𑁪𑁭𑁩. 𑀫𑀺𑀢𑁆𑀢𑀸𑀫𑀺𑀢𑁆𑀢𑀚𑀸𑀢𑀓𑀁 (𑁧𑁦)

𑁧𑁨𑁧. 𑀓𑀸𑀦𑀺 𑀓𑀫𑁆𑀫𑀸𑀦𑀺 𑀓𑀼𑀩𑁆𑀩𑀸𑀦𑀁, 𑀓𑀣𑀁 𑀯𑀺𑀜𑁆𑀜𑀽 𑀧𑀭𑀓𑁆𑀓𑀫𑁂;

𑀅𑀫𑀺𑀢𑁆𑀢𑀁 𑀚𑀸𑀦𑁂𑀬𑁆𑀬 𑀫𑁂𑀥𑀸𑀯𑀻, 𑀤𑀺𑀲𑁆𑀯𑀸 𑀲𑀼𑀢𑁆𑀯𑀸 𑀘 𑀧𑀡𑁆𑀟𑀺𑀢𑁄.

𑁧𑁨𑁨. 𑀦 𑀦𑀁 𑀉𑀫𑁆𑀳𑀬𑀢𑁂 𑀤𑀺𑀲𑁆𑀯𑀸, 𑀦 𑀘 𑀦𑀁 𑀧𑀝𑀺𑀦𑀦𑁆𑀤𑀢𑀺;

𑀘𑀓𑁆𑀔𑀽𑀦𑀺 𑀘𑀲𑁆𑀲 [𑀘𑀓𑁆𑀔𑀽𑀦𑀺𑀲𑁆𑀲 (𑀲𑁆𑀬𑀸. 𑀓.)] 𑀦 𑀤𑀤𑀸𑀢𑀺, 𑀧𑀝𑀺𑀮𑁄𑀫𑀜𑁆𑀘 𑀯𑀢𑁆𑀢𑀢𑀺.

𑁧𑁨𑁩. 𑀅𑀫𑀺𑀢𑁆𑀢𑁂 𑀢𑀲𑁆𑀲 𑀪𑀚𑀢𑀺, 𑀫𑀺𑀢𑁆𑀢𑁂 𑀢𑀲𑁆𑀲 𑀦 𑀲𑁂𑀯𑀢𑀺;

𑀯𑀡𑁆𑀡𑀓𑀸𑀫𑁂 𑀦𑀺𑀯𑀸𑀭𑁂𑀢𑀺, 𑀅𑀓𑁆𑀓𑁄𑀲𑀦𑁆𑀢𑁂 𑀧𑀲𑀁𑀲𑀢𑀺.

𑁧𑁨𑁪. 𑀕𑀼𑀬𑁆𑀳𑀜𑁆𑀘 𑀢𑀲𑁆𑀲 𑀦𑀓𑁆𑀔𑀸𑀢𑀺, 𑀢𑀲𑁆𑀲 𑀕𑀼𑀬𑁆𑀳𑀁 𑀦 𑀕𑀽𑀳𑀢𑀺;

𑀓𑀫𑁆𑀫𑀁 𑀢𑀲𑁆𑀲 𑀦 𑀯𑀡𑁆𑀡𑁂𑀢𑀺, 𑀧𑀜𑁆𑀜𑀲𑁆𑀲 𑀦𑀧𑁆𑀧𑀲𑀁𑀲𑀢𑀺.

𑁧𑁨𑁫. 𑀅𑀪𑀯𑁂 𑀦𑀦𑁆𑀤𑀢𑀺 𑀢𑀲𑁆𑀲, 𑀪𑀯𑁂 𑀢𑀲𑁆𑀲 𑀦 𑀦𑀦𑁆𑀤𑀢𑀺;

𑀅𑀘𑁆𑀙𑁂𑀭𑀁 [𑀅𑀘𑁆𑀙𑀭𑀺𑀬𑀁 (𑀲𑀻. 𑀲𑁆𑀬𑀸. 𑀧𑀻.)] 𑀪𑁄𑀚𑀦𑀁 𑀮𑀤𑁆𑀥𑀸, 𑀢𑀲𑁆𑀲 𑀦𑀼𑀧𑁆𑀧𑀚𑁆𑀚𑀢𑁂 𑀲𑀢𑀺;

𑀢𑀢𑁄 𑀦𑀁 𑀦𑀸𑀦𑀼𑀓𑀫𑁆𑀧𑀢𑀺, 𑀅𑀳𑁄 𑀲𑁄𑀧𑀺 [𑀅𑀳𑀸𑀲𑁄𑀧𑀺 (𑀓. 𑀲𑀻. 𑀲𑁆𑀬𑀸. 𑀓.)] 𑀮𑀪𑁂𑀬𑁆𑀬𑀺𑀢𑁄.

𑁧𑁨𑁬. 𑀇𑀘𑁆𑀘𑁂𑀢𑁂 𑀲𑁄𑀴𑀲𑀸𑀓𑀸𑀭𑀸, 𑀅𑀫𑀺𑀢𑁆𑀢𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑀸;

𑀬𑁂𑀳𑀺 𑀅𑀫𑀺𑀢𑁆𑀢𑀁 𑀚𑀸𑀦𑁂𑀬𑁆𑀬, 𑀤𑀺𑀲𑁆𑀯𑀸 𑀲𑀼𑀢𑁆𑀯𑀸 𑀘 𑀧𑀡𑁆𑀟𑀺𑀢𑁄.

𑁧𑁨𑁭. 𑀓𑀸𑀦𑀺 𑀓𑀫𑁆𑀫𑀸𑀦𑀺 𑀓𑀼𑀩𑁆𑀩𑀸𑀦𑀁, 𑀓𑀣𑀁 𑀯𑀺𑀜𑁆𑀜𑀽 𑀧𑀭𑀓𑁆𑀓𑀫𑁂;

𑀫𑀺𑀢𑁆𑀢𑀁 𑀚𑀸𑀦𑁂𑀬𑁆𑀬 𑀫𑁂𑀥𑀸𑀯𑀻, 𑀤𑀺𑀲𑁆𑀯𑀸 𑀲𑀼𑀢𑁆𑀯𑀸 𑀘 𑀧𑀡𑁆𑀟𑀺𑀢𑁄.

𑁧𑁨𑁮. 𑀧𑀯𑀼𑀢𑁆𑀣𑀁 𑀢𑀲𑁆𑀲 𑀲𑀭𑀢𑀺, 𑀆𑀕𑀢𑀁 𑀅𑀪𑀺𑀦𑀦𑁆𑀤𑀢𑀺;

𑀢𑀢𑁄 𑀓𑁂𑀮𑀸𑀬𑀺𑀢𑁄 𑀳𑁄𑀢𑀺, 𑀯𑀸𑀘𑀸𑀬 𑀧𑀝𑀺𑀦𑀦𑁆𑀤𑀢𑀺.

𑁧𑁨𑁯. 𑀫𑀺𑀢𑁆𑀢𑁂 𑀢𑀲𑁆𑀲𑁂𑀯 𑀪𑀚𑀢𑀺, 𑀅𑀫𑀺𑀢𑁆𑀢𑁂 𑀢𑀲𑁆𑀲 𑀦 𑀲𑁂𑀯𑀢𑀺;

𑀅𑀓𑁆𑀓𑁄𑀲𑀦𑁆𑀢𑁂 𑀦𑀺𑀯𑀸𑀭𑁂𑀢𑀺, 𑀯𑀡𑁆𑀡𑀓𑀸𑀫𑁂 𑀧𑀲𑀁𑀲𑀢𑀺.

𑁧𑁩𑁦. 𑀕𑀼𑀬𑁆𑀳𑀜𑁆𑀘 𑀢𑀲𑁆𑀲 𑀅𑀓𑁆𑀔𑀸𑀢𑀺, 𑀢𑀲𑁆𑀲 𑀕𑀼𑀬𑁆𑀳𑀜𑁆𑀘 𑀕𑀽𑀳𑀢𑀺;

𑀓𑀫𑁆𑀫𑀜𑁆𑀘 𑀢𑀲𑁆𑀲 𑀯𑀡𑁆𑀡𑁂𑀢𑀺, 𑀧𑀜𑁆𑀜𑀁 𑀢𑀲𑁆𑀲 [𑀧𑀜𑁆𑀜𑀫𑀲𑁆𑀲 (𑀲𑁆𑀬𑀸. 𑀓.)] 𑀧𑀲𑀁𑀲𑀢𑀺.

𑁧𑁩𑁧. 𑀪𑀯𑁂 𑀘 𑀦𑀦𑁆𑀤𑀢𑀺 𑀢𑀲𑁆𑀲 [𑀪𑀯𑁂 𑀦𑀦𑁆𑀤𑀢𑀺 𑀢𑀲𑁆𑀲 𑀘 (𑀓.)], 𑀅𑀪𑀯𑁂 𑀢𑀲𑁆𑀲 𑀦 𑀦𑀦𑁆𑀤𑀢𑀺;

𑀅𑀘𑁆𑀙𑁂𑀭𑀁 [𑀅𑀘𑁆𑀙𑀭𑀺𑀬𑀁 (𑀲𑀻. 𑀲𑁆𑀬𑀸. 𑀧𑀻.)] 𑀪𑁄𑀚𑀦𑀁 𑀮𑀤𑁆𑀥𑀸, 𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑁂 𑀲𑀢𑀺;

𑀢𑀢𑁄 𑀦𑀁 𑀅𑀦𑀼𑀓𑀫𑁆𑀧𑀢𑀺, 𑀅𑀳𑁄 𑀲𑁄𑀧𑀺 [𑀧𑀳𑀸𑀲𑁄𑀧𑀺 (𑀓. 𑀲𑀻. 𑀲𑁆𑀬𑀸. 𑀓.)] 𑀮𑀪𑁂𑀬𑁆𑀬𑀺𑀢𑁄.

𑁧𑁩𑁨. 𑀇𑀘𑁆𑀘𑁂𑀢𑁂 𑀲𑁄𑀴𑀲𑀸𑀓𑀸𑀭𑀸, 𑀫𑀺𑀢𑁆𑀢𑀲𑁆𑀫𑀺𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸;

𑀬𑁂𑀳𑀺 𑀫𑀺𑀢𑁆𑀢𑀜𑁆𑀘 𑀚𑀸𑀦𑁂𑀬𑁆𑀬 [𑀫𑀺𑀢𑁆𑀢𑀁 𑀲𑀼𑀚𑀸𑀦𑁂𑀬𑁆𑀬 (𑀧𑀻. 𑀓.)], 𑀤𑀺𑀲𑁆𑀯𑀸 𑀲𑀼𑀢𑁆𑀯𑀸 𑀘 𑀧𑀡𑁆𑀟𑀺𑀢𑁄𑀢𑀺.

𑀫𑀺𑀢𑁆𑀢𑀸𑀫𑀺𑀢𑁆𑀢𑀚𑀸𑀢𑀓𑀁 𑀤𑀲𑀫𑀁.

𑀤𑁆𑀯𑀸𑀤𑀲𑀓𑀦𑀺𑀧𑀸𑀢𑀁 𑀦𑀺𑀝𑁆𑀞𑀺𑀢𑀁.