𑁪𑁭𑁨. 𑀫𑀳𑀸𑀧𑀤𑀼𑀫𑀚𑀸𑀢𑀓𑀁 (𑁯)

𑁧𑁦𑁬. 𑀦𑀸𑀤𑀝𑁆𑀞𑀸 [𑀦𑀸𑀤𑀺𑀝𑁆𑀞𑀸 (𑀓. 𑀲𑀻. 𑀲𑁆𑀬𑀸. 𑀓.)] 𑀧𑀭𑀢𑁄 𑀤𑁄𑀲𑀁, 𑀅𑀡𑀼𑀁 𑀣𑀽𑀮𑀸𑀦𑀺 𑀲𑀩𑁆𑀩𑀲𑁄;

𑀇𑀲𑁆𑀲𑀭𑁄 𑀧𑀡𑀬𑁂 𑀤𑀡𑁆𑀟𑀁, 𑀲𑀸𑀫𑀁 𑀅𑀧𑁆𑀧𑀝𑀺𑀯𑁂𑀓𑁆𑀔𑀺𑀬.

𑁧𑁦𑁭. 𑀬𑁄 𑀘 𑀅𑀧𑁆𑀧𑀝𑀺𑀯𑁂𑀓𑁆𑀔𑀺𑀢𑁆𑀯𑀸, 𑀤𑀡𑁆𑀟𑀁 𑀓𑀼𑀩𑁆𑀩𑀢𑀺 𑀔𑀢𑁆𑀢𑀺𑀬𑁄;

𑀲𑀓𑀡𑁆𑀝𑀓𑀁 𑀲𑁄 𑀕𑀺𑀮𑀢𑀺, 𑀚𑀘𑁆𑀘𑀦𑁆𑀥𑁄𑀯 𑀲𑀫𑀓𑁆𑀔𑀺𑀓𑀁.

𑁧𑁦𑁮. 𑀅𑀤𑀡𑁆𑀟𑀺𑀬𑀁 𑀤𑀡𑁆𑀟𑀬𑀢𑀺 [𑀤𑀡𑁆𑀟𑀺𑀬𑀢𑀺 (𑀲𑁆𑀬𑀸. 𑀧𑀻.)], 𑀤𑀡𑁆𑀟𑀺𑀬𑀜𑁆𑀘 𑀅𑀤𑀡𑁆𑀟𑀺𑀬𑀁 [𑀅𑀤𑀡𑁆𑀟𑀺𑀬 (𑀦𑀺𑀬𑁆𑀬), 𑀦 𑀤𑀡𑁆𑀟𑀬𑁂 (?)];

𑀅𑀦𑁆𑀥𑁄𑀯 𑀯𑀺𑀲𑀫𑀁 𑀫𑀕𑁆𑀕𑀁, 𑀦 𑀚𑀸𑀦𑀸𑀢𑀺 𑀲𑀫𑀸𑀲𑀫𑀁.

𑁧𑁦𑁯. 𑀬𑁄 𑀘 𑀏𑀢𑀸𑀦𑀺 𑀞𑀸𑀦𑀸𑀦𑀺, 𑀅𑀡𑀼𑀁 𑀣𑀽𑀮𑀸𑀦𑀺 𑀲𑀩𑁆𑀩𑀲𑁄;

𑀲𑀼𑀤𑀺𑀝𑁆𑀞𑀫𑀦𑀼𑀲𑀸𑀲𑁂𑀬𑁆𑀬, 𑀲 𑀯𑁂 𑀯𑁄𑀳𑀭𑀺𑀢𑀼 [𑀯𑁄𑀳𑀸𑀢𑀼 (𑀧𑀻.)] 𑀫𑀭𑀳𑀢𑀺.

𑁧𑁧𑁦. 𑀦𑁂𑀓𑀦𑁆𑀢𑀫𑀼𑀤𑀼𑀦𑀸 𑀲𑀓𑁆𑀓𑀸, 𑀏𑀓𑀦𑁆𑀢𑀢𑀺𑀔𑀺𑀡𑁂𑀦 𑀯𑀸;

𑀅𑀢𑁆𑀢𑀁 𑀫𑀳𑀦𑁆𑀢𑁂 [𑀫𑀳𑀢𑁆𑀢𑁂 (𑀲𑁆𑀬𑀸. 𑀓.)] 𑀞𑀧𑁂𑀢𑀼𑀁 [𑀞𑀸𑀧𑁂𑀢𑀼𑀁 (𑀲𑀻. 𑀲𑁆𑀬𑀸. 𑀧𑀻.)], 𑀢𑀲𑁆𑀫𑀸 𑀉𑀪𑀬𑀫𑀸𑀘𑀭𑁂.

𑁧𑁧𑁧. 𑀧𑀭𑀺𑀪𑀽𑀢𑁄 𑀫𑀼𑀤𑀼 𑀳𑁄𑀢𑀺, 𑀅𑀢𑀺𑀢𑀺𑀓𑁆𑀔𑁄 𑀘 𑀯𑁂𑀭𑀯𑀸;

𑀏𑀢𑀜𑁆𑀘 𑀉𑀪𑀬𑀁 𑀜𑀢𑁆𑀯𑀸, 𑀅𑀦𑀼𑀫𑀚𑁆𑀛𑀁 𑀲𑀫𑀸𑀘𑀭𑁂.

𑁧𑁧𑁨. 𑀩𑀳𑀼𑀫𑁆𑀧𑀺 𑀭𑀢𑁆𑀢𑁄 𑀪𑀸𑀲𑁂𑀬𑁆𑀬, 𑀤𑀼𑀝𑁆𑀞𑁄𑀧𑀺 𑀩𑀳𑀼 𑀪𑀸𑀲𑀢𑀺;

𑀦 𑀇𑀢𑁆𑀣𑀺𑀓𑀸𑀭𑀡𑀸 𑀭𑀸𑀚, 𑀧𑀼𑀢𑁆𑀢𑀁 𑀖𑀸𑀢𑁂𑀢𑀼𑀫𑀭𑀳𑀲𑀺.

𑁧𑁧𑁩. 𑀲𑀩𑁆𑀩𑁄𑀯 [𑀲𑀩𑁆𑀩𑁄 𑀘 (𑀓. 𑀲𑀻. 𑀧𑀻.)] 𑀮𑁄𑀓𑁄 𑀏𑀓𑀢𑁄 [𑀏𑀓𑀦𑁆𑀢𑁄 (𑀲𑀻. 𑀧𑀻.)], 𑀇𑀢𑁆𑀣𑀻 𑀘 𑀅𑀬𑀫𑁂𑀓𑀺𑀓𑀸;

𑀢𑁂𑀦𑀸𑀳𑀁 𑀧𑀝𑀺𑀧𑀚𑁆𑀚𑀺𑀲𑁆𑀲𑀁, 𑀕𑀘𑁆𑀙𑀣 𑀧𑀓𑁆𑀔𑀺𑀧𑀣𑁂𑀯 [𑀧𑀓𑁆𑀔𑀺𑀧𑁂𑀣 (𑀲𑁆𑀬𑀸. 𑀅𑀝𑁆𑀞.)] 𑀢𑀁.

𑁧𑁧𑁪. 𑀅𑀦𑁂𑀓𑀢𑀸𑀮𑁂 𑀦𑀭𑀓𑁂, 𑀕𑀫𑁆𑀪𑀻𑀭𑁂 𑀘 𑀲𑀼𑀤𑀼𑀢𑁆𑀢𑀭𑁂 [𑀕𑀫𑁆𑀪𑀻𑀭𑁂 𑀲𑀼𑀤𑀼𑀭𑀼𑀢𑁆𑀢𑀭𑁂 (𑀧𑀻. 𑀓.)];

𑀧𑀸𑀢𑀺𑀢𑁄 𑀕𑀺𑀭𑀺𑀤𑀼𑀕𑁆𑀕𑀲𑁆𑀫𑀺𑀁, 𑀓𑁂𑀦 𑀢𑁆𑀯𑀁 𑀢𑀢𑁆𑀣 𑀦𑀸𑀫𑀭𑀺.

𑁧𑁧𑁫. 𑀦𑀸𑀕𑁄 𑀚𑀸𑀢𑀨𑀡𑁄 𑀢𑀢𑁆𑀣, 𑀣𑀸𑀫𑀯𑀸 𑀕𑀺𑀭𑀺𑀲𑀸𑀦𑀼𑀚𑁄;

𑀧𑀘𑁆𑀘𑀕𑁆𑀕𑀳𑀺 𑀫𑀁 𑀪𑁄𑀕𑁂𑀳𑀺, 𑀢𑁂𑀦𑀸𑀳𑀁 𑀢𑀢𑁆𑀣 𑀦𑀸𑀫𑀭𑀺𑀁.

𑁧𑁧𑁬. 𑀏𑀳𑀺 𑀢𑀁 𑀧𑀝𑀺𑀦𑁂𑀲𑁆𑀲𑀸𑀫𑀺, 𑀭𑀸𑀚𑀧𑀼𑀢𑁆𑀢 𑀲𑀓𑀁 𑀖𑀭𑀁;

𑀭𑀚𑁆𑀚𑀁 𑀓𑀸𑀭𑁂𑀳𑀺 [𑀓𑀸𑀭𑁂𑀲𑀺 (𑀲𑀻.)] 𑀪𑀤𑁆𑀤𑀦𑁆𑀢𑁂, 𑀓𑀺𑀁 𑀅𑀭𑀜𑁆𑀜𑁂 𑀓𑀭𑀺𑀲𑁆𑀲𑀲𑀺.

𑁧𑁧𑁭. 𑀬𑀣𑀸 𑀕𑀺𑀮𑀺𑀢𑁆𑀯𑀸 𑀩𑀴𑀺𑀲𑀁, 𑀉𑀤𑁆𑀥𑀭𑁂𑀬𑁆𑀬 𑀲𑀮𑁄𑀳𑀺𑀢𑀁;

𑀉𑀤𑁆𑀥𑀭𑀺𑀢𑁆𑀯𑀸 𑀲𑀼𑀔𑀻 𑀅𑀲𑁆𑀲, 𑀏𑀯𑀁 [𑀲𑀼𑀔𑀁 (𑀧𑀻. 𑀓.)] 𑀧𑀲𑁆𑀲𑀸𑀫𑀺 𑀅𑀢𑁆𑀢𑀦𑀁 [𑀅𑀢𑁆𑀢𑀦𑀺 (𑀧𑀻. 𑀓.), 𑀅𑀢𑁆𑀢𑀦𑀸 (𑀲𑁆𑀬𑀸.), 𑀏𑀯𑀁 𑀅𑀳𑀫𑁆𑀧𑀺 𑀧𑀼𑀦 𑀲𑁄𑀢𑁆𑀣𑀺𑀪𑀸𑀯𑀧𑁆𑀧𑀢𑁆𑀢𑀁 𑀕𑀺𑀮𑀺𑀢𑀩𑀴𑀺𑀲𑀁 𑀧𑀼𑀭𑀺𑀲𑀫𑀺𑀯 𑀅𑀢𑁆𑀢𑀸𑀦𑀁 𑀧𑀲𑁆𑀲𑀸𑀫𑀻𑀢𑀺 (𑀅𑀝𑁆𑀞. 𑀲𑀁𑀯𑀡𑁆𑀡𑀦𑀸)].

𑁧𑁧𑁮. 𑀓𑀺𑀁 𑀦𑀼 𑀢𑁆𑀯𑀁 𑀩𑀴𑀺𑀲𑀁 𑀩𑁆𑀭𑀽𑀲𑀺, 𑀓𑀺𑀁 𑀢𑁆𑀯𑀁 𑀩𑁆𑀭𑀽𑀲𑀺 𑀲𑀮𑁄𑀳𑀺𑀢𑀁;

𑀓𑀺𑀁 𑀦𑀼 𑀢𑁆𑀯𑀁 𑀉𑀩𑁆𑀪𑀢𑀁 𑀩𑁆𑀭𑀽𑀲𑀺, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄.

𑁧𑁧𑁯. 𑀓𑀸𑀫𑀸𑀳𑀁 𑀩𑀴𑀺𑀲𑀁 𑀩𑁆𑀭𑀽𑀫𑀺, 𑀳𑀢𑁆𑀣𑀺𑀅𑀲𑁆𑀲𑀁 𑀲𑀮𑁄𑀳𑀺𑀢𑀁;

𑀘𑀢𑁆𑀢𑀸𑀳𑀁 𑀉𑀩𑁆𑀪𑀢𑀁 𑀩𑁆𑀭𑀽𑀫𑀺, 𑀏𑀯𑀁 𑀚𑀸𑀦𑀸𑀳𑀺 𑀔𑀢𑁆𑀢𑀺𑀬.

𑁧𑁨𑁦. 𑀘𑀺𑀜𑁆𑀘𑀸𑀫𑀸𑀡𑀯𑀺𑀓𑀸 𑀫𑀸𑀢𑀸, 𑀤𑁂𑀯𑀤𑀢𑁆𑀢𑁄 𑀘 𑀫𑁂 𑀧𑀺𑀢𑀸;

𑀆𑀦𑀦𑁆𑀤𑁄 𑀧𑀡𑁆𑀟𑀺𑀢𑁄 𑀦𑀸𑀕𑁄, 𑀲𑀸𑀭𑀺𑀧𑀼𑀢𑁆𑀢𑁄 𑀘 𑀤𑁂𑀯𑀢𑀸;

𑀭𑀸𑀚𑀧𑀼𑀢𑁆𑀢𑁄 𑀅𑀳𑀁 𑀆𑀲𑀺𑀁 [𑀅𑀳𑀁 𑀢𑀤𑀸 𑀭𑀸𑀚𑀧𑀼𑀢𑁆𑀢𑁄 (𑀲𑀻. 𑀲𑁆𑀬𑀸. 𑀧𑀻.)], 𑀏𑀯𑀁 𑀥𑀸𑀭𑁂𑀣 𑀚𑀸𑀢𑀓𑀦𑁆𑀢𑀺.

𑀫𑀳𑀸𑀧𑀤𑀼𑀫𑀚𑀸𑀢𑀓𑀁 𑀦𑀯𑀫𑀁.