𑁪𑁮𑁩. 𑀲𑀭𑀪𑀫𑀺𑀕𑀚𑀸𑀢𑀓𑀁 (𑁧𑁦)

𑁧𑁩𑁪. 𑀆𑀲𑀻𑀲𑁂𑀣𑁂𑀯 [𑀆𑀲𑀺𑀁𑀲𑁂𑀣𑁂𑀯 (𑀲𑀻. 𑀲𑁆𑀬𑀸. 𑀧𑀻.)] 𑀧𑀼𑀭𑀺𑀲𑁄, 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀧𑀲𑁆𑀲𑀸𑀫𑀺 𑀯𑁄𑀳𑀁 𑀅𑀢𑁆𑀢𑀸𑀦𑀁, 𑀬𑀣𑀸 𑀇𑀘𑁆𑀙𑀺𑀁 𑀢𑀣𑀸 𑀅𑀳𑀼.

𑁧𑁩𑁫. 𑀆𑀲𑀻𑀲𑁂𑀣𑁂𑀯 𑀧𑀼𑀭𑀺𑀲𑁄, 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀧𑀲𑁆𑀲𑀸𑀫𑀺 𑀯𑁄𑀳𑀁 𑀅𑀢𑁆𑀢𑀸𑀦𑀁, 𑀉𑀤𑀓𑀸 𑀣𑀮𑀫𑀼𑀩𑁆𑀪𑀢𑀁.

𑁧𑁩𑁬. 𑀯𑀸𑀬𑀫𑁂𑀣𑁂𑀯 𑀧𑀼𑀭𑀺𑀲𑁄, 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀧𑀲𑁆𑀲𑀸𑀫𑀺 𑀯𑁄𑀳𑀁 𑀅𑀢𑁆𑀢𑀸𑀦𑀁, 𑀬𑀣𑀸 𑀇𑀘𑁆𑀙𑀺𑀁 𑀢𑀣𑀸 𑀅𑀳𑀼.

𑁧𑁩𑁭. 𑀯𑀸𑀬𑀫𑁂𑀣𑁂𑀯 𑀧𑀼𑀭𑀺𑀲𑁄, 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀧𑀲𑁆𑀲𑀸𑀫𑀺 𑀯𑁄𑀳𑀁 𑀅𑀢𑁆𑀢𑀸𑀦𑀁, 𑀉𑀤𑀓𑀸 𑀣𑀮𑀫𑀼𑀩𑁆𑀪𑀢𑀁.

𑁧𑁩𑁮. 𑀤𑀼𑀓𑁆𑀔𑀽𑀧𑀦𑀻𑀢𑁄𑀧𑀺 𑀦𑀭𑁄 𑀲𑀧𑀜𑁆𑀜𑁄, 𑀆𑀲𑀁 𑀦 𑀙𑀺𑀦𑁆𑀤𑁂𑀬𑁆𑀬 𑀲𑀼𑀔𑀸𑀕𑀫𑀸𑀬;

𑀩𑀳𑀽 𑀳𑀺 𑀨𑀲𑁆𑀲𑀸 𑀅𑀳𑀺𑀢𑀸 𑀳𑀺𑀢𑀸 𑀘, 𑀅𑀯𑀺𑀢𑀓𑁆𑀓𑀺𑀢𑀸 𑀫𑀘𑁆𑀘𑀫𑀼𑀧𑀩𑁆𑀩𑀚𑀦𑁆𑀢𑀺 [𑀫𑀘𑁆𑀘𑀼𑀫𑀼𑀧𑀩𑁆𑀩𑀚𑀦𑁆𑀢𑀺 (𑀓. 𑀲𑀻. 𑀧𑀻.), 𑀫𑀘𑁆𑀘𑀼𑀫𑀼𑀧𑀧𑀚𑁆𑀚𑀦𑁆𑀢𑀺 (𑀲𑁆𑀬𑀸. 𑀓.) 𑀏𑀢𑁆𑀣 ‘‘𑀅𑀯𑀺𑀢𑀓𑁆𑀓𑀺𑀢𑀸𑀧𑀺 𑀨𑀲𑁆𑀲𑁄 𑀫𑀘𑁆𑀘𑀁 𑀚𑀦𑀁 𑀉𑀧𑀕𑀘𑁆𑀙𑀦𑁆𑀢𑀻’’𑀢𑀺 𑀅𑀢𑁆𑀣𑁄].

𑁧𑁩𑁯. 𑀅𑀘𑀺𑀦𑁆𑀢𑀺𑀢𑀫𑁆𑀧𑀺 𑀪𑀯𑀢𑀺, 𑀘𑀺𑀦𑁆𑀢𑀺𑀢𑀫𑁆𑀧𑀺 𑀯𑀺𑀦𑀲𑁆𑀲𑀢𑀺;

𑀦 𑀳𑀺 𑀘𑀺𑀦𑁆𑀢𑀸𑀫𑀬𑀸 𑀪𑁄𑀕𑀸, 𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑀲𑁆𑀲 𑀯𑀸.

𑁧𑁪𑁦. 𑀲𑀭𑀪𑀁 𑀕𑀺𑀭𑀺𑀤𑀼𑀕𑁆𑀕𑀲𑁆𑀫𑀺𑀁, 𑀬𑀁 𑀢𑁆𑀯𑀁 𑀅𑀦𑀼𑀲𑀭𑀻 𑀧𑀼𑀭𑁂;

𑀅𑀮𑀻𑀦𑀘𑀺𑀢𑁆𑀢𑀲𑁆𑀲 𑀢𑀼𑀯𑀁, 𑀯𑀺𑀓𑁆𑀓𑀦𑁆𑀢𑀫𑀦𑀼𑀚𑀻𑀯𑀲𑀺 [𑀢𑀯, 𑀯𑀺𑀓𑁆𑀓𑀦𑁆𑀢𑀁 𑀚𑀻𑀯𑀺𑀢𑀁 𑀮𑀪𑀺 (𑀓.)].

𑁧𑁪𑁧. 𑀬𑁄 𑀢𑀁 𑀯𑀺𑀤𑀼𑀕𑁆𑀕𑀸 𑀦𑀭𑀓𑀸 𑀲𑀫𑀼𑀤𑁆𑀥𑀭𑀺, 𑀲𑀺𑀮𑀸𑀬 𑀬𑁄𑀕𑁆𑀕𑀁 𑀲𑀭𑀪𑁄 𑀓𑀭𑀺𑀢𑁆𑀯𑀸;

𑀤𑀼𑀓𑁆𑀔𑀽𑀧𑀦𑀻𑀢𑀁 𑀫𑀘𑁆𑀘𑀼𑀫𑀼𑀔𑀸 𑀧𑀫𑁄𑀘𑀬𑀺, 𑀅𑀮𑀻𑀦𑀘𑀺𑀢𑁆𑀢𑀁 𑀢𑀁 𑀫𑀺𑀕𑀁 [𑀢𑀫𑁂𑀯 (𑀲𑁆𑀬𑀸. 𑀓.)] 𑀯𑀤𑁂𑀲𑀺.

𑁧𑁪𑁨. 𑀓𑀺𑀁 𑀢𑁆𑀯𑀁 𑀦𑀼 [𑀢𑀼𑀯𑀦𑁆𑀦𑀼 (𑀲𑀻. 𑀧𑀻.)] 𑀢𑀢𑁆𑀣𑁂𑀯 𑀢𑀤𑀸 𑀅𑀳𑁄𑀲𑀺, 𑀉𑀤𑀸𑀳𑀼 𑀢𑁂 𑀓𑁄𑀘𑀺 𑀦𑀁 [𑀢𑀁 (𑀓.)] 𑀏𑀢𑀤𑀓𑁆𑀔𑀸;

𑀯𑀺𑀯𑀝𑁆𑀝𑀘𑁆𑀙𑀤𑁆𑀤𑁄 𑀦𑀼𑀲𑀺 𑀲𑀩𑁆𑀩𑀤𑀲𑁆𑀲𑀻, 𑀜𑀸𑀡𑀁 𑀦𑀼 𑀢𑁂 𑀩𑁆𑀭𑀸𑀳𑁆𑀫𑀡 𑀪𑀺𑀁𑀲𑀭𑀽𑀧𑀁.

𑁧𑁪𑁩. 𑀦 𑀘𑁂𑀯𑀳𑀁 𑀢𑀢𑁆𑀣 𑀢𑀤𑀸 𑀅𑀳𑁄𑀲𑀺𑀁, 𑀦 𑀘𑀸𑀧𑀺 𑀫𑁂 𑀓𑁄𑀘𑀺 𑀦𑀁 [𑀢𑀁 (𑀓.)] 𑀏𑀢𑀤𑀓𑁆𑀔𑀸;

𑀕𑀸𑀣𑀸𑀧𑀤𑀸𑀦𑀜𑁆𑀘 𑀲𑀼𑀪𑀸𑀲𑀺𑀢𑀸𑀦𑀁, 𑀅𑀢𑁆𑀣𑀁 𑀢𑀤𑀸𑀦𑁂𑀦𑁆𑀢𑀺 𑀚𑀦𑀺𑀦𑁆𑀤 𑀥𑀻𑀭𑀸.

𑁧𑁪𑁪. 𑀆𑀤𑀸𑀬 𑀧𑀢𑁆𑀢𑀺𑀁 [𑀧𑀢𑁆𑀢𑀁 (𑀲𑁆𑀬𑀸.), 𑀧𑀝𑁆𑀝𑀺𑀁 (𑀓.)] 𑀧𑀭𑀯𑀺𑀭𑀺𑀬𑀖𑀸𑀢𑀺𑀁, 𑀘𑀸𑀧𑁂 𑀲𑀭𑀁 𑀓𑀺𑀁 𑀯𑀺𑀘𑀺𑀓𑀺𑀘𑁆𑀙𑀲𑁂 𑀢𑀼𑀯𑀁;

𑀦𑀼𑀦𑁆𑀦𑁄 [𑀦𑀼𑀡𑁆𑀡𑁄 (𑀓. 𑀲𑀻. 𑀲𑁆𑀬𑀸.), 𑀢𑀼𑀡𑁆𑀡𑁄 (𑀓.)] 𑀲𑀭𑁄 𑀲𑀭𑀪𑀁 𑀳𑀦𑁆𑀢𑀼 𑀔𑀺𑀧𑁆𑀧𑀁, 𑀅𑀦𑁆𑀦𑀜𑁆𑀳𑀺 𑀏𑀢𑀁 𑀯𑀭𑀧𑀜𑁆𑀜 𑀭𑀜𑁆𑀜𑁄.

𑁧𑁪𑁫. 𑀅𑀤𑁆𑀥𑀸 𑀧𑀚𑀸𑀦𑀸𑀫𑀺 𑀅𑀳𑀫𑁆𑀧𑀺 𑀏𑀢𑀁, 𑀅𑀦𑁆𑀦𑀁 𑀫𑀺𑀕𑁄 𑀩𑁆𑀭𑀸𑀳𑁆𑀫𑀡 𑀔𑀢𑁆𑀢𑀺𑀬𑀲𑁆𑀲;

𑀧𑀼𑀩𑁆𑀩𑁂 𑀓𑀢𑀜𑁆𑀘 [𑀧𑀼𑀩𑁆𑀩𑁂 𑀘 𑀓𑀢𑀁 (𑀓.)] 𑀅𑀧𑀘𑀸𑀬𑀫𑀸𑀦𑁄, 𑀢𑀲𑁆𑀫𑀸 𑀫𑀺𑀕𑀁 𑀲𑀭𑀪𑀁 𑀦𑁄 𑀳𑀦𑀸𑀫𑀺.

𑁧𑁪𑁬. 𑀦𑁂𑀲𑁄 𑀫𑀺𑀕𑁄 𑀫𑀳𑀸𑀭𑀸𑀚, 𑀅𑀲𑀼𑀭𑁂𑀲𑁄 𑀤𑀺𑀲𑀫𑁆𑀧𑀢𑀺;

𑀏𑀢𑀁 𑀳𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑀺𑀦𑁆𑀤, 𑀪𑀯𑀲𑁆𑀲𑀼 𑀅𑀫𑀭𑀸𑀥𑀺𑀧𑁄.

𑁧𑁪𑁭. 𑀲𑀘𑁂 𑀘 𑀭𑀸𑀚𑀸 [𑀭𑀸𑀚 (𑀲𑀻. 𑀲𑁆𑀬𑀸. 𑀧𑀻.)] 𑀯𑀺𑀘𑀺𑀓𑀺𑀘𑁆𑀙𑀲𑁂 𑀢𑀼𑀯𑀁, 𑀳𑀦𑁆𑀢𑀼𑀁 𑀫𑀺𑀕𑀁 𑀲𑀭𑀪𑀁 𑀲𑀳𑀸𑀬𑀓𑀁 [𑀲𑀳𑀸𑀬𑀓𑀁 𑀫𑁂 (𑀲𑀻. 𑀧𑀻.)];

𑀲𑀧𑀼𑀢𑁆𑀢𑀤𑀸𑀭𑁄 𑀦𑀭𑀯𑀻𑀭𑀲𑁂𑀝𑁆𑀞 [𑀦𑀭𑀯𑀺𑀭𑀺𑀬𑀲𑁂𑀝𑁆𑀞 (𑀲𑀻. 𑀧𑀻.)], 𑀕𑀦𑁆𑀢𑁆𑀯𑀸 [𑀕𑀦𑁆𑀢𑀸 (𑀲𑀻. 𑀧𑀻. 𑀅𑀝𑁆𑀞.)] 𑀢𑀼𑀯𑀁 𑀯𑁂𑀢𑀭𑀡𑀺𑀁 𑀬𑀫𑀲𑁆𑀲.

𑁧𑁪𑁮. 𑀓𑀸𑀫𑀁 𑀅𑀳𑀁 𑀚𑀸𑀦𑀧𑀤𑀸 𑀘 𑀲𑀩𑁆𑀩𑁂, 𑀧𑀼𑀢𑁆𑀢𑀸 𑀘 𑀤𑀸𑀭𑀸 𑀘 𑀲𑀳𑀸𑀬𑀲𑀗𑁆𑀖𑀸;

𑀕𑀘𑁆𑀙𑁂𑀫𑀼 𑀢𑀁 𑀯𑁂𑀢𑀭𑀡𑀺𑀁 𑀬𑀫𑀲𑁆𑀲, 𑀦 𑀢𑁆𑀯𑁂𑀯 𑀳𑀜𑁆𑀜𑁄 𑀫𑀫 𑀧𑀸𑀡𑀤𑁄 𑀬𑁄 [𑀧𑀸𑀡𑀤’𑀲𑁆𑀲 (𑀲𑀻. 𑀲𑁆𑀬𑀸. 𑀧𑀻.)].

𑁧𑁪𑁯. 𑀅𑀬𑀁 𑀫𑀺𑀕𑁄 𑀓𑀺𑀘𑁆𑀙𑀕𑀢𑀲𑁆𑀲 𑀫𑀬𑁆𑀳𑀁, 𑀏𑀓𑀲𑁆𑀲 𑀓𑀢𑁆𑀢𑀸 𑀯𑀺𑀯𑀦𑀲𑁆𑀫𑀺 𑀖𑁄𑀭𑁂;

𑀢𑀁 𑀢𑀸𑀤𑀺𑀲𑀁 𑀧𑀼𑀩𑁆𑀩𑀓𑀺𑀘𑁆𑀘𑀁 𑀲𑀭𑀦𑁆𑀢𑁄, 𑀚𑀸𑀦𑀁 𑀫𑀳𑀸𑀩𑁆𑀭𑀳𑁆𑀫𑁂 𑀓𑀣𑀁 𑀳𑀦𑁂𑀬𑁆𑀬𑀁.

𑁧𑁫𑁦. 𑀫𑀺𑀢𑁆𑀢𑀸𑀪𑀺𑀭𑀸𑀥𑀻 𑀘𑀺𑀭𑀫𑁂𑀯 𑀚𑀻𑀯, 𑀭𑀚𑁆𑀚𑀁 𑀇𑀫𑀁 𑀥𑀫𑁆𑀫𑀕𑀼𑀡𑁂 [𑀭𑀚𑁆𑀚𑀫𑁆𑀧𑀺𑀫𑀁 𑀘𑀲𑁆𑀲 𑀕𑀡𑁂 (𑀓.)] 𑀧𑀲𑀸𑀲;

𑀦𑀸𑀭𑀻𑀕𑀡𑁂𑀳𑀺 𑀧𑀭𑀺𑀘𑀸𑀭𑀺𑀬𑀦𑁆𑀢𑁄, 𑀫𑁄𑀤𑀲𑁆𑀲𑀼 𑀭𑀝𑁆𑀞𑁂 𑀢𑀺𑀤𑀺𑀯𑁂𑀯 𑀯𑀸𑀲𑀯𑁄.

𑁧𑁫𑁧. 𑀅𑀓𑁆𑀓𑁄𑀥𑀦𑁄 𑀦𑀺𑀘𑁆𑀘𑀧𑀲𑀦𑁆𑀦𑀘𑀺𑀢𑁆𑀢𑁄, 𑀲𑀩𑁆𑀩𑀸𑀢𑀺𑀣𑀻 𑀬𑀸𑀘𑀬𑁄𑀕𑁄 𑀪𑀯𑀺𑀢𑁆𑀯𑀸 [𑀧𑀸𑀳𑀼𑀦𑀓𑁂 𑀓𑀭𑀺𑀢𑁆𑀯𑀸 (𑀲𑁆𑀬𑀸.), 𑀬𑀸𑀘𑀬𑁄𑀕𑁄 𑀯𑀺𑀤𑀺𑀢𑁆𑀯𑀸 (𑀓.)];

𑀤𑀢𑁆𑀯𑀸 𑀘 𑀪𑀼𑀢𑁆𑀯𑀸 𑀘 𑀬𑀣𑀸𑀦𑀼𑀪𑀸𑀯𑀁, 𑀅𑀦𑀺𑀦𑁆𑀤𑀺𑀢𑁄 𑀲𑀕𑁆𑀕𑀫𑀼𑀧𑁂𑀳𑀺 𑀞𑀸𑀦𑀦𑁆𑀢𑀺.

𑀲𑀭𑀪𑀫𑀺𑀕𑀚𑀸𑀢𑀓𑀁 𑀤𑀲𑀫𑀁.

𑀢𑁂𑀭𑀲𑀓𑀦𑀺𑀧𑀸𑀢𑀁 𑀦𑀺𑀝𑁆𑀞𑀺𑀢𑀁.