𑁪𑁮𑁦. 𑀅𑀓𑀺𑀢𑁆𑀢𑀺𑀚𑀸𑀢𑀓𑀁 (𑁭)

𑁮𑁩. 𑀅𑀓𑀺𑀢𑁆𑀢𑀺𑀁 [𑀅𑀓𑀢𑁆𑀢𑀺𑀁 (𑀓.)] 𑀤𑀺𑀲𑁆𑀯𑀸 𑀲𑀫𑁆𑀫𑀦𑁆𑀢𑀁, 𑀲𑀓𑁆𑀓𑁄 𑀪𑀽𑀢𑀧𑀢𑀻 𑀩𑁆𑀭𑀯𑀺;

𑀓𑀺𑀁 𑀧𑀢𑁆𑀣𑀬𑀁 𑀫𑀳𑀸𑀩𑁆𑀭𑀳𑁆𑀫𑁂, 𑀏𑀓𑁄 𑀲𑀫𑁆𑀫𑀲𑀺 𑀖𑀫𑁆𑀫𑀦𑀺.

𑁮𑁪. 𑀤𑀼𑀓𑁆𑀔𑁄 𑀧𑀼𑀦𑀩𑁆𑀪𑀯𑁄 𑀲𑀓𑁆𑀓, 𑀲𑀭𑀻𑀭𑀲𑁆𑀲 𑀘 𑀪𑁂𑀤𑀦𑀁;

𑀲𑀫𑁆𑀫𑁄𑀳𑀫𑀭𑀡𑀁 𑀤𑀼𑀓𑁆𑀔𑀁, 𑀢𑀲𑁆𑀫𑀸 𑀲𑀫𑁆𑀫𑀸𑀫𑀺 𑀯𑀸𑀲𑀯.

𑁮𑁫. 𑀏𑀢𑀲𑁆𑀫𑀺𑀁 𑀢𑁂 𑀲𑀼𑀮𑀧𑀺𑀢𑁂, 𑀧𑀢𑀺𑀭𑀽𑀧𑁂 𑀲𑀼𑀪𑀸𑀲𑀺𑀢𑁂;

𑀯𑀭𑀁 𑀓𑀲𑁆𑀲𑀧 𑀢𑁂 𑀤𑀫𑁆𑀫𑀺, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺.

𑁮𑁬. 𑀯𑀭𑀁 𑀘𑁂 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀬𑁂𑀦 𑀧𑀼𑀢𑁆𑀢𑁂 𑀘 𑀤𑀸𑀭𑁂 𑀘, 𑀥𑀦𑀥𑀜𑁆𑀜𑀁 𑀧𑀺𑀬𑀸𑀦𑀺 𑀘;

𑀮𑀤𑁆𑀥𑀸 𑀦𑀭𑀸 𑀦 [𑀮𑀤𑁆𑀥𑀸 𑀦𑀜𑁆𑀜𑀸𑀦𑀺 (𑀓.)] 𑀢𑀧𑁆𑀧𑀦𑁆𑀢𑀺, 𑀲𑁄 𑀮𑁄𑀪𑁄 𑀦 𑀫𑀬𑀻 𑀯𑀲𑁂.

𑁮𑁭. 𑀏𑀢𑀲𑁆𑀫𑀺𑀁 𑀢𑁂 𑀲𑀼𑀮𑀧𑀺𑀢𑁂, 𑀧𑀢𑀺𑀭𑀽𑀧𑁂 𑀲𑀼𑀪𑀸𑀲𑀺𑀢𑁂;

𑀯𑀭𑀁 𑀓𑀲𑁆𑀲𑀧 𑀢𑁂 𑀤𑀫𑁆𑀫𑀺, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺.

𑁮𑁮. 𑀯𑀭𑀁 𑀘𑁂 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀔𑁂𑀢𑁆𑀢𑀁 𑀯𑀢𑁆𑀣𑀼𑀁 𑀳𑀺𑀭𑀜𑁆𑀜𑀜𑁆𑀘, 𑀕𑀯𑀲𑁆𑀲𑀁 𑀤𑀸𑀲𑀧𑁄𑀭𑀺𑀲𑀁;

𑀬𑁂𑀦 𑀚𑀸𑀢𑁂𑀦 𑀚𑀻𑀬𑀦𑁆𑀢𑀺, 𑀲𑁄 𑀤𑁄𑀲𑁄 𑀦 𑀫𑀬𑀻 𑀯𑀲𑁂.

𑁮𑁯. 𑀏𑀢𑀲𑁆𑀫𑀺𑀁 𑀢𑁂 𑀲𑀼𑀮𑀧𑀺𑀢𑁂, 𑀧𑀢𑀺𑀭𑀽𑀧𑁂 𑀲𑀼𑀪𑀸𑀲𑀺𑀢𑁂;

𑀯𑀭𑀁 𑀓𑀲𑁆𑀲𑀧 𑀢𑁂 𑀤𑀫𑁆𑀫𑀺, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺.

𑁯𑁦. 𑀯𑀭𑀁 𑀘𑁂 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀩𑀸𑀮𑀁 𑀦 𑀧𑀲𑁆𑀲𑁂 𑀦 𑀲𑀼𑀡𑁂, 𑀦 𑀘 𑀩𑀸𑀮𑁂𑀦 𑀲𑀁𑀯𑀲𑁂;

𑀩𑀸𑀮𑁂𑀦𑀮𑁆𑀮𑀸𑀧 [𑀩𑀸𑀮𑁂𑀦𑀸’𑀮𑀸𑀧 (?)] 𑀲𑀮𑁆𑀮𑀸𑀧𑀁, 𑀦 𑀓𑀭𑁂 𑀦 𑀘 𑀭𑁄𑀘𑀬𑁂.

𑁯𑁧. 𑀓𑀺𑀁 𑀦𑀼 𑀢𑁂 𑀅𑀓𑀭𑀁 𑀩𑀸𑀮𑁄, 𑀯𑀤 𑀓𑀲𑁆𑀲𑀧 𑀓𑀸𑀭𑀡𑀁;

𑀓𑁂𑀦 𑀓𑀲𑁆𑀲𑀧 𑀩𑀸𑀮𑀲𑁆𑀲, 𑀤𑀲𑁆𑀲𑀦𑀁 𑀦𑀸𑀪𑀺𑀓𑀗𑁆𑀔𑀲𑀺.

𑁯𑁨. 𑀅𑀦𑀬𑀁 𑀦𑀬𑀢𑀺 𑀤𑀼𑀫𑁆𑀫𑁂𑀥𑁄, 𑀅𑀥𑀼𑀭𑀸𑀬𑀁 𑀦𑀺𑀬𑀼𑀜𑁆𑀚𑀢𑀺;

𑀤𑀼𑀦𑁆𑀦𑀬𑁄 𑀲𑁂𑀬𑁆𑀬𑀲𑁄 𑀳𑁄𑀢𑀺, 𑀲𑀫𑁆𑀫𑀸 𑀯𑀼𑀢𑁆𑀢𑁄 𑀧𑀓𑀼𑀧𑁆𑀧𑀢𑀺;

𑀯𑀺𑀦𑀬𑀁 𑀲𑁄 𑀦 𑀚𑀸𑀦𑀸𑀢𑀺, 𑀲𑀸𑀥𑀼 𑀢𑀲𑁆𑀲 𑀅𑀤𑀲𑁆𑀲𑀦𑀁.

𑁯𑁩. 𑀏𑀢𑀲𑁆𑀫𑀺𑀁 𑀢𑁂 𑀲𑀼𑀮𑀧𑀺𑀢𑁂, 𑀧𑀢𑀺𑀭𑀽𑀧𑁂 𑀲𑀼𑀪𑀸𑀲𑀺𑀢𑁂;

𑀯𑀭𑀁 𑀓𑀲𑁆𑀲𑀧 𑀢𑁂 𑀤𑀫𑁆𑀫𑀺, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺.

𑁯𑁪. 𑀯𑀭𑀁 𑀘𑁂 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀥𑀻𑀭𑀁 𑀧𑀲𑁆𑀲𑁂 𑀲𑀼𑀡𑁂 𑀥𑀻𑀭𑀁, 𑀥𑀻𑀭𑁂𑀦 𑀲𑀳 𑀲𑀁𑀯𑀲𑁂;

𑀥𑀻𑀭𑁂𑀦𑀮𑁆𑀮𑀸𑀧𑀲𑀮𑁆𑀮𑀸𑀧𑀁, 𑀢𑀁 𑀓𑀭𑁂 𑀢𑀜𑁆𑀘 𑀭𑁄𑀘𑀬𑁂.

𑁯𑁫. 𑀓𑀺𑀁 𑀦𑀼 𑀢𑁂 𑀅𑀓𑀭𑀁 𑀥𑀻𑀭𑁄, 𑀯𑀤 𑀓𑀲𑁆𑀲𑀧 𑀓𑀸𑀭𑀡𑀁;

𑀓𑁂𑀦 𑀓𑀲𑁆𑀲𑀧 𑀥𑀻𑀭𑀲𑁆𑀲, 𑀤𑀲𑁆𑀲𑀦𑀁 𑀅𑀪𑀺𑀓𑀗𑁆𑀔𑀲𑀺.

𑁯𑁬. 𑀦𑀬𑀁 𑀦𑀬𑀢𑀺 𑀫𑁂𑀥𑀸𑀯𑀻, 𑀅𑀥𑀼𑀭𑀸𑀬𑀁 𑀦 𑀬𑀼𑀜𑁆𑀚𑀢𑀺;

𑀲𑀼𑀦𑀬𑁄 𑀲𑁂𑀬𑁆𑀬𑀲𑁄 𑀳𑁄𑀢𑀺, 𑀲𑀫𑁆𑀫𑀸 𑀯𑀼𑀢𑁆𑀢𑁄 𑀦 𑀓𑀼𑀧𑁆𑀧𑀢𑀺;

𑀯𑀺𑀦𑀬𑀁 𑀲𑁄 𑀧𑀚𑀸𑀦𑀸𑀢𑀺, 𑀲𑀸𑀥𑀼 𑀢𑁂𑀦 𑀲𑀫𑀸𑀕𑀫𑁄.

𑁯𑁭. 𑀏𑀢𑀲𑁆𑀫𑀺𑀁 𑀢𑁂 𑀲𑀼𑀮𑀧𑀺𑀢𑁂, 𑀧𑀢𑀺𑀭𑀽𑀧𑁂 𑀲𑀼𑀪𑀸𑀲𑀺𑀢𑁂;

𑀯𑀭𑀁 𑀓𑀲𑁆𑀲𑀧 𑀢𑁂 𑀤𑀫𑁆𑀫𑀺, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺.

𑁯𑁮. 𑀯𑀭𑀁 𑀘𑁂 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀢𑀢𑁄 𑀭𑀢𑁆𑀬𑀸 𑀯𑀺𑀯𑀲𑀸𑀦𑁂 [𑀯𑀺𑀯𑀲𑀦𑁂 (𑀲𑀻. 𑀲𑁆𑀬𑀸. 𑀧𑀻.)], 𑀲𑀽𑀭𑀺𑀬𑀼𑀕𑁆𑀕𑀫𑀦𑀁 [𑀲𑀼𑀭𑀺𑀬𑀲𑁆𑀲𑀼𑀕𑁆𑀕𑀫𑀦𑀁 (𑀲𑀻. 𑀲𑁆𑀬𑀸. 𑀧𑀻.)] 𑀧𑀢𑀺;

𑀤𑀺𑀩𑁆𑀩𑀸 𑀪𑀓𑁆𑀔𑀸 𑀧𑀸𑀢𑀼𑀪𑀯𑁂𑀬𑁆𑀬𑀼𑀁, 𑀲𑀻𑀮𑀯𑀦𑁆𑀢𑁄 𑀘 𑀬𑀸𑀘𑀓𑀸.

𑁯𑁯. 𑀤𑀤𑀢𑁄 𑀫𑁂 [𑀤𑀤𑀢𑁄 𑀘 𑀫𑁂 (𑀧𑀻.)] 𑀦 𑀔𑀻𑀬𑁂𑀣, 𑀤𑀢𑁆𑀯𑀸 𑀦𑀸𑀦𑀼𑀢𑀧𑁂𑀬𑁆𑀬𑀳𑀁;

𑀤𑀤𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀬𑁆𑀬𑀁, 𑀏𑀢𑀁 𑀲𑀓𑁆𑀓 𑀯𑀭𑀁 𑀯𑀭𑁂.

𑁧𑁦𑁦. 𑀏𑀢𑀲𑁆𑀫𑀺𑀁 𑀢𑁂 𑀲𑀼𑀮𑀧𑀺𑀢𑁂, 𑀧𑀢𑀺𑀭𑀽𑀧𑁂 𑀲𑀼𑀪𑀸𑀲𑀺𑀢𑁂;

𑀯𑀭𑀁 𑀓𑀲𑁆𑀲𑀧 𑀢𑁂 𑀤𑀫𑁆𑀫𑀺, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺.

𑁧𑁦𑁧. 𑀯𑀭𑀁 𑀘𑁂 𑀫𑁂 𑀅𑀤𑁄 𑀲𑀓𑁆𑀓, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭;

𑀦 𑀫𑀁 𑀧𑀼𑀦 𑀉𑀧𑁂𑀬𑁆𑀬𑀸𑀲𑀺, 𑀏𑀢𑀁 𑀲𑀓𑁆𑀓 𑀯𑀭𑀁 𑀯𑀭𑁂.

𑁧𑁦𑁨. 𑀩𑀳𑀽𑀳𑀺 𑀯𑀢𑀘𑀭𑀺𑀬𑀸𑀳𑀺 [𑀯𑀢𑁆𑀢𑀘𑀭𑀺𑀬𑀸𑀳𑀺 (𑀲𑀻. 𑀲𑁆𑀬𑀸. 𑀓.)], 𑀦𑀭𑀸 𑀘 𑀅𑀣 𑀦𑀸𑀭𑀺𑀬𑁄;

𑀤𑀲𑁆𑀲𑀦𑀁 𑀅𑀪𑀺𑀓𑀗𑁆𑀔𑀦𑁆𑀢𑀺, 𑀓𑀺𑀁 𑀦𑀼 𑀫𑁂 𑀤𑀲𑁆𑀲𑀦𑁂 𑀪𑀬𑀁.

𑁧𑁦𑁩. 𑀢𑀁 𑀢𑀸𑀤𑀺𑀲𑀁 𑀤𑁂𑀯𑀯𑀡𑁆𑀡𑀁 [𑀤𑁂𑀯𑀯𑀡𑁆𑀡𑀺𑀁 (𑀧𑀻.)], 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀁;

𑀤𑀺𑀲𑁆𑀯𑀸 𑀢𑀧𑁄 𑀧𑀫𑀚𑁆𑀚𑁂𑀬𑁆𑀬 [𑀤𑀺𑀲𑁆𑀯𑀸 𑀢𑀧𑁄 𑀧𑀫𑀚𑁆𑀚𑁂𑀬𑁆𑀬𑀁 (𑀲𑀻. 𑀲𑁆𑀬𑀸. 𑀧𑀻.), 𑀤𑀺𑀲𑁆𑀯𑀸𑀦𑀳𑀁 𑀧𑀫𑀚𑁆𑀚𑁂𑀬𑁆𑀬𑀁 (𑀘𑀭𑀺𑀬𑀸𑀧𑀺𑀝𑀓𑀝𑁆𑀞𑀓𑀣𑀸)], 𑀏𑀢𑀁 𑀢𑁂 𑀤𑀲𑁆𑀲𑀦𑁂 𑀪𑀬𑀦𑁆𑀢𑀺.

𑀅𑀓𑀺𑀢𑁆𑀢𑀺𑀚𑀸𑀢𑀓𑀁 𑀲𑀢𑁆𑀢𑀫𑀁.