𑁪𑁭𑁯. 𑀓𑀸𑀮𑀺𑀗𑁆𑀕𑀩𑁄𑀥𑀺𑀚𑀸𑀢𑀓𑀁 (𑁬)

𑁬𑁭. 𑀭𑀸𑀚𑀸 𑀓𑀸𑀮𑀺𑀗𑁆𑀕𑁄 𑀘𑀓𑁆𑀓𑀯𑀢𑁆𑀢𑀺, 𑀥𑀫𑁆𑀫𑁂𑀦 𑀧𑀣𑀯𑀺𑀫𑀦𑀼𑀲𑀸𑀲𑀁 [𑀫𑀦𑀼𑀲𑀸𑀲𑀺 (𑀲𑁆𑀬𑀸. 𑀓.)];

𑀅𑀕𑀫𑀸 [𑀅𑀕𑀫𑀸𑀲𑀺 (𑀲𑁆𑀬𑀸. 𑀓.)] 𑀩𑁄𑀥𑀺𑀲𑀫𑀻𑀧𑀁, 𑀦𑀸𑀕𑁂𑀦 𑀫𑀳𑀸𑀦𑀼𑀪𑀸𑀯𑁂𑀦.

𑁬𑁮. 𑀓𑀸𑀮𑀺𑀗𑁆𑀕𑁄 𑀪𑀸𑀭𑀤𑁆𑀯𑀸𑀚𑁄 𑀘, 𑀭𑀸𑀚𑀸𑀦𑀁 𑀓𑀸𑀮𑀺𑀗𑁆𑀕𑀁 𑀲𑀫𑀡𑀓𑁄𑀮𑀜𑁆𑀜𑀁;

𑀘𑀓𑁆𑀓𑀁 𑀯𑀢𑁆𑀢𑀬𑀢𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 [𑀧𑀭𑀺𑀡𑁂𑀢𑁆𑀯𑀸 (𑀧𑀻.)], 𑀧𑀜𑁆𑀚𑀮𑀻 𑀇𑀤𑀫𑀯𑁄𑀘.

𑁬𑁯. 𑀧𑀘𑁆𑀘𑁄𑀭𑁄𑀳 𑀫𑀳𑀸𑀭𑀸𑀚, 𑀪𑀽𑀫𑀺𑀪𑀸𑀕𑁄 𑀬𑀣𑀸 𑀲𑀫𑀡𑀼𑀕𑁆𑀕𑀢𑁄 [𑀲𑀫𑀦𑀼𑀕𑀻𑀢𑁄 (𑀲𑀻. 𑀲𑁆𑀬𑀸. 𑀧𑀻.)];

𑀇𑀥 𑀅𑀦𑀥𑀺𑀯𑀭𑀸 𑀩𑀼𑀤𑁆𑀥𑀸, 𑀅𑀪𑀺𑀲𑀫𑁆𑀩𑀼𑀤𑁆𑀥𑀸 𑀯𑀺𑀭𑁄𑀘𑀦𑁆𑀢𑀺.

𑁭𑁦. 𑀧𑀤𑀓𑁆𑀔𑀺𑀡𑀢𑁄 𑀆𑀯𑀝𑁆𑀝𑀸, 𑀢𑀺𑀡𑀮𑀢𑀸 𑀅𑀲𑁆𑀫𑀺𑀁 𑀪𑀽𑀫𑀺𑀪𑀸𑀕𑀲𑁆𑀫𑀺𑀁;

𑀧𑀣𑀯𑀺𑀬𑀸 𑀦𑀸𑀪𑀺𑀬𑀁 [𑀧𑀼𑀣𑀼𑀯𑀺𑀬𑀸 𑀅𑀬𑀁 (𑀲𑀻.), 𑀧𑀞𑀯𑀺𑀬𑀸 𑀅𑀬𑀁 (𑀲𑁆𑀬𑀸.), 𑀧𑀼𑀣𑀯𑀺𑀬𑀸’𑀬𑀁 (𑀧𑀻.)] 𑀫𑀡𑁆𑀟𑁄, 𑀇𑀢𑀺 𑀦𑁄 𑀲𑀼𑀢𑀁 𑀫𑀦𑁆𑀢𑁂 𑀫𑀳𑀸𑀭𑀸𑀚 [𑀲𑀼𑀢𑀁 𑀫𑀳𑀸𑀭𑀸𑀚 (𑀲𑀻. 𑀲𑁆𑀬𑀸. 𑀧𑀻.)].

𑁭𑁧. 𑀲𑀸𑀕𑀭𑀧𑀭𑀺𑀬𑀦𑁆𑀢𑀸𑀬, 𑀫𑁂𑀤𑀺𑀦𑀺𑀬𑀸 𑀲𑀩𑁆𑀩𑀪𑀽𑀢𑀥𑀭𑀡𑀺𑀬𑀸;

𑀧𑀣𑀯𑀺𑀬𑀸 𑀅𑀬𑀁 𑀫𑀡𑁆𑀟𑁄, 𑀑𑀭𑁄𑀳𑀺𑀢𑁆𑀯𑀸 𑀦𑀫𑁄 𑀓𑀭𑁄𑀳𑀺.

𑁭𑁨. 𑀬𑁂 𑀢𑁂 𑀪𑀯𑀦𑁆𑀢𑀺 𑀦𑀸𑀕𑀸 𑀘, 𑀅𑀪𑀺𑀚𑀸𑀢𑀸 𑀘 𑀓𑀼𑀜𑁆𑀚𑀭𑀸;

𑀏𑀢𑁆𑀢𑀸𑀯𑀢𑀸 𑀧𑀤𑁂𑀲𑀁 𑀢𑁂, 𑀦𑀸𑀕𑀸 𑀦𑁂𑀯 𑀫𑀼𑀧𑀬𑀦𑁆𑀢𑀺.

𑁭𑁩. 𑀅𑀪𑀺𑀚𑀸𑀢𑁄 𑀦𑀸𑀕𑁄 [𑀅𑀪𑀺𑀚𑀸𑀢𑁄 𑀢𑁂 𑀦𑀸𑀕𑁄 (𑀲𑀻. 𑀧𑀻. 𑀅𑀝𑁆𑀞.)] 𑀓𑀸𑀫𑀁, 𑀧𑁂𑀲𑁂𑀳𑀺 𑀓𑀼𑀜𑁆𑀚𑀭𑀁 𑀤𑀦𑁆𑀢𑀺𑀁;

𑀏𑀢𑁆𑀢𑀸𑀯𑀢𑀸 𑀧𑀤𑁂𑀲𑁄 [𑀧𑀤𑁂𑀲𑁄 𑀘 (𑀲𑁆𑀬𑀸. 𑀓.)], 𑀲𑀓𑁆𑀓𑀸 [𑀦 𑀲𑀓𑁆𑀓𑀸 (𑀲𑁆𑀬𑀸.)] 𑀦𑀸𑀕𑁂𑀦 𑀫𑀼𑀧𑀕𑀦𑁆𑀢𑀼𑀁.

𑁭𑁪. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀓𑀸𑀮𑀺𑀗𑁆𑀕𑁄, 𑀯𑁂𑀬𑁆𑀬𑀜𑁆𑀚𑀦𑀺𑀓𑀯𑀘𑁄 𑀦𑀺𑀲𑀸𑀫𑁂𑀢𑁆𑀯𑀸;

𑀲𑀫𑁆𑀧𑁂𑀲𑁂𑀲𑀺 𑀦𑀸𑀕𑀁 𑀜𑀲𑁆𑀲𑀸𑀫, 𑀫𑀬𑀁 𑀬𑀣𑀺𑀫𑀲𑁆𑀲𑀺𑀤𑀁 [𑀬𑀣𑀸 𑀇𑀤𑀁 (𑀲𑀻. 𑀲𑁆𑀬𑀸. 𑀧𑀻.)] 𑀯𑀘𑀦𑀁.

𑁭𑁫. 𑀲𑀫𑁆𑀧𑁂𑀲𑀺𑀢𑁄 𑀘 𑀭𑀜𑁆𑀜𑀸, 𑀦𑀸𑀕𑁄 𑀓𑁄𑀜𑁆𑀘𑁄𑀯 𑀅𑀪𑀺𑀦𑀤𑀺𑀢𑁆𑀯𑀸𑀦;

𑀧𑀝𑀺𑀲𑀓𑁆𑀓𑀺𑀢𑁆𑀯𑀸 [𑀧𑀝𑀺𑀑𑀲𑀓𑁆𑀓𑀺𑀢𑁆𑀯𑀸 (𑀓.)] 𑀦𑀺𑀲𑀻𑀤𑀺, 𑀕𑀭𑀼𑀁𑀯 𑀪𑀸𑀭𑀁 𑀅𑀲𑀳𑀫𑀸𑀦𑁄.

𑁭𑁬. 𑀓𑀸𑀮𑀺𑀗𑁆𑀕𑀪𑀸𑀭𑀤𑁆𑀯𑀸𑀚𑁄, 𑀦𑀸𑀕𑀁 𑀔𑀻𑀡𑀸𑀬𑀼𑀓𑀁 𑀯𑀺𑀤𑀺𑀢𑁆𑀯𑀸𑀦;

𑀭𑀸𑀚𑀸𑀦𑀁 𑀓𑀸𑀮𑀺𑀗𑁆𑀕𑀁, 𑀢𑀭𑀫𑀸𑀦𑁄 𑀅𑀚𑁆𑀛𑀪𑀸𑀲𑀺𑀢𑁆𑀣;

𑀅𑀜𑁆𑀜𑀁 𑀲𑀗𑁆𑀓𑀫 𑀦𑀸𑀕𑀁, 𑀦𑀸𑀕𑁄 𑀔𑀻𑀡𑀸𑀬𑀼𑀓𑁄 𑀫𑀳𑀸𑀭𑀸𑀚.

𑁭𑁭. 𑀢𑀁 𑀲𑀼𑀢𑁆𑀯𑀸 𑀓𑀸𑀮𑀺𑀗𑁆𑀕𑁄, 𑀢𑀭𑀫𑀸𑀦𑁄 𑀲𑀗𑁆𑀓𑀫𑀻 𑀦𑀸𑀕𑀁;

𑀲𑀗𑁆𑀓𑀦𑁆𑀢𑁂𑀯 𑀭𑀜𑁆𑀜𑁂, 𑀦𑀸𑀕𑁄 𑀢𑀢𑁆𑀣𑁂𑀯 𑀧𑀢𑀺 [𑀧𑀢𑀺𑀢𑁄 (𑀓.)] 𑀪𑀼𑀫𑁆𑀬𑀸;

𑀯𑁂𑀬𑁆𑀬𑀜𑁆𑀚𑀦𑀺𑀓𑀯𑀘𑁄, 𑀬𑀣𑀸 𑀢𑀣𑀸 𑀅𑀳𑀼 𑀦𑀸𑀕𑁄.

𑁭𑁮. 𑀓𑀸𑀮𑀺𑀗𑁆𑀕𑁄 𑀭𑀸𑀚𑀸 𑀓𑀸𑀮𑀺𑀗𑁆𑀕𑀁, 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘;

𑀢𑁆𑀯𑀫𑁂𑀯 𑀅𑀲𑀺 𑀲𑀫𑁆𑀩𑀼𑀤𑁆𑀥𑁄, 𑀲𑀩𑁆𑀩𑀜𑁆𑀜𑀽 𑀲𑀩𑁆𑀩𑀤𑀲𑁆𑀲𑀸𑀯𑀻.

𑁭𑁯. 𑀢𑀁 𑀅𑀦𑀥𑀺𑀯𑀸𑀲𑁂𑀦𑁆𑀢𑁄 𑀓𑀸𑀮𑀺𑀗𑁆𑀕𑀁 [𑀓𑀸𑀮𑀺𑀗𑁆𑀕𑁄 (𑀲𑀻. 𑀲𑁆𑀬𑀸. 𑀧𑀻.)], 𑀩𑁆𑀭𑀸𑀳𑁆𑀫𑀡𑁄 𑀇𑀤𑀫𑀯𑁄𑀘;

𑀯𑁂𑀬𑁆𑀬𑀜𑁆𑀚𑀦𑀺𑀓𑀸 𑀳𑀺 𑀫𑀬𑀁, 𑀩𑀼𑀤𑁆𑀥𑀸 𑀲𑀩𑁆𑀩𑀜𑁆𑀜𑀼𑀦𑁄 𑀫𑀳𑀸𑀭𑀸𑀚.

𑁮𑁦. 𑀲𑀩𑁆𑀩𑀜𑁆𑀜𑀽 𑀲𑀩𑁆𑀩𑀯𑀺𑀤𑀽 𑀘, 𑀩𑀼𑀤𑁆𑀥𑀸 𑀦 𑀮𑀓𑁆𑀔𑀡𑁂𑀦 𑀚𑀸𑀦𑀦𑁆𑀢𑀺;

𑀆𑀕𑀫𑀩𑀮𑀲𑀸 [𑀆𑀕𑀫𑀧𑀼𑀭𑀺𑀲𑀸 (𑀧𑀻.)] 𑀳𑀺 𑀫𑀬𑀁, 𑀩𑀼𑀤𑁆𑀥𑀸 𑀲𑀩𑁆𑀩𑀁 𑀧𑀚𑀸𑀦𑀦𑁆𑀢𑀺.

𑁮𑁧. 𑀫𑀳𑀬𑀺𑀢𑁆𑀯𑀸 𑀲𑀫𑁆𑀩𑁄𑀥𑀺𑀁 [𑀫𑀳𑀸𑀬𑀺𑀢𑁆𑀯𑀸𑀦 𑀲𑀫𑁆𑀩𑁄𑀥𑀺𑀁 (𑀲𑀻. 𑀧𑀻.), 𑀧𑀳𑀁𑀲𑀺𑀢𑁆𑀯𑀸𑀦 𑀲𑀫𑁆𑀩𑁄𑀥𑀺𑀁 (𑀲𑁆𑀬𑀸.), 𑀫𑀫𑀸𑀬𑀺𑀢𑁆𑀯𑀸𑀦 𑀢𑀁 𑀩𑁄𑀥𑀺𑀁 (𑀓.)], 𑀦𑀸𑀦𑀸𑀢𑀼𑀭𑀺𑀬𑁂𑀳𑀺 𑀯𑀚𑁆𑀚𑀫𑀸𑀦𑁂𑀳𑀺;

𑀫𑀸𑀮𑀸𑀯𑀺𑀮𑁂𑀧𑀦𑀁 𑀅𑀪𑀺𑀳𑀭𑀺𑀢𑁆𑀯𑀸 [𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀆𑀳𑀭𑀺𑀢𑁆𑀯𑀸 (𑀲𑀻. 𑀧𑀻.); 𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑀁 𑀓𑀸𑀭𑁂𑀲𑀺; 𑀅𑀣 𑀭𑀸𑀚𑀸 𑀧𑀸𑀬𑀸𑀲𑀺 (𑀲𑀻. 𑀲𑁆𑀬𑀸. 𑀧𑀻.)] 𑀅𑀣 𑀭𑀸𑀚𑀸 𑀫𑀦𑀼𑀧𑀸𑀬𑀸𑀲𑀺 [𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑀁 𑀓𑀸𑀭𑁂𑀲𑀺; 𑀅𑀣 𑀭𑀸𑀚𑀸 𑀧𑀸𑀬𑀸𑀲𑀺 (𑀲𑀻. 𑀲𑁆𑀬𑀸. 𑀧𑀻.)].

𑁮𑁨. 𑀲𑀝𑁆𑀞𑀺 𑀯𑀸𑀳𑀲𑀳𑀲𑁆𑀲𑀸𑀦𑀺, 𑀧𑀼𑀧𑁆𑀨𑀸𑀦𑀁 𑀲𑀦𑁆𑀦𑀺𑀧𑀸𑀢𑀬𑀺;

𑀧𑀽𑀚𑁂𑀲𑀺 𑀭𑀸𑀚𑀸 𑀓𑀸𑀮𑀺𑀗𑁆𑀕𑁄, 𑀩𑁄𑀥𑀺𑀫𑀡𑁆𑀟𑀫𑀦𑀼𑀢𑁆𑀢𑀭𑀦𑁆𑀢𑀺 [𑀯𑀭𑀼𑀢𑁆𑀢𑀫𑁂𑀢𑀺 (𑀲𑀻.)].

𑀓𑀸𑀮𑀺𑀗𑁆𑀕𑀩𑁄𑀥𑀺𑀚𑀸𑀢𑀓𑀁 𑀙𑀝𑁆𑀞𑀁.