑀧𑀼𑀜𑁆𑀜𑀸𑀬𑀫𑁆𑀳𑀺 𑀇𑀥𑀸𑀕𑀢𑁄;

𑀥𑀫𑁆𑀫𑀫𑁂𑀯 𑀘𑀭𑀺𑀲𑁆𑀲𑀸𑀫𑀺, 𑀦𑀸𑀳𑀁 𑀭𑀚𑁆𑀚𑁂𑀦 𑀅𑀢𑁆𑀣𑀺𑀓𑁄.

𑁨𑁨𑁧. 𑀅𑀤𑀡𑁆𑀟𑀸𑀯𑀘𑀭𑀁 𑀫𑀕𑁆𑀕𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑀁;

𑀢𑀁 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀲𑁆𑀲𑀁, 𑀬𑁂𑀦 𑀕𑀘𑁆𑀙𑀦𑁆𑀢𑀺 𑀲𑀼𑀩𑁆𑀩𑀢𑀸𑀢𑀺.

𑀲𑀸𑀥𑀺𑀦𑀚𑀸𑀢𑀓𑀁 [𑀲𑀸𑀥𑀺𑀦𑀭𑀸𑀚𑀚𑀸𑀢𑀓𑀁 (𑀲𑁆𑀬𑀸.)] 𑀏𑀓𑀸𑀤𑀲𑀫𑀁.