𑁪𑁮𑁮. 𑀪𑀺𑀲𑀚𑀸𑀢𑀓𑀁 (𑁫)

𑁭𑁮. 𑀅𑀲𑁆𑀲𑀁 𑀕𑀯𑀁 𑀭𑀚𑀢𑀁 𑀚𑀸𑀢𑀭𑀽𑀧𑀁, 𑀪𑀭𑀺𑀬𑀜𑁆𑀘 𑀲𑁄 𑀇𑀥 𑀮𑀪𑀢𑀁 𑀫𑀦𑀸𑀧𑀁;

𑀧𑀼𑀢𑁆𑀢𑁂𑀳𑀺 𑀤𑀸𑀭𑁂𑀳𑀺 𑀲𑀫𑀗𑁆𑀕𑀺 𑀳𑁄𑀢𑀼, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

𑁭𑁯. 𑀫𑀸𑀮𑀜𑁆𑀘 𑀲𑁄 𑀓𑀸𑀲𑀺𑀓𑀘𑀦𑁆𑀤𑀦𑀜𑁆𑀘, 𑀥𑀸𑀭𑁂𑀢𑀼 𑀧𑀼𑀢𑁆𑀢𑀲𑁆𑀲 𑀩𑀳𑀽 𑀪𑀯𑀦𑁆𑀢𑀼;

𑀓𑀸𑀫𑁂𑀲𑀼 𑀢𑀺𑀩𑁆𑀩𑀁 𑀓𑀼𑀭𑀼𑀢𑀁 𑀅𑀧𑁂𑀓𑁆𑀔𑀁, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

𑁮𑁦. 𑀧𑀳𑀽𑀢𑀥𑀜𑁆𑀜𑁄 𑀓𑀲𑀺𑀫𑀸 𑀬𑀲𑀲𑁆𑀲𑀻, 𑀧𑀼𑀢𑁆𑀢𑁂 𑀕𑀺𑀳𑀻 𑀥𑀦𑀺𑀫𑀸 𑀲𑀩𑁆𑀩𑀓𑀸𑀫𑁂;

𑀯𑀬𑀁 𑀅𑀧𑀲𑁆𑀲𑀁 𑀖𑀭𑀫𑀸𑀯𑀲𑀸𑀢𑀼, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

𑁮𑁧. 𑀲𑁄 𑀔𑀢𑁆𑀢𑀺𑀬𑁄 𑀳𑁄𑀢𑀼 𑀧𑀲𑀬𑁆𑀳𑀓𑀸𑀭𑀻, 𑀭𑀸𑀚𑀸𑀪𑀺𑀭𑀸𑀚𑀸 [𑀭𑀸𑀚𑀸𑀥𑀺𑀭𑀸𑀚𑀸 (𑀲𑁆𑀬𑀸. 𑀓.)] 𑀩𑀮𑀯𑀸 𑀬𑀲𑀲𑁆𑀲𑀻;

𑀲 𑀘𑀸𑀢𑀼𑀭𑀦𑁆𑀢𑀁 𑀫𑀳𑀺𑀫𑀸𑀯𑀲𑀸𑀢𑀼, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

𑁮𑁨. 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀼 𑀅𑀯𑀻𑀢𑀭𑀸𑀕𑁄, 𑀫𑀼𑀳𑀼𑀢𑁆𑀢𑀦𑀓𑁆𑀔𑀢𑁆𑀢𑀧𑀣𑁂𑀲𑀼 𑀬𑀼𑀢𑁆𑀢𑁄;

𑀧𑀽𑀚𑁂𑀢𑀼 𑀦𑀁 𑀭𑀝𑁆𑀞𑀧𑀢𑀻 𑀬𑀲𑀲𑁆𑀲𑀻, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

𑁮𑁩. 𑀅𑀚𑁆𑀛𑀸𑀬𑀓𑀁 𑀲𑀩𑁆𑀩𑀲𑀫𑀦𑁆𑀢𑀯𑁂𑀤𑀁 [𑀲𑀩𑁆𑀩𑀲𑀫𑀢𑁆𑀢𑀯𑁂𑀤𑀁 (𑀲𑀻.), 𑀲𑀩𑁆𑀩𑀲𑀫𑀢𑁆𑀢𑀯𑁂𑀤𑀦𑀁 (𑀧𑀻.)], 𑀢𑀧𑀲𑁆𑀲𑀻𑀦𑀁 𑀫𑀜𑁆𑀜𑀢𑀼 𑀲𑀩𑁆𑀩𑀮𑁄𑀓𑁄;

𑀧𑀽𑀚𑁂𑀦𑁆𑀢𑀼 𑀦𑀁 𑀚𑀸𑀦𑀧𑀤𑀸 𑀲𑀫𑁂𑀘𑁆𑀘, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

𑁮𑁪. 𑀘𑀢𑀼𑀲𑁆𑀲𑀤𑀁 𑀕𑀸𑀫𑀯𑀭𑀁 𑀲𑀫𑀺𑀤𑁆𑀥𑀁, 𑀤𑀺𑀦𑁆𑀦𑀜𑁆𑀳𑀺 𑀲𑁄 𑀪𑀼𑀜𑁆𑀚𑀢𑀼 𑀯𑀸𑀲𑀯𑁂𑀦;

𑀅𑀯𑀻𑀢𑀭𑀸𑀕𑁄 𑀫𑀭𑀡𑀁 𑀉𑀧𑁂𑀢𑀼, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

𑁮𑁫. 𑀲𑁄 𑀕𑀸𑀫𑀡𑀻 𑀳𑁄𑀢𑀼 𑀲𑀳𑀸𑀬𑀫𑀚𑁆𑀛𑁂, 𑀦𑀘𑁆𑀘𑁂𑀳𑀺 𑀕𑀻𑀢𑁂𑀳𑀺 𑀧𑀫𑁄𑀤𑀫𑀸𑀦𑁄;

𑀲𑁄 𑀭𑀸𑀚𑀢𑁄 𑀩𑁆𑀬𑀲𑀦 𑀫𑀸𑀮𑀢𑁆𑀣 [𑀫𑀸 𑀭𑀸𑀚𑀢𑁄 𑀯𑁆𑀬𑀲𑀦’𑀫𑀮𑀢𑁆𑀣 (𑀲𑀻. 𑀲𑁆𑀬𑀸. 𑀧𑀻.)] 𑀓𑀺𑀜𑁆𑀘𑀺, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

𑁮𑁬. 𑀬𑀁 𑀏𑀓𑀭𑀸𑀚𑀸 𑀧𑀣𑀯𑀺𑀁 𑀯𑀺𑀚𑁂𑀢𑁆𑀯𑀸, 𑀇𑀢𑁆𑀣𑀻𑀲𑀳𑀲𑁆𑀲𑀸𑀦 [𑀇𑀢𑁆𑀣𑀻𑀲𑀳𑀲𑁆𑀲𑀲𑁆𑀲 (𑀲𑀻. 𑀧𑀻.)] 𑀞𑀧𑁂𑀢𑀼 𑀅𑀕𑁆𑀕𑀁;

𑀲𑀻𑀫𑀦𑁆𑀢𑀺𑀦𑀻𑀦𑀁 𑀧𑀯𑀭𑀸 𑀪𑀯𑀸𑀢𑀼, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑀸 𑀅𑀳𑀸𑀲𑀺.

𑁮𑁭. 𑀇𑀲𑀻𑀦𑀜𑁆𑀳𑀺 𑀲𑀸 𑀲𑀩𑁆𑀩𑀲𑀫𑀸𑀕𑀢𑀸𑀦𑀁, 𑀪𑀼𑀜𑁆𑀚𑁂𑀬𑁆𑀬 𑀲𑀸𑀤𑀼𑀁 𑀅𑀯𑀺𑀓𑀫𑁆𑀧𑀫𑀸𑀦𑀸;

𑀘𑀭𑀸𑀢𑀼 𑀮𑀸𑀪𑁂𑀦 𑀯𑀺𑀓𑀢𑁆𑀣𑀫𑀸𑀦𑀸, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑀸 𑀅𑀳𑀸𑀲𑀺.

𑁮𑁮. 𑀆𑀯𑀸𑀲𑀺𑀓𑁄 𑀳𑁄𑀢𑀼 𑀫𑀳𑀸𑀯𑀺𑀳𑀸𑀭𑁂, 𑀦𑀯𑀓𑀫𑁆𑀫𑀺𑀓𑁄 𑀳𑁄𑀢𑀼 𑀕𑀚𑀗𑁆𑀕𑀮𑀸𑀬𑀁 [𑀓𑀚𑀗𑁆𑀕𑀮𑀸𑀬𑀁 (𑀲𑀻. 𑀲𑁆𑀬𑀸. 𑀧𑀻.)];

𑀆𑀮𑁄𑀓𑀲𑀦𑁆𑀥𑀺𑀁 𑀤𑀺𑀯𑀲𑀁 [𑀤𑀺𑀯𑀲𑀸 (𑀲𑀻. 𑀲𑁆𑀬𑀸. 𑀧𑀻.)] 𑀓𑀭𑁄𑀢𑀼, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

𑁮𑁯. 𑀲𑁄 𑀩𑀚𑁆𑀛𑀢𑀽 𑀧𑀸𑀲𑀲𑀢𑁂𑀳𑀺 𑀙𑀩𑁆𑀪𑀺 [𑀙𑀫𑁆𑀳𑀺 (𑀲𑀻. 𑀧𑀻.), 𑀙𑀲𑁆𑀲𑀼 (?)], 𑀭𑀫𑁆𑀫𑀸 𑀯𑀦𑀸 𑀦𑀺𑀬𑁆𑀬𑀢𑀼 𑀭𑀸𑀚𑀥𑀸𑀦𑀺𑀁 [𑀭𑀸𑀚𑀞𑀸𑀦𑀺𑀁 (𑀓.)];

𑀢𑀼𑀢𑁆𑀢𑁂𑀳𑀺 𑀲𑁄 𑀳𑀜𑁆𑀜𑀢𑀼 𑀧𑀸𑀘𑀦𑁂𑀳𑀺, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

𑁯𑁦. 𑀅𑀮𑀓𑁆𑀓𑀫𑀸𑀮𑀻 𑀢𑀺𑀧𑀼𑀓𑀡𑁆𑀡𑀯𑀺𑀤𑁆𑀥𑁄, 𑀮𑀝𑁆𑀞𑀻𑀳𑀢𑁄 𑀲𑀧𑁆𑀧𑀫𑀼𑀔𑀁 𑀉𑀧𑁂𑀢𑀼;

𑀲𑀓𑀘𑁆𑀙𑀩𑀦𑁆𑀥𑁄 [𑀲𑀓𑁆𑀓𑀘𑁆𑀘𑀩𑀤𑁆𑀥𑁄 (𑀲𑀻. 𑀧𑀻.), 𑀲𑀁𑀓𑀘𑁆𑀘𑀩𑀦𑁆𑀥𑁄 (𑀦𑀺𑀬𑁆𑀬)] 𑀯𑀺𑀲𑀺𑀔𑀁 𑀘𑀭𑀸𑀢𑀼, 𑀪𑀺𑀲𑀸𑀦𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀬𑁄 𑀅𑀳𑀸𑀲𑀺.

𑁯𑁧. 𑀬𑁄 𑀯𑁂 𑀅𑀦𑀝𑁆𑀞𑀁𑀯 [𑀅𑀦𑀝𑁆𑀞𑀁 (𑀲𑀻. 𑀲𑁆𑀬𑀸. 𑀧𑀻.)] 𑀦𑀝𑁆𑀞𑀦𑁆𑀢𑀺 𑀘𑀸𑀳, 𑀓𑀸𑀫𑁂𑀯 𑀲𑁄 𑀮𑀪𑀢𑀁 𑀪𑀼𑀜𑁆𑀚𑀢𑀜𑁆𑀘 [𑀮𑀪𑀢𑀼 𑀪𑀼𑀜𑁆𑀚𑀢𑀼 𑀘 (𑀲𑁆𑀬𑀸.)];

𑀅𑀕𑀸𑀭𑀫𑀚𑁆𑀛𑁂 𑀫𑀭𑀡𑀁 𑀉𑀧𑁂𑀢𑀼, 𑀬𑁄 𑀯𑀸 𑀪𑁄𑀦𑁆𑀢𑁄 𑀲𑀗𑁆𑀓𑀢𑀺 𑀓𑀜𑁆𑀘𑀺𑀤𑁂𑀯 [𑀓𑀺𑀜𑁆𑀘𑀺𑀤𑁂𑀯 (𑀓.)].

𑁯𑁨. 𑀬𑀤𑁂𑀲𑀫𑀸𑀦𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂, 𑀇𑀝𑁆𑀞𑀜𑁆𑀘 𑀓𑀦𑁆𑀢𑀜𑁆𑀘 𑀩𑀳𑀽𑀦𑀫𑁂𑀢𑀁;

𑀧𑀺𑀬𑀁 𑀫𑀦𑀼𑀜𑁆𑀜𑀁 𑀘𑀺𑀥 𑀚𑀻𑀯𑀮𑁄𑀓𑁂, 𑀓𑀲𑁆𑀫𑀸 𑀇𑀲𑀬𑁄 𑀦𑀧𑁆𑀧𑀲𑀁𑀲𑀦𑁆𑀢𑀺 𑀓𑀸𑀫𑁂.

𑁯𑁩. 𑀓𑀸𑀫𑁂𑀲𑀼 𑀯𑁂 𑀳𑀜𑁆𑀜𑀭𑁂 𑀩𑀚𑁆𑀛𑀭𑁂 𑀘, 𑀓𑀸𑀫𑁂𑀲𑀼 𑀤𑀼𑀓𑁆𑀔𑀜𑁆𑀘 𑀪𑀬𑀜𑁆𑀘 𑀚𑀸𑀢𑀁;

𑀓𑀸𑀫𑁂𑀲𑀼 𑀪𑀽𑀢𑀸𑀥𑀺𑀧𑀢𑀻 𑀧𑀫𑀢𑁆𑀢𑀸, 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺 𑀫𑁄𑀳𑀸.

𑁯𑁪. 𑀢𑁂 𑀧𑀸𑀧𑀥𑀫𑁆𑀫𑀸 𑀧𑀲𑀯𑁂𑀢𑁆𑀯 𑀧𑀸𑀧𑀁, 𑀓𑀸𑀬𑀲𑁆𑀲 𑀪𑁂𑀤𑀸 𑀦𑀺𑀭𑀬𑀁 𑀯𑀚𑀦𑁆𑀢𑀺;

𑀆𑀤𑀻𑀦𑀯𑀁 𑀓𑀸𑀫𑀕𑀼𑀡𑁂𑀲𑀼 𑀤𑀺𑀲𑁆𑀯𑀸, 𑀢𑀲𑁆𑀫𑀸 𑀇𑀲𑀬𑁄 𑀦𑀧𑁆𑀧𑀲𑀁𑀲𑀦𑁆𑀢𑀺 𑀓𑀸𑀫𑁂.

𑁯𑁫. 𑀯𑀻𑀫𑀁𑀲𑀫𑀸𑀦𑁄 𑀇𑀲𑀺𑀦𑁄 𑀪𑀺𑀲𑀸𑀦𑀺, 𑀢𑀻𑀭𑁂 𑀕𑀳𑁂𑀢𑁆𑀯𑀸𑀦 𑀣𑀮𑁂 𑀦𑀺𑀥𑁂𑀲𑀺𑀁;

𑀲𑀼𑀤𑁆𑀥𑀸 𑀅𑀧𑀸𑀧𑀸 𑀇𑀲𑀬𑁄 𑀯𑀲𑀦𑁆𑀢𑀺, 𑀏𑀢𑀸𑀦𑀺 𑀢𑁂 𑀩𑁆𑀭𑀳𑁆𑀫𑀘𑀸𑀭𑀻 𑀪𑀺𑀲𑀸𑀦𑀺.

𑁯𑁬. 𑀦 𑀢𑁂 𑀦𑀝𑀸 𑀦𑁄 𑀧𑀦 𑀓𑀻𑀴𑀦𑁂𑀬𑁆𑀬𑀸, 𑀦 𑀩𑀦𑁆𑀥𑀯𑀸 𑀦𑁄 𑀧𑀦 𑀢𑁂 𑀲𑀳𑀸𑀬𑀸;

𑀓𑀺𑀲𑁆𑀫𑀺𑀁 𑀯𑀼𑀧𑀢𑁆𑀣𑀫𑁆𑀪 𑀲𑀳𑀲𑁆𑀲𑀦𑁂𑀢𑁆𑀢, 𑀇𑀲𑀻𑀳𑀺 𑀢𑁆𑀯𑀁 𑀓𑀻𑀴𑀲𑀺 𑀤𑁂𑀯𑀭𑀸𑀚.

𑁯𑁭. 𑀆𑀘𑀭𑀺𑀬𑁄 𑀫𑁂𑀲𑀺 𑀧𑀺𑀢𑀸 𑀘 𑀫𑀬𑁆𑀳𑀁, 𑀏𑀲𑀸 𑀧𑀢𑀺𑀝𑁆𑀞𑀸 𑀔𑀮𑀺𑀢𑀲𑁆𑀲 𑀩𑁆𑀭𑀳𑁆𑀫𑁂;

𑀏𑀓𑀸𑀧𑀭𑀸𑀥𑀁 𑀔𑀫 𑀪𑀽𑀭𑀺𑀧𑀜𑁆𑀜, 𑀦 𑀧𑀡𑁆𑀟𑀺𑀢𑀸 𑀓𑁄𑀥𑀩𑀮𑀸 𑀪𑀯𑀦𑁆𑀢𑀺.

𑁯𑁮. 𑀲𑀼𑀯𑀸𑀲𑀺𑀢𑀁 𑀇𑀲𑀺𑀦𑀁 𑀏𑀓𑀭𑀢𑁆𑀢𑀁, 𑀬𑀁 𑀯𑀸𑀲𑀯𑀁 𑀪𑀽𑀢𑀧𑀢𑀺𑀤𑁆𑀤𑀲𑀸𑀫;

𑀲𑀩𑁆𑀩𑁂𑀯 𑀪𑁄𑀦𑁆𑀢𑁄 𑀲𑀼𑀫𑀦𑀸 𑀪𑀯𑀦𑁆𑀢𑀼, 𑀬𑀁 𑀩𑁆𑀭𑀸𑀳𑁆𑀫𑀡𑁄 𑀧𑀘𑁆𑀘𑀼𑀧𑀸𑀤𑀻 𑀪𑀺𑀲𑀸𑀦𑀺.

𑁯𑁯. 𑀅𑀳𑀜𑁆𑀘 𑀲𑀸𑀭𑀺𑀧𑀼𑀢𑁆𑀢𑁄 𑀘, 𑀫𑁄𑀕𑁆𑀕𑀮𑁆𑀮𑀸𑀦𑁄 𑀘 𑀓𑀲𑁆𑀲𑀧𑁄;

𑀅𑀦𑀼𑀭𑀼𑀤𑁆𑀥𑁄 𑀧𑀼𑀡𑁆𑀡𑁄 𑀆𑀦𑀦𑁆𑀤𑁄, 𑀢𑀤𑀸𑀲𑀼𑀁 𑀲𑀢𑁆𑀢 𑀪𑀸𑀢𑀭𑁄.

𑁧𑁦𑁦. 𑀪𑀕𑀺𑀦𑀻 𑀉𑀧𑁆𑀧𑀮𑀯𑀡𑁆𑀡𑀸 𑀘, 𑀤𑀸𑀲𑀻 𑀔𑀼𑀚𑁆𑀚𑀼𑀢𑁆𑀢𑀭𑀸 𑀢𑀤𑀸;

𑀘𑀺𑀢𑁆𑀢𑁄 𑀕𑀳𑀧𑀢𑀺 𑀤𑀸𑀲𑁄, 𑀬𑀓𑁆𑀔𑁄 𑀲𑀸𑀢𑀸𑀕𑀺𑀭𑁄 𑀢𑀤𑀸.

𑁧𑁦𑁧. 𑀧𑀸𑀮𑀺𑀮𑁂𑀬𑁆𑀬𑁄 [𑀧𑀸𑀭𑀺𑀮𑁂𑀬𑁆𑀬𑁄 (𑀲𑀻. 𑀧𑀻.)] 𑀢𑀤𑀸 𑀦𑀸𑀕𑁄, 𑀫𑀥𑀼𑀤𑁄 [𑀫𑀥𑀼𑀯𑀸 (𑀲𑀻. 𑀧𑀻.)] 𑀲𑁂𑀝𑁆𑀞𑀯𑀸𑀦𑀭𑁄;

𑀓𑀸𑀴𑀼𑀤𑀸𑀬𑀻 𑀢𑀤𑀸 𑀲𑀓𑁆𑀓𑁄, 𑀏𑀯𑀁 𑀥𑀸𑀭𑁂𑀣 𑀚𑀸𑀢𑀓𑀦𑁆𑀢𑀺.

𑀪𑀺𑀲𑀚𑀸𑀢𑀓𑀁 𑀧𑀜𑁆𑀘𑀫𑀁.