𑁪𑁬𑁯. 𑀫𑀳𑀸𑀓𑀡𑁆𑀳𑀚𑀸𑀢𑀓𑀁 (𑁬)

𑁬𑁧. 𑀓𑀡𑁆𑀳𑁄 𑀓𑀡𑁆𑀳𑁄 𑀘 𑀖𑁄𑀭𑁄 𑀘, 𑀲𑀼𑀓𑁆𑀓𑀤𑀸𑀞𑁄 𑀧𑀪𑀸𑀲𑀯𑀸 [𑀧𑀢𑀸𑀧𑀯𑀸 (𑀲𑀻. 𑀲𑁆𑀬𑀸. 𑀧𑀻.)];

𑀩𑀤𑁆𑀥𑁄 𑀧𑀜𑁆𑀘𑀳𑀺 𑀭𑀚𑁆𑀚𑀽𑀳𑀺, 𑀓𑀺𑀁 𑀭𑀯𑀺 [𑀥𑀻𑀭 (𑀲𑀻. 𑀧𑀻.), 𑀯𑀻𑀭 (𑀲𑁆𑀬𑀸.)] 𑀲𑀼𑀦𑀔𑁄 𑀢𑀯.

𑁬𑁨. 𑀦𑀸𑀬𑀁 𑀫𑀺𑀕𑀸𑀦𑀫𑀢𑁆𑀣𑀸𑀬, 𑀉𑀲𑀻𑀦𑀓 [𑀉𑀲𑀻𑀦𑀭 (𑀲𑀻. 𑀧𑀻.), 𑀉𑀲𑀻𑀦𑁆𑀦𑀭 (𑀲𑁆𑀬𑀸.)] 𑀪𑀯𑀺𑀲𑁆𑀲𑀢𑀺;

𑀫𑀦𑀼𑀲𑁆𑀲𑀸𑀦𑀁 𑀅𑀦𑀬𑁄 𑀳𑀼𑀢𑁆𑀯𑀸, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀺.

𑁬𑁩. 𑀧𑀢𑁆𑀢𑀳𑀢𑁆𑀣𑀸 𑀲𑀫𑀡𑀓𑀸, 𑀫𑀼𑀡𑁆𑀟𑀸 𑀲𑀗𑁆𑀖𑀸𑀝𑀺𑀧𑀸𑀭𑀼𑀢𑀸;

𑀦𑀗𑁆𑀕𑀮𑁂𑀳𑀺 𑀓𑀲𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀺.

𑁬𑁪. 𑀢𑀧𑀲𑁆𑀲𑀺𑀦𑀺𑀬𑁄 [𑀢𑀧𑀦𑀻𑀬𑀸 (𑀓.) 𑀤𑀼𑀢𑀺𑀬𑀦𑁆𑀢𑀧𑀤𑀸𑀦𑀺 𑀳𑁂𑀢𑀸𑀦𑀺] 𑀧𑀩𑁆𑀩𑀚𑀺𑀢𑀸, 𑀫𑀼𑀡𑁆𑀟𑀸 𑀲𑀗𑁆𑀖𑀸𑀝𑀺𑀧𑀸𑀭𑀼𑀢𑀸;

𑀬𑀤𑀸 𑀮𑁄𑀓𑁂 𑀕𑀫𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀺.

𑁬𑁫. 𑀤𑀻𑀖𑁄𑀢𑁆𑀢𑀭𑁄𑀝𑁆𑀞𑀸 𑀚𑀝𑀺𑀮𑀸, 𑀧𑀗𑁆𑀓𑀤𑀦𑁆𑀢𑀸 𑀭𑀚𑀲𑁆𑀲𑀺𑀭𑀸;

𑀇𑀡𑀁 𑀘𑁄𑀤𑀸𑀬 [𑀯𑁄𑀤𑀸𑀬 (𑀲𑀻. 𑀧𑀻.), 𑀘𑁄𑀤𑀬 (𑀲𑁆𑀬𑀸.)] 𑀕𑀘𑁆𑀙𑀦𑁆𑀢𑀺, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀺.

𑁬𑁬. 𑀅𑀥𑀺𑀘𑁆𑀘 𑀯𑁂𑀤𑁂 [𑀯𑁂𑀤𑀁 (𑀓.)] 𑀲𑀸𑀯𑀺𑀢𑁆𑀢𑀺𑀁, 𑀬𑀜𑁆𑀜𑀢𑀦𑁆𑀢𑀜𑁆𑀘 [𑀢𑀦𑁆𑀢𑁆𑀭𑀜𑁆𑀘 (𑀲𑀻. 𑀲𑁆𑀬𑀸. 𑀧𑀻.)] 𑀩𑁆𑀭𑀸𑀳𑁆𑀫𑀡𑀸;

𑀪𑀢𑀺𑀓𑀸𑀬 𑀬𑀚𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀺.

𑁬𑁭. 𑀫𑀸𑀢𑀭𑀁 𑀧𑀺𑀢𑀭𑀜𑁆𑀘𑀸𑀧𑀺, 𑀚𑀺𑀡𑁆𑀡𑀓𑀁 𑀕𑀢𑀬𑁄𑀩𑁆𑀩𑀦𑀁;

𑀧𑀳𑀽 𑀲𑀦𑁆𑀢𑁄 [𑀲𑀦𑁆𑀢𑀸 (𑀲𑀻.)] 𑀦 𑀪𑀭𑀦𑁆𑀢𑀺, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀺.

𑁬𑁮. 𑀫𑀸𑀢𑀭𑀁 𑀧𑀺𑀢𑀭𑀜𑁆𑀘𑀸𑀧𑀺, 𑀚𑀺𑀡𑁆𑀡𑀓𑀁 𑀕𑀢𑀬𑁄𑀩𑁆𑀩𑀦𑀁;

𑀩𑀸𑀮𑀸 𑀢𑀼𑀫𑁆𑀳𑁂𑀢𑀺 𑀯𑀓𑁆𑀔𑀦𑁆𑀢𑀺, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀺.

𑁬𑁯. 𑀆𑀘𑀭𑀺𑀬𑀪𑀭𑀺𑀬𑀁 𑀲𑀔𑀺𑀁 [𑀆𑀘𑀭𑀺𑀬𑀪𑀭𑀺𑀬𑀁 𑀲𑀔𑀸𑀪𑀭𑀺𑀬𑀁 (𑀲𑀻. 𑀧𑀻.)], 𑀫𑀸𑀢𑀼𑀮𑀸𑀦𑀺𑀁 𑀧𑀺𑀢𑀼𑀘𑁆𑀙𑀓𑀺𑀁 [𑀧𑀺𑀢𑀼𑀘𑁆𑀙𑀬𑀁 (𑀲𑀻.), 𑀧𑀺𑀢𑀼𑀘𑁆𑀙𑀲𑀁 (𑀧𑀻.)];

𑀬𑀤𑀸 𑀮𑁄𑀓𑁂 𑀕𑀫𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀺.

𑁭𑁦. 𑀅𑀲𑀺𑀘𑀫𑁆𑀫𑀁 𑀕𑀳𑁂𑀢𑁆𑀯𑀸𑀦, 𑀔𑀕𑁆𑀕𑀁 𑀧𑀕𑁆𑀕𑀬𑁆𑀳 𑀩𑁆𑀭𑀸𑀳𑁆𑀫𑀡𑀸;

𑀧𑀦𑁆𑀣𑀖𑀸𑀢𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀺.

𑁭𑁧. 𑀲𑀼𑀓𑁆𑀓𑀘𑁆𑀙𑀯𑀻 𑀯𑁂𑀥𑀯𑁂𑀭𑀸, 𑀣𑀽𑀮𑀩𑀸𑀳𑀽 𑀅𑀧𑀸𑀢𑀼𑀪𑀸;

𑀫𑀺𑀢𑁆𑀢𑀪𑁂𑀤𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀺.

𑁭𑁨. 𑀫𑀸𑀬𑀸𑀯𑀺𑀦𑁄 𑀦𑁂𑀓𑀢𑀺𑀓𑀸, 𑀅𑀲𑀧𑁆𑀧𑀼𑀭𑀺𑀲𑀘𑀺𑀦𑁆𑀢𑀓𑀸;

𑀬𑀤𑀸 𑀮𑁄𑀓𑁂 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀓𑀡𑁆𑀳𑁄 𑀧𑀫𑁄𑀓𑁆𑀔𑀢𑀻𑀢𑀺.

𑀫𑀳𑀸𑀓𑀡𑁆𑀳𑀚𑀸𑀢𑀓𑀁 𑀙𑀝𑁆𑀞𑀁.