𑁪𑁭𑁧. 𑀫𑁂𑀡𑁆𑀟𑀓𑀧𑀜𑁆𑀳𑀚𑀸𑀢𑀓𑀁 (𑁮)

𑁯𑁪. 𑀬𑁂𑀲𑀁 𑀦 𑀓𑀤𑀸𑀘𑀺 𑀪𑀽𑀢𑀧𑀼𑀩𑁆𑀩𑀁, 𑀲𑀔𑁆𑀬𑀁 [𑀲𑀓𑁆𑀔𑀺𑀁 (𑀲𑀻. 𑀧𑀻.), 𑀲𑀔𑀺 (𑀲𑁆𑀬𑀸.)] 𑀲𑀢𑁆𑀢𑀧𑀤𑀫𑁆𑀧𑀺𑀫𑀲𑁆𑀫𑀺 𑀮𑁄𑀓𑁂;

𑀚𑀸𑀢𑀸 𑀅𑀫𑀺𑀢𑁆𑀢𑀸 𑀤𑀼𑀯𑁂 𑀲𑀳𑀸𑀬𑀸, 𑀧𑀝𑀺𑀲𑀦𑁆𑀥𑀸𑀬 𑀘𑀭𑀦𑁆𑀢𑀺 𑀓𑀺𑀲𑁆𑀲 𑀳𑁂𑀢𑀼.

𑁯𑁫. 𑀬𑀤𑀺 𑀫𑁂 𑀅𑀚𑁆𑀚 𑀧𑀸𑀢𑀭𑀸𑀲𑀓𑀸𑀮𑁂, 𑀧𑀜𑁆𑀳𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬𑀸𑀣 𑀯𑀢𑁆𑀢𑀼𑀫𑁂𑀢𑀁;

𑀭𑀝𑁆𑀞𑀸 𑀧𑀩𑁆𑀩𑀸𑀚𑀬𑀺𑀲𑁆𑀲𑀸𑀫𑀺 𑀯𑁄 𑀲𑀩𑁆𑀩𑁂, 𑀦 𑀳𑀺 𑀫𑀢𑁆𑀣𑁄 𑀤𑀼𑀧𑁆𑀧𑀜𑁆𑀜𑀚𑀸𑀢𑀺𑀓𑁂𑀳𑀺.

𑁯𑁬. 𑀫𑀳𑀸𑀚𑀦𑀲𑀫𑀸𑀕𑀫𑀫𑁆𑀳𑀺 𑀖𑁄𑀭𑁂, 𑀚𑀦𑀓𑁄𑀮𑀸𑀳𑀮𑀲𑀗𑁆𑀕𑀫𑀫𑁆𑀳𑀺 𑀚𑀸𑀢𑁂;

𑀯𑀺𑀓𑁆𑀔𑀺𑀢𑁆𑀢𑀫𑀦𑀸 𑀅𑀦𑁂𑀓𑀘𑀺𑀢𑁆𑀢𑀸, 𑀧𑀜𑁆𑀳𑀁 𑀦 𑀲𑀓𑁆𑀓𑀼𑀡𑁄𑀫 𑀯𑀢𑁆𑀢𑀼𑀫𑁂𑀢𑀁.

𑁯𑁭. 𑀏𑀓𑀕𑁆𑀕𑀘𑀺𑀢𑁆𑀢𑀸𑀯 𑀏𑀓𑀫𑁂𑀓𑀸, 𑀭𑀳𑀲𑀺 𑀕𑀢𑀸 𑀅𑀢𑁆𑀣𑀁 𑀦𑀺𑀘𑀺𑀦𑁆𑀢𑀬𑀺𑀢𑁆𑀯𑀸 [𑀅𑀢𑁆𑀣𑀸𑀦𑀺 𑀘𑀺𑀦𑁆𑀢𑀬𑀺𑀢𑁆𑀯𑀸 (𑀲𑁆𑀬𑀸. 𑀓.)];

𑀧𑀯𑀺𑀯𑁂𑀓𑁂 𑀲𑀫𑁆𑀫𑀲𑀺𑀢𑁆𑀯𑀸𑀦 𑀥𑀻𑀭𑀸, 𑀅𑀣 𑀯𑀓𑁆𑀔𑀦𑁆𑀢𑀺 𑀚𑀦𑀺𑀦𑁆𑀤 𑀏𑀢𑀫𑀢𑁆𑀣𑀁.

𑁯𑁮. 𑀉𑀕𑁆𑀕𑀧𑀼𑀢𑁆𑀢-𑀭𑀸𑀚𑀧𑀼𑀢𑁆𑀢𑀺𑀬𑀸𑀦𑀁, 𑀉𑀭𑀩𑁆𑀪𑀲𑁆𑀲 𑀫𑀁𑀲𑀁 𑀧𑀺𑀬𑀁 𑀫𑀦𑀸𑀧𑀁;

𑀦 𑀲𑀼𑀦𑀔𑀲𑁆𑀲 𑀢𑁂 𑀅𑀤𑁂𑀦𑁆𑀢𑀺 𑀫𑀁𑀲𑀁, 𑀅𑀣 𑀫𑁂𑀡𑁆𑀟𑀲𑁆𑀲 𑀲𑀼𑀡𑁂𑀦 𑀲𑀔𑁆𑀬𑀫𑀲𑁆𑀲.

𑁯𑁯. 𑀘𑀫𑁆𑀫𑀁 𑀯𑀺𑀳𑀦𑀦𑁆𑀢𑀺 𑀏𑀴𑀓𑀲𑁆𑀲, 𑀅𑀲𑁆𑀲𑀧𑀺𑀝𑁆𑀞𑀢𑁆𑀣𑀭𑀲𑁆𑀲𑀼𑀔𑀲𑁆𑀲 [𑀅𑀲𑁆𑀲𑀧𑀺𑀝𑁆𑀞𑀢𑁆𑀣𑀭𑀡𑀲𑀼𑀔𑀲𑁆𑀲 (𑀲𑀻.)] 𑀳𑁂𑀢𑀼;

𑀦 𑀘 𑀢𑁂 𑀲𑀼𑀦𑀔𑀲𑁆𑀲 𑀅𑀢𑁆𑀣𑀭𑀦𑁆𑀢𑀺, 𑀅𑀣 𑀫𑁂𑀡𑁆𑀟𑀲𑁆𑀲 𑀲𑀼𑀡𑁂𑀦 𑀲𑀔𑁆𑀬𑀫𑀲𑁆𑀲.

𑁧𑁦𑁦. 𑀆𑀯𑁂𑀮𑁆𑀮𑀺𑀢𑀲𑀺𑀗𑁆𑀕𑀺𑀓𑁄 𑀳𑀺 𑀫𑁂𑀡𑁆𑀟𑁄, 𑀦 𑀘 𑀲𑀼𑀦𑀔𑀲𑁆𑀲 𑀯𑀺𑀲𑀸𑀡𑀓𑀸𑀦𑀺 𑀅𑀢𑁆𑀣𑀺;

𑀢𑀺𑀡𑀪𑀓𑁆𑀔𑁄 𑀫𑀁𑀲𑀪𑁄𑀚𑀦𑁄 𑀘, 𑀅𑀣 𑀫𑁂𑀡𑁆𑀟𑀲𑁆𑀲 𑀲𑀼𑀡𑁂𑀦 𑀲𑀔𑁆𑀬𑀫𑀲𑁆𑀲.

𑁧𑁦𑁧. 𑀢𑀺𑀡𑀫𑀸𑀲𑀺 𑀧𑀮𑀸𑀲𑀫𑀸𑀲𑀺 𑀫𑁂𑀡𑁆𑀟𑁄, 𑀦 𑀘 𑀲𑀼𑀦𑀔𑁄 𑀢𑀺𑀡𑀫𑀸𑀲𑀺 𑀦𑁄 𑀧𑀮𑀸𑀲𑀁;

𑀕𑀡𑁆𑀳𑁂𑀬𑁆𑀬 𑀲𑀼𑀡𑁄 𑀲𑀲𑀁 𑀩𑀺𑀴𑀸𑀭𑀁, 𑀅𑀣 𑀫𑁂𑀡𑁆𑀟𑀲𑁆𑀲 𑀲𑀼𑀡𑁂𑀦 𑀲𑀔𑁆𑀬𑀫𑀲𑁆𑀲.

𑁧𑁦𑁨. 𑀅𑀝𑁆𑀞𑀟𑁆𑀠𑀧𑀤𑁄 𑀘𑀢𑀼𑀧𑁆𑀧𑀤𑀲𑁆𑀲, 𑀫𑁂𑀡𑁆𑀟𑁄 𑀅𑀝𑁆𑀞𑀦𑀔𑁄 𑀅𑀤𑀺𑀲𑁆𑀲𑀫𑀸𑀦𑁄;

𑀙𑀸𑀤𑀺𑀬𑀫𑀸𑀳𑀭𑀢𑀻 𑀅𑀬𑀁 𑀇𑀫𑀲𑁆𑀲, 𑀫𑀁𑀲𑀁 𑀆𑀳𑀭𑀢𑀻 𑀅𑀬𑀁 𑀅𑀫𑀼𑀲𑁆𑀲.

𑁧𑁦𑁩. 𑀧𑀸𑀲𑀸𑀤𑀯𑀭𑀕𑀢𑁄 𑀯𑀺𑀤𑁂𑀳𑀲𑁂𑀝𑁆𑀞𑁄, 𑀯𑀺𑀢𑀺𑀳𑀸𑀭𑀁 𑀅𑀜𑁆𑀜𑀫𑀜𑁆𑀜𑀪𑁄𑀚𑀦𑀸𑀦𑀁;

𑀅𑀤𑁆𑀤𑀓𑁆𑀔𑀺 [𑀅𑀤𑁆𑀤𑀲 (𑀲𑁆𑀬𑀸. 𑀓.)] 𑀓𑀺𑀭 𑀲𑀓𑁆𑀔𑀺𑀓𑀁 𑀚𑀦𑀺𑀦𑁆𑀤𑁄, 𑀩𑀼𑀪𑀼𑀓𑁆𑀓𑀲𑁆𑀲 𑀧𑀼𑀡𑁆𑀡𑀁 𑀫𑀼𑀔𑀲𑁆𑀲 [𑀪𑁄𑀪𑀼𑀓𑁆𑀔𑀲𑁆𑀲 𑀘 𑀧𑀼𑀡𑁆𑀡𑀫𑀼𑀔𑀲𑁆𑀲 (𑀲𑀻.)] 𑀘𑁂𑀢𑀁.

𑁧𑁦𑁪. 𑀮𑀸𑀪𑀸 𑀯𑀢 𑀫𑁂 𑀅𑀦𑀧𑁆𑀧𑀭𑀽𑀧𑀸, 𑀬𑀲𑁆𑀲 𑀫𑁂𑀤𑀺𑀲𑀸 𑀧𑀡𑁆𑀟𑀺𑀢𑀸 𑀓𑀼𑀮𑀫𑁆𑀳𑀺;

𑀧𑀜𑁆𑀳𑀲𑁆𑀲 𑀕𑀫𑁆𑀪𑀻𑀭𑀕𑀢𑀁 𑀦𑀺𑀧𑀼𑀡𑀫𑀢𑁆𑀣𑀁, 𑀧𑀝𑀺𑀯𑀺𑀚𑁆𑀛𑀦𑁆𑀢𑀺 𑀲𑀼𑀪𑀸𑀲𑀺𑀢𑁂𑀦 𑀥𑀻𑀭𑀸.

𑁧𑁦𑁫. 𑀅𑀲𑁆𑀲𑀢𑀭𑀺𑀭𑀣𑀜𑁆𑀘 𑀏𑀓𑀫𑁂𑀓𑀁, 𑀨𑀻𑀢𑀁 𑀕𑀸𑀫𑀯𑀭𑀜𑁆𑀘 𑀏𑀓𑀫𑁂𑀓𑀁;

𑀲𑀩𑁆𑀩𑁂𑀲𑀁 𑀯𑁄 𑀤𑀫𑁆𑀫𑀺 𑀧𑀡𑁆𑀟𑀺𑀢𑀸𑀦𑀁, 𑀧𑀭𑀫𑀧𑁆𑀧𑀢𑀻𑀢𑀫𑀦𑁄 𑀲𑀼𑀪𑀸𑀲𑀺𑀢𑁂𑀦𑀸𑀢𑀺.

𑀫𑁂𑀡𑁆𑀟𑀓𑀧𑀜𑁆𑀳𑀚𑀸𑀢𑀓𑀁 𑀅𑀝𑁆𑀞𑀫𑀁.