𑁪𑁭𑁦. 𑀓𑁄𑀲𑀺𑀬𑀚𑀸𑀢𑀓𑀁 (𑁭)

𑁭𑁩. 𑀦𑁂𑀯 𑀓𑀺𑀡𑀸𑀫𑀺 𑀦𑀧𑀺 𑀯𑀺𑀓𑁆𑀓𑀺𑀡𑀸𑀫𑀺, 𑀦 𑀘𑀸𑀧𑀺 𑀫𑁂 𑀲𑀦𑁆𑀦𑀺𑀘𑀬𑁄 𑀘 𑀅𑀢𑁆𑀣𑀺 [𑀇𑀥𑀢𑁆𑀣𑀺 (𑀲𑁆𑀬𑀸.)];

𑀲𑀼𑀓𑀺𑀘𑁆𑀙𑀭𑀽𑀧𑀁 𑀯𑀢𑀺𑀤𑀁 𑀧𑀭𑀺𑀢𑁆𑀢𑀁, 𑀧𑀢𑁆𑀣𑁄𑀤𑀦𑁄 𑀦𑀸𑀮𑀫𑀬𑀁 𑀤𑀼𑀯𑀺𑀦𑁆𑀦𑀁.

𑁭𑁪. 𑀅𑀧𑁆𑀧𑀫𑁆𑀳𑀸 𑀅𑀧𑁆𑀧𑀓𑀁 𑀤𑀚𑁆𑀚𑀸, 𑀅𑀦𑀼𑀫𑀚𑁆𑀛𑀢𑁄 𑀫𑀚𑁆𑀛𑀓𑀁;

𑀩𑀳𑀼𑀫𑁆𑀳𑀸 𑀩𑀳𑀼𑀓𑀁 𑀤𑀚𑁆𑀚𑀸, 𑀅𑀤𑀸𑀦𑀁 𑀦𑀼𑀧𑀧𑀚𑁆𑀚𑀢𑀺 [𑀦 𑀉𑀧𑀧𑀚𑁆𑀚𑀢𑀺 (𑀲𑀻. 𑀧𑀻.), 𑀦𑀽𑀧𑀧𑀚𑁆𑀚𑀢𑀺 (𑀲𑁆𑀬𑀸.)].

𑁭𑁫. 𑀢𑀁 𑀢𑀁 𑀯𑀤𑀸𑀫𑀺 𑀓𑁄𑀲𑀺𑀬, 𑀤𑁂𑀳𑀺 𑀤𑀸𑀦𑀸𑀦𑀺 𑀪𑀼𑀜𑁆𑀚 𑀘.

𑀅𑀭𑀺𑀬𑀫𑀕𑁆𑀕𑀁 𑀲𑀫𑀸𑀭𑀽𑀳 [𑀅𑀭𑀺𑀬𑀁 𑀫𑀕𑁆𑀕𑀁 𑀲𑀫𑀸𑀭𑀼𑀳 (𑀲𑀻. 𑀧𑀻.)], 𑀦𑁂𑀓𑀸𑀲𑀻 𑀮𑀪𑀢𑁂 𑀲𑀼𑀔𑀁.

𑁭𑁬. 𑀫𑁄𑀖𑀜𑁆𑀘𑀲𑁆𑀲 𑀳𑀼𑀢𑀁 𑀳𑁄𑀢𑀺, 𑀫𑁄𑀖𑀜𑁆𑀘𑀸𑀧𑀺 𑀲𑀫𑀻𑀳𑀺𑀢𑀁;

𑀅𑀢𑀺𑀣𑀺𑀲𑁆𑀫𑀺𑀁 𑀬𑁄 𑀦𑀺𑀲𑀺𑀦𑁆𑀦𑀲𑁆𑀫𑀺𑀁, 𑀏𑀓𑁄 𑀪𑀼𑀜𑁆𑀚𑀢𑀺 𑀪𑁄𑀚𑀦𑀁.

𑁭𑁭. 𑀢𑀁 𑀢𑀁 𑀯𑀤𑀸𑀫𑀺 𑀓𑁄𑀲𑀺𑀬, 𑀤𑁂𑀳𑀺 𑀤𑀸𑀦𑀸𑀦𑀺 𑀪𑀼𑀜𑁆𑀚 𑀘;

𑀅𑀭𑀺𑀬𑀫𑀕𑁆𑀕𑀁 𑀲𑀫𑀸𑀭𑀽𑀳, 𑀦𑁂𑀓𑀸𑀲𑀻 𑀮𑀪𑀢𑁂 𑀲𑀼𑀔𑀁.

𑁭𑁮. 𑀲𑀘𑁆𑀘𑀜𑁆𑀘𑀲𑁆𑀲 𑀳𑀼𑀢𑀁 𑀳𑁄𑀢𑀺, 𑀲𑀘𑁆𑀘𑀜𑁆𑀘𑀸𑀧𑀺 𑀲𑀫𑀻𑀳𑀺𑀢𑀁;

𑀅𑀢𑀺𑀣𑀺𑀲𑁆𑀫𑀺𑀁 𑀬𑁄 𑀦𑀺𑀲𑀺𑀦𑁆𑀦𑀲𑁆𑀫𑀺𑀁, 𑀦𑁂𑀓𑁄 𑀪𑀼𑀜𑁆𑀚𑀢𑀺 𑀪𑁄𑀚𑀦𑀁.

𑁭𑁯. 𑀢𑀁 𑀢𑀁 𑀯𑀤𑀸𑀫𑀺 𑀓𑁄𑀲𑀺𑀬, 𑀤𑁂𑀳𑀺 𑀤𑀸𑀦𑀸𑀦𑀺 𑀪𑀼𑀜𑁆𑀚 𑀘;

𑀅𑀭𑀺𑀬𑀫𑀕𑁆𑀕𑀁 𑀲𑀫𑀸𑀭𑀽𑀳, 𑀦𑁂𑀓𑀸𑀲𑀻 𑀮𑀪𑀢𑁂 𑀲𑀼𑀔𑀁.

𑁮𑁦. 𑀲𑀭𑀜𑁆𑀘 𑀚𑀼𑀳𑀢𑀺 𑀧𑁄𑀲𑁄, 𑀩𑀳𑀼𑀓𑀸𑀬 𑀕𑀬𑀸𑀬 𑀘;

𑀤𑁄𑀡𑁂 𑀢𑀺𑀫𑁆𑀩𑀭𑀼𑀢𑀺𑀢𑁆𑀣𑀲𑁆𑀫𑀺𑀁, 𑀲𑀻𑀖𑀲𑁄𑀢𑁂 𑀫𑀳𑀸𑀯𑀳𑁂.

𑁮𑁧. 𑀅𑀢𑁆𑀭 𑀘𑀲𑁆𑀲 𑀳𑀼𑀢𑀁 𑀳𑁄𑀢𑀺, 𑀅𑀢𑁆𑀭 𑀘𑀲𑁆𑀲 𑀲𑀫𑀻𑀳𑀺𑀢𑀁;

𑀅𑀢𑀺𑀣𑀺𑀲𑁆𑀫𑀺𑀁 𑀬𑁄 𑀦𑀺𑀲𑀺𑀦𑁆𑀦𑀲𑁆𑀫𑀺𑀁, 𑀦𑁂𑀓𑁄 𑀪𑀼𑀜𑁆𑀚𑀢𑀺 𑀪𑁄𑀚𑀦𑀁.

𑁮𑁨. 𑀢𑀁 𑀢𑀁 𑀯𑀤𑀸𑀫𑀺 𑀓𑁄𑀲𑀺𑀬, 𑀤𑁂𑀳𑀺 𑀤𑀸𑀦𑀸𑀦𑀺 𑀪𑀼𑀜𑁆𑀚 𑀘;

𑀅𑀭𑀺𑀬𑀫𑀕𑁆𑀕𑀁 𑀲𑀫𑀸𑀭𑀽𑀳, 𑀦𑁂𑀓𑀸𑀲𑀻 𑀮𑀪𑀢𑁂 𑀲𑀼𑀔𑀁.

𑁮𑁩. 𑀩𑀴𑀺𑀲𑀜𑁆𑀳𑀺 𑀲𑁄 𑀦𑀺𑀕𑀺𑀮𑀢𑀺 [𑀦𑀺𑀕𑁆𑀕𑀺𑀮𑀢𑀺 (𑀲𑀻. 𑀧𑀻.)], 𑀤𑀻𑀖𑀲𑀼𑀢𑁆𑀢𑀁 𑀲𑀩𑀦𑁆𑀥𑀦𑀁;

𑀅𑀢𑀺𑀣𑀺𑀲𑁆𑀫𑀺𑀁 𑀬𑁄 𑀦𑀺𑀲𑀺𑀦𑁆𑀦𑀲𑁆𑀫𑀺𑀁, 𑀏𑀓𑁄 𑀪𑀼𑀜𑁆𑀚𑀢𑀺 𑀪𑁄𑀚𑀦𑀁.

𑁮𑁪. 𑀢𑀁 𑀢𑀁 𑀯𑀤𑀸𑀫𑀺 𑀓𑁄𑀲𑀺𑀬, 𑀤𑁂𑀳𑀺 𑀤𑀸𑀦𑀸𑀦𑀺 𑀪𑀼𑀜𑁆𑀚 𑀘;

𑀅𑀭𑀺𑀬𑀫𑀕𑁆𑀕𑀁 𑀲𑀫𑀸𑀭𑀽𑀳, 𑀦𑁂𑀓𑀸𑀲𑀻 𑀮𑀪𑀢𑁂 𑀲𑀼𑀔𑀁.

𑁮𑁫. 𑀉𑀴𑀸𑀭𑀯𑀡𑁆𑀡𑀸 𑀯𑀢 𑀩𑁆𑀭𑀸𑀳𑁆𑀫𑀡𑀸 𑀇𑀫𑁂, 𑀅𑀬𑀜𑁆𑀘 𑀯𑁄 𑀲𑀼𑀦𑀔𑁄 𑀓𑀺𑀲𑁆𑀲 𑀳𑁂𑀢𑀼;

𑀉𑀘𑁆𑀘𑀸𑀯𑀘𑀁 𑀯𑀡𑁆𑀡𑀦𑀺𑀪𑀁 𑀯𑀺𑀓𑀼𑀩𑁆𑀩𑀢𑀺, 𑀅𑀓𑁆𑀔𑀸𑀣 𑀦𑁄 𑀩𑁆𑀭𑀸𑀳𑁆𑀫𑀡𑀸 𑀓𑁂 𑀦𑀼 𑀢𑀼𑀫𑁆𑀳𑁂.

𑁮𑁬. 𑀘𑀦𑁆𑀤𑁄 𑀘 𑀲𑀼𑀭𑀺𑀬𑁄 𑀘 [𑀲𑀽𑀭𑀺𑀬𑁄 𑀘 (𑀓.)] 𑀉𑀪𑁄 𑀇𑀥𑀸𑀕𑀢𑀸, 𑀅𑀬𑀁 𑀧𑀦 𑀫𑀸𑀢𑀮𑀺 𑀤𑁂𑀯𑀲𑀸𑀭𑀣𑀺;

𑀲𑀓𑁆𑀓𑁄𑀳𑀫𑀲𑁆𑀫𑀺 𑀢𑀺𑀤𑀲𑀸𑀦𑀫𑀺𑀦𑁆𑀤𑁄, 𑀏𑀲𑁄 𑀘 𑀔𑁄 𑀧𑀜𑁆𑀘𑀲𑀺𑀔𑁄𑀢𑀺 𑀯𑀼𑀘𑁆𑀘𑀢𑀺.

𑁮𑁭. 𑀧𑀸𑀡𑀺𑀲𑁆𑀲𑀭𑀸 𑀫𑀼𑀤𑀺𑀗𑁆𑀕𑀸 𑀘 [𑀫𑀼𑀢𑀺𑀗𑁆𑀕𑀸 𑀘 (𑀲𑀻. 𑀲𑁆𑀬𑀸. 𑀧𑀻.], 𑀫𑀼𑀭𑀚𑀸𑀮𑀫𑁆𑀩𑀭𑀸𑀦𑀺 𑀘;

𑀲𑀼𑀢𑁆𑀢𑀫𑁂𑀦𑀁 𑀧𑀩𑁄𑀥𑁂𑀦𑁆𑀢𑀺, 𑀧𑀝𑀺𑀩𑀼𑀤𑁆𑀥𑁄 𑀘 𑀦𑀦𑁆𑀤𑀢𑀺.

𑁮𑁮. 𑀬𑁂 𑀓𑁂𑀘𑀺𑀫𑁂 𑀫𑀘𑁆𑀙𑀭𑀺𑀦𑁄 𑀓𑀤𑀭𑀺𑀬𑀸, 𑀧𑀭𑀺𑀪𑀸𑀲𑀓𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁;

𑀇𑀥𑁂𑀯 𑀦𑀺𑀓𑁆𑀔𑀺𑀧𑁆𑀧 𑀲𑀭𑀻𑀭𑀤𑁂𑀳𑀁, 𑀓𑀸𑀬𑀲𑁆𑀲 𑀪𑁂𑀤𑀸 𑀦𑀺𑀭𑀬𑀁 𑀯𑀚𑀦𑁆𑀢𑀺.

𑁮𑁯. 𑀬𑁂 𑀓𑁂𑀘𑀺𑀫𑁂 𑀲𑀼𑀕𑁆𑀕𑀢𑀺𑀫𑀸𑀲𑀫𑀸𑀦𑀸 [𑀲𑀼𑀕𑁆𑀕𑀢𑀺𑀫𑀸𑀲𑀲𑀸𑀦𑀸 (𑀲𑀻. 𑀧𑀻.), 𑀲𑀼𑀕𑁆𑀕𑀢𑀸𑀲𑀺𑀲𑀫𑀸𑀦𑀸 (𑀓.)], 𑀥𑀫𑁆𑀫𑁂 𑀞𑀺𑀢𑀸 𑀲𑀁𑀬𑀫𑁂 𑀲𑀁𑀯𑀺𑀪𑀸𑀕𑁂;

𑀇𑀥𑁂𑀯 𑀦𑀺𑀓𑁆𑀔𑀺𑀧𑁆𑀧 𑀲𑀭𑀻𑀭𑀤𑁂𑀳𑀁, 𑀓𑀸𑀬𑀲𑁆𑀲 𑀪𑁂𑀤𑀸 𑀲𑀼𑀕𑀢𑀺𑀁 𑀯𑀚𑀦𑁆𑀢𑀺.

𑁯𑁦. 𑀢𑁆𑀯𑀁 𑀦𑁄𑀲𑀺 𑀜𑀸𑀢𑀺 𑀧𑀼𑀭𑀺𑀫𑀸𑀲𑀼 𑀚𑀸𑀢𑀺𑀲𑀼, 𑀲𑁄 𑀫𑀘𑁆𑀙𑀭𑀻 𑀭𑁄𑀲𑀓𑁄 [𑀓𑁄𑀲𑀺𑀬𑁄 (𑀲𑁆𑀬𑀸. 𑀓.)] 𑀧𑀸𑀧𑀥𑀫𑁆𑀫𑁄;

𑀢𑀯𑁂𑀯 𑀅𑀢𑁆𑀣𑀸𑀬 𑀇𑀥𑀸𑀕𑀢𑀫𑁆𑀳𑀸, 𑀫𑀸 𑀧𑀸𑀧𑀥𑀫𑁆𑀫𑁄 𑀦𑀺𑀭𑀬𑀁 𑀕𑀫𑀺𑀢𑁆𑀣 [𑀅𑀧𑁆𑀧𑀢𑁆𑀣 (𑀓. 𑀲𑀻. 𑀲𑁆𑀬𑀸. 𑀧𑀻.)].

𑁯𑁧. 𑀅𑀤𑁆𑀥𑀸 𑀳𑀺 𑀫𑀁 𑀯𑁄 𑀳𑀺𑀢𑀓𑀸𑀫𑀸, 𑀬𑀁 𑀫𑀁 𑀲𑀫𑀦𑀼𑀲𑀸𑀲𑀣;

𑀲𑁄𑀳𑀁 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺, 𑀲𑀩𑁆𑀩𑀁 𑀯𑀼𑀢𑁆𑀢𑀁 𑀳𑀺𑀢𑁂𑀲𑀺𑀪𑀺.

𑁯𑁨. 𑀏𑀲𑀸𑀳𑀫𑀚𑁆𑀚𑁂𑀯 𑀉𑀧𑀸𑀭𑀫𑀸𑀫𑀺, 𑀦 𑀘𑀸𑀧𑀺𑀳𑀁 [𑀦 𑀘𑀸𑀧𑀳𑀁 (𑀲𑀻. 𑀧𑀻.)] 𑀓𑀺𑀜𑁆𑀘𑀺 𑀓𑀭𑁂𑀬𑁆𑀬 𑀧𑀸𑀧𑀁;

𑀦 𑀘𑀸𑀧𑀺 𑀫𑁂 𑀓𑀺𑀜𑁆𑀘𑀺 𑀅𑀤𑁂𑀬𑁆𑀬𑀫𑀢𑁆𑀣𑀺, 𑀦 𑀘𑀸𑀧𑀺𑀤𑀢𑁆𑀯𑀸 𑀉𑀤𑀓𑀁 𑀧𑀺𑀯𑀸𑀫𑀺 [𑀉𑀤𑀓𑀫𑁆𑀧𑀳𑀁 𑀧𑀺𑀩𑁂 (𑀲𑀻.)].

𑁯𑁩. 𑀏𑀯𑀜𑁆𑀘 𑀫𑁂 𑀤𑀤𑀢𑁄 𑀲𑀩𑁆𑀩𑀓𑀸𑀮𑀁 [𑀓𑀸𑀮𑁂 (𑀓.)], 𑀪𑁄𑀕𑀸 𑀇𑀫𑁂 𑀯𑀸𑀲𑀯 𑀔𑀻𑀬𑀺𑀲𑁆𑀲𑀦𑁆𑀢𑀺;

𑀢𑀢𑁄 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀺 𑀲𑀓𑁆𑀓, 𑀳𑀺𑀢𑁆𑀯𑀸𑀦 𑀓𑀸𑀫𑀸𑀦𑀺 𑀬𑀣𑁄𑀥𑀺𑀓𑀸𑀦𑀻𑀢𑀺.

𑀓𑁄𑀲𑀺𑀬𑀚𑀸𑀢𑀓𑀁 𑀲𑀢𑁆𑀢𑀫𑀁.