𑁪𑁬𑁧. 𑀤𑀲𑀭𑀣𑀚𑀸𑀢𑀓𑀁 (𑁭)

𑁮𑁪. 𑀏𑀣 𑀮𑀓𑁆𑀔𑀡 𑀲𑀻𑀢𑀸 𑀘, 𑀉𑀪𑁄 𑀑𑀢𑀭𑀣𑁄𑀤𑀓𑀁;

𑀏𑀯𑀸𑀬𑀁 𑀪𑀭𑀢𑁄 𑀆𑀳, ‘‘𑀭𑀸𑀚𑀸 𑀤𑀲𑀭𑀣𑁄 𑀫𑀢𑁄’’.

𑁮𑁫. 𑀓𑁂𑀦 𑀭𑀸𑀫𑀧𑁆𑀧𑀪𑀸𑀯𑁂𑀦, 𑀲𑁄𑀘𑀺𑀢𑀩𑁆𑀩𑀁 𑀦 𑀲𑁄𑀘𑀲𑀺;

𑀧𑀺𑀢𑀭𑀁 𑀓𑀸𑀮𑀓𑀢𑀁 [𑀓𑀸𑀮𑀗𑁆𑀓𑀢𑀁 (𑀓.)] 𑀲𑀼𑀢𑁆𑀯𑀸, 𑀦 𑀢𑀁 𑀧𑀲𑀳𑀢𑁂 𑀤𑀼𑀔𑀁.

𑁮𑁬. 𑀬𑀁 𑀦 𑀲𑀓𑁆𑀓𑀸 𑀦𑀺𑀧𑀸𑀮𑁂𑀢𑀼𑀁, 𑀧𑁄𑀲𑁂𑀦 𑀮𑀧𑀢𑀁 𑀩𑀳𑀼𑀁;

𑀲 𑀓𑀺𑀲𑁆𑀲 𑀯𑀺𑀜𑁆𑀜𑀽 𑀫𑁂𑀥𑀸𑀯𑀻, 𑀅𑀢𑁆𑀢𑀸𑀦𑀫𑀼𑀧𑀢𑀸𑀧𑀬𑁂.

𑁮𑁭. 𑀤𑀳𑀭𑀸 𑀘 𑀳𑀺 𑀯𑀼𑀤𑁆𑀥𑀸 𑀘 [𑀬𑁂 𑀯𑀼𑀤𑁆𑀥𑀸 (𑀲𑀻. 𑀅𑀝𑁆𑀞.), 𑀬𑁂 𑀯𑀼𑀟𑁆𑀠𑀸 (𑀲𑁆𑀬𑀸.)], 𑀬𑁂 𑀩𑀸𑀮𑀸 𑀬𑁂 𑀘 𑀧𑀡𑁆𑀟𑀺𑀢𑀸;

𑀅𑀟𑁆𑀠𑀸 𑀘𑁂𑀯 𑀤𑀮𑀺𑀤𑁆𑀤𑀸 𑀘, 𑀲𑀩𑁆𑀩𑁂 𑀫𑀘𑁆𑀘𑀼𑀧𑀭𑀸𑀬𑀡𑀸.

𑁮𑁮. 𑀨𑀮𑀸𑀦𑀫𑀺𑀯 𑀧𑀓𑁆𑀓𑀸𑀦𑀁, 𑀦𑀺𑀘𑁆𑀘𑀁 𑀧𑀢𑀦𑀢𑁄 𑀪𑀬𑀁;

𑀏𑀯𑀁 𑀚𑀸𑀢𑀸𑀦 𑀫𑀘𑁆𑀘𑀸𑀦𑀁, 𑀦𑀺𑀘𑁆𑀘 𑀫𑀭𑀡𑀢𑁄 𑀪𑀬𑀁.

𑁮𑁯. 𑀲𑀸𑀬𑀫𑁂𑀓𑁂 𑀦 𑀤𑀺𑀲𑁆𑀲𑀦𑁆𑀢𑀺, 𑀧𑀸𑀢𑁄 𑀤𑀺𑀝𑁆𑀞𑀸 𑀩𑀳𑀼𑀚𑁆𑀚𑀦𑀸;

𑀧𑀸𑀢𑁄 𑀏𑀓𑁂 𑀦 𑀤𑀺𑀲𑁆𑀲𑀦𑁆𑀢𑀺, 𑀲𑀸𑀬𑀁 𑀤𑀺𑀝𑁆𑀞𑀸 𑀩𑀳𑀼𑀚𑁆𑀚𑀦𑀸.

𑁯𑁦. 𑀧𑀭𑀺𑀤𑁂𑀯𑀬𑀫𑀸𑀦𑁄 𑀘𑁂, 𑀓𑀺𑀜𑁆𑀘𑀺𑀤𑀢𑁆𑀣𑀁 𑀉𑀤𑀩𑁆𑀩𑀳𑁂;

𑀲𑀫𑁆𑀫𑀽𑀴𑁆𑀳𑁄 𑀳𑀺𑀁𑀲𑀫𑀢𑁆𑀢𑀸𑀦𑀁, 𑀓𑀬𑀺𑀭𑀸 𑀢𑀁 𑀯𑀺𑀘𑀓𑁆𑀔𑀡𑁄.

𑁯𑁧. 𑀓𑀺𑀲𑁄 𑀯𑀺𑀯𑀡𑁆𑀡𑁄 𑀪𑀯𑀢𑀺, 𑀳𑀺𑀁𑀲𑀫𑀢𑁆𑀢𑀸𑀦𑀫𑀢𑁆𑀢𑀦𑁄 [𑀫𑀢𑁆𑀢𑀦𑀸 (𑀲𑀻. 𑀅𑀝𑁆𑀞. 𑀲𑀼. 𑀦𑀺. 𑁫𑁯𑁦)];

𑀦 𑀢𑁂𑀦 𑀧𑁂𑀢𑀸 𑀧𑀸𑀮𑁂𑀦𑁆𑀢𑀺, 𑀦𑀺𑀭𑀢𑁆𑀣𑀸 𑀧𑀭𑀺𑀤𑁂𑀯𑀦𑀸.

𑁯𑁨. 𑀬𑀣𑀸 𑀲𑀭𑀡𑀫𑀸𑀤𑀺𑀢𑁆𑀢𑀁, 𑀯𑀸𑀭𑀺𑀦𑀸 𑀧𑀭𑀺𑀦𑀺𑀩𑁆𑀩𑀬𑁂 [𑀯𑀸𑀭𑀺𑀦𑀸𑀯𑀦𑀺𑀩𑁆𑀩𑀸𑀧𑀬𑁂 (𑀲𑁆𑀬𑀸. 𑀓.)];

𑀏𑀯𑀫𑁆𑀧𑀺 𑀥𑀻𑀭𑁄 𑀲𑀼𑀢𑀯𑀸, 𑀫𑁂𑀥𑀸𑀯𑀻 𑀧𑀡𑁆𑀟𑀺𑀢𑁄 𑀦𑀭𑁄;

𑀔𑀺𑀧𑁆𑀧𑀫𑀼𑀧𑁆𑀧𑀢𑀺𑀢𑀁 𑀲𑁄𑀓𑀁, 𑀯𑀸𑀢𑁄 𑀢𑀽𑀮𑀁𑀯 𑀥𑀁𑀲𑀬𑁂.

𑁯𑁩. 𑀫𑀘𑁆𑀘𑁄 𑀏𑀓𑁄𑀯 [𑀏𑀓𑁄𑀯 𑀫𑀘𑁆𑀘𑁄 (𑀲𑀻. 𑀲𑁆𑀬𑀸. 𑀧𑀻.)] 𑀅𑀘𑁆𑀘𑁂𑀢𑀺, 𑀏𑀓𑁄𑀯 𑀚𑀸𑀬𑀢𑁂 𑀓𑀼𑀮𑁂;

𑀲𑀁𑀬𑁄𑀕𑀧𑀭𑀫𑀸𑀢𑁆𑀯𑁂𑀯, 𑀲𑀫𑁆𑀪𑁄𑀕𑀸 𑀲𑀩𑁆𑀩𑀧𑀸𑀡𑀺𑀦𑀁.

𑁯𑁪. 𑀢𑀲𑁆𑀫𑀸 𑀳𑀺 𑀥𑀻𑀭𑀲𑁆𑀲 𑀩𑀳𑀼𑀲𑁆𑀲𑀼𑀢𑀲𑁆𑀲, 𑀲𑀫𑁆𑀧𑀲𑁆𑀲𑀢𑁄 𑀮𑁄𑀓𑀫𑀺𑀫𑀁 𑀧𑀭𑀜𑁆𑀘;

𑀅𑀜𑁆𑀜𑀸𑀬 𑀥𑀫𑁆𑀫𑀁 𑀳𑀤𑀬𑀁 𑀫𑀦𑀜𑁆𑀘, 𑀲𑁄𑀓𑀸 𑀫𑀳𑀦𑁆𑀢𑀸𑀧𑀺 𑀦 𑀢𑀸𑀧𑀬𑀦𑁆𑀢𑀺.

𑁯𑁫. 𑀲𑁄𑀳𑀁 𑀤𑀲𑁆𑀲𑀜𑁆𑀘 𑀪𑁄𑀓𑁆𑀔𑀜𑁆𑀘, 𑀪𑀭𑀺𑀲𑁆𑀲𑀸𑀫𑀺 𑀘 [𑀲𑁄𑀳𑀁 𑀬𑀲𑀜𑁆𑀘 𑀪𑁄𑀕𑀜𑁆𑀘, 𑀪𑀭𑀺𑀬𑀸𑀧𑀺 𑀘 (𑀲𑁆𑀬𑀸. 𑀓.)] 𑀜𑀸𑀢𑀓𑁂;

𑀲𑁂𑀲𑀜𑁆𑀘 𑀧𑀸𑀮𑀬𑀺𑀲𑁆𑀲𑀸𑀫𑀺, 𑀓𑀺𑀘𑁆𑀘𑀫𑁂𑀢𑀁 [𑀓𑀺𑀘𑁆𑀘𑀫𑁂𑀯𑀁 (𑀧𑀻.)] 𑀯𑀺𑀚𑀸𑀦𑀢𑁄.

𑁯𑁬. 𑀤𑀲 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀲𑀝𑁆𑀞𑀺 𑀯𑀲𑁆𑀲𑀲𑀢𑀸𑀦𑀺 𑀘;

𑀓𑀫𑁆𑀩𑀼𑀕𑀻𑀯𑁄 𑀫𑀳𑀸𑀩𑀸𑀳𑀼, 𑀭𑀸𑀫𑁄 𑀭𑀚𑁆𑀚𑀫𑀓𑀸𑀭𑀬𑀻𑀢𑀺.

𑀤𑀲𑀭𑀣𑀚𑀸𑀢𑀓𑀁 𑀲𑀢𑁆𑀢𑀫𑀁.