𑁪𑁬𑁩. 𑀲𑀼𑀧𑁆𑀧𑀸𑀭𑀓𑀚𑀸𑀢𑀓𑀁 (𑁯)

𑁧𑁦𑁮. 𑀉𑀫𑁆𑀫𑀼𑀚𑁆𑀚𑀦𑁆𑀢𑀺 𑀦𑀺𑀫𑀼𑀚𑁆𑀚𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀔𑀼𑀭𑀦𑀸𑀲𑀺𑀓𑀸;

𑀲𑀼𑀧𑁆𑀧𑀸𑀭𑀓𑀁 𑀢𑀁 𑀧𑀼𑀘𑁆𑀙𑀸𑀫, 𑀲𑀫𑀼𑀤𑁆𑀤𑁄 𑀓𑀢𑀫𑁄 𑀅𑀬𑀁.

𑁧𑁦𑁯. 𑀓𑀼𑀭𑀼𑀓𑀘𑁆𑀙𑀸 [𑀪𑀭𑀼𑀓𑀘𑁆𑀙𑀸 (𑀲𑀻. 𑀲𑁆𑀬𑀸. 𑀧𑀻. 𑀅𑀝𑁆𑀞.)] 𑀧𑀬𑀸𑀢𑀸𑀦𑀁, 𑀯𑀸𑀡𑀺𑀚𑀸𑀦𑀁 𑀥𑀦𑁂𑀲𑀺𑀦𑀁;

𑀦𑀸𑀯𑀸𑀬 𑀯𑀺𑀧𑁆𑀧𑀦𑀝𑁆𑀞𑀸𑀬, 𑀔𑀼𑀭𑀫𑀸𑀮𑀻𑀢𑀺 𑀯𑀼𑀘𑁆𑀘𑀢𑀺.

𑁧𑁧𑁦. 𑀬𑀣𑀸 𑀅𑀕𑁆𑀕𑀻𑀯 𑀲𑀼𑀭𑀺𑀬𑁄𑀯 [𑀅𑀕𑁆𑀕𑀺 𑀲𑀼𑀭𑀺𑀬𑁄 𑀘 (𑀲𑁆𑀬𑀸.), 𑀅𑀕𑁆𑀕𑀻𑀯 𑀲𑀽𑀭𑀺𑀬𑁄 (𑀓.)], 𑀲𑀫𑀼𑀤𑁆𑀤𑁄 𑀧𑀝𑀺𑀤𑀺𑀲𑁆𑀲𑀢𑀺;

𑀲𑀼𑀧𑁆𑀧𑀸𑀭𑀓𑀁 𑀢𑀁 𑀧𑀼𑀘𑁆𑀙𑀸𑀫, 𑀲𑀫𑀼𑀤𑁆𑀤𑁄 𑀓𑀢𑀫𑁄 𑀅𑀬𑀁.

𑁧𑁧𑁧. 𑀓𑀼𑀭𑀼𑀓𑀘𑁆𑀙𑀸 𑀧𑀬𑀸𑀢𑀸𑀦𑀁, 𑀯𑀸𑀡𑀺𑀚𑀸𑀦𑀁 𑀥𑀦𑁂𑀲𑀺𑀦𑀁;

𑀦𑀸𑀯𑀸𑀬 𑀯𑀺𑀧𑁆𑀧𑀦𑀝𑁆𑀞𑀸𑀬, 𑀅𑀕𑁆𑀕𑀺𑀫𑀸𑀮𑀻𑀢𑀺 𑀯𑀼𑀘𑁆𑀘𑀢𑀺.

𑁧𑁧𑁨. 𑀬𑀣𑀸 𑀤𑀥𑀻𑀯 𑀔𑀻𑀭𑀁𑀯 [𑀤𑀥𑀺 𑀘 𑀔𑀻𑀭𑀁 𑀘 (𑀲𑁆𑀬𑀸.), 𑀏𑀯𑀫𑀼𑀧𑀭𑀺𑀧𑀺], 𑀲𑀫𑀼𑀤𑁆𑀤𑁄 𑀧𑀝𑀺𑀤𑀺𑀲𑁆𑀲𑀢𑀺;

𑀲𑀼𑀧𑁆𑀧𑀸𑀭𑀓𑀁 𑀢𑀁 𑀧𑀼𑀘𑁆𑀙𑀸𑀫, 𑀲𑀫𑀼𑀤𑁆𑀤𑁄 𑀓𑀢𑀫𑁄 𑀅𑀬𑀁.

𑁧𑁧𑁩. 𑀓𑀼𑀭𑀼𑀓𑀘𑁆𑀙𑀸 𑀧𑀬𑀸𑀢𑀸𑀦𑀁, 𑀯𑀸𑀡𑀺𑀚𑀸𑀦𑀁 𑀥𑀦𑁂𑀲𑀺𑀦𑀁;

𑀦𑀸𑀯𑀸𑀬 𑀯𑀺𑀧𑁆𑀧𑀦𑀝𑁆𑀞𑀸𑀬, 𑀤𑀥𑀺𑀫𑀸𑀮𑀻𑀢𑀺 [𑀔𑀻𑀭𑀫𑀸𑀮𑀻𑀢𑀺 (𑀓.)] 𑀯𑀼𑀘𑁆𑀘𑀢𑀺.

𑁧𑁧𑁪. 𑀬𑀣𑀸 𑀓𑀼𑀲𑁄𑀯 𑀲𑀲𑁆𑀲𑁄𑀯, 𑀲𑀫𑀼𑀤𑁆𑀤𑁄 𑀧𑀝𑀺𑀤𑀺𑀲𑁆𑀲𑀢𑀺;

𑀲𑀼𑀧𑁆𑀧𑀸𑀭𑀓𑀁 𑀢𑀁 𑀧𑀼𑀘𑁆𑀙𑀸𑀫, 𑀲𑀫𑀼𑀤𑁆𑀤𑁄 𑀓𑀢𑀫𑁄 𑀅𑀬𑀁.

𑁧𑁧𑁫. 𑀓𑀼𑀭𑀼𑀓𑀘𑁆𑀙𑀸 𑀧𑀬𑀸𑀢𑀸𑀦𑀁, 𑀯𑀸𑀡𑀺𑀚𑀸𑀦𑀁 𑀥𑀦𑁂𑀲𑀺𑀦𑀁;

𑀦𑀸𑀯𑀸𑀬 𑀯𑀺𑀧𑁆𑀧𑀦𑀝𑁆𑀞𑀸𑀬, 𑀓𑀼𑀲𑀫𑀸𑀮𑀻𑀢𑀺 𑀯𑀼𑀘𑁆𑀘𑀢𑀺.

𑁧𑁧𑁬. 𑀬𑀣𑀸 𑀦𑀴𑁄𑀯 𑀯𑁂𑀴𑀽𑀯, 𑀲𑀫𑀼𑀤𑁆𑀤𑁄 𑀧𑀝𑀺𑀤𑀺𑀲𑁆𑀲𑀢𑀺;

𑀲𑀼𑀧𑁆𑀧𑀸𑀭𑀓𑀁 𑀢𑀁 𑀧𑀼𑀘𑁆𑀙𑀸𑀫, 𑀲𑀫𑀼𑀤𑁆𑀤𑁄 𑀓𑀢𑀫𑁄 𑀅𑀬𑀁.

𑁧𑁧𑁭. 𑀓𑀼𑀭𑀼𑀓𑀘𑁆𑀙𑀸 𑀧𑀬𑀸𑀢𑀸𑀦𑀁, 𑀯𑀸𑀡𑀺𑀚𑀸𑀦𑀁 𑀥𑀦𑁂𑀲𑀺𑀦𑀁;

𑀦𑀸𑀯𑀸𑀬 𑀯𑀺𑀧𑁆𑀧𑀦𑀝𑁆𑀞𑀸𑀬, 𑀦𑀴𑀫𑀸𑀮𑀻𑀢𑀺 𑀯𑀼𑀘𑁆𑀘𑀢𑀺.

𑁧𑁧𑁮. 𑀫𑀳𑀩𑁆𑀪𑀬𑁄 𑀪𑀺𑀁𑀲𑀦𑀓𑁄, 𑀲𑀤𑁆𑀤𑁄 𑀲𑀼𑀬𑁆𑀬𑀢𑀺𑀫𑀸𑀦𑀼𑀲𑁄 [𑀲𑀫𑀼𑀤𑁆𑀤𑁄 𑀲𑀼𑀬𑁆𑀬𑀢’𑀫𑀸𑀦𑀼𑀲𑁄 (𑀲𑀻. 𑀧𑀻. 𑀅𑀝𑁆𑀞.)];

𑀬𑀣𑀸 𑀲𑁄𑀩𑁆𑀪𑁄 𑀧𑀧𑀸𑀢𑁄𑀯, 𑀲𑀫𑀼𑀤𑁆𑀤𑁄 𑀧𑀝𑀺𑀤𑀺𑀲𑁆𑀲𑀢𑀺;

𑀲𑀼𑀧𑁆𑀧𑀸𑀭𑀓𑀁 𑀢𑀁 𑀧𑀼𑀘𑁆𑀙𑀸𑀫, 𑀲𑀫𑀼𑀤𑁆𑀤𑁄 𑀓𑀢𑀫𑁄 𑀅𑀬𑀁.

𑁧𑁧𑁯. 𑀓𑀼𑀭𑀼𑀓𑀘𑁆𑀙𑀸 𑀧𑀬𑀸𑀢𑀸𑀦𑀁, 𑀯𑀸𑀡𑀺𑀚𑀸𑀦𑀁 𑀥𑀦𑁂𑀲𑀺𑀦𑀁;

𑀦𑀸𑀯𑀸𑀬 𑀯𑀺𑀧𑁆𑀧𑀦𑀝𑁆𑀞𑀸𑀬, 𑀩𑀴𑀯𑀸𑀫𑀼𑀔𑀻𑀢𑀺 [𑀯𑀴𑀪𑀸𑀫𑀼𑀔𑀻𑀢𑀺 (𑀲𑀻. 𑀲𑁆𑀬𑀸.), 𑀩𑀮𑀯𑀸𑀫𑀼𑀔𑀻𑀢𑀺 (𑀲𑁆𑀬𑀸. 𑀓.)] 𑀯𑀼𑀘𑁆𑀘𑀢𑀺.

𑁧𑁨𑁦. 𑀬𑀢𑁄 𑀲𑀭𑀸𑀫𑀺 𑀅𑀢𑁆𑀢𑀸𑀦𑀁, 𑀬𑀢𑁄 𑀧𑀢𑁆𑀢𑁄𑀲𑁆𑀫𑀺 𑀯𑀺𑀜𑁆𑀜𑀼𑀢𑀁;

𑀦𑀸𑀪𑀺𑀚𑀸𑀦𑀸𑀫𑀺 𑀲𑀜𑁆𑀘𑀺𑀘𑁆𑀘, 𑀏𑀓𑀧𑀸𑀡𑀫𑁆𑀧𑀺 𑀳𑀺𑀁𑀲𑀺𑀢𑀁;

𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀲𑁄𑀢𑁆𑀣𑀺𑀁 𑀦𑀸𑀯𑀸 𑀦𑀺𑀯𑀢𑁆𑀢𑀢𑀽𑀢𑀺.

𑀲𑀼𑀧𑁆𑀧𑀸𑀭𑀓𑀚𑀸𑀢𑀓𑀁 𑀦𑀯𑀫𑀁.

𑀏𑀓𑀸𑀤𑀲𑀓𑀦𑀺𑀧𑀸𑀢𑀁 𑀦𑀺𑀝𑁆𑀞𑀺𑀢𑀁.