𑁪𑁬𑁨. 𑀲𑀁𑀯𑀭𑀚𑀸𑀢𑀓𑀁 (𑁮)

𑁯𑁭. 𑀚𑀸𑀦𑀦𑁆𑀢𑁄 𑀦𑁄 𑀫𑀳𑀸𑀭𑀸𑀚, 𑀢𑀯 𑀲𑀻𑀮𑀁 𑀚𑀦𑀸𑀥𑀺𑀧𑁄;

𑀇𑀫𑁂 𑀓𑀼𑀫𑀸𑀭𑁂 𑀧𑀽𑀚𑁂𑀦𑁆𑀢𑁄, 𑀦 𑀢𑀁 𑀓𑁂𑀦𑀘𑀺 𑀫𑀜𑁆𑀜𑀣.

𑁯𑁮. 𑀢𑀺𑀝𑁆𑀞𑀦𑁆𑀢𑁂 𑀦𑁄 𑀫𑀳𑀸𑀭𑀸𑀚𑁂, 𑀅𑀤𑀼 [𑀆𑀤𑀼 (𑀲𑀻. 𑀧𑀻.), 𑀆𑀤𑀽 (𑀲𑁆𑀬𑀸.)] 𑀤𑁂𑀯𑁂 𑀤𑀺𑀯𑀗𑁆𑀕𑀢𑁂;

𑀜𑀸𑀢𑀻 𑀢𑀁 𑀲𑀫𑀦𑀼𑀜𑁆𑀜𑀺𑀁𑀲𑀼, 𑀲𑀫𑁆𑀧𑀲𑁆𑀲𑀁 𑀅𑀢𑁆𑀣𑀫𑀢𑁆𑀢𑀦𑁄.

𑁯𑁯. 𑀓𑁂𑀦 𑀲𑀁𑀯𑀭𑀯𑀢𑁆𑀢𑁂𑀦, 𑀲𑀜𑁆𑀚𑀸𑀢𑁂 𑀅𑀪𑀺𑀢𑀺𑀝𑁆𑀞𑀲𑀺;

𑀓𑁂𑀦 𑀢𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀺, 𑀜𑀸𑀢𑀺𑀲𑀗𑁆𑀖𑀸 𑀲𑀫𑀸𑀕𑀢𑀸.

𑁧𑁦𑁦. 𑀦 𑀭𑀸𑀚𑀧𑀼𑀢𑁆𑀢 𑀉𑀲𑀽𑀬𑀸𑀫𑀺 [𑀭𑀸𑀚𑀧𑀼𑀢𑁆𑀢 𑀦𑀼𑀲𑁆𑀲𑀼𑀬𑁆𑀬𑀸𑀫𑀺 (𑀓.)], 𑀲𑀫𑀡𑀸𑀦𑀁 𑀫𑀳𑁂𑀲𑀺𑀦𑀁;

𑀲𑀓𑁆𑀓𑀘𑁆𑀘𑀁 𑀢𑁂 𑀦𑀫𑀲𑁆𑀲𑀸𑀫𑀺, 𑀧𑀸𑀤𑁂 𑀯𑀦𑁆𑀤𑀸𑀫𑀺 𑀢𑀸𑀤𑀺𑀦𑀁.

𑁧𑁦𑁧. 𑀢𑁂 𑀫𑀁 𑀥𑀫𑁆𑀫𑀕𑀼𑀡𑁂 𑀬𑀼𑀢𑁆𑀢𑀁, 𑀲𑀼𑀲𑁆𑀲𑀽𑀲𑀫𑀦𑀼𑀲𑀽𑀬𑀓𑀁;

𑀲𑀫𑀡𑀸 𑀫𑀦𑀼𑀲𑀸𑀲𑀦𑁆𑀢𑀺 [𑀲𑀫𑀦𑀼𑀲𑀸𑀲𑀦𑁆𑀢𑀺 (𑀲𑀻. 𑀲𑁆𑀬𑀸. 𑀧𑀻.)], 𑀇𑀲𑀻 𑀥𑀫𑁆𑀫𑀕𑀼𑀡𑁂 𑀭𑀢𑀸.

𑁧𑁦𑁨. 𑀢𑁂𑀲𑀸𑀳𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀲𑀫𑀡𑀸𑀦𑀁 𑀫𑀳𑁂𑀲𑀺𑀦𑀁;

𑀦 𑀓𑀺𑀜𑁆𑀘𑀺 𑀅𑀢𑀺𑀫𑀜𑁆𑀜𑀸𑀫𑀺, 𑀥𑀫𑁆𑀫𑁂 𑀫𑁂 𑀦𑀺𑀭𑀢𑁄 𑀫𑀦𑁄.

𑁧𑁦𑁩. 𑀳𑀢𑁆𑀣𑀸𑀭𑁄𑀳𑀸 𑀅𑀦𑀻𑀓𑀝𑁆𑀞𑀸, 𑀭𑀣𑀺𑀓𑀸 𑀧𑀢𑁆𑀢𑀺𑀓𑀸𑀭𑀓𑀸;

𑀢𑁂𑀲𑀁 [𑀢𑁂𑀲𑀼 (𑀧𑀻.)] 𑀦𑀧𑁆𑀧𑀝𑀺𑀩𑀦𑁆𑀥𑀸𑀫𑀺, 𑀦𑀺𑀯𑀺𑀝𑁆𑀞𑀁 [𑀦𑀺𑀩𑀤𑁆𑀥𑀁 (𑀲𑀻. 𑀧𑀻.)] 𑀪𑀢𑁆𑀢𑀯𑁂𑀢𑀦𑀁.

𑁧𑁦𑁪. 𑀫𑀳𑀸𑀫𑀢𑁆𑀢𑀸 𑀘 𑀫𑁂 𑀅𑀢𑁆𑀣𑀺, 𑀫𑀦𑁆𑀢𑀺𑀦𑁄 𑀧𑀭𑀺𑀘𑀸𑀭𑀓𑀸;

𑀩𑀸𑀭𑀸𑀡𑀲𑀺𑀁 𑀯𑁄𑀳𑀭𑀦𑁆𑀢𑀺, 𑀩𑀳𑀼𑀫𑀁𑀲𑀲𑀼𑀭𑁄𑀤𑀓𑀁.

𑁧𑁦𑁫. 𑀅𑀣𑁄𑀧𑀺 𑀯𑀸𑀡𑀺𑀚𑀸 𑀨𑀻𑀢𑀸, 𑀦𑀸𑀦𑀸𑀭𑀝𑁆𑀞𑁂𑀳𑀺 𑀆𑀕𑀢𑀸;

𑀢𑁂𑀲𑀼 𑀫𑁂 𑀯𑀺𑀳𑀺𑀢𑀸 𑀭𑀓𑁆𑀔𑀸, 𑀏𑀯𑀁 𑀚𑀸𑀦𑀸𑀳𑀼𑀧𑁄𑀲𑀣.

𑁧𑁦𑁬. 𑀥𑀫𑁆𑀫𑁂𑀦 𑀓𑀺𑀭 𑀜𑀸𑀢𑀻𑀦𑀁, 𑀭𑀚𑁆𑀚𑀁 𑀓𑀸𑀭𑁂𑀳𑀺 𑀲𑀁𑀯𑀭;

𑀫𑁂𑀥𑀸𑀯𑀻 𑀧𑀡𑁆𑀟𑀺𑀢𑁄 𑀘𑀸𑀲𑀺 [𑀘𑀸𑀧𑀺 (𑀲𑀻. 𑀧𑀻.)], 𑀅𑀣𑁄𑀧𑀺 𑀜𑀸𑀢𑀺𑀦𑀁 𑀳𑀺𑀢𑁄.

𑁧𑁦𑁭. 𑀢𑀁 𑀢𑀁 𑀜𑀸𑀢𑀺𑀧𑀭𑀺𑀩𑁆𑀬𑀽𑀴𑁆𑀳𑀁, 𑀦𑀸𑀦𑀸𑀭𑀢𑀦𑀫𑁄𑀘𑀺𑀢𑀁;

𑀅𑀫𑀺𑀢𑁆𑀢𑀸 𑀦𑀧𑁆𑀧𑀲𑀳𑀦𑁆𑀢𑀺, 𑀇𑀦𑁆𑀤𑀁𑀯 𑀅𑀲𑀼𑀭𑀸𑀥𑀺𑀧𑁄𑀢𑀺.

𑀲𑀁𑀯𑀭𑀚𑀸𑀢𑀓𑀁 𑀅𑀝𑁆𑀞𑀫𑀁.