𑁪𑁯𑁧. 𑀫𑀳𑀸𑀫𑁄𑀭𑀚𑀸𑀢𑀓𑀁 (𑁮)

𑁧𑁪𑁩. 𑀲𑀘𑁂 𑀳𑀺 𑀢𑁆𑀬𑀸𑀳𑀁 𑀥𑀦𑀳𑁂𑀢𑀼 𑀕𑀸𑀳𑀺𑀢𑁄, 𑀫𑀸 𑀫𑀁 𑀯𑀥𑀻 𑀚𑀻𑀯𑀕𑀸𑀳𑀁 𑀕𑀳𑁂𑀢𑁆𑀯𑀸;

𑀭𑀜𑁆𑀜𑁄 𑀘 [𑀭𑀜𑁆𑀜𑁄𑀯 (𑀲𑀻. 𑀧𑀻.)] 𑀫𑀁 𑀲𑀫𑁆𑀫 𑀉𑀧𑀦𑁆𑀢𑀺𑀓𑀁 [𑀉𑀧𑀦𑁆𑀢𑀺 (𑀲𑀻. 𑀲𑁆𑀬𑀸. 𑀧𑀻.)] 𑀦𑁂𑀳𑀺, 𑀫𑀜𑁆𑀜𑁂 𑀥𑀦𑀁 𑀮𑀘𑁆𑀙𑀲𑀺𑀦𑀧𑁆𑀧𑀭𑀽𑀧𑀁.

𑁧𑁪𑁪. 𑀦 𑀫𑁂 𑀅𑀬𑀁 𑀢𑀼𑀬𑁆𑀳 𑀯𑀥𑀸𑀬 𑀅𑀚𑁆𑀚, 𑀲𑀫𑀸𑀳𑀺𑀢𑁄 𑀘𑀸𑀧𑀥𑀼𑀭𑁂 [𑀘𑀸𑀧𑀯𑀭𑁂 (𑀲𑀻. 𑀧𑀻.), 𑀘𑀸𑀧𑀯𑀭𑁄 (𑀲𑁆𑀬𑀸.)] 𑀔𑀼𑀭𑀧𑁆𑀧𑁄;

𑀧𑀸𑀲𑀜𑁆𑀘 𑀢𑁆𑀬𑀸𑀳𑀁 𑀅𑀥𑀺𑀧𑀸𑀢𑀬𑀺𑀲𑁆𑀲𑀁, 𑀬𑀣𑀸𑀲𑀼𑀔𑀁 𑀕𑀘𑁆𑀙𑀢𑀼 𑀫𑁄𑀭𑀭𑀸𑀚𑀸.

𑁧𑁪𑁫. 𑀬𑀁 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀫𑀫𑀸𑀦𑀼𑀩𑀦𑁆𑀥𑀺, 𑀭𑀢𑁆𑀢𑀺𑀦𑁆𑀤𑀺𑀯𑀁 𑀔𑀼𑀧𑁆𑀧𑀺𑀧𑀸𑀲𑀁 𑀲𑀳𑀦𑁆𑀢𑁄;

𑀅𑀣 𑀓𑀺𑀲𑁆𑀲 𑀫𑀁 𑀧𑀸𑀲𑀯𑀲𑀽𑀧𑀦𑀻𑀢𑀁, 𑀧𑀫𑀼𑀢𑁆𑀢𑀯𑁂 𑀇𑀘𑁆𑀙𑀲𑀺 𑀩𑀦𑁆𑀥𑀦𑀲𑁆𑀫𑀸.

𑁧𑁪𑁬. 𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑁄 𑀦𑀼𑀲𑀚𑁆𑀚, 𑀅𑀪𑀬𑀁 𑀦𑀼 𑀢𑁂 𑀲𑀩𑁆𑀩𑀪𑀽𑀢𑁂𑀲𑀼 𑀤𑀺𑀦𑁆𑀦𑀁;

𑀬𑀁 𑀫𑀁 𑀢𑀼𑀯𑀁 𑀧𑀸𑀲𑀯𑀲𑀽𑀧𑀦𑀻𑀢𑀁, 𑀧𑀫𑀼𑀢𑁆𑀢𑀯𑁂 𑀇𑀘𑁆𑀙𑀲𑀺 𑀩𑀦𑁆𑀥𑀦𑀲𑁆𑀫𑀸.

𑁧𑁪𑁭. 𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀲𑁆𑀲 𑀩𑁆𑀭𑀽𑀳𑀺, 𑀅𑀪𑀬𑀜𑁆𑀘 𑀬𑁄 𑀲𑀩𑁆𑀩𑀪𑀽𑀢𑁂𑀲𑀼 𑀤𑁂𑀢𑀺;

𑀧𑀼𑀘𑁆𑀙𑀸𑀫𑀺 𑀢𑀁 𑀫𑁄𑀭𑀭𑀸𑀚𑁂𑀢𑀫𑀢𑁆𑀣𑀁, 𑀇𑀢𑁄 𑀘𑀼𑀢𑁄 𑀓𑀺𑀁 𑀮𑀪𑀢𑁂 𑀲𑀼𑀔𑀁 𑀲𑁄.

𑁧𑁪𑁮. 𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀲𑁆𑀲 𑀩𑁆𑀭𑀽𑀫𑀺, 𑀅𑀪𑀬𑀜𑁆𑀘 𑀬𑁄 𑀲𑀩𑁆𑀩𑀪𑀽𑀢𑁂𑀲𑀼 𑀤𑁂𑀢𑀺;

𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀮𑀪𑀢𑁂 𑀧𑀲𑀁𑀲𑀁, 𑀲𑀕𑁆𑀕𑀜𑁆𑀘 𑀲𑁄 𑀬𑀸𑀢𑀺 𑀲𑀭𑀻𑀭𑀪𑁂𑀤𑀸.

𑁧𑁪𑁯. 𑀦 𑀲𑀦𑁆𑀢𑀺 𑀤𑁂𑀯𑀸 𑀇𑀢𑀺 𑀆𑀳𑀼 [𑀇𑀘𑁆𑀘𑀸𑀳𑀼 (𑀲𑀻. 𑀧𑀻.)] 𑀏𑀓𑁂, 𑀇𑀥𑁂𑀯 𑀚𑀻𑀯𑁄 𑀯𑀺𑀪𑀯𑀁 𑀉𑀧𑁂𑀢𑀺;

𑀢𑀣𑀸 𑀨𑀮𑀁 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁, 𑀤𑀢𑁆𑀢𑀼𑀧𑀜𑁆𑀜𑀢𑁆𑀢𑀜𑁆𑀘 𑀯𑀤𑀦𑁆𑀢𑀺 𑀤𑀸𑀦𑀁;

𑀢𑁂𑀲𑀁 𑀯𑀘𑁄 𑀅𑀭𑀳𑀢𑀁 𑀲𑀤𑁆𑀤𑀳𑀸𑀦𑁄, 𑀢𑀲𑁆𑀫𑀸 𑀅𑀳𑀁 𑀲𑀓𑀼𑀡𑁂 𑀩𑀸𑀥𑀬𑀸𑀫𑀺.

𑁧𑁫𑁦. 𑀘𑀦𑁆𑀤𑁄 𑀘 𑀲𑀼𑀭𑀺𑀬𑁄 𑀘 𑀉𑀪𑁄 𑀲𑀼𑀤𑀲𑁆𑀲𑀦𑀸, 𑀕𑀘𑁆𑀙𑀦𑁆𑀢𑀺 𑀑𑀪𑀸𑀲𑀬𑀫𑀦𑁆𑀢𑀮𑀺𑀓𑁆𑀔𑁂;

𑀇𑀫𑀲𑁆𑀲 𑀮𑁄𑀓𑀲𑁆𑀲 𑀧𑀭𑀲𑁆𑀲 𑀯𑀸 𑀢𑁂, 𑀓𑀣𑀁 𑀦𑀼 𑀢𑁂 𑀆𑀳𑀼 𑀫𑀦𑀼𑀲𑁆𑀲𑀮𑁄𑀓𑁂.

𑁧𑁫𑁧. 𑀘𑀦𑁆𑀤𑁄 𑀘 𑀲𑀼𑀭𑀺𑀬𑁄 𑀘 𑀉𑀪𑁄 𑀲𑀼𑀤𑀲𑁆𑀲𑀦𑀸, 𑀕𑀘𑁆𑀙𑀦𑁆𑀢𑀺 𑀑𑀪𑀸𑀲𑀬𑀫𑀦𑁆𑀢𑀮𑀺𑀓𑁆𑀔𑁂;

𑀧𑀭𑀲𑁆𑀲 𑀮𑁄𑀓𑀲𑁆𑀲 𑀦 𑀢𑁂 𑀇𑀫𑀲𑁆𑀲, 𑀤𑁂𑀯𑀸𑀢𑀺 𑀢𑁂 𑀆𑀳𑀼 𑀫𑀦𑀼𑀲𑁆𑀲𑀮𑁄𑀓𑁂.

𑁧𑁫𑁨. 𑀏𑀢𑁆𑀣𑁂𑀯 𑀢𑁂 𑀦𑀻𑀳𑀢𑀸 𑀳𑀻𑀦𑀯𑀸𑀤𑀸, 𑀅𑀳𑁂𑀢𑀼𑀓𑀸 𑀬𑁂 𑀦 𑀯𑀤𑀦𑁆𑀢𑀺 𑀓𑀫𑁆𑀫𑀁;

𑀢𑀣𑀸 𑀨𑀮𑀁 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁, 𑀤𑀢𑁆𑀢𑀼𑀧𑀜𑁆𑀜𑀢𑁆𑀢𑀁 𑀬𑁂 𑀘 𑀯𑀤𑀦𑁆𑀢𑀺 𑀤𑀸𑀦𑀁.

𑁧𑁫𑁩. 𑀅𑀤𑁆𑀥𑀸 𑀳𑀺 𑀲𑀘𑁆𑀘𑀁 𑀯𑀘𑀦𑀁 𑀢𑀯𑁂𑀤𑀁 [𑀢𑀯𑁂𑀢𑀁 (𑀲𑀻. 𑀲𑁆𑀬𑀸. 𑀧𑀻.)], 𑀓𑀣𑀜𑁆𑀳𑀺 𑀤𑀸𑀦𑀁 𑀅𑀨𑀮𑀁 𑀪𑀯𑁂𑀬𑁆𑀬 [𑀯𑀤𑁂𑀬𑁆𑀬 (𑀲𑀻. 𑀧𑀻.)];

𑀢𑀣𑀸 𑀨𑀮𑀁 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁, 𑀤𑀢𑁆𑀢𑀼𑀧𑀜𑁆𑀜𑀢𑁆𑀢𑀜𑁆𑀘 𑀓𑀣𑀁 𑀪𑀯𑁂𑀬𑁆𑀬.

𑁧𑁫𑁪. 𑀓𑀣𑀁𑀓𑀭𑁄 𑀓𑀺𑀦𑁆𑀢𑀺𑀓𑀭𑁄 𑀓𑀺𑀫𑀸𑀘𑀭𑀁, 𑀓𑀺𑀁 𑀲𑁂𑀯𑀫𑀸𑀦𑁄 𑀓𑁂𑀦 𑀢𑀧𑁄𑀕𑀼𑀡𑁂𑀦;

𑀅𑀓𑁆𑀔𑀸𑀳𑀺 [𑀅𑀓𑁆𑀔𑀸𑀳𑀺 𑀢𑀁 𑀤𑀸𑀦𑀺 (𑀓.)] 𑀫𑁂 𑀫𑁄𑀭𑀭𑀸𑀚𑁂𑀢𑀫𑀢𑁆𑀣𑀁, 𑀬𑀣𑀸 𑀅𑀳𑀁 𑀦𑁄 𑀦𑀺𑀭𑀬𑀁 𑀧𑀢𑁂𑀬𑁆𑀬𑀁.

𑁧𑁫𑁫. 𑀬𑁂 𑀓𑁂𑀘𑀺 𑀅𑀢𑁆𑀣𑀺 𑀲𑀫𑀡𑀸 𑀧𑀣𑀩𑁆𑀬𑀸, 𑀓𑀸𑀲𑀸𑀬𑀯𑀢𑁆𑀣𑀸 𑀅𑀦𑀕𑀸𑀭𑀺𑀬𑀸 𑀢𑁂;

𑀧𑀸𑀢𑁄𑀯 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺 𑀓𑀸𑀮𑁂, 𑀯𑀺𑀓𑀸𑀮𑀘𑀭𑀺𑀬𑀸 𑀯𑀺𑀭𑀢𑀸 𑀳𑀺 𑀲𑀦𑁆𑀢𑁄.

𑁧𑁫𑁬. 𑀢𑁂 𑀢𑀢𑁆𑀣 𑀓𑀸𑀮𑁂𑀦𑀼𑀧𑀲𑀗𑁆𑀓𑀫𑀺𑀢𑁆𑀯𑀸, 𑀧𑀼𑀘𑁆𑀙𑀸𑀳𑀺 𑀬𑀁 𑀢𑁂 𑀫𑀦𑀲𑁄 𑀧𑀺𑀬𑀁 𑀲𑀺𑀬𑀸;

𑀢𑁂 𑀢𑁂 𑀧𑀯𑀓𑁆𑀔𑀦𑁆𑀢𑀺 𑀬𑀣𑀸𑀧𑀚𑀸𑀦𑀁, 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀧𑀭𑀲𑁆𑀲 𑀘𑀢𑁆𑀣𑀁.

𑁧𑁫𑁭. 𑀢𑀘𑀁𑀯 𑀚𑀺𑀡𑁆𑀡𑀁 𑀉𑀭𑀕𑁄 𑀧𑀼𑀭𑀸𑀡𑀁, 𑀧𑀡𑁆𑀟𑀽𑀧𑀮𑀸𑀲𑀁 𑀳𑀭𑀺𑀢𑁄 𑀤𑀼𑀫𑁄𑀯;

𑀏𑀲𑀧𑁆𑀧𑀳𑀻𑀦𑁄 𑀫𑀫 𑀮𑀼𑀤𑁆𑀤𑀪𑀸𑀯𑁄, 𑀚𑀳𑀸𑀫𑀳𑀁 𑀮𑀼𑀤𑁆𑀤𑀓𑀪𑀸𑀯𑀫𑀚𑁆𑀚.

𑁧𑁫𑁮. 𑀬𑁂 𑀘𑀸𑀧𑀺 𑀫𑁂 𑀲𑀓𑀼𑀡𑀸 𑀅𑀢𑁆𑀣𑀺 𑀩𑀤𑁆𑀥𑀸, 𑀲𑀢𑀸𑀦𑀺𑀦𑁂𑀓𑀸𑀦𑀺 𑀦𑀺𑀯𑁂𑀲𑀦𑀲𑁆𑀫𑀺𑀁;

𑀢𑁂𑀲𑀫𑁆𑀧𑀳𑀁 [𑀢𑁂𑀲𑀁 𑀅𑀳𑀁 (𑀲𑁆𑀬𑀸. 𑀓.)] 𑀚𑀻𑀯𑀺𑀢𑀫𑀚𑁆𑀚 𑀤𑀫𑁆𑀫𑀺, 𑀫𑁄𑀓𑁆𑀔𑀜𑁆𑀘 𑀢𑁂 𑀧𑀢𑁆𑀢𑀸 [𑀧𑀢𑁆𑀢𑁄 (𑀲𑀻.), 𑀅𑀘𑁆𑀙 (𑀲𑁆𑀬𑀸.)] 𑀲𑀓𑀁 𑀦𑀺𑀓𑁂𑀢𑀁.

𑁧𑁫𑁯. 𑀮𑀼𑀤𑁆𑀤𑁄 𑀘𑀭𑀻 𑀧𑀸𑀲𑀳𑀢𑁆𑀣𑁄 𑀅𑀭𑀜𑁆𑀜𑁂, 𑀩𑀸𑀥𑁂𑀢𑀼 𑀫𑁄𑀭𑀸𑀥𑀺𑀧𑀢𑀺𑀁 𑀬𑀲𑀲𑁆𑀲𑀺𑀁;

𑀩𑀦𑁆𑀥𑀺𑀢𑁆𑀯𑀸 [𑀩𑀦𑁆𑀥𑀺𑀢𑁆𑀯 (𑀲𑀻. 𑀧𑀻.)] 𑀫𑁄𑀭𑀸𑀥𑀺𑀧𑀢𑀺𑀁 𑀬𑀲𑀲𑁆𑀲𑀺𑀁, 𑀤𑀼𑀓𑁆𑀔𑀸 𑀲 𑀧𑀫𑀼𑀘𑁆𑀘𑀺 [𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀺 (𑀲𑀻.), 𑀤𑀼𑀓𑁆𑀔𑀸 𑀧𑀫𑀼𑀜𑁆𑀘𑀺 (𑀲𑁆𑀬𑀸. 𑀧𑀻.)] 𑀬𑀣𑀸𑀳𑀁 𑀧𑀫𑀼𑀢𑁆𑀢𑁄𑀢𑀺.

𑀫𑀳𑀸𑀫𑁄𑀭𑀚𑀸𑀢𑀓𑀁 𑀅𑀝𑁆𑀞𑀫𑀁.