𑁪𑁮𑁯. 𑀲𑀼𑀭𑀼𑀘𑀺𑀚𑀸𑀢𑀓𑀁 (𑁬)

𑁧𑁦𑁨. 𑀫𑀳𑁂𑀲𑀻 𑀲𑀼𑀭𑀼𑀘𑀺𑀦𑁄 [𑀭𑀼𑀘𑀺𑀦𑁄 (𑀲𑀻. 𑀲𑁆𑀬𑀸. 𑀧𑀻.)] 𑀪𑀭𑀺𑀬𑀸, 𑀆𑀦𑀻𑀢𑀸 𑀧𑀞𑀫𑀁 𑀅𑀳𑀁;

𑀤𑀲 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀬𑀁 𑀫𑀁 𑀲𑀼𑀭𑀼𑀘𑀺𑀫𑀸𑀦𑀬𑀺.

𑁧𑁦𑁩. 𑀲𑀸𑀳𑀁 𑀩𑁆𑀭𑀸𑀳𑁆𑀫𑀡 𑀭𑀸𑀚𑀸𑀦𑀁, 𑀯𑁂𑀤𑁂𑀳𑀁 𑀫𑀺𑀣𑀺𑀮𑀕𑁆𑀕𑀳𑀁;

𑀦𑀸𑀪𑀺𑀚𑀸𑀦𑀸𑀫𑀺 𑀓𑀸𑀬𑁂𑀦, 𑀯𑀸𑀘𑀸𑀬 𑀉𑀤 𑀘𑁂𑀢𑀲𑀸;

𑀲𑀼𑀭𑀼𑀘𑀺𑀁 𑀅𑀢𑀺𑀫𑀜𑁆𑀜𑀺𑀢𑁆𑀣 [𑀅𑀢𑀺𑀫𑀜𑁆𑀜𑀺𑀢𑁆𑀣𑁄 (𑀲𑀻. 𑀧𑀻.), 𑀅𑀢𑀺𑀫𑀜𑁆𑀜𑀺𑀢𑀸 (?)], 𑀆𑀯𑀺 [𑀆𑀯𑀺𑀁 (𑀲𑀻. 𑀧𑀻.)] 𑀯𑀸 𑀬𑀤𑀺 𑀯𑀸 𑀭𑀳𑁄.

𑁧𑁦𑁪. 𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀧𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑀢𑀁 𑀇𑀲𑁂;

𑀫𑀼𑀲𑀸 𑀫𑁂 𑀪𑀡𑀫𑀸𑀦𑀸𑀬, 𑀫𑀼𑀤𑁆𑀥𑀸 𑀨𑀮𑀢𑀼 𑀲𑀢𑁆𑀢𑀥𑀸.

𑁧𑁦𑁫. 𑀪𑀢𑁆𑀢𑀼 𑀫𑀫 𑀲𑀲𑁆𑀲𑀼 𑀫𑀸𑀢𑀸, 𑀧𑀺𑀢𑀸 𑀘𑀸𑀧𑀺 𑀘 𑀲𑀲𑁆𑀲𑀼𑀭𑁄;

𑀢𑁂 𑀫𑀁 𑀩𑁆𑀭𑀳𑁆𑀫𑁂 𑀯𑀺𑀦𑁂𑀢𑀸𑀭𑁄, 𑀬𑀸𑀯 𑀅𑀝𑁆𑀞𑀁𑀲𑀼 𑀚𑀻𑀯𑀺𑀢𑀁.

𑁧𑁦𑁬. 𑀲𑀸𑀳𑀁 𑀅𑀳𑀺𑀁𑀲𑀸𑀭𑀢𑀺𑀦𑀻, 𑀓𑀸𑀫𑀲𑀸 [𑀓𑀸𑀫𑀲𑁄 (𑀲𑀻.)] 𑀥𑀫𑁆𑀫𑀘𑀸𑀭𑀺𑀦𑀻 [𑀥𑀫𑁆𑀫𑀘𑀸𑀭𑀺𑀡𑀻 (𑀲𑀻.)];

𑀲𑀓𑁆𑀓𑀘𑁆𑀘𑀁 𑀢𑁂 𑀉𑀧𑀝𑁆𑀞𑀸𑀲𑀺𑀁, 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑀸.

𑁧𑁦𑁭. 𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀧𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑀢𑀁 𑀇𑀲𑁂;

𑀫𑀼𑀲𑀸 𑀫𑁂 𑀪𑀡𑀫𑀸𑀦𑀸𑀬, 𑀫𑀼𑀤𑁆𑀥𑀸 𑀨𑀮𑀢𑀼 𑀲𑀢𑁆𑀢𑀥𑀸.

𑁧𑁦𑁮. 𑀲𑁄𑀴𑀲𑀺𑀢𑁆𑀣𑀺𑀲𑀳𑀲𑁆𑀲𑀸𑀦𑀺, 𑀲𑀳𑀪𑀭𑀺𑀬𑀸𑀦𑀺 𑀩𑁆𑀭𑀸𑀳𑁆𑀫𑀡;

𑀢𑀸𑀲𑀼 𑀇𑀲𑁆𑀲𑀸 𑀯𑀸 𑀓𑁄𑀥𑁄 𑀯𑀸, 𑀦𑀸𑀳𑀼 𑀫𑀬𑁆𑀳𑀁 𑀓𑀼𑀤𑀸𑀘𑀦𑀁.

𑁧𑁦𑁯. 𑀳𑀺𑀢𑁂𑀦 𑀢𑀸𑀲𑀁 𑀦𑀦𑁆𑀤𑀸𑀫𑀺, 𑀦 𑀘 𑀫𑁂 𑀓𑀸𑀘𑀺 𑀅𑀧𑁆𑀧𑀺𑀬𑀸;

𑀅𑀢𑁆𑀢𑀸𑀦𑀁𑀯𑀸𑀦𑀼𑀓𑀫𑁆𑀧𑀸𑀫𑀺, 𑀲𑀤𑀸 𑀲𑀩𑁆𑀩𑀸 𑀲𑀧𑀢𑁆𑀢𑀺𑀬𑁄.

𑁧𑁧𑁦. 𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀧𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑀢𑀁 𑀇𑀲𑁂;

𑀫𑀼𑀲𑀸 𑀫𑁂 𑀪𑀡𑀫𑀸𑀦𑀸𑀬, 𑀫𑀼𑀤𑁆𑀥𑀸 𑀨𑀮𑀢𑀼 𑀲𑀢𑁆𑀢𑀥𑀸.

𑁧𑁧𑁧. 𑀤𑀸𑀲𑁂 𑀓𑀫𑁆𑀫𑀓𑀭𑁂 𑀧𑁂𑀲𑁆𑀲𑁂 [𑀧𑁄𑀲𑁂 (𑀲𑁆𑀬𑀸. 𑀓.)], 𑀬𑁂 𑀘𑀜𑁆𑀜𑁂 𑀅𑀦𑀼𑀚𑀻𑀯𑀺𑀦𑁄;

𑀧𑁂𑀲𑁂𑀫𑀺 [𑀧𑁄𑀲𑁂𑀫𑀺 (𑀲𑀻. 𑀲𑁆𑀬𑀸. 𑀧𑀻.)] 𑀲𑀳𑀥𑀫𑁆𑀫𑁂𑀦, 𑀲𑀤𑀸 𑀧𑀫𑀼𑀤𑀺𑀢𑀺𑀦𑁆𑀤𑁆𑀭𑀺𑀬𑀸.

𑁧𑁧𑁨. 𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀧𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑀢𑀁 𑀇𑀲𑁂;

𑀫𑀼𑀲𑀸 𑀫𑁂 𑀪𑀡𑀫𑀸𑀦𑀸𑀬, 𑀫𑀼𑀤𑁆𑀥𑀸 𑀨𑀮𑀢𑀼 𑀲𑀢𑁆𑀢𑀥𑀸.

𑁧𑁧𑁩. 𑀲𑀫𑀡𑁂 𑀩𑁆𑀭𑀸𑀳𑁆𑀫𑀡𑁂 𑀘𑀸𑀧𑀺, 𑀅𑀜𑁆𑀜𑁂 𑀘𑀸𑀧𑀺 𑀯𑀦𑀺𑀩𑁆𑀩𑀓𑁂;

𑀢𑀧𑁆𑀧𑁂𑀫𑀺 𑀅𑀦𑁆𑀦𑀧𑀸𑀦𑁂𑀦, 𑀲𑀤𑀸 𑀧𑀬𑀢𑀧𑀸𑀡𑀺𑀦𑀻.

𑁧𑁧𑁪. 𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀧𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑀢𑀁 𑀇𑀲𑁂;

𑀫𑀼𑀲𑀸 𑀫𑁂 𑀪𑀡𑀫𑀸𑀦𑀸𑀬, 𑀫𑀼𑀤𑁆𑀥𑀸 𑀨𑀮𑀢𑀼 𑀲𑀢𑁆𑀢𑀥𑀸.

𑁧𑁧𑁫. 𑀘𑀸𑀢𑀼𑀤𑁆𑀤𑀲𑀺𑀁 𑀧𑀜𑁆𑀘𑀤𑁆𑀤𑀲𑀺𑀁 [𑀧𑀦𑁆𑀦𑀭𑀲𑀺𑀁 (𑀲𑀻. 𑀧𑀻.)], 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻 [𑀅𑀝𑁆𑀞𑀫𑀺𑀁 (𑀲𑀻. 𑀧𑀻.)];

𑀧𑀸𑀝𑀺𑀳𑀸𑀭𑀺𑀬𑀧𑀓𑁆𑀔𑀜𑁆𑀘, 𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀕𑀢𑀁 [𑀅𑀝𑁆𑀞𑀗𑁆𑀕𑀲𑀼𑀲𑀫𑀸𑀳𑀺𑀢𑀁 (𑀲𑀩𑁆𑀩𑀢𑁆𑀣) 𑀯𑀺. 𑀯. 𑁧𑁨𑁯 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸 𑀧𑀲𑁆𑀲𑀺𑀢𑀩𑁆𑀩𑀸];

𑀉𑀧𑁄𑀲𑀣𑀁 𑀉𑀧𑀯𑀲𑀸𑀫𑀺 [𑀉𑀧𑀯𑀲𑀺𑀁 (𑀓.)], 𑀲𑀤𑀸 𑀲𑀻𑀮𑁂𑀲𑀼 𑀲𑀁𑀯𑀼𑀢𑀸.

𑁧𑁧𑁬. 𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀧𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑀢𑀁 𑀇𑀲𑁂;

𑀫𑀼𑀲𑀸 𑀫𑁂 𑀪𑀡𑀫𑀸𑀦𑀸𑀬, 𑀫𑀼𑀤𑁆𑀥𑀸 𑀨𑀮𑀢𑀼 𑀲𑀢𑁆𑀢𑀥𑀸.

𑁧𑁧𑁭. 𑀲𑀩𑁆𑀩𑁂𑀯 𑀢𑁂 𑀥𑀫𑁆𑀫𑀕𑀼𑀡𑀸, 𑀭𑀸𑀚𑀧𑀼𑀢𑁆𑀢𑀺 𑀬𑀲𑀲𑁆𑀲𑀺𑀦𑀺;

𑀲𑀁𑀯𑀺𑀚𑁆𑀚𑀦𑁆𑀢𑀺 𑀢𑀬𑀺 𑀪𑀤𑁆𑀤𑁂, 𑀬𑁂 𑀢𑁆𑀯𑀁 𑀓𑀺𑀢𑁆𑀢𑁂𑀲𑀺 𑀅𑀢𑁆𑀢𑀦𑀺.

𑁧𑁧𑁮. 𑀔𑀢𑁆𑀢𑀺𑀬𑁄 𑀚𑀸𑀢𑀺𑀲𑀫𑁆𑀧𑀦𑁆𑀦𑁄, 𑀅𑀪𑀺𑀚𑀸𑀢𑁄 𑀬𑀲𑀲𑁆𑀲𑀺𑀫𑀸;

𑀥𑀫𑁆𑀫𑀭𑀸𑀚𑀸 𑀯𑀺𑀤𑁂𑀳𑀸𑀦𑀁, 𑀧𑀼𑀢𑁆𑀢𑁄 𑀉𑀧𑁆𑀧𑀚𑁆𑀚𑀢𑁂 𑀢𑀯 [𑀢𑀯𑀁 (𑀲𑀻. 𑀧𑀻.)].

𑁧𑁧𑁯. 𑀤𑀼𑀫𑁆𑀫𑀻 [𑀭𑀼𑀫𑁆𑀫𑀻 (𑀲𑀻. 𑀧𑀻.)] 𑀭𑀚𑁄𑀚𑀮𑁆𑀮𑀥𑀭𑁄, 𑀅𑀖𑁂 𑀯𑁂𑀳𑀸𑀬𑀲𑀁 𑀞𑀺𑀢𑁄;

𑀫𑀦𑀼𑀜𑁆𑀜𑀁 𑀪𑀸𑀲𑀲𑁂 𑀯𑀸𑀘𑀁, 𑀬𑀁 𑀫𑀬𑁆𑀳𑀁 𑀳𑀤𑀬𑀗𑁆𑀕𑀫𑀁.

𑁧𑁨𑁦. 𑀤𑁂𑀯𑀢𑀸𑀦𑀼𑀲𑀺 𑀲𑀕𑁆𑀕𑀫𑁆𑀳𑀸, 𑀇𑀲𑀺 𑀯𑀸𑀲𑀺 [𑀘𑀸𑀧𑀺 (𑀓.)] 𑀫𑀳𑀺𑀤𑁆𑀥𑀺𑀓𑁄;

𑀓𑁄 𑀯𑀸𑀲𑀺 𑀢𑁆𑀯𑀁 𑀅𑀦𑀼𑀧𑁆𑀧𑀢𑁆𑀢𑁄, 𑀅𑀢𑁆𑀢𑀸𑀦𑀁 𑀫𑁂 𑀧𑀯𑁂𑀤𑀬.

𑁧𑁨𑁧. 𑀬𑀁 𑀤𑁂𑀯𑀲𑀗𑁆𑀖𑀸 𑀯𑀦𑁆𑀤𑀦𑁆𑀢𑀺, 𑀲𑀼𑀥𑀫𑁆𑀫𑀸𑀬𑀁 𑀲𑀫𑀸𑀕𑀢𑀸;

𑀲𑁄𑀳𑀁 𑀲𑀓𑁆𑀓𑁄 𑀲𑀳𑀲𑁆𑀲𑀓𑁆𑀔𑁄, 𑀆𑀕𑀢𑁄𑀲𑁆𑀫𑀺 𑀢𑀯𑀦𑁆𑀢𑀺𑀓𑁂.

𑁧𑁨𑁨. 𑀇𑀢𑁆𑀣𑀺𑀬𑁄 [𑀇𑀢𑁆𑀣𑀺𑀬𑀸 (𑀧𑀻.)] 𑀚𑀻𑀯𑀮𑁄𑀓𑀲𑁆𑀫𑀺𑀁, 𑀬𑀸 𑀳𑁄𑀢𑀺 [𑀳𑁄𑀦𑁆𑀢𑀺 (𑀲𑀻. 𑀲𑁆𑀬𑀸.)] 𑀲𑀫𑀘𑀸𑀭𑀺𑀦𑀻 [𑀲𑀫𑀘𑀸𑀭𑀺𑀡𑀻 (𑀲𑀻.)];

𑀫𑁂𑀥𑀸𑀯𑀺𑀦𑀻 𑀲𑀻𑀮𑀯𑀢𑀻, 𑀲𑀲𑁆𑀲𑀼𑀤𑁂𑀯𑀸 𑀧𑀢𑀺𑀩𑁆𑀩𑀢𑀸.

𑁧𑁨𑁩. 𑀢𑀸𑀤𑀺𑀲𑀸𑀬 𑀲𑀼𑀫𑁂𑀥𑀸𑀬, 𑀲𑀼𑀘𑀺𑀓𑀫𑁆𑀫𑀸𑀬 𑀦𑀸𑀭𑀺𑀬𑀸;

𑀤𑁂𑀯𑀸 𑀤𑀲𑁆𑀲𑀦𑀫𑀸𑀬𑀦𑁆𑀢𑀺, 𑀫𑀸𑀦𑀼𑀲𑀺𑀬𑀸 𑀅𑀫𑀸𑀦𑀼𑀲𑀸.

𑁧𑁨𑁪. 𑀢𑁆𑀯𑀜𑁆𑀘 𑀪𑀤𑁆𑀤𑁂 𑀲𑀼𑀘𑀺𑀡𑁆𑀡𑁂𑀦, 𑀧𑀼𑀩𑁆𑀩𑁂 𑀲𑀼𑀘𑀭𑀺𑀢𑁂𑀦 𑀘;

𑀇𑀥 𑀭𑀸𑀚𑀓𑀼𑀮𑁂 𑀚𑀸𑀢𑀸, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀻.

𑁧𑁨𑁫. 𑀅𑀬𑀜𑁆𑀘 𑀢𑁂 𑀭𑀸𑀚𑀧𑀼𑀢𑁆𑀢𑀺, 𑀉𑀪𑀬𑀢𑁆𑀣 𑀓𑀝𑀕𑁆𑀕𑀳𑁄;

𑀤𑁂𑀯𑀮𑁄𑀓𑀽𑀧𑀧𑀢𑁆𑀢𑀻 𑀘, 𑀓𑀺𑀢𑁆𑀢𑀻 𑀘 𑀇𑀥 𑀚𑀻𑀯𑀺𑀢𑁂.

𑁧𑁨𑁬. 𑀘𑀺𑀭𑀁 𑀲𑀼𑀫𑁂𑀥𑁂 𑀲𑀼𑀔𑀺𑀦𑀻, 𑀥𑀫𑁆𑀫𑀫𑀢𑁆𑀢𑀦𑀺 𑀧𑀸𑀮𑀬;

𑀏𑀲𑀸𑀳𑀁 𑀢𑀺𑀤𑀺𑀯𑀁 𑀬𑀸𑀫𑀺, 𑀧𑀺𑀬𑀁 𑀫𑁂 𑀢𑀯 𑀤𑀲𑁆𑀲𑀦𑀦𑁆𑀢𑀺.

𑀲𑀼𑀭𑀼𑀘𑀺𑀚𑀸𑀢𑀓𑀁 𑀙𑀝𑁆𑀞𑀁.