𑁪𑁯𑁦. 𑀧𑀜𑁆𑀘𑀼𑀧𑁄𑀲𑀣𑀺𑀓𑀚𑀸𑀢𑀓𑀁 (𑁭)

𑁧𑁨𑁭. 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀤𑀸𑀦𑀺 𑀢𑀼𑀯𑀁 𑀓𑀧𑁄𑀢, 𑀯𑀺𑀳𑀗𑁆𑀕𑀫 𑀦 𑀢𑀯 𑀪𑁄𑀚𑀦𑀢𑁆𑀣𑁄;

𑀔𑀼𑀤𑀁 [𑀔𑀼𑀤𑁆𑀤𑀁 (𑀲𑁆𑀬𑀸. 𑀓.), 𑀔𑀼𑀥𑀁 (𑀲𑀓𑁆𑀓𑀢-𑀧𑀸𑀓𑀢𑀸𑀦𑀼𑀭𑀽𑀧𑀁)] 𑀧𑀺𑀧𑀸𑀲𑀁 𑀅𑀥𑀺𑀯𑀸𑀲𑀬𑀦𑁆𑀢𑁄, 𑀓𑀲𑁆𑀫𑀸 𑀪𑀯𑀁𑀧𑁄𑀲𑀣𑀺𑀓𑁄 𑀓𑀧𑁄𑀢 [𑀓𑀧𑁄𑀢𑁄 (𑀲𑀻. 𑀧𑀻.)].

𑁧𑁨𑁮. 𑀅𑀳𑀁 𑀧𑀼𑀭𑁂 𑀕𑀺𑀤𑁆𑀥𑀺𑀕𑀢𑁄 𑀓𑀧𑁄𑀢𑀺𑀬𑀸, 𑀅𑀲𑁆𑀫𑀺𑀁 𑀧𑀤𑁂𑀲𑀲𑁆𑀫𑀺𑀫𑀼𑀪𑁄 𑀭𑀫𑀸𑀫;

𑀅𑀣𑀕𑁆𑀕𑀳𑀻 𑀲𑀸𑀓𑀼𑀡𑀺𑀓𑁄 𑀓𑀧𑁄𑀢𑀺𑀁, 𑀅𑀓𑀸𑀫𑀓𑁄 𑀢𑀸𑀬 𑀯𑀺𑀦𑀸 𑀅𑀳𑁄𑀲𑀺𑀁.

𑁧𑁨𑁯. 𑀦𑀸𑀦𑀸𑀪𑀯𑀸 𑀯𑀺𑀧𑁆𑀧𑀬𑁄𑀕𑁂𑀦 𑀢𑀲𑁆𑀲𑀸, 𑀫𑀦𑁄𑀫𑀬𑀁 𑀯𑁂𑀤𑀦 𑀯𑁂𑀤𑀬𑀸𑀫𑀺 [𑀯𑁂𑀤𑀦𑀁 𑀯𑁂𑀤𑀺𑀬𑀸𑀫𑀺 (𑀲𑀻. 𑀧𑀻.)];

𑀢𑀲𑁆𑀫𑀸 𑀅𑀳𑀁𑀧𑁄𑀲𑀣𑀁 𑀧𑀸𑀮𑀬𑀸𑀫𑀺, 𑀭𑀸𑀕𑁄 𑀫𑀫𑀁 𑀫𑀸 𑀧𑀼𑀦𑀭𑀸𑀕𑀫𑀸𑀲𑀺.

𑁧𑁩𑁦. 𑀅𑀦𑀼𑀚𑁆𑀚𑀼𑀕𑀸𑀫𑀻 𑀉𑀭𑀕𑀸 𑀤𑀼𑀚𑀺𑀯𑁆𑀳 [𑀉𑀭𑀕 𑀤𑁆𑀯𑀺𑀚𑀺𑀯𑁆𑀳 (𑀲𑀻.)], 𑀤𑀸𑀞𑀸𑀯𑀼𑀥𑁄 𑀖𑁄𑀭𑀯𑀺𑀲𑁄𑀲𑀺 𑀲𑀧𑁆𑀧;

𑀔𑀼𑀤𑀁 𑀧𑀺𑀧𑀸𑀲𑀁 𑀅𑀥𑀺𑀯𑀸𑀲𑀬𑀦𑁆𑀢𑁄, 𑀓𑀲𑁆𑀫𑀸 𑀪𑀯𑀁𑀧𑁄𑀲𑀣𑀺𑀓𑁄 𑀦𑀼 𑀤𑀻𑀖 [𑀤𑀻𑀖𑁄 (𑀲𑀻. 𑀧𑀻.)].

𑁧𑁩𑁧. 𑀉𑀲𑀪𑁄 𑀅𑀳𑀽 𑀩𑀮𑀯𑀸 𑀕𑀸𑀫𑀺𑀓𑀲𑁆𑀲, 𑀘𑀮𑀓𑁆𑀓𑀓𑀽 𑀯𑀡𑁆𑀡𑀩𑀮𑀽𑀧𑀧𑀦𑁆𑀦𑁄;

𑀲𑁄 𑀫𑀁 𑀅𑀓𑁆𑀓𑀫𑀺 𑀢𑀁 𑀓𑀼𑀧𑀺𑀢𑁄 𑀅𑀟𑀁𑀲𑀺, 𑀤𑀼𑀓𑁆𑀔𑀸𑀪𑀺𑀢𑀼𑀡𑁆𑀡𑁄 𑀫𑀭𑀡𑀁 𑀉𑀧𑀸𑀕𑀸 [𑀉𑀧𑀸𑀕𑀫𑀺 (𑀲𑀻. 𑀧𑀻.)].

𑁧𑁩𑁨. 𑀢𑀢𑁄 𑀚𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦 𑀕𑀸𑀫𑀸, 𑀓𑀦𑁆𑀤𑀺𑀢𑁆𑀯𑀸 𑀭𑁄𑀤𑀺𑀢𑁆𑀯𑀸 [𑀓𑀦𑁆𑀤𑀺𑀢𑁆𑀯 𑀭𑁄𑀤𑀺𑀢𑁆𑀯 (𑀲𑀻.)] 𑀅𑀧𑀓𑁆𑀓𑀫𑀺𑀁𑀲𑀼;

𑀢𑀲𑁆𑀫𑀸 𑀅𑀳𑀁𑀧𑁄𑀲𑀣𑀁 𑀧𑀸𑀮𑀬𑀸𑀫𑀺, 𑀓𑁄𑀥𑁄 𑀫𑀫𑀁 𑀫𑀸 𑀧𑀼𑀦𑀭𑀸𑀕𑀫𑀸𑀲𑀺.

𑁧𑁩𑁩. 𑀫𑀢𑀸𑀦 𑀫𑀁𑀲𑀸𑀦𑀺 𑀩𑀳𑀽 𑀲𑀼𑀲𑀸𑀦𑁂, 𑀫𑀦𑀼𑀜𑁆𑀜𑀭𑀽𑀧𑀁 𑀢𑀯 𑀪𑁄𑀚𑀦𑁂 𑀢𑀁;

𑀔𑀼𑀤𑀁 𑀧𑀺𑀧𑀸𑀲𑀁 𑀅𑀥𑀺𑀯𑀸𑀲𑀬𑀦𑁆𑀢𑁄, 𑀓𑀲𑁆𑀫𑀸 𑀪𑀯𑀁𑀧𑁄𑀲𑀣𑀺𑀓𑁄 𑀲𑀺𑀗𑁆𑀕𑀸𑀮 [𑀲𑀺𑀕𑀸𑀮𑁄 (𑀲𑀻. 𑀧𑀻.)].

𑁧𑁩𑁪. 𑀧𑀯𑀺𑀲𑀺 [𑀧𑀯𑀺𑀲𑁆𑀲𑀁 (𑀲𑀻. 𑀧𑀻.), 𑀧𑀯𑀺𑀲𑁆𑀲 (𑀲𑁆𑀬𑀸.)] 𑀓𑀼𑀘𑁆𑀙𑀺𑀁 𑀫𑀳𑀢𑁄 𑀕𑀚𑀲𑁆𑀲, 𑀓𑀼𑀡𑀧𑁂 𑀭𑀢𑁄 𑀳𑀢𑁆𑀣𑀺𑀫𑀁𑀲𑁂𑀲𑀼 𑀕𑀺𑀤𑁆𑀥𑁄 [𑀳𑀢𑁆𑀣𑀺𑀫𑀁𑀲𑁂 𑀧𑀕𑀺𑀤𑁆𑀥𑁄 (𑀲𑀻. 𑀧𑀻.)];

𑀉𑀡𑁆𑀳𑁄 𑀘 𑀯𑀸𑀢𑁄 𑀢𑀺𑀔𑀺𑀡𑀸 𑀘 𑀭𑀲𑁆𑀫𑀺𑀬𑁄, 𑀢𑁂 𑀲𑁄𑀲𑀬𑀼𑀁 𑀢𑀲𑁆𑀲 𑀓𑀭𑀻𑀲𑀫𑀕𑁆𑀕𑀁.

𑁧𑁩𑁫. 𑀓𑀺𑀲𑁄 𑀘 𑀧𑀡𑁆𑀟𑀽 𑀘 𑀅𑀳𑀁 𑀪𑀤𑀦𑁆𑀢𑁂, 𑀦 𑀫𑁂 𑀅𑀳𑀽 𑀦𑀺𑀓𑁆𑀔𑀫𑀦𑀸𑀬 𑀫𑀕𑁆𑀕𑁄;

𑀫𑀳𑀸 𑀘 𑀫𑁂𑀖𑁄 𑀲𑀳𑀲𑀸 𑀧𑀯𑀲𑁆𑀲𑀺, 𑀲𑁄 𑀢𑁂𑀫𑀬𑀻 𑀢𑀲𑁆𑀲 𑀓𑀭𑀻𑀲𑀫𑀕𑁆𑀕𑀁.

𑁧𑁩𑁬. 𑀢𑀢𑁄 𑀅𑀳𑀁 𑀦𑀺𑀓𑁆𑀔𑀫𑀺𑀲𑀁 𑀪𑀤𑀦𑁆𑀢𑁂, 𑀘𑀦𑁆𑀤𑁄 𑀬𑀣𑀸 𑀭𑀸𑀳𑀼𑀫𑀼𑀔𑀸 𑀧𑀫𑀼𑀢𑁆𑀢𑁄;

𑀢𑀲𑁆𑀫𑀸 𑀅𑀳𑀁𑀧𑁄𑀲𑀣𑀁 𑀧𑀸𑀮𑀬𑀸𑀫𑀺, 𑀮𑁄𑀪𑁄 𑀫𑀫𑀁 𑀫𑀸 𑀧𑀼𑀦𑀭𑀸𑀕𑀫𑀸𑀲𑀺.

𑁧𑁩𑁭. 𑀯𑀫𑁆𑀫𑀻𑀓𑀣𑀽𑀧𑀲𑁆𑀫𑀺𑀁 𑀓𑀺𑀧𑀺𑀮𑁆𑀮𑀺𑀓𑀸𑀦𑀺, 𑀦𑀺𑀧𑁆𑀧𑁄𑀣𑀬𑀦𑁆𑀢𑁄 𑀢𑀼𑀯𑀁 𑀧𑀼𑀭𑁂 𑀘𑀭𑀸𑀲𑀺;

𑀔𑀼𑀤𑀁 𑀧𑀺𑀧𑀸𑀲𑀁 𑀅𑀥𑀺𑀯𑀸𑀲𑀬𑀦𑁆𑀢𑁄, 𑀓𑀲𑁆𑀫𑀸 𑀪𑀯𑀁𑀧𑁄𑀲𑀣𑀺𑀓𑁄 𑀦𑀼 𑀅𑀘𑁆𑀙 [𑀅𑀘𑁆𑀙𑁄 (𑀲𑀻. 𑀧𑀻.)].

𑁧𑁩𑁮. 𑀲𑀓𑀁 𑀦𑀺𑀓𑁂𑀢𑀁 𑀅𑀢𑀺𑀳𑀻𑀴𑀬𑀸𑀦𑁄 [𑀅𑀢𑀺𑀳𑁂𑀴𑀬𑀸𑀦𑁄 (𑀲𑁆𑀬𑀸. 𑀓.)], 𑀅𑀢𑁆𑀭𑀺𑀘𑁆𑀙𑀢𑀸 [𑀅𑀢𑁆𑀭𑀺𑀘𑁆𑀙𑀢𑀸𑀬 (𑀲𑀻. 𑀲𑁆𑀬𑀸. 𑀧𑀻.)] 𑀫𑀮𑁆𑀮𑀕𑀸𑀫𑀁 [𑀫𑀮𑀢𑀁 (𑀲𑀻. 𑀧𑀻.), 𑀫𑀮𑁆𑀮𑀬𑀢𑀁 (𑀓.)] 𑀅𑀕𑀘𑁆𑀙𑀺𑀁;

𑀢𑀢𑁄 𑀚𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦 𑀕𑀸𑀫𑀸, 𑀓𑁄𑀤𑀡𑁆𑀟𑀓𑁂𑀦 𑀧𑀭𑀺𑀧𑁄𑀣𑀬𑀺𑀁𑀲𑀼 𑀫𑀁.

𑁧𑁩𑁯. 𑀲𑁄 𑀪𑀺𑀦𑁆𑀦𑀲𑀻𑀲𑁄 𑀭𑀼𑀳𑀺𑀭𑀫𑀓𑁆𑀔𑀺𑀢𑀗𑁆𑀕𑁄, 𑀧𑀘𑁆𑀘𑀸𑀕𑀫𑀸𑀲𑀺𑀁 𑀲𑀓𑀁 [𑀲 𑀲𑀓𑀁 (𑀲𑁆𑀬𑀸. 𑀓.),’𑀣 𑀲𑀓𑀁 (?)] 𑀦𑀺𑀓𑁂𑀢𑀁;

𑀢𑀲𑁆𑀫𑀸 𑀅𑀳𑀁𑀧𑁄𑀲𑀣𑀁 𑀧𑀸𑀮𑀬𑀸𑀫𑀺, 𑀅𑀢𑁆𑀭𑀺𑀘𑁆𑀙𑀢𑀸 𑀫𑀸 𑀧𑀼𑀦𑀭𑀸𑀕𑀫𑀸𑀲𑀺.

𑁧𑁪𑁦. 𑀬𑀁 𑀦𑁄 𑀅𑀧𑀼𑀘𑁆𑀙𑀺𑀢𑁆𑀣 𑀢𑀼𑀯𑀁 𑀪𑀤𑀦𑁆𑀢𑁂, 𑀲𑀩𑁆𑀩𑁂𑀯 𑀩𑁆𑀬𑀸𑀓𑀭𑀺𑀫𑁆𑀳 𑀬𑀣𑀸 𑀧𑀚𑀸𑀦𑀁;

𑀫𑀬𑀫𑁆𑀧𑀺 𑀧𑀼𑀘𑁆𑀙𑀸𑀫 𑀢𑀼𑀯𑀁 𑀪𑀤𑀦𑁆𑀢𑁂, 𑀓𑀲𑁆𑀫𑀸 𑀪𑀯𑀁𑀧𑁄𑀲𑀣𑀺𑀓𑁄 𑀦𑀼 𑀩𑁆𑀭𑀳𑁆𑀫𑁂.

𑁧𑁪𑁧. 𑀅𑀦𑀽𑀧𑀮𑀺𑀢𑁆𑀢𑁄 𑀫𑀫 𑀅𑀲𑁆𑀲𑀫𑀫𑁆𑀳𑀺, 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀫𑀼𑀳𑀼𑀢𑁆𑀢𑀁 𑀦𑀺𑀲𑀻𑀤𑀺;

𑀲𑁄 𑀫𑀁 𑀅𑀯𑁂𑀤𑀻 𑀕𑀢𑀺𑀫𑀸𑀕𑀢𑀺𑀜𑁆𑀘, 𑀦𑀸𑀫𑀜𑁆𑀘 𑀕𑁄𑀢𑁆𑀢𑀁 𑀘𑀭𑀡𑀜𑁆𑀘 𑀲𑀩𑁆𑀩𑀁.

𑁧𑁪𑁨. 𑀏𑀯𑀫𑁆𑀧𑀳𑀁 𑀯𑀦𑁆𑀤𑀺 𑀦 [𑀏𑀯𑀫𑁆𑀧𑀳𑀁 𑀦𑀕𑁆𑀕𑀳𑁂 (𑀲𑀻. 𑀧𑀻.)] 𑀢𑀲𑁆𑀲 𑀧𑀸𑀤𑁂, 𑀦 𑀘𑀸𑀧𑀺 𑀦𑀁 𑀫𑀸𑀦𑀕𑀢𑁂𑀦 𑀧𑀼𑀘𑁆𑀙𑀺𑀁;

𑀢𑀲𑁆𑀫𑀸 𑀅𑀳𑀁𑀧𑁄𑀲𑀣𑀁 𑀧𑀸𑀮𑀬𑀸𑀫𑀺, 𑀫𑀸𑀦𑁄 𑀫𑀫𑀁 𑀫𑀸 𑀧𑀼𑀦𑀭𑀸𑀕𑀫𑀸𑀲𑀻𑀢𑀺.

𑀧𑀜𑁆𑀘𑀼𑀧𑁄𑀲𑀣𑀺𑀓𑀚𑀸𑀢𑀓𑀁 𑀲𑀢𑁆𑀢𑀫𑀁.