𑁪𑁮𑁭. 𑀉𑀤𑁆𑀤𑀸𑀮𑀓𑀚𑀸𑀢𑀓𑀁 (𑁪)

𑁬𑁨. 𑀔𑀭𑀸𑀚𑀺𑀦𑀸 𑀚𑀝𑀺𑀮𑀸 𑀧𑀗𑁆𑀓𑀤𑀦𑁆𑀢𑀸, 𑀤𑀼𑀫𑁆𑀫𑀓𑁆𑀔𑀭𑀽𑀧𑀸 [𑀤𑀼𑀫𑁆𑀫𑀼𑀥𑀭𑀽𑀧𑀸 (𑀲𑀻. 𑀧𑀻. 𑀓.)] 𑀬𑁂 𑀫𑀦𑁆𑀢𑀁 𑀚𑀧𑁆𑀧𑀦𑁆𑀢𑀺 [𑀬𑁂𑀫𑁂 𑀚𑀧𑀦𑁆𑀢𑀺 (𑀲𑀻. 𑀧𑀻.), 𑀬𑁂’𑀫𑁂 𑀚𑀧𑁆𑀧𑀦𑁆𑀢𑀺 𑀫𑀦𑁆𑀢𑁂 (𑀚𑀸. 𑁧.𑁬.𑁧𑁦)];

𑀓𑀘𑁆𑀘𑀺𑀦𑁆𑀦𑀼 𑀢𑁂 𑀫𑀸𑀦𑀼𑀲𑀓𑁂 𑀧𑀬𑁄𑀕𑁂, 𑀇𑀤𑀁 𑀯𑀺𑀤𑀽 𑀧𑀭𑀺𑀫𑀼𑀢𑁆𑀢𑀸 𑀅𑀧𑀸𑀬𑀸.

𑁬𑁩. 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁂𑀣 [𑀓𑀭𑁂𑀬𑁆𑀬 (𑀲𑁆𑀬𑀸.), 𑀓𑀢𑁆𑀯𑀸𑀦 (𑀚𑀸. 𑁧.𑁬.𑁧𑁧)] 𑀭𑀸𑀚, 𑀩𑀳𑀼𑀲𑁆𑀲𑀼𑀢𑁄 𑀘𑁂 𑀦 𑀘𑀭𑁂𑀬𑁆𑀬 𑀥𑀫𑁆𑀫𑀁;

𑀲𑀳𑀲𑁆𑀲𑀯𑁂𑀤𑁄𑀧𑀺 𑀦 𑀢𑀁 𑀧𑀝𑀺𑀘𑁆𑀘, 𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑁂 [𑀧𑀫𑀼𑀜𑁆𑀘𑁂 (𑀲𑁆𑀬𑀸.)] 𑀘𑀭𑀡𑀁 𑀅𑀧𑀢𑁆𑀯𑀸.

𑁬𑁪. 𑀲𑀳𑀲𑁆𑀲𑀯𑁂𑀤𑁄𑀧𑀺 𑀦 𑀢𑀁 𑀧𑀝𑀺𑀘𑁆𑀘, 𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑁂 𑀘𑀭𑀡𑀁 𑀅𑀧𑀢𑁆𑀯𑀸;

𑀫𑀜𑁆𑀜𑀸𑀫𑀺 𑀯𑁂𑀤𑀸 𑀅𑀨𑀮𑀸 𑀪𑀯𑀦𑁆𑀢𑀺, 𑀲𑀲𑀁𑀬𑀫𑀁 𑀘𑀭𑀡𑀜𑁆𑀜𑁂𑀯 𑀲𑀘𑁆𑀘𑀁.

𑁬𑁫. 𑀦 𑀳𑁂𑀯 𑀯𑁂𑀤𑀸 𑀅𑀨𑀮𑀸 𑀪𑀯𑀦𑁆𑀢𑀺, 𑀲𑀲𑀁𑀬𑀫𑀁 𑀘𑀭𑀡𑀜𑁆𑀜𑁂𑀯 𑀲𑀘𑁆𑀘𑀁;

𑀓𑀺𑀢𑁆𑀢𑀺𑀜𑁆𑀳𑀺 [𑀓𑀺𑀢𑁆𑀢𑀺𑀜𑁆𑀘 (𑀲𑁆𑀬𑀸.)] 𑀧𑀧𑁆𑀧𑁄𑀢𑀺 𑀅𑀥𑀺𑀘𑁆𑀘 𑀯𑁂𑀤𑁂, 𑀲𑀦𑁆𑀢𑀺𑀁 𑀧𑀼𑀡𑀸𑀢𑀺 [𑀧𑀼𑀦𑁄𑀢𑀺 (𑀲𑀻. 𑀅𑀝𑁆𑀞.), 𑀧𑀼𑀡𑁂𑀢𑀺 (𑀲𑁆𑀬𑀸. 𑀚𑀸. 𑁧.𑁬.𑁧𑁩), 𑀧𑀼𑀦𑁂𑀢𑀺 (𑀧𑀻.)] 𑀘𑀭𑀡𑁂𑀦 𑀤𑀦𑁆𑀢𑁄.

𑁬𑁬. 𑀪𑀘𑁆𑀘𑀸 𑀫𑀸𑀢𑀸 𑀧𑀺𑀢𑀸 𑀩𑀦𑁆𑀥𑀽, 𑀬𑁂𑀦 𑀚𑀸𑀢𑁄 𑀲𑀬𑁂𑀯 𑀲𑁄;

𑀉𑀤𑁆𑀤𑀸𑀮𑀓𑁄 𑀅𑀳𑀁 𑀪𑁄𑀢𑁄 [𑀪𑁄𑀢𑀺 (𑀓.)], 𑀲𑁄𑀢𑁆𑀢𑀺𑀬𑀸𑀓𑀼𑀮𑀯𑀁𑀲𑀓𑁄 [𑀯𑀁𑀲𑀢𑁄 (𑀓.)].

𑁬𑁭. 𑀓𑀣𑀁 𑀪𑁄 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺, 𑀓𑀣𑀁 𑀪𑀯𑀢𑀺 𑀓𑁂𑀯𑀮𑀻;

𑀓𑀣𑀜𑁆𑀘 𑀧𑀭𑀺𑀦𑀺𑀩𑁆𑀩𑀸𑀦𑀁, 𑀥𑀫𑁆𑀫𑀝𑁆𑀞𑁄 𑀓𑀺𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁬𑁮. 𑀦𑀺𑀭𑀁𑀓𑀢𑁆𑀯𑀸 𑀅𑀕𑁆𑀕𑀺𑀫𑀸𑀤𑀸𑀬 𑀩𑁆𑀭𑀸𑀳𑁆𑀫𑀡𑁄, 𑀆𑀧𑁄 𑀲𑀺𑀜𑁆𑀘𑀁 𑀬𑀚𑀁 𑀉𑀲𑁆𑀲𑁂𑀢𑀺 𑀬𑀽𑀧𑀁;

𑀏𑀯𑀁𑀓𑀭𑁄 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺 𑀔𑁂𑀫𑀻, 𑀥𑀫𑁆𑀫𑁂 𑀞𑀺𑀢𑀁 𑀢𑁂𑀦 𑀅𑀫𑀸𑀧𑀬𑀺𑀁𑀲𑀼.

𑁬𑁯. 𑀦 𑀲𑀼𑀤𑁆𑀥𑀺 𑀲𑁂𑀘𑀦𑁂𑀦𑀢𑁆𑀣𑀺, 𑀦𑀸𑀧𑀺 𑀓𑁂𑀯𑀮𑀻 𑀩𑁆𑀭𑀸𑀳𑁆𑀫𑀡𑁄;

𑀦 𑀔𑀦𑁆𑀢𑀻 𑀦𑀸𑀧𑀺 𑀲𑁄𑀭𑀘𑁆𑀘𑀁, 𑀦𑀸𑀧𑀺 𑀲𑁄 𑀧𑀭𑀺𑀦𑀺𑀩𑁆𑀩𑀼𑀢𑁄.

𑁭𑁦. 𑀓𑀣𑀁 𑀲𑁄 [𑀪𑁄 (𑀲𑁆𑀬𑀸. 𑀓.)] 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺, 𑀓𑀣𑀁 𑀪𑀯𑀢𑀺 𑀓𑁂𑀯𑀮𑀻;

𑀓𑀣𑀜𑁆𑀘 𑀧𑀭𑀺𑀦𑀺𑀩𑁆𑀩𑀸𑀦𑀁, 𑀥𑀫𑁆𑀫𑀝𑁆𑀞𑁄 𑀓𑀺𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁭𑁧. 𑀅𑀔𑁂𑀢𑁆𑀢𑀩𑀦𑁆𑀥𑀽 𑀅𑀫𑀫𑁄 𑀦𑀺𑀭𑀸𑀲𑁄, 𑀦𑀺𑀮𑁆𑀮𑁄𑀪𑀧𑀸𑀧𑁄 𑀪𑀯𑀮𑁄𑀪𑀔𑀻𑀡𑁄;

𑀏𑀯𑀁𑀓𑀭𑁄 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺 𑀔𑁂𑀫𑀻, 𑀥𑀫𑁆𑀫𑁂 𑀞𑀺𑀢𑀁 𑀢𑁂𑀦 𑀅𑀫𑀸𑀧𑀬𑀺𑀁𑀲𑀼.

𑁭𑁨. 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀯𑁂𑀲𑁆𑀲𑀸, 𑀲𑀼𑀤𑁆𑀤𑀸 𑀘𑀡𑁆𑀟𑀸𑀮𑀧𑀼𑀓𑁆𑀓𑀼𑀲𑀸;

𑀲𑀩𑁆𑀩𑁂𑀯 𑀲𑁄𑀭𑀢𑀸 𑀤𑀦𑁆𑀢𑀸, 𑀲𑀩𑁆𑀩𑁂𑀯 𑀧𑀭𑀺𑀦𑀺𑀩𑁆𑀩𑀼𑀢𑀸;

𑀲𑀩𑁆𑀩𑁂𑀲𑀁 𑀲𑀻𑀢𑀺𑀪𑀽𑀢𑀸𑀦𑀁, 𑀅𑀢𑁆𑀣𑀺 𑀲𑁂𑀬𑁆𑀬𑁄𑀣 [𑀲𑁂𑀬𑁆𑀬𑁄𑀯 (𑀲𑀻. 𑀧𑀻.)] 𑀧𑀸𑀧𑀺𑀬𑁄.

𑁭𑁩. 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀯𑁂𑀲𑁆𑀲𑀸, 𑀲𑀼𑀤𑁆𑀤𑀸 𑀘𑀡𑁆𑀟𑀸𑀮𑀧𑀼𑀓𑁆𑀓𑀼𑀲𑀸;

𑀲𑀩𑁆𑀩𑁂𑀯 𑀲𑁄𑀭𑀢𑀸 𑀤𑀦𑁆𑀢𑀸, 𑀲𑀩𑁆𑀩𑁂𑀯 𑀧𑀭𑀺𑀦𑀺𑀩𑁆𑀩𑀼𑀢𑀸;

𑀲𑀩𑁆𑀩𑁂𑀲𑀁 𑀲𑀻𑀢𑀺𑀪𑀽𑀢𑀸𑀦𑀁, 𑀦𑀢𑁆𑀣𑀺 𑀲𑁂𑀬𑁆𑀬𑁄𑀣 𑀧𑀸𑀧𑀺𑀬𑁄.

𑁭𑁪. 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀯𑁂𑀲𑁆𑀲𑀸, 𑀲𑀼𑀤𑁆𑀤𑀸 𑀘𑀡𑁆𑀟𑀸𑀮𑀧𑀼𑀓𑁆𑀓𑀼𑀲𑀸;

𑀲𑀩𑁆𑀩𑁂𑀯 𑀲𑁄𑀭𑀢𑀸 𑀤𑀦𑁆𑀢𑀸, 𑀲𑀩𑁆𑀩𑁂𑀯 𑀧𑀭𑀺𑀦𑀺𑀩𑁆𑀩𑀼𑀢𑀸.

𑁭𑁫. 𑀲𑀩𑁆𑀩𑁂𑀲𑀁 𑀲𑀻𑀢𑀺𑀪𑀽𑀢𑀸𑀦𑀁, 𑀦𑀢𑁆𑀣𑀺 𑀲𑁂𑀬𑁆𑀬𑁄𑀣 𑀧𑀸𑀧𑀺𑀬𑁄;

𑀧𑀦𑀢𑁆𑀣𑀁 [𑀧𑀲𑀢𑁆𑀣𑀁 (𑀲𑁆𑀬𑀸.), 𑀧𑀲𑀝𑁆𑀞𑀁 (𑀓.)] 𑀘𑀭𑀲𑀺 𑀩𑁆𑀭𑀳𑁆𑀫𑀜𑁆𑀜𑀁, 𑀲𑁄𑀢𑁆𑀢𑀺𑀬𑀸𑀓𑀼𑀮𑀯𑀁𑀲𑀢𑀁.

𑁭𑁬. 𑀦𑀸𑀦𑀸𑀭𑀢𑁆𑀢𑁂𑀳𑀺 𑀯𑀢𑁆𑀣𑁂𑀳𑀺, 𑀯𑀺𑀫𑀸𑀦𑀁 𑀪𑀯𑀢𑀺 𑀙𑀸𑀤𑀺𑀢𑀁;

𑀦 𑀢𑁂𑀲𑀁 𑀙𑀸𑀬𑀸 𑀯𑀢𑁆𑀣𑀸𑀦𑀁, 𑀲𑁄 𑀭𑀸𑀕𑁄 𑀅𑀦𑀼𑀧𑀚𑁆𑀚𑀣.

𑁭𑁭. 𑀏𑀯𑀫𑁂𑀯 [𑀏𑀯𑀫𑁂𑀯𑀁 (𑀧𑀻.)] 𑀫𑀦𑀼𑀲𑁆𑀲𑁂𑀲𑀼, 𑀬𑀤𑀸 𑀲𑀼𑀚𑁆𑀛𑀦𑁆𑀢𑀺 𑀫𑀸𑀡𑀯𑀸;

𑀢𑁂 𑀲𑀚𑀸𑀢𑀺𑀁 𑀧𑀫𑀼𑀜𑁆𑀘𑀦𑁆𑀢𑀺 [𑀦 𑀢𑁂𑀲𑀁 𑀚𑀸𑀢𑀺𑀁 𑀧𑀼𑀘𑁆𑀙𑀦𑁆𑀢𑀺 (𑀲𑀻. 𑀲𑁆𑀬𑀸. 𑀧𑀻.), 𑀦 𑀢𑁂𑀲𑀁 𑀚𑀸𑀢𑀺 𑀲𑀼𑀚𑁆𑀛𑀢𑀺 (𑀓.)], 𑀥𑀫𑁆𑀫𑀫𑀜𑁆𑀜𑀸𑀬 𑀲𑀼𑀩𑁆𑀩𑀢𑀸𑀢𑀺.

𑀉𑀤𑁆𑀤𑀸𑀮𑀓𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.