𑁪𑁮𑁬. 𑀫𑀳𑀸𑀉𑀓𑁆𑀓𑀼𑀲𑀚𑀸𑀢𑀓𑀁 (𑁩)

𑁪𑁪. 𑀉𑀓𑁆𑀓𑀸 𑀘𑀺𑀮𑀸𑀘𑀸 [𑀫𑀺𑀮𑀸𑀘𑀸 (𑀲𑀻. 𑀲𑁆𑀬𑀸. 𑀧𑀻.)] 𑀩𑀦𑁆𑀥𑀦𑁆𑀢𑀺 𑀤𑀻𑀧𑁂 [𑀩𑀦𑁆𑀥𑀦𑁆𑀢𑀺 𑀮𑀼𑀤𑁆𑀤𑀸, 𑀤𑀻𑀧𑁂 (𑀓.)], 𑀧𑀚𑀸 𑀫𑀫𑀁 𑀔𑀸𑀤𑀺𑀢𑀼𑀁 𑀧𑀢𑁆𑀣𑀬𑀦𑁆𑀢𑀺;

𑀫𑀺𑀢𑁆𑀢𑀁 𑀲𑀳𑀸𑀬𑀜𑁆𑀘 𑀯𑀤𑁂𑀳𑀺 𑀲𑁂𑀦𑀓, 𑀆𑀘𑀺𑀓𑁆𑀔 𑀜𑀸𑀢𑀺𑀩𑁆𑀬𑀲𑀦𑀁 𑀤𑀺𑀚𑀸𑀦𑀁.

𑁪𑁫. 𑀤𑀺𑀚𑁄 𑀤𑀺𑀚𑀸𑀦𑀁 𑀧𑀯𑀭𑁄𑀲𑀺 𑀧𑀓𑁆𑀔𑀺𑀫 [𑀧𑀓𑁆𑀔𑀺 (𑀲𑀻. 𑀧𑀻.), 𑀧𑀓𑁆𑀔𑀺 𑀘 (𑀲𑁆𑀬𑀸.)], 𑀉𑀓𑁆𑀓𑀼𑀲𑀭𑀸𑀚 𑀲𑀭𑀡𑀁 𑀢𑀁 𑀉𑀧𑁂𑀫 [𑀉𑀧𑁂𑀫𑀺 (𑀲𑀻. 𑀲𑁆𑀬𑀸. 𑀧𑀻.)];

𑀧𑀚𑀸 𑀫𑀫𑀁 𑀔𑀸𑀤𑀺𑀢𑀼𑀁 𑀧𑀢𑁆𑀣𑀬𑀦𑁆𑀢𑀺, 𑀮𑀼𑀤𑁆𑀤𑀸 𑀘𑀺𑀮𑀸𑀘𑀸 [𑀫𑀺𑀮𑀸𑀘𑀸 (𑀲𑀻. 𑀲𑁆𑀬𑀸. 𑀧𑀻.)] 𑀪𑀯 𑀫𑁂 𑀲𑀼𑀔𑀸𑀬.

𑁪𑁬. 𑀫𑀺𑀢𑁆𑀢𑀁 𑀲𑀳𑀸𑀬𑀜𑁆𑀘 𑀓𑀭𑁄𑀦𑁆𑀢𑀺 𑀧𑀡𑁆𑀟𑀺𑀢𑀸, 𑀓𑀸𑀮𑁂 𑀅𑀓𑀸𑀮𑁂 𑀲𑀼𑀔𑀫𑁂𑀲𑀫𑀸𑀦𑀸 [𑀫𑀸𑀲𑀬𑀸𑀦𑀸 (𑀧𑀻.)];

𑀓𑀭𑁄𑀫𑀺 𑀢𑁂 𑀲𑁂𑀦𑀓 𑀏𑀢𑀫𑀢𑁆𑀣𑀁, 𑀅𑀭𑀺𑀬𑁄 𑀳𑀺 𑀅𑀭𑀺𑀬𑀲𑁆𑀲 𑀓𑀭𑁄𑀢𑀺 𑀓𑀺𑀘𑁆𑀘𑀁.

𑁪𑁭. 𑀬𑀁 𑀳𑁄𑀢𑀺 𑀓𑀺𑀘𑁆𑀘𑀁 𑀅𑀦𑀼𑀓𑀫𑁆𑀧𑀓𑁂𑀦, 𑀅𑀭𑀺𑀬𑀲𑁆𑀲 𑀅𑀭𑀺𑀬𑁂𑀦 𑀓𑀢𑀁 𑀢𑀬𑀻𑀤𑀁 [𑀢𑀯 𑀬𑀺𑀤𑀁 (𑀲𑀻. 𑀧𑀻.)];

𑀅𑀢𑁆𑀢𑀸𑀦𑀼𑀭𑀓𑁆𑀔𑀻 𑀪𑀯 𑀫𑀸 𑀅𑀤𑀬𑁆𑀳𑀺 [𑀅𑀟𑀬𑁆𑀳 (𑀲𑀻. 𑀧𑀻.)], 𑀮𑀘𑁆𑀙𑀸𑀫 𑀧𑀼𑀢𑁆𑀢𑁂 𑀢𑀬𑀺 𑀚𑀻𑀯𑀫𑀸𑀦𑁂.

𑁪𑁮. 𑀢𑀯𑁂𑀯 [𑀢𑀫𑁂𑀯 (𑀲𑁆𑀬𑀸. 𑀓.)] 𑀭𑀓𑁆𑀔𑀸𑀯𑀭𑀡𑀁 𑀓𑀭𑁄𑀦𑁆𑀢𑁄, 𑀲𑀭𑀻𑀭𑀪𑁂𑀤𑀸𑀧𑀺 𑀦 𑀲𑀦𑁆𑀢𑀲𑀸𑀫𑀺;

𑀓𑀭𑁄𑀦𑁆𑀢𑀺 𑀳𑁂𑀓𑁂 [𑀳𑁂𑀢𑁂 (𑀓. 𑀲𑀻. 𑀲𑁆𑀬𑀸. 𑀧𑀻.)] 𑀲𑀔𑀻𑀦𑀁 𑀲𑀔𑀸𑀭𑁄, 𑀧𑀸𑀡𑀁 𑀘𑀚𑀦𑁆𑀢𑀸 [𑀘𑀚𑀦𑁆𑀢𑀺 (𑀲𑀻. 𑀧𑀻.)] 𑀲𑀢𑀫𑁂𑀲 [𑀲𑀢𑀸𑀦𑁂𑀲 (𑀧𑀻.)] 𑀥𑀫𑁆𑀫𑁄.

𑁪𑁯. 𑀲𑀼𑀤𑀼𑀓𑁆𑀓𑀭𑀁 𑀓𑀫𑁆𑀫𑀫𑀓𑀸𑀲𑀺 [𑀫𑀓𑀸 (𑀲𑀻. 𑀧𑀻.)], 𑀅𑀡𑁆𑀟𑀚𑀸𑀬𑀁 𑀯𑀺𑀳𑀗𑁆𑀕𑀫𑁄;

𑀅𑀢𑁆𑀣𑀸𑀬 𑀓𑀼𑀭𑀭𑁄 𑀧𑀼𑀢𑁆𑀢𑁂, 𑀅𑀟𑁆𑀠𑀭𑀢𑁆𑀢𑁂 𑀅𑀦𑀸𑀕𑀢𑁂.

𑁫𑁦. 𑀘𑀼𑀢𑀸𑀧𑀺 𑀳𑁂𑀓𑁂 [𑀏𑀓𑁂 (𑀲𑀻. 𑀧𑀻.)] 𑀔𑀮𑀺𑀢𑀸 𑀲𑀓𑀫𑁆𑀫𑀼𑀦𑀸, 𑀫𑀺𑀢𑁆𑀢𑀸𑀦𑀼𑀓𑀫𑁆𑀧𑀸𑀬 𑀧𑀢𑀺𑀝𑁆𑀞𑀳𑀦𑁆𑀢𑀺;

𑀧𑀼𑀢𑁆𑀢𑀸 𑀫𑀫𑀝𑁆𑀝𑀸 𑀕𑀢𑀺𑀫𑀸𑀕𑀢𑁄𑀲𑁆𑀫𑀺, 𑀅𑀢𑁆𑀣𑀁 𑀘𑀭𑁂𑀣𑁄 [𑀘𑀭𑁂𑀣 (𑀲𑀻. 𑀲𑁆𑀬𑀸. 𑀧𑀻.)] 𑀫𑀫 𑀯𑀸𑀭𑀺𑀘𑀭 [𑀯𑀸𑀭𑀺𑀙𑀦𑁆𑀦 (𑀲𑀻. 𑀧𑀻.)].

𑁫𑁧. 𑀥𑀦𑁂𑀦 𑀥𑀜𑁆𑀜𑁂𑀦 𑀘 𑀅𑀢𑁆𑀢𑀦𑀸 𑀘, 𑀫𑀺𑀢𑁆𑀢𑀁 𑀲𑀳𑀸𑀬𑀜𑁆𑀘 𑀓𑀭𑁄𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀓𑀭𑁄𑀫𑀺 𑀢𑁂 𑀲𑁂𑀦𑀓 𑀏𑀢𑀫𑀢𑁆𑀣𑀁, 𑀅𑀭𑀺𑀬𑁄 𑀳𑀺 𑀅𑀭𑀺𑀬𑀲𑁆𑀲 𑀓𑀭𑁄𑀢𑀺 𑀓𑀺𑀘𑁆𑀘𑀁.

𑁫𑁨. 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀢𑀸𑀢 𑀢𑀼𑀯𑀁 𑀦𑀺𑀲𑀻𑀤, 𑀧𑀼𑀢𑁆𑀢𑁄 𑀧𑀺𑀢𑀼 𑀘𑀭𑀢𑀺 𑀅𑀢𑁆𑀣𑀘𑀭𑀺𑀬𑀁;

𑀅𑀳𑀁 𑀘𑀭𑀺𑀲𑁆𑀲𑀸𑀫𑀺 𑀢𑀯𑁂𑀢𑀫𑀢𑁆𑀣𑀁, 𑀲𑁂𑀦𑀲𑁆𑀲 𑀧𑀼𑀢𑁆𑀢𑁂 𑀧𑀭𑀺𑀢𑀸𑀬𑀫𑀸𑀦𑁄.

𑁫𑁩. 𑀅𑀤𑁆𑀥𑀸 𑀳𑀺 𑀢𑀸𑀢 𑀲𑀢𑀫𑁂𑀲 𑀥𑀫𑁆𑀫𑁄, 𑀧𑀼𑀢𑁆𑀢𑁄 𑀧𑀺𑀢𑀼 𑀬𑀁 𑀘𑀭𑁂 [𑀧𑀺𑀢𑀼𑀦𑀁 𑀘𑀭𑁂 (𑀓.), 𑀧𑀺𑀢𑀼 𑀬𑀜𑁆𑀘𑀭𑁂𑀣 (𑀲𑀻. 𑀧𑀻.)] 𑀅𑀢𑁆𑀣𑀘𑀭𑀺𑀬𑀁;

𑀅𑀧𑁆𑀧𑁂𑀯 𑀫𑀁 𑀤𑀺𑀲𑁆𑀯𑀸𑀦 𑀧𑀯𑀟𑁆𑀠𑀓𑀸𑀬𑀁, 𑀲𑁂𑀦𑀲𑁆𑀲 𑀧𑀼𑀢𑁆𑀢𑀸 𑀦 𑀯𑀺𑀳𑁂𑀞𑀬𑁂𑀬𑁆𑀬𑀼𑀁.

𑁫𑁪. 𑀧𑀲𑀽 𑀫𑀦𑀼𑀲𑁆𑀲𑀸 𑀫𑀺𑀕𑀯𑀻𑀭𑀲𑁂𑀝𑁆𑀞 [𑀫𑀺𑀕𑀯𑀺𑀭𑀺𑀬𑀲𑁂𑀝𑁆𑀞 (𑀲𑀻. 𑀧𑀻.)], 𑀪𑀬𑀝𑁆𑀝𑀺𑀢𑀸 [𑀪𑀬𑀤𑁆𑀤𑀺𑀢𑀸 (𑀲𑀻. 𑀧𑀻.)] 𑀲𑁂𑀝𑁆𑀞𑀫𑀼𑀧𑀩𑁆𑀩𑀚𑀦𑁆𑀢𑀺;

𑀧𑀼𑀢𑁆𑀢𑀸 𑀫𑀫𑀝𑁆𑀝𑀸 𑀕𑀢𑀺𑀫𑀸𑀕𑀢𑁄𑀲𑁆𑀫𑀺, 𑀢𑁆𑀯𑀁 𑀦𑁄𑀲𑀺 𑀭𑀸𑀚𑀸 𑀪𑀯 𑀫𑁂 𑀲𑀼𑀔𑀸𑀬.

𑁫𑁫. 𑀓𑀭𑁄𑀫𑀺 𑀢𑁂 𑀲𑁂𑀦𑀓 𑀏𑀢𑀫𑀢𑁆𑀣𑀁, 𑀆𑀬𑀸𑀫𑀺 𑀢𑁂 𑀢𑀁 𑀤𑀺𑀲𑀢𑀁 𑀯𑀥𑀸𑀬;

𑀓𑀣𑀜𑁆𑀳𑀺 𑀯𑀺𑀜𑁆𑀜𑀽 𑀧𑀳𑀼 𑀲𑀫𑁆𑀧𑀚𑀸𑀦𑁄, 𑀦 𑀯𑀸𑀬𑀫𑁂 𑀅𑀢𑁆𑀢𑀚𑀦𑀲𑁆𑀲 𑀕𑀼𑀢𑁆𑀢𑀺𑀬𑀸.

𑁫𑁬. 𑀫𑀺𑀢𑁆𑀢𑀜𑁆𑀘 𑀓𑀬𑀺𑀭𑀸𑀣 𑀲𑀼𑀳𑀤𑀬𑀜𑁆𑀘 [𑀲𑀼𑀳𑀤𑁆𑀤𑀬𑀜𑁆𑀘 (𑀲𑀻.), 𑀲𑀔𑀸𑀖𑀭𑀜𑁆𑀘 (𑀧𑀻.)], 𑀅𑀬𑀺𑀭𑀜𑁆𑀘 𑀓𑀬𑀺𑀭𑀸𑀣 𑀲𑀼𑀔𑀸𑀕𑀫𑀸𑀬;

𑀦𑀺𑀯𑀢𑁆𑀣𑀓𑁄𑀘𑁄𑀯 [𑀓𑁄𑀚𑁄𑀯 (𑀲𑀻. 𑀧𑀻.)] 𑀲𑀭𑁂𑀪𑀺𑀳𑀦𑁆𑀢𑁆𑀯𑀸, 𑀫𑁄𑀤𑀸𑀫 𑀧𑀼𑀢𑁆𑀢𑁂𑀳𑀺 𑀲𑀫𑀗𑁆𑀕𑀺𑀪𑀽𑀢𑀸.

𑁫𑁭. 𑀲𑀓𑀫𑀺𑀢𑁆𑀢𑀲𑁆𑀲 𑀓𑀫𑁆𑀫𑁂𑀦, 𑀲𑀳𑀸𑀬𑀲𑁆𑀲𑀸𑀧𑀮𑀸𑀬𑀺𑀦𑁄;

𑀓𑀽𑀚𑀦𑁆𑀢𑀫𑀼𑀧𑀓𑀽𑀚𑀦𑁆𑀢𑀺, 𑀮𑁄𑀫𑀲𑀸 𑀳𑀤𑀬𑀗𑁆𑀕𑀫𑀁.

𑁫𑁮. 𑀫𑀺𑀢𑁆𑀢𑀁 𑀲𑀳𑀸𑀬𑀁 𑀅𑀥𑀺𑀕𑀫𑁆𑀫 𑀧𑀡𑁆𑀟𑀺𑀢𑁄, 𑀲𑁄 𑀪𑀼𑀜𑁆𑀚𑀢𑀻 𑀧𑀼𑀢𑁆𑀢 𑀧𑀲𑀼𑀁 𑀥𑀦𑀁 𑀯𑀸;

𑀅𑀳𑀜𑁆𑀘 𑀧𑀼𑀢𑁆𑀢𑀸 𑀘 𑀧𑀢𑀻 𑀘 𑀫𑀬𑁆𑀳𑀁, 𑀫𑀺𑀢𑁆𑀢𑀸𑀦𑀼𑀓𑀫𑁆𑀧𑀸𑀬 𑀲𑀫𑀗𑁆𑀕𑀺𑀪𑀽𑀢𑀸.

𑁫𑁯. 𑀭𑀸𑀚𑀯𑀢𑀸 𑀲𑀽𑀭𑀯𑀢𑀸 𑀘 𑀅𑀢𑁆𑀣𑁄, 𑀲𑀫𑁆𑀧𑀦𑁆𑀦𑀲𑀔𑀺𑀲𑁆𑀲 𑀪𑀯𑀦𑁆𑀢𑀺 𑀳𑁂𑀢𑁂;

𑀲𑁄 𑀫𑀺𑀢𑁆𑀢𑀯𑀸 𑀬𑀲𑀯𑀸 𑀉𑀕𑁆𑀕𑀢𑀢𑁆𑀢𑁄, 𑀅𑀲𑁆𑀫𑀺𑀁𑀥𑀮𑁄𑀓𑁂 [𑀅𑀲𑁆𑀫𑀺𑀜𑁆𑀘 𑀮𑁄𑀓𑁂 (𑀲𑀻. 𑀲𑁆𑀬𑀸. 𑀧𑀻.)] 𑀫𑁄𑀤𑀢𑀺 𑀓𑀸𑀫𑀓𑀸𑀫𑀻.

𑁬𑁦. 𑀓𑀭𑀡𑀻𑀬𑀸𑀦𑀺 𑀫𑀺𑀢𑁆𑀢𑀸𑀦𑀺, 𑀤𑀮𑀺𑀤𑁆𑀤𑁂𑀦𑀸𑀧𑀺 𑀲𑁂𑀦𑀓;

𑀧𑀲𑁆𑀲 𑀫𑀺𑀢𑁆𑀢𑀸𑀦𑀼𑀓𑀫𑁆𑀧𑀸𑀬, 𑀲𑀫𑀕𑁆𑀕𑀫𑁆𑀳𑀸 𑀲𑀜𑀸𑀢𑀓𑁂 [𑀲𑀜𑀸𑀢𑀓𑀸 (?)].

𑁬𑁧. 𑀲𑀽𑀭𑁂𑀦 𑀩𑀮𑀯𑀦𑁆𑀢𑁂𑀦, 𑀬𑁄 𑀫𑀺𑀢𑁆𑀢𑁂 [𑀫𑁂𑀢𑁆𑀢𑁂 (𑀲𑀻.), 𑀫𑀺𑀢𑁆𑀢𑀁 (𑀲𑁆𑀬𑀸.)] 𑀓𑀼𑀭𑀼𑀢𑁂 𑀤𑀺𑀚𑁄;

𑀏𑀯𑀁 𑀲𑁄 𑀲𑀼𑀔𑀺𑀢𑁄 𑀳𑁄𑀢𑀺, 𑀬𑀣𑀸𑀳𑀁 𑀢𑁆𑀯𑀜𑁆𑀘 𑀲𑁂𑀦𑀓𑀸𑀢𑀺.

𑀫𑀳𑀸𑀉𑀓𑁆𑀓𑀼𑀲𑀚𑀸𑀢𑀓𑀁 𑀢𑀢𑀺𑀬𑀁.